តើពួកគេជាពួកណា?
ពួកស្មរបន្ទាល់ព្រះយេហូវ៉ាប្រាថ្នាចង់ឲ្យលោកអ្នកស្គាល់គេឲ្យបានជិតដិត។ លោកអ្នកប្រហែលជាបានជួបពួកគេ ដែលជាអ្នកជិតខាង ជានិយោជិតជាមួយគ្នា ឬក៏កាលដែលលោកអ្នកកំពុងប្រព្រឹត្តសកម្មភាពណាមួយក្នុងជីវិតរៀងរាល់ថ្ងៃ។ លោកអ្នកប្រហែលជាបានជួបប្រទះពួកគេតាមផ្លូវ កាលដែលគេកំពុងតែប្រគល់ទស្សនាវដ្ដីដល់អ្នកដើរតាមផ្លូវនោះ។ ឬក៏លោកអ្នកប្រហែលជាបាននិយាយដោយសង្ខេបជាមួយនឹងពួកគេនៅទ្វារផ្ទះរបស់លោកអ្នកដែរ។
តាមការពិតទៅ ពួកស្មរបន្ទាល់ព្រះយេហូវ៉ាយកចិត្តទុកដាក់នឹងប្រយោជន៍របស់លោកអ្នក។ ពួកគេចង់ធ្វើជាសំឡាញ់របស់លោកអ្នក ហើយចង់ថ្លែងប្រាប់រឿងថែមទៅទៀតអំពីខ្លួនគេ អំពីជំនឿរបស់គេ អំពីអង្គការរបស់គេ ហើយអំពីមនោសញ្ចេតនារបស់គេចំពោះមនុស្ស និងចំពោះពិភពលោកដែលមនុស្សយើងទាំងអស់គ្នារស់នៅក្នុងនោះ។ ដើម្បីឲ្យជួយសម្រេចនូវគោលបំណងនេះ ពួកគេបានរៀបចំបោះពុម្ពសៀវភៅស្តើងនេះសម្រាប់លោកអ្នក។
តាមរបៀបភាគច្រើននោះ ស្មរបន្ទាល់ព្រះយេហូវ៉ាគឺដូចគ្នានឹងមនុស្សទាំងអស់ទៀតដែរ។ ពួកគេមានបញ្ហា—ខាងសេដ្ឋកិច្ច ខាងសាច់ឈាម ហើយខាងមនោសញ្ចេតនាជាដើម។ ជួនកាលពួកគេធ្វើកំហុស ពីព្រោះគេមិនមែនជាមនុស្សល្អឥតខ្ចោះ ឬក៏ជាមនុស្សដែលគ្រប់សកម្មភាពនិងពាក្យសំដីចេញពីព្រះ ឬក៏ជាមនុស្សដែលមានភាពមិនភ្លាត់នោះទេ។ ប៉ុន្តែពួកគេខំព្យាយាមរៀនពីពិសោធន៍របស់ពួកគេ ហើយគេយកចិត្តទុកដាក់នឹងសិក្សាព្រះគម្ពីរ ដើម្បីធ្វើការកែប្រែទាំងអស់ដែលត្រូវការជាចាំបាច់។ គេបានឧទ្ទិសថ្វាយខ្លួនដល់ព្រះដើម្បីធ្វើតាមបំណងព្រះហឫទ័យទ្រង់ ហើយគេខ្នះខ្នែងយ៉ាងស៊ប់ចិត្តដើម្បីសម្រេចការឧទ្ទិសថ្វាយខ្លួននេះ។ ពួកគេស្វែងរកការដឹកនាំពីបន្ទូលរបស់ព្រះ ហើយវិញ្ញាណបរិសុទ្ធរបស់ទ្រង់ ចំពោះគ្រប់កិច្ចការទាំងអស់របស់គេ។
ជាសារៈសំខាន់ដ៏ជីវិតសម្ពន្ធចំពោះស្មរបន្ទាល់ព្រះយេហូវ៉ាដែលគ្រប់ជំនឿរបស់គេមានមូលដ្ឋានក្នុងព្រះគម្ពីរ ហើយមិនស្រេចទៅលើការស្មានរបស់មនុស្សឬក៏គោលជំនឿសាសនាប៉ុណ្ណោះឡើយ។ ពួកគេមានគំនិតដូចជាសាវកប៉ុល កាលដែលលោកបានបញ្ចេញយោបល់ក្រោមអានុភាពនៃវិញ្ញាណបរិសុទ្ធរបស់ព្រះថា៖ «សូមឲ្យព្រះបានរាប់ជាពិត