Мьждар

Хԝәрʹасткьрьн әв те һʹәсабе кӧ әм рʹабун-рʹуньштьна хԝә у фькьред хԝә контрол дькьн. Әм гәрәке хԝә һини ве йәке бькьн, ԝәки хԝә рʹаст кьн. Чахе де-бав тʹьме бь сәбьр зарʹед хԝәйи бьчʹук «бь ширәт у һинкьрьна Хӧдан» мәзьн дькьн, бь ве йәке али зарʹед хԝә дькьн, кӧ һин бьн хԝә рʹаст кьн у сәрԝахт бьн (Әфәс. 6:4). Әв принсип ӧса жи бона ԝан ә, йед кӧ ида мәзьн ьн чахе тенә сәр рʹийа рʹаст. Рʹаст ә фәрәсәте ԝан кӧ хԝә рʹаст кьн һәйә, ле әԝана рʹӧһʹанида һе гьһишти ниньн. Ле чахе әԝана һин дьбьн «мәрьве ну ль сәр хԝә ԝәргьрьн» у чʹәʹв дьдьнә Иса, ида рʹӧһʹанида гьһишти дьбьн (Әфәс. 4:23, 24). Бәле, хԝәрʹасткьрьн у һинкьрьн гәләк фәрз ә. w18.03 29 ¶3-4

Йаһоԝа у тʹәшкиләта ԝи мә тʹәглифи щьвате дькьн. У әм һʹәму мевана ԛәбул дькьн йед кӧ тенә щьвате (Рʹом. 15:7). Чахе йед тʹәзә тенә сәр щьвате, әм гәрәке ԝана бь дьл у щан ԛәбул кьн, чьмки әԝана жи меванед Хԝәде нә. Бәʹса хәбәре, чахе меван те щьвате, фьрԛи тʹӧнә әԝ ча хԝәкьри йә йан жи хәмьланди йә, әм гәрәке незики ԝи бьн у бь дьл у әшԛ ԝи сьлав кьн (Аԛуб 2:1-4). Һәрге әԝ меван тʹәне һатийә, һун дькарьн ԝи тʹәглиф кьн кʹеләка ԝә рʹуне. Әԝ ԝе ша бә һәрге һун али ԝи бькьн, ԝәки әԝ бәрнама щьвате фәʹм кә, йан жи рʹеза бьвинә кʹижан сәр щьвате тенә хԝәндьне. Әԝ мәщаләкә гәләк баш ә, ԝәки әм «пәй меванһʹьзийе бьн». Чахе готарванед тʹәглифкьри тенә щьвата мә, йан бәрпьрсийаред мьһале, йан жи чахе ԝәкʹилед филиале тʹәсәлийа щьвата мә дькьн, әԝ йәк мәщале дьдьн мә сәва әм меванһʹьзийе нишан кьн һьндава ԝан (3 Йуһʹн. 5-8). Бәʹса хәбәре, әм дькарьн ԝана тʹәглифи мала хԝә кьн сәр ширьнайи йан жи сәр нанхԝарьне. w18.03 15 ¶5, 7

Дина хԝә бьдьн мәсәла мәрьвәки Щьһу, кʹижани кӧ Мәсиһи дьзерʹандьн. Мьләте Щьһу бь тʹәмами тʹәсмили Хԝәде бьбу, ле паше ԝана һәләԛәтийа хԝә тʹәви Йаһоԝа ӧнда кьрьн. У әԝи мәрьви тʹьре мьләте ԝи диса жи рʹаст Хԝәде дьһʹәбинә. Ле щарәке Иса Мәсиһ, кӧ жь мьрьне рʹабьбу, жь әʹзмана тʹәви ԝи хәбәр да. Гәло әԝи мәрьви хԝә ча да кʹьфше? Әԝи бь дьл аликʹарийа Һананийа ԛәбул кьр. Кʹьтеба Пироз дәрһәԛа ԝи мәрьви дьбежә: «Рʹабу пе аве һатә ньхӧмандьне» (Кʹар. Шанд. 9:17, 18; Галт. 1:14). Дьбәкә һун ида сәрва чун ԝәки әԝ мәрьв Паԝлосе шанди бу. Ле диса жи бьфькьрьн, гава әԝи фәʹм кьр чь йә рола Иса ԛьрара Хԝәдеда у рʹасти ԛимәт кьр, һьнге әԝ дәрберʹа һатә ньхӧмандьне (Кʹар. Шанд. 22:12-16). Иро жи әԝед кӧ Кʹьтеба Пироз һин дьбьн, фьрԛи тʹӧнә щаһьл, йан жи әʹмьрда мәзьн, ӧса дькьн. w18.03 5-6 ¶9-11

Әʹмьре Аԛуб нәһеса бу. Бьре ԝийи һʹәлал Әсаԝ, кʹижан кӧ мәрьвәки бь һʹьш-аԛьле нәрʹӧһʹани бу, дьхԝәст ԝи бькӧшта. Хенщи ве йәке, хәзуре Аԛуб жи жерʹа һʹәйф нибу у тʹьме бона кʹара хԝә ԝи дьда хәбате. Ле йәкә Аԛуб нав әԝан мәрьвед нәрʹӧһʹанида, рʹӧһʹанийа хԝә хԝәй кьр (1 Корн. 2:14-16). Әԝи баԝәр дькьр әв созе кӧ Хԝәде да Бьраһим. Аԛуб заньбу кӧ әв соз малбәта ԝива жи гьредайи йә, ләма әԝ тʹьме мьԛати нәфәред хԝә дьбу (Дәстп. 28:10-15). Пе хәбәрдан у кьред Аԛуб дьһатә кʹьфше, ԝәки принсип у созед Хԝәде тʹьме бира ԝида бун. Бәʹса хәбәре чахе Аԛуб тьрсийа чьмки бьре ԝи дьхԝәст ԝи бькӧшта, әԝи дӧада жь Йаһоԝа һиви кьр: «Кʹәрәма хԝә, мьн . . . хьлаз кә . . . Нә тә готийә: ‹Әзе әʹсәйи ԛәнщийе ль тә бькьм у зӧрʹәта тә бькьмә ԝәкә ԛума бәре›» (Дәстп. 32:6-12). Бәле, әшкәрә йә кӧ Аԛуб созед Хԝәде ԛайим баԝәр дькьр у ль гора ԛьрара Хԝәде дьжит. w18.02 20 ¶9-10

