Кануна Пешьн

Пәтрусе шанди бь ван гьлийа Мәсиһийа ԛәwи кьр, йед кӧ жь бо Шәйтʹан гәләк тәнгасийа дькʹьшандьн. Пе мәсәлед wан, йед кӧ «сәбьр» кьрьнә, әм һин дьбьн ча ԛәwи бьминьн. Мәсәлед wан һьн жи мә дьлгәрм дькьн кӧ әм дькарьн амьн бьминьн, у әм баwәр дьбьн кӧ амьнийа мә wе әʹсә бе кʹәрәмкьрьне (Аԛуб 5:11). Дьбәкә тӧ жи рʹасти нәһәԛийа тейи, йан һәла һе пәйкʹәтьна жи. Йан, һәрге тӧ рʹуспи йи йан бәрпьрсийаре мьһале йи, дьбәкә хәмгин дьби кӧ гәләк щабдарийед тә һәнә. Wи чахи бьфькьрә сәр Паwлосе шанди. Әw рʹасти гәләк «тьштед жь дәрва» дьһат, у пәй wи дькʹәтьн. Хенщи ве йәке, әw тʹьме хәмгин дьбу бона щьвата (2 Корн. 11:23-29, ИМ). Ле йәкә әwи дәсте хwә пәйа нәкьр у мәсәла wи йед дьн ԛәwи дькьрьн (2 Корн. 1:6). Чахе һун тәнгасийада сәбьр дькьн, тʹьме бира хwәда хwәй кьн, кӧ йед дьн жи дькарьн чʹәʹв бьдьнә сәбьра wә. w16.04 2:11, 14

Әм чаwа Шәʹдед Йаһоwа, нав тʹәмамийа дьнйайеда гәләк тенә наскьрьне пе шьхӧле бәлакьрьна мьзгине. Дьԛәwьмә хьзмәтийеда һун рʹасти wан мәрьва һатьнә, йед кӧ ԛәбул накьн баwәрийа мә, ле йәкә ԛәдьре мә дьгьрьн жь бо шьхӧле кӧ әм дькьн. Әм заньн wәки Иса пʹехәмбәрти кьр, кӧ wе мьзгина дәрһәԛа Пʹадшатийе сәр тʹәмамийа дьнйайе бе бәлакьрьне (Мәт. 24:14). Гәләк мәрьвед жь рʹелигийед дьн дьфькьрьн, wәки әwана жи бәла дькьн wе мьзгине, дәрһәԛа кʹижане кӧ Иса дьгот. Ле әwана хьзмәта хwә тиньн сери, тʹәне бь хьзмәта дереда, йан даннасин дькьн бь телевизийоне йан бь интернете. Ле йед дьн дьфькьрьн кӧ әwана хьзмәта хwә тиньн сәри бь wе йәке, чахе аликʹарийе дьдьнә мәрьварʹа, мәсәлә, алийе медисинеда, йан жи сәва мәрьв хwәндьне бьстиньн. Ле пьрс пешда те: Гәло чь кӧ әwана дькьн, те һʹәсабе әw шьхӧл, кʹижан кӧ Иса шагьртарʹа гот кӧ бькьн? w16.05 2:1, 2

Жь сала 1914, сәрwертийед мәрьва бунә дьжмьнед Пʹадшатийа Хwәде. Әw Пʹадшати wе зутьрәке диwана һʹәму сәрwертийед мәрьва бькә, у wана кʹӧта кә (Зәб. 2:2, 7-9). Хwәде дьһелә кӧ система политика ве дьнйайе һәбә, чьмки әw ӧса дькә кӧ һьнәки әʹдьлайи у тʹәрбәти һәбә. Әw йәк али мә дькә кӧ әм мьзгина дәрһәԛа Пʹадшатийе бәла кьн (Рʹом. 13:3, 4). Хwәде һәла һе жи мәрʹа дьбежә кӧ әм дӧа бькьн бона әwед кӧ сәрwертийе дькьн, илаһи чахе сафикьрьна wан дькарә нәбаш һʹӧкӧм бә сәр хьзмәткьрьна мә (1 Тимтʹ. 2:1, 2). Чахе нәһәԛийе мә дькьн, әм дькарьн жь сәрwера аликʹарийе бьстиньн. Паwлосе шанди жи ӧса кьр. Рʹаст ә Кʹьтеба Пироз дьбежә wәки дьжмьне Хwәде, демәк Шәйтʹан, һʹӧкӧм дькә сәр политика ве дьнйайе, ле йәкә Кʹьтеба Пирозда найе готьне кӧ Шәйтʹан һәр сәрwерәки йан һʹӧкӧмәтәки контрол дькә (Луԛа 4:5, 6). Әм гәрәке ӧса нәфькьрьн, кӧ һәр кәс жь сәрwера бьн контрола Мире-щьнада нә. Дәwса wе йәке әм ԛәдьре «сәрwер у һʹӧкӧмәта» дьгьрьн, у wана «беһӧрмәт» накьн (Тито 3:1, 2). w16.04 4:5, 6

Wәʹде сафикьрьна дьбәкә әм дьфькьрьн: «Әз ча дькарьм тедәрхьм кӧ чь wе Йаһоwа хwәш бе, һәрге дәрһәԛа дәрәща мьн тʹәмийа конкрет Кʹьтеба Пирозда тʹӧнә йә?» Чахе Кʹьтеба Пирозда дәрһәԛа дәрәща мә ԛануна рʹастә-рʹаст тʹӧнә, әм ча дькарьн ԛьрара Хwәде бьзаньбьн? Әм гәрәке wирʹа дӧа бькьн у бь сайа рʹӧһʹе пироз рʹебәрийа wи бьвиньн. Шеwьр кьн кӧ Иса ча тедәрдьхьст ԛьрара Баве хwә. Мәсәлә, чахе дӧ дәрәщада Иса бь кʹәрәмәт әʹлаләта мәзьн тʹер кьр, пешийе әwи Хwәдерʹа дӧа кьр (Мәт. 14:17-20; 15:34-37). Ле чахе бәрʹийеда Иса бьрʹчи бу у Шәйтʹан wи дьщерʹьбанд, йәкә әwи инкʹар кьр кӧ бь кʹәрәмәт кәвьр бькә нан (Мәт. 4:2-4). Гәло чьрʹа? Чьмки әwи рʹьнд заньбу ньһерʹандьна Баве хwә, у ләма заньбу кӧ гәрәке ӧса нәкә. Иса фәʹм дькьр кӧ Йаһоwа хwәш найе, кӧ әw ԛәwата wи бона кʹара хwә бьдә хәбате. У чьмки Иса ӧса сафи кьр, бь ве йәке әwи да кʹьфше кӧ итʹбарийа хwә рʹебәрийа Йаһоwа тинә, у баwәр ә кӧ әwе али wи бькә. w16.05 3:7, 8

