Кануна Пешьн

Һәрге әм хәбәрдана хԝә контрол нәкьн, гәләк проблем дькарьн пешда бен. Мәсәлә, гава һун рʹасти ԝи бен, йе кӧ ԝәлате ӧсада хьзмәт дькә, кʹидәре шьхӧле мә ԛәдәхәкьри йә, һун дьбәкә бьхԝазьн, ԝәки әԝ һур бь һур ԝәрʹа  гьли кә, һәла ԝедәре шьхӧле мә ча те кьрьне. Фәʹмдари йә, һуне бь дьле хԝәйи сах бьпьрсьн. Әм хушк-бьра һʹьз дькьн у ләма дьхԝазьн бьзаньбьн һʹале ԝан ча нә. Һьн жи әм бона ԝан дӧа дькьн. Ле һәма ве дәрәщеда ԝәхте һʹьшбуне йә, әм гәрәке хԝә «зәфт кьн» кӧ пьрсед зедә нәдьн. Ле һәрге әм ӧса дькьн кӧ гьлийа жь ԝи дәрхьн, ԝәки информасийа конфеденсйал мәрʹа бежә, әԝ нишана ве йәке йә, кӧ һʹьзкьрьна мә кем  ә һьн һьндава ԝида, һьн жи һьндава ԝан хушк-бьрада, йед кӧ итʹбарийа хԝә ԝи тиньн, кӧ әԝ ԝе гьли нәкә информасийа дәрһәԛа шьхӧле ԝан. Бешьк, тʹӧ кәс жь мә нахԝазә ԝан хушк-бьрарʹа, йед кӧ ԝан ԝәлатада дьжин, кʹидәре шьхӧле мә ԛәдәхәкьри йә, чәтьнайа зедә кьн. У хԝәха әԝ хушк-бьра жи, йед кӧ ԝан ԝәлатада хьзмәт дькьн, ԝе һур бь һур гьли нәкьн кӧ Шәʹдед Йаһоԝа ԝедәре ча хьзмәт дькьн, йан жи тьштед дьн кӧ шьхӧлед мәва гьредайи нә. w20.03 21 ¶11-12

Ԛьрара Хԝәде әԝ нибу, ԝәки мәрьв бьмьрьн. Ле сәва кӧ һʹәта-һʹәтайе бьжитана, Адәм у Һеԝайе гәрәке тʹәмийа Йаһоԝа бьанийана сери, әԝ тʹәми чәтьн нибу. Әԝи ԝанрʹа гот: «Жь дара ԛәнщи у хьраби наскьрьне нәхԝә, чьмки ԝе рʹожа гава тӧ жь ԝе бьхԝи, те әʹсә бьмьри» (Дәстп. 2:16, 17). У Шәйтʹан дәстпекьр бь ԛәлптийа хԝә бькʹәвә нава ԝи шьхӧли. Әԝи пе мәʹр хәбәр да, у готә Һеԝайе гьлийед жь рʹеза ве роже (Дәстп. 3:6). Ԝи щурʹәйи гӧнә у мьрьн дәрбази һʹәму мәрьва бу (Рʹом. 5:12). Чаԝа кӧ Хԝәде ԝанрʹа пешда готьбу, Адәм у Һеԝа мьрьн. Ле Шәйтʹан диса жи бәрдәԝам дькьр дәрһәԛа мьрьне дәрәԝед дьн жи бәла кә. Йәк жь ԝан дәрәԝа әԝ һәйә һинкьрьн, кӧ бәдәна мәрьва дьмьрә, ле рʹӧһʹе  ԝи бәрдәԝам дькә дьжи чаԝа кәсе рʹӧһʹ. Дәрәԝед ԝи щурʹәйи иро беһʹәсаб мәрьва дьхальфиньн (1 Тимтʹ. 4:1). w19.04 14-15 ¶3-4

Зарʹ щерʹьбанди ниньн у нькарьн хофе тʹәхмин кьн, йан жи тедәрхьн. Ләма жи мәрьвед зорбә һеса зарʹа дьхапиньн. Әԝана дәрәԝед хоф зарʹарʹа дьбежьн. Мәсәлә, дьбежьн ԝәки ве зорбәтийеда зарʹ нәһәԛ ә, әԝ гәрәке кәсәкирʹа нәбежә, йан жи һәрге әԝ бежә, ԝе ԝи баԝәр нәкьн. Һьнәк жи зарʹа дьхапиньн, кӧ йанчь әԝ йәк тьштәки нормал ә, чьмки әԝ әʹйанкьрьна һʹьзкьрьне йә. Зарʹ бь гәләк сала әԝан дәрәԝа баԝәр дькә у паше фәʹм дькә, ԝәки әԝ һатийә хапандьне. Әԝ зарʹ чахе мәзьн дьбә, дькарә хԝә һʹәсаб кә кӧ әԝ һʹәрам ә, у нәһежайи һʹьзкьрьне у бәрдьлийе йә. Мә дит ԝәки зийана жь зорбәтийа сексуали гәләк ԝәхт дьминә. Әм рʹожед ахьрийеда дьжин, ләма мәрьв «дьлсар» ьн у «мәрьвед хьрабә хԝәйифел» хьрабийеда пешда дьчьн (2 Тимтʹ. 3:1-5, 13). w19.05 15 ¶7-8

Иса ча мәрьв һин дькьрьн? Йа пешьн, әԝи пе гьлийед хԝә һин дькьр. Гьлийед ԝи ԛайим сәр мәрьва һʹӧкӧм дьбун, чьмки әԝи дәрһәԛа рʹастийа Хԝәде хәбәр дьда, һин дькьр кӧ нета әʹмьр чь йә, у әʹйан дькьр, ԝәки тʹәне Пʹадшатийа Хԝәде дькарә һʹәму кӧл-дәрдед инсанәте бьдә һьлдане (Луԛа 24:19). Иса пе мәсәла хԝә жи һин  дькьр. Әԝи бь жийина хԝә шагьртед хԝәрʹа нишан дькьр, кӧ әԝана гәрәке ча бьжин (Йуһʹн. 13:15). Иса кʹәнге һин дькьр? Әԝи ԝәʹде хьзмәтийа хԝәйә сәр әʹрде һин дькьр (Мәт. 4:23). Иса паши сахбуна хԝә жи шагьртед хԝә һин дькьр. Мәсәлә, әԝ 500 зедәтьр шагьртед хԝәва хӧйа бу у тʹәми да ԝан, ԝәки мәрьва бькьн шагьрт (Мәт. 28:19, 20; 1 Корн. 15:6). Иса ӧса жи чахе вәгәрʹийа әʹзмана, чаԝа сәре щьвате бәрдәԝам дькьр рʹебәрийе шагьртед хԝә бькә. Мәсәлә, незикайа сала 96 Д.М., Мәсиһ рʹебәри Йуһʹәннайе шанди кьр, сәва әԝ дьл бьдә Мәсиһийед бьжарти у ширәта бьдә ԝан (Колс. 1:18; Әʹйан. 1:1). w19.05 3 ¶4-5

