Kukwatekesa yó Abhiti mu Mavuwa mu Muvu wa 2022—O Jiphange Alondekesa Kwila Azolo Mwene mu Kidi

O Bibidya yatangele kwila mu izuwa yetu mwejikala ita, itungutu ya ixi, mauhaxi ni “ima ikwatesa wôma.” (Luka 21:10, 11) O ima yoso yiyi yasuluka ni kudikumbidila mu muvu wa sidivisu wa 2022.a Mu kifika, o ita mu ixi ya Ucrania yasuluka, o kiki kyajibha jimidi ni jimidi ja athu. Jixi javulu mu ngongo jakexile hanji mu bhânga ni uhaxi wa COVID-19. Kikyene ngo, mundu wavulu watale hadi mukonda dya mavuwa, kala o ixi o kutunguta mu ixi ya Haiti, kitembu kyadikota mu ixi ya America Central, mu Jifilipinas ni ku mbandu ya lwiji ya Africa. Kyebhi o Jimbangi ja Jihova kyene mu kwatekesa yó abhiti mu mavuwa oso yá?

Mu muvu wa sidivisu ya 2022, o kilunga kyetu kyakwatekesa yó abhiti mu mavuwa, se ku akondala, atenesa 200 a mavuwa! Mu yoso, twangastala kifwa 12 a mazunda a jidolare phala kubhana o kikwatekesu kyatokala.b Ijiya kyebhi kitwangastala o kitadi phala kukwatekesa yó abhiti mu mavuwa ayadi.

Mu Haiti o ixi ya tunguta

Mu kizuwa kya 14 yambeji ya Kakwinyi ka 2021, kumbandu ya lwiji ya ixi ya Haiti, o ixi ya tunguta ni nguzu yoso. Jimbangi jitatu ja Jihova afu, kifwa phange jiyadi ja ahatu ni phange imoxi ya diyala. O yó abhuluka, adibhana ni ibhidi mu xitu ni ndolo ku muxima mukonda dya ixi o kutunguta. Phange imoxi dijina dyê Stephane wambe kiki: “Mu mbanza yoso, mundu wavulu wafu, mukonda dya kiki semana ni semana mwakexile jithambi mu mbeji jiyadi ndenge.” Phange yakamukwa amwixana Éliézer wambe kiki: “Jimbangi javulu ja Jihova axala sé jinzo, sé izwatu, sé idyotelu ni imbamba yakamukwa. Mundu wavulu wakexile ni wôma mukonda dya yoso yabhiti, adivu kiki mu jimbeji javulu.”

O kilunga kyetu ki kyalaleka kana, kyai mu kwatekesa ni lusolo. O filiyale ya Haiti yabhana nzungule ya makudya, jitenda, jilona, jikoloxá ni jimakina phala kuta mukengeji mu jitelefone. Kikyene ngo, mu muvu wa sidivisu ya 2022, atungu dingi ni kutungulula 100 a jinzo ja buzumukine. Twangastala kazunda kamoxi ndenge ka jidolare phala kubhana o kikwatekesu kiki.

O jiphange jetu asakidila kyavulu o kikwatekesu kyoso. Lorette wambe kiki: “O kutunguta kwa ixi kwabwika o inzo yetu ni wenji wetu. Twaxala sé kudya. Maji o kilunga kya Jihova kyeza mutuzokelela, atubhana yoso itwabhindamene.” Micheline wambe kiki: “O kutunguta kwa ixi, kwa bwisa o inzo mungatungile ni anami kiyadi. Kingejiya se ngibhanga kyebhi, ngatena ngo kusamba mukubhinga kikwatekesu, o Jihova wangitambwijila bhukaxi ka kilunga kyê. Kindala twala ni inzo yadifikidila kyambote. Ngandabhanga yoso ingitena o kubhanga phala kulondekesa o kisakidilu kyami kwa Jihova.”

O jinguvulu ja mbanza amono yoso itwabhange. O dimixi dya mbanza ya L’Asile watange kiki: “Ngamisakidila o lusolo lwenu mu kukwatekesa yó abhiti mu mavuwa. Ngamiximana we mukonda mwa xila o jinguvulu. Ngasanguluka kwijiya kwila enu kimwakibhangela kitadi kana, maji mwabhange kiki mukonda mwamesena kukwatekesa o athu. Mwamubhanga yoso yiyi mukonda dya henda.”