ហើយគ្រប់ទាំងមនុស្សជាភូតភរវិញចុះ»។ (រ៉ូម ៣:៤a) ចំពោះការបង្រៀនដែលផ្សាយចេញទុកដូចជាសេចក្ដីពិតអំពីព្រះគម្ពីរ ពួកគេយល់ព្រមទាំងស្រុងនឹងការប្រព្រឹត្តរបស់ពួកបេរា កាលពួកគេបានឮសាវកប៉ុលធ្វើការផ្សាយនោះ៖ «គេប្រុងប្រៀបសព្វគ្រប់នឹងទទួលព្រះបន្ទូល ក៏ពិចារណាមើលគម្ពីររាល់តែថ្ងៃ ឲ្យបានដឹងជាសេចក្ដីទាំងនោះត្រូវឬមិនត្រូវ»។ (កិច្ចការ ១៧:១១) ស្មរបន្ទាល់ព្រះយេហូវ៉ាជឿថា គ្រប់ការបង្រៀនខាងសាសនាទាំងអស់ ទោះជាការបង្រៀនរបស់ពួកគេឬក៏របស់អ្នកដទៃក៏ដោយ នោះត្រូវតែយកមកពិចារណាដោយប្រើសេចក្ដីសាកល្បងនេះ៖ ថាតើយល់ស្របនឹងបទគម្ពីរឬទេ។ ពួកគេអញ្ជើញលោកអ្នក—ជំរុញទឹកចិត្តលោកអ្នក—ឲ្យប្រើការសាកល្បងនេះក្នុងកាលដែលលោកអ្នកមានការពិគ្រោះជាមួយនឹងពួកគេ។
ដោយយល់នូវរឿងទាំងអស់នេះ ជាការជាក់ស្តែងណាស់ដែលពួកស្មរបន្ទាល់ព្រះយេហូវ៉ាជឿថា ព្រះគម្ពីរជាបន្ទូលរបស់ព្រះ។ គេចាត់ទុកទាំង៦៦សៀវភៅនៃគម្ពីរនោះ ជាបទដែលត្រូវបានបណ្ដាលមកពីវិញ្ញាណបរិសុទ្ធរបស់ព្រះ ហើយថាជាការដ៏ត្រឹមត្រូវខាងប្រវត្ដិសាស្ត្រផង។ ផ្នែកដែលបានត្រូវហៅជាទូទៅថាសញ្ញាថ្មីនោះ ពួកគេហៅថាបទគម្ពីរគ្រីស្ទានភាសាក្រិក ហើយគេហៅសញ្ញាចាស់ថាបទគម្ពីរភាសាហេព្រើរ។ ពួកគេពឹងផ្អែកទៅលើបទគម្ពីរក្រិកនិងបទគម្ពីរហេព្រើរទាំងពីរ ហើយគេចាត់ទុកថាជារឿងអត្ថានុរូបទាំងអស់ លើកលែងតែកាលណាពាក្យសំដីឬក៏ហេតុការណ៍ដែលវិលជុំវិញរឿងនោះ បង្ហាញយ៉ាងជាក់ស្តែងថា ជារឿងអត្ថបដិរូបឬជានិមិត្តរូបទៅវិញ។ ពួកគេយល់ថា បទទំនាយរបស់ព្រះគម្ពីរជាច្រើនបានសម្រេចរួចហើយ បទទំនាយឯទៀតកំពុងតែសម្រេចឥឡូវ ហើយបទទំនាយផ្សេងៗទៀតនឹងត្រូវបានសម្រេចនៅអនាគតកាលទៀតដែរ។
ឈ្មោះរបស់ពួកគេ
ស្មរបន្ទាល់ព្រះយេហូវ៉ាឬ? មែនហើយ ពួកគេសំដៅចំពោះខ្លួនគេតាមឈ្មោះនេះ។ ឈ្មោះនេះពណ៌នាអំពីគេ គឺសម្ដែងថាគេធ្វើបន្ទាល់អំពីព្រះយេហូវ៉ា អំពីឋានៈរបស់ទ្រង់ជាព្រះ ហើយអំពីគោលបំណងរបស់ទ្រង់ដែរ។ «ព្រះ» «ព្រះអម្ចាស់» ហើយ «អ្នកបង្កើត» —ដូចជា «ប្រធានាធិបតី» «ស្តេច» ហើយ «ឧត្តមសេនីយ» —គឺគ្រាន់តែជាឋានន្តរទាំងអស់ទេ ហើយអាចប្រើបានចំពោះបុគ្គលផ្សេងៗជាច្រើន។ ក៏ប៉ុន្តែ«យេហូវ៉ា» ជាព្រះនាមផ្ទាល់អង្គទ្រង់ ហើយសំដៅចំពោះព្រះដ៏មានព្រះចេស្ដាបំផុត គឺជាអ្នកដែលបង្កើតសកលលោកទាំងមូល។ រឿងនេះបានបង្ហាញឲ្យឃើញក្នុង ទំនុកដំកើង ៨៣:១៨ ថា៖ «ដើម្បីឲ្យគេបានដឹងថា គឺទ្រង់តែ១អង្គ ព្រះនាមជាយេហូវ៉ា ដែលជាព្រះដ៏ខ្ពស់បំផុតលើផែនដីទាំងមូល»។