Иро гәләк мәрьв зәʹф щәфе дькʹьшиньн, сәва әʹбура хԝә бькьн. Гәләк хушк-бьред мә гәләк сьһʹәта дьхәбьтьн, сәва нәфәред хԝә хԝәй кьн. Гәләк жи һәр рʹожәкә хәбате чәнд сьһʹәта сәр рʹе хәрщ дькьн, сәва бьгьһижьнә хәбата хԝә у бенә мале. Гәләк жь ԝана хәбата гьран дькьн, сәва пʹәре нане хԝә чекьн. Хьлазийа рʹоже, әԝ хушк-бьред кӧ ӧса дьхәбьтьн, ида һʹал дькʹәвьн! Бона ве йәке, ԛәԝата ԝан ида сәва леколинкьрьна шәхси наминә. Ле йәкә әм гәрәке хԝәрʹа ԝәʹдә бьвиньн, сәва Хәбәра Хԝәде у әʹдәбйәтед мә леколин бькьн. Һәләԛәтийа мә тʹәви Йаһоԝа у әʹмьре мәйи һʹәта-һʹәтайе ве йәкева гьредайи йә (1 Тимтʹ. 4:15). Һьнә хушк-бьред мә, һәр рʹож шәбәԛе зу рʹадьбьн леколина дькьн, чьмки шәбәԛа зу дәнг-һьс тʹӧнә у һʹьше ԝан һесабуйи йә. Һьнәк жи чәнд дәԛа хьлазийа рʹоже хԝәрʹа башԛә дькьн, ԝәки тʹӧ тьшт дина ԝана нарʹәвинә, сәва тьштәки леколин бькьн у сәр бьфькьрьн. w19.05 26 ¶1-2

Әԝ гӧһастьн һәма ньшкева у хԝәха наԛәԝьмьн. Әм гәрәке һәр алийава хирәт бьн, кӧ гәләк сала сәр хԝә бьхәбьтьн (2 Пәт. 1:5). Әм гәрәке һәр тьшти бькьн, сәва кʹурайа дьле хԝәда бенә гӧһастьне. Гава пешьн кӧ әм гәрәке бькьн, әԝ һәйә дӧа. Әм гәрәке мина зәбурбеж дӧа бькьн: «Хԝәде, дьләки паԛьж нав мьнда бьәʹфьринә у рʹӧһʹәки рʹаст нав мьнда сәр һәвда бинә» (Зәб. 51:10). Әм гәрәке фәʹм бькьн, ԝәки мәрʹа әʹсә лазьм ә щурʹе фькьрандьна хԝә бьгӧһезьн у аликʹарийе жь Йаһоԝа һиви кьн. Гава дӧда, әԝ һәйә фькьрандьн. Чахе әм һәр рʹож Хәбәра Хԝәде дьхуньн, әм гәрәке ԝәʹдә башԛә кьн, ԝәки кʹур сәр бьфькьрьн, сәва тедәрхьн кӧ лазьм ә чь ньһерʹандьн у хәйсәт-һʹӧнӧра нав хԝәда бьгӧһезьн (Зәб. 119:59; Ибрн. 4:12; Аԛуб 1:25). Әм гәрәке тедәрхьн һәла чь фькьр у ньһерʹандьнед ве дьнйайе сәр мә һʹӧкӧм бунә. Ӧса жи әм гәрәке һʹәлал кемасийед хԝә биньн сәр хԝә у паше сәр хԝә гәләк бьхәбьтьн, сәва ԝан кемасийа кʹокева дәрхьн. w19.06 8 ¶1; 10 ¶10; 12 ¶11-12

Чахе тьштәк сафи дькьн, хԝәрʹа ԝәʹдә бьжберьн сәва сафикьрьна хԝә биньн сери у әԝи ԝәʹдәйи нәгӧһезьн. Һивийа ԝәʹде лапи баш нибьн, чьмки дьбәкә әԝ ԝәʹдә нә жи ԝе бе (Ԝаиз 11:4). Фәсал бьн ԝәки тьштед нәфәрз ԝәʹдә у ԛәԝате жь ԝә нәстиньн, ԝәки һун бькарьбьн тьштед һе фәрз бькьн (Фили. 1:10). Һәрге те стандьн, хԝәрʹа ԝәʹдәки ӧса башԛә кьн, кӧ кәсәк ԝә ащьз нәкә. У ӧса бькьн кӧ мәрьв бьзаньбьн, ԝәки ԝи ԝәʹдәйи һун бәтал ниньн у һʹьш-аԛьле хԝә бь тʹәмами дьдьн сәр шьхӧле хԝә. Ԝе баш бә тʹела хԝә весиньн у ԝи ԝәʹдәйи нәкʹәвьнә интернете сәр малпәред сосйал. Ахьрийа сафикьрьна ԝә мина хьлазийа рʹеԝитийе йә. Һәрге һун дьхԝазьн бьгьһижьнә щики, рʹе чьԛас жи чәтьн бә, һуне рʹийа хԝә бәрдәԝам кьн, у һәрге жи лазьм бә һуне рʹийа хԝә бьгӧһезьн. Ԝи щурʹәйи, һәрге әм дьфькьрьн сәр ахьрийа сафикьрьнед хԝә, әме һʹәта хьлазийе сафикьрьна хԝә биньн сери, һәрге жи рʹасти чәтьнайа бен (Галт. 6:9). w19.11 30 ¶17-18

Мәʹнийа ԝәйә сәрәкә бона ньхӧмандьне гәрәке чь бә? Һун бь сайа леколинкьрьна Кʹьтеба Пироз һе зедә пеһʹәсийанә дәрһәԛа Йаһоԝа, хәйсәт-һʹӧнӧред ԝи у рʹийед ԝи. Һун дәрһәԛа ԝи чь жи пеһʹәсийан дьле ԝә гьрт, у ԝә Йаһоԝа һе зәʹф һʹьз кьр. Һʹьзкьрьна ԝә һьндава Йаһоԝа гәрәке мәʹнийа сәрәкә бә кӧ бенә ньхӧмандьне. Диса мәʹник кӧ чьрʹа ԝә сафи кьрийә бенә ньхӧмандьне әԝ ә, кӧ ԝә баԝәрийа хԝә һинкьрьнед Кʹьтеба Пироз анийә. Дина хԝә бьдьне, Иса чь гот чахе тʹәми да, кӧ шагьрта һазьр кьн (Мәт. 28:19, 20). Ль гора гьлийед Иса, әԝед кӧ тенә ньхӧмандьне гәрәке «бь наве Бав, Кӧрʹ у рʹӧһʹе пироз» бенә ньхӧмандьне. Ле әԝ чь дьһатә һʹәсабе? Һун гәрәке бь тʹәмамийа дьле хԝә рʹастийед дәрһәԛа Йаһоԝа, Кӧрʹе ԝи Иса у рʹӧһʹе пироз, баԝәр кьн. Ԛәԝата ԝан рʹастийа мәзьн ә у әԝ дькарьн дьле ԝә бьгьрьн. w20.03 9 ¶8-9