Һьнә пʹаред Кʹьтеба Пироз, серида, конкрет бона кәсәки йан бона кʹомәкә мәрьва бу. Ләма жи пешийа кӧ әм Кʹьтеба Пироз бьхуньн, әм гәрәке жь Йаһоwа һиви кьн, кӧ али мә бькә әм бь нета рʹаст бьхуньн. Ӧса жи, дӧада әм дькарьн жь Йаһоwа биланийе бьхwазьн, сәва кӧ хwәрʹа дәрса бьвиньн, кʹижан кӧ Йаһоwа дьхwазә әм һин бьн (Әзр. 7:10; Аԛуб 1:5). Чахе тӧ Кʹьтеба Пироз дьхуни, бьсәкьнә у пьрсед ӧса бьдә хwә: «Ль wьр әз чь педьһʹәсьм дәрһәԛа Йаһоwа? Әз ча дькарьм әве информасйайе жийина хwәда бьдьмә хәбате? Әз ча дькарьм бь сайа ве информасйайе, али йед дьн бькьм?» Чахе әм бьфькьрьн сәр пьрсед wи щурʹәйи, әме жь хwәндьна Кʹьтеба Пироз һе зәʹф кʹаре бьстиньн. Wәрә мәсәле шеwьр кьн. Кʹьтеба Пирозда те готьне кӧ чь те дәʹwакьрьне жь рʹуспийа (1 Тимтʹ. 3:2-7). Бәле, гәләк жь мә рʹуспи ниньн, ләма пешийе әм дькарьн бьфькьрьн, кӧ әw рʹез бона мә ниньн, у бона мә керһати ниньн. Ле әм жь wан дәʹwакьрьнед бона рʹуспийа, дькарьн кʹаре бьстиньн. w16.05 5:7, 8

Чахе Щьһу бьрьн Бабилоне ча дил, wана дит кӧ әw шәһәр бь пʹута тʹьжә йә, у мәрьва рʹӧһʹед зӧлм у щьна дьһʹәбандьн. Ле Данийеле амьн кӧ Щьһу бу, у се һәвалед wи нәкʹәтьнә бәр байе wан мәрьва, у нәһатьнә гӧһастьне (Дан. 1:6, 8, 12; 3:16-18). Данийел у һәвалед wи сафи кьрьн кӧ тʹәне Йаһоwарʹа амьн бьминьн, чаwа Һостәйе хwә. У әwана бь рʹастийе жи Хwәдерʹа амьн ман! Рʹаст ә Данийел тʹәмамийа әʹмьре хwә Бабилонеда жит, ле йәкә мьлйакʹәте Хwәде гот кӧ Данийел мәрьвәки зәʹф ԛимәт бу (Дан. 10:11, 19). Wәʹде бәре, һостә дькарьбу жь һʹәрʹийе дәрданед бь щурʹә-щурʹә форма чекьра, кʹижан кӧ wи хwәш дьһат. Иро хьзмәткʹаред рʹаст заньн, кӧ Йаһоwа Сәрwере һʹәму Зорайе йә у һʹӧкӧмәтийа wи һәйә кӧ мәрьва бьгӧһезә (Йерәм. 18:6). Әw дькарә мә һәр йәке башԛә жи бьгӧһезә. Ле әw мәрʹа азайа бьжартьне дайә, у дьхwазә кӧ әм бь рʹәзәдьли гӧрʹа wи бькьн. w16.06 2:1, 2

Шәйтʹан система комерсийа ве дьнйайе дьдә хәбате, сәва әм баwәр кьн кӧ бона жийина бәхтәwар, хенщи һʹәwщед мә, тьштед материали гәләк лазьм ьн. Әw рʹьнд занә кӧ ча «чʹәʹвһавьжи» бьдә хәбате (1 Йуһʹн. 2:15-17; Дәстп. 3:6; Мәтʹлк. 27:20). Әw дьнйа гәләк щурʹә-щурʹә тьшта реклам дькә, ча тьштед рʹьнд, ӧса жи тьштед пʹучʹ. У гәләк жь wан тьшта дьбәкә гәләк бәдәw ьн. Щәм wә ӧса ԛәwьмийә, кӧ wә тьштәк кʹьри, нә сәва ве йәке кӧ wәрʹа лазьм бу, ле чьмки wә рекламеда йан дькʹанеда дит? Паше wә фәʹм кьр, кӧ һун бей ви тьшти жи дькарьбун йолә бьчуна. Әw тьштед нәфәрз, жийина мә тʹәне гьран дькьн. Әw тьшт дькарьн мә бькьнә тʹәльке, у мә паш хьн жь тьштед рʹӧһʹани. Wәʹде мә дькарә ида нәминә сәва Кʹьтеба Пироз леколин кьн, һазьр бьн у бенә сәр щьвате, у дәркʹәвьн хьзмәтийе. Бира хwәда хwәй кьн, гьлийед Йуһʹәннайе шанди: «Дьнйайе жи дәрбаз бә, һавьжийа wе жи». w16.07 1:3, 4

Щьвата Мәсиһийед ԛьрʹна йәкеда, щурʹә-щурʹә мьләт һәбун, мәсәлә, Щьһу, Йунани, Рʹомайи, у мьләтед дьн. Әwана жь һәв щӧдә дьбун, пе рʹелигийа хwәйә бәре, пе әʹдәтед хwә, у хәйсәтед хwә. Ләма һьнәкарʹа чәтьн бу бь щурʹәки тʹәзә Хwәде бьһʹәбиньн, йан жи кьред хwәйә бәре бьһельн. У ләма Паwлосе шанди ани бира wан, кӧ тʹәне Хwәдеки Мәсиһийа һәйә, әw һәйә Йаһоwа. Ле әм чь дькарьн бежьн дәрһәԛа щьвата мәйә иройин? Ишайа пʹехәмбәр пешда гот кӧ рʹожед хьлазийеда, мәрьвед жь һʹәму мьләта wе тʹәвайи тʹоп бьн сәва Йаһоwа бьһʹәбиньн. Әwана wе бежьн: «[Йаһоwа] wе рʹийед хwә һини мә бькә у әме рʹийед wида бьмәшьн» (Иша. 2:2, 3). Рʹасти жи әм чьԛас ша нә кӧ пе чʹәʹве хwә дьвиньн, кӧ әw пʹехәмбәрти ча те сери! Хушк-бьред мә жь щурʹә-щурʹә мьләта, култура, у зьмана нә. У әwана гьшк жи Йаһоwа һӧрмәт у рʹумәт дькьн. w16.06 3:15, 16

Чәтьн ә әм бьдьнә бәр чʹәʹве хwә, кӧ чьԛас тьштед баш Йаһоwа һазьр кьрийә бона Мәсиһийед рʹункьри, чахе әwана сәр әʹзмана тʹәви Мәсиһ сәрwертийе бькьн (Луԛа 22:28-30; Фили. 3:20, 21; 1 Йуһʹн. 3:2). Әwана wе бь симболик бьбьнә «Оршәлима ну», йане бука Мәсиһ (Әʹйан. 3:12; 17:14; 21:2, 9, 10). Әwана wе тʹәви Иса «мьләта» ԛәнщ кьн. Әwана wе али мәрьва бькьн кӧ жь гӧнә у мьрьне аза бьн, сәва кӧ бьбьнә беԛьсур (Әʹйан. 22:1, 2, 17). Йаһоwа wе ԛәнщийа хwәйә лапә мәзьн бьдә кʹьфше, чахе мәрьва жь мьрьне рʹакә (Иб. 14:13-15; Йуһʹн. 5:28, 29). Ле кʹе нә әw мәрьв, йед кӧ wе жь мьрьне рʹабьн? Әw һәнә мәрьвед амьн йед кӧ пешийа мьрьна Иса мьрьнә, у ӧса жи «пәзед дьн», кʹижан кӧ wәʹде wан рʹожед ахьрийеда мьрьнә. Әw һʹәму мәрьвед амьн wе вәгәрʹьнә жийине, сәва бәрдәwам кьн Йаһоwарʹа хьзмәт кьн (Йуһʹн. 10:16). w16.07 4:13-15

Сәва кӧ «һʹьшйар бьминьн» хwәстьн тʹәне бәс нинә. Иса чәнд рʹож пешийа мьрьна хwә, диса жи Пәтрус, Аԛуб, у Йуһʹәннарʹа гот, кӧ әwана Йаһоwарʹа дӧа бькьн (Луԛа 21:36). Демәк, сәва кӧ әм wәʹде wан рʹожед ахьрийеда рʹӧһʹанида һʹьшйар бьминьн, әм жи гәрәке тʹьме Йаһоwарʹа дӧа бькьн (1 Пәт. 4:7). Иса гот кӧ хьлази wе «сьһʹәтәкә ӧсада бе, кӧ [әм] нә чʹәʹвньһерʹи нә». Ләма әм гәрәке тʹьме фәсал бьн, сәва кӧ рʹӧһʹанида хәwрʹа нәчьн. Ньһа wәʹдә нинә кӧ әм пәй тьштед ве дьнйайе кәвьн, у пәй хwәстьнед хwәйә бәдәне һәрʹьн (Мәт. 24:44). Бь сайа Кʹьтеба Пироз, Хwәде у Иса мәрʹа дьбежьн, кӧ әм ча дькарьн һʹьшйар бьминьн. Әм гәрәке тʹьме дина хwә бьдьнә рʹӧһʹанийа хwә. Ӧса жи гәрәке тʹьме һәләԛәтийа хwә тʹәви Йаһоwа ԛәwи хwәй кьн, у Пʹадшатийа wи дайньн щийе пешьн. Әм гәрәке тʹьме бира хwәда хwәй кьн кӧ әм чь wәʹдәйида дьжин, чьмки ӧса әме һазьр бьн бона һатьна ахьрийе (Әʹйан. 22:20) Әw йәк гәләк фәрз ә, чьмки әʹмьре мә ве йәкева гьредайи йә! w16.07 2:15-17

Зәwащ дькарә ԛәwи бә һәрге мер у жьн «һәв сәбьр кьн у ль һәв бьбахшиньн». Һәрдӧ жи гӧнәкʹар ьн, ләма жи шашийед wана wе һәбьн. Чахе әwана шашийа дькьн, жь wе йәке әwана дькарьн хwәрʹа дәрса һьлдьн, мәсәлә, һин бьн кӧ һәв бьбахшиньн у һʹьзкьрьна агапе бьдьнә кʹьфше. Әw һʹьзкьрьн «йәктийа тʹам һәвва гьредьдә» (Колс. 3:14). Һьн жи «һʹьзкьрьн думькдьреж у ширьн ә, . . . Кʹине нажо» (1 Корн. 13:4, 5). Чахе Мәсиһи һәв фәʹм накьн у проблем пешда тен, пьрс гәрәке ӧса зу бенә сафикьрьне, һʹәта кӧ рʹо нәчуйә ава (Әфәс. 4:26, 27). Сәва бь дьл бежьн «бьбахшинә, мьн тә хәйиданд», мьлукти у мерхаси лазьм ә. Әw йәк wе аликʹарийе бьдә wә, кӧ проблема сафи кьн у ча щоте зәwаще һәврʹа незик бьн. w16.08 2:6

