Мьждар

Иро гәләк мәрьвед кӧ хԝә аԛьл һʹәсаб дькьн, сәр ве ширәта Кʹьтеба Пироз дькʹәньн. Әԝана дьбежьн, кӧ һәрге тӧ хԝә сәр мәрьварʹа нәгьри, тӧйе бьби мәрьвәки сьст, у мәрьв ԝе тә бона кʹара хԝә бьдьнә хәбате. Ле гәло ахьрийа ве ньһерʹандьна дьнйа Шәйтʹан чь йә? Мәрьвед хԝәһʹьз, йан жи нәфәред ԝан ԛә бәхтәԝар ьн у һәвалед ԝани рʹаст һәнә? Һәләԛәтийа ԝан тʹәви Хԝәде незик ә? Бь тʹәхмина ԝә, чь һе ахьрийа баш тинә, сәрԝахтийа ве дьнйайе, йан сәрԝахтийа жь Хәбәра Хԝәде? (1 Корн. 3:19) Әԝед кӧ пәй сәрԝахтийа мәрьвед ве дьнйайе дьчьн, мина туристәки нә, кʹижан кӧ жь туристәки дьн дьпьрсә, ԝәки рʹе нишани ԝи кә, ле һәрдӧ жи ӧнда бунә. Иса дәрһәԛа мәрьвед «сәрԝахт» йед һьнге, гот: «Әԝә кор ьн у рʹебәре кора нә. Һәгәр кор рʹебәрийе кора бькә, һәр дӧйе жи бькʹәвьнә чʹәʹле» (Мәт. 15:14). Бь рʹасти жи, сәрԝахтийа ԝе дьнйайе бәр сәрԝахтийа Хԝәде, бефәʹмти йә. w19.05 24-25 ¶14-16

Ԝан салед пашԝәхтийе, йед кӧ ԝәʹде Биранине симбол дьхԝарьн у вәдьхԝарьн, һәжмара ԝан һе зедә дьбә. Гәло лазьм ә әм бона ве йәке бәрхԝә кʹәвьн? На. «Хӧдан йед пʹара хԝә нас дькә» (2 Тимтʹ. 2:19). Әԝ бьред кӧ ԝәʹде Биранине һʹәсаб дькьн кӧ кʹе жь симбола дьхԝә у вәдьхԝә, ньзаньн жь ԝана кʹе бь рʹасти бьжарти йә, әԝ йәк Йаһоԝа занә. Демәк, нава ԝанда һәнә йед ӧса, кӧ дьфькьрьн ԝәки бьжарти нә, ле бь рʹасти бьжарти ниньн. Мәсәлә, һьнәка кӧ ԝәʹдәки симбол дьхԝарьн у вәдьхԝарьн, паше ида данә сәкьнандьне. Һьнәк жи жь бо нәхԝәшийа емосийали дьфькьрьн, кӧ әԝана ԝе тʹәви Иса сәр әʹзмана сәрԝертийе бькьн. Әшкәрә йә, ԝәки әм ньзаньн кӧ бь рʹасти чьԛас бьжарти сәр әʹрде һәнә. Бьжарти ԝе сәр әʹрде ль щурә-щурә щийа бьн, чахе Иса ԝана тʹоп кә у бьвә әʹзмана. Кʹьтеба Пироз дьдә кʹьфше, ԝәки рