Кануна Пешьн

Кʹьтеба Пироз сәр Бьраһим се щара дьбежә досте Йаһоwа (2 Дир. 20:7; Иша. 41:8; Аԛуб 2:23). Рʹаст ә дь Кʹьтеба Пирозда тʹәне сәр wи те готьне досте Хwәде, ле гәло әw те һʹәсабе кӧ жь мәрьва тʹәне Бьраһим бу досте Йаһоwа? На, Кʹьтеба Пироз дьдә кʹьфше кӧ һәр кәс жь мә дькарә бьбә досте Хwәде. Хәбәра Хwәдеда гәләк мәсәлед жьн у меред амьн һәнә, кʹижан кӧ хwәдехоф бун, баwәрийа wан һьндава Йаһоwа һәбу у бунә достед wийи незик. Паwлосе шанди ньвиси дәрһәԛа «әʹwьрәки  . . . мәзьн йе шәʹдан», кʹижан кӧ бь рʹастийе достед Хwәде бун (Ибрн. 12:1, ИМ). Әw һʹәму мәрьв жь һәв щӧдә дьбун. Лә wана шабун стандьн жь достийа хwәйә тʹәви Хwәде. Wәрә әм чʹәʹв бьдьнә баwәрийа wан мәрьвед амьн (Ибрн. 6:11, 12). Һәрге әм ӧса бькьн, әм дькарьн сәд сәләфи баwәр бьн, кӧ әме ԛәдьрәки ӧса бьстиньн кӧ һʹәта-һʹәтайе бьбьнә достед Йаһоwа! w16.02 2:​1, 2, 19

Бьдьнә бәр чʹәʹве хwә кӧ һәвале wә wәрʹа әрәба пʹешкʹеш дьдә. Әw wәрʹа документа әрәба дьдә у дьбежә: «Кʹьлит wе щәм мьн бә. У тʹәне әзе әве әрәбе бажом, нә кӧ тӧ». Әw «пʹешкʹеш» wе wә хwәш бе? Ньһа бьфькьрьн кӧ Йаһоwа һивийа чь йә жь wи мәрьви, кижан кӧ хwә тʹәсмили wи дькә, у жерʹа дьбежә: «Әз әʹмьре хwә дьдьмә тә. Мьн хwә тʹәсмили тә кьрийә». Ле һәрге әw мәрьв паше дәстпедькә нәрʹаст бьжи, мәсәлә дьзикава рʹасти нәбаwәра те? Йан һәрге әw хәбатәкә ӧса ԛәбул дькә, жь бо кʹижани wәʹде wи тʹӧнә кӧ һәрʹә хьзмәтийе у сәр щьвате? Гәло әw нә мина ве йәке йә, кӧ әw мәрьв кʹьлита әрәбе щәм хwә хwәй дькә? Мәрьве кӧ хwә тʹәсмили Йаһоwа дькә, бь рʹастийе wирʹа гьлийед ӧса дьбежә: «Әʹмьре мьн һе зәʹф йе тә йә, нә кӧ йе мьн. Һәрге ӧса бьԛәwьмә кӧ әз гәрәке бьжберьм кӧ ԛьрара тә биньм сери йан хwәстьна хwә, әзе тʹьме әwе йәке бькьм чь кӧ ԛьрара тә йә». Әw ньһерʹандьн мина wе ньһерʹандьна Иса йә, дәрәԛа кʹижани кӧ рʹеза ирода һатьбу готьне. w16.03 1:​16, 17

Wәкә 3 000 сал пешда, Елйас пʹехәмбәр Елишайә щаһьл тʹәглиф кьр wәки бьбә аликʹарчийе wи. Елиша дәрберʹа ԛайил бу у бь амьни шьхӧле мьлуки бона пʹехәмбәр дькьр (2 Пʹадш. 3:11). Елйас wәкә шәш сала Елиша һин дькьр. Паше, чахе шьхӧле Елйас дь Исраеледа хьлаз дьбу, пʹехәмбәр готә Елиша, wәки әw дькарә ида али wи нәкә. Ле Елиша хwәрʹа ԛьрар кьр wәки тʹәви һинкʹаре хwә бә, һʹәта чьԛас дькарә. Һәрге тӧ бьре щаһьл и, тӧ чаwа дькари чʹәʹв бьди Елиша? Чахе шьхӧл тәрʹа дьдьн, дәрберʹа ԛәбул кә, һәла һе wи чахи жи, чахе әw шьхӧле ньмьз ә. Бира хwәда хwәй кә, wәки һинкʹаре тә һәвале тә йә. Wирʹа бежә wәки тӧ дьшекьрини чь кӧ әw бона тә дькә. У йа лапә фәрз, дь щабдарийа хwәда амьн бә. Ле чьрʹа фәрз ә амьн би? Чахе тӧ избат дьки кӧ тӧ амьн и у керһати йи, рʹуспи дькарьн баwәр бьн кӧ Йаһоwа дьхwазә wәки дь щьватеда һе зедә щабдарийа тә һәбә (Зәб. 101:6; 2 Тимтʹ. 2:2). w15 1/4 2:​13, 14

Шаwул, Йонатʹан һелан дькьр кӧ бьбә пʹадша паши wи (1 Сам. 20:31). Ле Йонатʹан Йаһоwарʹа амьн бу у әве йәке wи һелан кьр кӧ бьбә һәвале Даwьд. Ләма Йонатʹан нәдькʹәтә һәйра ве йәке кӧ бьбә пʹадша. «Йонатʹан кӧ Даwьдрʹа сонд хwәрьбу, жь сонда хwә вәнәгәрʹийа. Әм жи гәрәке ӧса бьн. Мәсәлә, һәрге әм бизнеседа пәймане гьредьдьн, әw пәйман чьԛас чәтьн бә жи, әм гәрәке биньн сери. Чьмки әм Йаһоwа һʹьз дькьн, ләма әм гәрәке созе хwә биньн сери. Йан жи һәрге дь зәwаща мәда проблем һәнә, һʹьзкьрьна һьндава Йаһоwа wе мә һелан кә кӧ амьн бьминьн һәвалзәwаще хwәрʹа (Малх. 2:13-16). Wәрә әм жи амьнийа хwә һьндава Йаһоwа избат кьн бь ве йәке, кӧ щьмәʹта wирʹа амьн бьн, һәла һе wанрʹа жи кʹе мә дьхәйидинә. Чахе әм һәла һе дәрәщед чәтьнда жи Йаһоwарʹа амьн дьминьн, әм дьле wи ша дькьн (Мәтʹлк. 27:11). Һәрге әм wирʹа амьн бьминьн, әме бьвиньн кӧ әw ча ԛәнщ ә һьндава йед wи һʹьз дькьн. w16.02 3:​16, 17

