Чьлә

Иро әм дьжин хьлазийа рʹожед ахьрийеда у әм дьвиньн ԝәки мәрьвед хьраб һе зедә мина «шинайе дьгьһижьн» (Зәб. 92:7). Ләма әʹщебмайи нинә кӧ мәрьв ԛанун у принсипед Хԝәде пьшт гӧһе хԝәва давежьн. Ле гәло ча ве дәрәщеда әм дькарьн «һьндава хьрабийеда мина зарʹа бьн», ле йәкә «һʹьше хԝәда гьһишти бьн»? (1 Корн. 14:20). Щаба ве пьрсе, рʹеза ве рожеда әм дьхуньн, кʹидәре те готьне: «Йе Хӧдан дьгәрʹьн, тʹам фәʹм дькьн». Әԝ те һʹәсабе кӧ әԝана дькарьн һәр тьшти фәʹм кьн чь жи лазьм ә, сәва Йаһоԝа хԝәш бен. Мәтʹәлок 2:7, 9-да жи те готьне, ԝәки Йаһоԝа «бона рʹаста» биланийе хԝәй дькә. У бь сайа ԝе йәке кәсед рʹаст дькарьн «рʹастийе, ԛьраре, һәԛийе» у «сәрда жи һәр шьвәрийед ԛәнщ» фәʹм бькьн. Нӧһ, Данийел у Ибо, мәрьвнә билан бун (Һәзԛл. 14:14). Әԝе йәке әм дькарьн бежьн дәрһәԛа щьмәʹта Хԝәдейә иро жи. Ле хут дәрһәԛа хԝә тӧ дькари бежи, ԝәки «тʹам» фәʹм дьки һәр тьшти чь жи лазьм ә, сәва дьле Йаһоԝа ша ки? Бона ве йәке лазьм ә ԝи рʹьнд нас бьки. w18.02 8 ¶1-3

Әв йәк нәрʹаст ә һәрге кәсәк зоре зарʹа хԝә бькә йан жи тʹәви кʹе һинбуне дәрбаз дькә, ԝәки бе ньхӧмандьне. Йаһоԝа тʹӧ щар зоре мә накә, кӧ әм жерʹа хьзмәт кьн (1 Йуһн. 4:8). Чахе мәрьва һин дькьн, әм гәрәке ԝанрʹа нишан кьн кӧ гәләк фәрз ә әԝана һәләԛәтийа хԝәйә шәхси тʹәви Йаһоԝа ԛәԝи кьн. Паше, чахе әԝ кәс рʹастийа дәрһәԛа Хԝәде ԛимәт кә у бьхԝазә әԝан борщдарийа бинә сери, кʹижан кӧ лазьм ьн сәва бьбә Мәсиһи, әԝе һелан бә бе ньхӧмандьне (2 Корн. 5:14, 15). Сәва мәрьв бе ньхӧмандьне, ԛанун тʹӧнә кӧ әԝ гәрәке чәнд сали бә. Һәр мәрьв щурʹәки йә, һьнәк зу рʹӧһʹанида пешда дьчьн һьнәк жи һеди-һеди. Рʹожа ньхӧмандьне, рʹожәкә шабуне йә. Ле ве рʹоже ӧса жи мәрьв гәрәке кʹур бьфькьрә дәрһәԛа борщдарийед хԝә чаԝа Мәсиһи, чьмки һеса нинә мәрьв һʹәму дәʹԝакьрьна бинә сери, кʹижан кӧ Мәсиһи гәрәке бькьн. Ләма жи Иса борщдарийа Мәсиһити бәрамбәри нир кьр. Шагьртед Иса гәрәке бьжин «иди нә жь бо хԝә, ле бәле жь бо ԝи, йе кӧ жь бо ԝан мьр у һат рʹакьрьн» (2 Корн. 5:15; Мәт. 16:24). w18.03 6-7 ¶14-17

Ԛә ӧса ԛәԝьмийә кӧ ԝә хԝә паш хьстийә гази мевана кьн? Һәрге әре, дьбәкә ԝә әԝ мәщал бәрʹда кӧ ԝәʹде хԝәш дәрбаз кьн у һәвалед баш ԛазанщ кьн. Бь рʹасти чахе әм меванһʹьз ьн, әԝ ча дәрман ә мьԛабьли ве йәке чахе хԝә тʹәне тʹәхмин дькьн. Ле гәло чьрʹа һьнәк хԝә дьгьрьн кӧ гази мевана кьн? Ԝәрә әм чәнд мәнийа шеԝьр кьн. Мәʹник әԝ ә, кӧ хьзмәткʹаред Йаһоԝа бәтал ниньн у гәләк щабдарийед ԝан һәнә. Ләма жи һьнәк дьфькьрьн кӧ бона меванһʹьзийе ԝәʹдә у ԛәԝата ԝан тʹӧнә. Һәрге һун ӧса дьфькьрьн, дьԛәԝьмә ԝәрʹа лазьм ә тьштәки бьгӧһезьн сәва ԝәʹде ԝә бьминә кӧ гази мевана кьн, йан жи хԝәха меванти һәрʹьн. Әԝ йәк фәрз ә, чьмки Кʹьтеба Пироз мәрʹа дьбежә, ԝәки әм гәрәке меванһʹьз бьн. Демәк меванһʹьзи әԝ тьштәки рʹаст ә, ләма жи сәва ве йәке дьбәкә лазьм ә тьштед нәфәрз бьдьнә алики. w18.03 16 ¶13-14

Гәло кʹе йә мәсәла лапә мәзьн алийе рʹӧһʹанида? Әԝ һәйә Иса! Әԝи тʹәмамийа әʹмьре хԝәда у хьзмәтийеда избат кьр, ԝәки дьхԝазә бь тʹәмами чʹәʹв бьдә Баве хԝә Йаһоԝа. Әԝи һәр тьштида, мәсәлә хәбәрданеда, фькьр у кьред хԝәда чʹәʹв дьда Йаһоԝа. Әԝи ль гора ԛьрар у принсипед Хԝәде дьжит (Йуһʹн. 8:29; 14:9; 15:10). Бәса хәбәре, дина хԝә бьдьне кʹьтеба Ишайада ча дьлшәԝатийа Йаһоԝа те кʹьфше, у бәрамбәр кьн кӧ кʹьтеба Марԛосда ча дьлшәԝатийа Иса те кʹьфше (Иша. 63:9; Марԛ. 6:34). Ле гәло әм чʹәʹв дьдьнә Иса, у тʹьме һазьр ьн дьлшәԝат бьн һьндава мәрьвед кӧ һʹәԝще ве йәке нә? Иса ӧса жи ԝәʹде хԝә у ԛәԝата хԝә бь тʹәмами хәрщ дькьр сәр шьхӧле бәлакьрьна мьзгинийе. Әԝ һʹәму хәйсәт-һʹӧнӧр у кьред ԝи, нишан дькьн кӧ әԝ йәки рʹӧһʹани бу. w18.02 21 ¶12

