Jihova Utena ku Kukwatekesa Kyoso ki Uluwala

1-2. Sayi ithangana poxolo Phawulu wexile mudivwa kyebhi? Ni mukonda dyahi o phangu yê itena kutukwatekesa? (Loma 7:​21-24)

IHI i ubanza yalungu ni poxolo Phawulu? O kwila ubanza kwila mwene wexile mukunji wa jixi jengi wa swina, mulongexi wambote mba muthu wasoneka madivulu avulu a Bibidya? Kyene mwene! Maji mu ithangana yavulu, kala etu mwene wexile mubhânga ni ixinganeku yayibha, kala o kuluwala ni kukala hele.

² Tanga Loma 7:​21-24. Mu mukanda we ku akwa Loma, poxolo Phawulu walondekesa kwila wexile ni ixinganeku yayibha kala etu. Phawulu wexile kidistá wafiyele, maji ne kiki mwene wexile mubhânga ni hanji yakubhanga ima yayibha ni hanji yakubhanga o vondadi ya Nzambi. Mwene we wexile mudibhana ni ixinganeku yayibha yalungu ni maka exile nawu ni ima yayibha yabhangele mu ukulu.

3. O milongi yiyi yanda tambwijila ibhwidisu yebhi? (Tanga we “Kizwelu Kyojimbulule”.)

³ Sumbala Phawulu wexile mubhânga ni ixinganeku yayibhaa moxi dyê, maji mwene kehela o ixinganeku yiyi kumutolola. Mu milongi yiyi twanda tambwijila o ibhwidisu yiyi: Mukonda dyahi sayi ithangana Phawulu wexile mudimona kwila kexile ni valolo? Kyebhi mwene kyexile mudibhana ni ixinganeku yayibha? Ihi itwatokala kubhanga phala kudibhana ni ixinganeku yayibha?

IHI YABHANGESA PHAWULU KUKALA NI IXINGANEKU YAYIBHA?

4. Ihi yabhangesa Phawulu kukala ni ixinganeku yayibha?

⁴ Ima yayibha yabhangele mu ukulu. Ande dya kukituka kidistá, Phawulu amwijidile kala Sawúlu, mwene wabhangele ima yavulu yayibha. Mu kifika mwene wamono kuma kima kyambote kujibha Xitevá. (Ika. 7:58; 8:1) Ku mbandu yengi mwene wexile ku pholo kya kibuka kyexile muzukutisa o jikidistá.—Ika. 8:3; 26:​9-11.

5. Kyebhi Phawulu kyexile mudivwa mukonda dya ima yayibha yabhangele mu ukulu?

⁵ Kyoso kyakituka kidistá, sayi bhabha poxolo Phawulu wexile muditatela mukonda dya ima yayibha yabhangele. Nange mu mivu yavulu o ima yayibha yabhangele yexile mumubhangesa kuluwala. Mu kifika kyoso mwene kyasoneka o mukanda we wa dyanga ku akwa kolindu, mu muvu wa 55 K.K, mwene wambe: “Ki ngi fwama ku ngixana ngi poxolo, mukonda nga zukutisa o kilunga kya Nzambi.” (1 Ko. 15:9) Mu kubhita mivu itanu mwene wambe: “Eme mwene ngala ngi ndenge ya jindenge mwaxaxi ka athu a asolo.” (Efe. 3:8) Phawulu wambe we kwa Timote: “Ngexile mu xinga Nzambi, ngexile ngi mukwa kuzukutisa, nga kakele kyavulu.” (1 Ti. 1:13) Mu kukunda o ilunga, nange Phawulu kwa mubhonzele kyavulu kudisanga ni jiphange mba jindandu ja yó wa azukutisile.

6. Kima kyahi dingi kyexile mutandanganyesa Phawulu? (Tala we kulwiji.)

⁶ Minya mu xitu. Phawulu wazwela yalungu ni kima kyexile mu mutandanganyesa kyavulu, o kima kiki kyedile kala “minya mu xitu.” (2 Ko. 12:7) Mu kidi Phawulu katumbula o maka exile mumutandanganyesa, maji o kizwelu kyatumbula mwene kilondekesa kwila o maka ya exile mumubhekela jindolo javulu. Nange uhaxi, kuluwala mba kima kyengi.b

7. Kyebhi kyexile mudivwa Phawulu mukonda dya kukala mukwa ituxi? (Loma 7:​18, 19)

⁷ O ituxi yê. Sayi bhabha Phawulu wexile muluwala mukonda dya kukala mukwa ituxi. (Tanga Loma 7:​18, 19.) Mwene wamesenene kubhanga o kima kyatokala, maji wexile mumona kwila keji tena kubhanga kiki. Phawulu waxikinine kwila mwene wexile mubhânga jinga phala kabhange o ima yayibha. Mwene wexile mubhanga nguzu phala kulungulula o ukexilu wa mwenyu wê. (1 Ko. 9:27) Maji sayi bhabha o ukexilu we wayibha wexile hanji mudimonekena. Kyoso o ima yiyi yexile mubhita, Phawulu wexile muluwala!

