តើសាក្សីព្រះយេហូវ៉ាកែគម្ពីរឲ្យស្របនឹងជំនឿរបស់ខ្លួនឬ?
អត់ទេ យើងមិនធ្វើដូច្នោះទេ។ ផ្ទុយទៅវិញ ពេលណាយើងរកឃើញថាជំនឿរបស់យើងមិនសូវស្របនឹងគម្ពីរ នោះយើងកែតម្រូវជំនឿរបស់យើងវិញ។
អស់រយៈពេលជាយូរមុនយើងបានបោះពុម្ពគម្ពីរបរិសុទ្ធសេចក្ដីបកប្រែពិភពលោកថ្មី ដែលបានចេញនៅឆ្នាំ១៩៥០ យើងបានពិនិត្យមើលគម្ពីរយ៉ាងយកចិត្តទុកដាក់។ យើងធ្លាប់ប្រើសេចក្ដីបកប្រែគម្ពីរផ្សេងៗ ហើយធ្វើកំណែទម្រង់ជំនឿរបស់យើងស្របទៅតាមអ្វីដែលចែងក្នុងគម្ពីរ។ សូមពិចារណាអំពីជំនឿខ្លះដែលសាក្សីព្រះយេហូវ៉ាបានជឿជាយូរមកហើយ ហើយពិនិត្យមើលដោយខ្លួនអ្នកផ្ទាល់ដើម្បីដឹងថា អ្វីដែលពួកគេជឿនោះ ស្របនឹងគម្ពីរឬមិនស្រប។ សូមពិចារណាឧទាហរណ៍ដូចតទៅ៖
១. អ្វីដែលយើងជឿ៖ ព្រះមិនមែនជាព្រះបីរួមជាព្រះតែមួយទេ។ នៅខែកក្កដា ឆ្នាំ១៨៨២ ទស្សនាវដ្ដីប៉មយាមនៃភ្នំស៊ីយ៉ូន បានរៀបរាប់ថា៖«អ្នកអានរបស់យើងដឹងថា យើងជឿលើព្រះយេហូវ៉ា ជឿលើលោកយេស៊ូ និងជឿថាមានឫទ្ធានុភាពបរិសុទ្ធ ហើយដំណាលគ្នានោះយើងមិនជឿអ្វីដែលមិនបានចែងក្នុងគម្ពីរទេ ដូចជាសេចក្ដីបង្រៀនដែលថាព្រះបីរួមគ្នាជាព្រះមួយ ឬបើនិយាយម្យ៉ាងទៀត ក្នុងព្រះមួយមានព្រះបី»។
● អ្វីដែលគម្ពីរចែង៖ «ព្រះយេហូវ៉ាជាព្រះនៃយើង គឺព្រះយេហូវ៉ាតែ១អង្គទ្រង់»។ (ការបំភ្លឺច្បាប់[ចោទិយកថា] ៦:៤, សមាគមគម្ពីរ) «គង់តែខាងយើង មានព្រះតែ១ប៉ុណ្ណោះ គឺជាព្រះវរបិតា ដែលរបស់សព្វសារពើកើតមកពីទ្រង់ ហើយយើងរាល់គ្នាក៏សំរាប់ទ្រង់ ក៏មានព្រះអម្ចាស់តែ១ គឺជាព្រះយេស៊ូវគ្រីស្ទ ដែលរបស់សព្វសារពើកើតមកដោយសារទ្រង់ ហើយយើងក៏ដោយសារទ្រង់ដែរ»។ (កូរិនថូសទី១ ៨:៦, សមាគមគម្ពីរ) លោកយេស៊ូផ្ទាល់បានមានប្រសាសន៍ថា៖«ដ្បិតព្រះបិតាមានឋានៈធំជាងខ្ញុំ»។—យ៉ូហាន ១៤:២៨, ព្រះគម្ពីរភាសាខ្មែរសម្រាយ
