Dya Kayadi Dya Malunda
3 Kyenyiki, Solomá wamateka kutunga o inzo ya Jihova mu Jeluzaleme, ku mulundu wa Modiya, bhwa monekene Jihova kwa tat’ê Davidi, o kididi kyayudika Davidi, bhu kididi kya kubhyatela kya Holonane mukwa Jebuze. 2 Ku muvu wa kawana ka utuminu wê, mu kizuwa kya kayadi kya mbeji ya kayadi, mwene wamateka kutunga o inzo. 3 O kaboko kabhange Solomá phala o inzo ya Nzambi yakidi, kexile ni makwinyi asamanu a jikovadu mu kulebha ni makwinyi ayadi a jikovadu mu kuzanza, kala kyexile muzonga m’ukulu.* 4 O mbalanda yexile ku pholo dya inzo, mu kuzanza yasokele ni kuzanza kwa inzo, kifwa, yexile ni makwinyi ayadi a jikovadu. Yene yexile ni makwinyi ayadi a jikovadu mu kulebha.* O mbalanda wa ifwamesa ni ulu yambote. 5 Wabhange jikwadulu ja mabaya a mixi ya junípelu mu dixilu dya dyanga, yu wa jifwamesa ni ulu yambote, wa seta-ku jifikula ja maye ni jifikula ja malubhambu. 6 Mwene wafwamesa we o inzo ni matadi afwama ni ulu yatundu ku Palavayime. 7 O inzo wa ifwamesa ni ulu, ni mikambu, ni jiphalelu ni mabhitu. Ku phalelu waseta-ku jifikula ja jikelubini.
8 Mwene wabhange o Kididi Kikôla Kinene.* O kulebha kwê kwasokele ni kuzanza kwa inzo, kifwa, makwinyi ayadi a jikovadu. O kuzanza kwê kwexile we kwa makwinyi ayadi a jikovadu. Yu wa ifwamesa ni hama jisamanu ja jitalendu* ja ulu yambote. 9 O jipheleku ja ulu jexile munema makwinyi atanu a jixikulu.* Wafwamesa we o maxilu a thunda ni ulu.
10 Mu Kididi Kikôla Kinene wabhange-mu jikelubini jiyadi, yu wa jifwamesa ni ulu. 11 O mabhabha a jikelubini mu kulebha exile ni makwinyi ayadi a jikovadu. O dibhabha dya kelubini ya dyanga dyexile ni jikovadu jitanu, dyexile mutula ku phalelu ya inzo. O dibhabha dya mukwa, dyexile ni jikovadu jitanu, dyexile muditakajana ni dibhabha dya kelubini ya mukwa. 12 O dibhabha dya kelubini ya kayadi dyexile ni jikovadu jitanu, dyexile mutula ku phalelu ya inzo. O dibhabha dya mukwa, dyexile we ni jikovadu jitanu, dyexile muditakajana ni dibhabha dya kelubini ya dyanga. 13 O mabhabha a jikelubini exile ni makwinyi ayadi a jikovadu. Jene jemanene, jalungile o jipholo moxi.*
14 Watungu kulutina ni jidinya ja azulu ni ja púlupula ni ja kusuka ni ja linyu yambote, yu watungu-ku we jifikula ja jikelubini.
15 Mukusuluka, wabhange jiphiladi jiyadi ku pholo dya inzo, jexile ni makwinyi atatu ni kitanu kya jikovadu mu kulebha, o ku thandu kwexile kapitele* kexile ni jikovadu jitanu. 16 Mwene wabhange malubhambu mu ukexilu wa misanga yu wa atula ku thandu a jiphiladi. Wabhange we hama ya jilomá yu wajitula ku malubhambu. 17 Mwene wemika o jiphiladi jiyadi bhu mwelu wa tembulu. Philadi imoxi wa imika ku mbandu ya kadilu,* yu wa iluku o dijina dya Jakini.* O philadi ya mukwa wa imika ku mbandu ya kyasu,* yu wa iluku o dijina dya Bowaji.*