តើសាក្សីព្រះយេហូវ៉ាប្រព្រឹត្តយ៉ាងណាចំពោះអ្នកដែលធ្លាប់កាន់សាសនារបស់ពួកគេ?
ជាសាក្សីព្រះយេហូវ៉ា យើងព្យាយាមប្រព្រឹត្តទៅលើមនុស្សគ្រប់រូបដោយសេចក្ដីស្រឡាញ់ សប្បុរស និងដោយគោរព។ ទោះជាសាក្សីព្រះយេហូវ៉ាម្នាក់បានបន្ថយសកម្មភាពបម្រើព្រះឬឈប់គោរពប្រណិប័តន៍ព្រះក្ដី យើងព្យាយាមទៅជួបគាត់a បង្ហាញសេចក្ដីស្រឡាញ់ដល់គាត់ និងខំជួយគាត់ឲ្យចូលទៅជិតព្រះម្ដងទៀត។—លូកា ១៥:៤-៧
ក្នុងករណីខ្លះ បុគ្គលម្នាក់ប្រហែលជាធ្វើអ្វីមួយដែលអាចនាំឲ្យគាត់ត្រូវដកចេញពីក្រុមជំនុំ។ (កូរិនថូសទី១ ៥:១៣) ប៉ុន្តែដោយសារយើងស្រឡាញ់បងប្អូនរួមជំនឿយ៉ាងជ្រាលជ្រៅ នោះយើងព្យាយាមជួយគាត់ដើម្បីកុំឲ្យគាត់ត្រូវដកចេញ។ សូម្បីតែគាត់បានត្រូវដកចេញហើយក្ដី យើងនៅតែបង្ហាញសេចក្ដីស្រឡាញ់និងគោរពគាត់តាមការលើកទឹកចិត្តពីគម្ពីរ។—ម៉ាកុស ១២:៣១; ពេត្រុសទី១ ២:១៧
តើទង្វើអ្វីខ្លះដែលបណ្ដាលឲ្យបុគ្គលម្នាក់ត្រូវដកចេញពីក្រុមជំនុំ?
គម្ពីរចែងចំៗថាបើគ្រិស្តសាសនិកម្នាក់ប្រព្រឹត្តអំពើខុសឆ្គងធ្ងន់ធ្ងរ ហើយមិនព្រមកែប្រែ គាត់គួរត្រូវដកចេញពីក្រុមជំនុំ។b (កូរិនថូសទី១ ៥:១១-១៣) គម្ពីរចែងអំពីអំពើខុសឆ្គងធ្ងន់ធ្ងរមួយចំនួនដែលអាចនាំឲ្យបុគ្គលម្នាក់ត្រូវដកចេញពីក្រុមជំនុំ។ ជាឧទាហរណ៍ អំពើទាំងនោះមានដូចជា ការផិតក្បត់ ការប្រមឹកស្រា ឃាតកម្ម អំពើហិង្សាក្នុងគ្រួសារ និងការលួចជាដើម។—កូរិនថូសទី១ ៦:៩, ១០; កាឡាទី ៥:១៩-២១; ធីម៉ូថេទី១ ១:៩, ១០
ទោះជាយ៉ាងនោះក៏ដោយ យើងមិនដកបុគ្គលដែលប្រព្រឹត្តអំពើខុសឆ្គងធ្ងន់ធ្ងរចេញពីក្រុមជំនុំភ្លាមៗទេ។ ដំបូង អ្នកចាស់ទុំក្នុងក្រុមជំនុំc ព្យាយាមជួយគាត់ឲ្យកែប្រែរបៀបរស់នៅ។ (រ៉ូម ២:៤) ពួកគេព្យាយាមជួយអ្នកដែលធ្វើខុស ដោយចិត្តសុភាព សប្បុរស និងស្លូតបូត។ (កាឡាទី ៦:១) ការប្រព្រឹត្តចំពោះគាត់បែបនេះ ប្រហែលជាអាចជំរុញចិត្តគាត់ឲ្យទទួលស្គាល់កំហុសខ្លួន ហើយប្រែចិត្ត។ (ធីម៉ូថេទី២ ២:២៤-២៦) ប៉ុន្តែ បើអ្នកចាស់ទុំខំជួយគាត់ហើយ តែគាត់នៅតែប្រព្រឹត្តទង្វើដែលបំពានខ្នាតតម្រាសីលធម៌ក្នុងគម្ពីរទៀត ហើយមិនព្រមកែប្រែទេ គាត់នឹងត្រូវដកចេញពីក្រុមជំនុំ។ អ្នកចាស់ទុំទំនងជាជូនដំណឹងដល់ក្រុមជំនុំថាបុគ្គលនោះលែងជាសាក្សីព្រះយេហូវ៉ាទៀតហើយ។
អ្នកចាស់ទុំព្យាយាមជួយអ្នកដែលធ្វើខុស ដោយចិត្តសុភាព សប្បុរស និងស្លូតបូត
តើការដកបុគ្គលដែលសម្រេចចិត្តប្រព្រឹត្តអំពើខុសឆ្គងចេញពីក្រុមជំនុំ មានលទ្ធផលល្អអ្វីខ្លះ? លទ្ធផលល្អមួយ គឺក្រុមជំនុំជួយរក្សាខ្នាតតម្រាសីលធម៌របស់ព្រះឲ្យនៅស្អាតស្អំ។ លទ្ធផលល្អមួយទៀត គឺការពារក្រុមជំនុំពីឥទ្ធិពលមិនល្អរបស់បុគ្គលនោះ។ (កូរិនថូសទី១ ៥:៦; ១៥:៣៣; ពេត្រុសទី១ ១:១៦) បន្ថែមទៅទៀត អាចជួយអ្នកដែលធ្វើខុសនោះឲ្យភ្ញាក់ខ្លួន ហើយព្យាយាមកែប្រែ។—ហេប្រឺ ១២:១១
តើសាក្សីព្រះយេហូវ៉ាប្រព្រឹត្តយ៉ាងណាចំពោះអ្នកដែលបានត្រូវដកចេញពីក្រុមជំនុំ?
