Suluka mu Kwenda mu Kixikanu

1. Mukonda dyahi Phawulu wasangulukile mu ima yasolo ku mwenyu wê?

POXOLO Phawulu wejidile kwila kwamukambele ngo eji mu jibha, maji mwene wasangulukile mukubanza kwila ku mwenyu we woso wendele kyambote. Mu kulembalala mu ima yoso yabhange, mwene wambe: “Ngalenge o dikanga dyoso dya ngixindile, ngakolokota mu kixikanu.” (2 Ti. 4:​6-8) Phawulu wasolo kyambote, mwene wasolo kusidivila Jihova, yu wakexile ni kidyelelu kya kwila Jihova wasangulukile ni mwene. Etu we twatokala kusola kyambote phala Jihova kutuxikina. Kyebhi ki tutena kubhanga kiki?

2. Ihi yamesenene kuzwela Phawulu mu divulu dya 2 Kolindu 5:7?

² Phawulu wambe, mwene ni Jikidista jamukwa ja fiyele kamukwenda mu ima ya mona: “maji bhukaxi ka kixikanu. (2 Ko. 5:7) Ihi yamesenene kuzwela Phawulu? Mu Bibidya o kizwelu, “kwenda” sayi ithangana kilombolola o ima isola o muthu phala kubhanga ku mwenyu wê. O athu akambe kixikanu kwa Jihova, mu kusola akayela ngo o ima yevwa, yamona ni kyebhi kyamudivwa ku muxima. Maji o muthu wala ni kixikanu kwa Jihova, mwene kyoso kyamesena kusola kima uxinganeka se ihi yamesena Jihova, mwene wejiya kwila se ukayela o itendelesu ya Jihova itusanga mu Bibidya, mwene wanda kala ni mwenyu wambote lelu ni kwila Jihova wanda mu besowala ku hádya.—Jisá. 119:66; Jih. 11:6.

3. Mabesá ebhi utwanda tambula se tusuluka mu mwenda mu kixikanu? (2 Kolindu 4:18)

³ Kyoso kitwamesena kusola kima, etu enyoso sayi ithangana tudyelela mu ima itumona, itwivwa ni kyebhi kitwamu divwa ku muxima, maji se mukusola o ima yabeta kota ku mwenyu wetu, tudyelela kya ngo ku ima itumona mba ku ima itwivwa, nange hádya twanda dibhana ni ibhidi. Mukonda kyahi? Mukonda o ima itumona ni ima itwivwa sayi bhabha itena kutunganala. Se mukusola tudyelela kya ngo mu ima itumona ni ima itwivwa, hádya twanda bhanga kima kyazembe Jihova. (Ndo. 11:9; Mat. 24:​37-39) Maji se mukusola tukayela o kixikanu kyetu, twanda sola ima “isangulukisa Ngana.”(Efe. 5:10) O kubelesela o milongi ya Nzambi, kutubhana kutululuka ni kusanguluka kwa kidi. (Jisá. 16:​8, 9; Iza. 48:​17, 18) Se tusuluka mu kwenda mu kixikanu, twanda kala ni mwenyu wakalelaku.—Tanga 2 Kolindu 4:18.

4. Kyebhi o muthu kyatena o kwijiya se wamu kwenda mu kixikanu, mba mu ima yamona?

⁴ Kyebhi ki tutena o kwijiya se twamu kwenda mu kixikanu, mba mu ima itumona? Twatokala kudibhanga o ibhwidisu yiyi: Mu kusola, tudyelela ku ima yebhi? O kwila tudyelela ngo ku ima itutena kumona? Inga tubelesela o milongi ya Jihova? Twanda dilonga se kyebhi ki tutena kudyelela mu milongi ya Jihova mu maukexilu atatu ya: Mu kusola salu, mu kusola muthu phala kukazala-nê ni kyoso o kilunga kyatubhana itendelesu ya ubhe. Mu maukexilu atatu yâ, twanda zwela yalungu ni ima itwatokala kuxinganeka phala tutene kusola kyambote.

