Сьбат

Нӧһ тʹӧ щар гәми ава нәкьрьбу. Ле әԝи бь тʹәмами итʹбарийа хԝә Йаһоԝа ани, у «ӧса жи кьр» чаԝа Йаһоԝа жерʹа гот. Ахьри чь бу? Әԝи гәми рʹьнд ава кьр чаԝа Йаһоԝа жерʹа гот, у әԝ нәфәред хԝәва хьлаз бун. Нӧһ ӧса жи бавәки баш бу, чьмки әԝи итʹбарийа хԝә сәрԝахтийа Хԝәде дьани. Пешийа селаве ԝәʹдәки гәләк хьраб бу, ле әԝи зарʹед хԝә рʹьнд мәзьн кьр у мәсәла баш бу бона ԝан (Дәстп. 6:5). Де-бавно, ле һун ча дькарьн «ӧса жи» бькьн ча Хԝәде дьхԝазә? Гӧһ бьдьнә Йаһоԝа. Бьһельн ԝәки әԝ мәзьнкьрьна зарʹада али ԝә бькә бь сайа Хәбәра хԝә у рʹебәрийе, кӧ әм жь тʹәшкиләта ԝи дьстиньн. Ле щара де-бав чь жи дькьн, йәкә һьнә зарʹ Йаһоԝа дьһельн. Исафа ԝан де-бава тʹәмьз ә, йед кӧ алийе хԝәда һәр тьшт кьрьнә сәва рʹастийе бькьнә дьле зарʹа хԝә. Әԝана ӧса жи дькарьн баԝәр бьн ԝәки рʹожәке зарʹа ԝан ԝе вәгәрʹә бал Йаһоԝа. w18.03 30 ¶10-11

Дьԛәԝьмә ԝә гәләк дьхԝәст мевана тʹәглиф кьн, ле дьфькьрин ԝәки һун нькарьн ве йәке бькьн. Мәсәлә, һьнәк шәрм дькьн у дьтьрсьн ԝәки меванарʹа ԝе һʹәԝас нибә. Һьнәк жи бәрхԝә дькʹәвьн, чьмки дәсте ԝанда тʹӧнә у дьфькьрьн ԝәки ԝе нькарьбьн һаԛас тьшт бькьн чьԛас йед дьн щьватеда дькьн. Фәрз нинә кӧ мал гәләк бәдәԝ у дәԝләти бә, ле фәрз әԝ ә кӧ щиԝар у тʹәмьз бә, ӧса жи әм меванһʹьз бьн. Чахе һʹьзкьрьн ԝә һелан дькә кӧ меванһʹьзийе нишан кьн, дәрһәԛа тьштед дьн ида бәрхԝә нәкʹәвьн. Әԝ йәк баш ә чахе әм дәрһәԛа меванед хԝә дьфькьрьн, кӧ ча ԝана ша кьн (Фили. 2:4). Гәләка хԝәш те хәбәр дьн дәрһәԛа ԛәԝьмандьнед хԝә әʹмьрда у әм дькарьн ԝан ԛәԝьмандьна бьбьһен, һәрге тʹәвайи тʹоп бьн. Рʹуспики ньвиси: «Чахе әз һәвалед жь щьвате тʹәглифи мала хԝә дькьм, әԝ йәк али мьн дькә кӧ ԝана һе рʹьнд фәʹм кьм у нас кьм, илаһи пебьһʹәсьм кӧ әԝана ча һатьнә сәр рʹийа рʹаст». Һәрге һун бона меванед хԝә хәм бькьн, әԝана ԝе гәләк ша бьн у ԝе һʹәԝаса ԝан бе. w18.03 17 ¶15-17

Де-бавед кӧ Мәсиһи нә, дьхԝазьн али зарʹед хԝә бькьн, ԝәки әԝана сафикьрьнед билани бькьн. Ле һәрге бе мәʹнийа фәрз ньхӧмандьне дәрәнги хьн, әԝ йәк ԝе хьраб һʹӧкӧм бә сәр рʹӧһʹанийа зарʹа (Аԛуб 4:17). Ле йәкә де-бав дьхԝазьн ԝәки зарʹа ԝан пешийа ньхӧмандьне бь рʹасти һазьр бә сәва борщдарийа Мәсиһити һьлдә сәр хԝә. Һьнә бәрпьрсийаред мьһале дина хԝә дан ԝәки гәләк щаһьл, йед кӧ рʹастийеда мәзьн бунә, ньхӧманди ниньн. Гәләк жь ԝан щаһьла тенә сәр щьвата, хьзмәт дькьн, у хԝә һʹәсаб дькьн ча Шәʹдед Йаһоԝа. Ле йәкә һәнә мәʹни кӧ әԝана хԝә дьгьрьн кӧ хԝә тʹәсмили Йаһоԝа бькьн у бенә ньхӧмандьне. Ле гәло әԝ чь мәʹни нә? Щара де-бав хԝәха ԝана дәрәнги дьхьн. w18.03 8 ¶1-2

