ឃ្លាក្នុងគម្ពីរ
សូមប្រើ«ពរពីព្រះ»ដើម្បីលើកទឹកចិត្តអ្នកឯទៀត
ពេលយើងចំណាយពេលជាមួយបងប្អូនរួមជំនឿរបស់យើង យើងទទួលការលើកទឹកចិត្តជាខ្លាំង។ ប៉ុន្តែ ការចំណាយពេលជាមួយគ្នាគឺមិនគ្រប់គ្រាន់ទេ។ គម្ពីរហៅសមត្ថភាពរបស់យើងក្នុងការពង្រឹងជំនឿគ្នាទៅវិញទៅមកថា ជា«ពរពីព្រះ»។ (រ៉ូម ១:១១, ១២) ដូច្នេះ តើយើងអាចប្រើពរពីព្រះនោះឲ្យមានប្រយោជន៍ច្រើនបំផុតយ៉ាងដូចម្ដេច?
សូមលើកទឹកចិត្តអ្នកឯទៀតតាមរយៈពាក្យសម្ដីរបស់អ្នក។ ជាឧទាហរណ៍ យើងអាចឆ្លើយនៅកិច្ចប្រជុំ ដោយមិនផ្ដោតអារម្មណ៍ទៅលើខ្លួនឯង តែផ្ដោតទៅលើព្រះយេហូវ៉ា បណ្ដាំរបស់លោក និងរាស្ត្ររបស់លោក។ ម្យ៉ាងទៀត ពេលយើងសន្ទនាជាមួយបងប្អូនរួមជំនឿ យើងអាចនិយាយអំពីប្រធានបទដែលពង្រឹងកម្លាំងចិត្តអ្នកឯទៀត។
សូមលើកទឹកចិត្តអ្នកឯទៀតតាមរយៈការសម្រេចចិត្តនិងការប្រព្រឹត្តរបស់អ្នក។ ជាឧទាហរណ៍ បងប្អូនខ្លះបានសម្រេចចិត្តបន្ដកិច្ចបម្រើពេញពេល ទោះជាពួកគេមានការពិបាកផ្ទាល់ខ្លួនក៏ដោយ។ បងប្អូនខ្លះទៀត ចូលរួមកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិកជាទៀងទាត់ ទោះជាពួកគេធ្វើការច្រើនម៉ោង ឬមានបញ្ហាសុខភាពរ៉ាំរ៉ៃក្ដី។
តើអ្នកលើកទឹកចិត្តអ្នកឯទៀតតាមរយៈពាក្យសម្ដីនិងការប្រព្រឹត្តរបស់អ្នកឬទេ? ម្យ៉ាងទៀត តើអ្នកកត់សម្គាល់អ្វីដែលបងប្អូនរួមជំនឿនិយាយនិងធ្វើដើម្បីលើកទឹកចិត្តអ្នកវិញឬទេ?