MBANDU YAKUDILONGA 20
MWIMBU 47 Samba Kwa Jihova, Izuwa Yoso
Dyelela Kwila Jihova Wanda Kukonda o Malamba
“Aximane Nzambi . . . Tata ya jihenda. O Nzambi mukwa kukonda o malamba a athu.”—2 KO. 1:3.
ITWANDADILONGA
Twanda dilonga kyebhi Jihova kyaswinisa o Jijudé atungile ku Babilonya.
1. Kyebhi kyexile o mwenyu wa Jijudé atungile ku Babilonya?
O JIJUDÉ atungile ku Babilonya aluwalele kyavulu. O ixi yâ a ibwikile. Mukonda dya ituxi yâ ni ya jikuku jâ, Jihova wehela kwakatula mu ixi yâ ni kwa ambata mu ixi yengi. (2 Mal. 36:15, 16, 20, 21) Kidi kwila ku Babilonya exile ni ufolo wa kubhanga ima ya mukwa. (Jel. 29:4-7) Maji o mwenyu wâ wabhonzele. Mukonda dya kiki, ene adivu kyebhi? Umoxi mudyâ wambe kiki: “Bhu mbandu’a jihonga, ja jingiji mu Babilónya, bhene bhu twa xikama jinga, anga tu kwata kudila, kyoso ki tu xinganeka Ziyone.” (Jisá. 137:1) O Jijudé abhingile mwene kwakonda o malamba, maji nanyi weji bhanga kiki?
2-3. (a) Ihi yabhange Jihova ku Jijudé atungile ku Babilonya? (b) Ihi itwanda dilonga mu milongi yiyi?
2 Jihova mwéne “o Nzambi mukwa kukonda o malamba a athu.” (2 Ko. 1:3) Jihova wazolo o jiselevende jê yu wamesena kwakonda o malamba. Mwene wejidile kwila amoxi ku Jijudé eji xikina o kibazelu kyê ni ku mubheza dingi. (Iza. 59:20) Hama ya mivu ande dya kwambata o Jijudé ku ubhika mu Babilonya, Jihova wabhana njimbu kwa polofeta Izaya, o njimbu yiyi, o divulu dya Izaya. Kyebhi o divulu dya Izaya dyeji kwakwatekesa? Izaya wambe: “Athu ami a kondyenu malamba, a kondyenu malamba, kyene kyambe Nzambi yenu.” (Iza. 40:1) Bhukaxi ka divulu dya Izaya, Jihova wakondo o malamba a Jijudé.
3 Kala o Jijudé jojo, etu we sayi ithangana tubhindamena ku tukonda o malamba. Mu milongi yiyi, twanda mona kyebhi Jihova kya kondo o malamba a Jijudé exile ku Babilonya: (1) Mwene wakanena kuloloka yó eji dyela o ituxi yâ, (2) wabhana kidyelelu ku mundu wê, ni (3) wa atululukisa kyoso kyexile ni woma. Twanda mona we kyebhi Jihova kyatukonda o malamba lelu.
JIHOVA UTULOLOKA
4. Kyebhi Jihova kyalondekesa kwila wexile polondo phala kuloloka o Jijudé? (Izaya 55:7)
4 Jihova mwene o “Tata ya jihenda.” (2 Ko. 1:3) Mwene walondekesa o kidifwa kiki kyoso kya kanena kuloloka o ituxi ya Jijudé eji dyela o ituxi ya. (Tanga Izaya 55:7.) Mwene wambe: “Nga-nda ku ku lendukila ni henda ki yene kúbhwa.” (Iza. 54:8) Kyebhi Jihova kyalondekesa kwila wexile polondo phala kwaloloka? Sumbala o Jijudé exile mutala hadi mukonda dya ibhangelu ya, Jihova wa ambela kwila ene keji nangenena-ku kate ku hadya ni hadya. (Iza. 40:2) Kiki kyaswinisa kyavulu o Jijudé adyele o ituxi ya, amesenene kubheza dingi Jihova!
