របៀបដែលវិភាគទានរបស់អ្នកបានត្រូវប្រើ
ការអភិវឌ្ឍន៍បៃតងផ្ដល់អត្ថប្រយោជន៍ដល់បងប្អូនយើងនិងភពផែនដី
ថ្ងៃទី១ ខែមេសា ឆ្នាំ២០២៥
ជាសាក្សីព្រះយេហូវ៉ា យើងដឹងថាមិនយូរទៀតព្រះយេហូវ៉ានឹងចាត់វិធានការដើម្បីស្រោចស្រង់ភពផែនដីយើង ព្រោះផែនដីយើងមានការខូចខាតជាខ្លាំងដែលបង្កឡើងដោយមនុស្ស។ (ការបើកបង្ហាញ ១១:១៨) ទោះជាយ៉ាងនោះក៏ដោយ យើងក៏អាចរួមចំណែកក្នុងការថែរក្សាផែនដីរបស់យើងដែរ។ ជាឧទាហរណ៍ យើងបានសាងសង់អគារផ្សេងៗដែលយើងប្រើសម្រាប់ការគោរពប្រណិប័តន៍ព្រះ តាមរបៀបមួយដែលមិនបង្ខូចបរិស្ថាន។
អភិវឌ្ឍន៍បៃតងជាគម្រោងមួយដែលជួយកាត់បន្ថយជាតិពុលដែលមានក្នុងបរិយាកាស។ តើគម្រោងអ្វីខ្លះពីអភិវឌ្ឍន៍បៃតងដែលយើងបានធ្វើឡើង? តើតាមរបៀបណាបច្ចេកវិទ្យានេះអាចជួយយើងឲ្យប្រើប្រាស់ប្រាក់វិភាគទានដោយឈ្លាសវៃ?
រក្សាសីតុណ្ហភាពត្រជាក់ក្នុងសាលសន្និបាត
សាលសន្និបាតម៉ាតូឡានៅប្រទេសម៉ូសំប៊ិក បានត្រូវសង់ជាសាលធំមួយដែលមានជញ្ជាំងអាចដោះបាន ហើយមានដំបូលស័ង្កសី។ ដំបូលនោះងាយស្រូបយកកម្ដៅថ្ងៃ ហេតុនេះធ្វើឲ្យសាលក្ដៅខ្លាំងណាស់។ បងប្រុសម្នាក់នៅទីនោះបាននិយាយថា៖«កម្ដៅនោះធ្វើឲ្យយើងបែកញើសជោក! គ្រាន់តែចប់កម្មវិធីភ្លាម បងប្អូនប្រញាប់រត់ចេញទៅក្រៅស្រូបយកខ្យល់ឲ្យត្រជាក់ខ្លួនបន្តិច»។ តើយើងអាចធ្វើយ៉ាងណាដើម្បីជួយបងប្អូនយើងឲ្យត្រជាក់ស្រួលជាង?
យើងបានសម្រេចប្រើដំណោះស្រាយមួយ គឺដោយដំឡើងកង្ហារបឺតខ្យល់នៅលើដំបូលសាល។ កង្ហារទាំងនោះដំណើរការដោយកម្លាំងខ្យល់ វាស្រូបយកខ្យល់ត្រជាក់ចូលអគារ ហើយកាត់បន្ថយសីតុណ្ហភាពក្ដៅក្នុងអគារ។ កង្ហារទាំងនោះមិនប្រើអគ្គិសនីទេ តែប្រើកម្លាំងខ្យល់ធម្មជាតិដោយបឺតយកខ្យល់ក្ដៅក្នុងសាលចេញទៅក្រៅ។ កង្ហារទាំងនោះក្នុងមួយគ្រឿងមានតម្លៃ៥០ដុល្លារ។a
កង្ហារបឺតខ្យល់នៅសាលសន្និបាតម៉ាតូឡា