Бира хwәда хwәй кә, кӧ Йаһоwа занә һәр кәс чьԛас дькарә бькә у чьԛас дькарә чәтьнайа тәйах кә (Зәб. 103:14). Әw ԛәwата лазьм дьдә мә. Рʹаст ә щара мә тʹьре ида чʹарә тʹӧнә. Ле Йаһоwа соз дьдә кӧ һәрге чәтьн ә әм щерʹьбандьнеда тәйах кьн, әw wе «дәлиләке жи бькә» (1 Корн. 10:13). Чахе әм заньн кӧ Йаһоwа занә әм чьԛаси дькарьн тәйах кьн, әw йәк мә дьлрʹьһʹәт дькә. Һәрге әм Йаһоwарʹа дӧа дькьн бона аликʹарийе, ле әw дәрберʹа щаба мә нәдә, wәрен әм сәбьр кьн. Бира хwәда хwәй кә wәки Йаһоwа дьхwазә али мә бькә, ле әw бь сәбьр һивийа wәʹде баш ә wәки һьнге бьдә мә чь кӧ мәрʹа лазьм ә. Кʹьтеба Пироз мәрʹа дьбежә: «Бона кӧ Хӧдан хере ль wә бькә, wе бьсәкьнә [һивийе бә], у бона кӧ дьле wи бь wә бьшәwьтә, wе бьльнд бьбә; жь бәр кӧ Хӧдан, Хwәдайе дадийе [һәԛийе] йә». w15 1/4 4:​8, 9

Wәʹде Ԛӧльхкьрьна тʹәви Малбәте, әм дәрһәԛа тьштед рʹӧһʹани хәбәр дьдьн, у әw йәк йәктийе дькә малбәте. Чахе малбәт пешда хwә һазьр дькә бона хьзмәткьрьне, әw йәк али малбәте дькә кӧ мьзгине һе рʹьнд бәла кьн. У чахе әwана тʹәвайи дәрһәԛа рʹастийе хәбәр дьдьн, у дьвиньн wәки гьшк малбәтеда Йаһоwа һʹьз дькьн у дьхwазьн дьле wи ша кьн, әwана һе незики һәв дьбьн. Щотед зәwаще чь дькарьн бькьн, сәва кӧ тʹәви һәв һәвкʹарийе бькьн, у пәсьне Йаһоwа бьдьн? Һәрге һәр йәк жь щотед зәwаще бь амьнийе Йаһоwарʹа хьзмәт кә, әwана wе бәхтәwар бьн у йәктийеда бьн. Бьраһим у Сәрайе, Исһаԛ у Рәбәкайе, Һаннайе у Әлкана, гьшк жи һьндава һәвдӧ һʹьзкьрьне дьданә кʹьфше. Әм жи гәрәке чʹәʹв бьдьнә wан, демәк һʹьзкьрьне бьдьнә кʹьфше щоте хwәрʹа (Дәстп. 26:8; 1 Сам. 1:5, 8). Әw йәк щотед зәwаще незики һәв дькә, у ӧса жи әwана һе зедә незики Баве хwәйи әʹзмана дьбьн (Wаиз 4:12). w16.03 3:​12, 13

Шәйтʹан мьԛабьли рʹункьрийед кӧ сәр әʹрде манә у «пәзед дьн» дьчә (Йуһʹн. 10:16). Жь бо wе йәке кӧ wәʹде Шәйтʹан һьндьк майә, әw дьхwазә баwәрийа гәләк ԛӧльхкʹаред Йаһоwа кʹӧта кә (Әʹйан. 12:9, 12). Ле әм дькарьн сәркʹәвьн, чахе мьԛабьли wи дәрен. Кʹьтеба Пироз дьбежә: «Мьԛабьли Мирещьн бьсәкьньн у әwе жь wә бьрʹәвә» (Аԛуб 4:7). Гәләк мәрьв дькʹәньн чахе дьбьһен кӧ Шәйтʹан һәйә. Бона wан, Шәйтʹан у щьн тʹәне дь сәрһатийада, филмед бь тьрсда, у дь листькед видеойеда һәнә. Мәрьвед ӧса, дьшьрмиш дьбьн кӧ кʹе wан рʹӧһʹе хьраб баwәр дькьн, әwана бефәʹм ьн. Ле гәло Шәйтʹан бәрхwәдькʹәвә, чахе мәрьв баwәр накьн кӧ әw у щьнед wи реали нә? На. Бона Шәйтʹан гәләк һеса йә, wәки wан мәрийа бьхапинә кʹе дӧдьли дьбә кӧ әw һәйә (2 Корн. 4:4). Шәйтʹан рʹасти жи дьхәбьтә wәки әw фькьр бәла бә, чьмки бь wе йәке әw дькарә мәрийа бьхальфинә. w15 1/5 2:​1, 2

Муса жь де-баве хwәйи щьһу пеһʹәсийа дәрһәԛа Йаһоwа. Wана жерʹа гьли кьрьбун кӧ Йаһоwа соз дайә, wәки щьмәʹта Щьһу wе жь дилтийе аза кә у Әʹрде Создайи бьдә wан (Дәстп. 13:14, 15; Дәркʹ. 2:5-10). Муса кʹур дьфькьри дәрһәԛа wи созе Йаһоwа, кӧ wе Ибранийа жь дилтийе аза кә. Чаwа ԛӧльхкʹаред Йаһоwайи майин, Муса жи заньбу кӧ Йаһоwа wе инсанәте жь мьрьне аза кә (Иб. 14:14, 15; Ибрн. 11:17-19). Муса фәʹм дькьр кӧ Йаһоwа мәрийа чьԛас зәʹф һʹьз дькә. Бь wе йәке әwи дьһа зәʹф Йаһоwа һʹьз кьр, у баwәрийа wи һьндава Хwәде ԛәwи бу. Әве йәке али wи кьр, кӧ тʹәмамийа әʹмьре хwәда бәрдәwан кә Йаһоwарʹа ԛӧльх кә (Ԛан. Дщр. 6:4, 5). Чахе фьрәwьн дьхwәст wи бькӧжә, Муса нәдьтьрсийа. Әwи заньбу кӧ Йаһоwа wе дь ахьрийеда әʹсә wи хәлат кә (Дәркʹ. 10:28, 29). w15 1/5 3:​11-​13

