Kayela o Phangu ya Jihova ya Kulenduka

1. Ihi i kubhangesa kudiwana mu kulenduka kwa Jihova?

KYOSO ki ubanza ku jinguvulu, o kwila uxinganeka kuma, ene athu alenduka? Nange kana. Maji Jihova, o Muteni-wa-yoso, walenduka. (Jisá. 113:​5-8) Kikwalé muthu walenduka dingi, Jihova ndenge. Mu milongi yiyi twanda dilonga maukexilu awana a Jihova kudibhana netu. O maukexilu yá anda londekesa kwila, Jihova muthu walenduka. Twanda dilonga we kyebhi Jezú kyene mukayela o phangu ya Tat’ê, ya kulenduka. Kubhanga kiki kwanda tukwatekesa kuzukama dingi kwa Jihova ni kukayela o phangu yê ya kulenduka.

JIHOVA WALA JINGA POLONDO PHALA KUTWIVWA

2. O divulu dya Jisálamu 62:8 ditutangela kwila twatokala kubhanga ihi? (Tala we yakapa.)

² Kubhonza kuzwela ni athu akwa ukumbu. O athu akwa ukumbu atalatala kyayibha akwa, mukonda ene adimona kwila abeta dingi kota, akwa ndenge. Mukonda dya kiki o athu ene mwalenga. Maji Jihova kadifu ni ene! O Tat’etu ya dyulu muthu walenduka, mukonda dya kiki mwene utubhinga phala kumutangela o ibhidi yetu yoso ni yoso yatukala ku muxima. (Tanga Jisálamu 62:8.) Kala o tata wivwa o twana twê kyoso kyamu dibhana ni ibhidi, Jihova wala we polondo phala kutwivwa. Mu Bibidya tusanga-mu misambu yavulu ya jiselevende ja Jihova. Kiki kilondekesa kwila mwene wala jinga polondo phala kutwivwa. (Josu. 10:​12-14; 1 Sam. 1:​10-18) Maji sayi bhabha tudivwa kwila Jihova katokala kwivwa o misambu yetu mukonda dya ituxi itwatele. Se kyene ki twamu divwa ihi itwatokala kubhanga?

3. Mukonda dyahi wadyelela kwila Jihova wamesena kuma usamba jinga kwa mwene?

³ Ne mwene se tumona kwila etu ki twala ni valolo ku pholo ya Jihova, tutena kusamba kwa mwene. Mukonda dyahi twamba kiki? Xinganeka mu kifika kya Jezú yalungu ni mona watexi o jimbote jê joso. Mu kifika kiki Jezú wasokesa Jihova ni tata mukwa henda wala ni mona ubanza kwila kafwame dingi kuvutuka ku dibhata dya tat’ê. Kyoso o mona yu kyavutuka kubhata, ihi yabhange o tat’ê? Jezú wambe kwila kyoso o tata kyamono mon’ê, “mwene anga ulenga ni lusolo u mu ndwakuna, ni henda yoso u mubhana jinzobole.” (Luk. 15:​17-20) Jihova wadifu ni tata yu. Kyoso o selevende ye kyakala ni kikote ku muxima mukonda dya kuditatela mba mukonda dya kutandanganya, ni kulenduka kwoso Jihova u mwivwa. (Kud. 3:​19, 20) Jihova utukwatela henda yavulu. Kala o tata wayi ni kulenga phala kundwakuna mon’ê, Jihova ni lusolo lwoso ubhanga kima phala kutukonda o malamba metu. (Iza. 57:15) Lelu kyebhi Jihova kyene mubhanga kiki? Mwene ubhanga kiki bhukaxi ka tufunga, ka jindandu jetu ala jimbangi ja Jihova ni bhukaxi ka jiphange jetu mu kilunga. (Tiy. 5:​14, 15) Jihova utubhana o kikwatekesu kiki mukonda mwene wamesena kwila tumuzukama.

