Кануна Пешьн

Ԝәʹде бәре, мәрьва меванһʹьзи нишан дькьрьн, мәсәлә мевана тʹәглифи мала хԝә дькьрьн сәр нанхԝарьне (Дәстп. 18:1-8; Һʹакьм. 13:15; Луԛа 24:28-30). Бь ве йәке ԝана нишан дькьр, ԝәки дьхԝазьн һәвалти у әʹдьлайи һәбә ортʹа ԝанда. Ле әм бәре әʹԝльн гәрәке һьндава кʹе меванһʹьз бьн? Һьндава хушк-бьред щьвата хԝә. Зәманед гьран һивийа мә нә, у әме һәврʹа гәләк лазьм бьн. Бәле, лазьм ә ортʹа мә һʹәму хушк-бьрада һәвалтийа амьн у әʹдьлайи һәбә. Чахе бәрпьрсийаред мьһале тʹәсәлийа щьвата дькьн, гәләк щар ԝанрʹа лазьм ә щики бьминьн. Ӧса жи бона ԝан хушк-бьред кӧ тʹәшкиләта мәда щурʹә-щурʹә мәкʹтәбада һин дьбьн, йан жи әԝед кӧ бь рʹәзәдьли авакьрьнада дьхәбьтьн, щара ԝанрʹа жи лазьм ә щи сәва бьминьн. Ӧса жи чахе тʹәшԛәлед тʹәбийәте дьԛәԝьмьн у хушк-бьра бе мал дьминьн, һʹәта әԝана мала хԝә чекьн, лазьм ә ԝәʹдәлу щики бьминьн. Әм гәрәке нәфькьрьн кӧ тʹәне мала кʹижана мәзьн ә у баш ә, әԝана дькарьн мевана ԛәбул кьн сәва бьминьн. Әԝана дьбәкә ида гәләк щар әԝ йәк кьрьнә. Һәрге жи мала ԝә бьчʹук ә у нәдәԝләти йә, йәкә һун дькарьн меванһʹьзийе нишан кьн, ԝана мала хԝәда ԛәбул кьн. w18.03 15 ¶6; 16 ¶9

Гәло чь ԝе али мә бькә кӧ пешда һәрʹьн? Тʹәне рʹӧһʹе Хԝәдейи пироз, нә кӧ ԛәԝата мә (Фили. 4:13). Хԝәгьртьн кӧ дькʹәвә нав бәре рʹӧһʹе пироз, гьредайи йә тʹәви хԝәрʹасткьрьне. Ӧса жи лазьм ә әм дӧа кьн, Кʹьтеба Пироз леколин бькьн, у бьфькьрьн сәр хԝәндьне. Ле дьбәкә ԝәрʹа чәтьн ә Хәбәра Хԝәде леколин кьн, йан жи һʹьз накьн леколина бькьн. Бәрхԝә нәкʹәвьн, Йаһоԝа ве йәкеда ԝе али ԝә бькә, һәрге һун рʹе бьдьнә ԝи. Әԝ дькарә али ԝә бькә ԝәки «һәйрʹа» Хәбәра Ԝида бьн (1 Пәт. 2:2). Пешийе, Йаһоԝарʹа дӧа бькьн, сәва али ԝә бькә һун хԝә һини леколинкьрьне бькьн. Паше, ль гора дӧайед хԝә гава бавежьн. Дьбәкә пешийе һун һьндьки леколин бькьн, ле ԝәʹдә шунда, леколинкьрьн ԝе ԝәрʹа дьһа һеса у һʹәԝас бә! Әԝ ԝәʹдә бона ԝә ԝе бь рʹасти хԝәш бә, чьмки һун дәрһәԛа фькьред Йаһоԝайә ԛимәт пебьһʹәсьн (1 Тимтʹ. 4:15). w18.03 29 ¶5-6

Шагьрте кӧ дьхԝазә бе ньхӧмандьне, гәрәке занәбуна рʹаст дәрһәԛа Хԝәде ԛазанщ кә, бьзаньбә ԛьрара Ԝи чь йә, у ӧса жи Хԝәде чь кьр сәва инсанәте хьлаз кә (1 Тимтʹ. 2:3-6). Баԝәрийа шагьрт гәрәке һәбә сәва кӧ ԝи һелан кә һәр тьшти бьтʹәрькинә чь кӧ Хԝәде хԝәш найе, у пе принсипед Йаһоԝа бьжи (Кʹар. Шанд. 3:19). Һәрге әԝ тьштәки ӧса дькә чь кӧ бәр чʹәʹве Хԝәде рʹәш ә, фәʹмдари йә кӧ әԝ нькарә Хԝәдерʹа созе тʹәсмилбуйине бьдә (1 Корн. 6:9, 10). Әԝе кӧ дьхԝазә хԝә тʹәсмили Хԝәде кә, ӧса жи гәрәке бе сәр щьвата у хирәт бә бәлакьрьна мьзгинийеда (Кʹар. Шанд. 1:8). Шагьрт гәрәке әван һʹәму тьшта бькә, у тʹәне паши ве йәке дькарә дӧада хԝә тʹәсмили Йаһоԝа кә у тʹәсмилбуйина хԝә пе ньхӧмандьне избат кә. w18.03 6 ¶12

Гәло чьрʹа Йаһоԝа Мәрйәм бьжарт сәва бьбә дийа Иса? Бешьк дькарьн бежьн, чьмки әԝ мәрьвәкә рʹӧһʹани бу. Рʹӧһʹанийа ԝе те кʹьфше жь ве йәке, кӧ әԝе ча бь гьлийа Йаһоԝа рʹумәт кьр чахе тʹәсәлийа мәрьвед хԝә Зәкәрйа у Елизабете кьр (Луԛа 1:46-55). Жь гьлийед ԝе әʹйан те кʹьфше, ԝәки әԝе Хәбәра Хԝәде чьԛас ԛәԝи һʹьз дькьр, у Ньвисаред Ибрани рʹьнд заньбу (Дәстп. 30:13; 1 Сам. 2:1-10; Малх. 3:12). Ӧса жи чахе әԝ у Усьв тʹәзә зәԝьщибун, сафи кьрьбун кӧ һʹәта Иса ԝанрʹа нәбә, ча жьн-мер тʹәви һәв рʹанәзен. Әв дьдә кʹьфше, ԝәки бона ԝан һәрда жи һе зедә ԛьрара Йаһоԝа фәрз бу, нә кӧ хԝәстьнед ԝан (Мәт. 1:25). Ԝәʹдә дәрбаз дьбу, Мәрйәме дина хԝә дьдайе кӧ чь дьԛәԝьмә әʹмьре Исада у гӧһ дьда һәр готьнед Исайә билан. Әԝ гәләк дьфькьри дәрһәԛа ԛьрара Хԝәде һьндава Мәсиһ. Ԝәрә әм чʹәʹв бьдьнә Мәрйәме, у әʹмьре хԝәда тʹьме ԛьрара Хԝәде дайньн щийе пешьн. w18.02 21 ¶11

