Kayela o Phangu ya Ji-anju

1-2. (a) Mu maukexilu ebhi kitwadifu ni ji-anju? (b) Mu maukexilu ebhi twadifu ni ji-anju?

KUMA tu mundu wa Nzambi, tubhanga mbandu ya mwiji wa Jihova. Kiki kyalungu ni jiphange jetu ku mundu woso ni mazunda ni mazunda a ji-anju. (Dan. 7:​9, 10) Kyoso ki tubanza ku ji-anju mu ithangana yavulu tumona kwila ene kadifu n’etu. Mu kifika ande dya kutubhanga, o ji-anju exile kya mu mivu yavulu ku mwenyu. (Jobe 38:​4, 7) Jene jala dingi ni kutena etu ndenge. O kuzela kwâ kwabeta dingi kota etu ndenge, mukonda etu tu akwa ituxi.—Luk. 9:26.

² Sumbala kwene ima yavulu ki yadifu, maji twala ni ima yadifu ni ji-anju. Mu kifika kala o ji-anju etu we tutena kukayela o idifwa ya Jihova, twala we ni ufolo wa kusola ima itwamesena kubhanga. O ji-anju ala ni majina mâ, ala ni idifwa ki yadifu, kala anju yala ni kikalakalu kyê mu sidivisu ya Jihova. O ji-anju abhingi we kubheza o Mubhangi wâ, etu we twabhingi kubheza o Mubhangi wetu.—1 Ph. 1:12.

3. Ihi itutena kudilonga yalungu ni ji-anju?

³ Kuma twala ni ima yavulu yadifu ni ji-anju, o phangu yâ itena kutuswinisa, tutena kudilonga kyavulu ni ene. Mu milongi yiyi twanda mona kyebhi ki tutena ku kayela o phangu ya ji-anju, o kulenduka kwâ, o henda yâ, o kukolokota kwâ ni yoso yene mubhanga phala kukwatekesa kuzelesa o kilunga.

O JI-ANJU JALENDUKA

4. (a) Kyebhi o ji-anju kyalondekesa o kulenduka? (b) Mukonda dyahi o ji-anju jalenduka kyavulu? (Jisálamu 89:7)

⁴ O ji-anju jalenduka. Sumbala jejiya ima yavulu, jala ni kutena kwavulu, né kiki jibelesela o itendelesu ya Jihova. (Jisá. 103:20) Kyoso kijiya ni kubhanga o ikalakalu ya abhana Jihova, kadinanze mba kalondekesa o kutena kwâ phala kujiximana ngó ku athu. Jene jisanguluka mu kubhanga o vondadi ya Nzambi, né mwene o athu kejiya o majina mâ.a (Dim. 32:​24, 29; 2 Jis. 19:35) Jene kijixikina kutambula o kijingu kya tokala kwa Jihova. Mukonda dyahi o ji-anju jalenduka kyavulu? Mukonda jazolo Jihova ni kwila jimuxila kyavulu.—Tanga Jisálamu 89:7.

5. Kyebhi sayi anju yalondekesa kulenduka kyoso kyabazela poxolo Nzwá? (Tala we ofoto.)

⁵ Tala o kifika kilondekesa kwila o ji-anju jalenduka. Mu muvu wa 96 K.K., sayi anju kamutumbula o dijina dyê mu Bibibya yalondekesa kwa poxolo Nzwá isuma yavulu. (Dij. 1:1) Ihi yabhange Nzwá kyoso kyamono o kisuma? Mwene wafikisa kubheza o anju. Maji o anju yamutangela wixi: “Aluka! Kana kubhanga kiki! Eme wami ngi mubhika kala eye ni jiphange jê . . . Bheza ngó Nzambi!” (Dij. 19:10) O anju yiyi yalondekesa kulenduka kwa dikota! Mwene kamesenene kutambula fuma. Ni lusolo lwoso yatangela Nzwá phala kubheza Jihova Nzambi. Mwene kalondekesa we kwa Nzwá kwila mwene wabetele-kota, Nzwá ndenge. Sumbala o anju yexile musidivila kya Nzambi mu mivu yavulu, Nzwá ndenge, wexile we dingi ni kutena, ni kulenduka kwoso yambe kwa Nzwá kwila wexile mubhika kala mwene. Sumbala mwene wabazela Nzwá maji ka kibhange ni undanda. Mu veji dya kiki, wazwela-nê ni henda yoso. Nange o anju yamono kwila Nzwá wamufukamene ngo mukonda dya isuma yamono.

6. Kyebhi kitutena kukayela o kulenduka kwa ji-anju?

⁶ Kyebhi kitutena kukayela o kulenduka kwa ji-anju? Kala o ji-anju tukalakala kyavulu mu sidivisu ya Jihova sé kudizangeleka, kitwamesena we kutambula kijingu mukonda dya uhete utwala nawu. (1 Ko. 4:7) Kitwatokala we kudimona kwila twa beta kota, akwetu ndenge mukonda twamusidivila kya Jihova mu mivu yavulu mba mukonda twala ni maujitu mukilunga. Mu kidi kyoso kitukala dingi ni maujitu twatokala kuditulula dingi. (Luk. 9:48) Kala o ji-anju, twamesena kusidivila akwetu. Kitwamesena kubhangesa akwetu kubanza kwila etu twabeta kota ene ndenge.