4. Mukonda dyahi o athu kexile ni hele ya kuzwela ni Jezú?

⁴ Kyebhi Jezú kyakayela o phangu ya Tat’ê? Kala Tat’ê, Jezú we walenduka. Mukonda dya kiki kyoso kyexile mu ixi o athu kexile ni hele ya kuzwela ni mwene. Ene kexile ni woma wa kumubhanga ibhwidisu. (Mál. 4:​10, 11) Kyoso mwene kyexile mubhanga ibhwidisu ku athu, ene exile muzwela yoso yexile mu mixima ya. (Mat. 16:​13-16) Kyoso kyexile mutondala ene kexile ni woma wa kwila Jezú weji zwela nawu ni undanda. Ene ejidile kwila Jezú mukwa henda, mukwa mwanyu ni mukwa kuloloka. (Mat. 17:​24-27) Kuma Jezú wa kayela o phangu ya Tat’ê ni kuyuka kwoso, mu kumumona o maxibulu me atena kwijiya kyambote Jihova. (Nzw. 14:9) Ene adilongo kwila Jihova muthu walenduka ni kwila wamesena kwila tumuzukama, ene amono we kwila Jihova kadifu ni atwameni a jingeleja ja exile akwa ukumbu ni akwa kudizangeleka.

5. Kyebhi o kulenduka kutukwatekesa kukala polondo phala kwivwa akwetu?

⁵ Kyebhi ki utena kukayela o phangu ya Jihova? Se tulenduka twanda kala polondo phala kwivwa akwetu. O kulenduka kwanda tukwatekesa kukamba kukala akwa lwimbi ni akwa kudizangeleka, mukonda o idifwa yiyi ibhangesa o athu kudisandula mudyetu. Maji o kulenduka kwanda kutukwatekesa kukala twakwa henda, twakwa mwanyu ni akwa kuloloka. O idifwa yiyi ibhangesa o athu kutuzukama. (Kol. 3:​12-14) Benge-benge o tufunga atokala kukala polondo phala kubhana matwi ku jiphange. Phala kubhanga kiki ene atokala kukala ni jiphange. Mukiki o tufunga abhanga yoso ni yoso phala kukala mu kididi kya ubhezelu, muveji dya kutala o kyonge bhukaxi ka iselekete. Ene wa abhanga yoso ni yoso phala kuboka ni jiphange nzo ni inzo. Se o jiphange akala jinga kumbandu ya tufunga, ene kanda kala ni hele ya kuzwela ni tufunga kyoso kyabhindamena kikwatekesu.

JIHOVA KI MUKWA KUJIZA

6-7. Misoso yebhi ilondekesa kwila Jihova ki mukwa kujiza?

⁶ O akwa ukumbu adimona kuma ejiya yoso ni kwila akwa kujiza. Sumbala Jihova wejiya yoso, maji ne kiki mwene ki mukwa kujiza. Mukonda dya kulenduka, mwene wala polondo phala kwivwa o athu. Mukifika, tala kyebhi Jihova kyatalatala Midiyana, phange ya Mozé. Midiyana ni phangye ya mukwa Alá, alongolola Mozé, sumbala Jihova wexile muzwela bhukaxi ka Mozé. Mukidi Midiyana wexile mulongolola Jihova. Mukonda dya kiki Jihova waluwalele kyavulu ni Midiyana yu wamubhangesa kukala ni uhaxi wa dibhute. Mukonda dya kiki Alá wabhingi kwa Mozé phala kukwatekesa Midiyana, Mozé wadyondela Jihova phala kumusaka. Ihi yabhange Jihova? Se Jihova wexile mukwa ukumbu, keji mubhana mátwi. Kuma Jihova walenduka, mwene wevu Mozé yu wasake Midiyana.—Dya. 12:​1-15.

⁷ Jihova watalatala we sobha Ezekiya ni kulenduka kwoso. Bhukaxi ka polofeta Izaya, Jihova wambe kwa Ezekiya kwila weji fwa. Mukiki Ezekiya wadidi, yu wadyondela kwa Jihova phala kumusaka. Jihova watambwijila o musambu wa Ezekiya ni henda yoso wamu bandekesa dingi 15 ya mivu. (2 Jis. 20:​1, 5, 6) Mukidi Jihova wazolo kyavulu o athu, mukonda dya kulenduka kwê, mwene wala polondo phala kwa evwa.