Иса кʹәрәмәта хwәйә пешьн шәһәре Ԛанайеда, wәʹде дәʹwате кьр. Әм ньзаньн чьрʹа, ле сәр дәʹwате шәрав кем бу у терʹа һʹәму мевана нәдькьр. Сәва wе йәке бук у зәʹва wе шәрми буна, чьмки wана гәрәке ԛәдьре мевана бьгьртана бь меванһʹьзийе. Дийа Иса Мәрйәм жи меван бу сәр ве дәʹwате. Гәло, әwе жь Иса аликʹари хwәст, чьмки әwе баwәр дькьр, кӧ ԛәwата wи һәйә кʹәрәмәта бькә? Мәрйәм дьбәк дьфькьри сәр һʹәму пʹехәмбәртийа дәрһәԛа кӧрʹе хwә, у әwе заньбу кӧ әw wе бе навкьрьне чаwа «Кӧрʹе Йе Һәри Жорьн» (Луԛа 1:30-32; 2:52). Фәʹмдари йә кӧ Мәрйәме жи у Иса жи, дьхwәстьн али бук у зәʹве бькьн. Ләма Иса бь кʹәрәмәти wәкә 380 литьр ав кьрә «шәрава рʹьнд» (Йуһʹн. 2:6-11). Гәло Иса борщдар бу кӧ кʹәрәмәте бькә? На. Әwи әw кʹәрәмәт кьр, чьмки дәрһәԛа мәрьва хәм дькьр, у чʹәʹв дьда Баве хwә, кʹижан кӧ мәрʹд ә. w15 1/6 1:3

Шагьртед Иса әw пьрс данә wи, һʹәта кӧ әw бьчуйа ль әʹзмана. Иса щаба wан да у гот, кӧ һе wәʹдә нинә кӧ әwана бьзаньбьн, кӧ кʹәнге Пʹадшатийа Хwәде wе дәстпекә сәрwертийе бькә. Әwи гот кӧ һе фәрз ә wәки әwана дина хwә бьдьнә сәр шьхӧле даннасинкьрьне (Кʹар. Шанд. 1:7, 8). Ле йәкә, Иса әwана һин кьрьн, кӧ дӧа бькьн бона һатьна Пʹадшатийе у һивийа wи wәʹдәйи бьн. Ләма жи, әм иро дӧа дькьн wәки Пʹадшати бе. Чахе wәʹдә незик дьбу кӧ Иса дәстпекә ль әʹзмана сәрwертийе бькә, Йаһоwа али щьмәʹта хwә кьр кӧ әwана фәʹм кьн, кӧ кʹижан сале әw йәк гәрәке бьԛәwьмә. Сала 1876, Чарлз Теиз Рассел готар ньвиси бь ви нави «Чахе Wәʹде Пʹутпʹарьста Хьлаз бьн?» Дь ве готареда әwи шьровәкьр, кӧ дь пʹехәмбәртийа Данийелда «һʹәфт wәхт», у пʹехәмбәртийа Исада «wәхте . . . мьләта», йәк ьн. У дь готареда һатьбу шьровәкьрьне кӧ әw wәхт гәрәке хьлаз бьн сала 1914 (Дан. 4:16; Луԛа 21:24). w15 1/6 4:​11, 12

Чахе мәрьва дәрд дькʹьшанд, сәр Иса зәʹф һʹӧкӧм дьбу. Мәсәлә, чахе һәвале Иса Лазар мьр, «кʹәсәра кʹур һате у дьле wи ешийа», чьмки әwи дит ча малбәта Лазар у һәвалед wи бәрхwәдькʹәвьн (Йуһʹн. 11:33-36). Рʹаст ә Иса заньбу кӧ әw wе Лазар сах кә, ле йәкә әw гьрийа. Әw нәдьтьрсийа кӧ һәстед wи мәрьварʹа әʹйан бьн. Иса һаԛас зәʹф Лазар у малбәта wи һʹьз дькьр, кӧ ԛәwата Хwәде да хәбате, сәва кӧ Лазар вәгәрʹинә жийине! (Йуһʹн. 11:43, 44) Кʹьтеба Пироз гьли дькә кӧ Иса хут мина Баве хwә Йаһоwа йә (Ибрн. 1:3). Демәк, кʹәрәмәтед Иса избат дькьн, кӧ Йаһоwа жи дьхwазә wәки нәхwәшийа, кӧл-дәрда у мьрьне бьдә һьлдане. У зутьрәке, Йаһоwа у кʹӧре wи wе гәләк мәрьва вәгәрʹиньн жийине. Иса гот кӧ «wәхт незик дьбә, кӧ һʹәмуйед тʹьрбада» wе бенә сахкьрьне (Йуһʹн. 5:28, 29). w15 1/6 2:​13, 14

Рʹаст ә гәләк мәрьв баwәр дькьн кӧ әwана тʹәне wе паши мьрьне сәр әʹзмана Хwәде рʹумәт кьн, ле щьмәʹта Йаһоwа занә кӧ чьԛас фәрз ә wи рʹумәт кьн ль wьр сәр әʹрде у ньһа. Чахе әм Йаһоwа һӧрмәт дькьн, әм чʹәʹв дьдьнә ԛӧльхкʹаред Хwәдейи амьн, дәрһәԛа кʹижана кӧ дь Зәбур 99:1-3, 5-да тә готьне. Мәрьвед амьн, Муса, Һарун, у Самуйел бь тʹәмами пьштгьрийа wе йәке дькьрьн, чь кӧ Хwәде чекьр бона һʹәбандьна рʹаст (Зәб. 99:6, 7). Иро рʹункьри, һʹәта кӧ тʹәви Иса ль әʹзмана ԛӧльх кьн чаwа кʹаһин, әwана бь амьни Йаһоwарʹа ԛӧльх дькьн дь пʹарәкә пʹарьстгәһа рʹӧһʹанида, ль сәр әʹрде. Милйона «пәзед дьн» бь амьни али wан дькьн (Йуһʹн. 10:16). Әw һәрдӧ кʹом, бь йәкти Йаһоwа дьһʹәбиньн. Ле әм гәрәке пьрсе бьдьнә хwә: «Гәло әз пьштгьрийа wе йәке дькьм, чь кӧ Йаһоwа бона һʹәбандьна рʹаст чекьр?» w15 1/7 1:​4, 5

