Tunda Mwavundu, Kolokota mu Mukengeji

1-2. (a) Kwebhi kwexile poxolo Phawulu kyoso kyasonekena akwa Efezu ni mukonda dyahi mwene wa asonekena? (b) Ibhwidisu yebhi itwanda dilonga?

KYOSO poxolo Phawulu kyexile mu kaleya ku Loma, wamesenene kuswinisa o jiphange jê mu nzumbi. Kuma kejitena kwakunda, wa asonekena mikanda. Ku mikanda yê, umoxi wa usoneka ku muvu wa 60 mba 61 K.K., wa usonekena akwa Efezu.—Efe. 1:1; 4:1.

² Dikwinyi dya mivu kudima, Phawulu wakexile mu mbanza ya Efezu mu kuboka ni kulonga o njimbu yambote. (Ika. 19:​1, 8-10; 20:​20, 21) Mwene wazolele kyavulu o jiphange jê, wamesenene kwakwatekesa kukolokota mu ufiyele wâ kwa Jihova. Maji mukonda dyahi mwene wasonekene o Jikidistá ja a undu yalungu ni kitombe ni mukengeji? Madisá ebhi atena kudilonga o Jikidistá joso yalungu ni kitendelesu kiki? Mu milongi yiyi twanda tambwijila o ibhwidisu yiyi.

KUTUNDA MWAVUNDU PHALA KWIZA MU MUKENGEJI

3. Kifika kyebhi kyate Phawulu mu mukanda wê ku akwa Efezu?

³ Phawulu wasoneka kiki ku Jikidistá mu mbanza ya Efezu: “M’ukulu mwexile mwavundu, maji kindala mwala kyá mu mukengeji.” (Efe. 5:8) Phawulu wate o kifika kya kukala mwavundu ni kukala mu mukengeji phala kulondekesa kyebhi o Jikidistá ku Efezu kyalunguluka. Tumone se mukonda dyahi Phawulu wambe kuma o akwa Efezu ‘m’ukulu exile mwavundu.’

4. Kyebhi o akwa Efezu kyexile mwavundu?

⁴ Kukala mwavundu mukonda dya jingeleja ja makutu. Ande dya akwa Efezu kwijiya o kidi ni kukituka Jikidistá, ene axikinine ku ilongesu ya makutu ni ku wanga. Mu mbanza ya Efezu mwene mwakexile o tembulu ya nzambi ya muhatu amwixana Alitemiza. Athu avulu axikinine kwila o tembulu yiyi, yexile mwaxaxi ka sambwadi dya ima yafwamene dingi mu izuwa yenyoyo. O athu exile muya mu tembulu yiyi phala kubheza o iteka. O akwa kuyudika o iteka exile munganyala kitadi kyavulu mu kubhanga ni kusumbisa o iteka ya tembulu yiyi ni iteka ya nzambi Alitemiza. (Ika. 19:​23-27) Avulu kwenyoko akexile we mubhanga ima ya wanga.—Ika. 19:19.

5. Kyebhi o akwa Efezu kyexile mwavundu mukonda dya ufusa ni undumbu?

⁵ Kukala mwavundu mukonda dya undumbu ni ufusa. O athu mu Efezu exile mubhanga undumbu ni ufusa wavulu, kexile ni jisonyi ja kubhanga o ima yiyi. O athu kyoso kyexile muya mutala o jijoko, exile muzwela jindaka javulu, katé mwene mu jifesa ja jingeleja jâ. (Efe. 5:3) Athu avulu ku Efezu ‘axixidile kyá, kexile dingi ni jisonyi ja kima.’ O izwelu yiyi mu dimi dya Ngeleku ilombolola kuma ‘ene kexile dingi mu kwivwa ndolo.’ (Efe. 4:​17-19) Ande dya kwijiya o itumu ya Jihova, o kitongolwelu kyâ ki kyexile mwatangela se o yabhange yexile yambote mba kana. Kexile we mubhana valolo se kyebhi Jihova kyexile mudivwa ni ima yexile mu bhanga. Kyenyiki-phe Phawulu wa ambela kwila, o ilunji yâ yexile mwavundu, “mukonda dya kukola kwa mixima yâ ni mukonda dya kudituna o kwijiya Nzambi.”

