Milongi Phala o Yônge, Ukexilu wa Ukidistá ni Ukunji Wetu

1-7 YA KAVWA

O VALOLO YA MAK’Â NZAMBI | KOLOSE 1-4

“Zule-nu o Ifwa Yokulu, Zwatenu-phe o Ukexilu wa Ubhe”

(Kolose 3:5-9) Wila kiki, o jihânji jenu ja mu ngongo jala kukalakala moxi dyenu, jibhenu-ju: ni undumbu, ni ufusa, ni hânji jayibha, ni vondadi jabolo, ni lwimbi, kuma o lwimbi lwa soko ni kukayela iteka. ⁶ Kuma ima yiyi, yene i bheka o njinda ya Nzambi. ⁷ En’wenu m’okulu yene njila i mu endele, wene o mwenyu u mwa layela jinga. ⁸ O kiki-phe zulenu-yu yene yoso: Ni njinda, ni kutema, ni phulu, ni kuxinga, ni jindaka jabolo ki ji tunde mu kanu dyenu. ⁹ Kana ku di tela makutu mudyenu, kuma o muthu wokulu mwa mu zula kyá ni ifwa yê,

Mulangidi 01/03/11 difwe 12 kaxi 12-13

Tambula o Nzumbi ya Nzambi, o ya Mundu Kana

¹² Ukexilu wahi u ngene mu londekesa ku mwenyu wami? (Tanga Kolose 3:8-10, 13.) O nzumbi ya mundu, i swinisa athu kubhanga o imbamba i bhanga o xitu. (Nga. 5:19-21) Se twa mesena kumona kyebhi kya tu nganala ku nzumbi ya mundu, ki mu ithangana yambote, maji kyoso ki bhu moneka maka, kala kya tu bhanga kima kya yibha ku phang’etu ya Kidistá, u tu xinga mba u tu ta kituxi. Mu inzo yetu, tu tena kulondekesa se nzumbi yebhi ya mu tu tumina. Kyenyiki, twa tokala ku di tonginina kyambote. Dibhwidise: ‘Mu jimbeji ji samanu ja bhiti, o kwila o ukexilu wa mwenyu wami wa londekesele kwila ngi Kidistá, anga nga vutuka ku ifwa ya yibha, ya ukexilu wami wa kuzwela?’

¹³ O nzumbi ya Nzambi, i tu kwatekesa o ku ‘zula o muthu wokulu, ni ifwa yê ya bolo’ ni kuzwata o “muthu wobhe.” Kiki kya-nda tu kwatekesa kulondekesa o henda. Twa-nda kala ni ukexilu wa kuloloka akwetu mu vondadi yetu, né muene se a tu te kituxi. Ki twa-nda zoka dingi ni athu a tu bhanga kya yibha, “ni kulunga kwoso ni kunônga, ni kutema. Kana ku kwata kuhoya-hoya, ni kulokalala.” Mu veji dya kiki, twa tokala kubhanga yoso phala “ku dixinganeka” mudyetu.—Efe. 4:31, 32.

(Kolose 3:10-14) enu mwa zwata muthu wobhe. O kikexilu kya ubhe kiki mwène o muthu wobhe ala ku mu umba kwala Nzambi ni kwijiya kwengi, phala ku difwangana ni mwène woso wa mu bhanga. ¹¹ O ku uthu wobhe ki kwene Ngeleku, ki kwene Judé, ki kwene a mu saye, ki kwene a kambe ku mu saya, ki kwene muthu wengi, ki kwene kabinji, ki kwene mubhika, ki kwene folo; kwala ngó Kidistu wa di bhange mwène ya yoso, wa tungu we mwa ene oso. ¹² Enu phe mwala mu athu a Nzambi. Mwene wa mi tungula phala mu kale mu athu ê, wa mi lumbu, wa mi zola. Kala kiki, enu zwatenu muxima wanengana, ni kunyephuka, ni kubatama, ni kubelesela, ni kuxidikika. ¹³ Mu di lendukile ni kudikwatekesa mudyenu, mu di loloka, se bhwala muthu wa di kwata ni mukwá. Kala muthu a loloke mukwá kala kyoso Nzambi kya mi loloka enu, kyene we ki mu bhanga jinga. ¹⁴ Ku ima yoso-phe, kota o henda, kuma o henda yene o dijikita di kuta o uthu wa tenena.

Mulangidi 15/09/13 difwe 21 kaxi 18-19

O Kwila a mi Lungulula Kwa Nzambi?

¹⁸ Phala o Mak’â Nzambi ku tu lungulula, o kutanga o Bibidya izuwa yoso, dimatekenu ngó. Athu avulu a tanga o Bibidya mu ithangana yavulu, mu kiki ene ejiya ihi i zwela o Bibidya. Sumbala eye wa sange kyá athu kala yá, kyoso ki wene mu bhanga o ukunji wé mu kuboka. A mukwá katé mwene a tumbula kibatulu kya Bibidya. Maji né mwene a bhanga kiki, o kwijiya kuku, ki kwa mu lungulula o ukexilu wa mwenyu wâ mba wa ibanzelu yâ. Mukonda dyahi? Mukonda phala o Mak’â Nzambi kulungulula o ukexilu wa muthu, mwéne wa tokala kwehela o Mak’â Nzambi kubokona ku hota dya muxima wê. (Nga. 6:6) Mu kiki, wa tokala kukatula kithangana phala kuxinganeka ku ima ya mu dilonga. Wa tokala ku dibhwidisa: O kwila eme ngejiya kyambote kuma, o ilongesu yiyi ya kidi, ki ilongesu kala ya jingeleja? O kwila ki ngi i mono luwa kwila ya kidi? O kwila nga tokala kubelesela o milongi yiyi ku mwenyu wami, ki ngi tokala ngó ku i longa ku akwetu? O kwila ngi divwa kuma Jihova wa mu zwela n’eme, pholo ni pholo? O kuxinganeka ni kubanza ku ibhwidisu yiyi, ku tu kwatekesa o kukala ni ukamba wambote ni Jihova. Se o ilongesu ya Bibidya i bokona ku muxima wetu, i tena kulungulula o ukexilu wa mwenyu wetu.—Jisa. 4:23; Luka 6:45.

¹⁹ O kutanga o Mak’â Nzambi izuwa yoso ni kuxinganeka ku yiyi i twa mu tanga, ya-nda tu kwatekesa o kubhanga i twene mu bhanga kyá: ‘Dizudyenu o ukexilu wa muthu wokulu, ni ifwa yê, ni mu zwate o ukexilu wa muthu wobhe. Wene o ukexilu wa muthu wobhe ala ku mu umba kwala Nzambi ni kwijiya kwengi.’ (Kol. 3:9, 10) Tu katula mbote yavulu, kyoso ki tuya ni kudilonga o Mak’â Nzambi. Mukonda dya kukala tu athu a ubhe mu ukexilu wetu, kya-nda tu kwatekesa o kudilanga ku mibhetu ya Satanaji.

Tokwesa o Milongi ya Nzambi

(Kolose 1:13, 14) Mwene wa tu kula mu ubhika wa usuku, yú wa tu bheka mu Utuminu wa Mon’ê wa kazola. ¹⁴ Kwa mwène ku tu tambula o ufôlo wa kujituka ku ungunji. Kwa mwène we ku tu tambwila o muloloko wa ituxi yetu.

Perspicaz Vol. 3 pág. 412 parág. 2-4

O Utuminu wa Nzambi

“O Utuminu wa Mon’ê wa Kazola.” Mu kubhita dikwinyi dya izuwa kyoso Jezú kya bande ku dyulu, mu Pendekoxi wa 33 K.K, o maxibulu mê a mono kwila mwene ‘a mu zangeleka ku kadilu ka Nzambi’ kyoso kya lundulula o nzumbi ikôla kuthandu dyâ. (Ik 1:8, 9; 2:1-4, 29-33) Ene anga a mateka o kubhanga mbandu ya “kikutu kyobhe,” anga a mateka we o kubhanga mbandu ya “kifuxi kya zele mba kikôla,” o Izalayele mu nzumbi.—Jih 12:22-24; 1Ph 2:9, 10; Ng 6:16.