Сәва кӧ әм бьбьнә ԝәк Иса, әм гәрәке бьзаньбьн кӧ нет-фькьред ԝи чь бун у әԝ ча дьфькьри, у дәрһәԛа хәйсәт-һʹӧнӧред ԝи жи пебьһʹәсьн. Паше әм гәрәке пʹегәһа ԝида һәрʹьн. Иса һʹьш-аԛьле хԝә дабу сәр һәләԛәтийа хԝә тʹәви Хԝәде. Ләма жи һәрге әм бьбьнә мина Иса, әме һе зәʹф чʹәʹв бьдьнә Йаһоԝа. Жь ве йәке те кʹьфше, ԝәки чьԛас фәрз ә әм һин бьн мина Иса бьфькьрьн. Ле ча әм дькарьн ве йәке бькьн? Шагьртед Иса кʹәрәмәтед ԝи дьдитьн, гӧһ дьдан һинкьрьнед ԝи, дина хԝә дьдан кӧ әԝ ча бу һьндава һʹәму щурʹә мәрьва, у дьдитьн кӧ әԝи чаԝа принсипед Хԝәде дьани сери (Кʹар. Шанд. 10:39). Рʹаст ә әм нькарьн Иса бьвиньн, ле Йаһоԝа жь һʹьзкьрьне мьзгини дайә ньвисаре, кʹидәре әм дәрһәԛа Иса дьхуньн у дькарьн хәйсәт-һʹӧнӧред ԝи бьвиньн. Чахе әм бьхуньн у бьфькьрьн сәр кʹьтеба Мәтта, Марԛос, Луԛа у Йуһʹәнна, ԝе нет-фькьра Мәсиһ сәре мәда бә. Ԝи щурʹәйи әм дькарьн «пʹегәһа ԝида һәрʹьн» у «бь ԝе нет-фькьре сильһʹкьри бьн» чаԝа Мәсиһ (1 Пәт. 2:21; 4:1). w18.02 22 ¶15-16

Дәстпека тʹәрихийа мәрьва, мәрьв дәрһәԛа Хԝәде дькарьбун бь сайа се тьштед сәрәкә пебьһʹәсийана: бь ве йәке кӧ дина хԝә дьданә сәр әʹфьринед Хԝәде, бь гьликьрьна мәрьвед хԝәдехоф, у бь кʹәрәмед Хԝәде кӧ ԝана дьстанд чахе пе принсипед ԝи дьжитьн (Иша. 48:18). Чахе Нӧһ сәр әʹфьрина дьньһерʹи, әԝи дькарьбу әшкәрә бьдита ԝәки Хԝәде һәйә, у ӧса жи дькарьбу һʹӧнӧред Хԝәде бьдита, мәсәлә «ԛӧдрәта ԝийә һʹәта-һʹәтайе у Хԝәдетийа ԝи» (Рʹом. 1:20). Бь сайа ԝан тьшта, Нӧһ нә кӧ тʹәне баԝәр кьр ԝәки Хԝәде һәйә, ле әԝи баԝәрийа ԛәԝи һьндава ԝида пешда ани. Дәрһәԛа Йаһоԝа дькарьн бежьн Нӧһ һʹәчʹи зәʹф жь мәрьвед хԝәйи незик пеһʹәсийа. Бәʹса хәбәре, баве ԝи Ламәх мәрьвәки бь баԝәрийа ԛәԝи бу, йе кӧ дьжит чахе Адәм һе сах бу. Дьбәкә әԝи ӧса жи жь кальке хԝә Мәтушәла у жь кальке кальке хԝә Йаред пеһʹәсийабу, йе кӧ паши буйина Нӧһ 366 сала жит (Луԛа 3:36, 37). Чь жи һәбә, әшкәрә йә ԝәки Нӧһ чь кӧ пеһʹәсийа дьле ԝи гьрт, у әԝе йәке ԝи һелан кьр кӧ Хԝәдерʹа хьзмәт кә (Дәстп. 6:9). w18.02 9 ¶4-5

Чахе хушк йан бьрак пе гьли йан кьре хԝә дьле мә дьешинә, бь ве йәке ча бежи шур дьле мә дьхьн. Һәрге әм нькарьн хәйде бир кьн, гәло әме бьһельн ԝәки әԝ хәйид бь сала дьле мәда бьминә? Йан әме ширәта Кʹьтеба Пироз бьдьнә хәбате у зу әве чәтьнайе сафи кьн? Чьԛас дьреж әв проблем нәсафикьри бьминә, һаԛас ԝе мәрʹа чәтьн бә әʹдьлайе чекьн тʹәви хушк йан бьра кӧ әм данә хәйидандьне. Һун чь дькарьн бькьн сәва әʹдьлайе чекьн? Йа пешийе, Йаһоԝарʹа дӧа бькьн. Аликʹари жь ԝи һиви кьн ԝәки тʹәви хушк йан жи бьре хԝә бь нәрми хәбәр дьн. Бир нәкьн, кӧ әԝ жи досте Йаһоԝа йә (Зәб. 25:14). Әԝ тʹәви достед хԝә ԛәнщ ә, у дьхԝазә кӧ әм жи ӧса бьн (Мәтʹлк. 15:23; Мәт. 7:12; Колс. 4:6). Паше, бьфькьрьн кӧ һун чь дьхԝазьн жерʹа бежьн. Нәфькьрьн кӧ әԝ һʹәмде хԝә дьле ԝә ешанд. Һʹәлал бьн у биньн сәр хԝә кӧ дьԛәԝьмә ԝә тьштәки нәрʹаст фәʹм кьр, ләма чәтьнайи пешда һат. w18.01 10 ¶15-16

Рʹаст ә ве дьнйайеда кемасийа һʹьзкьрьне һәйә, ле хьзмәткʹаред Йаһоԝа бь һʹьзкьрьна һʹәлал әʹйан ьн. Әԝ йәк тʹьме ӧса бу. Иса гот ԝәки Ԛануна Мусада тʹәмийа пешьн у һәрә мәзьн әԝ һәйә кӧ Хԝәде һʹьз бькьн, у тʹәмийа дӧда мәрьва һʹьз бькьн (Мәт. 22:38, 39). Иса ӧса жи гот ԝәки Мәсиһийед рʹаст ԝе бь һʹьзкьрьне һьндава һәвдӧ әʹйан бьн (Йуһʹн. 13:35). Мәсиһи һәла һе жи ԝе әʹйан буна бь ԝе йәке кӧ дьжмьне хԝә һʹьз бькьн (Мәт. 5:43, 44). Иса хԝәха жи һʹьзкьрьна мәзьн да кʹьфше һьндава мәрьва. Әԝи шәһәр пәй шәһәр дьчу мәрьварʹа мьзгинийа дәрһәԛа Пʹадшатийа Хԝәде гьли дькьр. Әԝи корʹа, сәԛәта, кʹотийа, у кәрʹ-лала ԛәнщ дькьр. Әԝи мьрийа жи рʹадькьр (Луԛа 7:22). Иса һәла һе жи әʹмьре хԝә да бона тʹәмамийа инсанәте. Әԝи бь тʹәмами әʹйан кьр һʹьзкьрьна Баве хԝә. Нав тʹәмамийа дьнйайеда, Шәʹдед Йаһоԝа чʹәʹв дьдьнә Хԝәде у Иса, у һьндава мәрьва һʹьзкьрьн дьдьн кʹьфше. w18.01 29-30 ¶11-12