Йаһоԝа мәләк шандьн нә тʹәне сәва ве йәке кӧ пешда Лутрʹа әʹламәтийе бежьн, ле ӧса жи сәва али ԝи бькьн, әԝ жь хәзәба Содоме бьрʹәвә (Дәстп. 19:12-14, 17). Әм жи чахе дьвиньн, кӧ хушк йан бьрак тьштәки ӧса дькә, кӧ дькарә проблема жерʹа бинә, ԝе баш бә әм ԝи йан ԝе пешда ширәт кьн. Һәрге жи әԝ  дәрберʹа ширәта жь Кʹьтеба Пироз надә хәбате, әм гәрәке бь сәбьр бьн һьндава ԝи. Чʹәʹв бьдьнә ԝан дӧ мәләка. Дәԝса кӧ әԝи бьрайи йан хушке инкʹар кьн у жь ԝи дур бьн, ԝе баш бә али ԝи бькьн (1 Йуһʹн. 3:18). Әм дькарьн ча бежи дәсте хԝә дьрежи ԝи кьн, у али ԝи бькьн кӧ әԝ ԛәбул кә ширәта баш. Йаһоԝа дькарьбу дина хԝә бьда кемасийед Лут, ле әԝи ӧса нәкьр. Ԝәʹдә дәрбаз бу у Йаһоԝа рʹебәри Пәтрусе шанди кьр, кӧ дәрһәԛа Лут бьньвисә, ԝәки әԝ мәрьвәки рʹаст бу (Зәб. 130:3). Ле әм ча дькарьн чʹәʹв бьдьнә Йаһоԝа, кӧ әԝи ча дьньһерʹи сәр Лут? Һәрге әм дина хԝә бьдьнә хәйсәт-һʹӧнӧред баш йед хушк-бьра, әме һьндава ԝан һе зедә бь сәбьр бьн. Әԝана жи ԝе дьһа һеса аликʹарийа мә ԛәбул кьн. w19.06 21 ¶6-7

Һәрге әԝ дәԝләт кʹидәре һун дьжин, һʹәбандьна мә ԛәдәхә дькә, дьбәкә һун бьфькьрьн, гәло лазьм ә дәрбази ԝәлатәки дьн бьн, сәва аза Йаһоԝарʹа хьзмәт кьн. Әԝ йәк сафикьрьна ԝәйә шәхси йә, у дәԝса ԝә тʹӧ кәс нькарә сафи кә. Һьнәк дьбәкә пешийа сафикьрьне леколин кьн, кӧ Мәсиһийед ԛьрʹна йәке чь кьрьн, гава рʹасти пәйкʹәтьна һатьн. Шагьртед жь Оршәлиме, бәлайи Щьһустан у Самәрйайе бун, һәла һе жи бәлайи Финикйа, Кипрус, у Әнтакйайе бун (Мәт. 10:23; Кʹар. Шанд. 8:1; 11:19). Ле ԝәʹде пәйкʹәтьнәкә дьн, Паԝлосе шанди сафи кьр, кӧ нәчә щики дьн у бәрдәԝам кә ԝи щийида хьзмәт кә (Кʹар. Шанд. 14:19-23). Әм жь ԝан сәрһатийа чь һин дьбьн? Һәр малхеки мале гәрәке хԝәха сафи кә, дәрбази ԝәлатәки дьн бә йан на. Ле пешийа сафикьрьне, әԝ гәрәке дӧа кә у кʹур бьфькьрә дәрһәԛа дәрәщед нәфәред хԝә, у дәрһәԛа ԝе йәке, кӧ бона ԝан ԝе чь баш бә у чь на. Әм гәрәке мәрьва сущдар нәкьн бона сафикьрьна ԝан. w19.07 10 ¶8-9

Иса готә шагьртед хԝә, кӧ «һәрʹьн у һʹәму мьләта бькьн шагьрт» (Мәт. 28:19, ИМ). Хенщи ве йәке, сәва мәрьва һин кьн кӧ Иса чь жь шагьртед хԝә дәʹԝа дькә, әм гәрәке  али шагьрта бькьн кӧ әԝана бьзаньбьн Мәсиһийед рʹаст гәрәке чаԝа бьжин. Әм гәрәке бь сәбьр али ԝан бькьн кӧ принсипед Кʹьтеба Пироз әʹмьре хԝәда бьдьнә хәбате. Һьнәк дькарьн ньһерʹандьн у хәйсәтед хԝә чәнд мәһада бьгӧһезьн, ле һьнәкарʹа жи һе зедә ԝәʹдә лазьм ә. Мисйонерәки кӧ Перуйеда хьзмәт дькә, ԛәԝьмандьнәк гьли кьр кӧ дьдә кʹьфше, ԝәки чьԛас фәрз ә бь сәбьр бьн. Әԝ дьбежә: «Мьн тʹәви мерәки бь наве Раул, һинбуна Кʹьтеба Пироз дәрбаз дькьр, мә дӧ кʹьтеб дәрбаз кьр, ле йәкә диса жи чәтьнайед ԝийи мәзьн һәбун. Малбәта ԝида шәрʹ-дәʹԝ һәбун, әԝи чʹер дькьр, у зарʹед ԝи ԛәдьре ԝи нәдьгьртьн. Ле әԝ һәр гав дьһатә щьвате, у мьн бәрдәԝам дькьр тʹәсәлийа ԝи бькьм, сәва али ԝи у нәфәред ԝи бькьм. Паши се сала зедәтьр, ахьрийеда әԝ һатә ньхӧмандьне». w19.07 15 ¶3; 19 ¶15-17

Дина хԝә бьдьне, Паԝлос чь һʹалида бу у чь дькьр, гава әԝи Филипийарʹа нәʹмә дьньвиси. Әԝ Рʹомеда гьртийе малда бу. Әԝ нькарьбу дәркʹәта хьзмәтийе. Ле йәкә әԝи ԝан мәрьварʹа шәʹдәти дьда, йед кӧ тʹәсәлийа ԝи дькьрьн, у ӧса жи әԝи щьватед дуррʹа нәʹмә дьньвисин. Әԝи заньбу ԝәки әԝ гәрәке мина Мәсиһ тʹәмамийа әʹмьре хԝәда бьщәʹдинә, демәк чь дәсте ԝи те, бькә. Ләма Паԝлос әʹмьре Мәсиһийа бәрамбәри ләщмәйдане кьр (1 Корн. 9:24-27). Йе ләщмәйданеда дьрʹәвә, һʹьш-аԛьле хԝә дьдә сәр финише у ԝәʹде рʹәве наһелә тʹӧ тьшт дина ԝи бьрʹәвинә. Мәсәлә, иро һәнә ләщмәйданед ӧса, дәр доред кʹижана һәнә дькʹан у тьштед майин. Әԝ тьшт дькарьн һʹьш-аԛьле йед рʹәвийа бькʹьшиньн. Һун дькарьн баԝәр кьн, кӧ йе дьрʹәвә, ԝәʹде рʹәве ԝе бьсәкьнә у пʹәнщәред дькʹана бьньһерʹә? Һәмьки на, чьмки әԝ дьхԝазә сәркʹәвә! Әм жи гәрәке ләщмәйдана бона жийинеда нәһельн тʹӧ тьшт һʹьш-аԛьле мә бьрʹәвинә. Һәрге дина мә сәр нета мә бә, у әм мина Паԝлос хирәт бьн, әме хәлате бьстиньн! w19.08 3 ¶4; 4 ¶7