Ча әм дькарьн чʹәʹв бьдьнә баԝәри у гӧһдарийа Ибо? Фьрԛи тʹӧнә әм рʹасти чь чәтьнайа бен, бьра Йаһоԝа әʹмьре мәда тʹьме сәр щийе пешьн бә, бь тʹәмами итʹбарийа хԝә ԝи биньн, у бь тʹәмамийа дьле хԝә гӧрʹа ԝи бькьн. Мәʹнийед мә һе гәләк һәнә ве йәке бькьн, нә кӧ йед Ибо! Мәсәлә бьфькьрьн сәр ве йәке, кӧ әм дәрһәԛа Шәйтʹан у тʹәлькед ԝи һе зедә заньн (2 Корн. 2:11). Һьн жи бь сайа кʹьтеба Ибо, әм заньн кӧ чьрʹа Хԝәде дьһелә ԝәки кӧл-дәрд һәбьн. Жь Кʹьтеба Данийел әм фәʹм дькьн кӧ Пʹадшатийа Хԝәде сәрԝертийа реали йә, кʹижан кӧ бьн сәрԝертийа Иса Мәсиһда нә (Дан. 7:13, 14). У әм заньн кӧ зутьрәке әв Пʹадшати ԝе һʹәму кӧл-дәрда кʹӧта кә. Сәрһатийа Ибо ӧса жи мә һин дькә кӧ чьԛас фәрз ә әм бәр дьле хушк-бьрада бен, чахе әԝана тәʹли-тәнгийада ньн. Һьнәк жь ԝан хушк-бьра дьбәкә мина Ибо, тьштед нәрʹаст бежьн (Ԝаиз 7:7). Ԝәрә әм ԝана нәһәԛ нәкьн, ле ԝана фәʹм бькьн у дьлгәрм кьн. Ԝи щурʹәйи әме чʹәʹв бьдьнә Йаһоԝа, Баве мәйи һʹьзкьри у рʹәʹм (Зәб. 103:8). w18.02 6 ¶16; 7 ¶19-20

Һьнә мәрьв ԛӧрʹә бунә жь бо бәдәԝбуна хԝә, йан жи чьмки нав у дәнг ьн, алийе мусикида һостә нә, физикида ԛәԝи нә, йан жи чьмки гьшк ԝанрʹа фьрнаԛ дьбьн. Бал Даԝьд әԝ һәр фәрәсәт һәбу, ле йәкә тʹәмамийа әʹмьре хԝәда әԝ мьлук ма. Чахе әԝи Голйатʹ кӧшт, Шаԝул Пʹадша жерʹа гот ԝәки дьхԝазә ԛиза хԝә бьдә ԝи. Дина хԝә бьдьн кӧ Даԝьд ча сәр ве йәке щаба ԝи да, әԝи гот: «Әз кʹи мә . . . кӧ әз бьбьм зәвайе ԛьрал [пʹадша]?» (1 Сам. 18:18). Мина Даԝьд, иро щьмәʹта Йаһоԝа жи мьлукти нав хԝәда пешда тинә. Әм мәтʹал дьминьн чахе заньн кӧ Йаһоԝа, Кәсе һәри жорьн нав дьнйалькеда, мьлук ә. Әм алийе хԝәда дьхԝазьн әве ширәте бьдьнә хәбате: «Дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн» (Колс. 3:12). Һьн жи әм заньн ԝәки һʹьзкьрьн «кʹӧбар набә, пʹьшька хԝәда наԝәрьмә» (1 Корн. 13:4). Чахе әм мьлук ьн, әԝ йәк дькарә мәрьва бәрбь Йаһоԝа бинә. w18.01 28 ¶6-7

Иро дьбәкә жь мә бе хԝәстьне кӧ бона проектәки мәхсус ԛӧрбана бькьн (Кʹар. Шанд. 4:34, 35; 1 Корн. 16:2). Мәсәлә, дьбәкә щьвата ԝә дьхԝазә Ода Щьвата тʹәзә ава кә йан жи тʹәзә бькә. Ӧса жи дьбәкә пʹәрә лазьм ә сәва хәрще щьвата мәзьн дадьн, йан жи аликʹари бьдьнә хушк-бьра ԝәʹде тʹәшԛәлед тʹәбийәте. Ԛӧрбанкьрьнед мә ӧса жи аликʹари дьдьнә мисйонера, пешәнгед мәхсус, бәрпьрсийаред мьһале, хьзмәткʹаред филиала сәрәкә у ӧса жи филиалед дьн нав тʹәмамийа дьнйайе. Һәр кәс жь мә дькарә алийе хԝәда пьштгьрийа шьхӧле Йаһоԝа бькә, кʹижан кӧ ԝан рʹожед ахьрийеда те кьрьне. Чахе әм пʹәрә ԛӧрбан дькьн ԛӧтʹийед Ода Щьватеда йан жи малпәра мә jw.org-да, әм тʹӧ кәсирʹа навежьн кӧ мә пʹәрә ԛӧрбан кьрийә. Дьбәкә әм дьфькьрьн ԝәки пʹәре кӧ әм ԛӧрбан дькьн, ԛә тьштәки нинә чьмки һьндьк ә. Ле бь рʹастийе һʹәчʹи зәʹф пʹәре ԛӧрбанкьри кӧ тенә тʹәшкиләте, бь сайа ԛӧрбанкьрьнед һьндьк тʹоп дьбьн, нә кӧ чәнд ԛӧрбанкьрьнед мәзьн. w18.01 19 ¶10-11

Ньхӧмандьн әԝ һәйә дәʹԝакьрьн бона Мәсиһийа, у гавәкә гәләк фәрз ә сәва хьлаз бьн (Мәт. 28:19, 20). Ньхӧмандьна тә нишан дькә, кӧ тә ида хԝә тʹәсмили Хԝәде кьрийә. Тә соз да Йаһоԝа кӧ ԝи һʹьз бьки у ԛьрара ԝи сәр һәр тьштирʹа бьгьри. Тӧйе тʹӧ щар пʹошман нәби, ԝәки тә хԝә дайә дәсте Йаһоԝа. Бьфькьрә сәр ве йәке: Мәрьвед кӧ Йаһоԝа нас накьн, бьн һʹӧкӧме Шәйтʹанда ньн. У бь рʹастийе ԛә тʹалаша Мире-щьна тӧ нини у әԝ нахԝазә тӧ хьлаз би. Хенщи ве йәке, әԝ ԝе гәләк ша бә һәрге тӧ әʹмьре хԝәйи һʹәта-һʹәтайе ӧнда ки, бь ве йәке кӧ алийе ԝи бьгьри у пьшта хԝә бьди Йаһоԝа. Дина хԝә бьде, кӧ тә чь кʹәрәм стандийә паши тʹәсмилбуйин у ньхӧмандьна хԝә. Тә әʹмьре хԝә дайә дәсте Йаһоԝа, у ләма тӧ дькари бей дӧдьлибуне бежи: «Хӧдан тʹәви мьн ә, әз натьрсьм, инсане чь ль мьн бькә?» (Зәб. 118:6). Бәле, алийе Хԝәде бьгьри у ԛәбулкьрьна ԝи бьстини, әԝ ԛәдьрәки һәри мәзьн ә. w17.12 23-24 ¶1-3