5. Mukonda dyahi twadyelela dingi kwila Jihova wanda loloka o ituxi yetu, o Jijudé ku Babilonya ndenge?
5 Ihi itwadilongo? Jihova wala polondo phala kuloloka o jiselevende jê. Lelu twala dingi ni kidyelelu kwila Jihova wanda bhanga kiki, o Jijudé ku Babilonya ndenge. Mukonda dyahi? Mukonda etu twejiya o kima kibhangesa Jihova kutuloloka. Kyoso o polofeta Izaya kya zubha kusoneka o izwelu yê, mivu yavulu kupholo Jihova watumikisa Mon’ê wakazola mu ixi phala kufwila o athu oso eji dyela o ituxi yâ. Mukonda dya Jezú kutufwila Jihova utena ‘kujimuna’ o ituxi yetu. (Ika. 3:19; Iza. 1:18; Efe. 1:7) Mukidi Jihova, Nzambi mukwa kuloloka!
6. Mukonda dyahi kima kyambote kubanza mu muloloki wa Jihova? (Tala we ofoto.)
6 O izwelu ya Jihova yosoneke mu Izaya 55:7 itena kutuswinisa se twamudivwa kyayibha mukonda dya kituxi kitwatele. Amoxi mudyetu asuluka mu kudivwa kyayibha ne mwene kyoso kyadyela kya o ituxi. Kiki kibhita benge-benge se twamutala hanji hadi mukonda dya kituxi ki twatele. Maji se twafisala kya o ituxi yetu ni kweha kubhanga o ima yayibha, tutena kudyelela kwila Jihova watuloloka kya. Kyoso Jihova kya tuloloka mwene kalembalala o ituxi i twatele. (Sokesa ni Jelemiya 31:34.) Se Jihova kalembalala o ituxi i twatele mu ukulu, kyene we kimoxi kitwatokala ku i lembalala dingi. O kyabeta kota phala Jihova o ima itwamu bhanga kindala, kana o ituxi itwatele mu ukulu. (Ize. 33:14-16) Kwakambe ngo bhofele, mu Palayizu o Tat’etu ya henda wanda zubha o ima yoso yayibha ijila mu ituxi i twatele mu ukulu.
O kyabeta kota phala Jihova o ima itwamu bhanga kindala, kana o ituxi itwatele mu ukulu (Tala okaxi 6)
7. Ihi itena kutubhangesa kusota o kikwatekesu kya tufunga se twamusweka kituxi?
7 Ihi itwatokala kubhanga se twamudivwa kyayibha mukonda dya kituxi kyadikota ki twatele, anga twakisweka? O Bibidya yamba kwila twatokala kubhinga kikwatekesu ku tufunga. (Tiy. 5:14, 15) Maji sayi bhabha kubhonza kuxikina o kitondalu kyetu. Maji twatokala kulembalala kwila Jihova utukwatekesa bhukaxi ka mayala enya ni kwila anda tukwatela henda kala kibhanga Jihova. Tala kyebhi Jihova kyakwatekesa phange Matulua bhukaxi ka tufunga, mwene wexile mudivwa kyayibha mukonda dya kima kyayibha kya bhangele. Phange Matulu wambe: “Mu muvu umoxi ngexile mutala ufusa. Maji kyoso ki ngevu o diskulusu dizwela yalungu ni kitongolwelu ngafisala o kituxi kyami ku muhatu wami ni ku tufunga. Mu kusuluka ngadivu kyambote, maji ngaluwalele hanji mukonda dya kima kyayibha ki ngabhangele. O tufunga angilembalesa kwila Jihova wamesenene hanji kukala kamba dyami. Mwene utubazela mukonda wa tuzolo.” Lelu manu Matulu mukwatekexi wa tufunga ni muboki wa thembu yoso. Kituswinisa kyavulu mu kwijiya kwila Jihova utuloloka se tudyela o ituxi yetu ni muxima woso!
