Dya Kayadi Dya Malunda

34 Joziya wexile ni dinake dya mivu kyoso kyakituka sobha, yu watumina mu makwinyi atatu a mivu ni umoxi mu Jeluzaleme. 2 Mwene wabhange ima yambote bhu pholo ya Jihova, wakayela o phangu ya kukwê Davidi. Kabhukumuka o itumu ya Nzambi.

3 Ku muvu wa kanake wa utuminu wê, kyoso Joziya kyexile hanji kamunzangala, mwene wamateka kubheza o Nzambi ya kukwê Davidi. Mu muvu wa dikwinyi ni kayadi wa utuminu wê, mwene wamateka kuzelesa Judá ni Jeluzaleme, wabulu o ididi ya kubhezela ni iteka yoso ya felu. 4 O jikalatódyu ja Bahale ajibulu bhu pholo ya Joziya. Joziya wabulu o jikalatódyu mwexile mubhakula o wasu wa dizumba. Wabulu we o jiphiladi ni iteka yoso, wa itutujula, kate ki yakituka fufuta, yu wa i mwange ku thandu a jimbila ja yó exile mwabhakwila o jisata. 5 Woha we o ifuba ya akunji ku jikalatódyu jâ. Mu kubhanga kiki, wazelesa o mbanza ya Judá ni ya Jeluzaleme.

6 Mu jimbanza ja Manasa, ja Efalayíme, ja Ximinyá ni ja Nafitali ni mu ididi yazukamene ni jimbanza jiji, 7 wabulu-mu o jikalatódyu, jiphiladi ni iteka kate ki yakituka fufuta. Wabulu we o jikalatódyu joso mwexile mubhakula o wasu wadizumba. Mukusuluka, wavutuka mu Jeluzaleme.

8 Ku muvu wa dikwinyi ni kanake wa utuminu wê, kyoso kyazubha kuzelesa o ixi ni tembulu, sobha Joziya watumikisa Safani, o seketa, mon’a Azaliya ni Mahaseya, o mutwameni wa mbanza ni musoneki Jowa, mon’a Nzowakaji, phala kuyudika o inzo ya Jihova, Nzambi yê. 9 Ene ayi muzwela ni mukunji wadikota Hilikiya, a mubhana o kitadi kyejile-nakyu mu inzo ya Nzambi. O Jilevita jexile mulangidila o mabhitu, abhongolola o kitadi kiki ku akwa Manasa, ku akwa Efalayíme, ku kwa Bejamí, ku akwa Judá ni ku athu oso atungile mu Izalayele ni mu Jeluzaleme. 10 O kitadi akibhana kwa yó exile ku pholo ya ikalakalu mu inzo ya Jihova, ene abhana o kitadi kiki kwa yó exile mu kalakala mu inzo ya Jihova, phala kuyudika ni kutungulula dingi o inzo ya Nzambi. 11 O kitadi akibhana ku asongi a mabaya ni atungi, phala kusumba mabaya ni matadi osete kyambote, ni mixi phala kubhanga o mikambu phala kutunga o jisabhalalu jehela o jisobha ja Judá kuzanganya.

12 O mayala abhange o kikalakalu kyâ, kala kya atendelesa. O Jilevita jexile ku pholo dya mayala yá, enya: Jahate ni Obadiya, atokala mu kibuka kya Meladi, Zakadiya ni Melulane atokala ku kibuka kya Kohate. O Jilevita joso jexile ni uhete wa kwimba, 13 éne exile ku pholo dya akalakadi amukwa* ni dya mayala exile mukwatekesa o ikalakalu. Sayi Jilevita exile jiseketa, amukwa exile alangidi a mabhitu, amukwa exile ku pholo a ikalakalu yengi.

14 Kyoso kyakexile mukatula o kitadi kyabhekele o athu mu inzo ya Jihova, o mukunji Hilikiya wasange o divulu dya Kitumu kyabhanene Jihova kwa Mozé. 15 Kyenyiki, o mukunji wadikota Hilikiya wambela Safani o seketa, wixi: “Ngasange o divulu dya Kijila mu inzo ya Jihova.” Hilikiya anga ubhana o divulu kwa Safani. 16 Safani wayi muzwela ni sobha yu wa mwambela, wixi: “O jiselevende jé, a mubhanga yoso i wa atumina. 17 Ene akatula o kitadi kyexile mu inzo ya Jihova, ya akibhana kwa yó ala ku pholo ya ikalakalu ni ku akalakadi.” 18 O seketa Safani wambela we o sobha, wixi: “O mukunji wadikota Hilikiya wa ngibhana divulu.” Kyenyiki, Safani wamateka kutanga o divulu bhu pholo ya sobha.