Ԛӧльхкʹаред Йаһоwайи бәре бь сәбьр һивийе бун кӧ пʹехәмбәрти бенә сери. Ишайа пʹехәмбәрти кьр, кӧ Йаһоwа wе Щьһуйа жь дилтийе вәгәрʹинә ль Щьһудайе у гот: «Хwәзи ль һʹәмуйед кӧ ль бәнда [һивийа] wи нә» (Иша. 30:18). Ӧса жи Миха һивийа созед Йаһоwа бу кӧ бенә сери у гот: «Әзе ль Хӧдан бьнерʹьм» (Мих. 7:7). У бь сәда сала ԛӧльхкʹаред Хwәде һивийе бун у баwәр бун, кӧ Мәсиһ демәк Иса wе бе (Луԛа 3:15; 1 Пәт. 1:10-12). Иро әм жи һивийе нә, кӧ пʹехәмбәртийед дәрһәԛа Пʹадшатийа Йаһоwа бенә сери. Иса чаwа Пʹадшайе ве Пʹадшатийе, wе зутьрәке ԛӧльхкʹаред Хwәде хьлаз кә жь ве дьнйа хьраб. Иса wе мәрьвед зӧлм кʹӧта кә у һʹәму кӧл-дәрда бьдә һьлдане (1 Йуһʹн. 5:19). Ләма жи әм гәрәке бәрдәwам кьн һивийа һатьна рʹожа Йаһоwа бьн у һʹәму тьшти бькьн чь кӧ дькарьн, сәва кӧ һазьр бьн бона wе рʹоже. w15 1/8 2:​1, 2

Йаһоwа готә Исраелийа кӧ әwана коне пироз ава кьн (Дәркʹ. 25:8). Паше, wәʹдә шунда Йаһоwа wанрʹа гот, кӧ әwана пʹарьстгәһе ава кьн (1 Пʹадш. 8:27, 29). Паши wе йәке, чахе щьмәʹта Хwәде жь Бабилоне дәркʹәт, әwана тʹьме дь кʹьништада тʹоп дьбун (Марԛ. 6:2; Йуһʹн. 18:20; Кʹар. Шанд. 15:21). Мәсиһийед пешьн малада тʹоп дьбун (Кʹар. Шанд. 12:12; 1 Корн. 16:19). Иро жи, щьмәʹта Йаһоwа нав тʹәмамийа дьнйайеда тʹоп дьбьн, бь дәһа һʹәзара Одед Щьватада, ль кʹидәре кӧ әwана педьһʹәсьн дәрһәԛа Йаһоwа у жерʹа ԛӧльх дькьн. Иса гәләк ԛимәт дькьр пʹарьстгәһа Йаһоwа кӧ дь Оршәлимеда бу. Иса пʹарьстгәһа Йаһоwа гәләк һʹьз дькьр, у жь бо ве йәке шагьртед wи һелан бун әw пʹехәмбәртийа кӧ рʹеза ирода те готьне, бьwәкʹьлиньн (Зәб. 69:9). Рʹаст ә иро Ода Щьвата әw «мала Хӧдан» нинә, чаwа кӧ пʹарьстгәһа Оршәлиме бу (2 Дир. 5:13; 33:4). Ле йәкә әм гәрәке гәләк ԛимәт кьн щийе ԛӧльхкьрьна хwә. w15 1/7 4:​1, 2

Гәло wәʹде Һʹәзарсалийа Сәрwертийа Иса, әме тʹәви йед дьн бь һʹьзкьрьн бьн у бьбахшиньн һәвдӧ? Һәрге әм ньһа һин бьн кӧ һәвдӧ бьбахшиньн у һәләԛәтийа баш нав һәвда хwәй кьн, дьнйа тʹәзәда wе мәрʹа һеса бә кӧ ӧса бькьн (Колс. 3:12, 13). Дьнйа тʹәзәда, дьбәкә, әм чь кӧ бьхwазьн тʹьме нәстиньн, йан жи әм гәрәке һивийе бьн кӧ бьстиньн. Чь жи һәбә, гәрәке әм рʹази бьн у ԛайил бьн. Рʹасти жи, мәрʹа әw һʹӧнӧр wе лазьм бьн, кʹижан кӧ Йаһоwа мә һин дькә кӧ әм ньһа бьдьнә кʹьфше. Демәк, һәрге әм ньһа һин дьбьн кӧ wан һʹӧнӧра бьдьнә кʹьфше, әм избат дькьн, кӧ бона мә дьнйа тʹәзә реали йә, у кӧ әм һазьр дьбьн бона жийина һʹәта-һʹәтайе (Ибрн. 2:5; 11:1). Бь wе йәке әм ӧса жи әʹйан дькьн, кӧ әм бь рʹастийе дьхwазьн ве дьнйайеда бьжин кʹидәре кӧ һәр кәс гӧрʹа Йаһоwа дькә. w15 1/8 3:​11, 12

Чахе тӧ дькʹанеда емише гьһишти дьжбери, тӧ дьвини кӧ әwана wәкә һәв ниньн. Ле те кʹьфше кӧ тʹәмам гьһишти нә. Ӧса жи Мәсиһийед гьһишти. Әwана wәкә һәв ниньн. Әwана жь wәлат у мьләтед щурʹә-щурʹә нә. Әwана әʹмьрда жи щурʹә-щурʹә нә. Ле йәкә хәйсәт-һʹӧнӧред һʹәму Мәсиһийед гьһишти йәк ьн, чь кӧ дьдә кʹьфше, кӧ әwана гьһишти нә. Ле кʹижан ьн һьнәк жь wан һʹӧнӧра? Мәсиһийе гьһишти чʹәʹв дьдә Иса у «пʹегәһа» wида дьчә (1 Пәт. 2:21). Иса гот гәләк фәрз ә, кӧ мәрьв Йаһоwа бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә һʹьз бькә, у ӧса жи һәвале хwә wәкә хwә һʹьз бькә (Мәт. 22:37-39). Мәсиһийе гьһишти гәләк дьхәбьтә, сәва кӧ әwе тʹәмийе бьԛәдинә. Әw бь щурʹе жийина хwә избат дькә, кӧ һәләԛәтийа wи тʹәви Йаһоwа у һʹьзкьрьна wи һьндава мәрьва лапә фәрз ә бона wи. w15 1/9 1:​3-5