Бона Иса, бәлакьрьна мьзгинийа Пʹадшатийе, шьхӧләкә лапә фәрз бу. Ле әwи ӧса жи гәләк wәʹдә хәрщ дькьр, сәва шагьртед хwә һин кә, кӧ ча бьбьнә дәрсдаред баш у ча мьԛати щьмәʹта Хwәде бьн. Шагьрт һин дьбун кӧ бьбьнә мина шьвана, йед кӧ мьԛати кәрийед хwә дьбьн (Мәт. 10:5-7). Филипо гәләк хьзмәт дькьр, ле әwи ӧса жи чар ԛизед хwә һин дькьр, сәва әwана жи мәрьвед дьн рʹастийе һин кьн (Кʹар. Шанд. 21:8, 9). Иро жи гәләк фәрз ә wәки әм йед тʹәзә һин кьн. Гәло чьрʹа? Нав тʹәмамийа дьнйайеда, гәләк мәрьв мьзгинийе ԛәбул дькьн, у һәжмара wан зедә дьбә. Йед нәщерʹьбанди кʹижан кӧ һе нәньхӧманди нә, гәрәке бенә һинкьрьне. Әм гәрәке али wан бькьн кӧ әwана фәʹм кьн, wәки чьԛас фәрз ә әwана хwәха Кʹьтеба Пироз бьхуньн у леколин кьн. Ӧса жи әм гәрәке wана һазьр кьн, сәва әwана мьзгинийе бәла кьн у мәрьва рʹастийе һин кьн. Щьватед мәда, бьред тʹәзә гәрәке бенә һинкьрьне, сәва ахьрийеда әwана бькарьбьн бьбьнә бәрдәстийед щьвате у рʹуспи. Мәсиһийед гьһишти дькарьн али йед нәщерʹьбанди бькьн, сәва әwана рʹӧһʹанида пешда һәрʹьн. w16.08 4:1, 2

Чахе әм бь дьл у щан тʹәви хушк-бьра хьзмәт дькьн, әw йәк йәктийе у тʹьфаԛийе тинә. Хенщи ве йәке, һәләԛәтийа мә тʹәви wан незик дьбә у әм баwәрийа һәвдӧ һьндава кʹәрәмед Пʹадшатийа Хwәде, ԛәwи дькьн. Чахе әм дәстед хушк-бьра ԛәwи дькьн, бь ве йәке әм али wан дькьн кӧ wәʹде тәнгасийа ԛәwи бьсәкьньн у ахьрийа баш бьдьн бәр чʹәʹве хwә (Иша. 35:4). У һе зедә, чахе әм али йед дьн дькьн, әм хwәха жи кʹаре дьстиньн, әм рʹӧһʹанида ԛәwи дьминьн у әм созед Хwәдеда дӧдьли набьн. Бь рʹастийе жи, әw йәк дәстед мә жи ԛәwи дькә. Әм дьвиньн кӧ бәре Йаһоwа ча щурʹә-щурʹә дәрәщада али хьзмәткʹаред хwәйи амьн кьрийә у wана хwәй кьрийә. Әw йәк гәрәке баwәрийа мә һьндава wи ԛәwи кә у әм гәрәке һе зедә итʹбарийа хwә wи биньн. Чахе һун рʹасти чәтьнайа у проблема тен, тʹӧ щар бьра дәстед wә сьст нәбьн! (Сефн. 3:16). Дәwсе, Йаһоwарʹа дӧа бькьн, у бьһельн кӧ дәсте wийи һʹьмзор wә ԛәwи кә у бәрбь кʹәрәмед Пʹадшатийе бьвә (Зәб. 73:23, 24). w16.09 1:16-18

Хьзмәткʹаред Хwәде чахе сафи дькьн кӧ чь хwә кьн, әwана һьлдьдьн һʹәсаб гьлийед ве рʹоже. Фәʹмдари йә кӧ чахе сезон, һәwа, у ӧса жи дәрәщед мә тенә гӧһастьне, әw йәк һʹӧкӧм дьбьн сәр щурʹе кʹьнщхwәкьрьна мә. Ле нормед Йаһоwа найенә гӧһастьне, чаwа һәwа те гӧһастьн (Малх. 3:6). Wан щийа кʹидәре кӧ һәwа гәрм ә, дькарә чәтьн бә тедәрхьн һәла кʹьнще мә лайиԛ у щайиз ьн йан на. Хушк-бьред мә дьшекьриньн, кӧ әм кʹьнще зәʹф тәнг йан жи зәʹф вәкьри хwә накьн (Иб. 31:1). Ӧса жи чахе әм һеса дьбьн бәр дәве бәре йан чахе дьчьнә һәвз, гәрәке кʹьнще мәйи хwәавехьстьне бь мьлукти бә (Мәтʹлк. 11:2, 20). Һәрге жи ниве зәʹф мәрьв бәр бәре гәләк вәкьри хwә дькьн, әм чаwа Шәʹдед Йаһоwа, чʹәʹв надьнә wан, у дьхwазьн Йаһоwа рʹумәт кьн. w16.09 3:11, 12

Иса гәләк щар жь пәйчуйед хwә дьпьрси, һәла әwана чь баwәр дькьн. Де-бавно, ве йәкеда чʹәʹв бьдьнә Иса. Чахе һун тʹәви зарʹед хwә һеса дьбьн, йан тьштәки тʹәвайи дькьн, wана һелан кьн кӧ дьле хwә wәрʹа вәкьн. Һәрге зарʹ һьнә һинкьрьнед Кʹьтеба Пирозда дӧдьли дьбә, тʹәвһәв нәбьн, ле бь сәбьр бьн. Али зарʹе бькьн кӧ щабед пьрсед хwә бьстинә. Гәләк баш ә кӧ зарʹ пьрса дьдә, чьмки әw те һʹәсабе кӧ әw дьхwазә тьшта пебьһʹәсә у фәʹм бькә. Һәла һе Иса жи чахе 12 сали бу пьрс дьда (Луԛа 2:46). Де-бавно, зарʹед хwә рʹьнд нас бькьн. Һаш пе һәбьн кӧ әwана чь дьфькьрьн, чь дьле wанда йә, у бона чь хәмгин дьбьн. Нәфькьрьн кӧ һәрге әwана тенә сәр щьвате у дәрдькʹәвьнә хьзмәтийе, әw те һʹәсабе кӧ баwәрийа wан һәйә. Һәр рʹож чахе һун тʹәвайи тьштәки дькьн, дәрһәԛа Йаһоwа тʹәви wан хәбәрдьн. Дӧа бькьн бона зарʹед хwә, у тʹәви wан жи дӧа бькьн. Һаш пе һәбьн кӧ әwана рʹасти чь щерʹьбандьна тен, у али wан бькьн кӧ wан щерʹьбандьнада амьн бьминьн. w16.09 5:3-5