Чахе мә сафи кьр кӧ гӧрʹа принсипед Хԝәде бькьн, мә әʹмьре хԝә гӧһаст, ле нәфәред мәрʹа чәтьн бу ԝан гӧһастьна ԛәбул кьн. Мәсәлә, әԝана дьвиньн, ԝәки әм ида тʹәви ԝан щәжьна дәрбаз накьн, у накʹәвьнә нава шьхӧлед политикайе. Серида, һьнә нәфәред мә дьбәкә сәр мә һерс дькʹәтьн (Мәт. 10:35, 36). Ле әм гәрәке нәфькьрьн, кӧ әԝана ида тʹӧ щар найенә гӧһастьне. Һәрге әм ида али ԝан нәкьн, кӧ баԝәрийа мә фәʹм бькьн, ӧса дәрте кӧ әм ԝана сущдар дькьн, ԝәки әԝана нәһежа нә жийина һʹәта-һʹәтайе бьстиньн. Йаһоԝа изьне надә мә, ԝәки әм диԝана кәсәки бькьн, әԝи әԝ шьхӧл дайә дәсте Иса (Йуһʹн. 5:22). Һәрге әм бь сәбьр бьн, ахьрийеда нәфәред мә дьбәкә бьхԝазьн гӧһ бьдьнә мьзгинийа мә. Әм гәрәке нәһельн кӧ нәфәред мә сафикьрьнед мә бьгӧһезьн, ле әм гәрәке ԝанрʹа һʹәйф у нәрм бьн, һәрге жи әԝана мьԛабьли мә дәртед (1 Корн. 4:12б). Ԝәʹдә лазьм ә сәва мәрьвед мәйи незик бь тʹәмами фәʹм кьн, ԝәки бона мә чьԛас фәрз ә Йаһоԝарʹа хьзмәт кьн. w19.08 17 ¶10, 13; 18 ¶14

«Чахе әз дьфькьрьм кӧ әз чь тәнгасирʹа дәрбаз бумә, әз дьвиньм ԝәки мьне пе ԛәԝата хԝә бәр ԝе йәке тәйах нәкьра». Әԝ гьли мә гәләка готийә. Дьбәкә ԝә әв йәк готийә, чахе бәр проблемәке тәйах кьрийә, мәсәлә чахе рʹасти нәхԝәшикә гьран һатьнә, йан жи ԝә мәрьве хԝәйи незик ӧнда кьрийә. Гава һун әԝе чәтьнайе тиньн бира хԝә, һун фәʹм дькьн кӧ ԝә һәр рʹож тәйах дькьр, чьмки Йаһоԝа пе рʹӧһʹе хԝәйи пироз «зорайийа ԛәԝате» дьда ԝә (2 Корн. 4:7-9). Мәрʹа ӧса жи аликʹарийа рʹӧһʹе пироз лазьм ә, сәва нәкʹәвьнә бәр байе ве дьнйа хьраб (1 Йуһʹн. 5:19). Хенщи ве йәке, мәрʹа ӧса жи ԛәԝат  лазьм ә, ԝәки мьԛабьли «ордийед рʹӧһʹанийә хьраб» бьсәкьньн (Әфәс. 6:12). Рʹӧһʹе Йаһоԝайи пироз али мә дькә бь ԝе йәке, кӧ ԛәԝате дьдә мә, ԝәки нава чәтьнайада жи щабдарийед хԝә биньн сери. Паԝлосе шанди фәʹм дькьр, ԝәки әԝи бәрдәԝам дькьр нава тәнгасийада хьзмәт кә у хьзмәтийа хԝә бинә сери, чьмки әԝи итʹбарийа хԝә «ԛәԝата Мәсиһ» дьани (2 Корн. 12:9). w19.11 8 ¶1-3

Тʹәне жь Кʹьтеба Пироз тӧ дькари рʹастийе пебьһʹәси, кӧ Иса бона тә чь кьрийә. Иса һʹьз бькә, у һʹьзкьрьна тә һьндава Йаһоԝа ԝе мәзьн бә. Чьрʹа? Чьмки Иса бь тʹәмами чʹәʹв дьда хәйсәт-һʹӧнӧред Баве хԝә. Тӧ чьԛас һе зедә Иса нас ки, һаԛас тӧйе дьһа рʹьнд Йаһоԝа фәʹм бьки у һʹьз бьки. Бьфькьрә дәрһәԛа дьлшәԝатийа Иса һьндава ԝан мәрьва, йед кӧ бәр чʹәʹве һьнәка нә тʹӧ тьшт бун жь бо кʹәсиббуне, нәхԝәшийе у һесирбуне. Ӧса жи бьфькьрә сәр ԝан ширәта кӧ Иса дьдә тә, у ча жийина тә һе баш дьбә чахе тӧ ширәтед ԝи ԛәбул дьки (Мәт. 5:1-11; 7:24-27). Һʹьзкьрьна тә һьндава Иса ԝе һе ԛайим бә, чахе тӧ кʹур сәр ве йәке бьфькьри, кӧ әԝи бона бахшандьна гӧнед мә, хԝә кьрә ԛӧрбан (Мәт. 20:28). Чахе тӧ фәʹм бьки, ԝәки Иса бь рʹәзәдьли бона тә әʹмьре хԝә да, тӧйе һелан би гӧне хԝә бини рʹуйе хԝә у жь Йаһоԝа бахшандьне бьхԝази (Кʹар. Шанд. 3:19, 20; 1 Йуһʹн. 1:9). У тӧ чьԛас зәʹф Йаһоԝа у Иса һʹьз бьки, һаԛас тӧйе бьхԝази нава ԝан мәрьвада би, йед кӧ мина тә Йаһоԝа у Иса һʹьз дькьн. w20.03 5-6 ¶10-12

Мәсиһи дькарә бьфькьрә кӧ щьватеда әԝ ә лапи баш, кʹе кӧ дькарә фьлан шьхӧли йан жи щабдари бинә сери. Йан жи кʹӧлфәта Мәсиһи дькарә бьфькьрә: «Әԝи шьхӧли мере мьн ԝе дьһа баш бькә, нә кӧ әԝ бьра!» Ле һәрге әм бь рʹасти мьлук ьн, фькьред ӧса ԝе нәйенә һʹьше мә. Әм дькарьн жь Муса дәрсәкә фәрз һин бьн, кӧ әԝи ча хԝә да кʹьфше, гава мәрьвед дьн щабдари стандьн. Муса рʹебәри щьмәʹта Исраеле дькьр, у әԝи әв шьхӧле хԝә ԛимәт дькьр. Ле әԝи ча хԝә да кʹьфше, чахе Йаһоԝа изьн да кӧ мәрьвед дьн тʹәви ԝи щабдари биньн сери? Муса тʹӧ щар һʹәвсуди ԝан нәкьр (Жьмар 11:24-29). Әԝ йәки мьлук бу у жь мәрьвед майин аликʹари ԛәбул кьр, кӧ тʹәви ԝи шьхӧле һʹакьмтийе бькьн (Дәркʹ. 18:13-24). Бь сайа ве йәке, нав Исраелийада ида гәләк меред щабдар һәбун, йед кӧ дькарьбун һʹакьмтийе бькьн. Жь ве йәке те кʹьфше, кӧ Муса нәдькʹәтә һʹәйра наве хԝә, ле дькʹәтә һʹәйра щьмәʹте, чьмки хәм дькьр бона ԝан. Рʹасти жи мәсәләкә чьԛас баш ә бона мә! Әм гәрәке бир нәкьн, кӧ һәрге әм дьхԝазьн бона Йаһоԝа керһати бьн, дьһа фәрз ә мьлук бьн, нә кӧ гәләк аԛьл бьн. w19.09 5-6 ¶13-14