KYOSO KI TUSOLA SALU

5. Kyoso kitwamusota salu, ihi itwatokala o kuxinganeka?

⁵ Etu enyoso twamesena kukala ni kitadi phala kudikila o ibhindamu yetu ni ibhindamu ya mwiji wetu. (Ndo. 7:12; 1 Ti. 5:8) Sayi salu ifuta kitadi kyavulu maji yamukwa kana. O salu ifuta kitadi kyavulu ikwatekesa o mukalakadi kudikila o ibhindamu yê ya kizuwa ni kizuwa, ni kubhaka we kitadi phala o ibhindamu ku hádya. Sayi salu ifuta ngo mwene kitadi kitena phala kudikila o mwiji kala o kusumba kudya, izwatu ni kukala ni inzo. Kyoso kitwamusota salu, ki kima kyayibha kusota kwijiya se kikuxi kitwanda tambula. Maji o muthu wamukwenda mu ima imona o mesu, udikwatenena kya ngo mu kitadi kyanda tambula.

6. Kyebhi ki tutena kwenda mu kixikanu mu kusota salu? (Jihebelewu 13:5)

⁶ Se twamukwenda mu kixikanu, ande dya kuxikina salu yoso-yoso, twanda xinganeka kyebhi kyanda kala o ukamba wetu ni Jihova. Dibhwidise: ‘O kwila Jihova uxikina o salu yiyi? O kwila o salu yiyi yanda ngibhangesa kubhanga kima kyazembe Jihova?’ (Jisa. 6:​16-19) ‘O kwila o salu yiyi yanda ngibhangesa kufonga mu yonge, kukamba kukala ni kithangana kya kuboka, ni kya kutanga o Bibidya? O kwila o salu yiyi yanda ngibhangesa kukala dikanga dya mwiji wami?’ (Fil. 1:10) Se wa tambwijila kyene mu ibhwidisu yiyi, kima kyambote kudituna o salu yiyi. Ne mwene se mu dyembu dyé kubhonza kusanga salu. Kuma twamukwenda mu kixikanu, o ima itusola ilondekesa kwila etu twadyelela kwila Jihova wanda dikila o ibhindamu yetu.—Mat. 6:33; Tanga Jihebelewu 13:5.

7-8. Kyebhi o phangyetu wa tungu ku America do Sulu kyende mu kixikanu? (Tala we ofoto.)

⁷ Tala yabhiti ni phangyetu Javier,a wa tungu ku America do Sulu, mwene wamono o mbote ijila mu kwenda mu kixikanu. Mwene wambe wixi: “Ngasange salu yeji ngifuta kitadi kyavulu o kitadi kingexile munganyala mu salu yokulu ndenge, o salu yiyi yeji ngisangulukisa kyavulu.” Maji, manu Javier wamesenene we kukala muboki wa thembu yoso. Ngayi phala kungimona se ngafwama mwene phala kukalakala mu ditenda. Mwene wambe dingi: “Ande dya kubokona phala kungibhanga o ibhwidisu, ngasambe, ngabhingi kikwatekesu, ngejidile we ni kidi kyoso kwila Jihova wejidile o ima yabeta kota phala eme. Kidi, ngamesenene kutambula dingi ikalakalu ku salu, ni kunganyala we kitadi kyavulu. Maji kingimesenene kuxikina o salu yiyi se kiyeji ngi kwatekesa kukumbidila o jimbambe jami mu nzumbi.”

⁸ Manu Javier wambe: “Kyoso o xefe kyexile mu ngibhanga o ibhwidisu, mwene wa ngitangela kwila ngeji kala mu kalakala izuwa yoso kate mwene mu mausuku, ni kuxila kwoso ngamutangela kwila ki ngeji tena mukonda dya ubhezelu wami”. Kyene mwene, manu Javier wa ditunu o salu yoyo. Mukubhita semana jiyadi, mwene wamateka kukalakala kala muboki wa thembu yoso. Kudisukilu dya muvu, mwene wa sange salu ya kukalakala ngo kaxaxi ka kizuwa. Mwene wambe: “Jihova wa tambwijila o misambu yami, mwene wa ngikwatekesa kusanga salu i ngi kwatekesa kusuluka mu kukala muboki wa thembu yoso. Nga sanguluka kyavulu mukukala ni salu ingibhana kithangana phala kusidivila kyambote Jihova ni kusidivila we o jiphange jami.”

