Mukonda Dyahi Athu Katena Kubheka Paze?—Ihi Izwela o Bibidya?

O jinguvulu ja mundu ni isangela ya ifuxi yoso ku mundu alembwa kubheka o paze. Mu izuwa ya lelu o kuyibha ni usweya kwamudibandekesa dingi mu izuwa ya Ita Yakayadi ku Mundu ndenge. Mazunda ayadi a athu mu ngongo, kifwa kaxaxi ka athu oso mu ngongo—atungu mu ididi mwene mubhita o izulukutu yiyi.

Mukonda dyahi athu katena kubheka paze? Ihi izwela o Bibidya?

Ima itatu ilondekesa se mukonda dyahi athu katena kubheka paze

1. 1. O athu alondekesa idifwa yene mwafidisa kubheka o paze. O Bibidya yakanena kwila mu izuwa yetu, “o athu anda dizola ngó ene mudyâ, anda zola o kitadi, anda kala athu akake, akwa ukumbu, . . . akamba ufiyele, . . . kanda kumbidila o ima yabakana, . . . kanda ditumina jihânji, anda kala ijibhangânga, . . . anda kala akwa kulungulukila akwâ, akwa kujiza.”—2 Timote 3:2-4.

2. 2. O athu, sé o kikwatekesu kya Mubhangi wetu Jihova aNzambi kikale ubheka mba mundu wavulu kalé ni uhete wakuzubha o ibhidi yene mu dibhana nayu. O Bibidya yamba kwila “muthu ki yene bhu lukwaku lwa muthu-mwène, mba muthu kyenda, mwene u tongesa o makanda mê-mwène.”—Jelemiya 10:23.

3. 3. O mundu wala bhu maku wa muthu wayibha wala ni kutena, Satanaji o Dyabhu, mwene “wa mu nganala athu oso a tungu mu ngongo.” (Dijingunwinu 12:9) Mukonda dya kwila “o ngongo yoso yala bhu maku a kadya-phemba,” kwanda kala mwene ita ni usweya.—1 Nzwá 5:19.

Nanyi utena kubheka o paze?

O Bibidya itulondekesa kwila, Nzambi mwene wanda bheka o paze, ki athu kana.

• “Kuma ixinganeku yoso i ngala ku mi xinganeka na-yu, nga ijiya kyambote mwene, eme ngi Jihova, ixinganeku ia wembu, ki ya phulu, kana, nda ngi mi bhane dizubhilu di mwene ku kinga.”—Jelemiya 29:11.

Kyebhi Nzambi kyanda bheka o paze? “o Nzambi mukwa kubhana o kutululuka wanda sasujula Satanaji bhoxi dya inama yenu.” (Loma 16:20) Nzambi bhu kaxi ka unguvulu wê wa dyulu a wixana mu Bibidya kwila “Utuminu wa Nzambi,” wanda bheka paze ku mundu woso. (Luka 4:43) Bhu kaxi ka Jezú Kidistu, o sobha ya Utuminu yú athu anda dilonga kukala kumoxi ni kutululuka kwoso.—Izaya 9:6, 7.

• Phala kwijiya dingi, tanga o milongi mu phutu ni dyambu “O que é que o Reino de Deus realizará?”