Kidistu wa xikama ku kadilu ka Tat’ê, mwéne we o Mutwameni wa kilunga kiki. (Ef 5:23; Jih 1:3; Fi 2:9-11) O Bibidya ilondekesa kwila tundé ku Pendekoxi ya 33 K.K. Jezú wa mateka o kutumina o maxibulu mê. Kyoso Phawulu kya sonekena o Jikidistá akwa Kolose ku hama ya dyanga, wa zwela kwila Jezú wa kexile kya ni Utuminu: “[Nzambi] wa tu kula mu ubhika wa usuku, yú wa tu bheka mu Utuminu wa Mon’ê wa kazola.”—Kol 1: 13; sokesa ni Ik 17:6, 7.

O Utuminu wa Kidistu, tunde ku Pendekoxi wa 33.K.K, wa kituka utuminu mu nzumbi, mu kutumina o Izalayele mu nzumbi, o jikidistá a a undu ni nzumbi ikôla ya Nzambi phala kukituka an’a a Nzambi mu nzumbi. (Nz 3:3, 5, 6) Kyoso o Jikidistá a a undu kyá tambula o futu yâ ku dyulu, ka-nda ku a tumina dingi ku Utuminu wa Kidistu mu nzumbi, maji a-nda kala jisobha ku dyulu kumoxi ni Kidistu.—Dij 5:9, 10.

(Kolose 2:8) Alukenu! Ki bhu kale muthu u mi tobhesa, anga u mi bhunda kala kingûmba, ni wanji wê ni makutu, wa kayela mu malunda ma ulongelu wa athu, ni mu jindonda ja mu ngong’umu, o kwa Kidistu ki kyala-ku.

Sentinela 15/08/08 pág. 28 parág. 9

Madisá u tu Katula mu Madivulu a Ngalásya, Efezu, Filipe ni Kolose

2:8—O “jindonda ja mu ngong’umu” ja tu dimuna Phawulu, ima yahi? Ima i bhanga mbandu ya mundu wa Satanaji, yendesa mba i funyisa o ukexilu wa athu. (1 Nzwá 2:16) Mu ima yiyi mwala o ulongelu wa jingijiye ja wanji wa kuzwela, o kumesena o jimbote ni jingeleja ja makutu ja mundu yú.

Kitangelu Kya Bibidya

(Kolose 1:1-20) Eme Phawulu, Phoxolo ya Kidistu Jezú mu vondandi ya Nzambi, kumoxi ni phange yetu Timote. ² Twa sonekena akwa Ngana, a tungu mu Kolose, ya ala jiphange jenu ja fiyele. Ku kale kyadi ku mwal’oko, ni kutululuka ku tunda kwa Nzambi Tata yetu, ni kwa Ngana Jezú Kidistu, Ngana yetu. ³ Twa mu sakidila Nzambi, Tata ya Ngana yetu Jezú Kidistu, kyoso ki tu kala mu ku mi sambela jinga enu. ⁴ Kuma twevu o kuxikana kwenu mwa Kidistu Jezú, ni henda yenu i mwa kwatela akwa Ngana oso. ⁵ Kyoso o ngolokela ya kidi, ya Njimbu Yambote, ki ya bhixila lwa dyanga kokwenu, kyenyókyo kyene ki mwevwa we ku mi zwelela o kudyelel’oko kwijila ku Njimbu Yambote. Kala kiki, o henda ni kuxikana ku mwala na-ku kwa tundu mu kidyelelu kyokyo ki mwala na-kyu, kya kudyelela ima yoyo ya mi lundila mu dyulu. ⁶ Mbata o Njimbu Yambote ya mi sange, koko, mu kusambuka kwê mu ngongo yoso, ya muya ni kwima dingi kyengi ni kusokolola ndumba ya mabesá. Kyen’iki we kya bhiti ni enu, tunde mu kizuwa ki mwevwa o kutanga kyadi kya Nzambi, anga mu kala mu ku k’ijiya mu kidi. ⁷ O kyen’iki mwa di longo-kyu kwa mukwetu Epafala, kamba dyetu twa mu zola, mukwa ku tu kalakela mwa Ngana ni kitongola kyoso. ⁸ Mwene we wa tu jimbwila o henda yenu i mwa tambula kwa nzumbi ya Nzambi. ⁹ Mukonda dya kiki, etu wetu, tunde kizuwa ki twa k’ivu, twa kwata kusamba kwa Nzambi sé kufula, ni ku mi bhingila enu, twa mu bhinga kwa Nzambi, phala enu mwizale ni kwijiya kwa kutongolola o vondadi yê mwene, ni unjimu wa kutongoloka koko kwene mù bhana o nzumbi ya Nzambi. ¹⁰ Phala mu kale mù kwenda kyoso kyandala Ngana, ni kubhanga jinga yoso ya mu wabhela kyambote mwène. Mwandù kwima ibundu mu ikalakalu yambote, hé mwenda ni kukula mu kwijiya kwa Nzambi. ¹¹ O nguzu yê ya fuma i mi swinise katé mwa tena o kukolokota mu ima yoso, ni kuxididika. ¹² Mwenda ni kusanguluka mu kusakidila Tata wa tu bhangesa o kufwama kididi kyetu mu undundu wa akwa Ngana mu Utuminu wa mukengeji. ¹³ Mwene wa tu kula mu ubhika wa usuku, yú wa tu bheka mu Utuminu wa Mon’ê wa kazola. ¹⁴ Kwa mwène ku tu tambula o ufôlo wa kujituka ku ungunji. Kwa mwène we ku tu tambwila o muloloko wa ituxi yetu. ¹⁵ Kidistu mwene kidifwa kya moneka ku mesu, kya Nzambi wa kambe kumoneka ku mesu. Mwène o thungunu, wala ku thandu dya ima yoso yobhange. ¹⁶ Mukonda ima yoso Nzambi wa i bhangela mwa mwène, ni ku dyulu, ni mu ngongo, ni yiyi ya moneka ku mesu, ni yoyo ki yene mu moneka ku mesu, kixi o jinguzu joso ja nzumbi, kixi makuswina, kixi mawungana, kixi atumini. Ima yoso Nzambi wa i bhangela mwa mwène, kuma yoso ya mu tokala mwène. ¹⁷ Kyoso ima yoso kiluwa i moneka, mwène wa dyanga. Mwène wa i kwatesa mu ididi yê, o mwa mwène ima yoso i bhanga o kikalakalu kyâ kya kidi. ¹⁸ Mwène we o mutwe wavu mukutu wê o Kilunga. Mwène dimatekenu dya mwenyu wa mukutu. Mu kufukunuka, mwène thungunu ya madifundu a dyanga ku mu fukununa mu’alunga. Kyen’iki, phala mu ima yoso mwène a kale ku pholo dya ima yoso. ¹⁹ Kuma kya vondadi ya Nzambi mwene, kwila o Mona, uvimba woso wa Nzambi Tata, u tunga mwa mwène ni kutenena kwoso. ²⁰ Wila kiki, Nzambi wa solele we kwa Mona kulwulwila-ku o ima yoso ni mwène Nzambi, kya zubha kubhanga paze ni manyinga ma kufwa kwa Mon’ê ku taka yê; yene yoso kindala i lwulukila kwa mwène o Mona, kixi ima mu ngongo, kixi ima ku dyulu.

8-14 YA KAVWA

O VALOLO YA MAK’Â NZAMBI | 1 TESALONIKA 1-5

“Di Longese Jingyenu Mudyenu, ni Kudikwatekesa, mu di Sokejeke Kumoxi”

(1 Tesalonika 5:11-13) Wila kiki di longese jingyenu mudyenu, ni kudikwatekesa, mu di sokejeke kumoxi, kala ki mwene kubhanga jinga kyá katé kindala. ¹² Twa mi bhingi-phe, jiphange, kwila mwijiya jinga en’yó a kalakala mw’axaxe kenu, a mi tela Ngana ku pholo, phala ku mi endesa ni ku mi longa. ¹³ Athu kala yó, mu a xila kyavulu mwene, ni ku a edikiza jinga o henda, mukonda dya kukalakala kwâ. Enu wenu, kalenu ku paze mudyenu.