JIHOVA UTUBHANA KIDYELELU
8. (a) Kidyelelu kyebhi kyabhana Jihova ku Jijudé exile ku Babilonya? (b) Kala kilondekesa Izaya 40:29-31, kyebhi kyadivu o Jijudé adyela o ituxi yâ ni kidyelelu kiki kya abhana Jihova?
8 O Jijudé nange afikile kwila keji tena dingi kuvutuka mu ixi yâ. Akwa Babilonya kexile mu jituna o abhik’â. (Iza. 14:17) Jihova wakanena kujituna o mundu wê, se-ku kima kyeji fidisa o kima kiki kudikumbidila. (Iza. 44:26; 55:12) Phala Jihova, akwa Babilonya edile kala fufuta ya hatu. (Iza. 40:15) Kyoso muthu kyabhusa bhwala fufuta, yene itunda ni lusolo. Kiki kitukwatekesa kutendela kwila ki kyeji bhonza phala Jihova kubhulula o mundu wê ku akwa Babilonya. Kyebhi o kidyelelu kiki kyeji kwatekesa o Jijudé? O kidyelelu kya aswinisa, kya abhana we nguzu, mukonda Izaya wasoneka: “Oso a kinga kwa Ngana-phe, a tambula nguzu yobhe.” (Tanga Izaya 40:29-31.) O kidyelelu kiki kya abhana nguzu, kala o jiholokoko jaleka o mabhabha mâ.
9. Ihi yakwakwatekesa o Jijudé kudyelela mu kikanenu kya Jihova?
9 Jihova wakwatekesa we o Jijudé kudyelela mu kikanenu kyê. Kyebhi? Xinganeka mu ikanenu yadikumbidile kya. Mu kifika, ene ejidile kwila kala kya kanene Jihova, akwa Asídya atolola o utuminu wa Izalayele wa dikwinyi dya miji, ya a ambatele mu ubhika. (Iza. 8:4) Amono we akwa Babilonya kubwika Jeluzaleme ni kwa ambata mu ubhika. (Iza. 39:5-7) Ejidile we kwila Sobha Zedekiya amutubwile o mesu ni kumwambata ku Babilonya. (Jel. 39:7; Ize. 12:12, 13) Yoso yakanene Jihova yadikumbidile. (Iza. 42:9; 46:10) O ima yoso yiyi yakolesa o kidyelelu kyâ kya kwila o kikanenu kya kwabhulula, kyeji dikumbidila we!
10. Ihi itena kutukwatekesa kukolesa o kidyelelu kyetu mu izuwa yiyi isukidilaku?
10 Ihi itwadilongo? Kyoso kituluwala, o kidyelelu kitena kutuximbakatesa ni kutukwatekesa kukala ni nguzu. Twala mu jithembu ja bhonzo, jinguma javulu ja Nzambi jene mutuzukutisa. Maji kituluwale. Jihova watubhana kidyelelu kya dikota kya kutunga mu Palayizu, ni kukondama ni kutululuka kwoso. Twatokala kusuluka mu kukala ni kidyelelu kiki ku muxima ni mu kilunji. Ihi yanda tukwatekesa kukolesa o kidyelelu kyetu? Tutena kubhanga kiki mu kukatula kithangana phala kuxinganeka kyebhi kyanda kala o mwenyu wetu ku mundu wa ubhe. Tutena kutanga, kutala jividyu mba kwivwa mimbu yalungu ni kidyelelu kyetu, tutena we kuzwela ni Jihova bhukaxi ka musambu yalungu ni ima yoso itwamukingila mu Palayizu.