Әʹмьре хԝәда Ибо рʹасти тәнгасийед гәләк гьран һат. Пешийа ԝан тәнгасийа, әԝ «жь һʹәмуйа лаԝед Рʹожһьлате . . . йе һәри мәзьн бу» (Иб. 1:3). Әԝ дәԝләти, навдар, у гәләк хԝәйиԛәдьр бу (Иб. 29:7-16). Ле йәкә әԝ тʹӧ щар ԛӧрʹә нәбу у пьшта хԝә нәда Хԝәде. Йаһоԝа ԝи нав кьр хьзмәткʹаре «мьн». Шәйтʹан пәй һәв бәла дьани сәре Ибо. Әԝи ӧса ани сәре ԝи, ԝәки Ибо бьфькьрә йанчь әԝ кӧл-дәрд жь Хԝәде бун (Иб. 1:13-21). Паше, се һәвалед ԛәлп һатьн щәм Ибо, ԝәки йанчь бәр дьле ԝида бен, ле бь рʹастийе ԝана бь гьлийед хԝә дьле Ибо дешандьн. Жь гьлийед ԝан дәрдькʹәт, ԝәки Хԝәде ӧса сәре ԝи кьр, чьмки ԝи щәза дькә (Иб. 2:11; 22:1, 5-10). Ле һьнге жи Ибо амьнийа хԝә хԝәй кьр. Чахе тәнгасийед Ибо хьлаз бун, Йаһоԝа дӧ щара зедәтьр ԝи кʹәрәм кьр, у һьн жи 140 сала әʹмьре ԝи дьреж кьр (Аԛуб 5:11). У паши ве йәке жи, Ибо бәрдәԝам дькьр Йаһоԝарʹа амьн бьминә. w18.02 6 ¶16; 7 ¶18

Мәрьвед ԝи щурʹәйи дьхԝазьн ԝәки гьшк ԝана бьльнд кьн у пʹайе ԝан бьдьн. Зандарәки дәрһәԛа мәрьве ԛӧрʹә ньвиси: «Дьле ԝида ԛӧрбангәһәкә бьчʹук һәйә, кʹидәре кӧ әԝ сәре хԝә бәр хԝә датинә». Һьнә мәрьв дьбежьн кӧ ԛӧрʹәбун хәйсәтәкә ӧса мьрʹдар ә, ԝәки һәла һе мәрьвед кʹӧбар жи һʹьз накьн чахе нав мәрьвед майинда ԛӧрʹәбуне дьвиньн. Кʹӧбари, демәк ԛӧрʹәбун бәр чʹәʹве Йаһоԝа рʹәш ә. Кʹьтеба Пироз дьбежә ԝәки әԝ «чʹәʹвед кʹӧбар» нәфрʹәт дькә (Мәтʹлк. 6:16, 17). Бь рʹастийе кʹӧбари мәрьва жь Хԝәде дур дьхә (Зәб. 10:4). Әԝ хәйсәтәки Мире-щьна йә (1 Тимтʹ. 3:6). Йазьх, ле һәла һе һьнә хьзмәткʹаред амьн жи бунә ԛӧрʹә. Мәсәлә, Пʹадша Узийа, гәләк сала Йаһоԝарʹа амьн бу. Ле Кʹьтеба Пироз дьбежә кӧ чахе әԝ «ԛәԝате дит, дьле ԝи ԛӧрʹә бу, у бь ве йәке бәла ани сәр сәре хԝә. Әԝи һьндава Йаһоԝа Хԝәдейе хԝә нәамьни да кʹьфше, у кʹәтә пʹарьстгәһа Йаһоԝа сәва бьхуре бьшәԝьтинә». Ԝәʹдәки Һьзԛийа Пʹадша жи бу йәки ԛӧрʹә, ле паше әԝ пʹошман бу у хԝә ньмьз кьр (2 Дир. 26:16, ДТʹ; 32:25, 26). w18.01 28 ¶4-5

Жь Кʹьтеба Пироз әм педьһʹәсьн кӧ сәва шьхӧле Хԝәде, щьмәʹта Йаһоԝа тьштед хԝәйә ԛимәт ԛӧрбан дькьр (Дәркʹ. 35:5; 2 Пʹадш. 12:4, 5; 1 Дир. 29:5-9). Ԛьрʹна йәкеда, Мәсиһи бьһистьн кӧ Щьһустанеда хәлайи дәстпедьбу у хушк-бьрарʹа аликʹари лазьм ә. Ләма жи ԝана хԝәрʹа ԛьрар кьр, кӧ «жь дәсте кʹева чьԛас те аликʹарийе бона баԝәрмәндед Щьһустане бьшиньн» (Кʹар. Шанд. 11:27-30). Бәле, щурʹе ԛӧрбанкьрьне кӧ хьзмәткʹаред бәре дькьрьн, жь һәв щӧдә дьбун. Ԛьрʹна йәкеда, һьнә Мәсиһи һәбука хԝә дьфьротьн, мәсәлә әʹрде хԝә йан жи малед хԝә, у әԝ пʹәрә дьданә шандийа. Шанди жи әԝ пʹәрә дьданә хәбате бона хушк-бьред кӧ һʹәԝщә бун (Кʹар. Шанд. 4:34, 35). Ле йед дьн пʹәрә башԛә дькьрьн у тʹьме ԛӧрбан дькьрьн сәва пьштгьрийа шьхӧле Хԝәде бькьн. Ԝи щурʹәйи һʹәму мәрьв, һьн мәрьвед дәԝләти һьн жи йед кʹәсиб алийе хԝәда дькарьбун ԛӧрбана бькьн (Луԛа 21:1-4). w18.01 18 ¶7; 19 ¶9