Әм ньзаньн кӧ сәрԝеред дьнйайе ԝе чь мәʹнийа бежьн, кӧ әԝана чьрʹа мьԛабьли Бабилона Мәзьн дәрдькʹәвьн. Дьбәкә әԝана ԝе бежьн кӧ жь бо религийед дьнйайе әʹдьлайи тʹӧнә у кӧ әԝана һәр гав дькʹәвьнә нава шьхӧле политикайе. Йан жи әԝана дьбәкә бежьн, кӧ әԝ тʹәшкиләтед религи гәләк дәԝләти бунә у һәбука мәзьн хԝәрʹа ԛазанщ кьрьнә (Әʹйан. 18:3, 7). Ча те кʹьфше, кʹӧтакьрьна религийа ԛәлп найе һʹәсабе, кӧ ԝе һʹәму әндәмед ԝе, бенә ԛьрʹкьрьне. Ле те кʹьфше, ԝәки әԝ сәрԝеред дьнйайе ԝе тʹәшкиләтед религи кʹӧта кьн. Гава һʹәму тʹәшкиләт ида тʹӧнә бьн, әндәмед ԝан религийа ԝе фәʹм кьн, кӧ сәрԝеред религийед ԝан, созед хԝә нәанинә сери, у әԝана дьбәкә бежьн кӧ ида тʹӧ тьштида тʹәви ԝан религийа набьн. Кʹӧтакьрьна Бабилона Мәзьн ԝе ԝәʹдә кьн бькʹьшинә (Әʹйан. 18:10, 21). Йаһоԝа соз дьдә, кӧ ԝе рʹожед тәнгасийа мәзьн «кьн» кә, сәва «бьжартийед» ԝи у һʹәбандьна рʹаст, бенә хԝәйкьрьне (Марԛ. 13:19, 20). w19.10 15 ¶4-5

Дайикьно, дьбәкә һун ӧса һатьнә мәзьнкьрьне, кӧ де-баве ԝә зу һерс дькʹәтьн у гәләк сәрт тʹәви ԝә хәбәр дьдан. Бона ԝә дькарә нормал бә, ԝәки һун жи тʹәви зарʹед хԝә ӧса хәбәр дьн. Бона ԝә дькарә нәһеса бә тʹәви зарʹа ӧса бьн, ча Йаһоԝа дьхԝазә, демәк һерс нәкʹәвьн у бь сәбьр бьн тʹәви ԝан, илаһи гава әԝана нәсийа дькьн чахе һун ԝәстийайи нә (Әфәс. 4:31). Һьнге ԝәрʹа һе зедә лазьм ә Йаһоԝарʹа дӧа бькьн, ԝәки али ԝә бькә хԝә бьгьрьн (Зәб. 37:5). Һьнә дайикарʹанәһеса йә һʹьзкьрьна хԝә зарʹед хԝәрʹа бьдьнә кʹьфше. Дьбәк әԝана малбәтәкә ӧсада мәзьн бунә, кӧ де-баве ԝан тʹәви ԝан незик нибунә у һʹьзкьрьна хԝә ԝанрʹа нәданә кʹьфше. Һәрге һун ӧса һатьнә мәзьнкьрьне, һун гәрәке мина де-баве хԝә ԝан шашийа нәкьн. Дайика кӧ гӧрʹа Йаһоԝада нә, гәрәке һин бә зарʹед хԝәрʹа һʹьзкьрьне бьдә кʹьфше. Әԝ гӧһастьн ԝәрʹа дькарә нәһеса бә. Ле әԝ йәк те стандьне, у ԝе һьн ԝерʹа, һьн жи нәфәред ԝерʹа кʹаре бинә. w19.09 18-19 ¶19-20

Мәрьве кӧ Йаһоԝа дьһʹәбинә, у ӧса жи гәләк ԝәʹдә у ԛәԝат хәрщ дькә сәва дәԝләти бә, бь рʹасти дьхԝазә дӧ ахарʹа хӧламтийе бькә. Һʹьзкьрьна ԝи һьндава Йаһоԝа ԝе бь тʹәмами нибә. Незики хьлазийа ԛьрʹна йәке, щьвата шәһәре Лаԝдькйайе хԝә ԛӧрʹә дькьр: «Әз дәԝләти мә, ԝе йәкеда гәләк пешда чумә, ԛәт һʹәԝще тʹӧ тьшти нимә». Ле чʹәʹве Йаһоԝа у Исада әԝана «мәʹрьм, рʹәбән, бәләнгаз, кор у тʹәзи» бун. Иса әԝана ширәт кьрьн, нә сәва ве йәке кӧ әԝана дәԝләти бун, ле чьмки һʹьзкьрьна ԝанә һьндава һәбуке, һәләԛәтийа ԝан тʹәви Йаһоԝа хьраб дькьр (Әʹйан. 3:14-17). Һәрге әм тедәрхьн кӧ әм дьле хԝәда дьхԝазьн пәй һәбуке кʹәвьн, әм гәрәке дәрберʹа ньһерʹандьна хԝә рʹаст кьн (1 Тимтʹ. 6:7, 8). Һәрге әм ве йәке нәкьн, дьле мә ԝе пʹаравәбә, демәк һʹьзкьрьна мә һьндава Йаһоԝа ԝе бь тʹәмами нибә, у Йаһоԝа ԝе ида һʹәбандьна мә ԛәбул нәкә. Йаһоԝа дьхԝазә әм ԝи «бь тʹәмамийа дьле хԝә» һʹьз бькьн (Марԛ. 12:30). w19.10 27 ¶5-6

Хәбәра Йунани кӧ һатийә ԝәлгәрʹандьне ча «рʹебәри», рʹастә-рʹаст те һʹәсабе «пәй һәрʹьн». Әԝ гьлийе Йунани ӧса жи ньвискʹаре Кʹаред Шандийа Луԛа да хәбате, чахе дәрһәԛа гәмийе гот, кʹижан кӧ жь ба һатә «ажотьне» (Кʹар. Шанд. 27:15). Ләма жи чахе Пәтрусе шанди ньвиси, кӧ ньвискʹаред Кʹьтеба Пироз бь «рʹебәрийа» рʹӧһʹе пироз дьньвисин, ль гора готьна зандарәки, әԝи гьлики ӧса да хәбате, кӧ гьредайи йә тʹәви ажотьна гәмийа. Пәтрус ча бежи гот, ԝәки чаԝа гәми пе рʹебәрийа ба дьчә сәва бьгьһижә щи, ӧса жи пʹехәмбәр у ньвискʹаред Кʹьтеба Пироз пе рʹебәрийа рʹӧһʹе пироз дьчун, сәва шьхӧле хԝә хьлаз кьн. Әԝи зандари гот: «Әԝ ньвискʹар ча бежи мина гәмийед пе бабьркед вәкьри бун». Йаһоԝа «ба», демәк рʹӧһʹе хԝәйи пироз дьда ньвискʹаред Кʹьтеба Пироз, у әԝана пәй рʹебәрийа рʹӧһʹе пироз дьчун. Мина ԝи байи, иро жи рʹӧһʹе пироз дькарә али мә бькә, ԝәки тәнгасийада жи бәрдәԝам кьн, һʹәта дьнйа тʹәзә Йаһоԝарʹа хьзмәт кьн. w19.11 9 ¶7-9