11. Ihi yene mukwatekesa o phange ya muhatu wala ni uhaxi wabhonzo kukala dingi ni nguzu?
11 Tutale kyebhi o kidyelelu kya kwatekesa phange Nzwana wala ni uhaxi wabhonzo. Mwene wambe: “Kyoso o ibhidi yami ingiluwalesa kyavulu, ngitangela kwa Jihova kyebhi ki ngamudivwa, eme ngejiya kwila mwene ungitendela. Mu kiki mu ithangana yiyi Jihova ungibhana ‘o kutena kusomboka o kutena kwa athu.’” (2 Ko. 4:7) Phange Nzwana udixinganeka we ku mundu wa ubhe, kyoso “ki bhwa kà kala mukwa-bhata . . . wila: ‘Nga kata.’” (Iza. 33:24) Se tujikula o muxima wetu kwa Jihova ni kudikwatenena mu kidyelelu kyetu, twanda kala dingi ni nguzu.
12. Mukonda dyahi tutena kudyelela mu ikanenu ya Jihova? (Tala we ofoto.)
12 Kala kyabhangele ni Jijudé Jihova wene mubhanga we ima yavulu itubhangesa kudyelela ku ikanenu yê. Xinganeka mu ikanenu itwene mu mona kudikumbidila. Mu kifika, o Bibidya yamba kwila sayi Utuminu weji ‘swina ni kubotomoka.’ O Utuminu yu wene o Utuminu wa Anglo-Americana. (Dan. 2:42, 43) Twene mu kwivwa we yalungu ni “kutunguta kwa ixi mu ididi yavulu,” twene mubokela we o athu “akwa jixi joso.” (Mat. 24:7, 14) O ikanenu yiyi ni yamukwa, ikolesa o kixikanu kyetu kya kwila, o ikanenu yoso ya Jihova yanda dikumbidila.
O ikanenu itwene mumona kudikumbidila lelu, ikolesa o kixikanu kyetu kya kwila, o ikanenu yoso ya Jihova yanda dikumbidila (Tala okaxi 12)
JIHOVA UTUTULULUKISA KYOSO KITUKALA NI WOMA
13. (a) Ibhidi yebhi yeji dibhana nayu o Jijudé mu kithangana kya kwabhulula? (b) Kala kilondekesa o divulu dya Izaya 41:10-13, kyebhi Jihova kyaswinisa o Jijudé exile mu ubhika?
13 Sumbala Jihova wakondo o malamba a Jijudé akexile mu ubhika ku Babilonya bhukaxi ka kidyelelu, mwene wejidile kwila eji dibhana ni ibhidi mu kithangana kya kuvutuka. Jihova wakanena kwila sayi sobha weji kala ni kutena kwavulu weji tolola o jimbanza jakondolokele o Babilonya ni kwila ku pholo dya kwenda weji tolola we o mbanza ya Babilonya. (Iza. 41:2-5) O kwila o Jijudé atokalele kukala ni wôma? Jihova waswinisa o mundu wê ni izwelu yiyi: “Kana kukala ni wôma, kuma eme ngala bhwamoxi n’eye; kana kubhuwama, mbata eme ngala ngi Nzambi yé; eme ngi ku swinisa.” (Tanga Izaya 41:10-13.) O izwelu “eme ngala ngi Nzambi yé” ilondekesa ihi? Ki ilondekesa ngo kwila o Jijudé atokalele kubheza Jihova, mukonda ene ejidile kya kwila atokalele kubhanga kiki. Maji yene ilondekesa we kwila Jihova wexile hanji ku mbandu yâ.—Jisá. 118:6.
14. Kyebhi dingi Jihova kyaswinisa o Jijudé?
14 Jihova waswinisa we o Jijudé bhukaxi ka kwijiya kwê ni kutena kwê kwonene. Mwene watendelesa Jijudé kutala o jithethembwa. Mwene wambela o Jijudé kwila wabhange o jithethembwa ni kwila wejiya o majina mâ. (Iza. 40:25-28) Se Jihova wejiya o majina a jithethembwa joso, sé phata mwene wejiya o majina a jiselevende jê joso! Se Jihova wala ni kutena kwa kubhanga o jithethembwa, sé phata mwene wala we ni kutena kwa kukwatekesa o mundu wê. O Jijudé kabhingile kukala ni hele mba woma.