Тӧ дькари бей нӧхӧмандьне ԝәʹде салийед хԝәйә щаһьлда жи. Ле тӧ нькари тʹьме пешда бьзаньби кӧ ахьрийеда рʹасти кʹижан чәтьнайа бей. Сәва кӧ һәр дәрәщада амьн бьмини Йаһоԝарʹа, тӧ гәрәке бир нәки, ԝәки созе кӧ тә дайә Йаһоԝа, найе гӧһастьне. Әв те һʹәсабе кӧ тә Кәсе Һәри бьльндрʹа гот, ԝәки тӧйе тʹьме жерʹа хьзмәт ки, һәрге жи һәвал йан жи де-баве тә хьзмәтийа хԝә бьһельн (Зәб. 27:10). Һʹәму дәрәщада тӧ дькари аликʹарийе жь Йаһоԝа бьстини, ԝәки бьжи ль гора тʹәсмилбуйина хԝә (Фили. 4:11, 12). Йаһоԝа дьхԝазә тӧ бьби досте ԝи. Ле лазьм ә әве достийе хԝәй ки у бьхәбьти бона хьлазбуна хԝә. Филипи 2:12-да те готьне: «Бона хьлазбуна хԝә бь хоф у тьрс бьхәбьтьн». Ләма жи бьфькьрә, кӧ чаԝа достийа хԝә у амьнийа хԝә Йаһоԝарʹа хԝәй ки ԝәʹде чәтьнайа. Ле тӧ гәрәке хԝәда баԝәр ниби, ԝәки дькари пе ԛәԝата хԝә ве йәке бьки. Һәла һе хьзмәткʹаред щерʹьбанди жи жь рʹийа рʹаст дәркʹәтьнә. w17.12 24 ¶4, 6-7

Йаһоԝа мәщал у ԛәдьрәки мәзьн да мә, кӧ әм дькарьн пьштгьрийа шьхӧле ԝи бькьн. Әԝ соз дьдә мә кӧ һәрге әм пьштгьрийа Пʹадшатийа ԝи бькьн, әԝ ԝе әʹсә мә кʹәрәм кә (Малх. 3:10). Йаһоԝа ӧса жи соз дьдә ԝәки мәрьве мәрʹд, ԝе пешда һәрә (Мәтʹлк. 11:24, 25). Чахе әм мәрʹд ьн әм бәхтәԝар дьбьн, чьмки Кʹьтеба Пироз дьбежә «хԝәзи ль дайийа, нә кӧ ль стандийа» (Кʹар. Шанд. 20:35). Пе хәбәрдан у кьред хԝә, әм ӧса жи дькарьн зарʹед хԝә у йед кӧ тʹәзә һатьнә нава рʹастийе һин кьн, ԝәки шьхӧле Хԝәдеда мәрʹд бьн у гәләк кʹәрәма бьстиньн. Һәр тьшт чь кӧ бал мә һәйә, жь Йаһоԝа йә. У чахе әм пашда ԝан тьшта дьдьнә ԝи, бь ве йәке әм дьдьнә кʹьфше кӧ ԝи һʹьз дькьн у ԛимәт дькьн һәр тьшт кӧ әԝ бона мә дькә. Чахе Исраели ԛӧрбан анин сәва авакьрьна пʹарьстгәһе, әԝана чь жи «бь дьле хԝәва пʹешкʹеши кьрьн кʹефхԝәш бун» (1 Дир. 29:9). Дә ԝәрен әм жи бь дьл ша бьн у ләзәте бьстиньн кӧ Йаһоԝарʹа, демәк хԝәйе һәр тьштирʹа, ԝан тьшта бьдьн кʹижан кӧ жь дәсте ԝи тен. w18.01 21 ¶18-19

Рʹабуна жь мьрьне йа пешийе, демәк йа бона жийина сәр әʹзмана, дәстпебу һьнә ԝәʹдә шунда паши һатьна Мәсиһ. Мәсиһийед бьжарти йед кӧ ԝәʹде тәнгасийа мәзьн сах бьминьн, ԝе «әʹԝрава бенә рʹаһьштьне» (1 Тʹеслн. 4:13-17; Мәт. 24:31). Әԝана ԝе «бенә гӧһастьне, ньшкева, чаԝа чʹәʹве хԝә бьгьри-вәки дәма борʹийа ахьрийе бе ледане» (1 Корн. 15:51, 52). Иро һәчʹи зәʹф Мәсиһи бьжарти ниньн сәва тʹәви Мәсиһ сәрԝертийе бькьн. Әԝана һивийа рʹожа Йаһоԝа нә, чахе әԝ ԛьрʹа ве дьнйа зӧлм бинә. Тӧ кәс ньзанә әв рʹож кʹәнге ԝе бе, ле һәр тьшт дьдә кʹьфше кӧ әв рʹож гәләк незик ә (1 Тʹеслн. 5:1-3). Чахе дьнйа тʹәзә бе, рʹабуна мьрийа ԝе һәбә, ле щурʹе дьн. Әԝед кӧ жь мьрьне рʹабьн, ԝе бона жийина сәр әʹрде рʹабьн у бькарьбьн бьбьнә беԛьсур у тʹӧ щар ида мьрьне нәвиньн. w17.12 11 ¶15; 12 ¶18-19