Mulangidi 01/06/11 difwe 30 kaxi 12

‘Xinganeke-nu a mu Kalakala mu’axaxi Kenu’

¹² O ‘kukalakala ku pholo’ mu kilunga ki ku bhingi ngó kulonga. Kyene kimoxi ni izwelu yala mu divulu dya 1 Timote 3:4. Phawulu wambe kwila o kafunga wa tokala ‘u kala muthu wa tena kutumina kyambote o dibhata dyê-mwene, ni ku bhangesa kwila an’ê a kala mu ku mu belesela ni ujitu woso.’ O kizwelu ‘kukalakala ku pholo’ mu kilunga, ki ki lombolola ngó kulonga o twana, maji ku bhinga wé kukala ku pholo ku mwiji, ni ‘kwila an’ê a kala mu ku mu belesela.’ Kyenyiki, o tufunga endesa o kilunga, phala kukwatekesa athu oso kubelesela Jihova.—1 Tim. 3:5.

Mulangidi 01/06/11 difwe 32 kaxi 19

‘Xinganeke-nu a mu Kalakala mu’axaxi Kenu’

¹⁹ Ihi i weji bhanga se a ku bhanene ujitu wa katunda? Ki weji sakidila o ujitu yú, u wa tambula? O ‘tufunga’ ujitu wa ku bhana Jihova, ni Jezú Kidistu. U tena kusakidila o ujitu yú, mu kwivwidila kyambote kyoso kya bhanga madiskúlusu, ni ku kumbidila o itendelesu ya bhana o tufunga. U tena we kulondekesa o kisakidilu kyê, mu kutambwijila kyambote o ibhwidisu mu yônge. Ni kukwatekesa o kikalakalu kya bhanga o tufunga, kala o kuboka. Se wa katula mbote ku milongi ya ku bhana ku kafunga, mukonda dyahi ku mu tangela-kyu? Mukonda dyahi ki ulondekesa we o kisakidilu kyé, ku mwiji wa tufunga? Ejiya kwila o tufunga a kalakala kyavulu mu kukwatekesa o kilunga, mu veji dya kukala ni mwiji wâ.

(1 Tesalonika 5:14) Twa mi ambela dingi, jiphange, lembalesenu oso a juwala, imonya a bazedyenu, swinisenu oso a toloka mixima, kwatekesenu oso a bhwila mu kuxikana, athu a lendukidyenu ene oso.

Mulangidi 10/17 difwe 6 kaxi 13

‘Londekesa Henda ya Kidi mu Ibhangelu Yé’

¹³ Kwatekesa yó a zoza mu nzumbi. O Bibidya yamba: “Kwatekesenu oso a bhwila mu kuxikana, athu a lendukidyenu ene oso.” (1 Tesalonika 5:14) Phange javulu a zozele mu nzumbi, a kituka athu a kulu mu nzumbi. Maji, sayi yá a bhingi hanji kwa kwatekesa ni henda. Kyebhi-phe ki tu a kwatekesa? Tu tena ku a kwatekesa bhu kaxi ka Bibidya, mu kuboka na-wu, mba mu kwa évwa. Ki tu tokala kubanza ngó kwila phang’etu wa “swina” mu nzumbi, mba wa “bhwila”. Mu veji dya kiki, twa tokala kulembalala kwila, etu enyoso tu akwa ituxi. Sumbala tu bhanga yoso phala kubhanga o kima kya tokala, maji né kiki tu tondala. Katé mwene poxolo Phawulu wa xikina kwila wexile ni itondalu. (2 Kolindu 12:9, 10) Etu enyoso twa bhingi ku di kwatekesa.

Mulangidi 15/02/15 difwe 8 kaxi 16

Kayela o Kulenduka ni Henda ya Jezú

¹⁶ O ukexilu wetu wa kuzwela. O henda yetu, ya-nda tu bhangesa we ku ‘swinisa oso a toloka mixima,’ ni izwelu yetu. (1 Tesalonika 5:14) Ihi i tu tena o kuzwela phala ku a swinisa? Tu tena ku a tangela kwila, ene ala ni valolo yavulu. Tu tena we ku a ximana ni ku a bhangesa kumona o idifwa yâ yambote, ni uhete wâ. Tu tena ku a lembalesa kwila, Jihova wa a kwatekesa kusanga o kidi, mu kiki ala ni valolo ku mesu mê. (Nzwá 6:44) Tu tena ku a tangela ni kidi kyoso kwila, Jihova u bhana valolo ku jiselevende jê a “toloka mixima,” ni yó a “talamana mu nzumbi.” (Jisálamu 34:18) O izwelu yetu ya henda i tena kuswinisa o athu a toloka mixima.—Jisabhu 16:24.

Tokwesa o Milongi ya Nzambi

(1 Tesalonika 4:3-6) Kuma o vondadi ya Nzambi yen’iyi, kwila: mu zela muxima, o undumbu mu weha. ⁴ Phala kala muthu mudyenu ejiye kutambula kyambote konda ya muhatu’ê mu kikexilu kya kuzela ni ujitu. ⁵ Kana ni hwinga ya hânji yayibha ya ufusa, kala ki bhanga yó ka xikana, a kambe kwijiya Nzambi. ⁶ Bhu kax’abha-phe, ki bhu kale muthu u somboka, mba u bhanga mukwâ phulu mu maka kala yá, kuma Ngana muzokedi a ima yoso yiyi. Kiki-phe twa mi dimuna dingi kala ki twa dyangele ku mi dimuna, ni ku mi bhana umbangi, kuma Mwene hinu wa ka bhana kaxtiku kwa oso a bhanga ima kala yiyi.

Perspicaz Vol. 2 pág. 155 parág. 1

Undumbu

O undumbu kituxi kya dikota ki bhangesa kwila o muthu a tena ku mu sandula mu kilumba mba (ku mu ta kamukonde). (1Ko 5:9-13; Jih 12:15, 16) O poxolo Phawulu wa lombolola kwila o Kidistá u bhanga undumbu, wa mu ta kituxi ku mukutu wê, mukonda wa bhange ima yayibha ni idyandu yê ya kuvwala. Mwene ka kala kyambote mu nzumbi, u xidisa o kilunga kya Nzambi, u kala we mu kilwezu kya ku mu sambukila mawuhaxi a jibha, ejila mukonda dya kuzeka ni muthu. (1Ko 6:18, 19) U bheka ibhidi ku jiphange jê mu kilunga (1Te 4:3-7) mukonda (1), u xidisa o kilunga, u ki bhekela we jisonyi ni lusebhu (Jih 12:15, 16), (2), u fidisa o muthu u ta n’ê o undumbu, kukala ni ukexilu wa zele. Se o muthu dikudi, ki mu fidisa kutambula kijingu kyoso mwene kya kazala, (3), u bhangesa o mwiji wê ku a tala mu ukexilu wayibha (4), ni kwila, u bhekela hadi ku jitata jê, ku munumi’yê, ku ngayala mba ku dibhanga dya muthu wa bhange-nê o undumbu. Mwene kyoso kya ta o kituxi, ka mu bhukumukina o muthu, maji wa mu bhukumukina Nzambi, mukonda Nzambi wa-nda mu fundisa mukonda dya kituxi kya te.—1Te 4:8.

