O Adyakime Akuka Kya Ala ni Valolo Yavulu mu Kilunga Kya Jihova

Nange eye we kiwene mubhanga dingi ima yavulu mukonda dya kukuka. Sumbala wamusidivila Jihova mu mivu yavulu, eye utena kukala ni ibanzelu yayibha. Nange ubanza kwila kwalé dingi ni valolo bhu pholo ya Jihova mukonda eye usokesa o ima i wene mubhanga kindala ni ima i wexile mubhanga mu ukulu. Kyenyiki-phe, ihi i utena kubhanga se wala ni kixinganeku kiki?

JIHOVA UKINGILA IHI KOKWÉ?

Dibhwidise: ‘Jihova ukingila ihi kokwami?’ O izwelu yala mu divulu dya Matendelelu 6:5 itena ku kuswinisa. Yene yamba: “Zola Jihova Nzambi yé ni muxima wé woso, ni mwenyu wé woso, ni nguzu yé yoso.”

O vélusu yiyi ilondekesa kwila Jihova wamesena kuma umusidivila ni muxima wé woso, ni mwenyu wé woso ni nguzu yé yoso. Kiki kitena ku kukwatekesa kukamba kudisokesa ni akwenu, mba kukamba kusokesa o ima i wamubhanga kindala ni ima i wexile mubhanga mu unzangala wé.

Xinganeka mu maka yá: Kyoso ki wexile u munzangala, ihi i wexile mubhanga mu sidivisu yé kwa Jihova? Jimbangi javulu ja Jihova anda zwela kwila exile mubhanga yoso yatenene. Maji mu kindala kiki, kuma o ima yalunguluka eye wamusuluka ni kubhanga yoso i utena mu sidivisu yê. Se uxinganeka mu maka yá mu ukexilu yu, wanda mona kwila wamubhanga kya yoso i utena, kala ki wexile mubhanga mu ukulu.

EYE UTENA KULONGA AKWENU BHUKAXI KA IMA I WADILONGO KU MWENYU WÉ

Mu veji dya kubanza ngo mu ima ki utena dingi kubhanga, né kiki eye utena hanji kukwatekesa athu avulu sumbala wakuka kya. Kindala eye utena kubhanga ima kiwatenene ku ibhanga kyoso ki wexile u munzangala. Mu kifika, eye utena kubhanga o ima yiyi:

O ima i wadilongo ku mwenyu wé, tangela-yu akwenu. Xinganeka mu izwelu yiyi yala mu Bibidya:

Sobha Davidi: “Tunde mu undenge, o kiki nga kuka; kiluwa ngi mona mukwa kidi a mu ehelela, mba mbutu yê yenda ni kubhinga jimola.”—Jisá. 37:25.

Jozuwé: “Talenu, kwa ngikambe ngo eme nganda fwa, enu mwejiya kyambote ni muxima wenu woso, ni mwenyu wenu woso kwila, ku izwelu yoso ya mikanena Jihova, Nzambi yenu, kikukambe né ngo kizwelu kimoxi kudikumbidila, yoso yadikumbidila kokwenu. Kikukambe kudikumbidila né ngo kizwelu kimoxi.”—Josu. 23:14.

Nange eye waswinisine kya akwenu ni izwelu kala yiyi kyoso ki wexile u munzangala. Kuma Davidi ni Jozuwé amwene o ima yiyi ni mesu mâ, o izwelu yâ yexile dingi ni nguzu.

Se eye wamusidivila kya Jihova mu mivu yavulu, utena we kuzwela ku akwenu o mabesá ejila mu kubhanga kiki. Wamulembalala o kizuwa ki wamono Jihova kukwatekesa o mundu wê mu ukexilu wa katunda? Se kyene, tangela o maka yá ku akwenu! O ima yiyi i wanda kwatangela yanda kwaswinisa kyavulu.—Lom. 1:​11, 12.

O kima kya mukwa ki utena kubhanga phala kukwatekesa akwenu, o kuya mu kididi kya ubhezelu, kyoso ki utena. Se ubhanga kiki, wanda swinisa akwenu, ene we anda kuswinisa. Mamá Katidi, twamutumbula kudima, wambe: “O kuya mu kyonge mu kididi kya ubhezelu ku ngikwatekesa phala kingiluwale, mukonda koko o jiphange alondekesa kwila angizolo kyavulu. Phala kulondekesa kwila nga azolo, ngene mwa ambatela ima, ngene mubhanga we yoso ni yoso phala kukala nawu kumoxi mu ikalakalu mu nzumbi.”

