O Mukunji Wetu Wabetakota Jezú, Wejiya o Malamba Metu

1-2. (a) Mukonda dyahi Jihova Nzambi watumikisa Mon’ê wakazola, Jezú, mu ixi? (b) Ihi i twanda dilonga mu milongi yiyi? (Jihebelewu 5:​7-9)

MIDI jiyadi ja mivu kudima, Jihova Nzambi watumikisa Mon’ê wakazola Jezú, mu ixi. Mukonda dyahi? Mwene wabhange kiki phala kubhulula o athu ku kituxi ni kukalunga, ni kuzubha o kuyibha kwene mubhanga Satanaji. (Nzw. 3:16; 1 Nz. 3:8) Jihova wejidile we kwila, mu kwiza mu ixi Jezú weji tena kukituka o Mukunji Wabeta dingi kota, o mukunji wejiya o malamba metu. Jezú wakituka o Mukunji Wabetakota, kyoso kyamubatizala ku muvu wa 29 K.K.a

² Mu milongi yiyi twanda dilonga kyebhi o kwiza mu ixi, kwakwatekesa Jezú kukala o Mukunji Wabetakota, wejiya o malamba metu. Kima kyambote kwijiya se ihi yabhange Jezú phala kukumbidila o kikalakalu kiki. Mu kwijiya o maka enyá, twanda tena kuzukama dingi kwa Jihova, né mwene se tuluwala mukonda dya itondalu yetu.—Tanga Jihebelewu 5:​7-9.

O MONA WAKAZOLA WA NZAMBI WEZA MU IXI

3-4. (a) Kyebhi kyexile o mwenyu wa Jezú ku dyulu? (b) Ibhidi yebhi yadibhele nayu Jezú kyoso kyamuvwala mu ixi?

³ Avulu mudyetu twaxisa kya ima yavulu kudima phala kubhanga ima yengi. Mu kifika, amoxi axisa o jindandu jâ ni makamba mâ phala kuya mutunga kididi kyengi. Kubhonza kubhanga kiki. Maji Jezú kwamubhonzele dingi. Mukonda dyahi? Mukonda o mwenyu wê ku dyulu wayukile kyavulu. Mwene wexile o mona wadyanga wa Jihova. Jihova wamuzolele kyavulu, mwene we wasangulukile mu kukalakala ku mbandu ya Tat’ê. (Jisá. 16:11; Jisa. 8:30) Né kiki, o divulu dya Filipe 2:7 dyamba kwila “mwene waditolesa,” waxisa yoso yakexile nayu ku dyulu, weza mu ixi mutunga ni akwa ituxi.

⁴ Xinganeka mu ibhidi yadibhele nayu Jezú kyoso kyamuvwala mu ixi. O jitata ja Jezú exile jingadyama. Twejiya o maka enyá mukonda dya ima yasatela o jitata jê kyoso kyamuvwala. (Iji. 12:8; Luk. 2:24) Kyoso o sobha Helode kyevu kwila Jezú amuvwala, mwene wamesenene kumujibha. Mu kiki phala kubhulula Jezú, o mwiji wê watokalele kulenga ku Ijitu. (Mat. 2:​13, 15) O mwenyu wa Jezú mu ixi kiwadifwile ni mwenyu wê ku dyulu!

5. Ihi yamono Jezú kyoso kyayi ni kukula? O ibhidi yadibhele nayu Jezú mu ixi yamukwatekesa kutendela ihi? (Tala we ofoto.)

⁵ Kyoso kyexile mu ixi, Jezú wamono o kuyibha mu ididi yoso. Mwene wafundu jindandu jakazola, kala o tat’ê, Zuze. Mu ukunji wê, Jezú wamono athu akexile ni dibhute, ifofo, inema ni jitata kutala hadi mukonda dya kufunda o twana twâ. Jezú wevu o ndolo yexile mukwivwa o athu yá. (Mat. 9:​2, 6; 15:30; 20:34; Mál. 1:​40, 41; Luk. 7:13) Kidi kwila kyoso kyexile ku dyulu Jezú wexile kya mumona o hadi yexile mu ixi. Maji kyoso kyexile mu ixi, mwene wejidile kyambote o malamba a athu. (Iza. 53:4) O ibhidi yadibhele nayu Jezú mu ixi yamukwatekesa kutendela o maka ala nawu o athu. Kala kyene mubhita ni athu engi, mwene we watohokele, watandanganyele ni kwila waluwalele we.

JEZÚ WEXILE MUKWATELA HENDA KU ATHU EXILE MUTALA HADI

6. Mukonda dyahi o polofeta Izaya wasoneka o kikanenu kyala mu divulu dya Izaya 42:3?

⁶ Mu ukunji wê, Jezú wakwatela henda ku athu exile mwatalatala kyayibha. Mu kubhanga kiki mwene wakumbidila kikanenu kya Bibidya. Mu Mikanda ya Hebalayiku, o athu ala ni nguzu yavulu ni jimbote javulu a asokesa ni njaludi yafwama ni mixi yonene. (Jisá. 92:12; Iza. 61:3; Jel. 31:12) Maji o athu kala ni kikwatekesu ene mwatalatala kyayibha, a asokesa ni mwenge wobukujule ni mwanga wamuxongota, wakambe ngo bhofele phala kujima. O ima yiyi kiyala ni valolo. (Tanga Izaya 42:3; Mat. 12:20) Bhukaxi ka nzumbi ikola, o polofeta Izaya wasoneka o kikanenu kiki phala kulondekesa o henda yeji kwatela Jezú ku athu exile mwasebhulula ku akwâ.

7-8. Kyebhi Jezú kyakumbidila o izwelu ya polofeta Izaya?

⁷ Matesu walondekesa kwila Jezú wakumbidila o izwelu yiyi ya polofeta Izaya: “Mwene kanda sasujula mwenge woso-woso wo bukujule, kanda jima mwanga uxongota.” Jezú wabhange madiwanu phala kukwatekesa o athu exile mwatalatala kyayibha edile kala mwenge wobukujule, athu kexile ni kidyelelu, edile kala mwanga wamuxongota. Mu kifika sayi kizuwa Jezú wasange diyala wezalele ni dibhute. Nange o diyala didi wejidile kwila keji tena dingi kumusaka ni kwila keji tena dingi kukala ni mwiji wê ni makamba mê. (Luk. 5:​12, 13) Sayi kizuwa Jezú wasange we diyala wexile muxilu, wexile we ni kifidisu mu kuzwela. O diyala didi nange wexile mudivwa kyayibha mukumona athu amukwolela, amuta jithathe jâ, maji mwene katena kubhanga kiki. (Mál. 7:​32, 33) Maji ki kyene ngo!

⁸ Mu izuwa ya Jezú, Jijudé javulu axikinine kwila sayi athu, Nzambi wexile mwatalesa hadi mukonda dya ituxi yâ, mba mukonda dya ituxi ya jitata jâ, mukonda dya kiki exile mukata. (Nzw. 9:2) Mukonda dya kiki, o athu exile mutala hadi exile mwaxongwena, ene exile mudivwa kala kexile ni valolo. Mu kukumbidila o izwelu ya polofeta Izaya, Jezú wasake o athu ya, yu walondekesa kwila Nzambi wa azolo. Kwijiya o maka enyá, kutubhana kidyelelu kyahi?