Иро бь һʹәзара Шәʹдед Йаһоwа пʹехәмбәртийе тиньн сери бь wе йәке, кӧ «һʹәму мьләта, бәрәка, зьмана» у щьмәʹтарʹа мьзгинийе бәла дькьн (Әʹйан. 14:6). Гәләк хушк-бьред мә зьмане тʹәзә һин дьбьн сәва мьзгинийе бәла кьн. Дьбәкә һун жи зьмане хәриб һин дьбьн, йан ча мисйонер хьзмәт дькьн, йан хьзмәт дькьн wәлате хәрибда кʹидәре кӧ һʹәwщәти һәйә, йан дәрбази щьвата тʹәзә бунә, кʹижан кӧ нә сәр зьмане wә йә. Һʹәму хьзмәткʹаред Хwәде, гәрәке мьԛати рʹӧһʹанийа хwә у малбәта хwә бьн, чьмки әw гәләк фәрз ә. Щара, һаԛас шьхӧле мә һәнә, кӧ мәрʹа чәтьн ә wәʹдә бьвиньн сәва һинбуна шәхси дәрбаз кьн. Ле әwед кӧ дәшта зьманәки дьнда хьзмәт дькьн, рʹасти чәтьнайед дьн жи тен. Мәсәлә, әw хушк-бьра хенщи кӧ зьмане тʹәзә һин бьн, ӧса жи гәрәке тʹьме леколин бькьн у кʹур пебьһʹәсьн нет-мәрәмед Хwәде (1 Корн. 2:10). w16.10 2:1-3

Шәʹдед Йаһоwа wәʹде пәйкʹәтьна жи бәрдәwам дькьн бь шабуне Хwәдерʹа хьзмәт дькьн. Мәсәлә, гәләк жь wан, Әритрейа, Сингапур, у Корейа Башуреда кәледа ньн, чьмки тʹәвнәбуйине хwәй дькьн у «шур» һьлнадьн дәсте хwә. Гәләк хушк-бьред мә дьбәкә рʹасти wан зерандьна нәһатьнә, ле баwәрийа wан бь щурʹәки майин те щерʹьбандьне. Гәләк тәли-тәнгийада ньн жь бо кʹәсиббуне, шәрʹа, йан жь бо хәзаба. Һьнәк жи, мина Муса у пʹехәмбәред дьн, нәкʹәтьнә һʹәйра наве хwә. Әwана мина ве дьнйайе ниньн, кӧ пәй һәбуне кәвьн у тʹәне сәва хwә бьфькьрьн. Ле гәло чь али wан дькә кӧ әwана амьн дьминьн Хwәдерʹа? Әwана Йаһоwа гәләк һʹьз дькьн. Әwана ԛайим баwәрийа хwә созед wи тиньн, кӧ әw wе һʹәму хьрабийе кʹӧта кә у дьнйа тʹәзәда wе жийина һʹәта-һʹәтайе бьдә хьзмәткʹаред хwәйи амьн (Зәб. 37:5, 7, 9, 29). w16.10 3:15, 16

Чахе тьрс кʹәтә дьле Йерәмийа у әw дьлтәнг бу, Йаһоwа әw ԛәwи кьр у шьданд (Йерәм. 1:6-10). Бьдьнә бәр чʹәʹве хwә, кӧ Данийел пʹехәмбәр ԛәwатәкә ча станд чахе Хwәде мьлийакʹәт шанд сәва wи ԛәwи кә, у wирʹа гот кӧ әw йәки гәләк ԛимәт ә (Дан. 10:8, 11, 18, 19). Һун жи дькарьн дьл бьдьнә хушк-бьра, пешәнга, у хушк-бьред әʹмьрда мәзьн, йед кӧ сьст бунә. Йаһоwа у Иса гәләк wәхт сәр әʹзмана тʹәвайи бун, ле чахе Иса сәр әʹрде бу, Йаһоwа нәдьфькьри wәки нәлазьм ә пʹайе wи бьдә у дьл бьдә wи. Дәwсе Йаһоwа дӧ щара жь әʹзмана Исарʹа гот: «Әв  ә Кӧрʹе мьни дәлал, кӧ әз жь wи рʹази мә» (Мәт. 3:17; 17:5). Бь wан гьлийа Хwәде пʹайе Иса да у жерʹа да кʹьфше кӧ wирʹа фьрнаԛ дьбә. Ӧса жи, чахе Иса шәва пешийа мьрьна хwә нав щәфайе гьранда бу, Йаһоwа мьлйакʹәте хwә шанд сәва Иса ԛәwи кә у дьлбинийе бьдә wи (Луԛа 22:43). w16.11 1:7, 8

Чахе кәсәк дьле мә дешинә йан нәһәԛийе мә дькә, чәтьн ә хwә бьгьрьн кӧ һерс нәкʹәвьн у нәхәйидьн. Дьле мә дешә чахе мәрьв һьндава мә нәбаш ьн, сәва ве йәке кӧ әм нә жь мьләте wан ьн, йан жи рʹува нә мина wан ьн. Ле гәләк чәтьн ә, чахе әw мәрьве кӧ дьле мә дешинә, хушк йан бьре мә йә! Кʹьтеба Пироз мә ширәт дькә wәки әм һерсе бьтәмьриньн у дьлмайи нәминьн (Мәтʹлк. 16:32). Бәле әм гьшк гәрәке сәр хwә бьхәбьтьн wәки зу нәхәйидьн у һәвдӧ бьбахшиньн. Йаһоwа у Иса һʹәсаб дькьн wәки бахшандьн гәләк фәрз ә, чьмки һәрге әм нәбахшиньнә йед дьн Хwәде жи wе нәбахшинә мә (Мәт. 6:14, 15). Ле дәрһәԛа хwә тӧ чь дькари бежи, тӧ дькари һерса хwә бьтәмьрини у бьбахшини йед дьн? Мәрьвед кӧ хәйде жь дьле хwә дәрнахьн, гәләк щар ӧса дьбә кӧ әwана һерс дьбьн у кʹине дажон. У ахьрийеда мәрьвед дьн wе хwә дури wан бьгьрьн. Мәрьве ӧса дькарә сәр щьвате хьраб һʹӧкӧм кә (Ԛан. Кʹаһ. 19:17, 18). w16.11 3:4-6