JIHOVA UBHANA VALOLO MU SIDIVISU YÉ KWA MWENE

Mu Bibidya mwala misoso ya jiselevende ja Jihova, amesenene kubhanga dingi mu sidivisu yâ kwa Jihova, maji katenene mukonda dya kukuka. Tala o phangu ya Ximinyá, mwadyakime mukwa Izalayele, wexile ku mwenyu kyoso kyavwala Jezú. Kyoso Ximinyá kyexile muya mu tembulu, nange wexile mumona minzangala kukalakala-mu. Nange Ximinyá wexile mubanza kwila kexile dingi ni valolo bhupholo ya Jihova, mukonda katenene dingi kubhanga kyavulu kala kyakexile mubhanga mu unzangala wê. Maji Jihova kexile mubanza kiki yalungu ni mwene. Jihova wamono kwila, Ximinyá “wexile muthu wambote, utumaka Nzambi.” Mu kiki, Jihova wamubhana o ujitu wa kumona Jezú, kyoso Jezú kyexile hanji kabwetele. Jihova wamubhangesa we kutangela o athu kwila o kabwetele koko, mwéne weji kala o Mexiya! (Luk. 2:​25-35) Jihova kadikwatenene mu nguzu yexile nayu Ximinyá kyoso kyexile munzangala, maji wadikwatenene mu kixikanu kyê kyakolo ni kwila Ximinyá wezalele ni “nzumbi ikôla ya Nzambi.”

Eye we utena kudyelela kwila Jihova ubhana valolo mu sidivisu yé sumbala ni ibhidi i wene mudibhana nayu. Phala Jihova, o “muthu watokala kubhana kala kya kala nakyu, kana mu ima kala nayu.”—2 Ko. 8:12.

Mu kiki, dikwatenene mu ima i utena kubhanga. Mu kifika, xinganeka mu maukexilu u utena kuboka, né mwene se wanda boka ngo bhofele. O kwila utena kuswinisa akwenu mukwaxindila mu mutelembe mba mu kwasonekena njimbu? O kulondekesa henda ku jiphange, né mwene mu kwabhangela ima yofele itena kwaswinisa kyavulu, benge-benge se eye wamusidivila kya Jihova mu mivu yavulu.

Sayi athu kala dingi ni nguzu yavulu mu mukutu. Tala yabhiti ni phange imoxi ya muhatu, watungu mu África. O musoso yu wala mu kaxa ni dyambu “Mwadyakime Wabhulula o Mwenyu wa Muthu Bhukaxi ka Bibidya.”

Ithangana yoso lembalala kwila o kixikanu kyé ni ufiyele wé kwa Jihova, wene muswinisa akwenu. Eye u phangu ya kukolokota, utena we kudyelela kwila “Nzambi wayuka, kyenyiki mwene kanda jimba o kikalakalu kyenu ni henda i mwene mu londekesa mu dijina dyê mu kukwatekesa o athu o’sole ni mu kukolokota mu kwa kwatekesa jinga.”—Jih. 6:10.

KATÉ BHWOSO BHU UTENA, KWATEKESA AKWENU

O akwa kutokwesa amba kwila o adyakime akuka kya ene mukwatekesa akwâ, ala dingi ni sawidi, abanza dingi kyambote, anangenena dingi ku mwenyu.

Mu kidi, né mwene se ukwatekesa akwenu, wanda suluka hanji mu kwivwa o jindolo jijila mu kukuka, mukonda o Utuminu wa Nzambi wene ngo wanda zubha o kima kitubhangesa kukuka ni kufwa, o kituxi kitwalundula kwa Adá ni Eva.—Lom. 5:12.

Né kiki, o ima i wene mubhanga mu sidivisu yê kwa Jihova, kala o kukwatekesa o athu kumwijiya, ikubhangesa kudyelela dingi mu ikanenu ya Jihova, ikukwatekesa we kukala ni sawidi yambote. Mu kiki, énu mu adyakime mwakuka kya, ijiyenu-kyu kwila Jihova ubhana valolo mu yoso i mwene mubhanga ni kwila o jiphange akatula mbote yavulu mu kixikanu ki mwala nakyu.