6. Mukonda dyahi Phawulu wambe ku akwa Efezu kwila ene exile “kyá mu mukengeji”?

⁶ Maji sayi athu mu mbanza ya Efezu atundile mwavundu. Phawulu wasoneka kwila mu kithangana kyenyokyo exile “kyá mu mukengeji kumoxi ni Ngana.” (Efe. 5:8) Exile mubelesela o Mak’â Nzambi, edile kala mukengeji wexile mwa endesa. (Jisá. 119:105) O akwa Efezu yá axisa o ubhezelu wa makutu ni undumbu. Ene amateka ‘kukayela o phangu ya Nzambi,’ kumubheza ni ku musangulukisa.—Efe. 5:1.

7. Kyebhi o mwenyu wetu wa difwangana ni wa Jikidistá javulu mu Efezu?

⁷ Kyene we kimoxi, ande dya kudilonga o kidi, twexile we mwavundu mukonda dya ilongesu ya jingeleja ja makutu ni mukonda dya undumbu ni ufusa. Amoxi mudyetu twexile mubhanga jifesa jalungu ni jingeleja ja makutu, amukwá exile jindumbu. Maji kyoso kitwadilongo o itumu ya Jihova yalungu ni yawabha ni yayibha, twalungulula o mwenyu wetu. Twamateka kubhanga o ima yamesena Jihova kwila, tu ibhanga. Mukonda dya kiki, twala ni mabesá avulu. (Iza. 48:17) Maji sayi bhabha kubhonza kukala dikanga dya kitombe ni ‘kukolokota mu kwenda kala tu an’â mukengeji.’ Kyebhi kitutena kubhanga kiki?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

LENGA O KITOMBE

8. Kala kyamba Efezu 5:​3-5, o akwa Efezu atokalele kweha kubhanga ihi?

⁸ Tanga Efezu 5:​3-5. Phala kusuluka mu kulenga o kitombe, o Jikidistá mu mbanza ya Efezu atokalele kukolokota mu kudituna kubhanga o ima yazembe Jihova. Katokalele ngó kulenga o undumbu, maji atokalele we kweha o jindaka. Phawulu walembalesa akwa Efezu kwila se amesenene kulundula “o Utuminu wa Kidistu ni wa Nzambi”, atokalele kulenga o ima yiyi.

9. Mukonda dyahi twatokala kudilanga ku izwelu yalungu ni undumbu?

⁹ Twatokala we kudilanga phala kitubhange “o ima ya kitombe yakambe valolo.” (Efe. 5:11) Kidi kwila kyoso o muthu kyamona, kyevwa mba kyazwela yalungu ni ima ya undumbu ni ufusa, mwene wanda bhanga o ima yiyi. (Dim. 3:6; Tiy. 1:​14, 15) Sayi ixi, jiphange javulu minzangala abhange ukamba mu internete. Ku dimatekenu exile mu zwela ima yalungu ni Jihova. Maji ku pholo dya kwenda amateka kuzwela ima ya ufusa. Avulu mudyâ ambe kwila kuzwela o ima yiyi ya abhangesa kuta undumbu.

10. Ihi ya mesena kutuxikinisa satanaji? (Efezu 5:6)

¹⁰ O mundu wa Satanaji wamesena kutunganala mu kutuxikinisa kwila o ima yambe Jihova yalungu ni undumbu, ki kituxi. (2 Ph. 2:19) Maji kitudiwana, mukonda tundé ukulu Dyabhu unganala o athu phala katongolole o ima yawabha ni yayibha. (Iza. 5:20; 2 Ko. 4:4) Mukonda dya kiki, jifilime javulu, minangu mu mutelembe wa izuzumbya, ni milongi mu internete ituswinisa kubhukumukina o ijila ya Jihova! Satanaji wamesena kutuxikinisa kuma, kima kyambote kuta undumbu ni kwila kitwanda kata se tubhanga kiki.—Tanga Efezu 5:6.

