តើអ្នកកំពុងតែស៊ូទ្រាំទេ?
១ «គ្មានសេចក្ដីណាដែលនាំឲ្យខ្ញុំអរសប្បាយ លើសជាងសេចក្ដីនេះទេ គឺដែល . . . ពួកកូនខ្ញុំកំពុងតែប្រព្រឹត្តតាមសេចក្ដីពិតនោះឯង»។ (យ៉ូហានទី៣ ៤) លោកយ៉ូហានបានមានអំណរជាច្រើនដោយដឹងថា កូនខាងវិញ្ញាណរបស់គាត់កំពុងតែស៊ូទ្រាំ។ ព្រះវរបិតារបស់យើងដែលគង់នៅស្ថានសួគ៌ប្រាកដជាមានព្រះទ័យរីករាយខ្លាំងណាស់ហ្ន៎! ពេលទ្រង់ទតឃើញមនុស្សរាប់លាននាក់ ដែលមានលទ្ធភាពទៅជាកូនរបស់ទ្រង់«កំពុងតែប្រព្រឹត្តតាមសេចក្ដីពិត»។—សុភាសិត ២៣:១៥, ១៦; ២៧:១១
២ ជាទូទៅ រាស្ត្ររបស់ព្រះកំពុងតែតស៊ូយ៉ាងខ្នះខ្នែងក្នុងសកម្មភាពគ្រីស្ទាន ក៏ប៉ុន្តែអ្នកខ្លះបានបន្ថយសកម្មភាពបន្ដិចម្ដងៗ។ ទោះបីអ្នកនោះប្រហែលជាបានមានសកម្មភាពច្រើន ពេលដែលគេទើបតែរៀនសេចក្ដីពិតក៏ដោយ ក្នុងឆ្នាំកន្លងទៅនេះ គេបានយកទម្លាប់ជាការរួមចំណែកតែបន្ដិចបន្តួចប៉ុណ្ណោះក្នុងកិច្ចការបញ្ចុះបញ្ចូលឲ្យមានសិស្ស។
៣ អ្នកខ្លះប្រហែលជាបានបន្ថយដោយហេតុដែលគួរឲ្យយោគយល់មួយ គឺថាបញ្ហាខាងរាងកាយនិងលទ្ធផលពីអាយុកាន់តែច្រើន។ ក៏ប៉ុន្តែ ពួកគេគឺគួរនឹងសរសើរដោយសារការស៊ូទ្រាំរបស់គេ។ គេកំពុងតែធ្វើអស់ពីសមត្ថភាពរបស់គេ។ ប៉ុន្តែ មនុស្សម្នាក់ៗដែលបានថ្វាយខ្លួនដល់ព្រះគួរសួរខ្លួនឯងថា៖ ‹តើខ្ញុំបានអនុញ្ញាតឲ្យខ្លួនចាប់ផ្ដើមគិតអំពីប្រយោជន៍ផ្ទាល់ខ្លួនដល់ម្ល៉េះបានជាប្រយោជន៍ខាងព្រះរាជាណាចក្របានទៅជាផ្នែកដ៏តូចប៉ុណ្ណោះនៃជីវិតខ្ញុំឬទេ? តើខ្ញុំបានទៅជា«ឧណ្ហៗ»ទៅ ឬក៏តើខ្ញុំនៅតែខំប្រឹង«យ៉ាងអស់ពីចិត្ត»?›។ (វិវរណៈ ៣:១៥, ១៦ ព្រះគម្ពីរភាសាខ្មែរសម្រាយ; លូកា ១៣:២៤) ចូរឲ្យយើងទាំងអស់គ្នារំពឹងគិតទាំងអធិស្ឋានអំពីអ្វីដែលយើងកំពុងតែប្រព្រឹត្ត និងធ្វើការកែលំអដ៏ជាចាំបាច់ ទាំងនឹកចាំពីការដែលព្រះយេហូវ៉ាសន្យាថា៖ «អស់អ្នកដែលប្រព្រឹត្តល្អ នោះនឹងបានសិរីល្អ កេរ្ដិ៍ឈ្មោះ នឹងសេចក្ដីសុខវិញ»។—រ៉ូម ២:១០
៤ របៀបស៊ូទ្រាំ: តើអ្វីដែលបានជួយព្រះយេស៊ូឲ្យស៊ូទ្រាំបាននោះ? ប៉ុលបានពន្យល់ថា៖ «ទ្រង់បានរងទ្រាំនៅ[បង្គោលទារុណកម្ម ព.ថ.] ទាំងមើលងាយចំពោះសេចក្ដីអាមាស់ខ្មាសនោះ ឲ្យតែបានសេចក្ដីអំណរដែលនៅចំពោះទ្រង់ រួចទ្រង់ក៏គង់ខាងស្ដាំបល្ល័ង្កនៃព្រះ»។ (ហេព្រើរ ១២:១-៣) អំណរដែលបាននៅចំពោះមុខទ្រង់នោះ គឺខ្លាំងជាងការល្បងលដ៏បណ្ដោះអាសន្នដែលទ្រង់ត្រូវប្រឈមនោះទៅទៀត។ ការរំពឹងគិតពីអំណរដែលនៅចំពោះមុខយើងក៏អាចជួយយើងឲ្យស៊ូទ្រាំបានដែរ។ (វិវរណៈ ២១:៤, ៧; ២២:១២) បើសិនជាយើងពឹងពាក់ព្រះយេហូវ៉ាសុំទ្រង់ឲ្យប្រទានកម្លាំងដល់យើង តាមរយៈការសិក្សាផ្ទាល់ខ្លួន ការទៅកិច្ចប្រជុំជាទៀងទាត់ និងការតស៊ូអធិស្ឋាន នោះយើងនឹងអាចតស៊ូក្នុងកិច្ចការដែលទ្រង់បានប្រគល់ឲ្យយើង។
៥ ព្រះយេហូវ៉ាមានអំណរដោយព្រោះការស៊ូទ្រាំរបស់អស់អ្នកដែលស្មោះត្រង់ចំពោះទ្រង់។ ដូច្នេះ ចូរឲ្យយើងជួយចំរើនអំណររបស់ទ្រង់ដោយការ«ប្រព្រឹត្តតាមសេចក្ដីពិត»ឥតឈប់ឈរ។