Ԝе дәрәщед ӧса һәбьн кӧ әм һерс кʹәвьн сәр гьли йан кьред хушк-бьред щьватеда, йан жи әԝана сәр мә һерс кәвьн. Әв бь рʹасти дькарә бьбә щерʹьбандьнәкә мәзьн. Ле әԝ щерʹьбандьн мәрʹа мәщале дьдә сәва амьнийа хԝә Йаһоԝарʹа избат кьн, у һин бьн кӧ йәктийе у әʹдьлайе тʹәви хушк-бьред хԝә хԝәй кьн. Рʹаст ә кемасийед ԝан хушк-бьра һәнә, ле йәкә Йаһоԝа ԝана һʹьз дькә у әм гәрәке чʹәʹв бьдьнә ԝи. Йаһоԝа хьзмәткʹаред хԝә жь щерʹьбандьна хԝәй накә, у әԝ йәк те кʹьфше жь сәрһатийа Усьв. Чахе Усьв щаһьл бу, бьред ԝи жь һʹәвсудийе ԝи фьротьн, у паше ԝи бьрьн Мьсьре (Дәстп. 37:28). Йаһоԝа һаш жь һʹале ԝи һәбу у бешьк әԝ бәрхԝә кʹәт кӧ чь һатә сәре ԝи. Ле йәкә Йаһоԝа нәкʹәтә нав ԝи шьхӧли. Ԝәʹдә шунда Усьв кʹәтә кәле чьмки шәрʹ авитьнә ԝи кӧ йанчь әԝ дьхԝәст тʹәви жьна Потифар рʹазе. Һьнге жи Хԝәде Усьв хьлаз нәкьр. Ле гәло әв те һʹәсабе кӧ Хԝәде ԝи һишт? Тʹӧ щар на! Кʹьтеба Пироз дьбежә: «Хӧдан тʹәви ԝи бу у һʹәму шьхӧле ԝи Хӧдан жерʹа ль һәв дани» (Дәстп. 39:21-23). w18.01 9-10 ¶12-14

Һәрге кәсәк ԝә бьпьрсә: «Баԝәрийа ԝәда һинкьрьнед сәрәкә кʹижан ьн?» Һуне әʹсә бежьн кӧ һун баԝәр дькьн, ԝәки Йаһоԝа йә Әʹфьрандар у Жийиндар. Ӧса жи дьԛәԝьмә һун бежьн кӧ һун Иса Мәсиһ баԝәр дькьн, йе кӧ бу ԛӧрбан у кʹьрʹин. Һьн жи дьбәкә һун бь шабуне бежьн кӧ һун баԝәр дькьн, ԝәки әʹрд ԝе бьбә щьнәт, кʹидәре кӧ щьмәʹта Хԝәде ԝе һʹәта-һʹәтайе бьжи. Ле гәло һуне ве йәке жи бежьн, ԝәки һинкьрьнәкә ԝәйә сәрәкә әԝ ә, кӧ рʹабуна мьрийа ԝе һәбә? Һәрге жи әм дьфькьрьн кӧ сахкьрьн мәрʹа ԝе нәлазьм бә, чьмки тәнгасийа мәзьнда әме хьлаз бьн у бьжин һʹәта-һʹәтайе, йәкә созе дәрһәԛа рʹабуна мьрийа бона мә һинкьрьнәкә сәрәкә йә. Баԝәри һьндава рʹабуна мьрийа гәләк фәрз ә. Бәле, һәрге Мәсиһ жь мьрьне рʹанәбуйа, әԝ ԝе сәр әʹзмана нәбуйа Пʹадша, у һьн жи әм дәрһәԛа сәрԝертийа ԝи чь кӧ мәрьва һин дькьн, ԝе бош-бәтал буйа (1 Корн. 15:12-19). Ле әм заньн кӧ Иса жь мьрьне рʹабуйә у баԝәрийа мә кӧ Хԝәде дькарә мьрийа рʹакә, ԛәԝи дьминә (Марԛ. 12:18; Кʹар. Шанд. 4:2, 3; 17:32; 23:6-8). w17.12 8 ¶1-2

Ферьсийа дина хԝә дьданә тʹәне сәр кьре мәрьв, нә кӧ әԝ дьлда йәки ча нә. Чахе Ферьсийа дитьн кӧ Иса чу мала Мәтта сәр нанхԝарьне, ԝана жь шагьртед ԝи пьрсин: «Чьма дәрсдаре ԝә тʹәви хәрщгьр у гӧнәкʹара дьхԝә у вәдьхԝә?». Иса щаба ԝан да: «Сахләм нә һʹәԝще һʹәким ьн, ле нәхԝәш. Һәрʹьн мәʹна ван хәбәра һин бьн: ‹Әз рʹәʹме дьхԝазьм, нә кӧ ԛӧрбане›. Әз нәһатьмә гази йед рʹаст кьм, ле гази гӧнәкʹара» (Мәт. 9:9-13). Ле гәло Иса бь ԝан гьлийа кьред нәрʹаст һәԛ дәрдьхьст? Тʹӧ щар на. Бь рʹастийе Иса дьхԝәст, ԝәки әԝана тʹобә бькьн у жь гӧнәкьрьне вәгәрʹьн (Мәт. 4:17). Иса сәрԝахт бу у дьдит кӧ һьнәк жь ԝан «хәрщгьр у гӧнәкʹара» дьхԝәстьн әʹмьре хԝә бьгӧһезьн. Әԝана һатьбун мала Мәтта нә тʹәне бона нанхԝарьне. Гәләк жь ԝана «пәй [Иса] дьчун» (Марԛ. 2:15). Йазьх, ле гәләк Ферьси мина Иса сәр мәрьва нәдьньһерʹин. w17.11 13 ¶2; 16 ¶15