KYEBHI PHAWULU KYEXILE MUDIBHANA NI IXINGANEKU YAYIBHA?

8. Ihi yexile mubhanga Phawulu phala kudibhana ni ixinganeku yayibha?

⁸ Kala kitwamono mu mikanda yasoneka Phawulu, mwene wexile muxinganeka kyebhi o nzumbi ikola itena kukwatekesa o jikidistá kweha o ixinganeku yayibha ni kulungulula o ukexilu wa mwenyu wâ. (Lom. 8:13; Nga. 5:​16, 17) Phawulu walondekesa se idifwa yebhi ni ixinganeku yebhi yayibha yatokalele kubhânga nayu o jikidistá. (Nga. 5:​19-21, 26) Kiki kilondekesa kwila Phawulu wexile muxinganeka se ihi yatokalele kulungulula ku mwenyu wê, mu kusota itendelesu mu mikanda ikola ni kumona se ihi yatokalele kubhanga phala kubhânga ni ixinganeku yayibha. Mu kidi mwene wexile mukumbidila ku mwenyu wê o itendelesu yexile mubhana kwa akwa.

9-10. Ihi yakwatekesa Phawulu kubhânga ni ixinganeku yayibha? (Efezu 1:7) (Tala we o foto.)

⁹ Sayi bhabha Phawulu wexile muluwala, maji mu ithangana yavulu mwene wexile musanguluka. Mu kifika mwene wexile musanguluka mu kwivwa jinjimbu jambote jalungu ni ilunga yexile dikanga. (2 Ko. 7:​6, 7) Mwene wexile musanguluka we mukonda dya ukamba wambote wexile nawu ni jiphange. (2 Ti. 1:4) Ku mbandu yengi, Phawulu wexile musanguluka we mukonda dya kukala ni ukamba wambote ni Nzambi ni ku “musidivila ni kitongolwelu kyazele.” (2 Ti. 1:3) Kate mwene kyoso kyexile mu kaleya ku Loma, mwene waswinisa o jiphange ‘kusanguluka mwa Ngana.’ (Fil. 4:4) O izwelu ya Phawulu ilondekesa kwila mwene kexile mubhita ithangana yavulu mu kubanza mu ibhidi yê mba mu itondalu yê. Kyoso o ixinganeku yayibha yexile mukwiza mu kitongolwelu kyê, ni lusolo mwene wexile mu xinganeka mu ima imukwatekesa kusanguluka ni kukala ni ibanzelu yambote.

¹⁰ O kima kyamukwa kyakwatekesa Phawulu kubhânga ni ixinganeku yayibha, o kumona o sata ya kukula kala ujitu wamubhana Nzambi. (Nga. 2:20; Tanga Efezu 1:7.) Phawulu wejidile kwila eji muloloka o ituxi yê bhukaxi ka sata ya kukula. (Lom. 7:​24, 25) Kyenyiki mwene weji tena kusuluka mukusidivila Nzambi ni kusanguluka kwoso sumbala ni itondalu yê yokulu ni kukala mukwa ituxi.—Jih. 9:​12-14.

11. O phangu ya poxolo Phawulu ikubhangesa kudivwa kyebhi?

¹¹ Kala kyabhiti ni Phawulu, etu we tutena kwivwa kima kyamubhânga moxi dyetu. Kubhonza kuxinganeka, kubhanga ima ni kuzwela ima isangulukisa Jihova. Sayi bhabha tutena kuzwela: “Kokolo dyami!” Sayi phange ya muhatu amwixana Elizac wajimbulula kyebhi kyadivwa, mwene wambe: “Ngisanguluka kyavulu kyoso kingixinganeka mu ibhidi yadibhana nayu Phawulu. Ngidivwa kyambote mu kwijiya kwila k’eme ngo ngidivwa kiki. O phangu yê ingi lembalesa we kwila Jihova umona o ibhidi yamudibhana nayu o jiselevende jê.” Kala Phawulu, ihi itwatokala kubhanga phala kusuluka ni kitongolwelu kyazele ni kusanguluka sumbala ni ixinganeku yetu yayibha?

