អត្ថបទសិក្សា ២៥

ចម្រៀងលេខ៩៦ សៀវភៅរបស់ព្រះជាសម្បត្តិវិសេស

មេរៀនយើងអាចរៀនពីទំនាយរបស់យ៉ាកុបពេលគាត់ជិតស្លាប់ ភាគទី២

«ឪពុកបានឲ្យពរតាមដែលពួកគេសមនឹងទទួល»។—ដក. ៤៩:២៨

ចំណុចផ្ដោត

មេរៀនដ៏សំខាន់ដែលយើងអាចរៀនពីទំនាយរបស់យ៉ាកុបពេលគាត់ជិតស្លាប់ដែលទាក់ទងនឹងសេប៊ូឡូន អ៊ីសាខារ ដាន់ កាដ អេស៊ើរ ណែបថាលី យ៉ូសែប និងបេនយ៉ាមីន។

១. តើយើងនឹងពិចារណាអ្វីក្នុងអត្ថបទនេះ?

ចម្លើយអ្នក

កូនប្រុសៗរបស់យ៉ាកុបបានមកជុំគ្នានៅជុំវិញគាត់ ហើយស្ដាប់យ៉ាងយកចិត្តទុកដាក់កាលដែលឪពុកជរារបស់ពួកគេឲ្យពរដល់ពួកគេម្នាក់ៗ។ ដូចយើងបានពិចារណានៅអត្ថបទមុន ពាក្យសម្ដីរបស់យ៉ាកុបទៅកាន់រូបេន ស៊ីម្មាន លេវី និងយូដា ធ្វើឲ្យពួកគេចាប់អារម្មណ៍ជាខ្លាំង ហើយប្រហែលជាថែមទាំងធ្វើឲ្យពួកគេភ្ញាក់ផ្អើលទៀតផង។ ដូច្នេះ ពួកគេច្បាស់ជាឆ្ងល់ថា តើយ៉ាកុបនឹងនិយាយអ្វីទៅកាន់កូនប្រុស៨នាក់ទៀតរបស់គាត់? សូមឲ្យយើងរកមើលមេរៀនដែលយើងអាចរៀនពីពាក្យរបស់យ៉ាកុបទៅកាន់សេប៊ូឡូន អ៊ីសាខារ ដាន់ កាដ អេស៊ើរ ណែបថាលី យ៉ូសែប និងបេនយ៉ាមីន។a

សេប៊ូឡូន

២. តើយ៉ាកុបបានប្រាប់អ្វីទៅសេប៊ូឡូន ហើយតើតាមរបៀបណាពាក្យទាំងនោះបានក្លាយទៅជាការពិត? (ដើមកំណើត ៤៩:១៣) (សូមមើលប្រអប់ផងដែរ)

ចម្លើយអ្នក

^២ សូមអាន ដើមកំណើត ៤៩:១៣។ យ៉ាកុបបង្ហាញថាកូនចៅរបស់សេប៊ូឡូននឹងរស់នៅតាមតំបន់ឆ្នេរសមុទ្រនៅភាគខាងជើងនៃស្រុកសន្យា។ ជាង២០០ឆ្នាំក្រោយមក កុលសម្ព័ន្ធសេប៊ូឡូនបានទទួលទឹកដីជាមត៌ក ដែលនៅរវាងសមុទ្រកាលីឡេ និងសមុទ្រមេឌីទែរ៉ានេ។ ទោះជាទឹកដីរបស់ពួកគេមិននៅជាប់នឹងឆ្នេរសមុទ្រក៏ដោយ ទឹកដីនោះគឺនៅជិតឆ្នេរសមុទ្រ។ ម៉ូសេបានប្រកាសទុកជាមុនថា៖ «ឱសេប៊ូឡូនអើយ! ចូរមានអំណរនឹងការធ្វើដំណើររបស់អ្នកទៅ»។ (បច. ៣៣:១៨) នេះប្រហែលជាសំដៅទៅលើភាពងាយស្រួលធ្វើដំណើររបស់កូនចៅសេប៊ូឡូនទៅកន្លែងពាណិជ្ជកម្ម ដោយសារពួកគេរស់នៅរវាងសមុទ្រទាំងពីរ។ ទោះជាយ៉ាងនោះក៏ដោយ កូនចៅរបស់សេប៊ូឡូនមានហេតុអរសប្បាយ។