Һәрге жи гәләк фәрәсәтед мә һәнә, йәкә һәнә тьштед ӧса кӧ әм пе ԛәԝата хԝә нькарьн бькьн, чьмки синоред мә һәнә. Әм гәрәке әве йәке тʹьме бира хԝәда хԝәй кьн. Рʹаст ә Паԝлосе шанди гәләк тьшт дькарьбу бькьра, ле йәкә синоред ԝи һәбун у ләма ԛәԝата ԝи нәдьгьһиште кӧ һәр тьшти бькә чь әԝи дьхԝәст. Чахе әԝи Хԝәдерʹа хәмед хԝә гьли кьр, Хԝәде жерʹа гот: «Ԛәԝата мьн сьстийада мийасәр дьбә». Паԝлос фәʹм кьр кӧ бь ԝан гьлийа Хԝәде чь дьхԝәст жерʹа бьгота, ләма әԝи гот: «Гава әз сьст дьбьм, һьнге ԛәԝат дьбьм» (2 Корн. 12:7-10). Гәло әԝ гьли чь дьһатьн һʹәсабе? Паԝлос фәʹм дькьр ԝәки әԝ нькарә һʹәму тьшти пе ԛәԝата хԝә бькә. Жерʹа аликʹарийа йе Һәри зор лазьм бу, демәк аликʹарийа Хԝәде. Рʹӧһʹе Хԝәдейи пироз дькарьбу ԛәԝате бьда ԝи, чахе әԝ сьст бу. Хенщи ве йәке, рʹӧһʹе пироз дькарьбу Паԝлос ԛәԝат кьра, сәва шьхӧлед ӧса бькә кӧ әԝи пе ԛәԝата хԝә тʹӧ щар ԝе нькарьбуйа бькьра. Ԛәԝата Хԝәде дькарә бона мә жи ӧса бькә. Гава Йаһоԝа рʹӧһʹе хԝәйи пироз дьдә мә, әм бь рʹастийе ԛәԝи дьбьн! w18.01 9 ¶8-9

Чахе зарʹа ԝә ԝәрʹа дьбежә кӧ дьхԝазә бе ньхӧмандьне, ԝе баш бә һун бьдьнә хәбате ԝан һащәта, кʹижан кӧ тʹәшкиләта Хԝәде дьдә бона де-бава. Ӧса һуне зарʹа хԝә бьдьнә фәʹмкьрьне, кӧ рʹаст ә тʹәсмилбуйин борщдарийа мәзьн ә, ле йәкә гәләк кʹәрәма жи тинә. Ча де у бав, борщдарийа ԝәйә мәзьн һәйә у ԛәдьрәки мәзьн, кӧ зарʹед хԝә «бь ширәт у һинкьрьна Хӧдан мәзьн кьн» (Әфәс. 6:4). Де-бав гәрәке нә кӧ тʹәне зарʹед хԝә һин кьн кӧ Кʹьтеба Пирозда чь те готьне, ле ӧса жи али ԝан бькьн, кӧ баԝәрийа хԝә ԝан тьшта биньн, чь кӧ әԝана һин дьбьн. Бәле, ԝанрʹа баԝәрийа ԛәԝи лазьм ә, кʹижан кӧ ԝе ԝана һелан кә әʹмьре хԝә тʹәсмили Йаһоԝа кьн, у бь дьл у щан жерʹа хьзмәт кьн. Бьра Хәбәра Йаһоԝа, рʹӧһʹе ԝийи пироз, у щәфе ԝә де-бавно, али зарʹед ԝә бькьн кӧ «сәрԝахт» бьн бона «хьлазбуне». w17.12 22 ¶17, 19

Данийел ԝәкә 100 сали бу, ида бәрбь мьрьне дьчу. Гәло Данийел ԝе ахьрийеда жь мьрьне рʹабә? Бәле! Хьлазийа кʹьтеба Данийелда әм дәрһәԛа созе Хԝәде дьхуньн: «Тӧ, һʹәта кӧ бьбә даԝин һәрә; жь бәр кӧ тӧйе бьгьһижи рʹьһʹәтийе». Данийеле әʹмьрда мәзьн, заньбу кӧ мьри рʹьһʹәтийеда ньн, чьмки ԝаре мьрийада «рʹаман, занин у занийари» тʹӧнә. Данийел фәʹм дькьр кӧ зутьрәке әԝе һәрә ԝедәре (Ԝаиз 9:10). Ле бона ԝи әԝ йәк хьлази нибу, чьмки Йаһоԝа жерʹа соз да дәрһәԛа ахьрийе. Мьлйакʹәте Йаһоԝа готә Данийел гьлийед жь ве рʹеза рʹоже. Әԝи ньзаньбу әԝ рʹож ԝе кʹәнге бе. Данийел ида бәр мьрьне бу у дьчу рʹьһʹәтийе. Ле әԝи фәʹм дькьр, кӧ ахьрийеда әԝе жь мьрьне рʹабә, чьмки жерʹа һатә готьне, ԝәки әԝ ԝе бона «сьтандьна мьраза хԝә һʹьшйар» бә. Әԝ йәк паши мьрьна ԝи гәрәке бьԛәԝьмийа «даԝийа рʹожанда», демәк рʹожед хьлазийеда. w17.12 7 ¶17-18

Йаһоԝа тʹәми да рʹуспийед Исраели кӧ чʹәʹв бьдьнә һәԛийа ԝийә мәзьн. Пешийе рʹуспи гәрәке дәрһәԛа меркӧж һʹәму информасийа у избаткьрьн пебьһʹәсийана. Паше ԝана гәрәке кʹур тедәрхьстана нет у фькьред ԝи, у ӧса жи кьред ԝийи бәре, у паше сафи кьрана һәла рʹәʹмтийе һьндава ԝи нишан кьн йан на. Рʹуспийа ӧса жи гәрәке тедәрхьстана һәла әԝи мәрьви «жь нәйартийе» у «ԛәста» кьрийә йан на. Бь ԝи щурʹәйи ԝана ԝе бь һәԛийа Хԝәде диԝана ԝи бькьрана (Жьмар 35:20-24). Һәрге 2 шәʹдә һәбуна у бьготана кӧ әԝ йәк рʹасти жи ӧса бу, һьнге әԝ меркӧж гәрәке бьһата кӧштьне. Чахе рʹуспи һәр тьшт пебьһʹәсийана кӧ чь ча бу, паше ԝана гәрәке дина хԝә бьда сәр ԝи кәси, нә кӧ тʹәне сәр кьре ԝи. Ԝана гәрәке кʹур фәʹм кьрана әв йәк чь кӧ нәдьһатә кʹьфше у пебьһʹәсийана кӧ чь бу мәʹни ԝәки әԝ йәк ԛәԝьми. Йа лапә фәрз әԝ бу, кӧ рʹуспийарʹа лазьм бу рʹӧһʹе Йаһоԝайи пироз, чьмки бь сайа ве йәке ԝана ԝе билани, рʹәʹм у һәԛийа ԝи бьдана кʹьфше (Дәркʹ. 34:6, 7). w17.11 16 ¶13-14