(1 Tesalonika 4:15-17) Twa mi ambela kala kya longa jinga mwene Ngana, kuma etu oso twala ku mwenyu, oso twa xala-ku katé bhu kizuwa bhwa kejila Ngana, ki tu di fike kwila twa kà twamenena akwetu aya ku kilu. ¹⁶ Kuma Ngana mwene wa kà tuluka ku dyulu, ni kutesa nzongo, ni dízwi dya kota dya jyanju, ni koloneta ya Nzambi. Bhenyobho o madifundu a fila mu kuxikana Kidistu, ene a kà dyanga kufukunuka. ¹⁷ O kya kà zubha o kufukunuka, ni etu twala ku mwenyu, twa xala-ku, twa kà zangumuka kumoxi ni ène ku matuta, phala kutakana ni Ngana mu dimbinza. Kyenyoko twà kalela-ku kyá kumoxi ni Ngana.

Mulangidi 15/07/15 difwe 14 kaxi 14-15

‘O Kubhuluka Kwenu Kwa Zukama!’

¹⁴ Ihi ya-nda bhita kyoso Ngongo dya Mangongo kya-nda mateka kuzukutisa o mundu wa Nzambi? O Bibidya izwela kwila, o Mon’a muthu “wa kà tuma jyanju jê ni ji bhongolole athu’ê angene ku mbandu jiwana ku tunda o kitembu, tunde kwa suku o’xi katé kwa suku o dyulu.” (Máluku 13:27; Matesu 24:31) O kikalakalu kiki kya kubhongolola, ki ki lungu ni kithangana kya sola o Jikidistá a a undu mu veji ya dyanga. Ki ki lungu we ni kithangana kya kuta o kidimbu kya suku-ku ku Jikidistá a a undu, a-nda kala hanji mu ixi. (Matesu 13:37, 38) O kidimbu a-nda ku ki ta ande dya kumateka o hadi ya dikota. (Dijingunwinu 7:1-4) Mu kiki, ihi ilombolola o kikalakalu kiki kya kubhongolola? Kilombolola o kithangana, kyoso o Jikidistá a a undu a-nda kala hanji mu ixi, a-nda tambula o ujitu wâ ni kuya ku dyulu. (1 Tesalonika 4:15-17; Dijingunwinu 14:1) O kizulukutu kiki, kya-nda bhita kyoso Ngongo dya Mangongo kya-nda mateka kuzukutisa o mundu wa Nzambi. (Izekiyele 38:11) Kala kya tangele Jezú, mu kusuluka, o ‘athu a yuka a-nda di mwika kala dikumbi mu Utuminu wa Tata yâ.’—Matesu 13:43.

¹⁵ O kwila kiki kilombolola kwila, o Jikidistá a a undu a-nda ku a “ambata ku dyulu?” Athu avulu mu Kidistándade a xikina kwila, o Jikidistá a-nda ku a ambata ku dyulu ni mikutu ya xitu. Ene a xikina we kwila, a-nda mona Jezú kwíza mu matuta phala kutumina o ixi. Maji o Bibidya ilondekesa kwila, kyoso Jezú kya-nda kwíza, o athu ka-nda mu mona ni mesu. O Bibidya i zwela: Kwa “kà tukuluka o kijimbwete kya Mon’a Muthu ku dyulu” ni kwila Jezú wa-nda kwíza mu “matuta ma dyulu.” (Matesu 24:30) O Bibidya i zwela we kwila, ‘xitu ni manyinga ki i tena kubhingana mu Utuminu wa Nzambi.’ Mu kiki, o athu a-ndaya ku dyulu, a-nda bhinga ku ‘kituluka. Mu kithangana kya kwila o dyesu pote, kyoso hádya ki xika o koloneta ya sukidila-ku.’ (Tanga 1 Kolindu 15:50-53.) O Jikidistá a a undu a-nda kala hanji mu ixi, a-nda ku a bhongolola ni lusolo lwoso.

Kitangelu Kya Bibidya

(1 Tesalonika 3:1-13) O ku tu ejil’uku, kwila o hele ya tu kumu kyá, ki tu tena kukinga dingi kithangana. ² Hé tu kana kuxala ubheka wetu mu Atena. Anga tu katula phang’yetu Timote, ngunza ya Nzambi, mukalakadi ni mukwetu mu kutula o Njimbu Yambote ya Kidistu, twa mu tumu phala ku mi swinisa mu kuxikana kwenu, ³ mbé ki bhu kale muthu mudyenu u bhwila n’a vutuke ku dima mukonda dya jihadi ni izudidiku. Kuma en’wenu mwa k’ijiya kwila a tu xindila-ju kwala Nzambi, mukonda yene we o vondadi yê phala etu. ⁴ Kya kidi kyene, kuma ni ki nga kexile ku mwal’oko, nga mi tangelele-kyu kwila twa-nda kutala hadi! O ku pholo kunu-phe mwa ki mono mwene kwila kyene kya bhiti! ⁵ Mukonda dya kiki, eme wami kya ngi kumu o kukala ni héle ya kuxala ubheka, eme nga tumine Timote kwijiya kyoso ki mwa mu kwenda mu kuxikana kwenu. Sumbala o Dyabhu we ka tena ku mi dyangula kinéne, o kukalakala kwetu kwoso ni ku-yê ngó! ⁶ Timote-phe kya tu sange kunu kindal’iki, wa tundu ku mwal’oko, wa tu bhekela hundu yambote ya kuxikana kwenu ni henda yenu, kuma hanji mwa tu lembalala kyambote, mwa tu indi ku tu mona mesu, kala etu we ki twa m’indi enu. ⁷ Mukonda dya kiki, enu jiphange, muxima wa tu tula mu kutâta kwetu ni jihadi, mù kwivwa o kuxikana kwenu. ⁸ Kuma ki twal’iki, enu se mu kolokota mwa Ngana, etu we tu laya ni kidi mwene. ⁹ O kiki ng’ila kyebhi mu kusakidila Nzambi kala kya tokala mukonda dyenu, mukonda dya ngalasa yoso i twa mi tanena bhu pholo ya Nzambi yetu! ¹⁰ Ni usuku ni mwanya ngala kusamba ni kujiza, phala tu mi mone dingi o jipholo, ni tu mi zubhile yoso ya kambe mu kuxikana kwenu. ¹¹ Kiki-phe Nzambi yetu, Tata yetu mwene, ni Ngana yetu Jezú Kidistu, a lungise o njila yetu ko kwenu, phala tuye ku mi kunda. ¹² Enu-phe Ngana a mi bandekese, a mi vudisile dingi o henda yenu mudyenu ni athu oso. O henda yenu yene’oyo i kule dingi kinéne, kala o henda yetu i twa mi kala na-yu. ¹³ Phala o mwène a mi kwatese mixima mu kuzela ku kamba kwêla, bhu pholo ya Nzambi yetu, Tat’etu, katé bhwoso bhwa kà tukulukila Ngana yetu Jezú kumoxi ni akwa Ngana oso.

15-21 YA KAVWA

O VALOLO YA MAK’Â NZAMBI | 2 TESALONIKA 1-3

“O Muthu wa Kiswéya u Tukuluka”

(2 Tesalonika 2:6-8) O kiki sayi-ku kyoso kya fudisa kwila o im’yiyi i bhita kindala, enu’enu mwa k’ijiya. Maji hinu-phe o Muthu wa Kiswéya u tukuluka bhu thembu yê. ⁷ Kuma o Uswéya wa Kaswekele wa kwata kyá kukalakala, maji sayi-ku hanji wala kufudisa, katé kya kà mu katula mu njila. ⁸ O kya kà zubha ku mu katula-ku, kyéne kya kà tukuluka o Kisweyi’ókyo, u bhinga Ngana Jezú kyà kèza wa kà mu jibha ni muha wa dikanu dyê, wa kà mu bhwisa-ku ni kisuma kya kutukuluka kwê-mwéne.