11. Kyebhi o musoso wa Ângela ulondekesa kwila twabhingi kukayela o kitendelesu kya Efezu 5:7? (Tala we ofoto.)

¹¹ Satanaji wamesena kwila twenda ni athu atufidisa kubelesela o itumu ya Jihova. Mukonda dya kiki Phawulu wadimuna o Jikidistá ku Efezu phala kende ni athu exile mubhanga o ima yazembe Nzambi. Mwene wa ambela: “Kanenu kubhanga o ima yene mubhanga ene.” (Efe. 5:7) Maji twabhingi kudilanga, akwa Efezu mukulu ndenge mukonda mu izuwa yetu twene mubhita kithangana ni athu pholo ni pholo ni mu internete. Ângela,a watungu ku Azya, wamono kwila mu internete mwala ilwezu yavulu. Mwene wambe: “O internete itena kulungulula o ibanzelu ya muthu bhofele-bhofele. Kyene kyabhiti neme. Ku pholo dya kwenda, kinga thandanganyele dingi se o makamba mami kexile muxila o itumu ya Bibidya. Mu kubhita thembu ngamateka kumona kwila kikima kyaibha kubhanga o ima yazembe Jihova.” Maji tufunga twa henda akwatekesa Ângela kulungulula o ukexilu wê. Mwene wambe: “Kindala ngidilonga dingi ima yalungu ni Jihova ni ixinganeku yê, mu veji dya kuthandanganya ni internete.”

12. Ihi yanda tukwatekesa kuzokela o itumu ya Jihova yalungu ni yawabha ni yayibha?

¹² Twatokala kudituna o kibanzelu kya mundu, kya kwila kima kyawabha kuta undumbu. Maji twejiya kwila kibanzelu kiki ki kyakidi. (Efe. 4:​19, 20) Mukonda dya kiki, kima kyambote kudibhwidisa: ‘O kwila ngidituna kubhanga ukamba ni jikoleka ja salu, ja xikola, mba athu engi kene mubelesela o itumu ya Jihova? O kwila ngene muzokela o itumu ya Jihova, né mwene se athu amba kuma yene yaneme kyavulu?’ Kala kyamba 2 Timote 2:​20-22, twabhingi we kusola kyambote o makamba metu mu kilunga. Twejiya kwila sayi athu kanda tukwatekesa kusuluka fiyele kwa Jihova.

ENDENU “KALA MU AN’Â MUKENGEJI”

13. Ihi ilombolola “kwenda kala . . . an’â mukengeji”? (Efezu 5:​7-9)

¹³ Phawulu kaswinisa ngó o Jikidistá ku Efezu phala kulenga o kitombe, maji wa aswinisa we phala “kwenda kala . . . an’â mukengeji.” (Tanga Efezu 5:​7-9.) Kiki kilombolola ihi? Kilombolola kwenda kala tu Jikidistá ja kidi mu ithangana yoso. Ukexilu umoxi wa kubhanga kiki, o kutanga ni kudilonga o Bibidya ni kikwatekesu kya madivulu metu. Kima kyambote kubhana matwi ku phangu ni ku ulongelu wa Jezú Kidistu, o “mukengeji wa mundu.”—Nzw. 8:12; Jisa. 6:23.

14. Kyebhi o nzumbi ikôla itukwatekesa?

¹⁴ Twabhingi o kikwatekesu kya nzumbi ikôla ni tusuluke mu kwenda kala tu “an’â mukengeji.” Mukonda dyahi? Mukonda kubhonza kukolokota fiyele, mu ngongo yiyi yezala ni undumbu. (1 Te. 4:​3-5, 7, 8) O nzumbi ikôla yanda tukwatekesa kutolola o ibanzelu ya athu kene mubelesela o itendelesu ya Nzambi. O nzumbi ikôla yanda tukwatekesa kubhanga o “ima yoso yambote, yayuka ni yakidi.”—Efe. 5:9.