Әм бәхтәԝар ьн кӧ щьвата Мәсиһтида ньн. Щьватеда әм Хәбәра Хԝәде леколин дькьн, у бь һʹьзкьрьн али һәвдӧ дькьн. У әв йәк жи али мә дькә кӧ чʹәʹве хԝә сәр хәлате хԝәй кьн. Ле щара дькарә ӧса бьԛәԝьмә, кӧ һәвнәфәʹмкьрьн пешда бе, у сәва ве йәке дькарә ортʹа хушк-бьрада чәтьнайи пешда бен. Һәрге әм ԝан чәтьнайа зу сафи нәкьн, әв дькарә һерскʹәтьне у бинтәнгийе бал мә пешда бинә (1 Пәт. 3:8, 9). Чаԝа әм дькарьн һерса хԝә бьтәмьриньн сәва хәлата хԝә ӧнда нәкьн? Паԝлос Колоси ширәт кьрьн: «Чаԝа щьмәʹта Хԝәдейә бьжартийә пироз у һʹьзкьри, дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн. Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв» (Колс. 3:12, 13). w17.11 27 ¶7-8

Һәрге Исраелики бе һʹәмде хԝә кәсәк бькӧшта, әԝ гәрәке бьрʹәвийа шәһәре сьтʹарбуне, у бәр дәргәһ «рʹуспийарʹа» гьли кьра кӧ «чь ԛәԝьми». Рʹуспийа гәрәке ԝи бь дьл у щан ԛәбул кьрана. Һьнә ԝәʹдә шунда, ԝана ԝи дьшандьнә бал рʹуспийед ԝи шәһәри, кʹидәре кӧ кӧштьн ԛәԝьмибу, сәва әԝана диԝане бькьн кӧ ча у чьрʹа кӧштьн ԛәԝьми (Жьмар 35:24, 25). Һәрге әван рʹуспийа әʹлам кьрана кӧ әԝи бь рʹастийе нәхԝәстьбу у бе һʹәмде хԝә кӧштьбу, әԝ дькарьбу диса вәгәрʹийа шәһәре сьтʹарбуне. Ле чьрʹа лазьм бу кӧ рʹуспи бькʹәвьнә нав ԝи шьхӧли? Чьмки әԝана гәрәке щьвата Исраел хԝәй кьрана, у ӧса жи али ԝи бькьрана йе кӧ бе һʹәмде хԝә кӧштьбу, сәва әԝи рʹәʹма Йаһоԝа бьстанда. Зандарәки Кʹьтеба Пироз ньвиси кӧ һәрге йе рʹәви нәчуйа бал рʹуспийа, «әԝи хԝә дькьрә хәтайе, . . . чьмки әԝи нәхԝәст хԝәйкьрьна Хԝәде бьстинә». Һәрге әԝи щи-сьтʹар нәдьгәрʹийа ԝан шәһәрада йед кӧ Йаһоԝа башԛә кьрьбу, изьна мәрьве незик йе мьри һәбу кӧ һʹәйфе һьлдә у ԝи бькӧжә. w17.11 9 ¶6-7

Йаһоԝа һʹәта иро пе ордийа мьлйакʹәтед хԝә щьмәʹта хԝә хԝәй дькә у ԛәԝи дькә (Малх. 3:6; Ибрн. 1:7). Жь сала 1919, чахе щьмәʹта Йаһоԝа жь дилтийа Бабилона Мәзьн хьлаз бу, дьжмьнед ԝан һәр тьшт дькьрьн сәва һʹәбандьна рʹаст пешда нәчә. Ле һʹәму кьред ԝан пʹучʹ бун (Әйан. 18:4). Мьлйакʹәт тʹәшкиләта Йаһоԝа хԝәй дькьн, ләма жи әм гәрәке нәтьрсьн кӧ диса әме бькʹәвьнә дәсте религийа ԛәлп (Зәб. 34:7). Бәле, әм гәрәке дӧдьли нәбьн кӧ хьзмәткʹаред Хԝәде нав тʹәмамийа дьнйайе ԝе бәрдәԝам кьн рʹӧһʹанида гәш бьн у пешда һәрʹьн. Ордийа Хԝәде пьшта мә йә. Ԝәʹде тәнгасийа мәзьн, мьлйакʹәтед Йаһоԝа ԝе щьмәʹта ԝи хԝәй кьн, у ԛьрʹа ԝан һʹәмуйа биньн йед кӧ мьԛабьли сәрԝертийа ԝи дәртен (2 Тʹеслн. 1:7, 8). Әв рʹож ԝе чьԛас мәхсус бә! w17.10 28 ¶10-11

Чахе нәфәрәки ԝә жь щьвате һатә дәрхьстьне, йан жи хԝә жь щьвате дур дьгьрә, әԝ йәк дькарә бона ԝә ӧса бә ча шур дьле ԝә хьн. Ле һун ча дькарьн бәр ве еша мәзьн тәйах кьн? Фәрз ә ԝәки хирәт бьн шьхӧлед рʹӧһʹанида. Тʹьме Кʹьтеба Пироз бьхуньн, хԝә бона щьвате һазьр кьн, һәрʹьн хьзмәтийе, у дӧа бькьн Хԝәдерʹа сәва ԛәԝате бьдә ԝә, ԝәки һун сәбьр кьн. Ӧса баԝәрийа ԝә ԝе һе ԛәԝи бә (Щьһуд. 21). Ле һәрге һун тʹәхмин дькьн кӧ дьле ԝә диса гәләк дешә, у нькарьн дьлрʹьһʹәт бьн, сьст нәбьн у ԛәԝи бьн! Ԝәʹдә дәрбаз бә, һуне ида хԝә бьгьрьн у фькьред нәбаш жь һʹьше хԝә дәрхьн. Дина хԝә бьдьнә ньвискʹаре Зәбур 73. Ԝәʹдәки ӧса һәбу чахе ньһерʹандьна ԝи нәрʹаст бу у әԝ әʹщьз бьбу. Ле чахе әԝ кʹәтә пирозгәһа Хԝәде кӧ ԝи бьһʹәбинә, әԝи ньһерʹандьна хԝә гӧһаст (Зәб. 73:16, 17). Һәрге һун жи бь хирәт Хԝәдерʹа хьзмәт кьн, һуне жи ньһерʹандьна хԝә рʹаст хԝәй кьн. w17.10 16 ¶17-18