Рʹаст ә әм нькарьн проблемед хԝә пьшт гӧһе хԝәва бавежьн, ле йәкә әм гәрәке нәһельн, ԝәки һʹьш-аԛьле мә педа һәрә сәр проблемед мә. Һәрге әм ӧса бькьн, әм дькарьн һевийа баш кӧ Йаһоԝа дьдә мә, бир кьн (Әʹйан. 21:3, 4). Дьлшкәстибун дькарә мә ӧса сьст кә, кӧ әм хьзмәтийа хԝә Йаһоԝарʹа бьдьнә сәкьнандьне. Дина хԝә бьдьн мәсәла хушкәкә жь Амәрикайе кӧ әԝ ча баԝәрийа хԝә хԝәй дькә, чахе мьԛати мере хԝәйи нәхԝәш дьбә. Әԝе ньвиси: «Дәрәща мә чәтьн ә у щара мә дьлтәнг дькә, ле һевийа мә ԛәԝи йә. Әз гәләк рʹази мә бона ширәтед Йаһоԝа кӧ дьдә мә, сәва баԝәрийа хԝә ԛәԝи кьн у дьлбинийе бьстиньн. Мәрʹа рʹасти лазьм ьн әԝ ширәт у дьлдайин. Әԝ али мә дькьн кӧ бәрдәԝам кьн Йаһоԝарʹа хьзмәт кьн у бәр ԝан щерʹьбандьна тәйах кьн». Әм жь гьлийед ве хушке педьһʹәсьн, кӧ әм дькарьн дьлтәнгийе алт кьн. Чаԝа? Бир нәкьн ԝәки әԝ щерʹьбандьнед ԝә жь Шәйтʹан ьн. Итʹбарийа хԝә Йаһоԝа биньн, чаԝа Канийа дьлбинийе. У бьшекьриньн хԝарьна рʹӧһʹани кӧ әԝ дьдә мә. w19.11 16 ¶9-10

Рʹуспи илаһи гәрәке әва принсипа жь Кʹьтеба Пироз бинә сери. Әԝ фәʹм дькә, ԝәки гәрәке «хәбәрдана конфеденсйал» йед хушк-бьред щьвате, бәла нәкә. Һәрге әԝ ве йәке нәкә, әԝе наве хԝә хьраб кә у тʹӧ кәс ԝе итʹбарийа хԝә ԝи нәйнә. Бьред кӧ щабдарийа ԝан һәйә, гәрәке «хәбәрданеда дӧрʹутийе нәкьн», йане дәрәԝин нибьн (1 Тимтʹ. 3:8). Әԝ те һʹәсабе, ԝәки әԝана гәрәке нәхапиньн у гәвәстийе нәкьн. Һәрге рʹуспи жьна хԝә һʹьз дькә, әԝ ԝе жьна хԝә баргьран нәкә пе информасийе, кӧ әԝ гәрәке ньзаньбә. Жьна кӧ зоре мере хԝә накә, ԝәки жерʹа тьштед конфеденсйал гьли кә, наве мере хԝә хԝәй дькә. Чахе жьн әве ширәте тинә сери, әԝ нә тʹәне али мере хԝә дькә, ле ӧса жи ԛәдьре ԝан хушк-бьра дьгьрә, йед кӧ итʹбарийа хԝә ԝи анинә. Ле йа лапә фәрз әԝ ә, кӧ жьн дьле Йаһоԝа ша дькә, чьмки әԝ әʹдьлайе у йәктийе дькә нава щьвате (Рʹом. 14:19). w20.03 22 ¶13-14

Сала 1512 Б.Д.М., чахе кон һатә вәгьртьне бьн пʹала Чʹийайе Синайе, Һарун у кӧрʹед ԝи ча кʹаһин һатьнә кʹьфшкьрьне, у әв дәрәщә Муса дәрбаз дькьр (Дәркʹ. 40:17; Ԛан. Кʹаһ. 9:1-5). Йаһоԝа ча да кʹьфше, ԝәки кʹома кʹаһинед тʹәзә ԛәбул кьр? Чахе Һарун у Муса дӧа ль щьмәʹте кьрьн, Йаһоԝа жорда агьр баранд у бь тʹәмами әԝ ԛӧрбана сәр горигәһе шәԝьтанд (Ԛан. Кʹаһ. 9:23, 24.) Ле әԝ кьре Хԝәде чь да кʹьфше һьндава кʹьфшкьрьна сәрәккʹаһина? Йаһоԝа пе ве йәке нишан кьр, ԝәки бь тʹәмами пьштгьрийа Һарун у кӧрʹед ԝи дькә, кӧ бьбьнә кʹаһин. Чахе Исраелийа әшкәрә дитьн пьштгьрийа Йаһоԝа һьндава кʹаһинада, ԝана фәʹм кьр кӧ әԝана жи гәрәке пьштгьрийа ԝан бькьн. Ле әԝ йәк мәрʹа чь әʹйан дькә? Кʹаһинти кӧ Исраеледа һәбу, сийа кʹаһинтийа һе мәзьн бу. 144 000 кʹаһин у пʹадша ԝе тʹәви Иса сәр әʹзмана сәрԝертийе бькьн (Ибрн. 4:14; 8:3-5; 10:1). Бешьк, Йаһоԝа рʹебәрийе тʹәшкиләта хԝә дькә у бь мәрʹдани кʹәрәм дькә. w19.11 23 ¶13; 24 ¶14, 16

Чахе Паԝлосе шанди Корьнтʹеда бу, мала Әкила у Прьскилайеда дьма у «тʹәви ԝан хәбьти, чьмки пʹеше ԝан йәк бу, кон чедькьрьн». Ле чахе Паԝлос гот, ԝәки әԝ «шәв у рʹож» дьхәбьтә, әԝи нәдьхԝәст бьгота, ԝәки бей һесабун дьхәбьтә. Әԝ һеса жи дьбу, мәсәлә рʹожа Шәмийе. Әве рʹоже мәщал дьда ԝи, ԝәки Щьһуйарʹа шәʹдәтийе бьдә, йед кӧ мина ԝи рʹожа Шәмийе нәдьхәбьтин (Кʹар. Шанд. 13:14-16, 42-44; 16:13; 18:1-4). Паԝлос һьн дьхәбьти, һьн жи һәр гав «Мьзгинидайина Хԝәдеда» хьзмәткʹари дькьр (Рʹом. 15:16; 2 Корн. 11:23). Әԝи ӧса жи дьл дьда хушк-бьра, ԝәки ԝи шьхӧлида хирәт бьн. Әкила у Прьскила «шьхӧле Мәсиһ Исада», «һәвал-хәбатед» Паԝлос бун (Рʹом. 12:11; 16:3). Паԝлос дьл дьда Корьнтʹийа, ԝәки «шьхӧле Хӧданда пешда һәрʹьн» (1 Корн. 15:58; 2 Корн. 9:8). Йаһоԝа һәла һе жи рʹебәрийа Паԝлос кьр, ԝәки бьньвисә: «Кʹи нахԝазә бьхәбьтә, бьра нәхԝә жи» (2 Тʹеслн. 3:10). w19.12 5 ¶12-13