Perspicaz Vol.1 pág. 704 parág. 3

Kuxila Nzambi

Sayi dingi kima ka kijiya, ki ki difu ni “kikutu kikôla” kya Jihova.” O Kima kiki ka kijiya kya lungu ni usweya wa kaswekele.” O kima kiki ka kijidile ku Jikidistá ja kidi mba kyexile kima kya kaswekele, mukonda mu izuwa ya Phawulu, o ‘diyala dya kiswéya’ ka di tungunwine luwa kala kibuka. Né mwene kyoso kya mu tungununa kala kibuka, ka mwijidile luwa kyambote ku athu avulu, mukonda o ima yê ya ibha yeji bhanga, weji bhangela mu kaswekele mu dijina dya Nzambi. Kubhanga kiki kulombolola kubhilukila Nzambi. Phawulu wambe kwila “o usweya wa kaswekele” wa matekene kya kukalakala mu izuwa yê, mukonda kwexile kyá athu mu kilunga akexile mu funyisa phala kubhanga ima ki i tokala mu kitumu kya Kilunga kya Jikidistá, ku disukilu ya bhangesa kwila kumoneka o kibuka kya akwa kulungulula o kidi mba kulungulukila Nzambi. Ku disukilu o kibuka kiki eji ku ki bwikisa kwa Jezú Kidistu, kyoso mwene kyeji tukuluka. O kibuka kiki kya akwa kubalukila Nzambi mba “o muthu” yú wa kiswéya, a mu funyisa kwa Satanaji, weji di zangeleka kuthandu dya ‘oso yó a exana jinzambi’ mba ima ya ubhezelu’ (Mu Ngel., seʹba·sma). O nguma yiyi ya dikota ya Nzambi, falamenda ya Satanaji, yeji nganala kyavulu o athu ni kubhekela o kibwikilu kya yó a kayela o ima ya bhanga mwene. O kiswéya kya kaswekele, kyeji tanga makutu mu ukexilu u londekesa kwila wa mu xila Nzambi, mbé mwene mbombo ku mbodi.—2Te 2: 3-12; sokesa Mat 7:15, 21-23.

(2 Tesalonika 2:9-12) Kuma o kisweya yuná, o ku di d’ikisa kwê, kwenda ni kukalakala kwoso kwa Satana, ni nguzu yoso ni iphata ni madiwanu ma makutu. ¹⁰ Mwène wa kà bhanga mangonya moso, phala kuxômba athu oso anda kutexika. Ene-phe anda kutexika, mukonda ngwâ kutambulula o muxima wa kubhindamena o kidi, ki tena ku a bhulula. ¹¹ Mukonda dya kiki, Nzambi wa a tumikisa nguzu ya a bhekela kavanza ka kutondala, phala a xikane o makutu. ¹² Phala ene oso a kambele o kuxikana o kidi, a wabhelele o makutu ni kubhanga o mangonya, ni vondadi jâ, a kà êlese.

Perspicaz Vol. 2 pág. 808 parág. 6

Makutu

Jihova Nzambi wehela o “ makutu” phala yó a mesena o makutu a xikina o makutu, mu veji dya ku xikina o Njimbu yambote ya lungu ni Jezú Kidistu. (2Te 2:9-12) Kiki kya bhitile mivu kudima ni Sobha ya Izalayele, Akabe. O jipolofeta ja makutu ja bhangesa Akabe ku xikina kwila mwene weji tolola o ita ku Lamote-Ngiliyadi. Maji o polofeta ya Jihova, Mika, wa mu tangele kwila weji bhita ni divuwa. Mu kisumwa kya monene Mika, Jihova wehela kwila o anju i bhangesa o jipolofeta kutanga o makutu ku a Akabe. Kiki kilombolola kwila o anju yiyi, ni kutena kwê wa bhangesa kwila ene ka zwela o kidi, maji a zwela o ima ya tundu ku mixima yâ, kuma yene ya mesenene kwívwa Akabe. Sumbala a mu dimuna, Akabe wa solo ku mu nganala ku makutu yá, yu wafu mu ita.—1Ji 22:1-38; 2Mal 18.

Tokwesa o Milongi ya Nzambi

(2 Tesalonika 1:7, 8) Hé enu-phe mwa tale hadi, u mi bhana kunyoha, kumoxi ni etu, twa tale hadi, bhwoso bhwa kà tulukila Ngana Jezú ku dyulu ni ji-anju jê ja nguzu. ⁸ Mwène wà kèjila mu túbhya tu bhana milengu, mu ku a bhesa kaxtiku, oso kejiya Nzambi ni yó ngwawâ kutumaka o Njimbu Yambote ya Ngana yetu Jezú Kidistu.

Perspicaz Vol. 2 pág. 149 parág. 8

Túbhya

Phetele wa soneka kwila “o mawúlu kiki ala-ku, ni oxi-phe, mu kizwelu kyene kimoxi kya Nzambi, ya xikamena túbhya.” O jivelusu ja mukwa jilondekesa kwila, mwene ka kexile mu zwela ya lungu ni túbhya ku twene mu wika, maji kilombolola o kibwikilu kya kalela-ku. Kala o diluvyu mu izuwa ya Nowé ki di bwikisa o mawúlu ni ixi mu twa tungu, maji dya bhwika ngó o athu a yibha. Kyene we kimoxi, kyoso Jezú kya-nda kwiza ni jyanju jê mu túbhya twa mulengu, wa-nda bwika ngó o athu a yibha ni ukexilu wa mundu, o kubwika kuku, kubwika kwa kalela-ku.—2Ph 3:5-7, 10-13; 2Te 1:6-10; sokesa ni Iz 66:15, 16, 22, 24.

(2 Tesalonika 2:2) Ki mu kwate kulungujuka mu ixinganeku yenu, mba mu sasumuka se bhu kala muthu u mi ambela kwila o Kizuwa kya Ngana kyeza-bhu kyá. Sumba ima yen’yiyi a mi tangela-yu ku muthu woso-woso wene mù kola o Njimbu Yambote, mba a i tange kwala musésedi, mba a mi ambela kwila etu twa i soneka mu mukanda woso-woso.

Perspicaz Vol. 2 pág. 402 parág. 6

Yó Bhuse

“Izwelu yo Bhuse”—Kidi ni Makutu. O kizwelu mu Ngeleku pneuʹma (nzumbi) a ki zwela benge-benge phala kuzwela ya lungu ni madivulu a soneka o jipoxolo. Mu kifika mu divulu dya 2 Tesalonika 2:2, poxolo Phawulu wa tendelesa o jiphange jê ku Tesalonika kwila: Ka “lungujuka mu ixinganeku yenu, mba mu sasumuka se bhu kala muthu u mi ambela kwila o Kizuwa kya [Jihova] kyeza-bhu kyá. Sumba ima yen’yiyi a mi tangela-yu ku muthu woso-woso wene mù kola o Njimbu Yambote, mba a i tange kwala musésedi, mba a mi ambela kwila etu twa i soneka mu mukanda woso-woso.” Tu mona kwila Phawulu u tumbula o kizwelu pneuʹma (nzumbi) ya lungu ni ku di zwelesa bhu kaxi ka “njimbu” mba “mukanda.”