8. Ihi ilondekesa kwila Jezú ki mukwa kujiza? (Máluku 3:​1-6)

⁸ Kyebhi Jezú kyakayela o phangu ya Tat’ê? Jezú kimukwa kujiza, mwene wexile mukwatekesa jinga o athu. Mukifika, Jezú wasake athu mukizuwa kya Sabhalu, o atwameni a jingeleja exile mumona kwila kituxi kubhanga kiki. (Tanga Máluku 3:​1-6.) Kuma mwéne o mutwameni wa kilunga, Jezú wene mukwatekesa o athu kate lelu. Mukifika, kyoso o muthu mu kilunga kyata kituxi kyadikota, Jezú ni mwanyu woso umukwatekesa kyavulu phala kudyela o kituxi kyê.—Dij. 2:​2-5.

9. Kyebhi kitutena kukamba kukala tu akwa kujiza? (Tala we o jifoto.)

⁹ Kyebhi ki utena kukayela o phangu ya Jihova? Kala Jihova twatokala kulenduka, ni kukamba kukala twakwa kujiza. (Tiy. 3:17) Mukifika, o jitata kene mujiza, kakingila kwila o twana twa abhanga ima yatundu o nguzu ya. Kala kilondekesa o divulu dya Dimatekenu 33:​12-14 Jakobo wabhana phangu yambote mu maka enya. O jitata jalenduka kene muzwela kwila mona umoxi wabeta dingi kota, o wamukwa ndenge. O tufunga katokala we kukala akwa kujiza. Mukiki o kafunga katokala kudikwatenena kyavulu mu kibanzelu kye. Maji mwene utena kuxikina o kibanzelu kya akwa se kyene kyalungu ni itumu ya Bibidya. (1 Tim. 3:​2, 3) Etwenyoso twatokala kutetuluka o ibanzelu ya akwetu ne mwene kyoso kitukala ni kixinganeku kyengi. (Lom. 14:1) O jiphange joso mukilunga atokala ‘kulondekesa o kutetuluka kwâ ku athu oso.’—Fil. 4:5.

JIHOVA MUKWA MWANYU

10. Kyebhi Jihova kyalondekesa o mwanyu?

¹⁰ Eye wejiya kwila o muthu mukwa ukumbu kawabhela kukingila. O ukumbu wene mwabhangesa kukamba mwanyu. Maji kikyene kimoxi ni Jihova! Mwene wabeta dingi kota mukulondekesa mwanyu, muthu woso-woso ndenge. Mukifika, mu izuwa ya Nowé, Jihova wambe kwila weji kingila 120 ya mivu phala kubwika o athu ayibha. (Dim. 6:3) Mukonda dya kiki Nowé watena kusasa o twana twê, ni kikwatekesu kya mwiji wê, mwene watena kutunga o aláka. Mu kithangana kyengi Jihova wevu ni mwanyu woso kyoso Mbalahamu kyexile mu mubhanga ibhwidisu yalungu ni kibwikilu kya mbanza ya Sodoma ni Ngomola. O mukwa ukumbu nange weji zwela kiki, ‘eye nanyi phala kungibhanga o ibhwidisu yoso yiyi?’ Maji kuma Jihova kimukwa ukumbu mwene walondekesa mwanyu kwa Mbalahamu.—Dim. 18:​20-33.

11. Kala kilondekesa o divulu dya 2 Phetele 3:​9, mukonda dyahi Jihova wene mulondekesa mwanyu lelu?

¹¹ Kate lelu, Jihova muthu wa lenduka, wene we mulondekesa mwanyu. Mwene wamukingila o kithangana kya xindi mwene phala kubheka o dizubhilu dya mundu yu. Maji mukonda dyahi Jihova mukwa mwanyu? “Mukonda mwene kamesena kwila kukala muthu ufwa. Maji wamesena kwila athu oso adyela o ituxi yâ.” (Tanga 2 Phetele 3:9.) O kwila o mwanyu wa Jihova kiwale ni valolo? Wala! Mukonda mazunda ni mazunda a athu amuzukama, ya ala makamba mê. Twamu kingila we kuma o mazunda ni mazunda a athu amukwa abhanga we kiki. Maji o mwanyu wa Jihova wala ni mbambe. Jihova wazolo o athu, maji wazembe o kuyibha. Mu kiki mwene kanda kwehela o kuyibha kunangenena kate ku hádya ni hádya.—Haba. 2:3.