Йаһоԝа жьн-мере пешьн пе хԝәстьна зарʹанине әʹфьранд. Ле кʹе сафи дькә зарʹ һәбьн йан на, у кʹәнге һәбьн? Нав һьнә мьләтада, ньһерʹандьнәкә ӧса һәйә, кӧ жьн-мер ча һәв дьстиньн, гәрәке зу зарʹа биньн. Һәла һе жи нәфәред ԝан у мәрьвед дьн, һәр гав ԝанрʹа дьбежьн, кӧ гәрәке зарʹа ԝан һәбә. Йетро, бьраки мә жь Асйайе, дьбежә: «Щьватеда әԝед кӧ зарʹед ԝан һәнә, жьн-меред безарʹ һелан дькьрьн, ԝәки зарʹа биньн». Щефри, бьраки майин жь Асйайе, дьбежә: «Һьнәк дьбежьнә жьн-меред кӧ зарʹед ԝан тʹӧнәнә, ԝәки чахе әԝана әʹмьрда мәзьн бьн, ԝе кәсәк тʹӧнәбә мьԛати ԝан бә». Ле жьн-мер гәрәке хԝәха сафи кьн зарʹед ԝан һәбьн йан на. Әԝ ише ԝан у щабдарийа ԝан ә (Галт. 6:5). Фәʹмдари йә, ԝәки һәвал у нәфәред ԝан дьхԝазьн йед кӧ тʹәзә зәԝьщи нә, бәхтәԝар бьн. Ле гьшк гәрәке бир нәкьн, кӧ жьн-мер гәрәке хԝәха сафи кьн зарʹед ԝан һәбьн йан на (1 Тʹеслн. 4:11). w19.12 22 ¶1-3

Ԝәрʹа чәтьн ә Хԝәде һʹәсаб кьн ча Баве хԝә? Һьнәк дьбәкә дьфькьрьн, ԝәки һьмбәри Йаһоԝа мәрьв ӧса бьчʹук ьн, кӧ бәр чʹәʹве ԝи тьштәк ниньн. Ләма әԝана дӧдьли дьбьн, ԝәки Хԝәдейе Һьмзор бона ԝан хәм дькә. Ле Баве мәйи бь һʹьзкьрьн нахԝазә әм ӧса бьфькьрьн. Әԝи әʹмьр дайә мә у әԝ дьхԝазә, ԝәки  һәләԛәтийа мә тʹәви ԝи һәбә. Чахе Паԝлос дәрһәԛа ве рʹастийе гот, әԝи Атʹинайеда гӧһдарванед хԝәрʹа шьровәкьр, кӧ Йаһоԝа «жь мә һәр кәси нә дур ә» (Кʹар. Шанд. 17:24-29). Хԝәде дьхԝазә ԝәки һәр кәс жь мә һьндава ԝида ӧса бә, ча зарʹ тʹәви баве хԝәйи бь һʹьзкьрьн у хәмкʹеш хәбәр дьдә. Һьнәкарʹа чәтьн ә Хԝәде һʹәсаб кьн ча Баве хԝә, чьмки баве ԝан ԝанрʹа һьндьк һʹьзкьрьн у дьлгәрми дайә кʹьфше, йан жи ԛә нәдайә кʹьфше. Хушкәкә мә гьли дькә: «Баве мьн гәләк щар пе чʹера у гьлийед нәщайиз мьнрʹа хәбәр дьда. Ләма жи чахе мьн щара пешьн дәстпекьр Кʹьтеба Пироз һин бьм, мьнрʹа чәтьн бу незики Баве хԝәйи әʹзмана бьм». Ле һун жи хԝә ӧса тʹәхмин дькьн? Һәрге әре, дьлтәнг нәбьн. Һьнә ԝәʹдә шунда, һуне жи бькарьбьн сәр хԝә тʹәхмин кьн, ԝәки Йаһоԝа Бавәки лапи баш ә. w20.02 3 ¶4-5

Иса һин дькьр, ԝәки фьрԛи тʹӧнә чь фәрәсәтед мә һәнә йан жи чьԛас һьндьк әм дькьн, ча әм мәзьн дьбьн, Йаһоԝа ԛимәт дькә һәр тьштед кӧ чьԛас дәсте мә те, әм бона ԝи дькьн (Зәб. 92:12-15; Луԛа 21:2-4). Ләма жи һʹьш-аԛьле хԝә бьдьнә сәр ве йәке чь кӧ һун дькарьн бькьн. Мәсәлә, һун дькарьн мәрьварʹа дәрһәԛа Йаһоԝа хәбәр дьн, бона хушк-бьра дӧа бькьн, у ԝана һелан кьн кӧ амьн бьминьн. Йаһоԝа ԝә һʹәсаб дькә ча һәвал-хәбаткʹаред хԝә нә жь бо ве йәке, кӧ һун чь дькарьн бькьн, ле чьмки һун бь дьл у щан дьхԝазьн гӧрʹа ԝи бькьн (1 Корн. 3:5-9). Әм чьԛас рʹази нә у бәхтәԝар ьн, ԝәки әм Йаһоԝа, демәк Хԝәдеки ӧса дьһʹәбиньн, кӧ хьзмәткʹаред хԝә һʹьз дькә у ԛимәт дькә! Әԝи әм әʹфьрандьнә, ԝәки ԛьрара ԝи биньн сери, у әԝ йәк мә бәхтәԝар дькә (Әʹйан. 4:11). Рʹаст ә әԝ дьнйа дьбәкә мә һʹәсаб дькә ча  нәтʹӧтьшт, ле Йаһоԝа тʹӧ щар ӧса нафькьрә (Ибрн. 11:16, 38). Чахе әм жь бо нәхԝәшийа хԝә, жь бо чәтьнайед алийе пʹәрәда, йан жи жь бо кал-пирбуне бинтәнг дьбьн, ԝәрә әм бир нәкьн, ԝәки тʹӧ тьшт тʹӧ щар нькарә  мә жь һʹьзкьрьна Баве мәйи әʹзмана бьԛәтинә (Рʹом. 8:38, 39). w20.01 18 ¶16; 19 ¶18-19

