Dya Kayadi Dya Malunda
22 Akwa Jeluzaleme atumbika Akaziya o kasule ka Jeholamu ku ungana bhu kididi kya tat’ê, mukonda o makota a Akaziya a ajibhile ku masoladi ejile kumoxi ni akwa Alábya. Kyenyiki, Akaziya mon’a Jeholamu wamateka kutumina mu Judá. 2 Kyoso Akaziya kyexile ni makwinyi ayadi ni kiyadi kya mivu, a mutumbika ku usobha, yu watumina mu Jeluzaleme mu muvu umoxi. O dijina dya manyâ dyexile Ataliya, mulawula* a Omidi.
3 Akaziya wexile mukwenda mu jinjila ja mwiji wa Akabe. Mukonda o manyâ, mwéne wexile mu mulonga kubhanga ima yayibha. 4 Mwene wexile mubhanga ima yayibhila Jihova, kala kyexile mubhanga akwa dibhata dya Akabe. Mukonda kyoso tat’ê kyafu, akwa dibhata dya Akabe, éne exile mu mubhana o jindunge. Kiki kya mubhekela windwa. 5 Akaziya wakayela o ndunge ya mubhana, yu wayi ni Jeholamu mon’a Akabe sobha ya Izalayele mulwa ita ni Hazayele, sobha ya Sídya, ku Lamote-Ngiliyade. Kwenyoko, kwene Jeholamu kwa mu kwamena, ku akwa kutakula o jisosa. 6 Kyenyiki, Jeholamu wavutuka ku Jezelele phala kudisanza, mukonda a mukwamene kyoso kyayi mubhânga ni akwa Sídya ku Lamá, kyabhânge ni Hazayele sobha ya Sídya.
Akaziya,* mon’a Jeholamu sobha ya Judá wa kulumuka ku Jezelele phala kukunda Jeholamu mon’a Akabe mukonda a mukwamene. 7 Mukonda dya kuya mukunda Jeholamu, Nzambi wabheka divuwa kwa Akaziya. Kyoso Akaziya kyabhixila kwenyoko, wayi kumoxi ni Jeholamu mu disanga ni Jehú mulawula wa Nimisi, yó a musolo kwa Jihova phala kubwika o dibhata dya Akabe. 8 Kyoso Jehú kyamateka kufundisa o dibhata dya Akabe, wasange o ilamba ya Judá ni ana a jiphange ja Akaziya, exile o akwatekexi a Akaziya yu wa ajibha. 9 Mukusuluka, wayi musota Akaziya. O masoladi a Jehú a mukwata ku Samadiya kwadiswekele, a mwambata kwa Jehú ya a mujibha. Kyenyiki-phe ene a mufundu, mukonda ambele: “Mwene mulawula wa Jozafate, o diyala dyasoto Jihova ni muxima wê woso.” Ku dibhata dya Akaziya kikwexile muthu weji tena kukala sobha.
10 Kyoso Ataliya, manya Akaziya kyamono kwila mon’ê a mujibha, mwene wajibha o mbutu yoso ya dibhata dya Judá. 11 Maji-phe o mon’a sobha wa muhatu, a mwixana Jezabate, wakatula Jowaji mon’a Akaziya mwaxaxi ka an’a sobha eji kwa jibha, yu wa musweka mu xilu ni kiledi kyê. Jezabate mon’a sobha Jeholamu, watena ku musweka phala Ataliya kamumone. Mukiki-phe Ataliya katena ku mujibha. (Jezabate wexile muhatu wa mukunji Joyada, mwene wexile we phange ya Akaziya.) 12 Ene a musweka mu inzo ya Nzambi yakidi mu mivu isamanu, kyoso Ataliya kyexile mutumina o ixi.