7. Kyebhi kitutena kubazela muthu ni kulenduka kwoso?

⁷ Twabhingi we kulenduka se twamesena kubazela phangyetu mba mon’etu. Kitwatokala kubazela o muthu ni undanda, maji ni henda yoso kala kyabhangele o anju kwa Nzwá. Se kitubanze kwila twabeta kota akwetu ndenge, twanda tena kubhana itendelesu kwa akwetu ni henda yoso ni kuxila kwoso.—Kol. 4:6.

O JI-ANJU JAZOLO O ATHU

8. (a) Kala kilondekesa Luka 15:​10, kyebhi o ji-anju jalondekesa kwila jazolo o athu? (b) O ji-anju jene mutukwatekesa kyebhi mu ukunji? (Tala we o foto yakapa.)

⁸ O ji-anju amona o ima ibhita n’etu mu ngongo, ene atuzolo. Ene asanguluka kyavulu kyoso kyamona muthu wate kituxi kya dikota, udyela, mba kyoso muthu weha kusidivila Jihova, anga uvutuka kwa mwene. Ene asanguluka we kyoso muthu kyalungulula o ukexilu wa mwenyu wê phala kusidivila Jihova. (Tanga Luka 15:10.) O ji-anju ene mutukwatekesa we mu ukunji. (Dij. 14:6) Sumbala ene kabokela o athu, maji atwendesa bhwala muthu umesena kudilonga yalungu ni Jihova. Mu kidi, kitutena kuzwela ni kidi kyoso kwila o ji-anju jitwendesa ku muthu umoxi, maji twejiya kwila Jihova ukwatekesa o jiselevende jê bhukaxi ka ima yavulu, kala bhukaxi ka nzumbi ikôla. (Ika. 16:​6, 7) Né kiki, Jihova utukwatekesa bhukaxi ka ji-anju mu ukunji wetu. Mu kiki, kyoso kituboka tutena kudyelela kwila o ji-anju jitukwatekesa.—Tala o kaxa “Atambwijila o Misambu Yâ.”b

9. Kyebhi kitutena kukayela o phangu ya ji-anju mu kuzola o athu?

⁹ Kyebhi kitutena kukayela o phangu ya ji-anju mu kuzola o athu? Kyoso kitwivwa kwila sayi muthu wavutuka mu kilunga, tutena we kusanguluka kala kibhanga o ji-anju. Twamesena kwila o phang’yetu ukala ni kidyelelu kya kwila twamuzolo ni kwila twasanguluka mu kumona kuma wavutuka kwa Jihova. (Luk. 15:​4-7; 2 Ko. 2:​6-8) Tutena we kukayela o phangu ya ji-anju mu kubhanga yoso itutena mu kikalakalu kya kuboka. (Ndo. 11:6) Kala o ji-anju jitukwatekesa mu ukunji, tusota we maukexilu phala kukwatekesa o jiphange mu ukunji wâ. Mu kifika, tutena kuboka ni muthu wamateka kuboka kindala, mba tutena kuboka ni phange wakuka kyá mba wamukata.

10. Ihi itutena kudilonga ku phangu ya mana Sala?

¹⁰ Ihi itutena kubhanga se o mwenyu wetu ki utwehela kubhanga dingi mu sidivisu ya Jihova? Né kiki tutena kudyelela kwila o ji-anju jitukwatekesa hanji mu ukunji. Tala yabhiti ni phange amwixana Sala,c mu ixi ya Índia. Mu kusidivila kala muboki wa thembu yoso mu 20 a mivu, mana Sala wakwata uhaxi, katenene dingi kwenda né kutunda bhu hama. Mukonda dya kiki, wexile ni kikote ku muxima. Maji ni kikwatekesu kya jiphange mu kilunga ni kitangelu kya Bibidya, mwene wakexile dingi ni ixinganeku yambote. Mu kidi mwene watokalele kusota maukexilu a ubhe a kuboka. Kuma katenene kusoneka mikanda, wexile ngo muboka bhukaxi ka mutelembe. Mwene wexile muxinda ku maxibulu mê, o maxibulu exile mumulondekesa athu amukwa amesenene we kudilonga. Ihi yabhiti? Jimbeji ku pholo phange Sala wexile ni 70 a maxibulu a Bibidya, katenene kudilonga ni enyoso! Mu kiki wabhingi ku jiphange mu kilunga phala kudilonga ni amoxi ku maxibulu mê. Kindala avulu mudyâ amuya mu yonge. O ji-anju jisanguluka kyavulu mu kukwatekesa jiphange kala Sala, mu sidivisu ya kuboka!