Чахе мә пешийе дәстпекьр Кʹьтеба Пироз һин бьн, әм рʹастийед гәләк ԛимәт пеһʹәсийан. Мәсәлә, әм пеһʹәсийан кӧ Йаһоԝа Әʹфьрандаре мә йә у ӧса жи дәрһәԛа ԛьрара ԝи һьндава инсанәте. Әм ӧса жи пеһʹәсийан ԝәки Хԝәде жь һʹьзкьрьне Кӧрʹе хԝә ԛӧрбан кьр, сәва кӧ әм жь гӧнә у мьрьне хьлаз бьн. Ӧса жи әм пеһʹәсийан ԝәки Пʹадшатийа Хԝәде ԝе һʹәму кӧл-дәрда бьдә һьлдане у паше әме бькарьбьн әʹдьлайеда у бәхтәԝарийеда бьжин (Йуһʹн. 3:16; Әʹйан. 4:11; 21:3, 4). Щара, фәʹмкьрьна мә һьндава пʹехәмбәртийа йан жи рʹезед жь Кʹьтеба Пироз дькарә бе гӧһастьне. Гава әм әԝан гӧһастьна дьстиньн, һьнге лазьм ә әм әве информасйайе кʹур леколин бькьн у сәр бьфькьрьн (Кʹар. Шанд. 17:11). Әм гәрәке зәлал фәʹм бькьн кӧ чь фьрԛи һәйә ортʹа фәʹмкьрьна бәре у йа тʹәзәда, һьн тьштед мәзьнда, һьн жи тьштед һурда. Ԝи щурʹәйи әме хьзна хԝә пе рʹастийед ну зедә кьн. w17.06 12-13 ¶15-16

Әм гәрәке һаш жь хԝә һәбьн у гәләк фәсал бьн гава дькʹәвьнә дәрәщед ӧса, кʹижанада әм дькарьн принсипед Йаһоԝа дәрһәԛа намусийе бьтʹәрьбиньн. Мәсәлә, ԝе аԛьлайи бә һәрге Мәсиһийед кӧ һәврʹа дьбьнә нас сәва һәв бьстиньн, жь дәстпека һәвнаскьрьне ида синора дайньн дәрһәԛа әʹйанкьрьна назькайе, пачʹкьрьне, у чахе тʹәне нә (Мәтʹлк. 22:3). Алийе намусийеда Мәсиһи ӧса жи дькарә бе щерʹбандьне кʹәнге бона хәбате дьчә щийе дур, йан жи чахе гәдә у ԛиз гәрәке тʹәвайи бьхәбьтьн. Ӧса жи гәләк хоф ә чахе әм депресийеда ньн у дьлшкәсти нә. Жь дьлтәнгийе әм дькарьн бькʹәвьнә һʹаләки ӧса, кӧ кʹе жи мәрʹа дьлгәрмийе у назькайе нишан кә, әм ԝи һʹьз кьн. Һәрге тӧ бькʹәви дәрәща ӧса, дәрберʹа аликʹарийе жь Йаһоԝа у щьмәʹта ԝи бьхԝазә (Зәб. 34:18; Мәтʹлк. 13:20). w17.11 26 ¶4-5

Йаһоԝа сьвьк наньһерʹә сәр хунрʹетьне. Ԝәʹде бәре, һәрге Исраели кәсәк бькӧшта, мәрьве йе мьри гәрәке ԝи бькӧшта. Әԝ гәрәке мер буйа, у сәр ԝи дьготьн «йе кӧ һʹәйфа хуне» һьлдьдә (Жьмар 35:19). Ӧса меркӧж һәԛе хԝә дьстанд, чьмки әʹмьре мәрьве бесущ сьтандьбу. Һәрге әԝ меркӧж нәһата щәзакьрьне, Әʹрде Создайи һʹәрам дьбу, демәк ида пироз нибу, чьмки Йаһоԝа тʹәми да Исраелийа: «Әʹрде кӧ һун ль сәр дьжин, нәһʹәрьминьн, чьмки хун [хунрʹетьна мәрьва] әʹрде дьһʹәрьминә» (Жьмар 35:33, 34). Ле чь дьԛәԝьми тʹәви ԝи мәрьви, йе кӧ бе һʹәмде хԝә хуна кәсәки бьрʹета? Рʹаст ә әԝи нәдьхԝәст мьрьна ԝи мәрьви, ле әԝ диса жи нәһәԛ бу кӧ хуна мәрьве бесущ һатә рʹетьне (Дәстп. 9:5). Ве дәрәщеда, әԝе кӧ бе һʹәмде хԝә кӧшт, дькарьбу бьрʹәвийа бажарәки сьтʹарбуне, сәва кӧ хԝә жь дәсте ԝи хьлаз кьра, йе кӧ гәрәке һʹәйфа хуне һьлда. Ԝедәре әԝ хԝәйкьри бу. Әԝ гәрәке ԝи шәһәре сьтʹарбунеда бьма, һʹәта мьрьна сәрәккʹаһин (Жьмар 35:15, 28). w17.11 9 ¶3-5

Хушкәкә мә жь Австралйайе гьли дькә: «Хәзуре мьн гәләк мьԛабьли рʹастийе бу. Мьн тʹәви мере хԝә пешийа кӧ жерʹа тʹелехьста у бьпьрсийа әԝ ча нә, Йаһоԝарʹа дӧа дькьр сәва али мә бькә, кӧ әм бь нәрми щаба ԝи бьдьн чахе әԝ һерс дькʹәвә. Һьн жи сәва хәбәрдана мә дьреж нәкʹьшинә у дәрһәԛа баԝәрийе кем дәʹԝ-доз пешда бен, мә сафи кьр кем тʹәви ԝи хәбәрдьн». Дьбәкә щара һун хԝә нәһәԛ дькьн чахе дәʹԝ-доз пешда тен, чьмки һун ԝана һʹьз дькьн у нахԝазьн дьле ԝан бешиньн. Һьнге һәр тьшти бькьн кӧ амьнийа ԝә һьндава Йаһоԝа щийе пешьн бьгьрә, нә кӧ һʹьзкьрьн һьндава малбәта ԝә. Ӧса әԝана ԝе фәʹм кьн кӧ гәләк фәрз ә Йаһоԝарʹа хьзмәт кьн у кӧ әʹмьре мәрьва ве йәкева гьредайи йә. Чь жи һәбә, бир нәкьн кӧ һун нькарьн зоре ԝан бькьн ԝәки рʹастийе ԛәбул кьн. Алийе хԝәда һун ԝанрʹа нишан кьн кӧ чьԛас кʹар ә чахе мәрьв рʹийа Йаһоԝада дьчә. Хԝәдейе бь һʹьзкьрьн ча мәрʹа ӧса жи ԝанрʹа мәщале дьдә, сәва бьжберьн хьзмәт кьн жерʹа йан на (Иша. 48:17, 18). w17.10 15-16 ¶15-16