Kitangelu Kya Bibidya

(2 Tesalonika 1:1-12) Eme Phawulu, ni Sidivanu, ni Timote, twa sonekena o Jiphange ja Kilunga kya akwa Tesalonika, enu mwa tokala Nzambi, Tata yetu, ni mwa Ngana Jezú Kidistu. ² O kyadi ni paze i tunda kwa Nzambi, Tata yetu, ni kwa Ngana Jezú Kidistu, i kale jinga ni enu ku mwal’oko. ³ Etu twa tokala kusakidila jinga Nzambi mukonda dyenu, enu jiphange! Mukonda kya tu fwama mwene ku ki bhanga, kuma o kuxikana kwenu kwa mu kula dingi kyengi, ni henda yenu i mwa di kwatela mudyenu yavulu dingi. ⁴ Katé etu twa mi tela thathe mu ilunga ya Nzambi mukonda dya kukolokota kwenu, ni ku xikana mu’axaxe ka izudidiku ni jihadi joso ji mwa bhiti na-ju. ⁵ Bhenyabha-phe, kijimbwete kya di monekena, kya kutetuluka kwa yuka kwa Nzambi. O ibundu i tunda ku ima yen’yiyi, i bhekela ku mi kita kuma mu athu mwa fwama mu Utuminu wa Nzambi; mbata o Utuminu wen’yú wene u mwa mu talela o hadi. ⁶ Kala kiki, kima kya yuka ki bhanga Nzambi kyen’iki: O ku a vutwila hadi, ene oso a mi talesa enu hadi. ⁷ Hé enu-phe mwa tale hadi, u mi bhana kunyoha, kumoxi ni etu, twa tale hadi, bhwoso bhwa kà tulukila Ngana Jezú ku dyulu ni jyanju jê ja nguzu. ⁸ Mwène wà kèjila mu túbhya tu bhana milengu, mu ku a bhesa kaxtiku, oso kejiya Nzambi ni yó ngwawâ kutumaka o Njimbu Yambote ya Ngana yetu Jezú Kidistu. ⁹ En’yó o kaxtiku kâ kà kala kingumba kinangenena, o bhu pholo ya Ngana a kà sandula-bhu, ni kufuma ya kuswina kwê. ¹⁰ Kiki kyene kya kà bhita bhu Kizuwa kyokyo, bhwoso bhwa kèjila mwène mu kutambula o fuma ku athu’ê angene, ni ujitu ku athu oso yó a mu xikana. Kuma enu mwa xikana umbangi u twa bhana mudyenu, muanda kwa kà kala we mu ‘axaxe kâ mu kizuwa kyenyokyo. ¹¹ Kyen’iki, kyene ki twene ku mi sambela jinga phala Nzambi yetu a mi kite mu athu mwa fwama o kixanu kya mwenyu wobhe wa m’ixanena. Twa mu bhinga we phala mwène mu nguzu yê a tenese o jivondadi jenu joso ja kubhanga o ima yambote, ni a mi zubhile o kikalakalu ki mwalù bhanga mu kuxikana. ¹² Phala mu kyen’iki o dijina dya Ngana yetu Jezú difumane mudyenu, ni enu mwa mwène, kala kya tokala mu kyadi kya Nzambi yetu, ni kya Ngana Jezú Kidistu.

22-28 YA KAVWA

O VALOLO YA MAK’Â NZAMBI | 1 TIMOTE 1-3

“Bhangenu Nguzu Phala mu Tambule Ikalakalu mu Kilunga”

(1 Timote 3:1) O yá maka a kidi kyene: Se muthu winda kididi kya kafunga, wendi ufunu wambote.

Mulangidi 08/16 difwe 16 kaxi 3

O Kwila u Divwa Kuma wa Tokala Kubhanga Dingi mu Sidivisu ya Jihova?

³ Tanga 1 Timote 3:1. Poxolo Phawulu wa ximana o jiphange a mesenene kukala tufunga. Se muthu wa mesena kukwata kima kyala dikanga, mwene wa tokala ku di sunga mba kusununa o lukwaku lwê, phala kukwata o kima kya mesena. Mu kiki, xinganeka phange wa mesena kukala mukwatekexi wa tufunga. Mwene wejiia kwila, phala kukala mukwatekexi, wa tokala kubhanga nguzu phala kukala ni ídifwa yambote. Kyoso kya-nda kala mukwatekexi wa tufunga, mwene wa tokala kubhanga dingi nguzu mu kulungulula o idifwa yê, phala kukala kafunga mu kilunga.

(1 Timote 3:13) Mukonda oso a sedivila kyambote mu kikalakalu kyâ, a nganyala ujitu wambote, kuma a soko-bho kùbhwa wôma mu kubhana umbangi wa kuxikana kwâ kwene na-ku mwa Kidistu Jezú.

Ministério do Reino 2/79 pág. 3 parág. 7

Yó a Mesena Kutambula Ujitu wambote

⁷ Ki ki bhonzo kutendela se mukonda dyahi Phawulu wambe kwila o mayala yá a ‘mesena kutambula ujitu wambote.’ Kiki ki kilombolola kutambula kikalakalu kya ungana kya ngeleja kala kya banza a moxi’mu. Mu veji dya kiki, o akwatekexi a tufunga, a ‘sedivila kyambote mu kikalakalu kyâ,’ ejiya kwila Jihova ni Jezú a-nda ku a besowala, ejiya we kwila a a xila ni ku a kwatekesa ku kilunga kyoso. Ene a “bhwa wôma mu kubhana umbangi wa kuxikana kwâ kwene na-ku mwa Kidistu Jezú.” Ene a a ximana, mukonda dya kubhanga kyambote o kikalakalu kyâ; a kolokota we mu kixikanu kyâ, a zwela ni kuswina kyoso kya tula o njimbu yambote; kà kala ni wôma wa ku a xongwena.

Tokwesa o Milongi ya Nzambi

(1 Timote 1:4) Athu enyá a tangele kwila, kana kukayela we mísoso, ni jingo ja vumu ki ji moneka bhu ja suku, ji bheka ngó jiphata, ki ji bheka kudibanda mu kuxikana kwala mwa Nzambi.

Perspicaz Vol. 2 pág. 197 parág. 1

Misoso ya Lungu ni Mwiji

Ki kyexile dingi kima kya valolo o kudilonga ni kuzoka o maka yá, benge-benge mu izuwa kyoso Phawulu kya sonekena Timote. Ki kyexile dingi ni valolo kubhaka o madivulu a misoso ya miji. Mukonda Nzambi ka kexile mu mona dingi o katungu kexile bhu kaxi ka athu, ki kale ku Jijudé ni yó kexile Jijudé, mu kilunga Jikidistá. (Ng 3:28) Ku mbandu ya mukwa o isoneku mba misoso ya lungu ni mwiji, ya zwelele kyá ya lungu ni wijilu wa Kidistu bhu kaxi ka mwiji wa Davidi. Ni kwila, kyoso Phawulu kya bhana o kitendelesu kiki, ki kweji kulaleka dingi kate o Jeluzaleme kyeji i bwika, kumoxi ni madivulu a misoso a Jijudé. Nzambi ka lange o madivulu yá. Mukonda dya kiki Phawulu ka mesenene kwila Timote ni Kilunga, a landuka mu kuzanga kithangana kyavulu mu kutokwesa ni kuzoka mukonda dya maka kála ni valolo kala a lungu ni mwiji wa muthu, mukonda o ima yiyi ki yeji kwatekesa kukolesa o kixikanu kyâ. O misoso ya miji, yala mu Bibidya yeji tena kulondekesa se nanyi o Mexiya, o misoso yiyi ya wijilu wa Mexiya, yene ya betele o kota phala o Jikidistá. O misoso ya mukwa ya miji i tu sanga mu Bibidya, phala kulondekesa ngó o kidi kya misoso yala-mu, kiki kilondekesa kwila o yene izwela o kidi.

(1 Timote 1:17) Mu kyenyiki, o mwenexi yó, kene kùfwa, kene kumoneka ku mesu, o Nzambi imoxi ngó—a tambule ujitu ni fuma mu mivu ni mivu sè dizubhilu! Amén.

Achegue-se pág.12 parág. 15

“Talesenu! Jihova, Mwene Nzambi Yetu”

¹⁵ Dijina dya mukwa dya ujitu dya Jihova ‘Mwenexi kene kùfwa’ mba Sobha Inangenena.’ (1 Timote 1:17; Dijingunwinu 15:3) O kiki kilombolola ihi? Kubhoza kutendela o maka yá mukonda etu ki twala ni kwijiya kwa soko, maji Jihova muthu wa kalelaku mu mawukexilu oso ku xahulu ni ku hádya. Jisálamu 90:2 yamba: “Tunde xahulu katé ku hádya, eye Nzambi u nangenena.” Mu kiki, Jihova k’ene ni dimatekenu, mwene wene-ku kyá tundé xahulu. Ki fwama ku mwixana “Mukulu-wa-Ndamba”—mwene wa kexile-ku kyá mu mivu ki tu tena ku i kondala, ande dya kukala muthu mba kima mu ngongo! (Daniyele 7:9, 13, 22) Nanyi u tena kuzwela kwila Jihova ka fwama kukala o Ngana Suke-ku mu ngongo yoso?

