O Kwila Utena Kutungula o Kidi ni Makutu?

1. Kyebhi ki udivwa yalungu ni kidi?

O MUNDU wa Jihova wa zolo o kidi kitusanga mu maka a Nzambi. O kixikanu kyetu kijila mu kwívwa o maka enya. (Lom. 10:17) Tweza mukudyelela kwila Jihova wabhange o kilunga kala “o ngunji ni kilangidilu kya kidi.” (1 Ti. 3:15) Ni kusanguluka kwoso tubelesela yo atukala kupholo, ene ajimbulula o kidi kya Bibidya kyalungu ni vondadi ya Nzambi.​—Jih. 13:17.

2. Kala kitwatange mu Tiyaku 5:19, ihi itena kubhita netu kyoso kitudilonga o kidi?

² Kuma twaxikina kyá o kidi ni ijila yatubhana o kilunga kya Jihova, twatokala kudilanga. (Tanga Tiyaku 5:19.) Satanaji wamesena kyavulu kwila tulembwa kudyelela mu Bibidya ni mu itendelesu itutambula mu kilunga kya Jihova.​—Efe. 4:14.

3. Mukonda dyahi twatokala kubelesela o kidi? (Efezu 6:13, 14)

³ Tanga Efezu 6:13, 14. Kwa kambe ngo bhofele Dyabhu wanda mwanga jinjimbu ja makutu ku mundu woso phala kubhangesa o athu kubhana dikunda kwa Jihova. (Dij. 16:13, 14) Tutena kukingila kwila Satanaji wanda bhanga yoso ni yoso phala kunganala o jiselevende ja Jihova. (Dij. 12:9) Kyenyiki-phe kima kyambote kutungula o kidi ni makutu ni kusola kubelesela o kidi. (Lom. 6:17; 1 Ph. 1:22) Kima kyambote kubhanga kiki phala tubhuluke ku hadi ya dikota.

4. Ihi itwanda dilonga mu milongi yiyi?

⁴ Mu milongi yiyi twanda dilonga idifwa iyadi yanda tukwatekesa kutungula o kidi kitunda mu Bibidya ni kuxikina o itendelesu itubhana o kilunga kya Jihova. Twanda mona ima itatu yanda tukwatekesa kusuluka mu kidi.

IDIFWA ITWATOKALA KUKALA NAYU PHALA KUTUNGULA O KIDI

5. Kyebhi o henda yetu kwa Jihova itukwatekesa kutungula o kidi?

⁵ Woma wa Jihova. Kyoso ki tukala ni woma wa Jihova, tu muzola kyavulu ni kwila tubhanga yoso itutena phala kitubhange kima kimuluwalesa. Twala ni hanji yavulu phala kwijiya o kima kyawabha ni kima kya ibha, ni kutungula o kidi ni makutu phala Jihova na tuxikine. (Jisa. 2:3-6; Jih. 5:14) Ki twatokala kwehela kwila o woma wetu ku athu ubeta dingi kota o henda yetu kwa Jihova ndenge, mu kusangulukisa o athu mu veji dya kusangulukisa Jihova.

6. Kyebhi o woma wabhangesa o dikwinyi dya alondi akwa Izalayele kulungulula o kidi?

⁶ Se o woma wetu ku athu ubeta dingi kota kwa Jihova ndenge, kiki kitena kutusandula mu kidi. Tumone o phangu ya 12 kya alondi ayile mulonda o ixi ya kanene Jihova kubhana ku akwa Izalayele. O woma wa alondi wa betele dingi kota o henda yá kwa Jihova ndenge. Ene ambe ku akwa Izalayele: “Ki tu tena kubanda mu kúlwa ni kifuxi kyókyo ene a tu tundu mu nguzu.” (Dya. 13:27-31) Bhu pholo ya athu o akwa Kanana exile dingi ni nguzu o akwa Izalayele ndenge, kiki nange kidi. Maji mukuzwela kwila o akwa Izalayele keji tena kutolola o jinguma jâ o muthu wexile muzwela kiki kexile mubanza kwa Jihova. O kwinyi dya alondi enyó eji dikwatenena mu ima ya mesenene Jihova kwila o akwa Izalayele a ibhanga. Ene we a tokalele kuxinganeka mu ima ya bhangele Jihova, izuwa kudima. Kyenyiki ene eji tena kumona kwila o kutena ku akwa kanana ki kwexile kima mukusokesa ni kutena kwa Jihova. Josuwé ni Kalebe kadifwile ni alondi enyó kexile ni kixikanu, mukonda ene a mesenene kwila Jihova u a xikina. Ene ambela o mundu: “Jihova hé wa tu wabhela, mwene u tu bheka m’ixi mwenyumu, u tu bhana-yu.”​—Dya. 14:6-9.