O JI-ANJU JENE MUKOLOKOTA

11. Kyebhi o ji-anju jene mutubhana phangu yambote ya kukolokota?

¹¹ O ji-anju jene mutubhana phangu yambote ya kukolokota. Mu mivu yavulu jene jamukolokota mu itatesu ni mu ima yayibha. Jene jamono Satanaji ni ji-anju jamukwa kubhukumukina Jihova. (Dim. 3:1; 6:​1, 2; Jud. 6) O Bibidya izwela yalungu ni anju yabhânge ni dimonyo mu izuwa yavulu. (Dan. 10:13) Tunde mu izuwa ya Adá ni Eva o ji-anju jene mu mona ngo athu ofele kusola kusidivila Jihova. Sumbala ni ima yoso yiyi o ji-anju jamusuluka mu kusidivila Jihova ni kusanguluka kwoso ni kuswina kwoso. Jene jejiya kwila mu kithangana kyatokala Nzambi wanda zubha o kuyibha kwoso.

12. Ihi itukwatekesa kukolokota?

¹² Kyebhi ki tutena kukayela o phangu ya kukolokota kwa ji-anju? Kala o ji-anju, etu we atena kututalatala kyayibha. Kala jene, twadyelela we kwila mukithangana kyatokala Nzambi wanda zubha o kuyibha kwoso. Kyenyiki kala o ji-anju “ki tubhwile mu kubhanga o ima yambote.” (Nga. 6:9) Nzambi wakanena kutukwatekesa kukolokota. (1 Ko. 10:13) Tutena kusamba kwa Jihova phala kutubhana o nzumbi ikola, o nzumbi yiyi itukwatekesa kukala ni mwanyu ni kukolokota. (Nga. 5:22; Kol. 1:11) Ihi i watokala o kubhanga se amukuzukutisa? Dyelela kwa Jihova ni muxima woso, kana kukala ni woma. Jihova wanda kuswinisa jinga ni kukukwatekesa.—Jih. 13:6.

O JI-ANJU JIKWATEKESA KUZELESA O KILUNGA

13. Mu izuwa yasukidilaku kikalakalu kyahi kya katunda kyabhana Jihova ku ji-anju? (Matesu 13:​47-49)

¹³ Mu izuwa yasukidilaku Jihova wa abhana kikalakalu kya katunda phala ku kibhanga. (Tanga Matesu 13:​47-49.) Mazunda a athu mu ngongo yoso amu kwivwa o njimbu yambote. Amoxi mudya, alungulula ukexilu wa mwenyu wâ phala kubhanga o vondadi ya Jihova, amukwa kana. O kikalakalu kya ji-anju, o “kukatula o athu ayibha mw’axaxi ka athu ayuka,” kiki kilombolola kwila o kikalakalu kya o kukwatekesa kuzelesa o kilunga. Kiki ki kilombolola kwila o yo eha kusidivila Jihova nuka dingi anda vutuka, ki kilombolola we kwila mu kilunga nuka mwanda moneka maka. Ne kiki tutena kudyelela kwila o ji-anju jikalakala kyavulu phala kukwatekesa kuzelesa o kilunga.

14-15. Kyebhi kitutena kukayela o phangu ya ji-anju mu kukwatekesa kuzelesa o kilunga? (Tala we o jifoto.)

¹⁴ Kyebhi kitutena kukayela o phangu ya ji-anju mu kukwatekesa kuzelesa o kilunga? Mu kubhanga o mbandu yetu phala o kilunga kizele. Tutena kubhanga kiki mu kukala ni makamba azolo Jihova ni mu kukamba kubhanga ima i muluwalesa. (Jisá. 101:3) Tutena we kukwatekesa o jiphange jetu kukolokota mu ufiyele wa kwa Jihova. Mu kifika, ihi itwatokala o kubhanga se tweza mu kwijiya kwila sayi phange wate kituxi kya dikota? Mukonda dya henda yetu kwa mwene twanda mutangela phala kuzwela ni tufunga. Se mwene kakibhange, étu twanda zwela ni tufunga. Twamesena kwila phange yoso-yoso wakate mu nzumbi amukwatekese ni lusolo!—Tiy. 5:​14, 15.

¹⁵ Sayi athu atele kituxi kya dikota, a akatula mu kilunga. Se kiki kibhita, kitwatokala ‘kudilunga’ nawu.d (1 Ko. 5:​9-13) Kiki kikwatekesa kuzelesa o kilunga. Kyoso kitukamba kudilunga ni muthu amukatula mu kilunga, twamu mulondekesa henda. Kyoso kitubelesela o kitumu kiki kya Jihova, twa mwakwatekesa phala kuvutuka. Se ene abhanga kiki, Jihova, o ji-anju ni etu tusanguluka kyavulu.—Luk. 15:7.

16. Kyebhi kitutena kukayela o phangu ya ji-anju?

¹⁶ Jihova watwehela kwijiya yalungu ni ji-anju ni kukalakala nawu. Yu ujitu wadikota! Tukayele o idifwa yâ, kala o kulenduka, o henda yâ ku athu, o kukolokota kwâ ni yoso yene mubhanga phala kukwatekesa kuzelesa o kilunga. Se tukayela o phangu ya ji-anju, twanda bhanga we mbandu ya mwiji wa Jihova katé ku hádya ni hádya.