Чахе Шәйтʹан бахче Әдәнеда тʹәви Һеԝайе хәбәр дьда, пе хәбәрдана хԝә әԝи да кʹьфше йанчь ԛәнщийе жерʹа дьхԝазә. Ле бь рʹастийе дьле ԝида ԛәлпи у дӧрʹути һәбу (Дәстп. 3:4, 5). Ӧса жи биньн бира хԝә Аһитофәл, кӧ һәвале Даԝьд Пʹадша бу. Әԝи хԝә нишан дькьр кӧ йанчь һәвале Даԝьд ә, ле паше әԝи нәмамийа Даԝьд кьр, чьмки кʹара хԝә дьгәрʹийа. Ӧса әԝи хԝә әшкәрә кьр кӧ һәвале рʹаст нибу (2 Сам. 15:31). Иро жи һәнә рʹабәр у мәрьвед дьн, йед кӧ бь «заре хԝәш у һьләкʹарийе» йәктийа щьвате хьраб дькьн. Әԝана хԝә ӧса датиньн те бежи ԛәнщийе дьхԝазьн у һʹәйф ьн, ле бь рʹастийе әԝана хԝәһʹьз ьн у һʹьзкьрьна ԝан ԛәлп ә (Рʹом. 16:17, 18). Һʹьзкьрьна дӧрʹути гәләк сосрәти йә, чьмки әв ԛәлп ә у мәрьва дьхапинә. Рʹаст ә мәрьв дькарә пе дӧрʹутийа хԝә кәсәки бьхапинә, ле Йаһоԝа найе хапандьне. Иса гот ԝәки мәрьвед кӧ дӧрʹутийе дькьн, ԝе ԛайим бенә щәзакьрьне (Мәт. 24:51). Ләма ԝе баш бә кӧ щара пьрсәкә ӧса бьдьнә хԝә: «Гәло һʹьзкьрьна мьн тʹьме һʹәлал ә, йан щара әз йәки хԝәһʹьз ьм у ԛәлп ьм?» w17.10 8 ¶6-8

Чахе әм Хәбәра Хԝәде мәрьварʹа дьхуньн, бь ве йәке әм дьһельн ԝәки Йаһоԝа тʹәви мәрьва хәбәр дә. Рʹезәкә рʹьнд бьжарти дьһа ԛәԝат ә, нә кӧ гьлийед мә (1 Тʹеслн. 2:13). Пьрсәкә ӧса бьдьнә хԝә: «Гәло әз һʹәму мәщала дьдьмә хәбате сәва кӧ ԝәʹде бәлакьрьна мьзгинийе пʹарәкә жь Хәбәра Хԝәде мәрьварʹа бьхуньм?» Ле мәрьварʹа тʹәне рʹеза бьхуньн бәс нинә. Чьрʹа? Чьмки һʹәчʹи зәʹф мәрьв йан ԛә фәʹм накьн Кʹьтеба Пироз, йан жи гәләк һьндьк фәʹм дькьн. Ԛьрʹна йәкеда жи ӧса бу у иро жи ӧса нә. Ләма жи әм гәрәке нәфькьрьн кӧ мәрьв ԝе перʹа-перʹа фәʹм кә әԝ рʹеза кӧ әм жерʹа дьхуньн. Чахе әм рʹезе дьхуньн, лазьм ә дина мәрьв бьдьнә сәр гьлийед сәрәкә жь рʹезе у паше жи шьровәкьн кӧ әԝ чь те һʹәсабе. Һәрге әм ӧса бькьн, Хәбәра Хԝәде ԝе бьгьһижә дьле мәрьва (Луԛа 24:32). w17.09 25 ¶7-8

Һәрге әм дьхԝазьн чʹәʹв бьдьнә Иса, әм гәрәке һьндава хушк-бьред хԝә у мәрьвед дьнда дьлшәԝат бьн (Йуһʹн. 13:34, 35). Хәбәра дьлшәԝати ӧса жи те һʹәсабе «тʹәвайи дәрд бькʹьшиньн». Мәрьве дьлшәԝат дьхԝазә еша мәрьвед дьн сьвьк кә, бь ве йәке кӧ ԝәʹде чәтьнайа аликʹарийе бьде. Ләма жи тʹьме бьфькьрьн кӧ һун чьда дькарьн аликʹарийе бьдьнә мәрьва. Чахе әм дьвиньн кӧ мәрьв жь бо хәзәба зийане дьстиньн, дьле мә дьшәԝьтә. Щьмәʹта Йаһоԝа әʹйан ә бь ве йәке кӧ ԝәʹде ӧсада тʹьме дьчьнә һәԝара ԝан, йед кӧ зийан стандьнә (1 Пәт. 2:17). Хушкәкә мә Жапони ль ԝи щийи дьжит, кʹидәре кӧ сала 2011-да әʹрдһәж у тсунами ԛәԝьми. Әви щийи зийанәкә мәзьн станд. Әԝ хушк дьбежә кӧ әԝ «гәләк ԛәԝи бу у дьлгәрм бу», чахе дьдит ча хушк-бьра жь Жапонйайе у ԝәлатед дор бәр, бь рʹәзәдьли аликʹари дьдан кӧ мал у Одед Щьвата тʹәзә кьн. Әԝе ньвиси: «Әве ԛәԝьмандьне әз дамә фәʹмкьрьне кӧ Йаһоԝа мә һʹьз дькә, у хушк-бьра чьԛас бона һәвдӧ хәм дькьн. Гәләк хушк-бьра нав тʹәмамийа дьнйайе бона мә дӧа дькьн». w17.09 11 ¶12-13

Чьрʹа әм гәрәке хԝәгьрти бьн? Дӧ мәʹнийед фәрз һәнә. Мәʹнийа пешьн әв ә, һәрге әм хԝәгьрти бьн чәтьнайед мә ԝе кем бьн. Әм емосйалида һе ԛәԝи бьн, һәләԛәтийа мә тʹәви мәрьва ԝе баш бә, әме һерса хԝә бьгьрьн, кем хәмгин бьн у кем бькʹәвьнә депресийе. Мәʹнийа дӧда әв ә, кӧ чахе ԝәʹде щерʹьбандьна әм накʹәвьнә тʹәльке у хԝәстьнед хԝәйә хьраб зәфт дькьн, бь ве йәке әм дьле Хԝәде ша дькьн у ԛәбулкьрьна ԝи дьстиньн. Адәм у Һеԝайе хԝә нәгьртьн у ахьрийа хьраб стандьн (Дәстп. 3:6). Иро жи әм дьвиньн ԝәки мәрьвед кӧ нькарьн хԝә бьгьрьн, бәред чьԛас хьраб дьстиньн. Мәрьвед гӧнәкʹаррʹа чәтьн ә бь тʹәмами хԝәгьрти бьн. Йаһоԝа әве йәке занә у дьхԝазә али мә бькә, ԝәки әм хԝәстьнед хԝәйә хьраб бьтәмьриньн (1 Пʹадш. 8:46-50). w17.09 3-4 ¶3-4