Һәрге әм бь рʹастийе бь һʹьзкьрьн ьн у ԛәнщ ьн, ԝе мәрʹа һеса бә хԝә жь һʹәвсудийе хԝәй кьн. Хәбәра Хԝәде дьбежә: «Һʹьзкьрьн думькдьреж у ширьн ә, һʹьзкьрьн һʹәвсудийе накә» (1 Корн. 13:4). Сәва кӧ һʹәвсуди дьле мәда шин нәбә, әм гәрәке сәр тьшта пе чʹәʹве Хԝәде бьньһерʹьн, у хушк- бьра һʹәсаб кьн ча әндәмед бәдәнәке, демәк щьвате. Кʹьтеба Пироз дьбежә: «Гава әндәмәк те пәсьндайине, һʹәму әндәм тʹәви ԝе ша дьбьн» (1 Корн. 12:16-18, 26). Бәле, чахе хушк-бьра пешда дьчьн у кʹәрәма дьстиньн, әме нә кӧ һʹәвсудийе ԝана бькьн, ле тʹәви ԝан ша бьн. Дина хԝә бьдьнә мәсәла кӧрʹе Шаԝул Пʹадша, Йонатʹан. Чахе Даԝьд дәԝса ԝи һатә кʹьфшкьрьне ча пʹадша, Йонатʹан һʹәвсуди ԝи нәкьр, ле дәԝсе пьштгьрийа ԝи кьр у дьл да ԝи (1 Сам. 23:16-18). Ле гәло әм жи чʹәʹв дьдьнә Йонатʹан? w17.11 27 ¶10-11

Йаһоԝа пәймана Ԛануне Хәбәра хԝәда хԝәй кьр бона мә. Әԝ нахԝазә ԝәки әм Ԛанунеда дина хԝә бьдьнә тьштед һур, ле дьхԝазә әм «тьштед . . . пеш» фәʹм кьн, демәк принсипед фәрз ԝан тʹәмийада (Мәт. 23:23). Ԛануна Муса «занәбуне у рʹастийе» әʹйан дькьр дәрһәԛа Йаһоԝа у принсипед ԝи (Рʹом. 2:20). Мәсәлә, шәһәред сьтʹарбуне рʹуспийа һин дькьн кӧ чаԝа бь һәԛийе шьхӧле диԝанкьрьне бькьн, у мә һʹәмушка һин дькьн кӧ чаԝа «һьндава һәвдӧ бь һʹьзкьрьна амьн у бь рʹәʹмти бьн» (Зәкәр. 7:9, ДТʹ). Рʹаст ә әм бьн Ԛануна Мусада ниньн, ле йәкә Йаһоԝа найе гӧһастьне у бона ԝи иро жи һәԛи у рʹәʹмти гәләк фәрз ьн. Ԛәдьрәки чьԛас мәзьн ә ԝәки Хԝәдеки ӧса бьһʹәбиньн, бь щурʹе кʹижани әм һатьнә әʹфьрандьне, у дькарьн чʹәʹв бьдьнә ԝи у бьн пʹәрʹе ԝида бенә хԝәйкьрьне! w17.11 13-14 ¶2-3; 17 ¶18-19

Бьред кӧ щьватеда готара дьхуньн гәрәке баԝәр бьн, ԝәки готаред ԝанда Кʹьтеба Пироз щийе лапи фәрз дьгьрә (Йуһʹн. 7:16). Әԝ чь те һʹәсабе? Ԝәʹде готаре һун гәрәке фәсал бьн ԝәки дина мәрьва нә кӧ һе зедә һәрә сәр мәсәлед ԝә йан жи щурʹе хәбәрдана ԝә, ле сәр рʹезед жь Кʹьтеба Пироз. Ӧса жи бир нәкьн, ԝәки һинкьрьна жь Кʹьтеба Пироз найе һʹәсабе тʹәне гәләк рʹеза бьхуньн. Бь рʹасти, чахе гәләк рʹеза дьхуньн, һʹәчʹи зәʹф мәрьв бир дькьн ԝан рʹеза. Ләма жи ԝе дьһа баш бә, һәрге һун рʹезед сәрәкә рʹьнд бьжберьн, бьхуньн, шьровәкьн, мәсәле биньн у кʹара рʹезе нишан кьн (Нәһәм. 8:8). Һун гәрәке рʹьнд фәʹм бькьн, һәла ча фькьред жь готаре гьредайинә тʹәви рʹеза. Хенщи ԝан һʹәму тьшта, Йаһоԝарʹа дӧа бькьн, ԝәки али ԝә бькә сәва һун фькьред ԛимәт жь Хәбәра ԝи мәрьварʹа әʹйан кьн (Әзр. 7:10). w17.09 26 ¶11-12

Исраели 70 сала дилтийа Бабилонеда бун у сала 537 Б.Д.М., һатьнә азакьрьне. Әԝ сал бона щьмәʹта Йаһоԝа сала шабуне бу. Әԝана бь дьл у әшԛ вәгәрʹийанә Оршәлиме сәва кӧ дәстпекьн пʹарьстгәһ тʹәзәда ава кьн, ԝәки ԝедәре Йаһоԝарʹа хьзмәт кьн. Саләк шунда ԝана ида һʹиме пʹарьстгәһе данин. Нава 16 салада авакьрьна пʹарьстгәһа Йаһоԝа һе хьлаз нәбьбу. Кәсәки гәрәке бьанийа бира щьмәʹта Хԝәде, ԝәки лазьм ә әԝана вәгәрʹьн бал Йаһоԝа у нәкʹәвьнә һʹәйра хԝәстьнед хԝә. Сала 520 Б.Д.М., Хԝәде Зәкәрйа пʹехәмбәр шандә бал щьмәʹта хԝә, ԝәки бинә бира ԝан, кӧ чьрʹа Әԝи әԝана жь дилтийа Бабилоне аза кьрьн. Наве Зәкәрйа кӧ те һʹәсабе «Йаһоԝа Ани Бира Хԝә», рʹастийе дьдә кʹьфше дәрһәԛа Йаһоԝа. Рʹаст ә Исраелийа бир кьрьн кӧ Йаһоԝа чь бона ԝан кьр, ле йәкә әԝана диса бира Йаһоԝада бун (Зәкәр. 1:3, 4). Әԝи жь һʹьзкьрьне соз да ԝан, кӧ ԝе али ԝан бькә әԝана һʹәбандьна рʹаст вәгәрʹиньн. Әԝи ӧса жи әԝана пешда ширәт кьрьн, кӧ һәрге әԝана бь тʹәмамийа дьле хԝә жерʹа хьзмәт нәкьн, әԝ ԝе хьзмәтийа ԝан ԛәбул нәкә. w17.10 21-22 ¶2-3