Һәрге әм мьлук у шекьрдар бьн, әме нәһельн, ԝәки һʹәвсуди дьле мәда кʹока хԝә бьдә. Чахе дьле мә бь ԝан хәйсәт-һʹӧнӧред баш тʹьжи йә, ида щийе һʹәвсудийе ԝе тʹӧнә бә. Мьлукти ԝе али мә бькә дәрһәԛа хԝә зедә нәфькьрьн у хԝә сәр мәрьварʹа нәгьрьн. Мәрьве мьлук тʹӧ щар нафькьрә, ԝәки әԝ һежайи һе зедә тьшта йә, нә кӧ кәсәки дьн (Галт. 6:3, 4). Мәрьве шекьрдар жи рʹази йә бона ԝан тьшта, чь кӧ бал ԝи һәйә у әԝ хԝә һьмбәри тʹӧ кәси накә (1 Тимтʹ. 6:7, 8). Мәрьве мьлук у рʹази, чахе дьвинә кӧ кәсәк тьштед баш дьстинә, әԝ бона ԝи ша дьбә. Һәрге әм дьхԝазьн хԝә жь һʹәвсудийе хԝәй кьн, мьлук у шекьрдар бьн, мәрʹа аликʹарийа рʹӧһʹе Хԝәдейи пироз  лазьм  ә (Галт. 5:16; Фили. 2:3, 4). Рʹӧһʹе Йаһоԝайи пироз али мә дькә, ԝәки дьле хԝәда нет у фькьред хԝә кʹур бьщерʹьбиньн. Пе аликʹарийа Хԝәде әм дькарьн фькьр у һʹӧнӧре хоф жь хԝә дур хьн у дәԝсе йед баш пешда биньн (Зәб. 26:2). w20.02 15 ¶8-9

Хԝәтʹәсмилкьрьн әԝ һәйә сонд, у Йаһоԝа дьхԝазә һун хԝәйе сонда хԝә бьн. Ләма жи хԝә ль щьвата хԝә бьгьрьн. Чахе һун тенә ньхӧмандьне, һун ида дьбьнә пʹара бьратийа һʹәмдьнйайе. Хушк-бьред ԝәйә щьвате ида малбәта ԝәйә рʹӧһʹани нә. Һәләԛәтийа ԝә тʹәви ԝан ԝе дьһа незик у ԛәԝи бә, һәрге һун тʹьме бенә сәр щьвата. Һәр рʹож Хәбәра Хԝәде бьхуньн у сәр бьфькьрьн (Зәб. 1:1, 2). Ԝәʹдә хԝәрʹа бьвиньн сәва кʹур бьфькьрьн сәр ве чь ԝә хԝәнд. Һьнге ида әԝ гьли ԝе дьле ԝә бьгьрьн. Ӧса жи һәр гав дӧа бькьн (Мәт. 26:41). Дӧайед ԝәйи бь дьл, ԝе ԝә һе незики Йаһоԝа кьн. Бәрдәԝам кьн «бәре пешьн ль Пʹадшатийа Хԝәде бьгәрʹьн» (Мәт. 6:33). Ве йәке һун дькарьн бькьн, һәрге әʹмьре хԝәда хьзмәтийе дайньн щийе пешийе. Һәрге һун һәр гав хьзмәт кьн, баԝәрийа ԝә ԝе ԛәԝи бьминә. Һәр щәфе кӧ һуне ве дьнйа кәвьнда бьвиньн, «дәм-дәмә сьвьк» ьн (2 Корн. 4:17). Ле ньхӧмандьн у хԝәтʹәсмилкьрьн ԝе ԝәрʹа рʹе вәкә, ԝәки һун ида ирода бәхтәԝар бьжин, у ахьрийеда һуне «жийина кӧ рʹасти жийин ә» ԛазанщ кьн. Ле гәло әԝ йәк һежа йә? Һәмьки әре! (1 Тимтʹ. 6:19) w20.03 13 ¶19-21

Һәрге әԝе кӧ Кʹьтеба Пироз һин дьбә, әʹмьре хԝәда гӧһастьна накә, дьбәкә һун пьрсе бьдьнә хԝә: «Гәло лазьм ә әз һинбуне бьдьмә сәкьнандьне?» Сәва әве сафикьрьне бькьн, сәр ԝан пьрса бьфькьрьн: «Гәло әԝ дәрәща хԝәда һәма һьнә гӧһастьна дькә? Гәло әԝ чь кӧ педьһʹәсә, ида дәстпедькә әʹмьре хԝәда дьдә хәбате?» (Мәт. 28:20) Йазьх, ле һьнә мәрьвед кӧ Кʹьтеба Пироз һин дьбьн, мина Исраелийед ԝәʹде Һәзәԛел ьн. Дәрһәԛа ԝан Йаһоԝа готә Һәзәԛел: «Тӧ бона ԝан те бежи мина кʹьламәкә һʹьзкьрьне йи, мина мәрьвәки кӧ бь дәнге хԝәш дьстьре у бь һостәти сазе ледьхә. Әԝана ԝе гьлийед тә бьбьһен, ле тʹӧ кәс ԝе нәйнә сери» (Һәзԛл. 33:32, ДТʹ). Бәле, мәрʹа дьбәкә нәһеса йә ԝи мәрьвирʹа бежьн, ԝәки әме тʹәви ԝи һинбуне бьдьнә сәкьнандьне. Ле «ԝәхт һьндьк майә». Дәԝса кӧ ԝәʹдә хәрщ кьн сәр ԝан, йед кӧ ԛә пешда начьн, әм гәрәке ԝан мәрьва бьвиньн, дьле кʹижана һазьр ә мьзгинийе ԛәбул кьн (Кʹар. Шанд. 13:48). w20.01 6 ¶17; 7 ¶20

Мәсиһийед ве дьнйайе мәрьва һин накьн әв рʹастийа Кʹьтеба Пироз, кӧ йед гӧрʹа Хԝәде дькьн, ԝе һʹәта-һʹәтайе сәр әʹрде бьжин (2 Корн. 4:3, 4). Иро һʹәчʹи зәʹф Мәсиһийед ве дьнйайе һин дькьн, ԝәки мәрьвед ԛәнщ ԝе паши мьрьне һәрʹьн әʹзмана. Ле әԝ йәк щӧдә дьбу жь фькьред кʹома бьчʹукә Леколинкʹаред Кʹьтеба Пироз, йед кӧ жь сала 1879  «Бьрща Ԛәрәԝьлийе» дәрдьхьстьн. Әԝана фәʹм дькьрьн, ԝәки Хԝәде ԝе щьнәта сәр әʹрде вәгәрʹинә, у кӧ бь милйона мәрьвед гӧһдар ԝе бьжин сәр әʹрде, нә кӧ сәр әʹзмана. Ле йәкә пешийе ԝанрʹа ԝәʹдә лазьм бу, сәва зәлал фәʹм кьн, кӧ кʹе нә әԝ мәрьв. Һәмьки әԝ Леколинкʹаред Кʹьтеба Пироз ӧса жи фәʹм дькьрьн, ԝәки һьнә мәрьв ԝе «жь дьнйайе» бенә «кʹьрʹине», сәва тʹәви Иса сәр әʹзмана сәрԝертийе бькьн (Әʹйан. 14:3). Әԝ кʹома ԝан мәрьва, ԝе 144 000 Мәсиһийед хирәт бьн у тʹәсмилбуйи бьн, йед кӧ һʹәта сәр әʹрде бьн, бь амьни Хԝәдерʹа хьзмәт кьн. w19.09 27 ¶4-5