Һʹьзкьрьна мә гәрәке нә кӧ тʹәне пе хәбәред мә бе кʹьфше, ле пе кьред мә, илаһи чахе кәсәкирʹа аликʹари лазьм ә. Бәʹса хәбәре, һәрге әм дьвиньн кӧ щьватеда кәсәк һʹәԝще хԝарьне йан кʹьнща йә, гьлийед ширьн ԝе кем кери ԝи бен (Аԛуб 2:15, 16). Ӧса жи, һәрге әм Йаһоԝа у мәрьва һʹьз дькьн, әме нә кӧ тʹәне жь Хԝәде бьхԝазьн кӧ хәбаткʹара бьшинә мьзгинийе бәла кьн, ле әме хԝәха жи хирәт бьн ԝи шьхӧлида (Мәт. 9:38). Йуһʹәннайе шанди гот кӧ әм гәрәке «бь кьра у рʹастийе» һʹьз бькьн. Бәле, һʹьзкьрьна мә гәрәке «һʹьләкʹари нибә», демәк дӧрʹу нибә (Рʹом. 12:9; 2 Корн. 6:6). Әв те һʹәсабе кӧ һәрге кәсәк хԝә нишан дькә йанчь һʹьзкьрьна ԝи рʹаст ә у һʹәлал ә, ле ӧса нинә, бь рʹастийе ӧса дәрте кӧ әԝ рʹуйе хԝә вәдьшерә. Ле гәло һʹьзкьрьна рʹастда дӧрʹути һәйә? На. Мәрьве кӧ һʹьзкьрьна ԝи щурʹәйи дьдә кʹьфше, бь рʹастийе һʹьзкьрьна ԝи ԛәлп у пʹучʹ ә. w17.10 8 ¶5-6

Сәва кӧ Хәбәра Хԝәде сәр мә һʹӧкӧм кә, әм гәрәке чьԛас дькарьн һәр рʹож бьхуньн. Шьхӧле мә чьԛас зәʹф бә жи у чь щабдарийед мә жи һәбьн, йәкә әм гәрәке ԝәʹдә бьвиньн сәва кӧ Кʹьтеба Пироз бьхуньн (Әфәс. 5:15, 16). Бона ве йәке әм дькарьн хԝәрʹа ԝәʹдә кʹьфш кьн, мәсәлә шәбәԛа, нивро, йан жи еваре. Әм ԛайил ьн тʹәви зәбурбеж кʹижани гот: «Һинкьрьна Тә чьԛас әз һʹьз дькьм! Тʹәмамийа рʹоже әз сәр ԝе дьфькьрьм» (Зәб. 119:97). Ле тʹәне хԝәндьна Кʹьтеба Пироз бәс нинә, гәләк фәрз ә әм ӧса жи сәр бьфькьрьн (Зәб. 1:1-3). Һьнге әме бькарьбьн ширәтед Кʹьтеба Пирозә билани әʹмьре хԝәда бьдьнә хәбате. Фьрԛи тʹӧнә әм Кʹьтеба Пироз сәр кʹахаза бьхуньн йан бь һащәтед әләктроник, ле нета мә гәрәке әԝ бә, ԝәки гьлийед теда бьгьһижнә дьле мә. w17.09 24 ¶4-5

Нәлазьм ә ԝәки әм һәр дәрәщада дьлшәԝат бьн. Мәсәлә, Шаԝул Пʹадша гӧне хԝә Агаг ани, демәк дьжмьне щьмәʹта Хԝәде. Йанчь дьле ԝи сәр шәԝьти, ле бь рʹасти әԝи тʹәмийа Хԝәде нәани сери. Ләма ахьрийеда Йаһоԝа пʹадшати жь Шаԝул станд (1 Сам. 15:3, 9, 15). Йаһоԝа Һʹакьме һәԛ ә. Әԝ дькарә дьле мәрьва бьхунә, у әԝ занә кʹәнге нәрʹаст ә дьлшәԝатийе бьдә кʹьфше (Лур. Йерәм. 2:17; Һәзԛл. 5:11). Зутьрәке Йаһоԝа ԝе диԝана ԝан мәрьва бькә, йед кӧ нахԝазьн гӧрʹа ԝи бькьн (2 Тʹеслн. 1:6-10). Һьнге дьле Хԝәде ԝе нәшәԝьтә сәр мәрьвед хьраб у зӧлм. Әԝ ԝе ԝана кʹӧта кә, чьмки гӧне хԝә мәрьвед рʹаст бинә, кʹижана ԝе хьлаз кә. Бәле, изьна мә тʹӧнә мәрьва сущдар кьн кӧ әԝана һежайи жийине нә йан на. Дәԝсе, әм гәрәке һәр тьшти бькьн сәва ньһа али ԝан бькьн. w17.09 10-11 ¶10-12

Хԝәгьртьн һʹӧнӧрәки ӧса йә, кʹижан кӧ бь аликʹарийа Йаһоԝа әм дькарьн нав хԝәда пешда биньн. Бал Йаһоԝа кемасийа хԝәгьртьне тʹӧнә, чьмки әԝ Хԝәдейе беԛьсур ә. Ле әм гӧнәкʹар ьн, ләма мәрʹа чәтьн ә бь тʹәмами әви һʹӧнӧри бьдьнә кʹьфше. Бь рʹастийе дьнйайеда гәләк кӧл-дәрд у чәтьнайи һәнә, чьмки щәм мәрьва кемасийа хԝәгьртьне һәйә. Мәсәлә, щара жь бо кемасийа хԝәгьртьне мәрьв мәкʹтәбеда хьраб һин дьбә, йан жи хәбата хԝә паш дьхә у рʹьнд нахәбьтә. Кемасийа хԝәгьртьне ӧса жи дьбә мәʹнийа хәбәрдана нәщайиз, сәрхԝашбуне, зорбәтийе, һәвԛәтандьне, дәйнед нәлазьм, кʹәтьна кәле, бинтәнгийе, нәхԝәшийед кӧ бь һәләԛәтийа сексуал дәрбаз дьбьн у диса тьштед дьн (Зәб. 34:11-14). Ԝәʹдә дәрбаз дьбә у мәрьв һе кем у кем хԝә дьгьрьн, у әв йәк рʹабун-рʹуньштьна ԝанда те кʹьфше. Ле әм әʹщебмайи наминьн, чьмки Хәбәра Хԝәде пʹехәмбәрти кьр кӧ «рʹожед ахьрийеда» мәрьв ԝе хԝәгьрти нибьн (2 Тимтʹ. 3:1-3). w17.09 3 ¶1-2