Ԝәʹдәке, Африкайа Башуреда изьн тʹӧнә бу кӧ щурʹә-щурʹә раса тʹәвайи тʹоп бьн у ләма Шәʹдед Йаһоԝа жи нькарьбун тʹәвайи тʹоп бьн. Ле 18 Кануна Пешьн, сала 2011-да, 78 000 зедәтьр Шәʹдед Йаһоԝа жь щурʹә-щурʹә раса тʹоп бун стадионеда ль шәһәре Йоһанесбурге. Әԝана жь Африкайа Башуре у жь ԝәлатед незики ве бун. Менещерәки ве стадионе гот: «Мьн ве стадионеда тʹӧ щар әʹлаләтәкә бь рʹабун-рʹуньштьна ӧса баш нәдитийә. Гьшка гәләк тʹәмьз у маԛули хԝәкьрьнә. У ԝә әв стадион гәләк рʹьнд дайә һәв. Ле лапә һʹәԝас әԝ ә, кӧ һун жь гәләк щурʹә мьләта нә». Әв гьлийед нә Шәʹдед Йаһоԝа дьдьнә кʹьфше, кӧ бьратийа мәйә һʹәмдьнйайе рʹасти жи мәхсус ә (1 Пәт. 5:9). Ле гәло чьрʹа әм гәләк щӧдә дьбьн жь тʹәшкиләтед дьн? Әм бь аликʹарийа Хәбәра Хԝәде у рʹӧһʹе ԝийи Пироз зәʹф сәр хԝә дьхәбьтьн, ԝәки «мәрьве кәвьн» ль сәр хԝә бехьн у дәԝсе «мәрьве ну» ль хԝә кьн, кʹижан кӧ Хԝәде хԝәш те (Колс. 3:9). w17.08 17-18 ¶2-3

Ль гора Кʹьтеба Пироз, сәбьр әԝ һәйә бәре рʹӧһʹе пироз, ләма жи бей аликʹарийа Хԝәде мәрьв нькарьн ча лазьм ә әԝи һʹӧнӧри бьдьнә кʹьфше. Әм дькарьн бежьн, кӧ сәбьр әԝ пʹешкʹеш ә жь Хԝәде. У чахе сәбьра мә һәйә, бь ԝе йәке әм һʹьзкьрьна хԝә Хԝәдерʹа нишан дькьн. Әм ӧса жи һʹьзкьрьне һьндава йед майин дьдьн кʹьфше, гава бь сәбьр ьн. Ле чахе әм бе сәбьр ьн, һʹьзкьрьн ортʹа мә у мәрьвед дьнда сьст дьбә (1 Корн. 13:4; Галт. 5:22). Сәбьр әԝ ә, кӧ ԝәʹде чәтьнайед гьран әм диса жи тәйах дькьн у шабуна хԝә ӧнда накьн (Колс. 1:11; Аԛуб 1:3, 4). Сәбьр ӧса жи әԝ ә, чахе әм һʹәйфе вәнакьн, ле тәйах дькьн, ԛәԝи дьминьн у чь чәтьнайи рʹасти мә тен, йәкә әм сьст набьн. Хенщи ве йәке, Кʹьтеба Пироз мә һелан дькә, ԝәки бь дьл у щан ԛәбул кьн әве йәке кӧ лазьм ә һивийе бьн. Әв йәк рʹьнд те кʹьфше жь Аԛуб 5:7, 8. w17.08 4 ¶4

Щаһьлно, чахе һун дьхԝазьн рʹеԝитийе бькьн, аԛьлайи йә һәрге нете дайньн пешийа хԝә у пешда бьфькьрьн кӧ һуне һәрʹьнә кӧ. Әм дькарьн бежьн кӧ әʹмьр жи ча рʹеԝити йә, у щаһьлтийеда лазьм ә сафи кьн һуне әʹмьре хԝә ча дәрбаз кьн. Ле бь рʹастийе һеса нинә әве сафикьрьне бькьн. Щаһьлно, Йаһоԝа ширәте дьдә ԝә, ԝәки бона ахьрийа хԝә нетед аԛьлайи дайньн пешийа хԝә (Ԝаиз 12:1; Мәт. 6:20). Әԝ дьхԝазә һун бәхтәԝар бьн. У әԝи ча әм әʹфьрандьнә, әв йәк жи дьдә кʹьфше кӧ әԝ дьхԝазә һун әʹмьре хԝәрʹа ша бьн. Мәсәлә, әм дькарьн бьвиньн, бьбьһен, у тьштед хԝәш тәʹм кьн чь кӧ әԝи чекьрийә. Хенщи ве йәке, Хԝәде мә һʹьз дькә, ширәт дькә у һин дькә. Ле ԝи хԝәш найен әԝ мәрьв, йед кӧ гӧһ надьнә ԝи. Әԝ дәрһәԛа ԝан дьбежә: «Һун дьжберьн чь кӧ мьн хԝәш найе. . . . Хьзмәткʹаред мьн ԝе ша бьн, ле һуне шәрми бьн. Хьзмәткʹаред мьн жь фьрʹәйа дьл ԝе бьстьрен» (Иша. 65:12-14, ДТʹ). Бәле, чахе әм әʹмьре хԝәда сафикьрьнед аԛьлайи дькьн, Йаһоԝа рʹумәт дьбә (Мәтʹлк. 27:11). w17.07 22 ¶1-2

Хԝәде занә һәр стәйркәк кʹидәре йә, демәк әԝ мә һәр кәса жи башԛә нас дькә, занә әм кʹидәре нә, әм чь тʹәхмин дькьн, у ве дәме чь мәрʹа лазьм ә. Йаһоԝа дәрһәԛа мә һәр тьшти занә, әԝ дьлшәԝат ә у ԛәԝата ԝи һәйә ԝәʹде чәтьнайа али мә бькә (Зәб. 147:5). Щара чахе һун дькʹәвьнә чәтьнайе, дьбәкә һун дьфькьрьн кӧ әв чәтьнайи жь ԛәԝата ԝә дәр ә у бона ԝә гәләк гьран ә. Ле Хԝәде занә ԛәԝата мә чьԛас ә у занә әм «хали нә» (Зәб. 103:14). Әм гӧнәкʹар ьн, ләма жи әм шашикә хԝә диса у диса дькьн. Паше, әм пʹошман дьбьн кӧ мә чьрʹа ӧса гот, йан чьрʹа әм диса кʹәтьнә пәй хԝәстьнед нәрʹаст, йан жи чьрʹа мә чʹәʹвнәбари кьр! Йаһоԝа бекемаси йә у шашийед ԝи тʹӧнә нә, ле йәкә әԝ бь тʹәмами мә фәʹм дькә у дькʹәвә һʹәйра мә (Иша. 40:28). Дьбәкә ԝә сәр хԝә тʹәхмин кьрийә, кӧ чаԝа Йаһоԝа бь дәсте хԝәйи зор али ԝә кьр, ԝә тәнгасийада дьлрʹьһʹәти станд (Иша. 41:10, 13). w17.07 18-19 ¶6-8