Хьлазийа ԛьрʹна 19-да, Чарлз Теиз Рассел у һьнә һәвалед wи дәстпекьрьн Кʹьтеба Пироз леколин бькьн, чьмки дьхwастьн рʹастийа Кʹьтеба Пироз пебьһʹәсьн. Пешийе Рассел бьра, дьхwәст кӧ леколин бькә у тедәрхә, һәла кʹижан рʹелигийа рʹастийе һин дькә. Әwи һинкьрьнед щурʹә-щурʹә рʹелигийа, һур бь һур бәрамбәри һинкьрьнед Кʹьтеба Пироз дькьр. Зутьрәке әwи фәʹм кьр, wәки тʹӧ рʹелигийа бь тʹәмами һинкьрьнед Кʹьтеба Пироз һин нәдькьрьн. Щарәке, Рассел рʹасти һьнә сәрwеред дера һат. Әw баwәр бу wәки әwана wе ԛәбул кьн рʹастийед жь Кʹьтеба Пироз, кʹижан кӧ әw тʹәви һәвалед хwә дитьн, у кӧ әwана дәрһәԛа wан рʹастийа мәрьва дерада һин кьн. Ле сәрwеред дера гӧһ нәдьданә wи. Леколинкʹаред Кʹьтеба Пироз фәʹм кьрьн wәки әwана нькарьн Хwәдерʹа хьзмәт кьн тʹәви wан мәрьва, йед кӧ пьштгьрийа рʹелигийа ԛәлп дькьн. w16.11 4:14

Ԛәнщийа нәһежа жь Хwәде мә һелан дькә, wәки әм гӧнед гьран нәкьн, ча ԛави, сәрхwәши, йан диса йед дьн (1 Корн. 6:9-11). Бәʹса хәбәре, әм нә кӧ тʹәне хwә жь бенамусийе хwәй дькьн, ле әм ӧса жи тьштед ӧса накьн кӧ гьредайинә тʹәви бенамусийе, мәсәлә wәʹдәдәрбазкьрьна нәщайиз. Ӧса жи әм нә кӧ тʹәне хwә хwәй дькьн жь сәрхwәшийе, ле әм һаԛас вәнахwьн, кӧ һьндьк дьминә сәрхwәш бьн. Бәле, һеса нинә мьԛабьли wан тьштед нәрʹаст һәрʹьн, ле йәкә әм дькарьн. Нета мә гәрәке әw бә, wәки ча гӧнед гьран, ӧса жи гӧнед сьвьк нәкьн. Ле әм гӧнәкʹар ьн у нькарьн хwә жь һʹәму гӧна хwәй кьн. Әм гәрәке мина Паwлос, һʹәму тьшти бькьн сәва кӧ мьԛабьли гӧнә шәрʹ кьн. Паwлос бьрарʹа гот: «Бьра иди гӧнә һʹӧкӧми сәр ԛальбе wәйи пʹучʹи-мьри нәкә, кӧ һун гӧрʹа хwәстьнед wи бькьн» (Рʹом. 6:12; 7:18-20). w16.12 1:16, 19-21

Иса соз да wәки чахе әм жь Баве мәйи әʹзмана рʹӧһʹе пироз бьхwазьн, әw wе әʹсә бьдә мә (Луԛа 11:10-13). Әw һʹӧнӧред кӧ бь рʹӧһʹе Хwәдейи пироз пешда тен, рʹьнд әʹйан дькьн wәки Хwәдейе Һьмзор йәки ча нә (Колс. 3:10). Һәрге әм әwан һʹӧнӧра пешда биньн, һәләԛәтийа мә тʹәви мәрьва wе баш бә. Демәк әме һе кем рʹасти wан дәрәща бен, кʹижан кӧ дькарьн мә дьлтәнг кьн у дьле мә бешиньн. Мьлукти ӧса жи мәрʹа лазьм ә, сәва кӧ әм итʹбарийа хwә «дәсте Хwәдейи зор» биньн у «һʹәму хәмед хwә бавежьнә сәр wи» (1 Пәт. 5:6, 7). Һәрге һун мьлук ьн, Йаһоwа wе әʹсә али wә бькә у чʹәʹве wи wе сәр wә бә (Мих. 6:8). У чахе һун фәʹм дькьн wәки һʹәму тьшт дәсте wәда нинә, һуне итʹбарийа хwә Хwәде биньн у баре хwә бьдьнә wи. Әw йәк wе хәмед wә дьһа кем кә. w16.12 3:7, 12

Нӧһ «рʹасти даннасин дькьр», у бь амьни дәрһәԛа диwана Хwәде әʹлам дькьр. Бешьк, әwе йәке али Нӧһ дькьр, wәки баwәрийа хwә ԛәwи хwәй кә. Хенщи хьзмәткьрьне, әwи ӧса жи ԛәwата хwә да хәбате, wәки бь рʹебәрийа Йаһоwа гәмийе ава кә (Ибрн. 11:7). Әм жи мина Нӧһ дькарьн ӧса бькьн, wәки «шьхӧле Хӧданда пешда һәрʹьн» (1 Корн. 15:58). Мәсәлә, әм дькарьн аликʹарийе бьдьн бона авакьрьн у хwәйкьрьна Одед Щьвата у Одед Щьвата мәзьн. Ӧса жи бь рʹәзәдьли сәр щьвата мәзьн кʹомәке бьдьн, йан Бәйтʹәледа хьзмәт кьн, йан жи офисед wәлгәрʹандьнеда кӧ нә филиалада ньн. Ле йа лапә фәрз әw ә, wәки әм хирәт бьн бәлакьрьна мьзгинийеда, у әм заньн wәки ӧса әм баwәрийа хwә һьндава ахьрийе ԛәwи хwәй дькьн. Бәле, хьзмәткьрьн али мә дькә, wәки бәрдәwам кьн ләщмәйданеда бьрʹәвьн wәки жийине бьстиньн (1 Корн. 9:24). w17.01 1:8, 9