Чахе «әʹдьлайийа Хԝәде» щәм мә һәйә, дьл у һʹьше мә рʹьһʹәт дьминә. Әм заньн ԝәки чʹәʹве Йаһоԝа сәр мә йә, у кӧ әԝ дьхԝазә әм бәхтәԝар бьн (1 Пәт. 5:10). Чахе әм ве йәкеда дӧдьли ниньн, әм чәтьнайада тʹӧ щар гәләк бәрхԝә накʹәвьн у бина хԝә тәнг накьн. Зутьрәке һʹәму инсанәт ԝе рʹасти тәнгасийа мәзьн бе, кӧ сәр әʹрде тʹӧ щар нәԛәԝьмийә (Мәт. 24:21, 22). Әм ньзаньн әв тәнгаси ԝе сәр мә һәр кәси ча һʹӧкӧм бә. Ле әм гәрәке сәва ве йәке гәләк бәрхԝә нәкʹәвьн. Рʹаст ә әм ньзаньн кӧ һьнге Йаһоԝа ԝе чь бькә, ле әм Хԝәдейе хԝә нас дькьн. Әм заньн кӧ әԝ һьндава хьзмәткʹаред хԝәйә бәре чаԝа бу. Әм дьвиньн кӧ чь жи бьԛәԝьмә, Йаһоԝа ԝе тʹьме ԛьрара хԝә бинә сери у дькарә бона мә жи тьштед ӧса бькә чь кӧ әм һивийе ниньн. Чь жи Йаһоԝа бона мә ньһа дькә, мәщале дьдә мә кӧ «әʹдьлайийа Хԝәде» тʹәхмин кьн, кʹижан кӧ «жь һәр һʹьш-аԛьли дәрбазтьр ә». w17.08 12 ¶16-17

Һʹәта чь ԝәхти?» Әԝ пьрс пʹехәмбәред амьн Ишайа у Һәбаԛуԛ дан (Иша. 6:11; Һәбԛ. 1:2). Һәла һе Иса жи әԝ пьрс да чахе кʹәтә нав ԝан мәрьва баԝәрийа кʹижана тʹӧнә бу (Мәт. 17:17). Ләма әʹщебмайи нинә ԝәки щара бал мә жи әв пьрс пешда те. Дьԛәԝьмә нәрʹастийе һьндава мәда бькьн. Йан дьбәкә әм әʹмьрда мәзьн ьн у нәхԝәш дькʹәвьн. Йан жи дьбәкә әм дькʹәвьнә стресе, чьмки «зәманед» хьрабда дьжин (2 Тимтʹ. 3:1). Йан дьԛәԝьмә ньһерʹандьна хьраб йа мәрьвед дор бәре мә, мә бинтәнг дькьн у әʹщьз дькьн. Ле чь жи һәбә, әм гәләк дьлгәрм дьбьн чахе педьһʹәсьн кӧ хьзмәткʹаред Йаһоԝайи бәре жи әԝ пьрс дьдан у Хԝәде әԝана сущдар нәдькьрьн сәва ԝе йәке. Чь дькарә али мә бькә гава әм рʹасти дәрәщед чәтьн тен? Аԛуб щаба ве пьрсе пе гьлийед жь рʹеза иро дьдә. w17.08 3-4 ¶1-3

Иса шагьртед хԝә ширәт кьр ԝәки пе «һәбука нәрʹаст» ль әʹзмана хԝәрʹа һәвала ԛазанщ кьн. Әм амьнийа хԝә Хԝәдерʹа избат дькьн, чахе бона шьхӧле бәлакьрьна мьзгинийе, дәрһәԛа чь жи Иса пʹехәмбәрти кьр, ԛӧрбана дькьн (Мәт. 24:14). Ԛизькәкә бьчʹук жь Һьндьстане ԛӧтʹийа бьчʹукда хԝәрʹа пʹәрә тʹоп дькьр, у әԝе һәла һе листок жи хԝәрʹа нәдькʹьрʹи. Гава әв ԛӧтʹи тʹьжә бу, әԝе әв пʹәрә ԛӧрбан кьр сәва шьхӧле бәлакьрьна мьзгинийе. Бьраки мә жь Һьндьстане, кʹархана ԝийә гузед һьнде (кокос) һәйә. У әԝи гәләк кокос ԛӧрбан кьр сәва офиса ԝәлгәрʹандьне йа Малайаламе. Әԝи заньбу ԝәки йәкә филиал гәрәке кокоса бькʹьрʹә, у ләма фькьри һе баш ә кокоса бьдә, нә кӧ пʹәра. Бәле, әԝ аԛьлайи йә. Бьрак жи жь Йунаньстане тʹьме бьзьре зәйтʹуне, пәнир, у хԝарьнед дьн бона хушк-бьред Бәйтʹәледа ԛӧрбан дькә. w17.07 8 ¶7-8

Щьһуйед кӧ дилтийа Бабилонеда бун, сәре ԝан странарʹа тʹӧнә бу, чьмки дьле ԝан шкәсти бу. Һьнге ԝанрʹа бәрдьли у дьлгәрми лазьм бу. Ле хьлазийа тәнгасийа ԝан һат, чьмки ль гора пʹехәмбәртийа Хԝәде, пʹадше Фарьсе Корәш ԝана аза кьр. У чахе Корәш Бабилон алт кьр, әԝи әʹлам кьр: «Хӧдан . . . Оршәлима кӧ ль Щьһудайе йә, жь бо әз ханийәки жерʹа ава бькьм, әʹмьр да мьн. Жь һʹәмуйа нәтәԝа ԝи һәр кʹи нав ԝеда һәбә, бьра Хԝәдайе ԝи Хӧдан бь ԝирʹа бә у бьра дәркʹәвә» (2 Дир. 36:23). Бәле, ԝи чахи Исраели ԝе чьԛас дьлгәрм буна! Йаһоԝа нә кӧ тʹәне бәрдьли дайә щьмәʹта хԝә бь тʹәмами, ле дайә һәр кәси башԛә. Иро жи Йаһоԝа бона мә һәр кәси башԛә хәм дькә. Хԝәде «дьлшкәстийа ԛәнщ дькә у бьринед ԝан дьпʹечә» (Зәб. 147:3). Бәле, чахе әм нәхԝәш ьн, дьлтәнг ьн, йан депресийеда ньн, Йаһоԝа тʹьме кʹеләка мә йә. Әԝ бәр дьле мәда те у бьринед дьле мә ԛәнщ дькә (Зәб. 34:18; Иша. 57:15). Һьн жи, әԝ билани у ԛәԝате дьдә мә, сәва әм бькарьбьн бәр һәр чәтьнайике тәйах кьн (Аԛуб 1:5). w17.07 18 ¶4-5