Ве дьнйа хьрабда һеса нинә зарʹед хԝә мәзьн кьн (2 Тимтʹ. 3:1-5). Зарʹ жь буйина хԝә рʹасти у хьрабийе жь һәв дәрнахьн, у исафа ԝан жи һинкьри нинә (Рʹом. 2:14, 15). Зандарәки Кʹьтеба Пироз шьровәкьр, ԝәки хәбәра Йунани кӧ те ԝәлгәрʹандьне «ширәткьрьн», дькарә ӧса жи бе һʹәсабе «мәзьнкьрьна зарʹа». Зарʹед кӧ бь һʹьзкьрьне тенә ширәткьрьне, хԝә хԝәйкьри тʹәхмин дькьн. Әԝана педьһʹәсьн кӧ азайеда синор һәнә, у кӧ һәр сафикьрьн у рʹабун-рʹуньштьн, йан ахьрийа баш йан жи ахьрийа хьраб тинә. Ләма жи гәләк фәрз ә, кӧ де-бав мәзьнкьрьна зарʹада рʹебәрийа Йаһоԝа бьгәрʹьн. Әʹйд-ԛәйдед мәзьнкьрьна зарʹада щурʹә-щурʹә ԝәлатада щурʹә-щурʹә йә. Ле де-бавед кӧ гӧһ дьдьнә Хԝәде, гәләк бәрхԝә накʹәвьн кӧ чаԝа зарʹед хԝә мәзьн кьн у ве пьрседа чʹәʹв надьнә биланийа ве дьнйайе. w18.03 30 ¶8-9

Чаԝа Мәсиһийе ньхӧманди у щаһьл, тӧ хԝәха бона хьлазбуна хԝә щабдар и, һәрге жи тӧ һе тʹәви де-баве хԝә дьжийи. Чьрʹа фәрз ә ве йәке бир нәки? Чьмки тӧйе рʹасти щерʹьбандьнед тʹәзә бейи. Ԛизькәкә щаһьл әв йәк ӧса шьровәкьр: «Һәрге зарʹ мәкʹтәбеда кәри тотька кӧ бона рʹожа буйине йә, нәхԝә, әԝ ԝе бина хԝә тәнг нәкә кӧ әԝ Шәʹде Йаһоԝа йә у ләма нахԝә. Ле паши чәнд сала чахе әԝ мәзьн дьбә у хԝәстьна сексуали ԛәԝи дьбә, һьнге әԝ гәрәке ԛә дӧдьли нәбә, ԝәки сафикьрьна лапә баш әԝ ә, кӧ гӧрʹа ԛанунед Йаһоԝа бькә». Йед мәзьн жи кӧ һатьнә ньхӧмандьне, рʹасти щерʹьбандьнед ӧса һатьнә кӧ нә жи һивийе бун. Бәʹса хәбәре, рʹасти чәтьнайед зәԝащеда тен, проблемед сьһʹәт-ԛәԝатева гьредайи, йан жи хәбатеда. Әм чәнд сали бьн жи, йәкә әме рʹасти чәтьнайа бен, кʹидәреда ԝе лазьм бә амьнийа хԝә Йаһоԝарʹа хԝәй кьн (Аԛуб 1:12-14). w17.12 24 ¶4-5

Һьнә мәрьв кʹәтьнә һʹале мина йа Даԝьд. Ле Даԝьд кӧ һәвале Хԝәде бу, изьн нәда хԝә кӧ бьбә йәки зӧлм у хԝә жь Хԝәде бьԛәтинә. Ле дәԝсе әԝи ньвиси: «Һерс нәкәвә, нәԛьлԛьлә, бинтәнг нәбә кӧ хьрабийе бьки» (Зәб. 37:8). Мәʹнийа лапә мәзьн кӧ чьрʹа әм гәрәке «һерс» нәкʹәвьн, әԝ ә кӧ әм чʹәʹв дьдьнә Йаһоԝа, йе кӧ «ԝәкә гӧнәйед мә, сәре мә накә» (Зәб. 103:10). Һерсбун дькарә сьһʹәт-ԛәԝата мә хьраб кә, мәсәлә, тансийона хуне дькарә бьльнд бә у проблемед бинкʹьшандьнева гьредайи пешда бен. Ӧса жи әԝ хьраб һʹӧкӧм дькә сәр щәгәре у щийе мәһандьна хԝарьне. Чахе әм һерс ьн, әм тʹәвһәв дьбьн у гәләк щар рʹаст нафькьрьн. У чахе һерса мә дьреж дькʹьшинә, әм дькарьн сәр гәләк ԝәхт бькʹәвьнә депресийе. Һе баш ә һәрге әм һерсе хԝәй нәкьн, чьмки әԝ йәк бона кʹара мә йә. Кʹьтеба Пироз дьбежә кӧ «дьле рʹьһʹәт жийина бәдәне йә» (Мәтʹлк. 14:30). Ле гәло чаԝа әм дькарьн чәтьнайи ортʹа хушк йан бьра сафи кьн у ль һәв бен? Әм гәрәке ширәтед Кʹьтеба Пироз бьдьнә хәбате. w18.01 10 ¶14-15

Бь ԝан гьлийа Даԝьд нәдьхԝәст бьгота кӧ әԝ ԝе тʹӧ щар нәмьрә йан жи тʹӧ щар нәкʹәвә горʹе. Хәбәра Хԝәде зәлал дьбежә кӧ Даԝьд кал бу, у чахе әԝ мьр, «бь бапиред хԝәрʹа рʹакәт у ль бажаре һатә бьнәʹрд кьрьн [чʹәʹлкьрьне]» (1 Пʹадш. 2:1, 10). Һәрге Даԝьд мьр у һатә чʹәʹлкьрьне, ԝәки ӧса нә әв рʹез дәрһәԛа кʹе йә? Паши чәнд һʹәфтийа мьрьн у сахкьрьна Иса, Пәтрус шьровәкьр кӧ Зәбура 16:10-да дәрһәԛа кʹе дьһатә готьне. Һьнә ԝәʹдә шунда паши рʹабуна Иса жь мьрьне, Пәтрус тʹәви бь һʹәзара Щьһуйа у прозелита хәбәр дьда (Кʹар. Шанд. 2:29-32). Әԝи готә ԝан, ԝәки Даԝьд бь рʹастийе мьрьбу у ԝи чʹәʹл кьрьбун. Әԝед кӧ гӧһе хԝә дабунә Пәтрус, һаш ԝе йәке һәбун. Ӧса жи чахе Пәтрус гот ԝәки Даԝьд «әв йәк һе пешда дит у бона рʹабуна Мәсиһ гот», Кʹьтеба Пирозда найе готьне кӧ кәсәк тʹәви ԝи ԛайил нибу. Пәтрус гьлийед хԝә избат кьр бь рʹеза жь Зәбур 110:1 (Кʹар. Шанд. 2:33-36). Шьровәкьрьна Пәтрус, әʹлаләтәкә мәзьн да баԝәркьрьне, кӧ Иса «һьн . . . Хӧдан, һьн жи Мәсиһ» бу. Щьмәʹте фәʹм кьр кӧ пʹехәмбәртийа жь Зәбур 16:10, һатә сери чахе Иса жь мьрьне рʹабу. w17.12 10 ¶10-12