Експертед психоложийе дьбежьн, кӧ чахе мәрьв дьлшәԝатийе дьдә кʹьфше, сьһʹәт-ԛәԝата ԝи һе баш дьбә у һәләԛәтийа ԝи тʹәви мәрьва һе баш ә. Бәле, чахе һун бәр дьле мәрьвада тен, һун һе бәхтәԝар дьбьн, шабуна ԝә зедә дьбә, тʹәнебуне тʹәхмин накьн у һе кем фькьред нәбаш тенә һʹьше ԝә. Дьлшәԝати ԝе кʹаре ԝәрʹа бинә. Мәсиһийед кӧ бона һʹалхԝәшийа мәрьвед дьн хәм дькьн у аликʹарийе дьдьн, баԝәр ьн кӧ әԝана ль гора принсипед Хԝәде әве йәке дькьн у исафа ԝан жи тʹәмьз ә. Һәрге әм дьлшәԝат ьн, әме бьбьн де-баве баш, мер йан жьна баш, у һәвале баш. Хенщи ве йәке, чахе мәрьв дьлшәԝат ә, гава жерʹа аликʹари лазьм ә, йед дьн жи али ԝи дькьн (Мәт. 5:7; Луԛа 6:38). Бәле, дьлшәԝати мәрʹа кʹаре тинә, ле әԝ гәрәке мәʹнийа сәрәкә нибә ԝәки дьлшәԝат бьн. Мәʹни кӧ чьрʹа әм гәрәке дьлшәԝат бьн, әԝ ә кӧ чʹәʹв бьдьнә Йаһоԝа Хԝәде у ԝи һӧрмәт кьн, йе кӧ Канийа һʹьзкьрьне у дьлшәԝатийе йә (Мәтʹлк. 14:31). w17.09 12 ¶16-17

Хенщи шьхӧле пʹадшатийе у сәрәккʹаһинтийе, Иса ӧса жи щабдари станд кӧ «пʹарьстгәһа Хӧдан ава бькә». Сала 1919-да әԝи ида дәстпекьр ԝи шьхӧли бькә. Әԝи щьмәʹта Хԝәде жь Бабилона Мәзьн аза кьр у щьвата Мәсиһи тʹәзәда саз кьр. Әԝи ӧса жи «хӧламе амьн у сәрԝахт» кʹьфш кьр, сәва кӧ сәр әʹрде рʹебәрийа һʹәбандьна рʹаст бькә (Мәт. 24:45). Иса ӧса жи щьмәʹта Хԝәде паԛьж дькә у али ԝан дькә, ԝәки һʹәбандьна ԝан тʹәмьз бә (Малх. 3:1-3). Әԝ Ԝәʹде Һʹәзарсалийа Пʹадшатийа хԝә, тʹәви 144 000 пʹадша у кʹаһина, мәрьвед амьн ԝе бькьнә беԛьсур. Гава әԝ йәк бе сери, сәр әʹрде ԝе тʹәне хьзмәткʹаред рʹаст бьминьн. Ахьрийеда ԝе бь тʹәмами һʹәбандьна рʹаст бә! w17.10 29 ¶15-16

Мәрьве кӧ бе һʹәмде хԝә кәсәк кӧштьбу, сәва кӧ бахшандьн бьстанда, гәрәке бьрʹәвийа шәһәре сьтʹаргәһе (Йешу 20:4). Сәва әʹмьре хԝә хьлаз кьра, әԝ гәрәке зу бьрʹәвийа ԝи шәһәри у ԝедәре бьма. Әԝ йәк бона ԝи һеса нибу, чьмки әԝи гәрәке гәлә тьшт жь хԝә кем кьра. Бәʹса хәбәре, әԝи гәрәке хәбата хԝә у мал-һʹале хԝә бьһишта. Әԝ ӧса жи һʹәта мьрьна сәрәккʹаһин ԝе нькарьбуйа кʹӧда бьхԝазә һәрә. Ле чь жи әԝи жь хԝә кем дькьр, һежа бу. Иро жи әԝе кӧ гӧне хԝә тинә рʹуйе хԝә, гәрәке тьштәки бькә сәва рʹәʹма Хԝәде бьстинә. Әԝ гәрәке бьһелә рʹийа нәрʹаст, у жь һәр тьшти хԝә дур бьгьрә чь кӧ дькарә ԝи бәрбь гӧнед гьран бьвә. Чахе әм һәр тьшти дькьн сәва ида гӧнә нәкьн, әм нишан дькьн ԝәки әм хԝәрʹази ниньн, ле пʹошман дьбьн, у әм рʹәʹма Хԝәде һьндава хԝә ԛимәт дькьн (2 Корн. 7:10, 11). w17.11 10-11 ¶10-11

