O Jinguvulu Jazwela Yalungu ni Alumajedone—Ihi izwela o Bibidya?

Kya segunda mukamene mu kizuwa kya 10 ya mbeji ya Katutu, 2022, akwa Rússia atakula jimisi mu mbanza ya Ucrânia mukonda exile ni njinda ya akwa Ucrânia kubula o mulondi wexile mutakanesa o Crimeia ni ixi ya Rússia. O ima yiyi yabhiti tu ithangana kupholo kyoso o akwa jinguvulu kyazubhile kuzwela kwila nange tutena kudibhana ni alumajedone mu kithangana ni mbandu.

• “Etu kitwanda dibhana ni Alumajedone [Nguvulu ya U.S. John F.] Kennedy ni Crise dos mísseis cubanos. . . . Kingixikina kwila o athu atena kubhanga o ita ni jimbomba atomika sé kubheka Alumajedone.”—Nguvulu ya U.S Joe Biden, mu kizuwa kya 6 ya Katutu, 2022.

• Kyoso kyebhwidisa o Nguvulu ya Ucrânia Volodymyr Zelensky, yalungu ni ibhidi ijila mu kubhanga o ita ni jimbomba nucliali, mwene wambe: “Eme ngixikina kwila nange tutena kudibhana ni alumajedone, kiki kibhidi phala o ngongo yoso.”—BBC News, kizuwa kya 8 ya Katutu, 2022.

O kwila o kubhanga o ita ni jimbomba nucliali jitena kubheka Alumajedone? Ihi yamba o Bibidya?

O kwila jimbomba nucliali jitena kubheka o Alumajedone?

Kana. O kizwelu “Alumajedone” tu isanga lumoxi ngó mu Bibidya mu Dijingunwinu 16:16. O kizwelu kiki kikilombolola ita ya jinguvulu mba ixi ni ixi. Maji kilombolola ita ya Nzambi ni “jisobha ja tungu mu ngongo yoso.” (Dijingunwinu 16:14) Nzambi wandabheka o Alumajedone phala kubwika o jinguvulu joso.—Daniyele 2:44

Phala kwijiya dingi yalungu ni ihi ilombolola o Alumajedone phala o ixi, tanga o milongi ni dyambu O Ita ya Alumajedone Ihi?

O kwila o ixi ni athu atungumu anda kwa abwika mu ita ya jimbomba nucliali?

Kana. Sumbala o jinguvulu mu ixi kuhádya atena kubhanga o ita ni jimbomba nucliali, maji Nzambi kanda kwehela kubwika o ixi. O Bibidya yamba:

• “O ixi ya kalé, kyene ki yene kyene.”—Ndongixi 1:4.

• “Ixi-phe ixalela ku athu yá ayuka, ene a ilundula, mwene mwa tunga, o thembu yâ ki ibhu.”—Jisálamu 37:29.

Maji, o polofesiya ya Bibidya ni ima yamubhita mu izuwa yalelu, ilondekesa kwila kwakambe ngó o ima mu ixi yandalunguluka. (Matesu 24:3-7; 2 Timote 3:1-5) Sota kwijiya ihi izwela o Bibidya yalungu ni hádya mu kudilonga o Bibidya.