Әԝ йәк кӧ чаԝа Кʹома Рʹебәрийе пʹәре тʹәшкиләте хәрщ дькә, амьни у сәрԝахти дьдә кʹьфше (Мәт. 24:45). Әԝана дӧа дькьн, ԝәки ԝан пʹәра кӧ тенә ԛӧрбанкьрьне рʹаст хәрщ кьн (Луԛа 14:28). Ԛьрʹна йәкеда, Паԝлосе шанди пʹәрә тʹоп кьр, ԝәки аликʹари бьдә хушк-бьред Щьһустанеда. Әԝи алийе хԝәда һәр тьшт кьр сәва әԝ пʹәрә рʹаст бе хәрщкьрьне, «нә кӧ тʹәне ль бәр Хӧдан, ле ль бәр мәрьва жи» (2 Корн. 8:18-21). Иро жи тʹәшкиләта мә чʹәʹв дьдә Әзра у Паԝлосе шанди ве йәкеда, кӧ рʹаст у бь аԛьлайи ԛӧрбанкьрьна хәрщ дькә (Әзр. 8:24-33). Салед пашԝәхтийеда, һәбун гәләк проектед тʹәзә. Ләма жи тʹәшкиләт һәр тьшти дькә, ԝәки хәрщ дьһа кем бьн у хәбат жи сьвьк бә. Бь ԝи щурʹәйи пе пʹәре ԝәйи ԛӧрбанкьри кӧ һун бь мәрʹданийе дьдьн, һе зедә шьхӧл те кьрьне. w18.01 19-20 ¶12-13

Һʹьзкьрьн у ԛәнщи дькарә али мә бькә кӧ бьбахшиньнә һәв. Мәсәлә, һәрге хушк йан бьрак пе гьли йан кьред хԝә дьле мә ешандийә, һьнге әм дькарьн бьфькьрьн кӧ мә жи гәләк щар пе гьли у кьред хԝә мәрьв данә хәйдандьне у ԝана бахшандийә мә. Әм чьԛас рʹази нә бона һʹьзкьрьн у ԛәнщийа ԝан, кӧ ԝана чʹәʹвед хԝә даданә сәр шашийед мә! (Ԝаиз 7:21, 22). Илаһи әм чьԛас рʹази нә бона ԛәнщийа Иса, кӧ әԝ мә дькә йәктийе. Әм гьшк Хԝәдеки һʹьз дькьн, мьзгиники бәла дькьн, у гәләк чәтьнайед мә мина һәв ьн. Чахе әм пе һʹьзкьрьне бь дьл у щан дьбахшиньнә һәв, нав щьватеда тʹьфаԛи дьминә у әм чʹәʹве хԝә сәр хәлате һьлнадьн. Һʹәвсуди дькарә рʹе мә бьгьрә кӧ хәлате бьстиньн. Сәрһатийед Кʹьтеба Пироз нишан дькьн кӧ әв хәйсәтәкә хоф ә. Мәсәлә, Ԛайин жь һʹәвсудийе бьре хԝә Һабил кӧшт. Ԛорах, Датʹан, у Абирам һʹәвсуди Муса кьрьн у мьԛабьли ԝи рʹабун. Шаԝул Пʹадша жи һʹәвсуди Даԝьд дькьр, чьмки әв пешда дьчу, у дьхԝәст ԝи бькӧжә. w17.11 27 ¶9-10

Чахе рʹуспи комитейа диԝанкьрьнеда хьзмәт дькьн, әԝана гәрәке фәсал бьн у тедәрхьн һәла әԝ Мәсиһи кӧ гӧне гьран кьрийә бь растийе гӧне хԝә тинә рʹуйе хԝә йан на. Ле һеса нинә ве йәке тедәрхьн. Тʹобәкьрьна рʹаст те һʹәсабе кӧ мәрьв ча дьньһерʹә у чь дьфькьрә дәрһәԛа кьре хԝә у дьле ԝида чь йә (Әʹйан. 3:3). Мәсиһийе кӧ гӧнә кьрийә, гәрәке һʹәлал тʹобә бькә сәва алийе Хԝәдеда бе бахшандьне. Йаһоԝа у Иса дьлед мәрьва дьвиньн, ле рʹуспи нькарьн дьла бьвиньн. Һәрге һун рʹуспи нә, һун ча дькарьн тедәрхьн кʹе бь рʹастийе тʹобә дькә? Пешийе, бона биланийе у фәʹмкʹарийе Йаһоԝарʹа дӧа бькьн (1 Падш. 3:9). Йа дӧда, Хәбәра Хԝәде у әʹдәбйәтед жь хӧламе амьн, леколин бькьн, сәва тедәрхьн «бәрхԝәкʹәтьна жь ве дьнйайе» у «бәрхԝәкʹәтьна ль гора хԝәстьна Хԝәде», демәк тʹобәкьрьна һʹәлал (2 Корн. 7:10, 11). Дина хԝә бьдьн кӧ Кʹьтеба Пироз ча әʹйан дькә ԝан мәрьва йед кӧ бь рʹастийе гӧнед хԝә тиньн рʹуйе хԝә у йед кӧ ԛәлп тʹобә дькьн. Бьфькьрьн кӧ Кʹьтеба Пироз ча фькьр, ньһерʹандьн у рʹабун-рʹуньштьна ԝан әʹйан дькә. w17.11 17 ¶16-17

Әв йәк ӧса бәлабуйи йә иро, ԝәки һәла һе кʹьтебада, филмада, у телевисйонеда жи бәрбь нәгӧһдарийе һелан дькьн. Нәгӧһдарибун малбәте сьст дькә, һәләԛәтийа ортʹа нәфәра сар дькә, у хьраб һʹӧкӧм дькә сәр тʹьфаԛийа ортʹа мәрьва. Мәрьв ве йәке ида бәреда заньн. Мәсәлә, Йунаньстана бәреда һәрге кәсәк де-баве хԝә хьста, ча бажарван изьна ԝи кәси һʹәму тьштида ӧнда дьбу. Ле Рʹомеда һәбу ԛанун кӧ һәрге кәсәк баве хԝә хьста, әԝ бәрамбәри кӧштьне бу, демәк гӧнәки гәләк гьран дьһатә һʹәсабе. Чаԝа Ньвисаред Ибранида ӧса жи Ньвисаред Йунанида тʹәми һәнә кӧ зарʹ гәрәке ԛәдьре де-баве хԝә бьгьрьн (Дәркʹ. 20:12; Әфәс. 6:1-3). Ле гәло ча зарʹ дькарьн чʹәʹв нәдьнә ԝан, йед кӧ нә гӧрʹа де-бавада ньн? Әԝана гәрәке бьфькьрьн кӧ де-бав чь әмәк данә ԝан. Чахе әԝана әмәке де-баве хԝә бьшекьриньн, әԝана ԝе дьһа бьхԝазьн гӧрʹа ԝанда бьн. Зарʹ ӧса жи гәрәке фәʹм бькьн кӧ Хԝәде, Баве һʹәмуйа, жь ԝана дәԝа дькә ԝәки гӧрʹа де-баве хԝәда бьн. Чахе зарʹ дәрһәԛа де-баве хԝә баш хәбәр дьдьн, әԝ йәк ԝе бона щаһьлед дьн бьбә мәсәла баш, кӧ әԝана жи ԛәдьре де-баве хԝә бьгьрьн. w18.01 29 ¶8-9