12. Kyebhi Jezú kyamukayela o phangu ya Jihova yalungu ni mwanyu?

¹² Kyebhi Jezú kyakayela o phangu ya Tat’ê? Jezú wamu kayela o phangu ya Jihova ya lungu ni mwanyu mu mazunda ni mazunda a mivu. Jezú wene mumona Satanaji kuzwela makutu alungu ni Jihova ni jiselevende jê jafiyele. (Dim. 3:​4, 5; Jobe 1:11; Dij. 12:10) Jezú wene mumona we o hadi yamutala o athu mu ixi. Mwene wala ni hanji ya “kubwikisa o ikalakalu ya Dyabhu”! (1 Nz. 3:8) Ihi yene mukwatekesa Jezú kukingila ni mwanyu katé Jihova kumwehela kubwikisa o ikalakalu ya Dyabhu? Kima kimoxi o kulenduka. Mukonda dya kulenduka, Jezú wehela o maka enya bhu maku a Jihova, mukonda wejiya kwila Jihova mwéne ngo wala ni ungana phala kusola o kithangana phala kubhanga kiki.—Ika. 1:7.

13. Kyebhi Jezú kyalondekesa mwanyu ku jipoxolo jê, ni mukonda dyahi mwene wabhange kiki?

¹³ Kyoso kyexile mu ixi, Jezú walondekesa we mwanyu ku jipoxolo jê. Mu kifika, kyoso ene kyexile muzoka se nanyi wabetele-kota, Jezú kexile muthathamana, maji wexile mwadyelela ni kwalondekesa mwanyu. (Luk. 9:46; 22:​24-27) Jezú wabhange kiki mukonda wejidile kwila kupholo dya kwenda, ene eji tena kulenduka kala mwene. O kwila watele kya kilwezu kimoxi mu ithangana yavulu? Se kyene, eye usanguluka kyavulu mu kukala ni Sobha mukwa kulenduka, mukwa mwanyu we.

14. Ihi yanda tukwatekesa kulondekesa dingi mwanyu?

¹⁴ Kyebhi ki utena kukayela o phangu ya Jihova? Phala kuxinganeka ni kubhanga o ima kala kibhanga Jihova, twatokala kukala ni “kilunji kya Kidistu.” (1 Ko. 2:16) Kyebhi kitutena kukala ni kilunji kya Kidistu? Ukexilu umoxi wa kubhanga kiki, o kutanga o divulu dya Matesu, dya Máluku, dya Luka ni divulu dya Nzwá. Kyenyiki, twatokala kukatula kithangana phala kuxinganeka mu ima itulonga o madivulu yá yalungu ni ukexilu wa Jezú kuxinganeka. Twatokala we kusamba phala Jihova kutukwatekesa kukala tu athu alenduka ni athu akwa mwanyu kala Jezú. Kyoso kitukala ni kilunji kya Kidistu, twanda kayela o phangu ya Jihova ni kulondekesa mwanyu kokwetu ni ku akwetu.—Mat. 18:​26-30, 35.