ទំនាយរបស់យ៉ាកុបពេលគាត់ជិតស្លាប់

កូនប្រុស

សេប៊ូឡូន

ទំនាយ

«សេប៊ូឡូននឹងរស់នៅតាមតំបន់ឆ្នេរសមុទ្រ . . . ព្រំប្រទល់ទឹកដីគាត់លាតសន្ធឹងរហូតដល់ក្រុងស៊ីដូន»។—ដក. ៤៩:១៣

ការសម្រេចនៃទំនាយ

សេប៊ូឡូនរស់នៅភាគខាងជើង រវាងសមុទ្រកាលីឡេនិងសមុទ្រមេឌីទែរ៉ានេ។—យ៉ូស. ១៩:១០-១៦

៣. តើអ្វីអាចជួយយើងឲ្យស្កប់ចិត្ត?

ចម្លើយអ្នក

^៣ តើយើងអាចរៀនអ្វី? យើងមានហេតុអរសប្បាយ មិនថាយើងរស់នៅទីណា ឬស្ថិតក្នុងស្ថានភាពបែបណាក៏ដោយ។ ដើម្បីបន្តអរសប្បាយ យើងត្រូវស្កប់ចិត្តនឹងអ្វីដែលយើងមាន។ (ចសព. ១៦:៦; ២៤:៥) ជួនកាល យើងប្រហែលជាងាយស្រួលផ្ដោតអារម្មណ៍ទៅលើអ្វីដែលយើងមិនមាន ជាជាងលើអ្វីល្អៗដែលយើងមាន។ ដូច្នេះ សូមព្យាយាមនឹកចាំអំពីអ្វីល្អៗដែលអ្នកមាន ហើយអរសប្បាយក្នុងជីវិត។—កាឡ. ៦:៤

អ៊ីសាខារ

៤. តើយ៉ាកុបបានប្រាប់អ្វីទៅអ៊ីសាខារ ហើយតើតាមរបៀបណាពាក្យទាំងនោះបានក្លាយទៅជាការពិត? (ដើមកំណើត ៤៩:១៤, ១៥) (សូមមើលប្រអប់ផងដែរ)

ចម្លើយអ្នក

^៤ សូមអាន ដើមកំណើត ៤៩:១៤, ១៥។ យ៉ាកុបបានសរសើរអ៊ីសាខារចំពោះកិច្ចការនឿយហត់របស់គាត់ ដោយប្រដូចគាត់ទៅនឹងសត្វលាដ៏មាំ ជាសត្វមួយដែលអាចដឹកអីវ៉ាន់ធ្ងន់ៗបាន។ យ៉ាកុបក៏និយាយដែរថា អ៊ីសាខារនឹងទទួលទឹកដីដែលស្រួលរស់នៅ។ ស្របទៅតាមពាក្យសម្ដីរបស់យ៉ាកុប កូនចៅអ៊ីសាខារបានទទួលទឹកដីដែលសម្បូរភោគផលនិងស្រួលដាំដុះ ជាទឹកដីនៅក្បែរទន្លេយ៉ូដាន់។ (យ៉ូស. ១៩:២២) ពួកគេទំនងជាខំប្រឹងដាំដុះនិងថែទាំទឹកដីរបស់ពួកគេ តែពួកគេក៏ខំធ្វើកិច្ចការផ្សេងៗដើម្បីប្រយោជន៍អ្នកឯទៀតដែរ។ (១បស. ៤:៧, ១៧) ជាឧទាហរណ៍ កុលសម្ព័ន្ធអ៊ីសាខារប្រុងប្រៀបចូលរួមជាមួយនឹងជនជាតិអ៊ីស្រាអែលដើម្បីធ្វើចម្បាំង ដូចពួកគេបានធ្វើនៅសម័យបារ៉ាក់ដែលជាអ្នកសម្រេចក្ដីនិងដេបូរ៉ាជាអ្នកប្រកាសទំនាយ។—អសក. ៥:១៥

៥. ហេតុអ្វីយើងគួរខំព្យាយាមធ្វើការ?