Иро, һәрге Мәсиһи гӧне гьран кьрийә, әԝ гәрәке һәрә бал рʹуспийа, сәва кӧ әԝана ԝи рʹӧһʹанида ԛәнщ кьн. Гәло чьрʹа әԝ йәк фәрз ә? Йа пешьн, хԝәха Йаһоԝа щабдари да рʹуспийа, ԝәки гӧнед гьран сафи кьн, у Хәбәра ԝи әԝе йәке зәлал дьдә кʹьфше (Аԛуб 5:14-16). Йа дӧда, рʹуспи али ԝи кәси дькьн кӧ диса ԛәбулкьрьна Хԝәде бьстинә у ида гӧнә нәкә (Галт. 6:1; Ибрн. 12:11). Йа сьсийа, рʹуспи щабдар ьн у һинкьри нә, кӧ дьлбинийе бьдьнә ԝан йед кӧ тʹобә дькьн, ԝәки әԝана хԝә нәчәрчьриньн сәва гӧне хԝә у еша ԝан сьвьк бә. Йаһоԝа ԝан рʹуспийа нав дькә ча щи-сьтʹара кӧ «жь байе . . . вәдьшерә» (Иша. 32:2). Бәле, әԝ тʹәми кӧ Йаһоԝа дайә, дьдә кʹьфше ԝәки әԝ ча рʹәʹм ә һьндава мә. Гәләк хьзмәткʹаред Хԝәде дьлрʹьһʹәт бунә чахе незики рʹуспийа бунә у аликʹари жь ԝана хԝәстьнә. w17.11 10 ¶8-9

Рʹаст ә дьле мә дьшәԝьтә гава мәрьве мәйи незик жь щьвате те дәрхьстьне, ле бей мәʹнийа фәрз әм гәрәке тʹәви ԝи хәбәр нәдьн нә пе тʹеле, нә пе нәʹме, йан емаиле у нә жи малпәрада. Ле баԝәрийа хԝә ӧнда нәкьн. Һʹьзкьрьн «һәр гав баԝәр дькә», ләма әм баԝәрийа хԝә ӧнда накьн ԝәки әԝед кӧ Йаһоԝа һиштьнә, диса вәгәрʹьнә бал ԝи (1 Корн. 13:7). Һәрге һун дьвиньн кӧ әԝ мәрьве ԝә те гӧһастьне у ньһерʹандьна хԝә дьгӧһезә, һун дькарьн бона ԝи дӧа бькьн, ԝәки әԝ жь Кʹьтеба Пироз ԛәԝате бьстинә у ԛәбул кә ве тʹәглифкьрьна Йаһоԝа: «Вәгәрʹә [бал] мьн» (Иша. 44:22). Иса гот кӧ һәрге әм мәрьва һе зедә һʹьз кьн нә кӧ ԝи, әм нькарьн бьбьнә шагьртед ԝи. Ле әԝ баԝәр бу кӧ шагьртед ԝи ԝе мерхас бьн у амьн бьминьн, чахе нәфәред ԝан бона рʹастийе пәй ԝан кәвьн. Һәрге рʹастийе «шур» анийә мала ԝә, итʹбарийа хԝә Йаһоԝа биньн кӧ әԝе али ԝә бькә һун сәбьр кьн у ԛәԝи бьминьн (Иша. 41:10, 13). Шабуна хԝә ӧнда нәкьн, чьмки һун заньн кӧ Йаһоԝа у Иса ԝә ԛәбул дькьн, у ԝе бона амьнийа ԝә әʹсә ԝә кʹәрәм кьн. w17.10 16 ¶19-21

Чахе әм дьвиньн кӧ мәрьв чьԛас дьчәрчьрьн жь бо нәхԝәшийа йан жи жь бо кал-пирбуне, гӧне мә ԝана те у әм дьхԝазьн али ԝан бькьн. Бәле, әм гәләк һивийа ԝи ԝәʹдәйи нә, чахе нәхԝәши у кал-пирбун ида тʹӧнә бьн, у әм дӧа дькьн ԝәки Пʹадшатийа Хԝәде бе. Ле һʹәта әԝ ԝәʹдә бе, әм дьхԝазьн чьԛас дәсте мә те аликʹарийе бьдьнә ԝан, йед кӧ һʹәԝщә нә. Дина хԝә бьдьн ԛәԝьмандьнәке кӧ авторәк ньвисийә. Дийа ԝийә әʹмьрда мәзьн, бь нәхԝәшийа Алтсгеймере нәхԝәш бу. Щарәке, әԝе перʹа нәгиһандьбу һәрә дәставе у кʹьнщед хԝә кьрьбу ԛьреж. Чахе әԝе дьхԝәст хԝә тәмьз кә, зәнгьле дәри хьстьн. Әԝ Шәʹдед Йаһоԝа бун, йед кӧ тʹьме дьһатьнә щәм ве жьньке. Хушка жь ԝе пьрсин һәла тьштәкида аликʹари жерʹа лазьм ә. Жьньке ԝанрʹа гот: «Мьнрʹа шәрм ә бежьм, ле әре». Әван дӧ хушка али ԝе кьрьн кӧ хԝә тʹәмьз кә. Паше, ԝана жерʹа чай чекьрьн у тʹәви ԝе хәбәр дьдан. Кӧрʹе жьньке гәләк рʹази бу. Әԝи ньвиси: «Әʹфәрьм ԝан Шәʹдед Йаһоԝарʹа. Әԝана чь һин дькьн, хут ӧса жи дьжин». Ле дьлшәԝати ԝә һелан дькә кӧ чьԛас дькарьн аликʹарийе бьдьнә кал-пира у нәхԝәша? (Фили. 2:3, 4). w17.09 9 ¶5; 12 ¶14

Әм гәрәке бь дьл у щан шьхӧлед баш бона хушк-бьра «дьзива» бькьн, демәк ԝәки тʹӧ кәсирʹа нәйе кʹьфше, у дина ԝана нәкʹьшиньн сәр хԝә (Мәт. 6:1-4). Әм ӧса жи гәрәке ԛәдьре һʹәмуйа бьгьрьн (Рʹом. 12:10). Иса мәсәлә мәрʹа һишт кӧ чаԝа ԛәдьр у һӧрмәте нишан кьн. Әԝи шьхӧлед ӧса дькьр кӧ ньмьз бун (Йуһʹн. 13:3-5, 12-15). Бәле, һеса нинә мьлук у шкәсти бьн, ләма лазьм ә сәр хԝә гәләк бьхәбьтьн, ԝәки ԛәдьр нишан кьн һьндава мәрьва. Пешийа кӧ шандийа рʹӧһʹе пироз бьстандана, ԝана бь тʹәмами фәʹм нәдькьр кӧ чьрʹа Иса әв йәк кьр у ча чʹәʹв бьдьнә ԝи (Йуһʹн. 13:7). Әм дькарьн ԛәдьр нишан кьн һьндава хушк-бьра, һәрге хԝә сәр ԝанрʹа нәгьрьн. Бәʹса хәбәре, һәрге мә хԝәндьна бьльнд стандийә, йан әм дәԝләти нә, йан жи щьватеда щабдарийед мә һәнә, әм бәр ԝан хԝә ԛӧрʹә накьн (Рʹом. 12:3). Һьн жи чахе пʹайе кәсәки дьдьн, әм чʹәʹвнәбарийе накьн, ле дәԝсе тʹәви ԝан ша дьбьн һәрге жи әм дьфькьрьн кӧ пʹайи мәрʹа жи дькʹәвә. w17.10 9 ¶9-10

Гәләк хушк-бьра тʹәхмин кьрьнә кӧ чахе әԝана хьзмәтийеда Хәбәра Хԝәде дьдьн хәбате, әԝ дьле мәрьва һе дьгьрә у баш сәр ԝан һʹӧкӧм дькә. Ԝәрә мәсәләке шеԝьр кьн. Бьраки мә мерькәки әʹмьрда мәзьнрʹа бь сала журналед мә дьбьр у әԝи мерьки тʹьме әԝ журнал дьхԝәндьн. Щарәке әԝи бьрайи сафи кьр нә кӧ тʹәне журнала «Бьрща Ԛәрәԝьлийе» бьдә ԝи, ле рʹезәкә Кʹьтеба Пироз жи бьхунә кʹижан ве журналеда кʹьфшкьри бу. Әԝи 2 Корьнтʹи 1:3, 4 ԝирʹа хԝәнд кʹидәреда те готьне: «Баве дьлшәԝатийе у Хԝәдейе һʹәму бәрдьлийе . . . нава һʹәму тәʹли-тәнгийада дьл дьдә бәр мә». Әԝ рʹез ӧса дьле ԝи мерьки гьрт, ԝәки әԝи готә бьре мә кӧ щара дӧда бьхунә. Әԝи гот кӧ әԝ у жьна ԝи гәләк һʹәԝще бәрдьлийе бун у әԝ һе зедә дьхԝазә дәрһәԛа Кʹьтеба Пироз пебьһʹәсә. Бәле, рʹасти жи ԛәԝата Хәбәра Хԝәде гәләк зор ә (Кʹар. Шанд. 19:20). w17.09 26 ¶9-10

Мьлйакʹәтед амьн ԝе сәр кьред Шәйтʹан һерс кʹәтана у тʹәвһәвбуна. Ле Йаһоԝа хԝә гьрт. Әԝи Шәйтанрʹа щаба фькьранди да у бь һәԛийе хԝә да кʹьфше һьндава рʹабәрибуна ԝи. Йаһоԝа ләз нәкʹәт һерса хԝә бьрʹежә (Дәркʹ. 34:6; Иб. 2:2-6). Ле чьрʹа? Йаһоԝа һишт ԝәки ԝәʹдә дәрбаз бә, чьмки нахԝазә тʹӧ кәс бьмьрә, ле «дьхԝазә ԝәки һʹәму жь гӧнәкьрьне вәгәрʹьн» (2 Пәт. 3:9). Мәсәла Йаһоԝа мә һин дькә кӧ һʹәта әм тьштәки бежьн йан бькьн, лазьм ә ләз нәкʹәвьн у пешийе бьфькьрьн. Илаһи чахе әм гәрәке сафикьрьнәкә фәрз бькьн, ԝәʹдә хԝәрʹа бьвиньн сәва бьфькьрьн. Хԝәдерʹа дӧа бькьн сәва биланийе бьдә ԝә кӧ рʹаст хәбәр дьн у тьштед рʹаст бькьн (Зәб. 141:3). Чахе әм һерс дькʹәвьн йан жи бина хԝә тәнг дькьн, һьнге чәтьн дьбә хԝә бьгьрьн. Ләма щара әм пʹошман дьбьн гава жь һерсе гьлийед нәбаш дьбежьн йан жи тьштед нәрʹаст дькьн (Мәтʹлк. 14:29; 15:28; 19:2). w17.09 4 ¶6-7

Гәло әв дьһатә һʹәсабе кӧ Йешу кʹаһине мәзьн, бу пʹадша? На, Йешу жь зӧрʹәта Даԝьд нибу, ләма жерʹа нәдькʹәт кӧ бьбә пʹадша. Әԝ йәк кӧ тʹащ данинә сәр сәре ԝи пʹехәмбәрти бу, кӧ ахьрийеда кʹаһинәк ԝе бьбә пʹадша у кʹаһине һʹәта-һʹәтайе. Әв кʹаһине мәзьн кӧ ԝе бьбә пʹадша, наве ԝи һатьбу данин Чʹил. Кʹьтеба Пироз зәлал дьдә кʹьфше кӧ Чʹил, әв һәйә Иса Мәсиһ (Иша. 11:1; Мәт. 2:23). Бәле, Иса Пʹадша у Сәрәккʹаһин ә. Әԝ рʹебәре ордийа мьлйакʹәтед Йаһоԝа йә. Иса гьран дьхәбьтә сәва кӧ ве дьнйа хьрабда щьмәʹта Хԝәде бь тʹәмами хԝәйкьри бә (Йерәм. 23:5, 6). Иса пьштгьрийа сәрԝертийа Йаһоԝа дькә, у ләма зутьрәке әԝ ԝе һʹәму сәрԝеред дьнйайе кʹӧта кә у щьмәʹта Хԝәде хьлаз кә (Әʹйан. 17:12-14; 19:11, 14, 15). Ле һʹәта әв рʹож бе, Иса, демәк Чʹил, шьхӧләки мәзьн дькә. w17.10 29 ¶12-14

Һуне чь бькьн һәрге кʹьнще ԝә ԛьреж буйә, йан һәла һе жи бина мьрʹдар те? Һуне дәрберʹа әԝи кʹьнщи бехьн, ӧса нинә? Бь ԝи щурʹәйи, чахе әм дьвиньн кӧ кьред мә йан хәйсәт-һʹӧнӧред мә Хԝәде хԝәш найен, әм гәрәке дәрберʹа дәстпекьн хԝә бьгӧһезьн, демәк бь симболик ԝан тьшта жь хԝә бехьн. Дәрһәԛа ԝе йәке Паԝлос ширәтәкә ӧса да Мәсиһийа: «Ван һʹәмуйа жь хԝә дур хьн». Йәк жь ԝан кьред хьраб кʹижана Паԝлос гот, әԝ һәйә бенамуси (Колс. 3:5-9). Хәбәра орижинал кӧ һатә ԝәлгәрʹандьне ча «бенамуси», те һʹәсабе һәләԛәтийа сексуал ортʹа дӧ мәрьва кӧ бь ԛануни зәԝащеда ниньн у һомосексуәли. Паԝлос Мәсиһийарʹа гот, ԝәки һәр «хԝәстьнед дьле хԝә» һьндава бенамусийе «бькӧжьн». Гьлийе Паԝлос, кӧ гот «бькӧжьн», дьдә кʹьфше ԝәки һеса нинә ве йәке бькьн. Лазьм ә зәʹф сәр хԝә бьхәбьтьн, шәрʹ бькьн, сәва әв хԝәсть-нед хьраб кʹокева нав хԝә дәрхьн. Бәле, әв чәтьн ә, ле әм дькарьн ԝи шәрʹида сәркʹәвьн. w17.08 18 ¶5-6