IHI ITWATOKALA KUBHANGA PHALA KUDIBHANA NI IXINGANEKU YAYIBHA?

12. O kubhanga o ima mu nzumbi itukwatekesa kyebhi?

¹² Bhanga o ima mu nzumbi. O kutanga o Bibidya izuwa yoso, itukwatekesa kudikwatenena mu ima yambote. Tutena kusokesa o kutanga o Bibidya ni ima itubhanga phala kukala ni sawidi yambote. Mu kidi tutena kukala ni sawidi yambote kyoso ki tudya kudya kwambote, kyoso ki tutungutisa o mukutu izuwa yoso ni kyoso kituzeka mu kithangana kya soko. Kyene we kimoxi, etu enyoso twamono kya o mbote ijila mu kutanga o Bibidya izuwa yoso, kudisokejeka phala o yonge, kuya mu yonge, kutambwijila mu yonge ni kyoso kituboka o njimbu yambote. O kubhanga o ima yiyi mu nzumbi, itukwatekesa kusanguluka ni kudibhana ni ixinganeku yayibha.—Lom. 12:​11, 12.

13-14. Bhana phangu ilondekesa kwila kima kyambote kubhanga o ima mu nzumbi.

¹³ Tala o phangu ya phange amwixana Nzwá wala ni 39 a mivu, amutangela kwila wexile ni uhaxi wabhonzo. Ku dimatekenu mwene wexile ni woma wavulu ni hele. Mwene wexile mu banza kiki: ‘Kiki kima kyayibha, mukonda eme ngimunzangala hanji phala kukala ni uhaxi yu!’ Mu kithangana kyenyokyo o mon’ê wadiyala wexile ni mivu itatu. Ihi yakwatekesa manu Nzwá kudibhana ni ixinganeku yiyi? Mwene wambe: “Sumbala ngexile mutohoka kyavulu, maji eme ni mwiji wami twexile mubhanga ima mu nzumbi kala kuya mu yonge, kuboka ni kubhanga o ubhezelu ku mwiji.” Mu kuxinganeka mu ima yabhiti, mwene wasuku mu kuzwela: “Sumbala kudimatekenu tukala ni woma, maji o henda ni kutena kwa Jihova kutukwatekesa kutolola o ixinganeku yayibha. Jihova wangibhana nguzu, mwene utena we kukubhana o nguzu yiyi.”

¹⁴ Phange Eliza twamutumbula kudima, wambe: “Kyoso ki ngiya mu yonge ni kudilonga ubheka wami, ngidyelela dingi kwila Jihova ungivwa ni kwila wangizolo. Kiki kingisangulukisa kyavulu.” Manu Nelu kafunga ka ilunga mu Afrika, kumoxi ni muhatu wê mana Denize ajimbulula se ihi yene mubhanga kyoso kyaluwala. Ene ambe: “Etu twene musuluka mu kubhanga o ima mu nzumbi kala o kusamba, kuya mu yonge, kuboka, kudilonga ubheka, kate mwene kyoso kituluwala. Jihova wene mulondekesa jinga kwila mwene wala kumbandu yetu mu kutukwatekesa kukala ni ixinganeku yambote. Tudilembalala kwila Jihova wanda tukwatekesa ni kutubesowala. Sayi bhabha kitwejiya se kyebhi mwene kyanda tukwatekesa, maji twadyelela kwila mwene wanda bhanga kiki.”

15. Ima yebhi dingi itwatokala kubhanga phala kutolola o ixinganeku yayibha? Ta kifika.

¹⁵ Tutena kubhanga ima yakamukwa phala kutolola o ixinganeku yayibha. Mu kifika xinganeka kwila eye wamukwivwa jindolo ku dikunda. Phala kudisanza kiwatokala ngo kutungutisa o mukutu, maji watokala we kutokwesa yalungu ni uhaxi yu ni kuya kwa dotolo. Mu kubhanga kiki eye wanda tena kwijiya se mukonda dyahi wamu kwivwa o jindolo jiji. Kyene we ki twatokala kubhanga phala kudibhana ni ixinganeku yayibha. Tutena we kutanga o Bibidya, o madivulu metu ni kuzwela ni phange wakulu mu nzumbi. Tumone jindunge jamukwa jitena kutukwatekesa.