ព្រះនាមយេហូវ៉ា (ឬក៏យ៉ាវេ ដូចជាព្រះគម្ពីរយេរូសាឡិមខាងកាតូលិក ហើយវិជ្ជាករខ្លះនៅសម័យនេះចូលចិត្ត) លេចឡើងជិត៧.០០០ដងក្នុងបទគម្ពីរហេព្រើរដើម។ កំណែថ្មីនៃព្រះគម្ពីរភាគច្រើនមិនបង្ហាញព្រះនាមព្រះផ្ទាល់ទេ ផ្ទុយទៅវិញ គេដាក់«ព្រះ» ឬក៏«ព្រះអម្ចាស់»ជំនួសព្រះនាមដ៏ពិតនោះ។ យ៉ាងណាក៏ដោយ សូម្បីតែក្នុងព្រះគម្ពីរទាំងនោះ ជាធម្មតាមនុស្សម្នាក់ៗអាចដឹងកន្លែងដែលបទគម្ពីរហេព្រើរដើមបានប្រើព្រះនាមយេហូវ៉ា ពីព្រោះឋានន្តរដែលគេដាក់ជំនួសនោះ បានត្រូវសរសេរដោយអក្សរធំៗ។ តែកំណែថ្មីជាច្រើនដែលទាន់សម័យ ប្រើព្រះនាមយេហូវ៉ាឬក៏ព្រះនាមយ៉ាវេបាន។ ហេតុដូច្នេះហើយព្រះគម្ពីរបានចែងនៅ អេសាយ ៤២:៨ ថា៖ «អញជាយេហូវ៉ា នេះហើយជាឈ្មោះរបស់អញ»។
ដំណើររឿងនៃបទគម្ពីរដែលពួកស្មរបន្ទាល់ព្រះយេហូវ៉ាប្រើដើម្បីទទួលយកឈ្មោះគេ គឺមកពី អេសាយ ជំពូកទី៤៣។ នៅបទនោះ វិការដ្ឋាននៃលោកីយនេះមើលទៅហាក់ដូចជាវិនាដកម្មនៅតុលាការ៖ ព្រះនានាពីសាសន៍ទាំងអស់បានត្រូវអញ្ជើញឲ្យនាំមកនូវសាក្សីរបស់គេ ដើម្បីបង្ហាញភស្តុតាងចំពោះបណ្ដឹងក្ដីដែលគេអះអាងថាគេជាអ្នកសុចរិត ឬក៏ដើម្បីឲ្យស្ដាប់ស្មរបន្ទាល់ខាងព្រះយេហូវ៉ា ហើយទទួលស្គាល់នូវសេចក្ដីពិតទៅវិញ។ ក្នុងបទនោះ ព្រះយេហូវ៉ាបានប្រកាសទៅរាស្ត្ររបស់ទ្រង់ថា៖ «ព្រះយេហូវ៉ាទ្រង់មានបន្ទូលថា ឯងរាល់គ្នាជាស្មរបន្ទាល់របស់អញ ហើយជាអ្នកបំរើដែលអញបានរើសតាំង ដើម្បីឲ្យបានស្គាល់ ហើយជឿដល់អញ ព្រមទាំងយល់ថា គឺអញនេះហើយ ឥតមានព្រះណាកើតមកមុនអញទេ ហើយក្រោយអញក៏ឥតមានដែរ។ គឺអញ អញនេះហើយជាយេហូវ៉ា ក្រៅពីអញ គ្មានអ្នកសង្គ្រោះណាទៀតឡើយ»។—អេសាយ ៤៣:១០, ១១