Дәрәщед кӧ иро рʹасти мә тен, мина дәрәщед ԝәʹде Миха пʹехәмбәр ьн. Әԝ ԝәʹде пʹадшатийа Аһазда дьжит, чахе һʹәму щурʹә корупсийа һәбу. Аһаз пʹадшаки гәләк зӧлм бу. Щьмәʹте жи хԝә хьрабийе дьгьрт у «кʹаре хьрабда» дәстед ԝан бь хирәт бу (Мих. 7:1-3). Миха фәʹм дькьр кӧ әԝ пе ԛәԝата хԝә нькарә әԝан дәрәщед хьраб бьгӧһезә. Һәрге баԝәрийа мә мина йа Миха йә, әме бь дьл у щан һивийа Йаһоԝа бьн. Мәсәлә, гьртийе кәледа кʹижан кӧ һивийа рʹожа щәза хԝә йә, бьхԝазә нәхԝазә гәрәке һивийа ве рʹоже бә, ле әԝ нә жи дьхԝазә әв рʹож бе. Ле дәрәща мә ӧса нинә. Әм бь дьл у щан һивийа Йаһоԝа нә, чьмки заньн кӧ әԝ ԝе ԝәʹдәда созе хԝә бинә сери у жийина һʹәта-һʹәтайе бьдә мә! Ләма жи «бь думька дьреж» у бь шабуне сәбьр бькьн (Колс. 1:11, 12). Ле һәрге әм бесәбьр бьн у бькьнә кӧтә-кӧт кӧ чьрʹа Йаһоԝа ләз накʹәвә, әԝ йәк ԝе ԝи хԝәш нәйе (Колс. 3:12). w17.08 4 ¶6-7

Гәло әм ча дькарьн аликʹарийа Йаһоԝа бьстиньн? Һәләԛәтийа мә гәрәке тʹәви ԝи ԛәԝи бә. Бона ве йәке әм гәрәке мьлук у шкәсти бьн (Сефн. 2:3). Мәрьвед мьлук итʹбарийа хԝә Йаһоԝа тиньн, кӧ әԝ ԝе һәр нәһәԛийе рʹаст кә у ԝе хьлазийа тәнгасийа ԝан бинә. Мәрьвед ӧса Йаһоԝа хԝәш тен у әԝ ԝана ԛәбул дькә. Хԝәде «нәпʹака дәвәрʹуйа тинә дькә хали» (Зәб. 147:6б). Бәле, әм нәхԝазьн әԝ йәк бе сәре мә. Ләма һәрге әм дьхԝазьн Йаһоԝа аликʹарийе бьдә мә, әм гәрәке нәфрʹәт кьн чь кӧ әԝ нәфрʹәт дькә (Зәб. 97:10). Мәсәлә, бенамуси гәрәке бәр чʹәʹве мә рʹәш бә. Әԝ те һʹәсабе кӧ әм хԝә жь һәр тьшти дур бьгьрьн, чь кӧ дькарә мә бьвә бәрбь бенамусийе, бәʹса хәбәре порнографйа (Зәб. 119:37; Мәт. 5:28). Нәһеса йә мьԛабьли ԝан тьшта шәрʹ бькьн, ле әԝ йәк һежа йә, чьмки әме кʹәрәмед Йаһоԝа бьстиньн. Ле ԝи шәрʹида әм гәрәке аликʹарийа Хԝәде бьгәрʹьн, нә кӧ сәр хԝә баԝәр бьн. Әм гәрәке хԝә ль Йаһоԝа бьгьрьн у лавайи ԝи бькьн ԝәки али мә бькә. w17.07 19-20 ¶11-13

Дьбәкә әм нькарьн хьзмәт кьн ча хьзмәткʹаред һәртʹьм, йан жи дәрбази ԝи щийи бьн кʹидәре һʹәԝщәти һәйә, ле әм пʹәра ԛӧрбан дькьн у бь ве йәке әм али хушк-бьред дьн дькьн хьзмәтийеда. Мәсәлә, пʹәре кӧ те ԛӧрбанкьрьне, аликʹарийе дьдә сәва әʹдәбйәт һәбьн у шьхӧле бәлакьрьна мьзгинийе пешда һәрә ԝәлатед кʹәсибда, кʹидәре кӧ гәләк мәрьв тенә нава рʹастийе. Бәса хәбәре, Конгода, Мадагәскареда, у Рԝандайеда, Кʹьтеба Пироз гәләк бьһа йә. Мәрьв гәрәке ԝәкә һʹәфтеке йан мәһәке бьхәбьтә, сәва Кʹьтеба Пироз бькʹьрʹә. У бь сала хушк-бьред ԝедәре дьжбартьн, йан хԝарьне бькʹьрʹьн сәва нәфәред хԝә, йан жи Кʹьтеба Пироз. Ле ньһа бь аликʹарийа пʹәрәԛӧрбанкьрьна хушк-бьра, «зедәйа» кӧ һәйә «кемасийа» тʹьжи дькә, у тʹәшкиләта Йаһоԝа Кʹьтеба Пироз ԝәлдьгәрʹинә у нәшьр дькә бона һʹәму нәфәред малбәтед ԝан у ӧса жи бона ԝан йед кӧ Кʹьтеба Пироз һин дьбьн (2 Корн. 8:13-15). w17.07 9 ¶1

Сәрһатийа Ибо мә дьлгәрм дькә, чьмки дьдә кʹьфше кӧ амьнийа мә бадиһәԝа нинә. Һьн жи һәрге әм кӧл-дәрда дькʹьшиньн, әԝ найе һʹәсабе кӧ Йаһоԝа мә ԛәбул накә. Хенщи ве йәке, әм ԝәʹде тәнгасийа дькарьн Йаһоԝарʹа нишан кьн, ԝәки әм пьштгьрийа һʹӧкӧмәтийа ԝи дькьн. Чахе әм сәбьр дькьн у ԛәԝи дьминьн, дьле Йаһоԝа ша дьбә, у һьн жи баԝәрийа мә бона ахьрийе һе ԛәԝи дьбә (Рʹом. 5:3-5). Сәрһатийа Ибо избат дькә, ԝәки Йаһоԝа «чьԛаси исаф у рʹәʹм ә!» (Аԛуб 5:11). Бәле, әм гәрәке ԛә дӧдьли нәбьн кӧ Йаһоԝа ԝе һьн мә хәлат кә у һьн жи һʹәмушка йед кӧ пьштгьрийа сәрԝертийа ԝи дькьн. Занәбуна ве йәке ԝе али мә бькә «һәр тьштида бь думька дьреж сәбьр бькьн» у шабуна хԝә ӧнда нәкьн (Колс. 1:11). Бәле, дина мә гәрәке сәр ве йәке бә, кӧ пьштгьрийа сәрԝертийа Йаһоԝа бькьн. Ләма жи ԝәʹде чәтьнайа фәрз ә тʹьме биньн бира хԝә, кӧ чьԛас фәрз ә пьштгьрийа сәрԝертийа Хԝәде бькьн. w17.06 26 ¶15-16