Исафа һинкьри нә кӧ тʹәне мә хwәй дькә, кӧ тьштед хьраб нә кьн, ле әw ӧса жи мә һелан дькә, кӧ әм тьштед баш бькьн. Йәк жь wан тьштед баш әw ә, чахе әм мал бь мал даннасин дькьн у wанрʹа кʹе жи рʹасти мә те. Паwлос жи ӧса дькьр. Әwи ньвиси: «Әв дәйне стуйе мьн ә. Wәй ль мьн һәгәр әз Мьзгинийе даннасин нәкьм!» (1 Корн. 9:16). Һәрге әм пәй мәсәла Паwлос һәрʹьн, исафа мә wе баш бә, у әме бькарьбьн тьштед рʹаст бькьн. У һьн жи, чахе әм мәрийарʹа мьзгинийа хере даннасин дькьн, әм исафа wан һʹьшйар дькьн. Бәле, исаф дькарә бьбә һащәтәкә ԛимәт. У исафа мә али мә дькә кӧ бьгьһижнә ве нета хwә. Чахе әм һәргав Хәбәра Хwәде леколин дькьн у сәр дьфькьрьн, у чь кӧ әм һин дьбьн дьдьнә хәбате, бь ве йәке әм исафа хwә һин дькьн. Паше әв пʹешкʹеша баш, демәк исафа мә wе рʹебәре рʹаст бә, дь жийина мәйә Мәсиһитида. w15 1/9 2:​16, 18

Усьв, Муса, у Даwьд гәләк щерʹьбандьнед чәтьн дәрбаз кьрьнә. Ле wәʹде wан щерʹьбандьна, Йаһоwа тʹәви wан бу. Дь wан щерʹьбандьнада әwана чь кӧ һин бун, али wан кьр, чахе Йаһоwа щабдарийед мәзьн да wан. Чахе әм Кʹьтеба Пирозда дьхуньн, кӧ Йаһоwа чаwа али щьмәʹта хwә дькә у һин дькә, әм тʹәхмин дькьн, кӧ Йаһоwа бь рʹастийе жи мә һʹьз дькә. Һәла һе һәрге әм тьштәки нәрʹаст жи дькьн, Йаһоwа бәрдәwам дькә мә һʹьз дькә. Һәрге әм рʹасткьрьна wи ԛәбул дькьн у гӧне хwә тиньн рʹуйе хwә, әw wе мә «бь зедәйи» бьбахшинә (Иша. 55:7). Әw чь те һʹәсабе? Гьлийед Даwьд дәрһәԛа бахшандьна Йаһоwа мәрʹа дьдьнә кʹьфше, кӧ Бавәки мәйи чьԛас рʹәʹм һәйә. Даwьд гот: «Йе кӧ һʹәму сущед тә дьбахшинә, йе кӧ жь һʹәму нәхwәшийед тәрʹа шифайе [ԛәнщкьрьне] тинә. Йе кӧ щане тә жь горе дәртинә, йе кӧ тʹаща кʹәрәм у дьлованийе ль тә дькә» (Зәб. 103:3, 4, ИМ). Йаһоwа мә рʹаст дькә у рʹебәрийе дьдә мә бь гәләк щурʹа. Ле тӧ дәрберʹа хwә дьгӧһези, чахе Йаһоwа тә рʹаст дькә? Тʹьме бира хwәда хwәй кә, кӧ Йаһоwа мә рʹаст дькә, чьмки мә һʹьз дькә (Зәб. 30:5). w15 1/9 4:​13, 14

Мәртʹайе хwарьна мәхсус һазьр дькьр бона Иса у диса гәләк тьштед дьн, сәва кӧ Иса мала wанда хwә баш тʹәхмин кә. Чахе әwе дит кӧ Мәрйәм али wе накә, әw ащьз бу у шькийате wе бал Иса кьр. Иса заньбу кӧ Мәртʹа дьхwазә гәләк тьшт бькә, у ләма әwи бь нәрми жера гот: «Мәртʹа, Мәртʹа, тӧ бона гәләк тьшта хәма дьки у тʹәвиһәв дьби». Әwи ӧса жи жерʹа гот кӧ хwарьнәк тʹәне бәс ә. Паше Иса пʹайе Мәрйәме да, чьмки әwе рʹьнд гӧһе хwә дьда Иса. Әwи гот: «Әw пʹара ԛәнщ жи Мәрйәме хwәрʹа бьжарт у жь wе найе стандьне» (Луԛа 10:38-42). Мәрйәме дьбәкә бир кьра кӧ әwе чь хwар, ле әwе тӧ щар wе бир нәкьра әw тьшт, чь кӧ жь Иса һин бу у әw кӧ Иса ча пʹайе wе да. Паши 60 сала зедәтьр, Йуһәннайе шанди гьлийед ӧса ньвиси: «Иса Мәртʹа, хушка wе  . . . һʹьз дькьрьн» (Йуһʹн. 11:5). Әw гьли дьдьнә кʹьфше, кӧ Мәртʹайе ширәта Иса кӧ бь һʹьзкьрьне бу, ԛәбул кьрийә, у тʹәмамийа жийина хwә Йаһоwарʹа бь амьни хьзмәт кьрийә. w15 1/10 3:​3, 4

Гәләк избаткьрьнед мә һәнә, кӧ Йаһоwа иро жи али щьмәʹта хwә дькә. Әм гәләк щар дьбьһен кӧ мәрьва бона аликʹарийе Хwәдерʹа дӧа кьрьнә у щаб сәр дӧайед хwә стандьнә (Зәб. 53:2). Мәсәлә, дь гьравәкә бьчʹукә Филипинеда wәʹде хьзмәтийе, Алан рʹасти жьнәке һат, кʹижан кӧ чахе бьһист кӧ Алан Шәʹде Йаһоwа йә, дәстпекьр бьгьри. Алан гьли дькә: «Ве шәбәԛе, әwе жьньке Йаһоwарʹа дӧа кьрьбу, сәва кӧ Шәʹдед wи wе бьвиньн». Хwәде щаба дӧайе wе ӧса зу да, кӧ әw әʹщебмайи ма. Нава саләкеда әwе хwә тʹәсмили Йаһоwа кьр. Гәләк хьзмәткаʹред Йаһоwа аликʹарийа wи дитьнә, чахе пешийа кӧ бьбуна хьзмәткʹаред Хwәде тьштед хьраб тʹәрк данә кʹижан кӧ wанрʹа бьбу хәйсәт, мәсәлә кʹьшандьна щьхаре, хәбьтандьна наркотикайе, йан жи ньһерʹандьна порнографийайе. Һьнәк дьбежьн кӧ wана дьхwәстьн кӧ бь ԛәwата хwә бьтʹәркиньн әwан тьшта, ле йәкә нькарьбун. Ле, чахе wана жь Йаһоwа аликʹари хwәст, һьнге «зорайийа ԛәwате жь Хwәде» стандьн, у паше ида wана карьбун wан тьштед нәрʹаст бьтʹәркиньн (Зәб. 37:23, 24). w15 1/10 1:​10, 11