ដំណោះស្រាយនេះបានជួយឲ្យមានខ្យល់ចេញចូលល្អនៅក្នុងសាលសន្និបាត។ ដោយសារមានខ្យល់ចេញចូល នោះក្នុងអគារមិនសូវមានភាពស្អុះស្អាប់ទេ តែមានខ្យល់អុកស៊ីសែនច្រើនជាង។ ជាលទ្ធផល អ្នកចូលរួមសន្និបាតមានអារម្មណ៍ស្រស់ស្រាយជាង។ បងប្រុសដែលបានរៀបរាប់នៅខាងដើម បាននិយាយថា៖«ឥឡូវយើងមិនបាច់រត់ទៅក្រៅភ្លាមៗក្រោយចប់កម្មវិធីសន្និបាតទេ។ យើងអាចបន្តនៅក្នុងសាលអំឡុងពេលអាហារថ្ងៃត្រង់ ហើយអាចសំណេះសំណាលជាមួយបងប្អូនយើង។ យើងសប្បាយណាស់ឥឡូវសាលសន្និបាតយើងមានខ្យល់ចេញចូលល្អ ហើយយើងមានអារម្មណ៍ដូចអង្គុយនៅក្រោមដើមឈើដែលមានម្លប់ត្រឈឹងត្រឈៃអ៊ីចឹង!»។
ឥឡូវបងប្អូនកាន់តែសប្បាយចូលរួមសន្និបាតនិងមហាសន្និបាត
ការទទួលថាមពលអគ្គិសនីពីធនធានធម្មជាតិគ្មានដែនកំណត់
យើងបានដំឡើងប្រព័ន្ធបន្ទះសូឡានៅលើអគារផ្សេងៗរបស់យើងនៅទូទាំងពិភពលោក។ បន្ទះសូឡានេះស្រូបយកថាមពលពីពន្លឺថ្ងៃ ដើម្បីផលិតអគ្គិសនី។ ជាលទ្ធផល យើងប្រើម៉ាស៊ីនភ្លើងតិចជាងមុន ហើយមិនចាំបាច់ចំណាយប្រាក់ច្រើនទៅលើប្រេងឥន្ធនៈដែរ។ បន្ថែមទៅទៀត ប្រព័ន្ធសូឡានេះជួយយើងកាត់បន្ថយការបង្ខូចបរិស្ថាននិងជួយសន្សំសំចៃប្រាក់វិភាគទានទៀតផង។
នៅឆ្នាំ២០២៣ ប្រព័ន្ធបន្ទះសូឡាបានត្រូវដំឡើងនៅការិយាល័យសាខាស្លូវេនី។ វាផ្គត់ផ្គង់ថាមពលអគ្គិសនីដល់ទៅ៣០ភាគរយទៅលើការប្រើប្រាស់នៅទីនោះ។ បើប្រព័ន្ធនេះអាចផលិតអគ្គិសនីច្រើនជាងតម្រូវការរបស់ការិយាល័យសាខា នោះថាមពលអគ្គិសនីដែលនៅសល់អាចបំពេញសេចក្ដីត្រូវការរបស់សហគមន៍ក្នុងតំបន់នោះ។ ប្រព័ន្ធបន្ទះសូឡានេះមានតម្លៃ៣៦០.០០០ដុល្លារ។ ប៉ុន្តែ ដោយសារវាជួយកាត់បន្ថយថ្លៃចំណាយទៅលើអគ្គិសនី នោះក្នុងរយៈពេលបួនឆ្នាំប៉ុណ្ណោះ ប្រាក់ដែលយើងបានសន្សំពីការប្រើប្រាស់ប្រព័ន្ធនេះ នឹងច្រើនជាងប្រាក់ដែលយើងបានចំណាយទៅលើការទិញវាទៅទៀត។
ការិយាល័យសាខាស្លូវេនី
ក្នុងឆ្នាំ២០២៤ យើងបានដំឡើងប្រព័ន្ធសូឡានិងអាគុយធំមួយនៅការិយាល័យសាខាស្រីលង្កា។ គម្រោងនេះបានចំណាយប្រាក់ប្រមាណបីលានដុល្លារ ហើយប្រព័ន្ធនេះបានផ្គត់ផ្គង់ថាមពលអគ្គិសនីដល់ការិយាល័យសាខាដល់ទៅ៧០ភាគរយ។ ការផ្គត់ផ្គង់នេះនឹងជួយសន្សំសំចៃយ៉ាងច្រើន