Иро һʹьш-аԛьле гәләк мәрьва тʹәне сәр тьшта йә, мәсәлә әԝана пәй моде дькʹәвьн, пәй тьштед әләктроник, у диса пәй гәләк тьштед дьн. Бона ԝан һәбук у пʹәрә жь һәр тьшти фәрзтьр ьн. Ләма жи Мәсиһи гәрәке тʹьме хԝә бьщерʹьбинә һәла хԝәстьнед ԝи чь нә. Мәсәлә, пьрсед ӧса бьдьнә хԝә: «Гәло бона мьн чь һе фәрз ә у сәр чь әз һе зәʹф ԝәʹдә хәрщ дькьм? Гәло дьбәкә әз дьһа зәʹф ԝәʹде хԝә сәр тьшта хәрщ дькьм, мәсәлә тʹьме дьгәрʹьм у дьньһерʹьм әʹрәбед тʹәзә йан тьштед дьнә модерн, ле һе кем ԝәʹде мьн дьминә сәва хԝә һазьр кьм бона щьвате? Дьбә кӧ сәр шьхӧлед һәррʹожи ԝәʹде мьн һе зәʹф хәрщ дьбә, ле һьндьк ԝәʹдә хәрщ дькьм сәр дӧа йан жи хԝәндьна Кʹьтеба Пироз?» Һәрге ԝә тедәрхьст кӧ һʹьш-аԛьле ԝә дьчә тʹәне сәр тьшта, у һʹьзкьрьна ԝә һьндава Иса сар дьбә, һун гәрәке гӧһ бьдьн ԝан гьлийед Иса, кӧ рʹеза ве рʹожеда әм дьхуньн. Иса гот кӧ «тʹӧ кәс нькарә дӧ ахарʹа хӧламтийе бькә». Паше Иса зедә кьр: «Һун нькарьн һьн Хԝәдерʹа, һьн жи һәбукерʹа хӧламтийе бькьн». Бәле, ӧса набә кӧ һәрдӧ ахарʹа амьн бьминьн (Мәт. 6:24). Әм гьшк гӧнәкʹар ьн, ләма жи мәрʹа лазьм ә шәрʹ бькьн мьԛабьли хԝәстьнед хԝәйә бәдәне, демәк ӧса жи мьԛабьли һʹьзкьрьна һьндава һәбуке (Әфәс. 2:3). w17.05 25-26 ¶15-16

Рʹаст ә әм гӧнәкʹар ьн у ләма чаԝа дәрданед һәри нә, ле мьзгинийа кӧ әм бәла дькьн хьзнә йә. Чьрʹа? Чьмки хьзмәти дькарә жийина һʹәта-һʹәтайе һьн бьдә мә, һьн жи бьдә ԝан мәрьва йед кӧ гӧһ дьдьнә мә. Паԝлос хьзмәтийа хԝә гәләк һʹьз дькьр у һʹәму тьшт дькьр кӧ мәрьва бинә сәр рʹийа рʹастийе (Рʹом. 1:14, 15; 2 Тимтʹ. 4:2). Әве йәке али ԝи кьр кӧ ԝәʹде зерʹандьнед ԛайим әԝи сәбьр кьр у амьн ма (1 Тʹеслн. 2:2). Ле әм ча дькарьн һʹьзкьрьна хԝә һьндава хьзмәтийе нишан кьн? Паԝлос хьзмәти гәләк һʹьз дькьр. Әԝи һәр мәщал дьда хәбате сәва мәрьварʹа мьзгинийе гьли кә. Әм жи мина шандийа у Мәсиһийед ԛьрʹна йәке һʹәму щийа мьзгинийе бәла дькьн, мәсәлә дәрва, мал бь бал у щийед кӧ гәләк мәрьв тʹоп дьбьн (Кʹар. Шанд. 5:42; 20:20). Чьԛас дәсте мә те, әм дьхԝазьн һе зедә хьзмәт кьн, мәсәлә, ча пешәнге кʹомәкдар йан ча пешәнге һәртʹьм. Йан жи дьбәкә әм зьмане тʹәзә һин дьбьн, жь шәһәре хԝә дәрбази шәһәрәки дьн дьбьн, йан һәла һе жи ԝәлате дьн (Кʹар. Шанд. 16:9, 10). w17.06 10-11 ¶8-9

Һʹәчʹи зәʹф хьраби кӧ ве дьнйайеда дьԛәԝьмьн жь тʹәшкиләта тен. Мәсәлә, тʹәшкиләтед рʹелиги милйона мәрьва дьхапиньн. Әԝана Хԝәде нәрʹаст дәрдьхьн, Кʹьтеба Пироз нәрʹаст шьровәдькьн, у дәрһәԛа ахьрийа әʹрде у инсанәте нәрʹастийе дьбежьн. Диса һәнә тʹәшкиләтед ӧса кӧ шәрʹа гӧрʹ дькьн у фьрԛийе дькьнә ортʹа мьләта, у бона ве йәке гәләк шәрʹ-дәʹԝ пешда тен. Мәрьвед сьст у пьшта кʹижана тʹӧнә, тенә зерʹандьне. Һьн жи әԝ тʹәшкиләт рʹӧшәте һьлдьдьн у тʹәне мәрьвед хԝә ԛәбул дькьн у али ԝан дькьн. Хенщи ԝан тʹәшкиләта, һәнә корпорасийед тьма, йед кӧ әʹрде хьраб дькьн у ресурсед тʹәбийәте вала дькьн. Әԝ корпорасийа, мәрьвед дьлсах дьхапиньн сәва бизнеса хԝә пешда бьвьн у паше щева һьнә мәрьва тʹьжә кьн. Ле бь милйона мәрьв иро кʹәсиббунеда ньн. Кʹьтеба Пироз пʹехәмбәртийе дькә, ԝәки һʹәму сәрԝерти у тʹәшкиләтед кӧ ԝанва гьредайи нә, ԝе бенә кʹӧтакьрьне (Йерәм. 25:31-33). w17.06 10-11 ¶8-9