9. Ihi i wadilongo ku musoso wa manu Trésor?

⁹ Ihi itwatokala o kubhanga se tumona kwila o salu yetu yamu tufidisa kwenda mu kixikanu? Tumone o musoso wa manu Trésor, mukwa Congo. Mwene wambe: “O salu yami yene mwene o salu i ngexile mu sota. O kitadi kingexile mu tambula mu mbeji imoxi ngo, se kusalu yokulu ngeji bhinga kukalakala mbeji jitatu, o athu exile mu ngixila kyavulu.” Maji manu Trésor wexile mufonga mu yonge mukonda wexile mukalakala kate mwene mu mausuku. Mwene we amujijidika kutanga makutu ku athu, phala o athu kejiye o ima ya ibha yakexile mubhanga o ditenda. Manu Trésor wa mesenene kuxisa o salu yiyi maji mwene wa thandanganyele kyavulu se kyebhi kyeji kala o mwenyu wê se u xisa o salu yiyi. Ihi yamukwatekesa? Mwene wambe: “O divulu dya Habakuke 3:​17-19 yangikwatekesa kumona kwila ne mwene se ngi xisa o salu, Jihova wanda ngitambula konda, mukonda dya kiki ngaxisa o salu yoyo.” Mwene wa suku mukuzwela kiki: “Jixefe javulu abanza kwila eye se a mukufuta kitadi kyavulu, wanda bhanga kima kyoso-kyoso kate mwene kubwazeka o mwiji we, wanda bhana we dikunda kwa Nzambi. Ngasanguluka mukonda ngalange o ukamba wami ni Jihova ni wa mwiji wami. Mukubhita muvu, Jihova wangikwatekesa kusanga salu i ngisangulukisa, ingifuta o kitadi kisoka phala kudikila o mwiji wami ni kukala ni kithangana phala kubhanga dingi musidivisu ya Nzambi. Kyoso kituta Jihova kupholo, sayi bhabha kitwanda kala ni kitadi kyasoko, maji Jihova wanda tulanga.” Kyene, se tu dyelela ku milongi ni ikanenu ya Jihova, twanda suluka mukwenda mu kixikanu, mwene wanda tubesowala.

MU KUSOLA MUTHU PHALA KUKAZALA-NE

10. Ima yebhi yambote yatokala kuxinganeka o muthu mu kusola se wanda kazala ni nanyi? Maji mwene katokala kudikwatenena mu ihi?

¹⁰ O ukaza ujitu wa Jihova, ki kituxi kumesena kukazala. Se phangyetu ya muhatu wa muxinganeka kukazala, mwene nange utala o idifwa ya phangyetu ya diyala, o pholo yê, o athu amumona kyebhi, mwene u ngastala kyebhi o kitadi, mwene we umona se o diyala wa mutambula konda ya muthu ku mwiji wê ni kumona se mwene umusangulukisa, o ima yoso yiyi ima yambote.b Maji se mwene udikwatenena ngo mu ima yiyi, mwene wamulondekesa kwila wa mukwenda mu ima yamona.

11. Kyebhi kitwenda mu kixikanu kyoso kitusola muthu phala kukazalane? (1 Kolindu 7:39)

¹¹ Jihova usanguluka kyavulu kyoso o jiphange jetu, kikale ja mala kikale ja ahatu, akayela o milongi yê mukusola o muthu anda kazala né! Ene a kayela o itendelesu ya Bibidya, a kingila kate kyanda ‘bhita mu kitala kya kikumbi’ kyene ngo kya banza o kukazala. (1 Ko. 7:36) Ene a sota kwijiya se o muthu a mesena ku kazalane wala ni idifwa itendelesa Jihova yatokala kukala nayu o muthu phala kukala diyala dyambote mba phe muhatu wambote. (Jisa. 31:​10-13, 26-28; Efe. 5:33; 1 Ti. 5:8) Se kumoneka muthu ki Mbangi ya Jihova, umesena kuditangesa nawu, o jiphange jetu abelesela o kitumu kya kukazala ngo “mwangana” o kitumu kitusanga mu divulu dya 1 Kolindu 7:39. (Tanga.) Ene abhanga kiki mukonda ejiya kwila Jihova wanda kwakwatekesa jinga mu ibhindamu yâ.—Jisá. 55:22.