គឺប្រាក់សន្សំក្នុងអំឡុងបីឆ្នាំស្មើនឹងប្រាក់ដែលយើងចំណាយទៅលើបន្ទះសូឡាទាំងនោះ។ នៅឆ្នាំ២០២៤ដដែលនោះ យើងក៏ដំឡើងប្រព័ន្ធបន្ទះសូឡានៅការិយាល័យសាខាហូឡង់ដែរ។ ការចំណាយទៅលើប្រព័ន្ធនេះគឺមួយលានមួយសែនដុល្លារ ហើយប្រព័ន្ធនេះនឹងផ្គត់ផ្គង់អគ្គិសនីដល់ការិយាល័យសាខាដល់ទៅ៣៥ភាគរយ។ ការផ្គត់ផ្គង់នេះនឹងជួយសន្សំសំចៃយ៉ាងច្រើន គឺប្រាក់សន្សំក្នុងអំឡុង៩ឆ្នាំស្មើនឹងប្រាក់ដែលយើងចំណាយទៅលើបន្ទះសូឡាទាំងនោះ។
ការិយាល័យសាខាហូឡង់
បន្ថែមទៅទៀត យើងក៏ដំឡើងប្រព័ន្ធបន្ទះសូឡានៅការិយាល័យបកប្រែផ្សេងៗក្នុងប្រទេសម៉ិកស៊ិកផងដែរ។ សូមពិចារណាឧទាហរណ៍មួយ នៅការិយាល័យបកប្រែថារ៉ាអ៊ូម៉ារ៉ា ដែលមានទីតាំងក្នុងក្រុងឈីវ៉ាវ៉ា។ នៅរដូវរងា សីតុណ្ហភាពអាចធ្លាក់ចុះក្រោមសូន្យអង្សា រីឯរដូវក្ដៅវិញ សីតុណ្ហភាពឡើងដល់ជាង៤០អង្សា! ប៉ុន្តែ ដោយសារតម្លៃអគ្គិសនីថ្លៃខ្លាំង នោះបងប្អូនរបស់យើងមិនហ៊ានប្រើម៉ាស៊ីនកម្ដៅឬម៉ាស៊ីនត្រជាក់ទេ។ បងប្រុសម្នាក់ឈ្មោះចនណាថិន ដែលធ្វើការនៅការិយាល័យបកប្រែនោះបានរៀបរាប់ថា៖«នៅរដូវរងា យើងស្លៀកពាក់ក្រាស់ៗនិងប្រើផួយ ហើយនៅរដូវក្ដៅវិញ យើងបើកបង្អួចឲ្យខ្យល់ចូល»។
នៅឆ្នាំ២០២៤ យើងបានដំឡើងប្រព័ន្ធបន្ទះសូឡានៅការិយាល័យបកប្រែនោះ។ ប្រព័ន្ធនោះមានតម្លៃ២១.៤៨០ដុល្លារ តែការផ្គត់ផ្គង់នេះនឹងជួយសន្សំសំចៃយ៉ាងច្រើន គឺប្រាក់សន្សំក្នុងអំឡុងប្រាំឆ្នាំស្មើនឹងប្រាក់ដែលយើងចំណាយទៅលើបន្ទះសូឡាទាំងនោះ។ ឥឡូវបងប្អូនយើងអាចប្រើម៉ាស៊ីនកម្ដៅនិងម៉ាស៊ីនត្រជាក់ញឹកញាប់ជាង។ បងចនណាថិនដែលបានរៀបរាប់ខាងលើបន្តថា៖«ឥឡូវយើងស្រួលបំពេញកិច្ចការរបស់យើងជាង ហើយយើងអាចសម្រេចកិច្ចការបានច្រើនជាង។ តែដំណាលគ្នានោះ យើងមានអារម្មណ៍ស្រួលដោយដឹងថាការិយាល័យបកប្រែរបស់យើងកំពុងប្រើប្រាក់វិភាគទានរបស់អង្គការយើងដោយឈ្លាសវៃ និងដោយការពារបរិស្ថាន»។
ក្រុមបកប្រែនៅថារ៉ាអ៊ូម៉ារ៉ា កំពុងរីករាយធ្វើការក្នុងបរិយាកាសដ៏មានផាសុកភាព
ការស្តុកទឹកភ្លៀង