JIHOVA UBHANA VALOLO KU ATHU ALENDUKA

15. Bhana ifika ilondekesa kwila Jihova ubhana valolo yavulu ku athu abatama. (Jisálamu 138:6)

¹⁵ Tanga Jisálamu 138:6. Xinganeka ngo: Jihova, o Suke-ku ya ngongo yoso ubhana valolo yavulu ku athu alenduka! Mu ukulu mwexile athu kexile mu abhana valolo ku akwa, maji Jihova wexile mubhana valolo ku athu yá. Nange mwaxaxi kâ mwala athu kitwa ejiya kyambote, maji Jihova wate o misoso yâ mu Bibidya. Mu kifika, Jihova wabhangesa Mozé kusoneka yalungu ni muhatu amwixana Debola. Mwene wexile kiledi kya mwiji wa Izake ni mwiji wa Jakobo mu 125 kya mivu! Sumbala kitwejiya ima yavulu yalungu ni muhatu yu wafiyele, maji Jihova wabhangesa Mozé kusoneka o musoso wê, mukonda Jihova wamuzolele kyavulu. (Dim. 24:59; 35:​8, nota) Mivu yavulu ku pholo, Jihova wasolo munzangala amwixana Davidi, phala kukala o sobha ya Izalayele. O munzangala yu wexile mubhidi wa jimbudi. (2 Sam. 22:​1, 36) Kyoso Jezú kyamuvwala, mu kubhita kakithangana Nzambi watumikisa jianju phala kuzwela ni abhidi a jimbudi. Éne adyangele o kwijiya kwila o Mexiya amuvwalele ku Beleme. (Luk. 2:​31, 39) Kyoso Zuze ni Madiya kyambata Jezú mu tembulu, mwenyomo mwexile adyakime ayadi akukile kya, a exanene Ximinyá ni Ana. Ene atena kumona o Mon’a Nzambi. Yu wexile ujitu wadikota! (Luk. 2:​25-30, 36-38) Kima kyambote kwijiya kwila, sumbala Jihova “kota dya ngana, maji u suwa yó wa batama”!

16. Kyebhi Jezú kyakayela o phangu ya Tat’ê?

¹⁶ Kyebhi Jezú kyakayela o phangu ya Tat’ê? Kala Tat’ê, Jezú ubhana valolo yavulu ku athu alenduka. Mwene walongo o kidi kyalungu ni Utuminu wa Nzambi ku “athu oso-oso, kadilongele kyavulu.” (Ika. 4:13; Mat. 11:25) Jezú wasake we o jihaxi, mwene wabhange kiki mu ukexilu wa abhangesa kudivwa kwila a azolo ni kwila a axila. (Luk. 5:13) Mu usuku ande dya kufwa, Jezú wasukula o inama ya jipoxolo jê. O abhika éne exile mubhanga o kikalakalu kiki. (Nzw. 13:5) Ande dya kuya ku dyulu, Jezú wabhana ku akayedi’ê oso, o kikalakalu kyabeta-kota mu ngongo. O kikalakalu kiki kyalungu ni kukwatekesa o athu phala kutambula o mwenyu wakalelaku. O kikalakalu kiki kyatutokala we etu lelu.—Mat. 28:​19, 20.

17. Kyebhi kitutena kubhana kijingu ku athu? (Tala we o foto)

¹⁷ Kyebhi ki utena kukayela o phangu ya Jihova? Etu tubhana kijingu ku athu kyoso kitwabokela o njimbu yambote, kikale se ambundu mba mindele, kikale se adilongo kyavulu mba kana. Tubhana kijingu ku jiphange jetu kyoso kitu amona kwila abeta dingi kota, etu ndenge, né mwene se twala ni uhete mba maujitu ene kala nawu. (Fil. 2:3) Jihova usanguluka kyavulu kyoso kitulenduka ni kyoso kituditalatala ni henda ni kuxila kwoso.—Lom. 12:10; Sof. 3:12.

18. Mukonda dyahi twatokala kukayela o phangu ya Jihova ya kulenduka?

¹⁸ Kyoso kitubhanga yoso i tutena phala kukayela o phangu ya Jihova ya kulenduka, twanda kala dingi polondo phala kwivwa akwetu ni kwalondekesa dingi o mwanyu, kitwanda kala tu akwa kujiza. Kala kyene mubhanga Jihova, twanda bhana we valolo ku athu alenduka. Mu kiki-phe, se tubhanga yoso i tutena phala kukayela o phangu ya Jihova ya kulenduka, twanda kala dingi ni valolo bhupholo yê!—Iza. 43:4.