7. Kyebhi kitutena kukolesa o woma wetu kwa Jihova? (Tala we ofoto.)

⁷ Phala kukolesa o woma wetu kwa Jihova twabhingi kuxinganeka mu ima yanda musangulukisa ni mu ima itusola mu ithangana yoso. (Jisá. 16:8) Mukutanga o Bibidya dibhwidise: ‘Se ngexile bhukididi kyenyokyo ihi i ngeji bhanga?’ Mukifika xinganeka ngo o dikwinyi dya alondi kuzwela kwila o akwa Izalayele keji tena kutolola o akwa Kanana. O kwila weji xikina o ima ya zwela ene ni kukala ni woma wa athu inga weji kolesa dingi o henda yê kwa Jihova, ni hanji ya kumusangulukisa itolola o woma wé? Akwa Izalayele kaxikina kwila Josuwé ni Kalebe exile muzwela o kidi. Mukonda dya kiki Jihova kehela akwa Izalayele kubokona mu ixi ya akanene.​—Dya. 14:10, 22, 23.

8. Kidifwa kyebhi kitwatokala kukala nakyu ni mukonda dyahi?

⁸ Kulenduka. Jihova utungununa o kidi kwa yo alenduka. (Mat. 11:25) Ni kulenduka tuxikina o kikwatekesu phala kudilonga o kidi. (Ika. 8:30, 31) Nekiki, twatokala kudilanga phala kitudizangeleke. Se tukala ni lwimbi twanda banza kwila o ixinganeku yetu ya beta kota o itumu ya Bibidya ni itendelesu itubhana o kilunga kya Jihova ndenge.

9. Kyebhi kitutena kusuluka ni kulenduka?

⁹ Phala kusuluka ni kulenduka kwetu twatokala kulembalala kwila Jihova wa beta dingi kota etu ndenge. (Jisá. 8:3, 4) Ku mbandu yengi twatokala kusamba kwa Jihova phala kutukwatekesa kukala tu athu alenduka. Jihova wanda tukwatekesa kumona kwila o ixinganeku ya Bibidya ni ya kilunga kye yabeta dingi kota o ixinganeku yetu ndenge. Mu kitangelu kye kya Bibidya sota kumona kyebhi Jihova uzola o muthu walenduka maji uzemba o muthu mukwa lwimbi, ni yo udizangeleka. Bhanga nguzu phala kusuluka ni kulenduka, kyoso ki utambula maujitu mu kilunga.

KYEBHI KITUTENA KUSULUKA MU KUDIKWATENENA MU KIDI?

10. Jihova wa solo nanyi phala kubhana itendelesu ni kulanga o mundu we?

¹⁰ Suluka mu kudyelela mu kilunga kya Jihova. Mu Izalayele yokulu Jihova wabhanene itendelesu ku mundu wê bhu kaxi ka Mozé ni Jozuwé. (Josu. 1:16, 17) O akwa Izalayele exile mu ditunda kyambote kyoso ene kyexile mu mona o athu enya kala akunji a Jihova Nzambi. Hama ya mivu kudima, kyoso kyabhange o kilunga kyadyanga kya Jikidistá, o 12 kya jipoxolo exile mubhana itendelesu. (Ika. 8:14, 15) Kupholo dya kwenda, o tufunga akwa Jeluzaleme abhangele we mbandu ku kibuka kiki. Mukukayela o itendelesu ya bhanene o mayala enya a fiyele, “o ilunga yakexile muswina dingi mu kixikanu, anga ikala mu dibandekesa izuwa yoso.” (Ika. 16:4, 5) Kyene we kimoxi lelu, kyoso kitubelesela o itendelesu itubhana o kilunga kya Jihova tutambula mabesa. Maji kyebhi kyanda divwa Jihova se kitubelesela o athu a asolo phala kukala ku kupholo? Tutena kutambwijila o kibhwidisu kiki, mukudilonga o ima yabhiti kyoso akwa Izalayele kyexile phala kubokona mu ixi ya akanene.

11. Ihi ya bhiti ni athu mu Izalayele yokulu kabelesela Nzambi bhukaxi ka Mozé yo wexile kupholo? (Tala we ofoto.)

¹¹ Mu njila yendele o akwa Izalayele kate mu ixi ya Kanana, kwexile mayala exile ni fuma kaxikinine Mozé mukonda dya kikalakalu kyamubhanene Jihova. Ene ambe: “Kilômbo kyoso kya Ngana, o ene oso athu a Ngana, o Jihova wala mu’axaxe kâ.” (Dya. 16:1-3) Kidi kwila kupholo ya Jihova kilômbo kyoso kya Ngana, maji nekiki Jihova wa solo Mozé phala kukala kupholo ya mundu wê. Mukuzwela kyayibha kwa Mozé mukidi exile muzwela kyayibha kwa Jihova. Ene kadikwatenena mu ima ya mesenene Jihova maji mu ima ya mesenene ene—kutena kwavulu ni fuma. Jihova wa jibha oso exile kupholo dya kavwanza ni mazunda a athu exile mwakayela. (Dya. 16:30-35, 41, 49) Lelu tutena we kudyelela kwila Jihova kaxikina yo kabelesela o itendelesu ya kilunga kyê.