Йаһоԝа тʹәми дайә мә кӧ һьндава хушк-бьрада дәствәкьри бьн (1 Йуһʹн. 3:17). Ле әве йәке әм гәрәке пе нета рʹаст бькьн. Пьрсед ӧса бьдьнә хԝә: «Гәло әз тʹәне һьндава һәвалед хԝә меванһʹьз ьм, йан жи һьндава ԝан кʹижана һʹәсаб дькьм кӧ щьватеда наве ԝан һәйә? Гәло әз тʹәне ԝан мевана тʹәглифи мала хԝә дькьм, дәсте кʹижанада һәйә у кʹе дькарә мьнрʹа ԛәнщийе бькә? Йан жи әз гази ԝан хушк-бьра дькьм, дәсте кʹижанада тʹӧнә?» (Луԛа 14:12-14). Бьдьнә бәр чʹәʹве хԝә кӧ хушк йан бьракирʹа аликʹари лазьм ә, чьмки әԝи тьштәкида шаши бәрʹдайә, йан жи һәрге кәсәк нашекьринә кӧ әм ԝи тʹәглифи мала хԝә дькьн. Дәрәщед ӧсада, әм гәрәке әве тʹәмийе биньн сери кӧ рʹеза ве рʹожеда ньвисар ә. Һәрге һун әве ширәте тʹьме биньн сери, һуне бәхтәԝар бьн чьмки бь дьл у әшԛ мәрʹд ьн (Кʹар. Шанд. 20:35). w17.10 9 ¶12

Жьна Потифар чʹәʹв бәрда Усьв, чьмки әԝ «бәжьн у баледа йәки бәрбьчʹәʹв у бәдәԝ бу». Әԝе зоре Усьв дькьр сәва тʹәви ԝе рʹазе. Чахе әԝ дәрәщә ида лап хьраб бу, әԝ жь ԝе рʹәви. Сәрһатийа Усьв чь мә һин дькә? Чахе әм тенә щерʹьбандьне кӧ ԛануна Йаһоԝа бьтʹәрьбиньн, әм дәрберʹа гәрәке бьрʹәвьн жь ве щерʹьбандьне у нәкʹәвьнә тʹәльке (Мәтʹлк. 1:10). Һьнәк пешийа кӧ бунә Шәʹдед Йаһоԝа, хԝарьнева, вәхԝарьнева, щьхарәкʹьшандьнева, наркотикева, бенамусийева у тьштед дьнва гьредайи бун. Ле һәла һе паши ньхӧмандьне жи щара әԝана ԝан тьштада диса жи тенә щерʹьбандьне. Һәрге дәрәща ԝә жи ӧса йә у һун дьвиньн кӧ дькарьн ԛануна Йаһоԝа бьтʹәрьбиньн, бьсәкьньн у бьфькьрьн кӧ әв йәк ԝе чь ахьри бинә. Мәсәлә, һәрге һун хԝә нәгьрьн һәләԛәтийа ԝә тʹәви Йаһоԝа дькарә хьраб бә. Пешда бьфькьрьн кӧ кʹижан дәрәщада һун дькарьн бенә щерʹьбандьне у ча һун дькарьн хԝә жь ԝан дәрәща хԝәй кьн (Зәб. 26:4, 5; Мәтʹлк. 22:3). Гава һун бькʹәвьнә дәрәще ӧсада, жь Йаһоԝа һиви кьн кӧ сәрԝахтийе у ԛәԝате бьдә ԝә, сәва хԝә бьгьрьн у гӧнә нәкьн. w17.09 4-5 ¶8-9

Әм ӧса жи дькарьн бьбьнә достед Йаһоԝа, һәрге әм кем бькʹәвьнә нава комерсйа ве дьнйайе у һәбука «рʹаст» бьгәрʹьн. Ве йәкеда Бьраһим мәсәләкә баш мәрʹа һиштийә. Әԝи гӧрʹа Йаһоԝа кьр, у ԝәлате дәԝләти Ур һишт чу сәва чадьрада бьжи. Бәле, әԝи ӧса кьр чьмки дьхԝәст бьбә досте Йаһоԝа (Ибрн. 11:8-10). Бьраһим тʹӧ щар нәдькʹәтә пәй һәбуке, чьмки бь тʹәмами итʹбарийа хԝә Хԝәде дьани (Дәстп. 14:22, 23). Иса шагьртед хԝә һелан дькьр, ԝәки баԝәрийа ԝан жи ӧса ԛайим бә. Щарәке, әԝи мәрьве дәԝләтирʹа гот: «Һәгәр тӧ дьхԝази кʹамьл би, һәрә һәбука хԝә бьфьрошә бьдә фәԛира, һьнге хьзна тә ԝе ль әʹзмана һәбә. У пәй мьн ԝәрә» (Мәт. 19:21). Йазьх, баԝәрийа ԝи мерьки кем бу, ле һәбун мәрьв кӧ итʹбарийа хԝә бь тʹәмами Хԝәде дьанин. w17.07 10 ¶12

Паши 430 сала чахе Бьраһим Чʹәме Фәратрʹа дәрбаз бу, рʹькʹьнйата ԝи бу мьләт, кʹижан кӧ гәрәке ԝи әʹрди ԝар буйа (Дәркʹ. 12:40-42; Галт. 3:17). Бьраһим бь дьл һивийе бу у сәбьр дькьр, чьмки баԝәрийа хԝә Йаһоԝа у созе ԝи дьани (Ибрн. 11:8-12). Рʹаст ә Бьраһим бь тʹәмами пе чʹәʹве хԝә нәдит әв соз ча һатә сери, йәкә әԝ бь шабуне сәбьр дькьр. Ле бьдьнә бәр чʹәʹве хԝә чахе Бьраһим дьнйа тʹәзәда жь мьрьне рʹабә, әԝ ԝе чьԛас ша бә. Әԝ ԝе әʹщебмайи бьминә кӧ Кʹьтеба Пирозда сәрһатийа ԝи у рʹькʹьнйата ԝи гәләк щийада һатийә ньвисаре. Бьдьн бәр чʹәʹве хԝә, әԝ ԝе ча зәндәгьрти бьминә гава пебьһʹәсә, кӧ әԝи роләкә чьԛас мәзьн листийә ԛьрара Хԝәдеда дәрһәԛа Мәсиһ! Бешьк, әԝ ԝе бьвинә кӧ чьԛас һежа бу, ԝәки һаԛас ԝәхт сәбьр кьр у һивийе ма. w17.08 5-6 ¶10-11