ចម្លើយអ្នក

^៥ តើយើងអាចរៀនអ្វី? ដូចព្រះយេហូវ៉ាឲ្យតម្លៃចំពោះកិច្ចការនឿយហត់របស់កុលសម្ព័ន្ធអ៊ីសាខារ លោកក៏ឲ្យតម្លៃចំពោះកិច្ចការនឿយហត់របស់យើងក្នុងកិច្ចបម្រើលោកដែរ។ (អទ. ២:២៤) ជាឧទាហរណ៍ សូមគិតអំពីបងប្អូនប្រុសដែលខំប្រឹងថែរក្សាក្រុមជំនុំ។ (១ធី. ៣:១) បងប្អូនប្រុសទាំងនេះមិនចាំបាច់ធ្វើចម្បាំងដូចសម័យមុនទេ ប៉ុន្តែពួកគេត្រូវខំព្យាយាមដើម្បីការពាររាស្ត្ររបស់ព្រះពីអ្វីដែលអាចបង្ខូចចំណងមិត្តភាពជាមួយនឹងព្រះយេហូវ៉ា។ (១កូ. ៥:១, ៥; យូ. ១៧-២៣) បងប្អូនប្រុសទាំងនោះក៏ខំព្យាយាមដើម្បីរៀបចំនិងថ្លែងសុន្ទរកថាដ៏គួរឲ្យលើកទឹកចិត្តដែលនឹងពង្រឹងក្រុមជំនុំ។—១ធី. ៥:១៧

ដាន់

៦. តើកុលសម្ព័ន្ធដាន់ទទួលភារកិច្ចអ្វី? (ដើមកំណើត ៤៩:១៧, ១៨) (សូមមើលប្រអប់ផងដែរ)

ចម្លើយអ្នក

^៦ សូមអាន ដើមកំណើត ៤៩:១៧, ១៨។ យ៉ាកុបប្រដូចដាន់ទៅនឹងសត្វពស់ដែលចឹកសត្រូវដែលធំជាងខ្លួន ដូចជាសេះចម្បាំងនិងអ្នកជិះជាដើម។ កុលសម្ព័ន្ធដាន់មានចិត្តក្លាហាន ហើយប្រុងប្រៀបវាយប្រហារពួកសត្រូវរបស់ប្រជាជាតិអ៊ីស្រាអែល។ ក្នុងអំឡុងពេលធ្វើដំណើរទៅស្រុកសន្យា កុលសម្ព័ន្ធដាន់បានទទួលភារកិច្ច‹ការពារអ៊ីស្រាអែលពីខាងក្រោយ›។ (ជប. ១០:២៥) ទោះបីជាប្រជាជាតិអ៊ីស្រាអែលមិនអាចឃើញអ្វីទាំងអស់ដែលកុលសម្ព័ន្ធដាន់បានធ្វើនៅខាងក្រោយក៏ដោយ ភារកិច្ចរបស់ពួកគេគឺជាភារកិច្ចដែលសំខាន់។

៧. តើយើងគួរមានអារម្មណ៍យ៉ាងណាចំពោះភារកិច្ចណាក៏ដោយដែលយើងទទួលក្នុងកិច្ចបម្រើព្រះយេហូវ៉ា?

ចម្លើយអ្នក

^៧ តើយើងអាចរៀនអ្វី? តើអ្នកធ្លាប់បំពេញភារកិច្ចណាមួយដែលមើលទៅគ្មានអ្នកណាកត់សម្គាល់ឬទេ? អ្នកប្រហែលជាបានជួយសម្អាតនិងថែទាំសាលប្រជុំ បានស្ម័គ្រចិត្តធ្វើកិច្ចការនៅសន្និបាតឬមហាសន្និបាត ឬបំពេញភារកិច្ចឯទៀត។ បើដូច្នេះមែន យើងសូមសរសើរអ្នក! សូមចាំជានិច្ចថាព្រះយេហូវ៉ាកត់សម្គាល់និងឲ្យតម្លៃអ្វីទាំងអស់ដែលអ្នកធ្វើសម្រាប់លោក។ លោកពេញចិត្តជាខ្លាំង ពេលអ្នកបម្រើលោកដោយសារអ្នកចង់បង្ហាញសេចក្ដីស្រឡាញ់ដ៏ស្មោះចំពោះលោក មិនមែនដោយសារអ្នកចង់ទទួលការសរសើរពីអ្នកឯទៀតនោះទេ។—ម៉ាថ. ៦:១-៤

កាដ

៨. ហេតុអ្វីពួកសត្រូវរបស់ជនជាតិអ៊ីស្រាអែលងាយស្រួលវាយប្រហារកុលសម្ព័ន្ធកាដ? (ដើមកំណើត ៤៩:១៩) (សូមមើលប្រអប់ផងដែរ)