Әм гәрәке ԛәдьре бьжартьна мәрьва бьгьрьн, чьмки азайа wан жи һәйә. Демәк һʹәму Мәсиһи мина һәв сафикьрьна накьн. Сафикьрьнед Мәсиһийа дькарьн һәла һе щӧдә бьн һьндава рʹабун-рʹуньштьне у хьзмәтийе жи. Чахе әм фәʹм дькьн wәки һәр Мәсиһи щабдар ә сәва сафикьрьнед хwә, wи чахи әме ԛәдьре азайа бьжартьна wан бьгьрʹьн илаһи чахе хушк-бьра тьштед нәфәрз сафи дькьн, гәрәке ԛәдьре сафикьрьнед wан бьгьрьн (1 Корн. 10:32, 33). Йаһоwа азайа бьжартьне ча пʹешкʹеш дайә мә (2 Корн. 3:17). Әм гәләк ԛимәт дькьн әве пʹешкʹеше, чьмки бь сайа ве әм дькарьн сафикьрьнед ӧса бькьн, кʹижан кӧ дьдьнә кʹьфше кӧ әм Йаһоwа һʹьз дькьн. Wәрә әм тʹьме рʹази бьн сәва ве пʹешкʹеше, у бьдьнә хәбате сәва Хwәде рʹумәт кьн у ԛәдьре бьжартьн у сафикьрьнед мәрьва бьгьрьн. w17.01 2:15, 17, 18

Чахе әм мьлук ьн, һьнге әм дькарьн дьле мәрьва бькʹьрʹьн, нә кӧ һәрге әм хwә ԛӧрʹә кьн йан пʹайе хwә бьдьн (1 Пәт. 3:3, 4; Йерәм. 9:23, 24). Чь жи әм дьле хwәда дәрһәԛа хwә дьфькьрьн, әw wе әʹйан бә бь кьред мә. Мәсәлә, әм дькарьн хwә ӧса бьдьн кʹьфше, wәки әм шьхӧләки мәхсус дькьн, йан wәки әм тьштәки конфиденсийал заньн, йан жи әм рʹьнд нас дькьн бьред щабдар. Йан жи дьбәкә әм хwә ԛӧрʹә дькьн кӧ мә хwәха шьхӧләки мәзьн кьрийә, ле бь рʹастийе мәрьвед дьн жи али мә кьрьнә. Ле wәрә әм дина хwә бьдьнә сәр мәсәла Иса. Иса тʹӧ щар хwә нишан нәдькьр wәки әw чьԛас аԛьл у билан ә. Әwи тʹьме гьлийед жь Хәбәра Хwәде дьгот, чьмки әwи нәдьхwаст, wәки мәрьв wи рʹумәт кьн. Нета wи әw бу, wәки гьшк бьзаньбьн гьлийед wи жь Йаһоwа нә у wәки мәрьв Хwәде рʹумәт кьн. w17.01 4:12

Әw ԛанун зәлал бу бона Адәм у Һеwайе, у нә жи гьран бу сәва гӧрʹа Хwәде бькьн, чьмки хwарьн тʹер-тʹьжә һәбу. Шәйтʹан Мире-щьна мәʹр да хәбате у Һеwа хальфанд, wәки әw гӧрʹа Баве хwә Йаһоwа нәкә (Дәстп. 3:1-5; Әʹйан. 12:9). Һьн жи, Шәйтʹан шәрʹ авитә Хwәде, wәки йанчь нә кӧ тʹәне жь дарәке гәрәке нәхwьн, ле «жь һʹәму даред бахчә». Готьна Шәйтʹан кʹижан әwи готә Һеwайе, ӧса дәрдькʹәт: «Тӧ нькари әwе йәке бьки чь кӧ дьле тә дьхwазә?» Паше, әwи дәрәwәкә һе мәзьн кьр: «Һун тʹӧ щар намьрьн». Паше жи, әwи Һеwа да баwәркьрьне кӧ нәлазьм ә гӧһ бьдьнә Хwәде, у жерʹа гот: «Хwәде занә, wе рʹожа гава һун жь wе бьхwьн, чʹәʹвед wәйе вәбьн». Бь ве йәке Шәйтʹан дьхwәст бьгота, wәки Йаһоwа нәдьхwәст кӧ әwана бәре ве даре бьхwьн, чьмки йанчь wана wе занәбуна мәхсус бьстандана. Хенщи ве йәке, Шәйтʹан созе ԛәлп да wан: «Һун . . . бьбьнә мина Хwәде, ԛәнщи у хьрабийе жь һәв дәрхьн». w17.02 1:8, 9

Ишайа жи пешда гот, wәки әw Кәс wе бьбә рʹебәр у сәрок (Иша. 55:4). Данийел жи ньвиси wәки Мәсиһ wе бе, кӧ бьбә рʹебәре щьмәʹта Хwәде (Дан. 9:25). Ахьрийеда, хwәха Иса Мәсиһ хwә әʹйан кьр ча «Рʹебәре» щьмәʹта Хwәде (Мәт. 23:10). Шагьртед Иса бь дьл у щан пәй wи дьчун, у әwана ԛә дӧдьли нәдьбун wәки Йаһоwа wи бьжартийә (Йуһʹн. 6:68, 69). Ле ве йәкеда чь wанрʹа избат дькьр? Чахе Иса дьһатә ньхӧмандьне, Йуһʹәннайе ньхӧмдар дит кӧ чаwа «әʹзман вәбун у рʹӧһʹ мина кәвоткәке ль сәр wи дани» (Марԛ. 1:10-12). Wәʹде хьзмәтийа Иса сәр әʹрде, рʹӧһʹе Хwәдейи пироз ԛәwат дьда wи, wәки әw кʹәрәмәта бькә у мәрьва һин кә (Кʹар. Шанд. 10:38). Һьн жи, Иса бәре рʹӧһʹе пироз дьда кʹьфше, мәсәлә һʹьзкьрьн, шабун, у баwәрийа ԛәwи (Йуһʹн. 15:9; Ибрн. 12:2). Сәр тʹӧ мәрьве кӧ Хwәде кʹьфш кьр чаwа рʹебәр, ӧса әʹйан нәдьһатә кʹьфше wәки Йаһоwа wи бьжартийә, ча сәр Иса дьһатә кʹьфше. w17.02 3:15, 16