Бьраки мә жь Шри Ланкайе кʹижан кӧ ньһа дьжи ԝәлате хәрибда, әʹрде хԝә у мала хԝә дайә сәва ль ԝедәре щьвин у щьватед мәзьн дәрбаз бьн, у ӧса жи сәва хьзмәткʹаред һәртʹьм ль ԝедәре бьминьн. Әв ԛӧрбанкьрьн ә бона ԝи бьрайи, ле аликʹарийа мәзьн ә сәва хушк-бьред ԝе мьһале, дәсте кʹижанада тʹӧнә. Ԝан ԝәлатада, кʹидәре кӧ шьхӧле мә ԛәдәхәкьри йә, хушк-бьра мала хԝәда щьвата дәрбаз дькьн. Бь сайа ве йәке, гәләк пешәнг у хушк-бьред дьн кӧ дәстәнг ьн, пʹәре хԝә хәрщ накьн сәва кʹьрʹийа оде. Хушкәкә кӧ тʹьме бона шьхӧле бәлакьрьна мьзгинийе пʹәра ԛӧрбан дькә, гьли дькә кӧ әԝ чь кʹәрәма дьстинә жь ве йәке: «Чахе әз пʹәра ԛӧрбан дькьм, әз тʹәхмин дькьм кӧ нава салада әз һатьмә гӧһастьне. Мьн тедәрхьст кӧ чьԛас зәʹф әз ве йәкеда мәрʹд ьм, һаԛас һе зәʹф әз һьндава мәрьвада жи дәствәкьри дьбьм. Мәсәлә, әз бумә мәрʹд бахшандьнеда у сәбьреда. Һьн жи әве йәке али мьн кьр, кӧ кем бәрхԝә кʹәвьм у ширәта ԛәбул кьм». w17.07 9 ¶9-10

Һәрге жи Ибо ахьрийеда мәʹнийа щәфе хԝә пеһʹәсийа, йәкә дьбәкә ԝирʹа бь тʹәмами фәʹмдари нибу кӧ чьрʹа Хԝәде һишт, ԝәки әԝ кӧл-дәрдед ӧса гьран бьвинә. Ле әԝ чь жи бьфькьрийа, йәкә әԝи ширәтед Хԝәде бира хԝәда хԝәй дькьр у сәр дьфькьри. У әԝе йәке ԝе али ԝи бькьра кӧ ньһерʹандьна рʹаст хԝәй кә у ӧса жи бәрдьлийе бьстинә (Зәб. 94:19). Әм жи дькарьн ньһерʹандьна хԝә рʹаст кьн у бәрдьлийе бьстиньн һәрге сәр сәрһатийа Ибо бьфькьрьн. Йаһоԝа әԝ сәрһати хԝәй кьр «бона һинбуна мә . . . , ԝәки әм бь сәбьре у ԝан готьнед ньвисарада кӧ бине дьдьнә бәр мә» баԝәр бьн (Рʹом. 15:4, ИМ). Гәло әм чь дәрсе һин дьбьн жь сәрһатийа Ибо? Дәрса пешьн әԝ ә: Әм гәрәке ӧса нәкʹәвьнә һʹәйра тәнгасийед хԝә, кӧ пьрсәкә лапә фәрз бир кьн, демәк пьштгьрийа сәрԝертийа Йаһоԝа. Хенщи ве йәке, әм гәрәке бьшекьриньн ԝи ԛәдьри кӧ әм дькарьн пьштгьрийа сәрԝертийа Хԝәде бькьн, у мина Ибо ԝәʹде тәнгасийед гьранда жи жерʹа амьн бьминьн. w17.06 24 ¶9; 25 ¶13-14

Иса фәʹм дькьр, ԝәки щара лазьм ә мәрьв һеса бә. Щарәке, чахе Иса тʹәви шагьртед хԝә мьзгини бәла дькьр, у әԝана вәстийан, әԝи готә ԝан гьлийед жь рʹеза жоре. Чахе әм тьштәкива мьжул дьбьн у хԝәрʹа ԝәʹдә дәрбаз дькьн, әм һеса дьбьн. Ле һәрге һʹьш-аԛьле мә тʹәне сәр һесабуне йә, әԝ дькарә жийина мәда щийе пешьн бьгьрә. Ԛьрʹна йәкеда, гәләк мәрьв ӧса дьфькьрин: «Әм бьхԝьн-вәхԝьн, чьмки әме сьбе бьмьрьн» (1 Корн. 15:32). Иро жи гәләк мәрьв ӧса дьфькьрьн. Ле ча әм дькарьн тедәрхьн һәла ньһерʹандьна мә сәр һесабуне рʹаст ә йан на? Мәсәлә, әм дькарьн бьньвисьн кӧ һʹәфтийеда чьԛас ԝәʹде мә чу сәр шьхӧлед рʹӧһʹани. Паше, әԝан сьһʹәта бәрамбәр кьн тʹәви сьһʹәтед кӧ мә бона һесабуне хәрщ кьр, мәсәлә сәр спорте, мьжулбуна мә тьштәкива кӧ мә хԝәш те, бәр телевизоре, йан сәр видео листька. Дьбәкә һун тʹәхмин кьн кӧ лазьм ә «ширьнайи» һьнәки кем кьн (Әфәс. 5:15, 16). w17.05 24-25 ¶11-13

Мәтʹәлока Исада базьрган дӧрʹәкә гәләк бьһа дит. Ле әԝ һазьр бу тʹәмамийа һәбука хԝә жи бьфьрошә, сәва ԝи дӧрʹи ԛазанщ кә. Бьдьнә бәр чʹәʹве хԝә, ԝәки бона ԝи әԝ дӧрʹ чьԛас ԛимәт бу! Рʹастийа дәрһәԛа Пʹадшатийа Хԝәде мина ви дӧрʹи гәләк ԛимәт ә. Һәрге әм жи Пʹадшатийа Хԝәде ӧса ԛайим һʹьз дькьн чаԝа базьрган әв дӧрʹ һʹьз дькьр, әме һәр тьшти бькьн сәва Пʹадшатийа Хԝәде ԝар бьн (Марԛ. 10:28-30). Мәсәлә, Зәхайо хԝәрʹа бь хәрще хәлԛе һәбука мәзьн тʹоп кьр у дәԝләти бу (Луԛа 19:1-9). Ле щарәке Зәхайо жь Иса дәрһәԛа Пʹадшатийа Хԝәде бьһист. Әԝи дәрберʹа ԛимәте Пʹадшатийе фәʹм кьр у хԝәст жийина хԝәда гӧһастьна бькә. Әԝи гот: «Хӧдан, әз ва ниве һәбука хԝә дьдьмә фәԛира у мьн нәһәԛи кʹе жи кьрьбә, әзе чар щар ле вәгәрʹиньм». Бәле, Зәхайо дәсте хԝә жь һәбука һʹәрам кʹьшанд у тьмайи һьндава пʹәра жь дьле хԝә дәрхьст. w17.06 10 ¶3-5