12. Mukonda dyahi twatokala kudyelela mu kilunga kya Jihova?

¹² Tutena kusuluka mukudyelela mu kilunga kya Jihova. Kyoso kitumona kwila twabhindamena kulungulula kima phala kutendela o kidi kya Bibidya mba mu ukexilu wene musokejeka o ikalakalu ya kuboka, o yo atukala kupholo alungulula ni lusolo-lwoso o milongi yiyi. (Jisa. 4:18) Ene abhanga kiki mukonda azolo Jihova Nzambi. Ene we abhanga yoso yatena phala kubatula o maka bhukaxi ka maka a Nzambi, o jiselevende joso ja Jihova atokala kubelesela.

13. Ihi ilombolola kudikwatenena “mu maka mambote” ni ihi itwatokala kubhanga ni maka yá?

¹³ “Dikwatenene mu maka mambote.” (2 Ti. 1:13) ‘O maka mambote’ alombolola o milongi yoso itusanga mu Bibidya. (Nzw. 17:17) Etu twadikwatenena mumilongi yiyi ya tulongo o kilunga kya Jihova. O kilunga kya Jihova kituswinisa kubelesela o itendelesu itutambula. Se tubhanga kiki anda tubesowala.

14. Kyebhi o jikidista ja kamukwa eha kudikwatenena “mu maka mambote”?

¹⁴ Ihi itena kubhita se tulembwa kudikwatenena “mu maka mambote”? Tumone kifika: Ku hama yadyanga kwexile kudimwanga jinjimbu ja kwila o kizuwa kya Jihova kyabhixila. Nange poxolo Phawulu wasonekene mukanda wexile mu zwela o ima yiyi. Se kulaleka sayi jikidista akwa Tesalonika axikina mu jinjimbu jiji ya ajimwange wa. Ene keji tena kwanganala se ene alembalele o ima yazwelele Phawulu kyoso mwene kyexile ni ene. (2 Te. 2:1-5) Phawulu waswinisa o jiphange jê phala kabhane matwi mu ima yexile mukwivwa. Phala ku akwatekesa kuhadya Phawulu wazubha o mukanda ku akwa Tesalonika ni izwelu yiyi: “Yu o umenekenu wami, eme ngi Phawulu, u ngasoneka ni lukwaku lwami, kiki kyene o kijimbwete mu mikanda yami yoso, kyene kingene musoneka.”​—2 Te. 3:17.

15. Kyebhi kitutena kudilanga ni milongi imoneka kala yakidi? Bhana phangu. (Tala we o jifoto.)

¹⁵ Ihi itutena kudilonga mu izwelu ya Phawulu ku akwa Tesalonika? Kyoso ki twivwa ima kiyalungu ni milongi itwadilongo mu Bibidya, mba kyoso kitwivwa jinjimbu twatokala kwaluka. Ku Uniao Sovietica o jinguma jetu jabhanene mukanda ku jiphange jetu, o jiphange afikile kwila watundu ku mbonge ya Jimbangi ja Jihova. O mukanda waswinisa o jiphange kusokejeka kibuka mba kilunga kyengi. O mukanda wexile kala wakidi mwene. Maji o jiphange jafiyele ka anganala. Ene atonginine kwila o njimbu yatambwile mu mukanda ki yalungile ni ima yadilongele. Lelu o akwa kulungulula o kidi ene mu mwanga jinjimbu jamakutu bhukaxi ka internete phala ku tu wanuna. Mu veji dya “kwehela muthu kulungulula o ibanzelu” yetu, tutena kudilanga mu kudikwatenena mu milongi ya kidi itwadilongo kyá.​—2 Te. 2:2; 1 Nz. 4:1.

16. Kala kyambe Loma 16:17, 18, ihi itena kubhita se tudisandula ku kidi?

¹⁶ Sulukenu mukukala kumoxi ni athu alondekesa o ufiyele wa kwa Jihova. Jihova wamesena kwila tumubheza ni muxima umoxi. Tukale ni muxima umoxi kyoso kitusuluka ni kudikwatenena mukidi. Kitwatokala kudilunga ni muthu woso-woso udisandula mu kilunga, Nzambi utudimuna kukala dikanga dya “athu yá.” Kiki kyeji tubhangesa kuxikina o milongi ya makutu ni kukamba kulondekesa o ufiyele wetu kwa Jihova.​—Tanga Loma 16:17, 18.

17. Mbote yahi itwanda katula mukwijiya, ni kudikwatenena mukidi?

¹⁷ Kyoso kituxikina o kidi anga tudikwatenena mukidi, o ukamba ni kixikanu kyetu kwa Jihova yanda kola dingi. (Efe. 4:15, 16) Twanda dilanga mu milongi ya makutu yene mumwanga Satanaji bhukaxi ka jinjimbu jamakutu, twanda kala bhukididi kya kondama mu kilangidilu kya Jihova mu kithangana kya hadi ya dikota. Dikwatenenyenu mu ima ya kidi anga, “o Nzambi ya paze wanda kala ni enu.”​—Fil. 4:8, 9.