ចម្លើយអ្នក

^៨ សូមអាន ដើមកំណើត ៤៩:១៩។ យ៉ាកុបបានប្រាប់ទុកជាមុនថាកាដនឹងត្រូវក្រុមចោរវាយប្រហារ។ ជាងពីររយឆ្នាំក្រោយមក កុលសម្ព័ន្ធកាដបានទទួលទឹកដីនៅត្រើយខាងកើតទន្លេយ៉ូដាន់ដែលមានព្រំប្រទល់ជាប់នឹងទឹកដីរបស់ពួកសត្រូវ។ ទីតាំងនោះងាយឲ្យសត្រូវវាយប្រហារពួកគេ។ ប៉ុន្តែ កុលសម្ព័ន្ធកាដចង់រស់នៅទីនោះដោយសារមានវាលស្មៅសម្រាប់ហ្វូងសត្វរបស់ពួកគេ។ (ជប. ៣២:១, ៥) កុលសម្ព័ន្ធកាដទំនងជាមានចិត្តក្លាហាន។ លើសពីនេះទៅទៀត ពួកគេទុកចិត្តថាព្រះយេហូវ៉ានឹងជួយពួកគេឲ្យការពារទឹកដីដែលលោកបានឲ្យពួកគេ ពីការវាយប្រហាររបស់ក្រុមចោរ។ អស់ជាច្រើនឆ្នាំ ពួកគេថែមទាំងចាត់ពួកទាហានឲ្យទៅជួយកុលសម្ព័ន្ធឯទៀត ដើម្បីច្បាំងយកទឹកដីផ្សេងទៀតនៅស្រុកសន្យាដែលនៅត្រើយម្ខាងទន្លេយ៉ូដាន់។ (ជប. ៣២:១៦-១៩) ពួកគេទុកចិត្តថាព្រះយេហូវ៉ានឹងការពារប្រពន្ធនិងកូនរបស់ពួកគេ ទោះជាមិនមានពួកបុរសនៅជាមួយក៏ដោយ។ ព្រះយេហូវ៉ាបានឲ្យពរពួកគេចំពោះចិត្តក្លាហាននិងការលះបង់ប្រយោជន៍ខ្លួន។—យ៉ូស. ២២:១-៤

៩. តើទំនុកចិត្តរបស់យើងទៅលើព្រះយេហូវ៉ានឹងមានឥទ្ធិពលយ៉ាងណាទៅលើការសម្រេចចិត្តរបស់យើងក្នុងជីវិត?

ចម្លើយអ្នក

^៩ តើយើងអាចរៀនអ្វី? ដើម្បីបម្រើព្រះយេហូវ៉ាក្នុងគ្រាលំបាក យើងត្រូវបន្ដទុកចិត្តលោក។ (ចសព. ៣៧:៣) បងប្អូនជាច្រើននៅសព្វថ្ងៃនេះបង្ហាញថា ពួកគេទុកចិត្តព្រះយេហូវ៉ាដោយធ្វើការលះបង់ដើម្បីគាំទ្រកិច្ចការសាងសង់របស់អង្គការព្រះ បម្រើនៅកន្លែងដែលមានសេចក្ដីត្រូវការច្រើនជាង ឬបំពេញភារកិច្ចឯទៀត។ ពួកគេធ្វើដូច្នេះ ដោយសារពួកគេជឿជាក់ថាព្រះយេហូវ៉ានឹងតែងតែថែរក្សាពួកគេ។—ចសព. ២៣:១

អេស៊ើរ

១០. តើកុលសម្ព័ន្ធអេស៊ើរមិនបានធ្វើអ្វី? (ដើមកំណើត ៤៩:២០) (សូមមើលប្រអប់ផងដែរ)