Йаһоԝа, йе кӧ «дьла дьщерʹьбинә», һьндава Аһаб рʹасти жи рʹәʹма мәзьн да кʹьфше (Мәтʹлк. 17:3). Гәло әԝ сафикьрьна Хԝәде ча һʹӧкӧм бу сәр нәфәред Набот, йед кӧ һаш жь зӧлмийа Аһаб һәбун? Баԝәрийа нәфәр у һәвалед Набот дькарьбу бьһата щерʹьбандьне, чьмки әԝана һивийе бун кӧ Аһаб ԝе һәԛе хԝә бьстинә. Ле мьлукти ԝе али ԝан бькьра баԝәрийа хԝә ӧнда нәкьн. Гәло чаԝа? Һәрге әԝана мьлук буна, ԝана ԝе бәрдәԝам кьра диса Йаһоԝарʹа хьзмәт кьрана у дӧдьли нәбуна кӧ Хԝәде нькарә нәһәԛийе бькә (Ԛан. Дщр. 32:3, 4). Чахе Йаһоԝа Набот, кӧрʹед ԝи у малбәта ԝи жь мьрьне рʹакә, һьнге әԝана ԝе бь тʹәмами һәԛийа Йаһоԝа бьвиньн (Иб. 14:14, 15; Йуһʹн. 5:28, 29). Мәрьве мьлук дӧдьли нинә кӧ Хԝәде ԝе диԝана һәр тьшти бькә, «дьхԝазә бьра баш бә йан жи хьраб бә, тʹәви һәр тьштед вәшарти» (Ԝаиз 12:14). Бәле, чахе Йаһоԝа диԝане дькә, һәр тьшти һьлдьдә һʹәсаб, кʹижан кӧ дьбәкә әм һаш пе тʹӧнә нә. Ләма жи сәва әм баԝәрийа хԝә һьндава Йаһоԝа ӧнда нәкьн, лазьм ә әм мьлук бьн. w17.04 24 ¶8-9

Жь бо һʹале дьнйайе гәләк хушк-бьред мә кʹәтьнә хәрибийе. Әԝ йәк һеса нинә, чьмки һʹәму тьшт дькʹәвә сәр стуйе ԝан. Бьдьн бәр чʹәʹве хԝә, әԝана гәрәке зьмане тʹәзә һин бьн, һини ԛанун у әʹдәтед ԝәлат бьн, һьн жи һин бьн чаԝа хәрще ԝәлат дадьн, чаԝа тьшта бькʹьрʹьн. Хенщи ве йәке, әԝана гәрәке зарʹа бьвьнә мәкʹтәбе, ԝана ширәт кьн у һин кьн. Әԝ һʹәму тьшт чәтьн ә. Ләма жи әм гәрәке сәбьр бьн һьндава ԝан, ԛәдьре ԝан бьгьрьн у аликʹарийе бьдьнә ԝан (Фили. 2:3, 4). Щара жь бо мәрьвед дәԝләте, хушк-бьред мәрʹа чәтьн ә ԝәлате тʹәзәда щьвате бьвиньн. Һьнә тʹәшкиләтед дәԝләте хушк-бьред мә дьдьнә тьрсандьне кӧ ԝе аликʹарийе нәдьнә ԝан. Әԝана щара дькарьн бежьн, кӧ һәрге рʹәви фьлан хәбате ԛәбул нәкьн сәва щьватед хԝә бәрнәдьн, ԝе бәри ԝан дьн жь ԝәлат дәрхьн. Ле сәд һʹәйф һьнәк тьрсийан у мәщбур бун хәбатед ӧса ԛәбул кьн. Ләма жи чахе хушк-бьред рʹәви тенә ԝәлате мә, гәләк фәрз ә әм дәрберʹа ԝана бьвиньн у аликʹарийе бьдьнә ԝан. Ӧса әԝана ԝе тʹәхмин кьн кӧ әм бона ԝан хәм дькьн. Дьлшәԝатийа мә у аликʹарийа мә дькарә баԝәрийа ԝан ԛәԝи кә (Мәтʹлк. 12:25). w17.04 24 ¶8-9

Чахе Иса сәр әʹрде бу, әԝи гот кӧ нишана «ахьрийа ве дьнйайе» ӧса жи әԝ ә, кӧ «һʹьзкьрьна гәләка ԝе сар бә» (Мәт. 24:3). У Щьһуйед ԛьрʹна йәкеда, йед кӧ хԝә щьмәʹта Хԝәде һʹәсаб дькьрьн, һиштьн кӧ һʹьзкьрьна ԝан һьндава Хԝәде сар бә. Ле ԝи ԝәʹдәйи, һʹәчʹи зәʹф Мәсиһи бь хирәт «мьзгини дьдан у һин дькьрьн» дәрһәԛа Мәсиһ. Ԝана һьндава хушк-бьра у нәбаԝәра жи һʹьзкьрьн дьданә кʹьфше. Әԝан Мәсиһийа ԛайим Хԝәде һʹьз дькьрьн (Кʹар. Шанд. 2:44-47; 5:42). Ле йазьх, һʹьзкьрьна һьнә Мәсиһийед ԛьрʹна йәкеда сар бу. Дәрһәԛа Мәсиһийед Әфәсида йед ԛьрʹна йәке, Иса гот: «Газьнәкә мьн ль тә һәйә, кӧ тӧ мина бәре мьн һʹьз наки» (Әйан. 2:4). Гәло чь дькарьбу бьбуйа мәʹнийа ве йәке? Дьԛәԝьмә әԝана кʹәтьбун бәр байе ԝан мәрьва, йед кӧ тʹәне дәрһәԛа хԝәстьнед хԝә дьфькьрин (Әфәс. 2:2, 3). w17.05 17 ¶1-3

Йәфтаһе һʹакьм у Һанна жьна Әлкана, һьнә тьштада мина һәв бун. Һәрдӧ жи мәрьвнә баш бун. Йәфтаһ сәроке ԛәԝи у әскәре мерхас бу. Һанна кʹӧлфәтәкә гӧһдар, мьлук у кәваникә баш бу. Әԝана һәрдӧ жи Хԝәдекирʹа хьзмәт дькьрьн. Ле диса һәбу тьштәк, чьда жи әԝана мина һәв бун. Ԝана һәрда жи бәр Хԝәде сонд хԝарьбун у бь амьни сонда хԝә анинә сери. Рʹасти жи ԝана мәсәләкә баш һишт бона ԝан, йед кӧ сафи дькьн бәр Йаһоԝа сонд бьхԝьн. Хәбәра сонд кӧ Кʹьтеба Пирозда те хәбьтандьне, те һʹәсабе созе фәрз кӧ мәрьв дьдә Хԝәде. Мәсәлә, әв мәрьв соз дьдә Хԝәде, ԝәки ԝе фьлан тьшти бькә, ԛӧрбане йан жи пʹешкʹеше бинә, щурʹе хьзмәткьрьне дәстпекә, йан жи соз дьдә ԝәки һьнә тьшта ԝе тʹәрк бьдә. Мәрьв бь рʹәзәдьли у бь хԝәстьна хԝә сонде дьхԝә. Ле йәкә әԝ сонд бәр чʹәʹве Хԝәде пироз ә у ча пәйман ә. Әԝ мина ад-ԛьраре йә, демәк мәрьв Хԝәдерʹа соз дьдә, ԝәки әԝ ԝе фьлан тьшти бькә йан жи фьлан тьшти нәкә (Дәстп. 14:22, 23; Ибрн. 6:16, 17). w17.04 3 ¶1-2