Һьнәк мәрьв шәбәԛе зу рʹадьбьн сәва кӧ бьхуньн, бьфькьрьн у дӧа бькьн. Һьнәк жи сәр хәбате wәʹде һесабуне әве йәке дькьн. Дьбәкә бона тә wәʹде лапи баш еваре йә, йан жи пешийа кӧ һәрʹи рʹазейи. Һьнәк һʹьз дькьн шәбәԛе у пешийа рʹазане жи бьхуньн (Йешу 1:8). Фәрз ә кӧ әм «дәст бьдьнә бәр wәхт», демәк wәʹдә жь тьштед нә фәрз бьстиньн, чьмки ӧса әме бькарьбьн һәр рʹож бьфькьрьн сәр Хәбәра Хwәде. Кʹьтеба Пироз соз дьдә кӧ Йаһоwа wе wан һʹәмушка кʹәрәм кә, йед кӧ сәр Хәбәра wи дьфькьрьн, у чьԛас дькарьн дьхәбьтьн кӧ чь һин дьбьн бьдьнә хәбате (Зәб. 1:1-3). Иса гот: «Хwәзи ль wан, йед кӧ хәбәра Хwәде дьбьһен у пек тиньн» (Луԛа 11:28). Ле йа лапә фәрз әw ә, кӧ чахе әм һәр рʹож сәр Хәбәра Йаһоwа бьфькьрьн, әw йәк wе али мә бькә, кӧ бь һәр кьред хwә wи румәт кьн. Чахе әм ӧса бькьн, Йаһоwа wе мә кʹәрәм кә кӧ ньһа бәхтәwар бьн у ӧса жи һʹәта-һʹәтайе дь дьнйа тʹәзәда (Аԛуб 1:25; Әʹйан. 1:3). w15 1/10 4:​17, 18

Чахе Иса готә шагьртед хwә кӧ әw гәрәке бьмьрә, Пәтрус готә wи, кӧ әw ԛәнщ бә һьндава хwә. Иса заньбу кӧ Пәтрус wи һʹьз дькә, ле ӧса жи заньбу кӧ Пәтрус нәрʹаст дьфькьрә. Ле Иса ча али wи у шагьртед дьн кьр? Пешийе әwи Пәтрус ширәт кьр. Паше әwи шагьртед хwәрʹа шьровәкьр кӧ wе чь бьԛәwьмә тʹәви wан, йед кӧ чәтьнайада нахwазьн ԛьрара Хwәде биньн сери. Иса ӧса жи гот кӧ Йаһоwа wе wан мәрьва хәлат кә, йед кӧ хwәһʹьз ниньн (Мәт. 16:21-27). Әw йәк Пәтрусрʹа дәрсәкә баш бу (1 Пәт. 2:20, 21). Йаһоwарʹа дӧа бькьн кӧ әw фәʹмкаʹрийе бьдә wә, сәва кӧ һун бькарьбьн фәʹм кьн кӧ зарʹед wә һʹәwще чь нә (Зәб. 32:8). Дьбәкә һун дьвинин кӧ зарʹа wә ӧса ша нинә ча бәре, йан жи әw дәрһәԛа хушк у бьрайед дь щьватеда нәбаш хәбәрдьдә. У дьбәкә һун тʹәхмин дькьн, кӧ тьштәк һәйә кӧ әw wәрʹа навежә. Ләма дәрберʹа нәфькьрьн кӧ зарʹа wә дьзива тьштәки гәләк хьраб дькә. Ле әwе проблеме пьшт гӧһе хwәха нәвежьн, йан жи нәфькьрьн кӧ әw проблем wе хwәха сафи бә. Дьбәкә wәрʹа лазьм ә кӧ али wи бькьн, wәки әw баwәрийа хwә ԛәwи кә. w15 1/11 2:​12, 13

Һʹьзкьрьна рʹаст у йәктийа хьзмәткʹаред Йаһоwа, дьдә кʹьфше кӧ религийа wан йа рʹаст ә. Иса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:34, 35). У Йуһʹәннайе шанди ньвиси: «Зарʹед Хwәде у зарʹед Мирещьн бь ве йәке жь һәв тенә фьрԛикьрьне: Әwе кӧ рʹастийе накә, әw нә жь Хwәде йә у ӧса жи әwе кӧ бьре хwә һʹьз накә. Әв ә әw готьн, йа кӧ wә бәре пешда бьһистийә: Гәрәке әм һәвдӧ һʹьз бькьн» (1 Йуһʹн. 3:10, 11). Һʹьзкьрьн у йәктийа нава Шәʹдед Йаһоwада wана әʹйан дькьн ча пәйчуйед Исайи рʹаст, демәк әw щьмәʹт кʹижан кӧ Хwәде дьдә хәбате, сәва кӧ мьзгина дәрһәԛа Пʹадшатийе бәла бә сәр тʹәмамийа дьнйайе (Мәт. 24:14). w15 1/11 4:​10, 11

Әм гәрәке дь територйа хwәда култура у баwәрийа мәрьва һьлдьнә һʹәсаб, чьмки ӧса әм дькарьн wәʹде рʹаст бьжберьн кӧ тʹәви wана хәбәр дьн. Кʹижан дәрәщада әм гәрәке һивийа wәʹде рʹаст бьн кӧ хәбәр дьн? Дьбәкә кәсәк тьштед ӧса дьбежә чь кӧ дьле мә дешинә. Дәwса wе йәке кӧ дәрбера щаба wи бьдьн йан жи бе һәмде хwә тьштәки бежьн, wе бь билани бә бьсәкьньн у бьфькьрьн: «Гәло әwи бь рʹастийе дьхwәст дьле мьн бешинә? Гәло әʹсәйи йә әз тʹәви wи дәрһәԛа wе йәке хәбәр дьм чь кӧ әwи гот?» Wе һе баш бә кӧ ԛә тьштәки нәбежьн. Ле һәрге жи мәʹнийа лайиԛ һәйә кӧ тʹәви wи хәбәрдьн, әм гәрәке һивийе бьн кӧ һерса мә дайнә (Мәтʹлк. 15:28). Йан дьбәкә әм дьхwазьн нәфәред мала хwә, кʹижан нә Шәʹдед Йаһоwа нә һелан кьн, кӧ Йаһоwа нас кьн. Әм гәрәке сәбьр бьн у кʹур бьфькьрьн дәрһәԛа wе йәке кӧ чь әм дьхwазьн бежьн wанрʹа. У һьн жи әм гәрәке wәʹдәки ӧса бьжберьн, wәки әwана бькарьбьн гӧһ бьдьнә мә. w15 1/12 3:​6, 8, 9