គម្ពីរចែងថាគ្រិស្តសាសនិកគួរ«ឈប់ទាក់ទង»ជាមួយនឹងអ្នកដែលបានត្រូវដកចេញពីក្រុមជំនុំ ហើយ«កុំបរិភោគជាមួយនឹងមនុស្សបែបនោះដែរ»។ (កូរិនថូសទី១ ៥:១១) ដូច្នេះ យើងមិនត្រូវសេពគប់ជាមួយនឹងអ្នកដែលបានត្រូវដកចេញពីក្រុមជំនុំទេ។ ប៉ុន្តែ មិនបានន័យថាយើងលែងអើពើនឹងគាត់ឡើយ។ យើងប្រព្រឹត្តទៅលើគាត់ដោយគោរព។ ហើយយើងទទួលស្វាគមន៍គាត់ពេលគាត់ចូលរួមកិច្ចប្រជុំ។d គាត់ក៏អាចសុំជំនួយពីពួកអ្នកចាស់ទុំដើម្បីគាត់អាចត្រឡប់មកវិញដែរ។
អ្នកដែលបានត្រូវដកចេញពីក្រុមជំនុំបានទទួលស្វាគមន៍ឲ្យចូលរួមកិច្ចប្រជុំ
ចុះយ៉ាងណាទំនាក់ទំនងរបស់គាត់ជាមួយគូនិងកូនដែលនៅតែជាសាក្សីព្រះយេហូវ៉ា? ទោះជាគាត់លែងគោរពប្រណិប័តន៍ព្រះជាមួយក្រុមគ្រួសារក្ដី គាត់និងក្រុមគ្រួសារនៅតែមានទំនាក់ទំនងជាមួយគ្នា។ បើគាត់និងក្រុមគ្រួសាររស់នៅក្នុងផ្ទះតែមួយ ចំណងអាពាហ៍ពិពាហ៍និងមនោសញ្ចេតនាគ្រួសារនៅមានដូចធម្មតា ហើយពួកគេគួរបន្តប្រព្រឹត្តចំពោះគ្នាដោយសេចក្ដីស្រឡាញ់។
បុគ្គលដែលបានត្រូវដកចេញពីក្រុមជំនុំ អាចស្នើសុំអ្នកចាស់ទុំឲ្យមកលេងគាត់។ អ្នកចាស់ទុំនឹងជូនយោបល់ដែលប្រកបដោយសេចក្ដីស្រឡាញ់ពីគម្ពីរ ហើយលើកទឹកចិត្តគាត់ឲ្យប្រែចិត្ត និងត្រឡប់មកព្រះយេហូវ៉ាវិញ។ (សាការី ១:៣) បើគាត់ឈប់ប្រព្រឹត្តអាក្រក់ទៀត ហើយបង្ហាញចិត្តស្មោះដោយរស់នៅស្របតាមគោលការណ៍សីលធម៌គម្ពីរ គាត់បានត្រូវស្វាគមន៍ឲ្យចូលក្រុមជំនុំម្ដងទៀត។ ក្រុមជំនុំនឹង«អភ័យទោសឲ្យ . . . ហើយសម្រាលទុក្ខគាត់»ដូចគ្រិស្តសាសនិកនៅក្រុងកូរិនថូសបានធ្វើ ពេលអ្នកដែលធ្វើខុសនោះកែប្រែរបៀបរស់នៅរបស់គាត់។—កូរិនថូសទី២ ២:៦-៨
តើអ្នកដែលចូលក្នុងក្រុមជំនុំវិញមានអារម្មណ៍យ៉ាងណា?