ព្រះយេហូវ៉ាទ្រង់មានស្មរបន្ទាល់នៅលើផែនដីក្នុងកំលុងពេលរាប់ពាន់ឆ្នាំមុនព្រះគ្រីស្ទយាងមកផង។ ក្រោយបានថ្លែងរៀបរាប់ពីមនុស្សខ្លះដែលប្រកបទៅដោយជំនឿក្នុងគម្ពីរហេព្រើរជំពូកទី១១នោះ ហេព្រើរ ១២:១ បានចែងថា៖ «ដូច្នេះ ដែលមានស្មរបន្ទាល់១ហ្វូងធំម្ល៉េះ នៅព័ទ្ធជុំវិញយើង នោះត្រូវឲ្យយើងចោលអស់ទាំងបន្ទុក នឹងអំពើបាប ដែលរុំយើងជុំវិញជាងាយម្ល៉េះនោះចេញ។ ហើយត្រូវរត់ក្នុងទីប្រណាំង ដែលនៅមុខយើង ដោយអំណត់»។ ព្រះយេស៊ូវបានមានបន្ទូលនៅខាងមុខលោកប៉ុនទាស-ពីឡាត់ថា៖ «ខ្ញុំបានកើតមក ហើយក៏ចូលក្នុងលោកីយនេះ សំរាប់តែការនោះឯង ដើម្បីឲ្យខ្ញុំបានធ្វើបន្ទាល់ពីសេចក្ដីពិត»។ ទ្រង់បានត្រូវហៅថា៖ «ស្មរបន្ទាល់ស្មោះត្រង់ ហើយពិតប្រាកដ»។ (យ៉ូហាន ១៨:៣៧; វិវរណៈ ៣:១៤) ព្រះយេស៊ូវមានបន្ទូលប្រាប់សិស្សរបស់ទ្រង់ថា៖ «កាលណាព្រះវិញ្ញាណបរិសុទ្ធបានមកសណ្ឋិតលើអ្នករាល់គ្នា នោះអ្នករាល់គ្នានឹងបានព្រះចេស្ដា ហើយនឹងធ្វើជាទីបន្ទាល់ពីខ្ញុំ នៅក្រុងយេរូសាឡិម ព្រមទាំងស្រុកយូដា នឹងស្រុកសាម៉ារីទាំងមូល ហើយរហូតដល់ចុងផែនដីបំផុតផង»។—កិច្ចការ ១:៨
ហេតុដូច្នេះហើយ មនុស្សជាង៤.២៧៥.០០០នាក់ដែលកំពុងផ្សាយប្រាប់ដំណឹងល្អនៃរាជាណាចក្ររបស់ព្រះយេហូវ៉ាដោយគ្រីស្ទយេស៊ូវ នៅជាង២១០ប្រទេសយល់ថា ជាការត្រឹមត្រូវណាស់ដែលគេហៅខ្លួនគេថាជាស្មរបន្ទាល់ព្រះយេហូវ៉ា។
[កំណត់សម្គាល់]
a បើគ្មានការបញ្ជាក់ថែមទៀតទេនោះ បទគម្ពីរនៅក្នុងសៀវភៅស្តើងនេះ បានដកស្រង់ចេញពីសេចក្ដីបកប្រែជាភាសាខ្មែរ ពីសមាគមខ្មែរនៃព្រះគម្ពីរបរិសុទ្ធ ដែលផ្សាយចេញក្នុងឆ្នាំ១៩៥៤។ បើមាន «ពថ» នៅបន្ទាប់ពីបទគម្ពីរណា នោះមានន័យថា បានធ្វើការបកប្រែពីសេចក្ដីបកប្រែពិភពលោកថ្មីនៃបទគម្ពីរបរិសុទ្ធ ជាភាសាអង់គ្លេស កំណែថ្មីនៅឆ្នាំ១៩៨៤។
[ឃ្លាអក្សរធំនៅទំព័រ៣]
ពួកគេយកចិត្តទុកដាក់នឹងលោកអ្នក
[ឃ្លាអក្សរធំនៅទំព័រ៣]
ពួកគេបានថ្វាយខ្លួនដើម្បីប្រព្រឹត្តតាមបំណងព្រះហឫទ័យព្រះ
[ឃ្លាអក្សរធំនៅទំព័រ៤]
ពួកគេជឿថា ព្រះគម្ពីរគឺជាបន្ទូលរបស់ព្រះ
[ឃ្លាអក្សរធំនៅទំព័រ៥]
ព្រះនាមទ្រង់ដែលមានការទាក់ទងទៅនឹងវិនាដកម្មនៅតុលាការ
[ឃ្លាអក្សរធំនៅទំព័រ៥]
ស្មរបន្ទាល់ព្រះយេហូវ៉ាជាង៤.២៧៥.០០០នាក់កំពុងផ្សាយនៅជាង២១០ប្រទេស
[រូបភាពនៅទំព័រ៤]
ព្រះនាមរបស់ព្រះផ្ទាល់អង្គទ្រង់ជាភាសាហេព្រើរពីបុរាណ