Чахе әм сафи дькьн кӧ, кʹижан щурʹе ԛәнщкьрьне йан кʹижан дәрман бьдьнә хәбате, әм гәрәке «аԛьлда гьран» бьн, демәк сәрwахт бьн. Илаһи чахе әw щурʹе ԛәнщкьрьне йан жи дәрман нәнас ә, әм гәрәке сәрwахт бьн. Гәло әw мәрьве кӧ мәрʹа дәрһәԛа wан ԛәнщкьрьна готийә, дькарә шьровәкә әw тьшт йан дәрман ча гәрәке бенә хәбьтандьне? Шьровәкьрьна wи тә дӧдьли накә? Гәло һәнә гәләк һәким кӧ ԛайил ьн, wәки әw ԛәнщкьрьн йан дәрман бь рʹастийе дькарә мәрьва ԛәнщ кә? (Мәтʹлк. 22:29). Дьбәкә кәсәк мәрʹа дьбежә, кӧ щики дур щурʹәки ԛәнщкьрьна тʹәзә һатә дәрхьстьне у кӧ һәким һе ньзаньн дәрһәԛа ве йәке. Ле гәло һәнә избаткьрьн кӧ әw щурʹе ԛәнщкьрьне һәйә? Һьнәк жи дьбәкә ширәте дьдьнә мә кӧ дәрманед ӧса бьдьнә хәбате, кӧ әʹйан ниньн жь чь һатьнә чекьрьне йан әʹйан ниньн, кӧ әw ча сәр мәрьва һʹӧкӧм дьбә. Әw йәк дькарә гәләк хоф бә. Бира хwәда хwәй кьн кӧ Хwәде мәрʹа пешда дьбежә, кӧ әм тьштед нәтʹәбийәти йан сербазийева гьредайи нәдьнә хәбате (Иша. 1:13; Ԛан. Дщр. 18:10-12). w15 1/12 4:​16

Дь Кʹьтеба Пирозда гәләк мәсәлед мәрьвед амьн һәнә, йед кӧ рʹӧһʹе Хwәдейи пироз стандьнә, ле әwана нәчунә ль әʹзмен. Мәсәлә Йуһʹәннайе Ньхӧмдар. Иса гот кӧ мәрьвәки мина wи гьринг тʹӧнә бу, ле паше гот кӧ әw wе нәчә сәр әʹзман чаwа пʹадша wәки пʹадшатийе бькә. Сәр Даwьд жи рʹӧһʹе Хwәдейи пироз һәбу (1 Сам. 16:13). Рʹӧһʹе пироз али wи дькьр кӧ дәрһәԛа Йаһоwа тьштед кур фәʹм бькә, у һьн жи әwи бь рʹебәрийа рʹӧһʹе пироз һьнә пʹаред жь Кʹьтеба Пироз ньвиси (Марԛ. 12:36). Ле йәке Пәтрусе шанди дәрһәԛа Даwьд ньвиси кӧ әw «нәчубу әʹзмана» (Кʹар. Шанд. 2:34). Рʹаст ә рʹӧһʹе пироз али wан дькьр кӧ әwана тьштед мәхсус бькьн, ле йәкә рʹӧһʹе пироз wанра шәʹдәти нәдьда, кӧ әwана һатьнә бьжартьне бона жийина сәр әʹзмана. Әw найе һʹәсабе кӧ кемасийа wан һәбу, йан жи кӧ әwана нәһежайи wе йәке бун. Әw те һʹәсабе кӧ Йаһоwа wе wана вәгәринә жийине щьнәтеда ль сәр әʹрде (Йуһʹн. 5:28, 29; Кʹар. Шанд. 24:15). w16.01 3:​16

Чахе әм шьхӧлкʹарийе дькьн тʹәви wан кʹижана әм һʹьз дькьн, әм һе незики wан дьбьн, у һе гәләк педьһʹәсьн дәрһәԛа wан у һӧнӧред wан. Һьн жи әм педьһʹәсьн дәрһәԛа нетед wан, у ӧса жи кӧ әwана ча дьхwазьн нетед хwә биньн сери. Иса тʹәви Йаһоwа wәкә милиард сала шьхӧлкʹари дькьр. Һʹьзкьрьна wан у һәләԛәтийа wан һьндава һәвдӧ, ӧса ԛәwи дьбу кӧ тӧ тьшти нькарьбу зийане бьда һәләԛәтийа wан. Wана жь ве һәләԛәтийа незик, шабун дьстандьн у тʹәвайи әдьлайеда шьхӧлкʹари дькьрьн. Иса дӧайе хwәда жь Йаһоwа һиви дькьр, кӧ шагьртед wи хwәй кә. Ле мәʹни чь бу? Әwи дӧайе хwәда ӧса гот: «Wәки бьбьн йәк, чаwа әз у тӧ йәк ьн» (Йуһн. 17:11). Һәрге әм тʹәмийед Хwәде биньн сери у дь хьзмәткьрьнеда кʹар бькьн, әме бькарьбьн пебьһʹәсьн дәрһәԛа һӧнӧред wийи баш. У ӧса жи дәрһәԛа wе йәке, чьрʹа әм гәрәке баwәрийа хwә wи биньн у пәй рʹебәрийа wи һәрʹьн. Һәрге әм незики Хwәде бьн, әw жи wе незики мә бә (Аԛуб 4:8). Әме ӧса жи бькарьбьн незики хушк-бьра бьн, чьмки әм жи wәк wан рʹасти щерьбандьна у шабуне тен, у нете мә жи йәк ьн. w16.01 5:​9, 10