Kitembu kyadikota akixana Ana kyabheka ibhidi ku ixi ya Malawi ni Mozambique

Mu kizuwa kya 24 yambeji ya Katatu ka 2022, o Kitembu akixana Ana kyabheka makulundu kwese mu ixi ya Mozambique ki kyasuluka katé ku Malawi. O kitembu kiki kyabheka mvula yadikota. Kyabwikisa mikolo ya mukengeji, milonde ni kubhanga we izanga yamakota.

O kitembu kiki kyabheka windwa wavulu ku 30.000 a Jimbangi ja Jihova ndenge mu ixi ya Malawi ni ku Mozambique. Charles, phange wakwatekesa we yó abhiti mu divuwa didi, wambe kiki: “Kyoso kingamono o hadi yatale o jiphange ni yoso yatexikile, ngadivu kyaibha ku muxima, nguzu yangibhu.” Ku hadi kwaditele dingi kibatu, mukonda kudya kwoso kwakexile naku, kwadiboto mukonda dya divuwa. Avulu axala sé jinzo. Phangyetu imoxi, muhatuê wafu ni ana kiyadi, kyoso kyakexile mu abhulula o baluku yabilula mu menya.

O kitembu kyabheka ilwezu yavulu. Mu ola ya 1:00 kifwa mu usuku hanji, mu mbanza ya Nchalo, Malawi, o mwiji wa Sengeredo wevu jibuya ja menya amukunguluka. Ngiji jiyadi jezalele ni menya! O phange Sengeredo wamono kwila atokalele kulenga. Abhange kyambote mukonda o menya mukubhita ithangana abuzumukisa o inzo. Imbamba yâ yoso yadiboto. O mwiji wai ku Kididi kya Ubhezelu, phala kubhixilaku kwabhingile kwenda 30 a ithangana. Maji mu veji yiyi, ende ola jiyadi. Kyoso kyabhixila, abetele kyavulu, atohokele maji abhixila kyambote.

O filiyale ya Malawi ni Mozambique ni lusolo lwoso amateka o kukwatekesa. Abhana itendelesu ku tufunga twa ilunga ni tufunga twoso, a a tendelesa kumona o ibhindamu ya jiphange abhiti mu divuwa ni ku akwatekesa mu nzumbi natene kudivwa kyambote. Ibuka yavulu ya jiphange akwa kukwatekesa yó abhiti mu mavuwa, a atumu kwendesa o ikalakalu, o ibuka yiyi ni lusolo lwoso amateka kukwatekesa o jiphange jetu na kale ni kya kudya ni imbamba yakamukwa dingi. Twangastala 33.000 ajidolare phala kukwatekesa o jiphange jetu ni 300.000 mu kutunga ni kutungulula jinzo.

O ibuka yiyi angastala kyambote o kitadi kiki, bengebenge mukonda o imbamba aitele kalu yavulu. Mu kifika, mu sambwadi dya jimbeji jadyanga, kyoso kyamateka kukwatesa yó abhiti mu mavuwa, o fuba ya masa, kifwa kudya kwa athu oso mu ixi ya Malawi—yabande kinene kifwa 70 jipurcentu. O phete kyene kimoxi yabande we. Phala kupopala kyambote o kitadi, o jiphange asumbu mu ixi mwenyomo kudya mu jisaku javulu mu veji dya kusumba bhofelebhofele, mwene we mwasumbu o imbamba yakutunga. Mukonda dya kiki o asumbixi ka bandesa kyavulu o imbamba, kabhingi we kufuta kitadi kyavulu phala kututa o imbamba.

O kikwatekesu kiki kyaswinisa o mundu wa Jihova. Felisberto, phange mu ixi ya Mozambique wambe kiki: “Nuka ngamwene kisangela watena kubhana kyavulu kiki: Watena kubhana imbamba yakutunga, makalu, atungi, kudya ni kubhana milongi yambote. O kikwatekesu kiki kilondekesu kyadikota kya henda yatange Jezú mu divulu dya Nzwá 13:34, 35.” Ester, mutudi mu ixi ya Malawi, inzo yê yabwika, watange kiki: “nganyongamene mukonda kingikexile ni kitadi phala kutunga inzo yengi. Mu kiki, kyoso jiphange kyeza mungitungila inzo, ngadivu kala ngala kya mu Palayizu.”

Kuma twamuzukama kya ku mundu wa ubhe, twandamona dingi mavuwa avulu. (Matesu 24:7, 8) Mu kiki twasakidila kyavulu o kitadi ki wene mu sangela, ni kitadi kiki twadyelela kwila o mundu wa Jihova wandatambula jinga o kikwatekesu kyatokala. Phala kwijiya o maukexilu akusangela kitadi, nde ku mbandu donate.jw.org. Twakusakidila mukonda dya ukexilu wé wakubhana.