Рʹевекайе Дьхԝәст Дьле Йаһоԝа Ша кә

Рʹевека Йаһоԝа һʹәз дькьр. Наве мере ԝе Исһаԛ бу. Исһаԛ жи Йаһоԝа һʹәз дькьр. Ле ча ԝана һәв нас кьр? У ча Рʹевека да кʹьфше кӧ дьхԝәст дьле Йаһоԝа ша кә? Ԝәре пешийе әм дәрһәԛа мере ԝе Исһаԛ, пебьһʹәсьн.

Де-баве Исһаԛ, Бьраһим у Сәраһ бун. Әԝана әʹрде Кәнанеда дьжитьн. Кәнанеда мәрьв Йаһоԝарʹа хьзмәт нәдькьрьн. Ле Бьраһим дьхԝәст, ԝәки кӧрʹе ԝи бьзәԝьщә сәр ԛизәкә ӧса, йа кӧ Йаһоԝарʹа хьзмәт дькә. Ләма жи әԝи хӧламе хԝә Әлийәзәр шандә әʹрде Һаране, сәва кӧ бона Исһаԛ жьне бьвинә. Ви әʹрдида бьра-пьсмамед Бьраһим дьман.

Әлийәзәр тʹәви хӧламед Бьраһимә дьн, рʹе кʹәт. Рʹийа ԝан гәләк ԝәʹдә кʹьшанд. Әԝана тʹәви хԝә дәһә дәвәйед баркьри бьрьн, йед кӧ сәр хԝә хԝарьн у пʹешкʹеш дьбьрьн. Ле гәло Әлийәзәр ча гәрәке бьзаньбуйа, кӧ Исһаԛрʹа кʹижан ԛизе бьжберә? Чахе Әлийәзәр у хӧламед майин һатьнә Һаране, әԝана бәр канийе сәкьнин. Чьмки Әлийәзәр заньбу, кӧ зутьрәке кʹӧлфәт гәрәке бенә сәр канийе, сәва кӧ аве һьлдьн. Әԝи Йаһоԝарʹа дӧа кьр у гот: «Һәрге әз ԛизәкерʹа бежьм, кӧ һьнә ав бьдә мьн, у әԝе, аве бьдә мьн у дәвәйед мьн, бь ве йәке әзе бьзаньбьм кӧ әв һәма әԝ ԛиз ә, йа кӧ тә бьжартийә».

Һьнге Рʹевека һатә бәр канийе. Кʹьтеба Пирозда те готьне, кӧ әԝ ԛизәкә назьк бу. Әлийәзәр ав жь ԝе хԝәст кӧ вәхԝә. Рʹевека готе: «Бәле, кʹәрәм кә. Әзе аве бьдьмә тә у һәрʹьм ԝәки бона дәвәйед тә жи аве биньм». Ле тӧ зани ԝәки дәвәйед тʹи, гәләк аве вәдьхԝьн! Ләма жи Рʹевека рʹәвә-рʹәв дьчу бәр канийе у ав дьани. Һәла дина хԝә бьдә шькьл. Тӧ дьвини кӧ Рʹевека хәбатәкә чьԛас гьран дькә?— Әлийәзәр гәләк әʹщебмайи ма, кӧ чаԝа Йаһоԝа щаба дӧайе ԝи да.

Әлийәзәр гәләк тьштед бәдәԝ пʹешкʹеши Рʹевекайе кьр. Ԝи чахи Рʹевека, ча Әлийәзәр ӧса жи хӧламед дьн тʹәглифи мала баве хԝә кьр. Һьнге Әлийәзәр шьровәкьр, кӧ чьрʹа Бьраһим әԝ шандә ви әʹрди, у чаԝа Йаһоԝа щаба дӧайе ԝи да. Малбәта Рʹевекайе ша бу у ԛайил бу, ԝәки ԛиза ԝан бьбә жьна Исһаԛ.

Ле тӧ ча дьфькьри, Рʹевека хԝәст бьбә жьна Исһаԛ?— Рʹевека заньбу кӧ Йаһоԝа, Әлийәзәр шандә мала ԝан. Ләма жи чахе малбәта Рʹевекайе ле пьрсин һәла әԝ дьхԝазә һәрʹә Кәнане, ԝәки бьбә жьна Исһаԛ, әԝе гот: «Әре, әз дьхԝазьм һәрʹьм». Паше ве йәке Рʹевека тʹәви Әлийәзәр рʹе кʹәт. Чахе әԝана һатьнә Кәнане, Рʹевека бу жьна Исһаԛ.

Рʹевека һʹәму тьшт ӧса кьр, чаԝа кӧ Йаһоԝа дьхԝәст. Ләма жи Йаһоԝа ле кʹәрәм кьр. Гәләк сал дәрбаз бу, у Иса малбәта ԝеда һатә буйине! Һәрге тӧ жи мина Рʹевека дьле Йаһоԝа ша дьки, әԝе тә жи кʹәрәм бькә.