ចម្លើយអ្នក

^១០ សូមអាន ដើមកំណើត ៤៩:២០។ យ៉ាកុបបានប្រាប់ទុកជាមុនថាកុលសម្ព័ន្ធអេស៊ើរនឹងក្លាយទៅជាកុលសម្ព័ន្ធដែលមានទ្រព្យសម្បត្តិហូរហៀរ ហើយនេះគឺជាអ្វីដែលបានកើតឡើង។ ទឹកដីដែលកុលសម្ព័ន្ធអេស៊ើរបានទទួលរួមបញ្ចូលទឹកដីដែលមានជីវជាតិក្នុងស្រុកអ៊ីស្រាអែល។ (បច. ៣៣:២៤) ទឹកដីនោះក៏នៅក្បែរសមុទ្រមេឌីទែរ៉ានេ ហើយរួមមានកំពង់ផែស៊ីដូនដែលជាកំពង់ផែអ្នកមាន។ ប៉ុន្តែ កុលសម្ព័ន្ធអេស៊ើរមិនបានបណ្ដេញជនជាតិកាណានចេញពីស្រុកទេ។ (អសក. ១:៣១, ៣២) ឥទ្ធិពលអាក្រក់ពីជនជាតិកាណានគួបផ្សំនឹងភាពមានបានរបស់កុលសម្ព័ន្ធអេស៊ើរ ប្រហែលជាបានធ្វើឲ្យពួកគេមិនសូវមានចិត្តខ្នះខ្នែងក្នុងការគោរពប្រណិប័តន៍ពិត។ ជាឧទាហរណ៍ ពេលបារ៉ាក់ដែលជាអ្នកសម្រេចក្ដីបានសុំជនជាតិអ៊ីស្រាអែលឲ្យជួយច្បាំងនឹងកងទ័ពកាណាន កុលសម្ព័ន្ធអេស៊ើរមិនបានជួយទេ។ ដូច្នេះ ពួកគេមិនបានឃើញអ្វីដ៏អស្ចារ្យដែលព្រះយេហូវ៉ាបានធ្វើដើម្បីជួយជនជាតិអ៊ីស្រាអែលឲ្យទទួលជ័យជម្នះនៅ«ក្បែរព្រែកមេគីដោ»ទេ។ (អសក. ៥:១៩-២១) កុលសម្ព័ន្ធអេស៊ើរច្បាស់ជាខ្មាស ពេលដែលឮបារ៉ាក់និងដេបូរ៉ាច្រៀងចម្រៀងជ័យជម្នះក្រោមការដឹកនាំរបស់ព្រះដែលរួមមានពាក្យថា៖ «កុលសម្ព័ន្ធអេស៊ើរអង្គុយមិនធ្វើអ្វីសោះនៅឆ្នេរសមុទ្រ»។—អសក. ៥:១៧

១១. ហេតុអ្វីយើងត្រូវរក្សាទស្សនៈត្រឹមត្រូវចំពោះទ្រព្យសម្បត្តិ?

ចម្លើយអ្នក

^១១ តើយើងអាចរៀនអ្វី? យើងចង់បម្រើព្រះយេហូវ៉ាឲ្យអស់ពីសមត្ថភាព។ ដើម្បីធ្វើដូច្នេះ យើងត្រូវប្រុងប្រយ័ត្នមិនធ្វើដូចមនុស្សក្នុងពិភពលោកនេះដែលគិតថា លុយនិងសម្ភារៈនិយមគឺសំខាន់បំផុតក្នុងជីវិត។ (សុភ. ១៨:១១) យើងព្យាយាមរក្សាតុល្យភាពស្ដីអំពីលុយកាក់។ (អទ. ៧:១២; ហេ. ១៣:៥) យើងមិនអនុញ្ញាតឲ្យការស្វែងរកវត្ថុទ្រព្យបំបែរអារម្មណ៍យើងពីការបម្រើព្រះទេ។ ផ្ទុយទៅវិញ យើងខំអស់ពីសមត្ថភាពដើម្បីព្រះយេហូវ៉ា។ យើងដឹងថាបើយើងរក្សាភាពស្មោះត្រង់ចំពោះព្រះយេហូវ៉ា លោកនឹងផ្ដល់រង្វាន់ឲ្យយើងជាជីវិតដ៏អស្ចារ្យនៅក្នុងពិភពលោកថ្មី។—ចសព. ៤:៨

ណែបថាលី

១២. តើពាក្យរបស់យ៉ាកុបទៅកាន់ណែបថាលីប្រហែលជាក្លាយទៅជាការពិតយ៉ាងដូចម្ដេច? (ដើមកំណើត ៤៩:២១) (សូមមើលប្រអប់ផងដែរ)