Kitangelu Kya Bibidya

(1 Timote 2:1-15) Nga ku ambela-phe kuma, ku ima yoso, ku dyanga o kubheza, ni kusamba, ni kusakidila Nzambi mukonda dya athu oso. ² Kwa tokala kubhingila jisobha, ni oso ala ni kijingo kya kutumina, phala tu tene kutunga ni muxima wa batama, sè kavwanza, sè jimvunda, mu ujitu ni wendelu wayuka. ³ Kyenyiki kima kyambote, o Nzambi, Mubhuludi wetu, kyene kya mu wabhela. ⁴ Mwène mukwa kumesena kwila athu oso a bhuluke, eze mu kwijiya o kidi. ⁵ Mukonda sayi-ku Nzambi imoxi ngó, ni Mubhangedi umoxi ngó, u bhita bhu kaxi ka Nzambi ni athu—mwène o muthu Jezú Kidistu, ⁶ wa di bhele kíximbi kya ku tu kula etu ene oso. O yú wene umbangi wê waxalela, wa bhana bhu thembu yoso ya tokala, kwila Nzambi wendi athu oso a bhuluka. ⁷ Kyene kya bhangesa ku ngi katula eme mu kukala poxolo, ni kukala mesene ya oso ka tokala mu mwiji wa Jijudé. Mbé ku a tudila o njimbu ya kuxikana ni ya kidi. O ki nga mu zwel’iki-phe ki makutu, nga tange kidi. ⁸ Wila kiki, nga mesena kwila athu oso a di bhakula kwa Ngana Nzambi, a sambe jinge ku ididi yoso, o mu kusamba a tena kuleka o maku mazele sè kizembu sè jimvunda. ⁹ Kyene we, nginda ahatu a kemba ni izwatu ya fwama muthu wa sonyi, a kala jinjimu. Kana kukemba ni usamwinu wa bhônzo, mba matunda a ulu, mba ni jiphélula, ni izwatu yate kitadi kyavulu. ¹⁰ Maji kota uzwatelu wa kubhanga ima yambote, kala kya fwama ahatu a sola kuxila Nzambi. ¹¹ O ahatu a di longe ni kudixibha ni kubelesela. ¹² Eme o muhatu ki ngi mu ehela kukwata kulonga, mba kutambula ukota wa kutumina o diyala. Ahatu kikale a batame. ¹³ Kuma a dyangele ku mu bhanga Adá, Eva wa kayela. ¹⁴ Adá we ka mu nganalele, a mu nganalele o muhatu, yú wa twamena kutondala o kijila kya Nzambi. ¹⁵ Kyene we kimoxi, muhatu hàdya wa kà bhulukila mu kuvwala ana, se u jijila kwenda mu kuxikana, ni mu henda, ni mu kukwata kilunji, ni mu kuzela moxi.

29 YA KAVWA–4 YA KAKWINYI

O VALOLO YA MAK’Â NZAMBI | 1 TIMOTE 4-6

“Kuxila Mba Kuzola Nzambi mu Veji Dya Jimbongo”

(1 Timote 6:6-8) Kuma kya kidi kyene, o kuxila Nzambi-phe ni kutululuka kwê, nganyu mwene ya dikota, kabasa muthu wa tena kusanguluka ni kyoso kyala na-kyu. ⁷ Mukonda mu ngong’umu ki tweza-mu ni kima, ki twandu tena we kwambata-mu kima! ⁸ Kala kiki, se twa mono-phe kya kudya ni kya kudivunga, ima yenyi’yi i tu soke.

Sentinela 01/06/03 pág. 9 parág. 1-2

Dilonge Kusanguluka ni Kyoso ki Wala Na-kyu

Phawulu wa sangulukile ni kyoso kya kexile na-kyu. Ihi i lombolola o kusanguluka ni kyoso ki wala na-kyu? Kilombolola kusanguluka ni kya kudya ni kya kudivunga. Mu ku zwela ya lungu ni maka yá kwa Timote, wa kexile mu bhanga-né kumoxi o ukunji, Phawulu wambe: “Kuma kya kidi kyene, o kuxila Nzambi-phe ni kutululuka kwê, nganyu mwene ya dikota, kabasa muthu wa tena kusanguluka ni kyoso kyala na-kyu. Mukonda mu ngong’umu ki tweza-mu ni kima, ki twandu tena we kwambata-mu kima! Kala kiki, se twa mono-phe kya kudya ni kya kudivunga, ima yenyi’yi i tu soke.”—1 Timote 6:6-8.

Tala kwila, Phawulu wa bundu kusanguluka ni kyoso ki wala na-kyu, ni kuxila mba kuzola Nzambi. Phawulu wa mono kwila o kuzediwa kwa kidi kwijila mu kuxila mba kuzola Nzambi. Kiki kilombolola kuta ku pholo o sedivisu ya Nzambi mu veji dya kusota jimbote mba umvwama. O kukala ni “kya kudya ni kya kudivunga,” yexile o ima ya bhindamene Phawulu phala kusuluka kuta o sidivisu ya Nzambi ku pholo. Phala Phawulu, o kusanguluka ni ima ya kexile na-yu, kyexile o kudyelela kwa Jihova, ki kale mu ithangana ya bhonzo mba kana.

(1 Timote 6:9) Mukonda oso-phe a bhindamena kukala jimvwama, ene kudibhala mu kudyanguka, anga afwa mu mubhetu, ni mu jihânji javulu jayibha ji tobhesa, ji bheka muthu mu kusenguluka anga u jikinina mu dibwikilu.

Despertai! 06/07 pág. 6 parág. 2

Kyebhi o Hanji ya Kukala Mvwama, i Tena ku ku Funyisa?

Mu kidi, ko athu oso afwa mu kusota o jimbongo. Né kiki, o mwenyu wâ, u tena kukala mu kilwezu mukonda dya kubhanga yoso ni yoso phala kusota o umvwama. Ku mbandu ya mukwa, o muthu ka laleka ku mwenyu, mukonda dya ibhidi ijila ku salu, kukamba kitadi, kukamba kilu, o ndolo ya mútwe ki i bhiti mba mawuhaxi engi. Né mwene se o muthu u mona kwila, wa bhingi kulungulula o ukexilu wa mwenyu wê, nange kiki, ki kya-nda mu kwatekesa dingi, kya-nda kala tádidi kyá. Nange o kaza dyê ka-nda mu dyelela dingi, o twana nange ka-nda sanguluka, kà kala wa ni sawidi yambote. Nange ki bhana kuyudika o ima ya zanganya ku mwenyu, maji kubhinga nguzu yavulu. Mu kidi, o athu yá a bhita mu mavuwa mavulu edi kala jisongo.—1 Timote 6:10.

(1 Timote 6:10) Kuma o lwimbi lwa kitadi, lwene lundânji lubhana o ima yoso yayibha. Amoxi-moxi-phe, mukonda dya kudisunga mu ku ki kwata, a jimbila o kuxikana, ya a di toma mu mavuwa mavulu mukwâ ni jisongo.

Despertai! 11/08 pág. 6 parág. 4-6

Ima Isamanu Ibhekela o Kusanguluka Kwa Kidi

Kala ki twa mono mu milongi ya dyanga, o athu a bhanga yoso ni yoso phala kusota o jimbote kala kyéne o kima ki a bhekela o kuzediwa kwa kidi; maji mu kidi o nguzu ya bhanga, kingoho. O muthu u kala ni ukexilu yú, kà luwala ngó maji u dibhana we ni maka avulu. Mu kifika, kà kala ni ukamba wambote ni jindandu ni makamba mê, mukonda dya kusota o jimbongo. Ku mbandu ya mukwa, o kukalakala kyavulu, o hele, ni ibhindamu ya mukwa ku mwenyu, i bhangesa kukala sé kilu. Ndongixi 5:12, yamba: “O kilu kya muthu u kalakala, ki towala mwene nzwé, né wedi bhwa tolo, mba u dya bhwa vulu. Maji o mvwama, mukwa itadi ya vulu, o itadi yê ki i mwehela kuzeka.”