Хәбәра орижинал кӧ һатә ԝәлгәрʹандьне ча «һʹәрами», тʹәне бенамуси найе һʹәсабе. Мәсәлә, дькарьн бежьн кӧ щьхарәкʹьшандьн у һʹәнәкед нәщайиз жи дькʹәвьнә нава ве йәке (2 Корн. 7:1; Әфәс. 5:3, 4). Һʹәрами ӧса жи әԝ ә, чахе мәрьв тьштед нәрʹаст дьзива дькә, мәсәлә хԝәндьна кʹьтебед дәрһәԛа бенамусийе, ньһерʹандьна порнографйайе, кʹижан кӧ дьбә бәрбь хәйсәте һʹәрам, демәк мастурбасийайе. Мәрьвед кӧ тʹьме порнографйайе дьньһерʹьн, нав хԝәда «тәме хьраб» пешда тиньн, у паше секс бона ԝан дьбә чаԝа наркотик. Бь леколинкьрьнәке һатә кʹьфше, кӧ мәрьвед ӧсарʹа һе чәтьн ә тʹәрка ве йәке бьдьн, нә кӧ тʹәрка наркотикайе йан алкоголизме. Бәле, ньһерʹандьна порнографйайе ахьрийа хьраб тинә, мәсәлә шәрми, хәбатеда сьст, малбәтеда бебәхт, һәвԛәтандьн, у хԝәкӧштьн. w17.08 19 ¶8-9

Чахе зәбурбеж дьфькьри кӧ чаԝа Исраели пе ԛәԝата Хԝәде вәгәрʹийанә Оршәлиме, әԝи кʹьламеда ԝан гьлийед жь рʹеза иройин гот. Бәле, зәбурбеж гәләк дьлрʹьһʹәт бу, чьмки заньбу кӧ Хԝәде ԝе дәргәһед шәһәре ԝан ԛәԝи кә у хьзмәткʹаред хԝә хԝәй кә! Ԝәʹде чәтьнайа чахе һун бәрхԝә дькʹәвьн у ньзаньн чь бькьн, Йаһоԝа дькарә сәрԝахтийе бьдә ԝә сәва әве чәтьнайе сафи кьн. Зәбурбеж гот кӧ Хԝәде «әʹмьре Хԝә дьшинә сәр дьне у хәбәра Ԝи зу бәла дьбә». Әԝ зәбура хԝәда гьли дькә кӧ Хԝәде бәрфе дьшинә, ԛьше дьрʹәшинә, у бузе дькә тәйрок. Паши ван гьлийа әԝ пьрсе дьдә: «Кʹи дькарә ль бәр сәрма Ԝи тәйах кә?» Зәбурбеж щаба ве пьрсе дьдә кӧ Йаһоԝа «хәбәра хԝә дьшинә ԝан дьһʹәлинә» (Зәб. 147:15-18). Бәле, Хԝәдейе һәри билан у һәри зор, кʹижан кӧ һʹӧкӧм дькә сәр тәйрок у бәрфе, дькарә али ԝә бькә һәр тәнгасийада тәйах кьн. w17.07 20 ¶14-15

Йаһоԝа сәрԝере рʹаст ә у һʹӧкӧмәтийа ԝи һәри баш ә. Ләма жи әԝ һежа йә кӧ әм бь дьл у щан пьштгьрийа сәрԝертийа ԝи бькьн. Чьрʹа? Чьмки Йаһоԝа һәр тьшт әʹфьрандьн, у ләма бь тʹәмами тʹәне изьна ԝи һәйә ча сәр әʹрде, ӧса жи сәр әʹзмана сәр һʹәмуйа сәрԝертийе бькә. Шәйтʹан тʹӧ тьшт нәәʹфьрандийә, ләма жи изьна ԝи тʹӧнә сәрԝертийе дьнйайе бькә. Ле әԝ у мәрьвед пешьн хԝәрʹази бун, ләма әԝана мьԛабьли сәрԝертийа Йаһоԝа рʹабун (Йерәм. 10:23). Рʹаст ә азайа ԝан һәбу бьжберьн кӧ гӧрʹа Хԝәдеда бьн йан на, ле гәло әԝ бьжартьн рʹаст бу? На. Азайа бьжартьне мәрьварʹа изьне дьдә кӧ хԝәха бьжартьна у сафикьрьна бькьн, ле әԝ найе һʹәсабе ԝәки гәрәке мьԛабьли Әʹфьрандаре хԝә дәрен, кʹижан кӧ әʹмьр дайә ԝан. Демәк, кʹе кӧ мьԛабьли Хԝәде дәрте, әԝ азайа хԝә нәрʹаст дьдә хәбате. Бь рʹастийе һʹәму мәрьв гәрәке бьн сәрԝертийа Йаһоԝада бьн. w17.06 27-28 ¶2-4

Һәрге әм хьзмәтийа хԝә ԛимәт дькьн, әме мина Паԝлос ԝәʹде пәйкʹәтьна жи хьзмәт бькьн (Кʹар. Шанд. 14:19-22). Жь сала 1930 һʹәта ԝәкә сала 1944, хушк-бьред Дәԝләтед Йәкбуйида ԛайим дьһатьнә зерʹандьне. Ле әԝана мина Паԝлос ԛәԝи дьсәкьнин у хьзмәтийа хԝә нәдьданә сәкьнандьне. Сәва кӧ дәԝләт изьне бьдә ԝәки әм аза мьзгинийе бәла кьн, бьра әԝ шьхӧл дьданә диԝане у гәләк щар әԝана сәр кʹәтьн. Сала 1943-да, бьред мә Диԝана Һәрә Мәзьнда йа Дәԝләтед Йәкбуйида сәр кʹәтьн, у Нейтан Нор дәрһәԛа ве йәке мьзгинванарʹа ӧса гот: «Әԝ сәркʹәтьн бь сайа хирәта ԝә йә. . . . Әԝ сәркʹәтьн йа щьмәʹта Хӧдан ә, кʹижан кӧ ԛәԝи дьсәкьнә у ләма сәр дькʹәвә». Бәле, һәрге әм хьзмәтийе һʹьз дькьн, тʹӧ тьшт рʹе мә нагьрә кӧ бәрдәԝам кьн хьзмәт кьн. Һәрге әм хьзмәтийа хԝә ԛимәт дькьн, әме тʹӧ щар пәй «сьһʹәта» нәкʹәвьн. Дәԝсе, әме һәр тьшти бькьн чь дәсте мәва те, сәва хьзмәтийа хԝә биньн сери (2 Тимтʹ. 4:5). w17.06 11-12 ¶11-12