Әԝ хушк-бьред кӧ де-бав ԝана дьжберьн сәва аликʹарийе бьдьнә зарʹед ԝан, гәрәке тʹьме зарʹа һелан кьн кӧ ԛәдьре де-баве хԝә бьгьрьн. Мәсәлә, әԝана дькарьн дәрһәԛа де-бава баш хәбәр дьн у щабдарийа де-бава һьлнәдьн сәр хԝә. Һьн жи әԝана гәрәке ӧса бькьн, ԝәки нә щьватеда, нә жи жь щьвате дәр тʹӧ кәс щурʹәки майин нәфькьрә у нәбежә кӧ тьштәки нәщайиз те кьрьне (1 Пәт. 2:12). Де-бав гәрәке ширәткьрьна зарʹа алийе рʹӧһʹанида нәкьнә стуйе кәсәки дьн. Әԝана гәрәке дина хԝә бьдьне кӧ зарʹед ԝан ча һин дькьн у һьн жи бәрдәԝам кьн хԝәха зарʹед хԝә һин кьн у ширәт кьн. Де-бавно, бона аликʹарийе Йаһоԝарʹа дӧа бькьн у чь дәсте ԝә те бькьн (2 Дир. 15:7). Бьра достийа зарʹед ԝә тʹәви Йаһоԝа сәр щийе пешьн бә. Алийе хԝәда һʹәму тьшти бькьн сәва Хәбәра Хԝәде бьгьһижә дьле зарʹа. Тʹӧ щар баԝәрийа хԝә ӧнда нәкьн кӧ зарʹед ԝә дькарьн бьбьнә хьзмәткʹаред баш. w17.05 12 ¶19-20

Бьдьнә бәр чʹәʹве хԝә әве дәрәще. Шәрʹәки мәзьн авитьнә мерькәки. Дӧ мәрьвед зӧлм дәрһәԛа ԝи шәʹдәтийа дәрәԝ дан у ӧса кьрьн кӧ әԝ мер данә бәр кәвьра. Ле нә кӧ тʹәне әԝ мер һатә кӧштьне, ле кӧрʹед ԝи жи. Бьдьнә һʹәсабе хԝә ԝәки мәрьвед ԝани незик ча дьлшкәсти бун у тʹәвһәв бун, чьмки заньбун кӧ әԝана бе мәʹни һатьнә кӧштьне. Дьле ԝан дьшәԝьти бона ве нәһәԛийа бехԝәдети. Бь рʹастийе әԝ сәрһати чʹирок нинә. Әԝ йәк ԛәԝьми тʹәви Набот, хьзмәткʹаре Йаһоԝайи амьн, йе кӧ ԝәʹде сәрԝертийа Аһаб Пʹадша дьжит (1 Пʹадш. 21:11-13; 2 Пʹадш. 9:26). Аһаб Наботрʹа гот ԝәки дьхԝазә рʹәзе тьрийе ԝи бькʹьрʹә йан жи дәԝсе рʹәзәки дьн бьдә ԝи. Набот ԛайил нәбу. Гәло чьрʹа? Чьмки ԛануна Йаһоԝа кӧ Исраелийарʹа һатә дайине, ԛәдәхә дькьр мьлкʹе кал-баве хԝә бьфрошьн (Ԛан. Каһ. 25:23; Жьмар 36:7). Бәле, Набот гӧрʹа Йаһоԝа дькьр. w17.04 23 ¶1; 24 ¶4

Кʹе ԝе сәр дьнйайе бьминә? Йаһоԝа созәки дьлгәрм дьдә мә: «Мьлуке әʹрде ԝар бьн, хер-хԝәшийева ԝе хьне бьн у ша бьн». Паше диса ве зәбуреда әм дьхуньн: «Рʹасте ль әʹрде ԝар бьн у һәр-һәйе ԝе сәр бьжин» (Зәб. 37:11, 29). Гәло кʹе нә әԝ мәрьвед «мьлук» у йед «рʹаст»? Йед мьлук әԝ ьн, кӧ бь дьл һинкьрьн у рʹебәрийа Йаһоԝа ԛәбул дькьн. Ле йед рʹаст әԝ ьн кӧ һʹьз дькьн ԝан тьшта бькьн, кʹижан кӧ бәр чʹәʹве Йаһоԝа рʹаст ьн. Иро һәжмара мәрьвед хьраб жь йа мәрьвед рʹаст гәләк зедәтьр ә. Ле дьнйа тʹәзәда мәрьвед хьраб ԝе ԛә тʹӧнә бьн, сәр әʹрде тʹәне мәрьвед рʹаст ԝе бьжин! Мәрьвед ԝи щурʹәйи ԝе әʹрде бькьнә щьнәт! w17.04 10-11 ¶5-6

«Һʹьзкьрьна Хԝәде» мә һелан дькә, ԝәки әм жи һʹьзкьрьне хушк-бьрарʹа бьдьнә кʹьфше, илаһи ԝанрʹа йед кӧ чәтьнайада ньн (1 Йуһʹн. 3:17, 18). Мәсәлә, ԛьрʹна йәкеда чахе нава Мәсиһийед Щьһудайеда хәлайи бу, хушк-бьред щьватеда кʹе чьԛас дькарьбу али ԝан кьрьн (Кар. Шанд. 11:28, 29). Паԝлос у Пәтрусе шанди жи Мәсиһи һелан дькьрьн кӧ меванһʹьз бьн һьндава хушк-бьрада (Рʹом. 12:13; 1 Пәт. 4:9). Һәрге Мәсиһи хушк-бьред меванрʹа һʹьзкьрьна ӧса гәрәке бьдьнә кʹьфше, ле чьԛас фәрз ә илаһи али ԝан хушк-бьра бькьн, йед кӧ бьн ԛәзийеда ньн, йан жи бона баԝәрийа хԝә тенә зерʹандьне! Ԝан пашԝәхтийада бь һʹәзара Шәʹдед Йаһоԝа Украинайа рʹоһлатеда мәщбур бун мал-һʹале хԝә бьһельн бьрʹәвьн, чьмки ԝедәре шәрʹ дьчу. Йазьх, һьнәк жь ԝан һатьнә кӧштьне. Ле хушк-бьред жь Украине у Урьсете, гәләка жь ԝана бьрьнә малед хԝә. Һәрдӧ ԝәлатада жи ԝана тʹәвнәбуйин хԝәй дькьрьн. Әԝана «нә пʹара дьнйайе» бун у бәрдәԝам дькьрьн бь хирәт «мьзгинийа хәбәре» бәла дькьрьн (Йуһʹн. 15:19; Кʹар. Шанд. 8:4). w17.05 4 ¶6-7