19 Kyoso sobha kyevu o izwelu yexile mu divulu dya Kijila, watandula o izwatu yê. 20 Mukusuluka, sobha watendelesa Hilikiya, Hayikane mon’a Safani, Akebolo mon’a Mikaya ni Safani o seketa ni Azayiya, o selevende ya sobha, wixi: 21 “Ndenu ibhulenu mu dijina dyami ni mu dijina dya mundu wa Izalayele ni wa Judá, kyebhi o kibanzelu kya Jihova kyalungu ni izwelu yala mu divulu di twasange. Kuma Jihova watukwatela njinda yavulu, mukonda o jikuku jetu kabelesela o izwelu ya Jihova yala mu divulu didi, ene katumaka yoso yasoneka-mu.”

22 Kyenyiki, Hilikiya ni yó a atumikisa kwala o sobha, ayi muzwela ni polofeta ya muhatu amwixana Hulda. Mwene wexile muhatu wa Salume, wexile mubhaka o izwatu, wexile mon’a Tikiva mon’a Hala. Hulda watungile mu Jeluzaleme mu Mbanza ya Ubhe.* O akunji a atumikisa kwala o sobha azwela-nê bhenyobho. 23 Hulda wambe, wixi: “Jihova, o Nzambi ya Izalayele wambe kiki: ‘O diyala wa mitumikisa kokwami, mutangelyenu kiki: 24 “Jihova wambe, wixi: ‘O izwelu yoso yatange o sobha ya Judá mu divulu didi, nganda ikumbidila, nganda bheka divuwa bhu kididi kiki ni ku athu oso atungu-bhu. 25 Mukonda ene a ngixisa, ya a mubhakula jisata ku jinzambi jengi, phala ku ngithathamesa ni ikalakalu yoso ya maku mâ. O njinda yami yanda wama ku thandu dya kididi kiki, kala túbhya katena ku tujima.’” 26 Maji o sobha ya Judá, wa mitumikisa phala kwijiya o kibanzelu kya Jihova, mutangelyenu kiki: “Jihova Nzambi ya Izalayele wambe wixi: ‘Yalungu ni maka yó u wevu, 27 kuma o muxima we waxikina, eye waditulula bhu pholo yami, eme ngi Nzambi yé, kyoso kiwevu o maka u ngazwela alungu ni kididi kiki ni athu atungu-mu, waditulula bhu pholo yami, eye watandula o kizwatu kyé, wadidi, eme wami ngakwivu.’ Kiki kyene kyambe Jihova. 28 ‘Mukonda dya kiki, eye wanda dibunda kumoxi ni jikuku jé, wanda fwa maji anda kufunda ni kutululuka mu mbila yé, kuma o mesu mé kanda tala o wíndwa u nganda bheka bhu kididi kiki ni ku athu atungu-bhu.’”’”

Kyenyiki, ene ayi atangela o maka yá kwa sobha. 29 Bhenyobho, sobha watumu kwixana o atwameni oso a Judá ni a Jeluzaleme. 30 Mukusuluka, o sobha wayi mu inzo ya Jihova kumoxi ni mayala oso a Judá ni athu oso akwa Jeluzaleme, o akunji ni Jilevita ni mundu woso, tunde ku mwadyakime kate ku mona-ndenge. Mwene watange o izwelu yoso ya divulu dya kikutu, dyasangele mu inzo ya Jihova. 31 O sobha wemana bhu mbandu ya philadi, yu wate kikutu bhu pholo ya Jihova. Mwene wakanena kukayela ni kubelesela o itumu ya Jihova, o itendelesu yê, o jingonge jê ni muxima wê woso, mu kubelesela we o izwelu yoso yosoneke mu divulu dya kikutu. 32 Mwene wabhangesa o mundu woso mu Jeluzaleme ni mu mbanza ya akwa Bejamí kuxikina o kikutu kiki. O akwa Jeluzaleme akumbidila o kikutu kyate ni Nzambi, o Nzambi ya jikuku jâ. 33 Mukusuluka, Joziya wabulu o iteka yoso mu jimbanza joso ja Izalayele, yu waswinisa o mundu woso wa Izalayele kubheza ngo Jihova, Nzambi yê. Kyoso mwene kyexile ku mwenyu,* o athu keha kubheza Jihova, o Nzambi ya jikuku jâ.