Нава тʹәмамийа гәрдунеда, Йаһоԝа Кәсе лапи дәԝләмәнд ә (1 Дир. 29:11, 12). Әԝ Бавәки дәствәкьри йә, у бь мәрʹдани хьзнед рʹӧһʹани дьдә ԝан һʹәмуйа, йед кӧ әԝан хьзна ԛимәт дькьн. Әм чьԛас жь Йаһоԝа рʹази нә, ԝәки хьзнед рʹӧһʹани дайә мә, мәсәлә, 1) Пʹадшатийа Хԝәде, 2) хьзмәти, 3) у рʹастийед жь Хәбәра ԝи. Ле һәрге әм мьԛати хԝә нәбьн, дькарә ӧса бә кӧ әм ԝан хьзна нәшекьриньн у ахьрийеда ӧнда кьн жи. Сәва әԝ йәк нәԛәԝьмә, лазьм ә әм тʹьме биньн бира хԝә кӧ ԛимәте ԝан чьԛас мәзьн ә, у һʹьзкьрьна хԝә һе ԛәԝи кьн. Сәва кӧ бьбьнә бажарванед Пʹадшатийа Хԝәде, гәләка жь мә жийина хԝә лаптә гӧһастьнә (Рʹом. 12:2). Ле паши ве йәке жи әм гәрәке нәсәкьньн. Әм гәрәке нәһельн ԝәки һʹьзкьрьна мә һьндава Пʹадшатийе сьст бә, мәсәлә жь бо һәбуке йан жи жь бо хԝәстьнед бенамуси (Мәтʹлк. 4:23; Мәт. 5:27-29). w17.06 9 ¶1; 10 ¶7

Тʹӧ щики нәньвисар ә ԝәки Хԝәде Иборʹа мәʹнийа кӧл-дәрдед ԝи дьбежә. Һьн жи нета Йаһоԝа әԝ нибу кӧ хԝә һәԛ дәрхә у Иборʹа шьровәкә кӧ чьрʹа әԝ дьчәрчьрә. Дәԝсе Хԝәде али ԝи кьр, ԝәки әԝ фәʹм кә кӧ бәр Хԝәде әԝ чьԛас бьчʹук ә у кӧ тьштед дьһа фәрз һәнә нә кӧ проблемед ԝи (Иб. 38:18-20). Гьлийед Хԝәде али Ибо кьрьн ԝәки ньһерʹандьна хԝә рʹаст кә. Гәло әм дькарьн бежьн, ԝәки ширәткьрьна Йаһоԝа сәрт бу, чьмки Ибо һаԛас дәрд дит? На, Хԝәде ԛә сәрт нибу у нә жи Ибо ӧса фькьри. Рʹаст ә әԝи кӧл-дәрдед гьран дит, ле ахьрийеда әԝи рʹазибуна хԝә да кʹьфше Хԝәдерʹа. Әԝи һәла һе жи гот: «Әз хԝә бьчʹук дьвиньм у дь хԝәли у тʹозеда тʹобә кьрьнеда мә!» (Иб. 42:1-6). Бәле, ширәткьрьна Йаһоԝа баш һʹӧкӧм бу сәр Ибо. Әԝи ширәтед Йаһоԝа ԛәбул кьр, у Йаһоԝа дит кӧ Ибо фькьред хԝә гӧһаст. Паши ве йәке, Йаһоԝа мәрьвед дьнрʹа гот кӧ әԝ Ибо ԛәбул дькә, чьмки әԝ ԝәʹде кӧл-дәрда Хԝәдерʹа амьн ма (Иб. 42:7, 8). w17.06 24-25 ¶11-12

Сәва кӧ тедәрхьн һәла әм рʹаст дьньһерʹьн сәр хәбата хԝә йан на, пьрсәкә ӧса бьдьнә хԝә: «Гәло дьбә кӧ хәбат бона мьн һе һʹәԝас ә у һе мьн хԝәш те, ле хьзмәтийа мьн Хԝәдерʹа бона мьн баргьрани йә?» Чахе әм кʹур бьфькьрьн сәр ве пьрсе, әме тедәрхьн кӧ әм чь һе зәʹф һʹьз дькьн. Иса мәрʹа дәрс һишт кӧ жийина мәда щийе пешьн гәрәке чь бьгьрә. Щарәке, Иса чу мала Мәрйәме у Мәртʹайе. Мәртʹа хԝарьнеда кʹәтьбу, ле Мәрйәм бәр ньге Иса рʹуньштьбу, сәва гӧһ бьдә ԝи. Гава Мәртʹайе сәр Мәрйәме кьрә котә-кот ԝәки әԝ али ԝе накә, Иса готә Мәртʹайе гьлийед рʹеза ве рʹоже (Луԛа 10:38-42). Бәле, Иса дәрсәкә ԛимәт да Мәртʹайе у әԝ дәрс бона мә йә жи. Сәва кӧ әм нәкʹәвьнә һʹәйра хәмед хԝә у Исарʹа избат кьн кӧ әм ԝи һʹьз дькьн, әм гәрәке тʹьме «пʹара ԛәнщ» бьжберьн. Ӧса һәләԛәтийа мә тʹәви Хԝәде ԝе щийе пешьн бьгьрә. w17.05 24 ¶9-10