16. Ihi itena ku kukwatekesa kwijiya se ima yebhi yene mu kubhangesa kukala ni hele? (Jisálamu 139:​1-4, 23, 24)

¹⁶ Samba phala kwijiya kyambote o maka u wamudibhana nawu. Sobha Davidi wejidile kwila Jihova wamwijidile kyambote. Mu kiki mwene wabhingi phala Jihova kutongolola o ‘ilunji yê yoso.’ (Tanga Jisálamu 139:​1-4, 23, 24.) Eye we utena kubhinga kwa Jihova phala ku kukwatekesa kwijiya se ima yebhi yene mu kubhangesa kukala ni hele ni kwijiya se kyebhi ki utena kudibhana ni ima yiyi. Mu kifika, eye utena kudibhwidisa: ‘Kima kyebhi kya mungibhangesa kukala ni hele? O kwila sayi kima ki ngibhangesa kukala ni ixinganeku yayibha? Mu veji dya kubhanga nguzu phala kweha o ixinganeku yayibha, o kwila ngisuluka mu kubanza mu ima yiyi?’

17. Milongi yebhi i utena kudilonga ubheka wé?(Tala we o foto.)

¹⁷ Mu kudilonga ubheka wé, dilonge milongi yanda kukwatekesa kudibhana ni maka u wala nawu. Sayi ithangana kima kyambote kudilonga yalungu ni idifwa ya Jihova. Mu kifika, kyoso poxolo Phawulu kyaxinganeka mu henda ya Jihova kokwê ni mu sata ya kukula, mwene wamono kwila Jihova wamuzolele kyavulu. Mu kiki, kayela o phangu ya poxolo Phawulu. Tokwesa mu Kadivulu ka Kutokwesa Phala o Jimbangi ja Jihova, mu Índice das Publicações da Torre de Vigia, mba mu madivulu amukwa, milongi yalungu ni henda ya Nzambi, o muloloki wê ni henda yê yakalelaku. Kyoso ki wanda sanga milongi yanda ku kukwatekesa, soneka-yu mu phaphela. Anga u ita mu kididi ki kyanda kubhonza ku isanga. Kyenyiki, kyoso ki umateka kukala ni ixinganeku yayibha, dilonge o milongi yiyi. Anga kumbidila-yu ku mwenyu wé.—Fil. 4:8.

18. Milongi yebhi i tena kutukwatekesa?

¹⁸ Mana Eliza, twamutumbula kudima wadilongo yalungu ni Jobe. Mwene wambe: “Ngadibhele ni ibhidi yavulu mu kithangana kimoxi. Ngadilongo yalungu ni Jobe. Mwene wadibhele we ni ibhidi yavulu mu kithangana kimoxi, mukonda dya kiki waluwalele kyavulu. Sumbala mwene kejidile se mukonda dyahi wexile mutala hadi, wasuluka ni kudyelela kwa Jihova.” (Jobe 42:​1-6) Mana Denize, twamutumbula kudima wambe: “Eme ni mwadi wami twamudilonga o divulu Achegue-se a Jeová. Tusakidila Jihova mu kutu umba, kala o ngumbi kya umba o utuma. Mu veji dya kudikwatenena mu itondalu yetu, tulembalala kwila Jihova wamutulonga ni kutukwatekesa kukala tu athu ambote. O kiki kituzukamesa dingi kwa mwene.”—Iza. 64:8.

EYE UTENA KUDYELELA KWILA JIHOVA WANDA KUKWATEKESA NI KU KUBESOWALA

19. Né mwene se tukayela o jindunge ji twadilongo mu milongi yiyi, ihi yanda bhita netu? Maji tutena kudyelela mu ihi?

¹⁹ Né mwene se tukayela o jindunge ji twadilongo mu milongi yiyi, sayi ithangana twanda luwala hanji ni kukala ni hele. Maji ni kikwatekesu kya Jihova, tutena kutululuka ni kweha kukala ni ixinganeku yayibha. Tutena kudyelela kwila twanda sanguluka dingi mukonda twala ni kitongolwelu kyazele ni kwila tu makamba a Jihova.

20. Ihi i twatokala kubhanga?

²⁰ Tubhangyenu yoso ni yoso phala kitwehele o ixinganeku yayibha kutuluwalesa. O ixinganeku yiyi ijila mukonda dya ibhidi itwadibhele nayu, mukonda dya itondalu yetu yokulu. Ni kikwatekesu kya Jihova, tutena kutolola o ixinganeku yiyi yayibha. (Jisá. 143:10) Twamukingila ni hanji yoso o Palayizu! Mwenyomo kitwanda banza dingi mu ima yayibha. Izuwa yoso twanda balumuka sé hele ni kusanguluka mu kusidivila o Nzambi ya henda, Jihova!