15. Kyebhi kitutena kutambula o nzumbi ikôla? (Efezu 5:​19, 20)

¹⁵ Ukexilu umoxi wa kutambula o nzumbi ikôla, o ku ibhinga bhukaxi ka musambu. Jezú wambe kwila Jihova wanda bhana o “nzumbi ikôla kwa yó a mubhinga.” (Luk. 11:13) Tutambula we o nzumbi ikôla kyoso kituximana Jihova mu yônge. (Tanga Efezu 5:​19, 20.) O nzumbi ikôla yanda tukwatekesa kukala ni wendelu usangulukisa Nzambi.

16. Ihi yanda tukwatekesa kusola ni unjimu? (Efezu 5:​10, 17)

¹⁶ Ande dya kusola kima, twabhingi kutongolola se “yebhi o vondadi ya Jihova” ni ku ikumbidila. (Tanga Efezu 5:​10, 17.) Kyoso kitusanga kitendelesu kya Bibidya kyalungu ni maka utwamudibhana nau, kiki kilombolola kwila twamusota o kibanzelu kya Jihova kyalungu ni maka metu. Se tu kibelesela, twanda sola ni unjimu.

17. Kyebhi kitutena kubhanga ima yambote ni kithangana kitwala nakyu? (Efezu 5:​15, 16) (Tala we ofoto.)

¹⁷ Phawulu watendelesa we o Jikidistá akwa Efezu kukalakala kyambote ni kithangana kyâ. (Tanga Efezu 5:​15, 16.) O nguma yetu Satanaji, o “kadya-phemba,” wamesena kwila tulanduka ni ima ya ngongo yiyi, phala kitukale ni kithangana kya kusidivila o Nzambi yetu. (1 Nz. 5:19) Ki kibhonzo we phala o Kidistá kumateka kusuwa dingi o jimbote, kudilonga kyavulu, mba kusuwa dingi o salu yê, mu veji dya kusanzumuna o ukunji wê. Se ubhanga kiki, wanda londekesa kwila wamateka kubanza kala o athu a mundu yú. Kidi kwila o ima yiyi ki kituxi, maji ki itokala kukala kupholo ku mwenyu wetu. Phala kwenda kala tu “an’â mukengeji,” twatokala “kubhanga ima yambote ni kithangana [kitwala] nakyu,” mu kudikwatenena mu ima yabetakota.

18. Ihi yabhange Betu phala kubhanga ima yambote ni kithangana kyexile nakyu?

¹⁸ Banza se kyebhi ki utena kubhanga dingi mu kilunga kya Jihova. Kiki kyene kya bhange Betu, watungu ku África do Sul. Mwene wambe: “Ngabanze yalungu ni mwenyu wami, ngasambe kwa Jihova phala kungikwatekesa kukalakala dingi mu kilunga kyê. Ngasambe phala ngisange salu yeji ngibhana kithangana phala kuboka dingi. Ni kikwatekesu kya Jihova ngasange o salu yiyi. Eme ni muhatu wami twabokona mu sidivisu ya thembu yoso.”

19. Kyebhi kitutena kusuluka mu kukala tu “an’â mukengeji”?

¹⁹ O mukanda wa Phawulu ku akwa Efezu, wa akwatekesa kukala fiyele kwa Jihova. O itendelesu yiyi itena we kutukwatekesa. Kala kitwamono, yene itena kutukwatekesa kusola kyambote o itonokenu yetu ni makamba metu. Ituswinisa we kusuluka mu kudilonga o Bibidya phala o mukengeji wa Jihova, usuluke mu kutwendesa mu yoso itwanda bhanga. O itendelesu yiyi yalondekesa kwila o nzumbi ikôla yala ni valolo yavulu, itukwatekesa kukala ni idifwa yambote. Kukumbidila o ima yasoneka Phawulu kutukwatekesa kusola ni unjimu, kala kyamesena Jihova. Se tubhanga o ima yiyi, twanda lenga o kitombe kya mundu yú, ni kukala mu mukengeji!