សាលប្រជុំខ្លះនៅទ្វីបអាហ្វ្រិកមិនមានទឹកស្អាតប្រើប្រាស់ទេ។ ដូច្នេះ បងប្អូនយើងប្រហែលត្រូវដើរអស់ប៉ុន្មានគីឡូទាំងទូលទឹកទៅសាលប្រជុំរបស់ពួកគេ។ ឯសាលប្រជុំខ្លះទៀត បងប្អូនយើងត្រូវទិញទឹកដែលគេលក់តាមឡាន តែតម្លៃទឹកនោះថ្លៃណាស់ ហើយទឹកក៏មិនសូវស្អាតដែរ។
ដើម្បីបងប្អូនអាចមានទឹកប្រើប្រាស់ យើងបានភ្ជាប់ទនៅក្រោមសន្ទះដំបូល និងដាក់បាសាំងធំៗសម្រាប់ស្តុកទឹកនៅសាលប្រជុំជាច្រើនក្នុងទ្វីបអាហ្វ្រិក។ មុននឹងដំឡើងឧបករណ៍ទាំងនោះ បងប្អូនយើងបានសិក្សាអំពីអាកាសធាតុនិងសីតុណ្ហភាពក្នុងតំបន់នោះ ដើម្បីពួកគេអាចរៀបចំប្រព័ន្ធទឹកនៅក្នុងសាលប្រជុំ។ ការបំពាក់ឧបករណ៍បន្ថែមនេះត្រូវចំណាយប្រាក់ពី៦០០ដុល្លារទៅដល់៣.០០០ដុល្លារ។ ប៉ុន្តែ ឧបករណ៍ទាំងនេះជួយកាត់បន្ថយការចំណាយសម្រាប់សាលប្រជុំ ព្រោះបងប្អូនយើងមិនចាំបាច់បង់ចំណាយទៅលើថ្លៃទឹកទៀតទេ។
បាសាំងទឹកនៅសាលប្រជុំមួយក្នុងក្រុងភូដាឌីចាបា នៅអាហ្វ្រិកខាងត្បូង
ប្រព័ន្ធទឹកភ្លៀងនេះផ្ដល់អត្ថប្រយោជន៍ច្រើនណាស់ដល់បងប្អូនយើង។ បងស្រីម្នាក់ឈ្មោះណូអេមយ៉ា ដែលរស់នៅប្រទេសម៉ូសំប៊ិក បានរៀបរាប់ថា៖«ពីមុន យើងត្រូវធ្វើដំណើរយ៉ាងឆ្ងាយដើម្បីបានទឹក។ ពេលយើងទៅដល់សាលប្រជុំយើងអស់កម្លាំងល្ហិតល្ហៃខ្លាំងណាស់។ ហើយដោយសារទឹកមិនសូវមានដែរ នោះពិបាកឲ្យយើងរក្សាអនាម័យខ្លួនប្រាណ។ ប៉ុន្តែ ឥឡូវបងប្អូនអាចលាងដៃទាំងអស់គ្នាបាន។ យើងអាចទៅសាលប្រជុំទាំងទឹកមុខសប្បាយ មិនមែនដោយអស់កម្លាំងទេ។ សូមអរគុណបងប្អូនជាអនេកប្បការ!»។
បងស្រីម្នាក់នៅប្រទេសអាហ្វ្រិកខាងត្បូងនិងកូនប្រុសគាត់កំពុងលាងដៃដោយទឹកភ្លៀងដែលគេបានស្តុកទុក
តើការចំណាយទៅលើអភិវឌ្ឍន៍បៃតងទាំងនេះបានមកពីណា? គឺពីប្រាក់វិភាគទានសម្រាប់កិច្ចការទូទាំងពិភពលោក។ មានវិធីជាច្រើនដែលយើងអាចជូនវិភាគទាន វិធីមួយគឺជូនតាមរយៈគេហទំព័រdonate.jw.org។ សូមអរគុណបងប្អូនចំពោះការជូនវិភាគទានដោយចិត្តទូលាយ!
a ប្រាក់ដុល្លារដែលបានរៀបរាប់ក្នុងអត្ថបទនេះ គឺសំដៅទៅលើដុល្លារអាម៉េរិក។