Наһоми сафи кьрийә кӧ бәрдәwам кә һәрʹә мала хwә Исраеле. Тʹәви wе Рʹутʹ ә кʹижан кӧ гәрәке сафикьрьна фәрз бькә. Әw дькарә йан һәрʹә мала хwә щәм щьмәʹта хwә Моwабеда, йан тʹәви хасийа хwә Наһомийе бьминә, у һәрʹә Бәйтләһʹме (Рут 1:1-8, 14). Рʹуʹт дькарьбу бьфькьрийа кӧ вәгәрʹә wәлате хwә Моwабе, кʹидәре кӧ малбәта wе у мәрьвед wейи незик wе мьԛати wе буна у әw хwәй кьрана. Һьн жи әʹйд-ԛәйд, зьман у щьмәʹта Моwабе йе wе бун. Ле Наомийе нькарьбу жеʹра әw һʹәму тьшт ль Бәйтләһʹмеда соз бьда. У ләма Наомийе готә Рʹутʹ кӧ вәгәрʹә wәлате хwә Моwабе. Наоми дьтьрсийа кӧ wе нькарьбә бука хwәрʹа нә мер, нә жи мале бьвинә. Ле Рʹутʹ чь сафи кьр? Бьньһерʹьн фьрԛийа ортʹа wе у Орпʹайе. Орпʹа «вәгәрʹийа гәле хwә у илаһе [хӧданед] хwә» (Рʹутʹ 1:9-15). Ле гәло Рʹутʹ жи дьхwәст вәгәрʹә хӧданед щьмәʹта хwә йед ԛәлп? Әʹйан ә кӧ на. w16.02 2:​4, 5

Ниве шәве, Даwьд у Абишә һеди-һеди бәр 3 000 әскәред рʹазайирʹа дәрбаз дьбун. Wана ортʹа wан әскәрада, Шаwул Пʹадша дитьн, кӧ кʹур рʹазайи бу. Шаwул дь бәрийа Щьһустанеда бу, чьмки әwи Даwьд дьгәрийа сәва бькӧжә. Абишә Даwьдрʹа дькә пʹьстә-пʹьст: «Бьһелә кӧ әз бь дәрбәке, бь рʹьме wи ль әʹрдева бькʹӧтьм у щара дӧwәмин әз ль wи нахьм». Ле щаба Даwьд рʹасти жи әʹщебмайи йә. Әwи Абишәрʹа гот: «Ма wе кʹи дәсте хwә дьрежи мәсиһийе Хӧдан бькә у бесущ бьминә?» Даwьд ӧса жи гот кӧ әw тʹӧ щар нькарә дәсте хwә сәр рʹункьрийе Йаһоwа һьлкʹьшинә (1 Сам. 26:8-12). Даwьд фәʹм дькьр кӧ чь дьһатә һʹәсабе амьн бьминә Хwәдерʹа. Ԛә һьше wирʹа дәрбаз нәдьбу кӧ зийане бьдә Шаwул. Ле чьрʹа? Чьмки Йаһоwа Шаwул кʹьфш кьрьбу ча пʹадше Исраеле. Бәле, хьзмәткʹаред Йаһоwайи амьн ԛәдьре wан дьгьрьн, кʹижана Йаһоwа кʹьфш дькә. У Йаһоwа дәʹwа дькә, кӧ жь щьмәʹта wи һәр кәс амьнийе хwәй кә. w16.02 4:​1, 2

Һәрге тӧ щаһьл и, у дьхwази бейи ньхӧмандьне, әw те һʹәсабе кӧ ԛәдьрәки мәзьн һивийа тә йә. Ньхӧмандьн гавәкә гәләк фәрз ә. Чьмки әw те һʹәсабе кӧ тӧ хwә тʹәсмили Йаһоwа дьки, демәк wирʹа соз дьди кӧ тӧйе һʹәта-һʹәтайе wирʹа хьзмәт ки. Һьн жи, тӧ соз дьди кӧ тӧйе жийина хwәда жь һʹәму тьшти ԛьрара wи дайни щийе пешийе. Фәʹмдари йә, кӧ тӧ гәрәке бейи ньхӧмандьне, чахе епʹещә гьһишти йи кӧ әwе сафикьрьне бьки. Хенщи ве йәке, әw гәрәке хwәстьна тәйә шәхси бә, у тӧ гәрәке фәʹм бьки чь те һʹәсабе тʹәсмилбуйин. Ле һәрге тӧ дӧдьли дьби кӧ һазьр и бейи ньхӧмандьне? Йан жи һәрге тӧ дьхwази бейи ньхӧмандьне, ле де-баве тә дьбежьн кӧ һе зу йә, дьбәкә сәва кӧ тӧ һе щерʹьбанди би? Һәрдӧ дәрәщада жи, бәрхwә нәкʹәвә. Дәwсе, әwи wәʹдәйи чаwа мәщал бьдә хәбате, сәва кӧ һе пешда һәрʹи, у зутьрәке бькарьби бейи ньхӧмандьне. w16.03 2:​1, 2

Һәнә хушк у бьра, малбәта кʹижанада нәбаwәр һәнә. Һьнәк жь wан ида зәwащеда бун чахе һатьнә нава рʹастийе, ле һәвалзәwаще wана нәһатьнә нава рʹастийе. Ве дәрәщеда йәкә Мәсиһи дькарә малбәтеда әʹдьлайе хwәй кә, һәрге пе принсипед Хwәде бьжи. У ӧса жи әwана дькарьн тʹәвайи һәвкʹарийе бькьн у рʹе бьдьнә һәв. Рʹаст ә әw йәк дькарә чәтьн бә, ле бьфькьрьн әв кʹарәкә чьԛас мәзьн тинә. Рʹожа иройин Шәйтʹан пәй малбәта дькʹәвә, у ләма гәләк фәрз ә wәки хьзмәткʹаред Хwәде һәләԛәтийа баш хwәй кьн зәwаща хwәда. Фьрԛи тʹӧнә һун чьԛас wәхт зәwащеда ньн, тʹьме бьфькьрьн һәла һун чь дькарьн бежьн йане бькьн, сәва зәwаща хwә һе ԛәwи кьн. Һәрге һун щотед әʹмьрда мәзьн ьн, һун дькарьн али щотед щаһьл бькьн. Һун дькарьн щотед щаһьл тʹәглифи мала хwә кьн, сәва кӧ тʹәвайи ԛӧльхкьрьна тʹәви малбәте дәрбаз кьн. Әwана дькарьн жь wә һин бьн, wәки фьрԛи тʹӧнә әwана чьԛас wәхт зәwащеда ньн, йәкә гәрәке һʹьзкьрьне һьндава һәвдӧ бьдьнә кʹьфше у йәктийеда бьн (Тито 2:3-7). w16.03 3:​14, 15