12. Ihi i wa dilongo ku musoso wa mana Rosa?

¹² Tumone o musoso wa mana Rosa, muboki wa thembu yoso ku ixi ya Colombia. Kusalu yê, kwexile diyala ki Mbangi ya Jihova, wa mateka kumuwabhela. Mana Rosa wamateka we kumuwabhela. Mwene wambe: “Mwene wedile kala wexile diyala dyambote, mwene wexile mu kwatekesa o athu mu dyembu dyê, mwene wedile kala wexile muthu wambote mwene, wexile mungitalatala kyambote, mwene wexile ni idifwa yoso ingamesenene kudiyala phala kukazala-ne. O kibhidi kya ngo ó mwene kukamba kukala Mbangi ya Jihova.” Mwene wambe dingi: “Kwa ngibhonzele kyavulu kumutangela kwila kingamesena kuditangesa-ne. Mu izuwa yenyoyo, ngangexile mudivwa ubheka, mukonda dya kiki ngamesenene kukazala, maji kingatenene kusanga muthu mu kilunga.” Maji mana Rosa, kadikwatenena ngo ku ima yatenene kumona. Mwene waxinganeka kyebhi Jihova kyeji divwa se wa solele kukazala ni koleka yê yasalu. Kyenyiki, mwene wabatula o ukamba ni diyala dyodyo yu wa dikwatenena mu sidivisu yê kwa Jihova. Mukubhita tu ithangana, a mwixana phala kubhanga o Xikola ya Akunji a Utuminu, kindala mwene wa musidivila kala muboki wa katunda. Mana Rosa wambe: “Jihova wa ngibesowala, lelu ngasanguluka kyavulu.” Sayi bhabha kubhonza kyavulu kubhanga o ima yamesena Jihova kwila twibhanga, benge-benge se twawabhela kyavulu ku bhanga kima kyengi, maji kyoso ki twehela Jihova kutwendesa, tukatula jinga mbote.

KYOSO O KILUNGA KYATUBHANA ITENDELESU YA UBHE

13. Ihi yeji tubhangesa kwenda mu ima itumona, kyoso o kilunga kyatubhana itendelesu?

¹³ Phala kutukwatekesa kusidivila Jihova, muveji javulu o tufunga, ni kafunga ka ilunga, ni jiphange ku filiyale ni Kibuka kya Utuminu, atubhana itendelesu. Maji sayi bhabha kitwanda tendela se mukonda dyahi o jiphange amutubhana itendelesu, nange twanda kala ni jiphata ja kwila se o kitendelesu kya mutubhana kyanda tukwatekesa mwene. Mba tutena kudikwatenena ngo mu itondalu ya jiphange ja mutubhana o itendelesu.

14. Ihi yanda tukwatekesa kubelesela o kitendelesu kitubhana o kilunga? (Jihebelewu 13:17)

¹⁴ Kyoso ki twamu kwenda mu kixikanu, tudyelela kwila Jihova mwene wa mukwendesa o kilunga kyê. Twejiya we kwila, mwene wejiya o ima itwabhindamena, mukonda dya kiki, ni lusolo-lwoso tubelesela o itendelesu, tubhanga kiki ni kusanguluka kwoso. (Tanga Jihebelewu 13:17.) Twejiya kwila kyoso kitubelesela o itendelesu, tukwatekesa o kilunga kyetu kukala kumoxi. (Efe. 4:​2, 3) Twadyelela we kwila sumbala o jiphange ala kupholo akwa ituxi, Jihova wanda tubesowala se tubelesela o itendelesu. (1 Sam. 15:22) Twadyelela we kwila, ne mwene se o kitendelesu kya tubhana o kilunga kikifwame, mu kithangana kya tokala Jihova wanda kilungulula.—Mik. 7:7.

15-16. Ihi yakwatekesa phangyetu kwenda mu kixikanu ne mwene kyoso kyakexile ni jiphata jalungu ni kitendelesu kyatambula mwene? (Tala we ofoto.)

¹⁵ Tumone musoso ulondekesa o mbote ijila mu kukala ni kixikanu ni kubelesela o kitendelesu kitubhana o kilunga. Ku ixi ya Peru sumbala athu avulu azwela dimi dya Espanyole, sayi-ku we athu avulu azwela madimi a uvwalukilu, mu kifika o dimi dya Quechua. Mu mivu yavulu, o jiphange amuzwela o dimi dya Quechua exile musota mu dyembu dyâ, woso yo wexile muzwela o dimi dya Quechua. Maji phala kubelesela o ijila ya jinguvulu, alungulula o ukexilu wa kusota o athu. (Lom. 13:1) Mukonda dya kiki, sayi jiphange abanze kwila o itendelesu yoyo yeji bhonzesa kusanga o athu azwela o dimi dya Quechua. Maji mukonda dya jiphange kubelesela o kitendelesu, Jihova wa abesowala ya asange athu avulu azwela o dimi dya Quechua.

¹⁶ Manu Kevin, kafunga watokala mu kilunga kya dimi dya Quechua wathandanganyele we. Mwene wajimbulula: “Kyoso ki ngevu o kitendelesu kya ubhe, nga dibhwidisa, kyebhi ki twanda tena kusanga o athu azwela o dimi dya Quechua?” Ihi yabhange manu Kevin? Mwene wambe: “Ngalembalala o divulu dya Jisabhu 3:5. Ngalembalala o musoso wa Mozé. Jihova wamutumu kubhanga kima kyedile kala kikifwamene. Mwene watangela Mozé kukatula akwa Izalayele mu Ijitu ni kuya nawu kate ku Kalunga Kakusuka, bhenyobho edile kala keji tena kubhuluka mukonda akwa Ijitu exile mukwiza kudima dyâ phala ku akwata. Ne kiki mwene wabelesela, Jihova wamubesowala, wabhange madiwanu phala kwabhulula.” (Mak. 14:​1, 2, 9-11, 21, 22) Manu Kevin wakexile polondo phala kulungulula o ukexilu wê wakuboka. Mbote yebhi yakatula? Mwene wambe: “Ngadiwana kyavulu mu kumona o mabesá atubhana Jihova. Mu ukulu ngexile mu kwenda kyavulu, mu kuboka, sayi ithangana ngexile ngo musanga muthu umoxi mba ayadi azwela o dimi dya Quechua. Lelu tudikwatenena dingi mu ididi momo mwa beta kukala athu a muzwela o dimi dya Quechua. Mukonda dya kiki, twene muzwela ni athu avulu, ku akunda ni ku alonga o Bibidya. Athu avulu ene muya mu yonge.” Kidi mwene, kyoso ki twenda mu kixikanu, Jihova utubesowala kyavulu.

17. Ihi iwadilongo mu milongi yiyi?

¹⁷ Twamono kyebhi ki tutena kusuluka mu kwenda mu kixikanu mu ima itatu. Maji twatokala kusuluka mu kwenda mu kixikanu mu maukexilu oso a mwenyu wetu, mu kifika mu kusola o jifilime ji twanda tala, o ima itwanda bhanga mu ithangana yetu ya kunyoha, kusola se twanda dilonga xikola ya katunda ni kyebhi ki twanda sasa o twana twetu. Kima kyoso-kyoso kitusola, kitwatokala kudikwatenena ngo ku ima itumona, maji twatokala kudikwatenena we ku ukamba wetu ni Jihova, ku milongi yê, ni ku ikanenu yê ya kwila wanda tulanga. Se tubhanga kiki, twanda tena kwenda mu dijina dya Jihova kate kuhádya ni hadya.”—Mik. 4:5.