9. Kyebhi kitutena kumona kwila Jezú watuzolo kyavulu? (Jihebelewu 4:​15, 16)

⁹ Tanga Jihebelewu 4:​15, 16. Tutena kudyelela kwila o Mukunji wetu Wabetakota Jezú, wejiya o malamba metu. Kiki kilombolola ihi? O izwelu imoneka mu velusu 15 yolungulule kala “wejiya o malamba metu,” mu dimi dya Ngeleku ilombolola kuluwala kyavulu mukonda dya hadi itala akwetu, ni kwivwa o ndolo yâ. Mu divulu dya Jihebelewu 10:​34, Phawulu watumbula we o kizwelu kiki mu dimi dya Ngeleku, phala kulondekesa kwila twabhingi kukwatela henda kwa yó ala mu jikaleya. Kyoso kitutanga o Bibidya, tutena kumona kwila Jezú watuzolo kyavulu ni kwila wamesena kutukwatekesa. O athu kexile mu mujijidika phala kubhanga madiwanu. Mu kifika, kyoso kyasake o diyala wexile ni dibhute, mwene weji tena kubhanga kiki sé kumuzukama, maji mwene wasolo kumuzukama ni kumukwata. Nange o diyala didi wabhitile mivu yavulu sé kumukwata dingi ku muthu! (Mat. 8:3) Xinganeka we mu kithangana kyoso Jezú kyasake o diyala wexile muxilu. O Bibidya yamba kwila “Jezú wa mu katula bhwa kexile o mundu, yu wa sondoloka n’ê.” (Mál. 7:33) Sayi kizuwa, muhatu umoxi wasukula o inama ya Jezú ni masoxi mê, yu wa ikondona ni ndemba yê. Mwene wabhange kiki phala kulondekesa kwila wadyela o ituxi yê. Kwexile falizewu amwixana Ximá, wazwela kyayibha yalungu ni muhatu yu, maji Jezú wazokela o muhatu. (Luk. 7:44) Jezú kalondekesa katombo ku athu exile mukata ni ku athu atele ituxi ya makota. Maji mwene wexile mwakwatela henda, wamesenene we kwila ene azukama kokwê. Lelu, tutena kudyelela kwila Jezú utukwatela we henda yavulu.

LELU TWAMUKAYELA O PHANGU YA MUKUNJI WETU WABETAKOTA

10. Ihi yene mubhanga o kilunga kya Jihova phala kukwatekesa o maxilu ni ifofo? (Tala we o jifoto.)

¹⁰ Kuma tu akayedi’a Jezú, tubhanga yoso ni yoso phala kukayela o phangu yê mu kulondekesa o henda ku athu. (1 Ph. 2:21; 3:8) Kidi kwila kitwala ni kutena kwa kusaka o maxilu mba o ifofo, maji tutena kwakwatekesa kukala makamba a Jihova. Mu kifika o madivulu metu ala kya polondo mu 100 ya madimi ndenge, a ijimbwete. Kwala we madivulu phala yo afu o mesu ni yó kene mumona kyambote. O madivulu yá ala kya polondo mu 60 a madimi ndenge. Kwala we ji audyu ni jividyu phala o athu afu o mesu, jene jala kya polondo mu 100 ya madimi ndenge. O kilunga kya Jihova kyene mubhanga o ima yoso yiyi phala kukwatekesa o maxilu ni ifofo kukala makamba a Jihova ni makamba a Mon’ê, Jezú.

11. Kyebhi o kilunga kya Jihova kyene mukayela o phangu ya Jezú? (Ikalakalu 2:​5-7, 33) (Tala we o jifoto.)

¹¹ O kilunga kya Jihova kyene mubhanga nguzu phala kukwatekesa athu oso. Lembalala kwila kyoso Jezú kyamufukununa, walundula o nzumbi ikola phala o athu oso adyongekele mu Fesa ya Pendekoxi, natene kwivwa o njimbu yambote ‘mu madimi mâ a uvwalukilu.’ (Tanga Ikalakalu 2:​5-7, 33.) Mu kukayela o phangu ya Jezú, o kilunga kya Jihova kyene mubhanga madivulu mu 1.000 ya madimi ndenge. Athu ofele ngo azwela o madimi yá. Mu kifika, sayi madimi ku mbandu ya lwiji ni ku mbandu ya thunda ya América, athu ofele ngo azwela o madimi yá. Né kiki, o kilunga kya Jihova kyamubhanga madivulu mu 160 a madimi yá, ndenge. Kiki, kikwatekesa o athu azwela o madimi yá kwivwa o njimbu yambote. O madivulu metu ala polondo mu 20 a madimi ndenge, a akwa Romani. Mazunda a athu azwela o madimi yá amusidivila Jihova.

12. O kilunga kya Jihova kyene we mukwatekesa ananyi?

¹² O kilunga kya Jihova kyene we mukwatekesa o athu ene mubhita mu mavuwa. Phala kubhanga kiki, mazunda a jiphange adibhakula phala kukwatekesa o athu yá. O kilunga kya Jihova kitunga we jinzo mwene mudyongeka athu phala kudilonga dingi yalungu ni Nzambi ni kumusidivila.