២. អ្វីដែលយើងជឿ៖ គ្មានការធ្វើទារុណកម្មជារៀងរហូតនៅក្នុងស្ថាននរកទេ។ ការដកស្រង់ពីរ៉ូម ៦:២៣ ពីអត្ថបទទស្សនាវដ្ដីប៉មយាមនៃភ្នំស៊ីយ៉ូន ចេញនៅខែមិថុនា ឆ្នាំ១៨៨២ ដែលមានចំណងជើងថា«ប្រាក់ឈ្នួលដែលភាពខុសឆ្គងបើកឲ្យ គឺជាសេចក្ដីស្លាប់» អត្ថបទនេះរៀបរាប់ថា៖«ពាក្យនេះចំៗ ហើយស្រួលយល់ណាស់។ គួរឲ្យភ្ញាក់ផ្អើលណាស់ មនុស្សជាច្រើនបានអះអាងថាគម្ពីរជាបណ្ដាំព្រះ តែពួកគេបែរជាជឿផ្ទុយពីខគម្ពីរនេះទៅវិញ ដោយអះអាងថាអ្វីដែលពួកគេជឿនោះជាសេចក្ដីបង្រៀនពីគម្ពីរ គឺថាប្រាក់ឈ្នួលដែលភាពខុសឆ្គង(ឬអំពើបាប)បើកឲ្យជាការរងទារុណកម្មជារៀងរហូតទៅវិញ»។
● អ្វីដែលគម្ពីរចែង៖ «អ្នកណាប្រព្រឹត្តអំពើបាប អ្នកនោះនឹងបាត់បង់ជីវិត»។ (អេសេគាល[អេសេគីអែល] ១៨:៤, ២០, ព្រះគម្ពីរភាសាខ្មែរសម្រាយ) ការវិនិច្ឆ័យចុងក្រោយចំពោះអ្នកដែលប្រឆាំងព្រះ មិនទទួលទារុណកម្មជារៀងរហូតទេ តែ«វិនាសអន្តរាយអស់កល្បជានិច្ច»។—ថែស្សាឡូនិចទី២[២ ថេស្សាឡូនិក] ១:៩, ព្រះគម្ពីរភាសាខ្មែរសម្រាយ
៣. អ្វីដែលយើងជឿ៖ រាជាណាចក្រព្រះគឺរដ្ឋាភិបាលពិតប្រាកដមួយ មិនមែនជាស្ថានភាពក្នុងចិត្តទេ។ អត្ថបទទស្សនាវដ្ដីប៉មយាមនៃភ្នំស៊ីយ៉ូន ខែធ្នូ ឆ្នាំ១៨៨១ បានរៀបរាប់ថា៖«ការស្ថាបនារាជាណាចក្រនេះនឹងបំផ្លាញរាជាណាចក្រទាំងអស់នៅផែនដី»។
● អ្វីដែលគម្ពីរចែង៖ «ក្នុងរជ្ជកាលរបស់ស្ដេចទាំងនោះ ព្រះជាម្ចាស់នៃស្ថានបរមសុខនឹងធ្វើឲ្យរាជាណាចក្រមួយទៀតកើតឡើង ដែលមិនរលាយ ហើយក៏មិនធ្លាក់ទៅក្រោមអំណាចគ្រប់គ្រងរបស់ប្រជាជាតិណាមួយឡើយ។ រាជាណាចក្រមួយនេះនឹងកម្ទេចរាជាណាចក្រឯទៀតៗទាំងប៉ុន្មាន ដែលមានពីមុនឲ្យវិនាសសូន្យ ហើយរាជាណាចក្រនេះនឹងនៅស្ថិតស្ថេររហូតតទៅ»។—ដានីយ៉ែល[ដានីអែល] ២:៤៤, ព្រះគម្ពីរភាសាខ្មែរសម្រាយ
តើសាក្សីព្រះយេហូវ៉ាប្រើសេចក្ដីបកប្រែពិភពលោកថ្មីដើម្បីគាំទ្រជំនឿរបស់ពួកគេឬ?
អត់ទេ ព្រោះយើងនៅតែប្រើសេចក្ដីបកប្រែគម្ពីរផ្សេងៗក្នុងកិច្ចការផ្សព្វផ្សាយរបស់យើង។ តាមពិត យើងស្នើផ្ដល់គម្ពីរសេចក្ដីបកប្រែពិភពលោកថ្មីមួយច្បាប់ដោយឥតគិតថ្លៃដល់អ្នកដែលចាប់អារម្មណ៍រៀនគម្ពីរ តែយើងក៏រីករាយរៀនជាមួយគាត់ដោយប្រើគម្ពីរសេចក្ដីបកប្រែផ្សេងទៀតដែរ។