Сәва зарʹа рʹастийе һин кьн, Йаһоԝа щабдари дайә де-бава, нә кӧ кальк-пирька йан жи кәсәки дьн. У әԝ рʹасти жи ԛәдьрәки мәзьн ә сәва де-бава (Мәтʹлк. 31:10, 27, 28). Де-бав йед кӧ ньзаньн зьмане ԝи щийи кʹидәре әԝана дьжин, ле зарʹед ԝан ви зьмани заньн, дькарьн аликʹарийе бьхԝазьн. Ле әԝ найе һʹәсабе кӧ әԝана нахԝазьн щабдарийа хԝә биньн сери ләма аликʹарийе дьхԝазьн. Бь ве йәке жи әԝана дькарьн «бь ширәт у һинкьрьна Хӧдан» зарʹед хԝә мәзьн кьн (Әфәс. 6:4). Мәсәлә, де-бав дькарьн жь рʹуспийа ширәта һьлдьн кӧ чаԝа ԛӧльхкьрьна тʹәви малбәте дәрбаз кьн у чаԝа сәва зарʹед хԝә һәвалед баш бьжберьн. Әԝана щара ӧса жи дькарьн малбәтед дьн жи тʹәглиф кьн сәр ԛӧльхкьрьна малбәте. Хенщи ве йәке, щаһьл ԝе кʹаре бьстиньн, һәрге һәвалтийе бькьн тʹәви хушк-бьред щерʹьбанди, бәʹса хәбәре тʹәви ԝан һәрʹьн хьзмәтийе у тʹәви ԝан ԝәʹдә дәрбаз кьн (Мәтʹлк. 27:17). w17.05 11-12 ¶17-18

Йаһоԝа бь мьлйакʹәте хԝә пешда готә Усьв, ԝәки Һеродәс Пʹадша дьхԝазә Иса бькӧжә. Ләма жи Иса у малбәта ԝи рʹәвинә Мьсьре у кʹәтьнә хәрибийе. Әԝана ль ԝедәре ман һʹәта мьрьна Һеродәс (Мәт. 2:14, 19-21). Паши гәләк сала, шагьртед Иса дьһатьнә зерʹандьне у әԝана «бәлайи тʹопрахед Щьһустане у Самәрйайе бун» (Кʹар. Шанд. 8:1). Иса заньбу ԝәки гәләк шагьртед ԝи ԝе мәщбур бьн малед хԝә бьһельн, ләма жи әԝи гот: «Гава нав ви бажарида ԝә бьзериньн, бьрʹәвьнә бажарәки дьн» (Мәт. 10:23). Бь һʹәзара Шәʹдед Йаһоԝа жи рʹасти ԝан дәрәща һатьнә. Гәләк жь ԝана мәрьвед хԝәйи незик ӧнда кьрьнә у әм дькарьн бежьн һʹәму мал-һʹале хԝә жи ӧнда кь рьнә. Бәле, фьрԛи тʹӧнә жь бо чь жи мәрьв мала хԝә бьһелә бьрʹәвә, йәкә әԝ зәʹф чәтьн ә. Чахе рʹәви жь ԝәлат дьрʹәвьн, бона ԝан һьн рʹева дькарә хоф бә, һьн жи кампада. Ԝедәре гәләк мәрьв ичʹкә вәдьхԝарьн, хӧмар дьлистьн, дьзи у бенамуси дькьрьн. Ле йәкә ԝана шабуна хԝә ӧнда нәдькьр, чьмки заньбун ԝәки жийина ԝанә кампада ԝәʹдәлу йә, чаԝа кӧ жийина Исраелийа бәрʹийеда ԝәʹдәлу бу (2 Корн. 4:18). w17.05 3-4 ¶2-5

Һʹәзара щарәке дьԛәԝьмә кӧ һун йан кәсәки дьн тʹәхмин кьн кӧ щьватеда нәһәԛи һатә кьрьне. Ләма жи мьԛати хԝә бьн кӧ нәлькʹӧмьн у жь рʹийа Хԝәде дәрнәкʹәвьн. Бь амьни Хԝәдерʹа хьзмәт кьн, жерʹа дӧа бькьн у һʹәԝара хԝә ԝи биньн. Һьн жи, бь мьлукти биньн сәр хԝә ԝәки дьԛәԝьмә һун дәрһәԛа ве чәтьнайе, нә һʹәму тьшти заньн. Әм гӧнәкʹар ьн у сәр тьшта бь щурʹәки майин дьньһерʹьн, ләма жи щара мәрʹа дькарә бе хане кӧ нәһәԛийе мә дькьн, ле әԝ йәк ӧса нинә. Ԝе нәбаш бә һәрге әм гәвәстийе бькьн, чьмки әԝ йәк дькарә чәтьнайе һе мәзьн кә. Тʹӧ щар чәтьнайе бь һʹьш-аԛьле хԝә сафи нәкьн, ле тʹьме амьн бьминьн у бь сәбьр һивийа Йаһоԝа бьн кӧ әԝ дәрәща ԝә рʹаст кә. Һәрге әм ӧса бькьн, Йаһоԝа ԝе жь мә рʹази бә у ԝе мә кʹәрәм кә. Ԛә дӧдьли нәбьн кӧ «һʹакьме тʹәмамийа дьнйайе» тʹьме тьштед рʹаст дькә, чьмки «һʹәму рʹийед ԝи һәԛи нә» (Дәстп. 18:25; Ԛан. Дщр. 32:4). w17.04 22 ¶17

Чь ԝе бьбә тʹәви ԝан мәрьва, йед кӧ нахԝазьн бенә гӧһастьне у һʹәта дәстпебуна тәнгасийа мәзьн диса жи пьштгьрийа ве дьнйайе бькьн? Йаһоԝа соз да ԝәки ԝе ԛьрʹа мәрьвед хьраб бинә (Зәб. 37:10). Әԝ мәрьвед хьраб дьбәкә бьфькьрьн ԝәки жь диԝана Хԝәде ԝе хьлаз бьн. Ве дьнйайеда әԝана һин бунә кьред хԝә вәшерьн, у щәза хԝә настиньн (Иб. 21:7, 9). Ле Кʹьтеба Пироз мәрʹа дьбежә: «Чʹәʹвед [Хԝәде] ль сәр рʹейед зьлам ьн у һʹәму гавед ԝи дьвинә. Тәʹри нинә у сийа мьрьне нинә кӧ, . . . йед хьрабийе кьрьбьн хԝә ль ԝьр вәшерьн» (Иб. 34:21, 22). Бәле, тʹӧ кәс нькарә хԝә жь Йаһоԝа Хԝәде вәшерә. Тʹӧ мәрьве һʹьләкʹар нькарә ԝи бьхапинә. Тʹӧ щики ӧса тʹӧнә кӧ чʹәʹве Хԝәде нәвиньн чь дьԛәԝьмә. Паши Һармәгәдоне, дьбәкә әм бьгәрʹьн кʹа мәрьвед хьраб кʹидәре нә, ле әме ԝана нәвиньн. Әԝана ԝе һʹәта-һʹәтайе ӧнда бьн һәрʹьн (Зәб. 37:12-15). w17.04 10 ¶5