សូមកត់សម្គាល់សម្ដីរបស់សាក្សីព្រះយេហូវ៉ាខ្លះដែលបានត្រូវដកចេញពីក្រុមជំនុំ ហើយបានត្រឡប់មករកព្រះវិញ។
ម៉ារៀនៅសហរដ្ឋអាម៉េរិក បានរៀបរាប់ថា៖«ពេលខ្ញុំសម្រេចចិត្តត្រឡប់មកក្រុមជំនុំវិញ ខ្ញុំបានគិតថាអ្នកចាស់ទុំច្បាស់ជាសួរនាំខ្ញុំអំពីអ្វីដែលខ្ញុំបានធ្វើតាំងពីខ្ញុំបានត្រូវដកចេញហើយ។ ប៉ុន្តែ ពួកគាត់គ្រាន់តែនិយាយថា៖‹សូមបងផ្ដោតអារម្មណ៍ទៅលើអ្វីដែលបងធ្វើនៅឥឡូវនេះ›។ ពេលឮពួកគាត់និយាយដូច្នោះ ខ្ញុំមានអារម្មណ៍ស្រួល ហើយធូរចិត្តណាស់»។
ម៉ាលខាំនៅប្រទេសសៀរ៉ាឡេអូន បានរៀបរាប់ថា៖«បងប្អូនក្នុងក្រុមជំនុំទន្ទឹងផ្លូវខ្ញុំត្រឡប់មកវិញ។ ពេលឃើញដូច្នោះខ្ញុំមានអារម្មណ៍ថាខ្លួនមានតម្លៃ។ លើសពីនោះទៅទៀត ពួកគាត់បានបង្ហាញភាពកក់ក្ដៅចំពោះខ្ញុំ ធ្វើឲ្យខ្ញុំមានអារម្មណ៍ថាព្រះយេហូវ៉ានិងក្រុមជំនុំបានអភ័យទោសឲ្យខ្ញុំហើយ។ អ្នកចាស់ទុំតែងតែជួយខ្ញុំពង្រឹងចំណងមិត្តភាពជាមួយព្រះយេហូវ៉ា។ ពួកគាត់បានសម្រាលទុក្ខនិងជួយខ្ញុំឲ្យឃើញថាព្រះយេហូវ៉ានៅតែឲ្យតម្លៃនិងស្រឡាញ់ខ្ញុំ»។
សាន់ឌីនៅសហរដ្ឋអាម៉េរិក បានរៀបរាប់ថា៖«ខ្ញុំសប្បាយណាស់ព្រោះព្រះយេហូវ៉ាស្រឡាញ់រាស្ត្រលោកខ្លាំង ហេតុនេះហើយលោកត្រូវរក្សាអង្គការលោកឲ្យស្អាតស្អំ។ អ្នកខ្លះប្រហែលជាគិតថាការរៀបចំដកអ្នកដែលធ្វើខុសចេញពីក្រុមជំនុំ មើលទៅតឹងរ៉ឹង តែនោះគឺចាំបាច់និងពិតជាការរៀបចំដែលប្រកបដោយសេចក្ដីស្រឡាញ់មែន។ ខ្ញុំដឹងគុណព្រះយេហូវ៉ាខ្លាំងណាស់ ដែលលោកជាបិតាដែលប្រកបដោយសេចក្ដីស្រឡាញ់និងបម្រុងតែអភ័យទោស»។
a ទោះជាបុគ្គលនេះមើលទៅសំដៅទៅភេទប្រុសក្ដី តែព័ត៌មានក្នុងអត្ថបទនេះទាក់ទងទាំងពីរភេទ។
b ពីមុន យើងធ្លាប់ហៅបុគ្គលដែលប្រព្រឹត្តអំពើខុសឆ្គងដែលមិនប្រែចិត្តថា អ្នកដែលបានត្រូវបណ្ដាច់មិត្តភាព។ ប៉ុន្តែ ឥឡូវយើងហៅគាត់ដូចពាក្យក្នុងគម្ពីរវិញ គឺយើងហៅបុគ្គលនោះថាអ្នកដែលបានត្រូវដកចេញពីក្រុមជំនុំ។
c អ្នកចាស់ទុំគឺជាគ្រិស្តសាសនិកដែលមានភាពស្មោះត្រង់និងមានបទពិសោធន៍។ ពួកគាត់បង្រៀនគម្ពីរ និងមើលថែរាស្ត្រព្រះយេហូវ៉ាដោយជួយនិងលើកទឹកចិត្តពួកគេ។ ពួកគាត់មិនទទួលប្រាក់ខែពីការបំពេញកិច្ចការនោះទេ។—ពេត្រុសទី១ ៥:១-៣
d ក្នុងករណីកម្រខ្លះ បុគ្គលម្នាក់ប្រហែលជាមិនគ្រាន់តែចេញពីក្រុមជំនុំទេ តែក៏ព្យាយាមធ្វើអ្វីដែលបង្ខូចដល់ក្រុមជំនុំដែរ ឬគាត់ប្រហែលជាថែមទាំងបញ្ចុះបញ្ចូលឲ្យអ្នកឯទៀតប្រព្រឹត្តអាក្រក់ទៀតផង។ បើមានករណីនេះមែន យើងធ្វើតាមបង្គាប់ក្នុងគម្ពីរមិន«ជម្រាបសួរ»បុគ្គលនោះឡើយ។—យ៉ូហានទី២ ៩-១១