Рʹожа Пенщийе Һʹәсабе сала 33 Д.М., шандийа дәстпекьрьн рʹебәрийе щьвата Мәсиһити бькьн. Кʹьтеба Пироз дьбежә, «Пәтрус тʹәви һәр йанздәһа», әʹлаләта мәзьнрʹа, Щьһуйа у нәщьһуйарʹа, дәрһәԛа рʹастийе гьли дькьр (Кʹар. Шанд. 2:14, 15). Гәләк жь wан мәрьва бунә Мәсиһи. У әw Мәсиһийед тʹәзә «хwә ль һинкьрьна шандийа дьгьрт, ль һәв дьщьвийан» (Кʹар. Шанд. 2:42). Шанди ӧса жи щабдар бун бона пʹәре щьвате (Кʹар. Шанд. 4:34, 35). Әwана ӧса жи рʹӧһʹанида мьԛати щьмәʹта Хwәде бун. Wана дьгот: «Әме хwә бьдьнә дӧа у даннасинийа хәбәре» (Кʹар. Шанд. 6:4). Хенщи ве йәке, wана Мәсиһийед щерʹьбанди дьшандьн щийед дьн, сәва мьзгинийе бәла кьн (Кʹар. Шанд. 8:14, 15). Wәʹдә дәрбаз бу, паше рʹуспийед кӧ бь рʹӧһʹе пироз бьжарти бун, тʹәви шандийа рʹебәри щьвата дькьрьн. У чаwа кʹома рʹебәрийе wана рʹебәри һʹәму щьвата дькьрьн (Кʹар. Шанд. 15:2). w17.02 4:4

Ве дьнйа Шәйтʹанда мәрьв гәләк бьльнд һӧрмәт дькьн мәрьвед дьн. Ле дәwсе ԛәдьре мәрьва бьгьрьн әw ида бәс ә. Иро мәрьв сәрwеред рʹелигийа у политика, спортсменед навдар, артиста у мәрьвед нав у дәнг, рʹумәт дькьн у хwәрʹа дькьнә хӧдан. У ләма жи әwана дьхwазьн мина wан бьн, у чʹәʹв дьдьнә wана хәйсәт-һʹӧнӧрада, кʹьнщхwәкьрьнеда у рʹабун-рʹуньштьнеда. Мәсиһийед рʹаст бь wи щурʹәйи мәрьва һӧрмәт накьн. Жь һʹәму мәрьва кӧ сәр әʹрде дьжитьн, тʹәне Иса мәсәләкә һәри баш һишт кӧ лазьм ә әм чʹәʹв бьдьне (1 Пәт. 2:21). Хwәде нахwазә wәки әм мәрьва ӧса һӧрмәт-рʹумәт бькьн, чаwа кӧ wанрʹа накʹәвә. Әм гәрәке бир нәкьн әве рʹастийе: «Һʹәмуйа гӧнә кьр у нәгьһиштьнә рʹумәта Хwәде» (Рʹом. 3:23). Бь рʹастийе тʹӧ мәрьв һежайи һʹәбандьне нинә, чьмки гәрәке тʹәне Хwәде бьһʹәбиньн. w17.03 1:6-8

Һәр кәс жь мә дькарә хwә бьщерʹьбинә, һәла дьле мә бь тʹәмами Йаһоwарʹа амьн ә йан на. Мәсәлә, пьрсед ӧса бьдьнә хwә: «Гәло әз тʹьме гӧрʹа Йаһоwа дькьм? Гәло әз чь дькьм сәва һʹәбандьна рʹаст у рʹӧһʹанийа щьвате тʹәмьз хwәй кьм?» Мәсәлә, тӧйе чь бьки һәрге мәрьве тәйи незик гәрәке жь щьвате бе дәрхьстьне? Гәло тӧйе диса тʹәви wи мәрьви һәвалтийе бьки? Гәло һьнге дьле тә wе тә бәрбь чь һелан кә? Әм жи мина Аса дьбәкә рʹасти чәтьнайа бен. Мәсәлә, дьԛәwьмә пәй мә кʹәвьн у ӧса бе кʹьфше кӧ те бежи чʹарә тʹӧнә. Ле һәрге әм итʹбарийа хwә Хwәде биньн, әме бьдьнә кʹьфше wәки дьле мә бь тʹәмами тʹәви wи йә. Дьбәкә мәкʹтәбеда wә дькʹәньн, чьмки һун Шәʹдед Йаһоwа нә. Йан жи һәвалхәбатчи ԛәрфе хwә wә дькьн, чьмки һун жь щийе хәбате рʹожед һесабуне (татиле) һьлдьдьн сәва кӧ һәрʹьнә щьвата мәзьн, йан жи чьмки гәләк щар хәбата зедә накьн. Wан дәрәщада чʹәʹв бьдьнә Аса у Хwәдерʹа дӧа бькьн (2 Дир. 14:11). Бәрдәwам кьн тьштед рʹаст бькьн. Бир нәкьн wәки Хwәде Аса ԛәwи кьр у али wи кьр, у Әw wе әʹсә wә жи ԛәwи кә. w17.03 3:6-8

Хәбәра Хwәде ширәте дьдә мә, wәки ләз нәкʹәвьн чахе тьштәки фәрз сафи дькьн. Әме сафикьрьнәкә баш бькьн, һәрге рʹьнд һʹәму тьшти чап кьн у бьпивьн (1 Тʹеслн. 5:21). Чахе малхе мале тьштәки сафи дькә, пешийе әw гәрәке Кʹьтеба Пирозда у әʹдәбйәтада дәрһәԛа ве пьрсе леколин бькә. Ӧса жи малхе мале гәрәке дәрһәԛа ве сафикьрьне тʹәви нәфәред малбәта хwә жи шеwьр кә. Биньн бира хwә wәки Хwәде готә Бьраһим кӧ гӧһдарийа готьна жьна хwә бькә (Дәстп. 21:9-12). Рʹуспи жи гәрәке тʹьме леколина бькьн чахе тьштәки сафи дькьн. Щара ӧса дьԛәwьмә кӧ рʹуспи әʹламәтийа тʹәзә педьһʹәсьн, у дьньһерʹьн һәла лазьм ә сафикьрьна хwә бьгӧһезьн йан на. Рʹуспийед сәрwахт у мьлук wе тʹӧ щар нәфькьрьн, кӧ һәрге әwана сафикьрьна хwә бьгӧһезьн, wе ԛәдьре wан бькʹәвә. Рʹуспи гәрә тʹьме һазьр бьн чахе лазьм ә, ньһерʹандьна хwә у сафикьрьна хwә бьгӧһезьн. Wе баш бә wәки әм жи ве йәкеда чʹәʹв бьдьнә wан, чьмки ӧса wе щьватеда әʹдьлайи у тʹәрбәти һәбә (Кʹар. Шанд. 6:1-4). w17.03 2:16