ចម្លើយអ្នក

^១២ សូមអាន ដើមកំណើត ៤៩:២១។ ពាក្យរបស់យ៉ាកុបអំពី‹សម្ដីពីរោះគួរឲ្យចង់ស្ដាប់› ប្រហែលជាសំដៅទៅលើរបៀបដែលលោកយេស៊ូនិយាយក្នុងអំឡុងកិច្ចបម្រើរបស់លោក។ លោកយេស៊ូដែលគេស្គាល់ថាជាអ្នកបង្រៀនដ៏ប៉ិនប្រសប់ បានធ្វើឲ្យក្រុងកាពើណិមដែលនៅក្នុងទឹកដីរបស់ណែបថាលី ទៅជា«ក្រុងរបស់លោក»។ (ម៉ាថ. ៤:១៣; ៩:១; យ៉ូន. ៧:៤៦) ស្ដីអំពីលោកយេស៊ូ អេសាយបានប្រកាសទុកជាមុនថា អ្នកដែលនៅទឹកដីសេប៊ូឡូន និងទឹកដីណែបថាលីនឹងឃើញ«ពន្លឺចិញ្ចាចចិញ្ចែង»។ (អេ. ៩:១, ២) តាមរយៈការបង្រៀនរបស់លោកយេស៊ូ លោកជា«ពន្លឺដ៏ពិតដែលបំភ្លឺមនុស្សគ្រប់ប្រភេទ»។—យ៉ូន. ១:៩

១៣. តើយើងអាចប្រាកដថាពាក្យសម្ដីរបស់យើងនាំឲ្យព្រះយេហូវ៉ាពេញចិត្តយ៉ាងដូចម្ដេច?

ចម្លើយអ្នក

^១៣ តើយើងអាចរៀនអ្វី? ពាក្យដែលយើងនិយាយ និងរបៀបដែលយើងនិយាយគឺសំខាន់ណាស់ចំពោះព្រះយេហូវ៉ា។ តើយើងអាចនិយាយ‹សម្ដីពីរោះគួរឲ្យចង់ស្ដាប់›ដែលនាំឲ្យព្រះយេហូវ៉ាពេញចិត្តយ៉ាងដូចម្ដេច? គឺយើងអាចនិយាយអ្វីដែលពិត។ (ចសព. ១៥:១, ២) យើងអាចលើកទឹកចិត្តអ្នកឯទៀតតាមរយៈពាក្យសម្ដីរបស់យើង ដោយឆាប់សរសើរ តែមិនឆាប់រិះគន់ឬត្អូញត្អែរ។ (អេភ. ៤:២៩) ម្យ៉ាងទៀត យើងអាចព្យាយាមមានភាពប៉ិនប្រសប់ក្នុងការចាប់ផ្ដើមការសន្ទនាជាមួយមនុស្ស ហើយក្រោយមកប្រាប់ពួកគេអំពីដំណឹងល្អ។

យ៉ូសែប

១៤. តើទំនាយអំពីយ៉ូសែបបានក្លាយទៅជាការពិតតាមរបៀបណា? (ដើមកំណើត ៤៩:២២, ២៦) (សូមមើលប្រអប់ផងដែរ)

ចម្លើយអ្នក

^១៤ សូមអាន ដើមកំណើត ៤៩:២២, ២៦។ យ៉ាកុបទំនងជាមានមោទនភាពយ៉ាងខ្លាំងចំពោះយ៉ូសែប។ យ៉ូសែប«ជាអ្នកដែលបានត្រូវជ្រើសរើសពីចំណោមបងប្អូនរបស់គាត់»។ យ៉ាកុបហៅគាត់ថា៖ «ជាមែកនៃដើមដែលសម្បូរផ្លែ»។ យ៉ាកុបផ្ទាល់ជាដើម ហើយយ៉ូសែបជាមែកដែលចេញពីដើមនោះ។ យ៉ូសែបគឺជាកូនច្បងរបស់រ៉ាជែលដែលជាប្រពន្ធជាទីស្រឡាញ់របស់យ៉ាកុប។ យ៉ាកុបបានបង្ហាញទុកជាមុនថា ដោយសាររូបេនជាកូនច្បងរបស់លេអាបានបាត់បង់សិទ្ធិទទួលមត៌កដែលជាចំណែករបស់កូនច្បង នោះយ៉ូសែបនឹងទទួលមត៌កនោះជំនួសរូបេនវិញ។ (ដក. ៤៨:៥, ៦; ១ប្រ. ៥:១, ២) ផ្នែកនេះក្នុងទំនាយរបស់យ៉ាកុបបានក្លាយទៅជាការពិត ពេលដែលកូនប្រុសពីរនាក់របស់យ៉ូសែប គឺអេប្រាអ៊ីមនិងម៉ាណាសេបានទៅជាកុលសម្ព័ន្ធពីរក្នុងប្រជាជាតិអ៊ីស្រាអែល ហើយកុលសម្ព័ន្ធទាំងពីរនោះបានទទួលទឹកដីជាមត៌ក។—ដក. ៤៩:២៥; យ៉ូស. ១៤:៤