O MUKUNJI WETU WABETAKOTA UTENA KU KUKWATEKESA

13. O Mukunji wetu Wabetakota, Jezú, utena ku kukwatekesa bhukaxi kahi?

¹³ O mubhidi wetu wambote Jezú, ubhanga yoso ni yoso phala, kala muthu mudyetu akale kyambote mu nzumbi. (Nz 10:14; Ef 4:7) Sayi bhabha, mukonda dya ibhidi itudibhana nayu ku mwenyu tudivwa kala mwenge wobukujule mba mwanga wamuxongota. Nange tuluwala mukonda dya uhaxi wabhonzo utwala nawu, mba mukonda dya kituxi kitwatele m’ukulu mba tuluwala mukonda twala ni maka ni phange mu kilunga. Mukonda dya kuluwala kuku, tutena kudikwatenena kyavulu mu maka utwala nawu ni kujimba o mabesá utwanda tambula ku hádya. Maji lembalala kwila Jezú wamumona o malamba mé moso, mwene wejiya kyambote kyebhi kiwamudivwa. Mukonda dya henda yene mu kukwatela, mwene wamesena ku kukwatekesa. Mu kifika, kyoso ki uzoza, mwene ukukwatekesa bhukaxi ka nzumbi ikola. (Nz 16:7; Ti 3:6) Ku mbandu ya mukwá, Jezú utena kukwatekesa bhukaxi ka “maujitu” ala mu kilunga, kifwa o tufunga. Utena we ku kukwatekesa bhukaxi ka jiphange ja mukwa, ene anda kuswinisa ni ku kukonda o malamba.—Ef 4:8.

14. Ihi i watokala kulembalala se waluwala?

¹⁴ Se eye waluwala, lembalala kwila Jezú, mwéne o Mukunji wetu Wabetakota. Xinganeka we se kiki kilombolola ihi phal’eye. Lembalala kwila Jihova katumikisa ngo Jezú mu ixi phala kubhana o mwenyu wê kala sata, maji wamutumikisa we phala kwijiya o ibhidi yene mu dibhana nayu o athu. Kyoso ki tuluwala mukonda dya kitondalu kyetu, tulembalale kwila Jezú wala jinga polondo phala ku tukwatekesa “mu kithangana kyatokala.”—Jih 4:​15, 16.

15. Ihi yakwatekesa phange umoxi kuvutuka mu kilunga?

¹⁵ Jezú wamukwendesa we o kikalakalu kya kukwatekesa o athu adisandula ku kilunga kya Jihova, phala ene navutuke. (Mat 18:​12, 13) Tala yabhiti ni phangyetu amwixana Xitevá.b Mu kubhita 12 kya mivu tunde kyamukatula mu kilunga, mwene wasolo kuya mu kyonge. Mwene wambe: “Kyangibhonzele kyavulu, sayi ithangana ngexile muluwala mukonda dya kuxisa o kilunga kya Jihova, kingamesenene dingi kuvutuka. Maji o tufunga adyongeka n’eme angibhangesa kudivwa kyambote, mu kiki ngamesenene kuvutuka mu kubhanga mbandu ku mwiji wa Jihova. O tufunga angilembalesa kwila Jihova ni Jezú amesenene kwila ngikolokota. Kyoso kyabhana o ngolokela ya kwila ngavutuka kya mu kilunga, o jiphange atutambulula kyambote, eme ni mwiji wami. Ku pholo dya kwenda, muhatu wami wamateka kudilonga o Bibidya, lelu ngamusidivila Jihova kumoxi ni mwiji wami.” O Mukunji wetu wahenda, usanguluka kyavulu mu kumona o jiphange joso mu kilunga kukwatekesa yó adyela o ituxi yâ, kuvutuka mu kilunga.

16. Lelu, tutena kudyelela mu ihi? Ku mundu wa ubhe, ihi yanda bhanga Jezú?

¹⁶ Kyoso Jezú kyexile mu ixi, mwene wakwatekesa athu avulu mu kithangana kyabhindamene. Lelu, tutena kudyelela kwila Jezú wanda tubhana o kikwatekesu kitwabhindamena. Kwakambe ngo bhofele, ku mundu wa ubhe, mwene wanda tukwatekesa kukala tu athu ayuka. Tusakidila kyavulu Jihova, o Nzambi yetu mukwa henda, mu kutubhana o Mukunji wetu Wabetakota, o Mukunji wejiya o malamba metu, Mon’ê, Jezú!