Mu veji dya kukala ngó patalá yayibha, o kitadi ki nganala we. Jezú Kidistu wa zwela ya lungu ni “músendu wa jimbôngo.” (Máluku 4:19) Mu izwelu ya mukwa, o jimbongo ji kanena o kuzediwa maji ki ji kumbidila o kikanenu kiki. Mu veji dya kiki, ji bhekela o hanji ya kumesena dingi. Ndongixi 5:10 yamba: “Woso u zola o kitadi, o kitadi ki mungu ki mu kuma dingi.”

Kala ki twa mono, o kuzola o kitadi kubhekela dingi maka, mu veji dya kubatula o maka, ku disukilu, o muthu u luwala, u tekuka, katé mwene u tena kubhanga usweya mukonda dya kitadi. (Jisabhu 28:20) O ima i bhekela o kuzediwa kwa kidi, o ukexilu wa kubhana, o kuloloka, o kukala ni kitongolwelu kya zele, o henda, ni kukula mu nzumbi.

Tokwesa o Milongi ya Nzambi

(1 Timote 4:2) O mawulongelu enyá a tunda ku athu a tanga makutu ni kàdya, kuma o kitongolwelu kyá kya di fwila mukonda kya xixidila kala kyawuka ku felu ya tema.

Continua a Amar a Deus pág. 23-24 parág. 17

Kyebhi ki tu Tena Kukala ni Kitongolwelu Kya Zele?

¹⁷ Poxolo Phetele wa soneka: “Mu kale ni kitongolwelu kya zele kyambote.” (1Ph 3:16) Kyoso o muthu kyaya ni kubhukumukina o itendelesu ya Jihova, mu kubhita thembu o kitongolwelu kyê ki kya-nda kalakala dingi kyambote. Phawulu wambe kwila kitongolwelu ki kala kiki, “kya di fwila mukonda kya xixidila kala kyawuka ku felu ya tema.” (1 Timote 4:2) Ihi i bhita se tu dyoha ku felu ya tema? Se tu dyoha kyavulu, o bhu twa dyoha bhu xixidila, ki twa-nda kwívwa dingi ndolo. Kyene kimoxi we, se o muthu k’ene mu bhana mátwi ku kitongolwelu kyê, anga u suluka mu kubhanga o ima ya ibha, o kitongolwelu kyê, kya-nda xixidila. Mu kiki-phe, ki kya-nda kalakala dingi kyambote.

(1 Timote 4:13) Kyosu’iki, katé ki ngi ku sanga, ta muxima wé mu kutanga o Mikanda ya Ngana bhu pholo ya mundu, ni mu kulombolola o Njimbu Yambote, ni mu kulonga oso a xikana.

Perspicaz Vol. 2 pág. 688 parág. 5-6

Kutanga ku Pholo dya Mundu

Mu Kilunga kya Jikidistá. Ku hama ya dyanga, kuma o jikópya ja madivulu a Bibidya ja tolele, mukonda dya kiki, a bhingile ku ji tanga ku pholo dya mundu. Poxolo Phawulu wa tendelesa kwila, o mikanda yê a tokalele ku i tanga mu yônge ya kilunga kya Jikidistá, yu wa tendelesa kutanga we o mikanda ya tumikisine mu ilunga ya mukwa. (Ko 4:16; 1Te 5:27) Phawulu wa tendelesa o munzangala Timote, wexile o kafunga ka ilunga, ‘kuta o muxima wê mu kutanga o mikanda ya Ngana bhu pholo ya mundu, ni kwa tendelesa mu kwa longa.’—1Te 4:13.

O kutanga ku pholo dya mundu, a tokala ku ki bhanga ni uhete woso. (Hab 2:2) Kuma o kutanga ku pholo dya mundu kya lungu ni kulonga, o mutangi wa tokala kutongolola kyambote ya mu tanga ni kutendela kyambote se ihi ya mesena kulonga o musoneki. Wa tokala we ku di langa phala ka bhangese o jingivwidi kukala ni ibanzelu ya ibha mu ima ya mu kwívwa mba kutendela ima yengi. Kala ki londekesa o divulu dya Dijingunwinu 1:3, oso u tanga ni dízwi dya swina, ni yó évwa anga a belesela a-nda zediwa.

Kitangelu Kya Bibidya

(1 Timote 4:1-16) O nzumbi ya Nzambi ya ki ambe ni kujimbuluka kwoso kuma, mu jithembu ja sukidila, sayi athu a ká jimbila o kuxikana. A kà kayela jinzumbi ji sendula, ni mawulongelu ma madimonyo. ² O mawulongelu enyá a tunda ku athu a tanga makutu ni kàdya, kuma o kitongolwelu kyá kya di fwila mukonda kya xixidila kala kyawuka ku felu ya tema. ³ Athu yâ a kà kidika o kukazala exi ki kwa tokala, a kà tuma kujila xitu ni makudya ma mukwâ. Maji o makudya yá, Nzambi wa a bhanga phala ku a tambula ni ku a dya kwala yó a xikana ya ejiya o kidi. Inda o mu kudya mu dyanga jinga kusamba musambu wa ku sakidila. ⁴ Kuma kimbamba kyoso kya bhanga Nzambi kya wabha, kana-bhu kya tokala kudituna-kyu, se athu a ki tambula ni musambu wa sakidila. ⁵ Mu kyenyiki, o kimbamb’okyo Nzambi u ki xikina, mukonda a ki zelesa ku maka ma Nzambi ni mu kusamba. ⁶ Ki u lembalesa ima yenyi’yi ku jiphange ja xikana, u kala u ngunza yambote ya Jezú Kidistu, se u di sanza mu maka ma kuxikana mu wa kudila, ni mu ulongelu wambote u wene kukayela. ⁷ Misoso ya ulalu-phe, ya akwa mundu, ditune jinge-yu kuma ni ku i tanga ngó ki ya fwama. Inda-xi sota jinga kudilonga o ima ya nzumbi, u mone ki uya ku pholo mu kuxila Nzambi. ⁸ Mukonda o kudilonga nguzu ya mukutu, kubhanduluka kwê sayi maji ki kwa kidi; o kuxila Nzambi-phe, kubhanduluka kwê sayi mu ima yoso; mukonda ku dyelelesa ni ku mwenyu yú wa kindala, ni ku mwenyu wa kèza-ku. ⁹ Maka yá a kidi, a tokala ku a tambula ni ku a xikana ni muxima woso. ¹⁰ Kyene kya mu tubhekela kubhânga ni kukalakala kyavulu, mukonda kudyelela kwetu kwa kwata kwa Nzambi ya muenyu, Mubhuludi wa athu oso, kota-kota dingi wa yó oso a xikana. ¹¹ Enda ni kutendela ni kulonga ima yenyi’yi. ¹² Kana kwehela kwila bhu kala muthu u ku tènda mukonda dya undenge. Oso-phe a xikana, eye-mwène a bhane phangu, ni mu kuzwela, ni mu kudituma, ni mu henda, ni mu kuxikana ni mu kuzela. ¹³ Kyosu’iki, katé ki ngi ku sanga, ta muxima wé mu kutanga o Mikanda ya Ngana bhu pholo ya mundu, ni mu kulombolola o Njimbu Yambote, ni mu kulonga oso a xikana. ¹⁴ Uhete yó wa ku bhana mu wanji wa kuzwela kwa Jipolofeta ja Kilunga, kya ku tudile o maku ma adyakimi ku thandu’a mùtwe wé, phala ku ku lumba mu kikalakalu kya Ngana, kana kukala na-wu ni kaxixi. ¹⁵ Kolokota ni kubhanga ima yenyi’yi, suwa ngó yene mu yene, athu oso a ku mone ki uya kyambote ku pholo. ¹⁶ Dilange eye-mwène, ni ulongelu wé. Kwata mwanu mu ima yenyi’yi; kuma mu kubhanga kiki, wa-nda kwila ni eye-mwène u bhuluka, ni ene we a bhuluka oso a kwivwa.