Чахе әм ԛайим Хԝәде һʹьз дькьн, әԝ йәк али мә дькә гӧрʹа тʹәмийед ԝи бькьн, ԛәԝи бьминьн у хьрабийе нәфрʹәт кьн (Зәб. 97:10). Ле Шәйтʹан у дьнйа ԝи һәр тьшти дькьн сәва һʹьзкьрьна мә һьндава Хԝәде кʹӧта кьн. Әԝ дьнйа, һʹьзкьрьне нәрʹаст дьдә кʹьфше. Мәрьв нә кӧ Әʹфьрандар һʹьз дькьн, ле хԝә һʹьз дькьн (2 Тимтʹ. 3:2). Әԝана «дьлһавьжи, чʹәʹвһавьжи у кʹӧбар-бабахи» дьдьнә кʹьфше (1 Йуһʹн. 2:16). Паԝлосе шанди Мәсиһи пешда ширәт кьрьн, ԝәки нәкʹәвьнә бьн байе хԝәстьна бәдәне. Әԝи готә ԝан: «Ахьрийа фькьра бьнйатʹа мәрьвайе мьрьн ә . . . Чьмки фькьра бьнйатʹа мәрьвайе дьжмьне Хԝәде йә» (Рʹом. 8:6, 7). Мәрьвед кӧ әʹмьре хԝәда тʹәне пәй һәбуке йан жи хԝәстьнед сексуали дькʹәвьн, ахьрийеда рʹасти гәләк кӧл-дәрда тен у бәхтәԝар ниньн (1 Корн. 6:18; 1 Тимтʹ. 6:9, 10). w17.05 18 ¶5-6

Чахе хушк-бьред рʹәви дәʹԝа накьн ԝәки али ԝан бькьн у рʹази нә сәва ве йәке, әԝ хушк-бьред кӧ аликʹарийе дьдьнә ԝан, ша дьбьн. Ле фәрз ә ԝәки хушк-бьред рʹәви ахьрийеда хԝәха бона һʹәԝщед хԝә хәм бькьн. Әԝ йәк ԝе али ԝан бькә, ԝәки ԛәдьре хԝә бьзаньбьн у һәләԛәтийа баш хԝәй кьн тʹәви хушк-бьред хԝә (2 Тʹеслн. 3:7-9). Ле йәкә әм гәрәке диса жи али ԝан бькьн. Әʹсәйи нинә гәләк пʹәре мә һәбә сәва аликʹарийе бьдьнә рʹәвийа. Әԝана дьһа зәʹф һʹәԝщә нә кӧ кʹеләка ԝан бьн у һʹьзкьрьна хԝә ԝанрʹа бьдьнә кʹьфше. Мәсәлә, һун дькарьн ԝанрʹа нишан кьн, кӧ чаԝа дькарьн шәһәрда һәрʹьн-бен у пе чь, кʹидәре хԝарьна баш у әʹрзан бькʹьрʹьн. Йан жи һун дькарьн али ԝан бькьн, кӧ һащәта хԝәрʹа дәстхьн, сәва пʹешәки һин бьн у пʹәре нане хԝә чекьн. Ле йа лапә фәрз әԝ ә, кӧ али ԝан бькьн сәва әԝана һини щьвата тʹәзә бьн. Һәрге дькарьн ԝана тʹәви хԝә бьвьн щьвате. Ӧса жи ԝанрʹа бежьн кӧ әԝана ча дькарьн мьһала ԝәда мьзгинийе бәла кьн, у тʹәви ԝан хьзмәт кьн. w17.05 5 ¶11-12

Гәләк мәрьв һʹьш-аԛьле хԝә ӧса зәʹф дьдьнә сәр хԝәстьнед дьле хԝә, кӧ ԝанрʹа чәтьн дьбә рʹаст сәр һәбуке бьньһерʹьн. Гәло чьрʹа? Чьмки әԝана ида тедәрнахьн кӧ бәр чʹәʹве Хԝәде чь ԛимәт ә (1 Корн. 2:14). Һʹьш-аԛьле ԝан те дадан, ләма ԝанрʹа чәтьн дьбә ԛәнщи у хьрабийе жь һәв дәрхьн (Ибрн. 5:11-14). Ахьрийеда, әԝана ида нькарьн хԝә бьгьрьн, у һе зәʹф у зәʹф тьшта дьхԝазьн у тʹер набьн (Ԝаиз 5:10). Ле чʹарә һәйә кӧ әм ча дькарьн хԝә жь ве йәке хԝәй кьн. Әм гәрәке тʹьме Хәбәра Хԝәде, демәк Кʹьтеба Пироз бьхуньн, сәва нәкʹәвьнә тʹәлька һәбуке. Иса тʹьме дьфькьри сәр рʹастийа у принсипед Хԝәде, у әԝе йәке али ԝи кьр кӧ ԝәʹде щерʹьбандьне амьн бьминә. Иро жи һәрге әм нахԝазьн бькʹәвьнә тʹәлька һәбуке, әм гәрәке жийина хԝәда принсипед Кʹьтеба Пироз бьдьнә хәбате (Мәт. 4:8-10). Бь ве йәке әме нишан кьн кӧ әм һе зедә Иса һʹьз дькьн нә кӧ һәбуке. w17.05 26 ¶17