15. Ihi yatangela Nzambi ku mundu wê yatokalele kubhanga phala kwabhulula?
15 Jihova watangela we ku mundu wê yatokalele kubhanga kyoso kyeji kwabhulula. Ku mbandu yadyanga mu divulu dya Izaya, Nzambi wambe kiki ku mundu wê: “Wila kiki, enu mu mundu wami, ndenu, mu bokone mu jinzu jenu, mu di jikile momo, mu swame ngó kathangana, katé ki somboka o njinda.” (Iza. 26:20) Nange o Jijudé akumbidila o kitendelesu kiki kyoso Sobha Silu kyamateka kulwa ni akwa Babilonya. Mu ukulu, sayi diyala mukwa musoso, mukwa Ngelexya wambe kwila kyoso Silu kyabokona ku Babilonya, mwene “watumu o masoladi mê phala kujibha athu oso exile mu ikoka.” Xinganeka o woma wexile nawu o athu akwa Babilonya! Maji o Jijudé abhuluka mukonda abelesela o itendelesu ya Jihova.
16. Mukonda dyahi kitubhingi kukala ni woma wa ima yanda bhita ku hadi ya dikota? (Tala we ofoto.)
16 Ihi itwadilongo? Kwakambe ngo, kwanda mateka o hadi ya dikota. Kyoso kyanda mateka, o athu ku mundu anda kala ni woma, anda tandanganya. Maji o mundu wa Nzambi kana, mukonda twejiya kwila Jihova, Nzambi yetu. Twanda swina mukonda dya kwijiya kwila “o kubhuluka [kwetu] kwa zukama.” (Luk. 21:28) Né mwene kyoso o kibuka kya ifuxi kyanda tuzukutisa, twanda suluka mu kudyelela kwa Jihova. Jihova wanda tulanga bhukaxi ka ji-anju ni bhukaxi ka itendelesu yê. Maji kitwejiya luwa se mwene wanda tubhana o itendelesu yiyi bhukaxi ka nanyi. Nange twanda tambula o itendelesu yiyi mu ilunga yetu. Nange jene o “jinzu,” mu twanda disweka. Kyebhi kitutena kudisokejeka ku ima yanda bhita ku hadya? Twatokala kukolesa o ukamba wetu ni jiphange jetu, kukala polondo phala kubelesela o itendelesu ya kilunga kya Jihova ni kudyelela kwila Jihova wamukwendesa o kilunga kyetu.—Jih. 10:24, 25; 13:17.
Twejiya kwila Jihova wala ni kutena ni uhete phala kutubhulula, kyenyiki kitubhingi kukala ni woma wa ima yanda bhita mu kithangana kya hadi ya dikota (Tala okaxi 16)b
17. Kyebhi kitutena kulengela kwa Jihova phala kutuswinisa?
17 Sumbala o mwenyu wa Jijudé ku Babilonya wabhonzele, Jihova wakondo o malamba mâ. Mwene wanda bhanga we kiki n’etu. Kize ki kizé, tusulukyenu mu kwehela Jihova kutukonda o malamba. Dyelela kwila mwene uloloka o jiselevende jê ja fiyele, wene we mwalanga. Kolesa o kidyelelu kyé. Lembalala kwila, kuma Jihova, Nzambi yé, eye kubhingi kukala ni woma!
MWIMBU 3 Jihova Nguzu Yami, Kidyelelu Kyami
a Sayi majina a alungulula.
b KILOMBOLWELU KYA FOTO: Kibuka kyofele kya jiphange adyongeka. Mu kutala jithethembwa javulu, ene alembalala kwila Jihova wala ni kutena ni uhete phala kubhulula o mundu wê mu ixi.