Рʹәхабе Йаһоԝа Баԝәр Кьр

Бьдә һʹәсабе хԝә кӧ әм шәһәре Әриһайеда ньн. Әв шәһәр әʹрде Кәнанеда нә, мәрьвед кʹижани Йаһоԝа баԝәр нәдькьрьн. У кʹӧлфәтәк бь наве Рʹәхаб жи ԝедәре дьжит.

Чахе Рʹәхаб һе зарʹ бу, әԝе бьһистьбу сәрһатийа дәрһәԛа Муса, кӧ әԝи чаԝа Бәʹра Сор кьрә дӧ пʹара, у щьмәʹта Исраеле жь Мьсьре дәрхьст. Әԝе ӧса жи бьһистьбу, ԝәки ча Йаһоԝа али Исраелийа кьрийә, ԝәки шәрʹада дьжмьнед хԝә алт кьн. Ле ньһа әԝ дьбьһе кӧ Исраели незики Әриһайе щиԝар бунә!

Еварәке дӧ Исраели кʹәтьнә Әриһайе, ԝәки дьзикава ве шәһәре бьньһерʹьн. Мәрьвед ӧса, тенә навкьрьне щәʹсус. Әԝана һатьнә мала Рʹәхабе. Әԝе ԝана тʹәглиф кьр, сәва кӧ мала ԝеда бьминьн. Еваре, пʹадше Әриһайе пеһʹәсийа кӧ щәʹсус шәһәрда ньн, у әԝана мала Рʹәхабеда манә. Ләма жи пʹадша һьнә мәри шандьн, ԝәки ԝан щәʹсуса бьгьрьн. Ле Рʹәхабе әԝ щәʹсус сәр банийе мала хԝәйи пәʹн вәшартьн. У Рʹәхабе ӧса гот ԝан мәрьварʹа, кʹижана пʹадша шандьбу: «Щәʹсус вьра бун, ле әԝана ида жь шәһәр дәркʹәтьн. Һәрге һун ньһа пәй ԝан кʹәвьн, һуне ԝана бьгьрьн!» Ле тӧ зани Рʹәхаб чьрʹа ԝан щәʹсуса вәдьшерә?— Чьмки әԝ Йаһоԝа баԝәр дькә, у занә кӧ Йаһоԝа әʹрде Кәнане ԝе бькә дәсте Исраелийа.

Пешийа кӧ щәʹсус жь мала Рʹәхабе бьчуна, әԝана соз данә ԝе, кӧ чахе шәһәре Әриһайе бе һьлшандьне, әԝе тʹәви малбәта хԝә хьлаз бә. Ле тӧ зани щәʹсуса жерʹа чь готьн, кӧ әԝ бькә?— Ԝана гот: «Һьлдә тʹога сор у сәр пʹәнщәра мала хԝә дарда кә. Һәрге тӧ ӧса бьки, һәр кәсе кӧ мала тәда бә, ԝе хьлаз бьн». Рʹәхабе һʹәму тьшт һәма ӧса кьр, чаԝа кӧ щәʹсуса ԝерʹа готьбун. Ле тӧ зани паше чь дьԛәԝьмә?—

Һьнә ԝәʹдә дәрбаз бу, у Исраелийа дәстпекьрьн дора шәһәр һәрʹьн-бен. Шәш рʹожа әԝана дора шәһәр рʹоже щарәке дьчун-дьһатьн. Ле рʹожа һʹәфта әԝана һʹәфт щара дора шәһәр дьчун-дьһатьн. Һьнге әԝана тʹәвайи бь дәнге ԛайим кьрьнә ԛарʹә-ԛарʹ. Ԝе дәме Йаһоԝа диԝаред ви шәһәри һьлшандьн. Ле әԝ мала кӧ тʹога сор пева гьредайи бу, һьлнәшийа! Ле тӧ дькари әве йәке сәр шькьл бьвини?— Рʹәхаб у малбәта ԝе хьлаз бун!

Тӧ чь дькари жь мәсәла Рʹәхабе һин би?— Рʹәхабе Йаһоԝа баԝәр кьр, чьмки әԝе дәрһәԛа ԝи гәләк тьштед баш пеһʹәсийабу. Тӧ жи дәрһәԛа Йаһоԝа гәләк тьштед баш педьһʹәси. Ле тӧ мина Рʹәхабе баԝәрийа хԝә Йаһоԝа тини?— Әм заньн ԝәки тӧ һʹәма ӧса жи дьки!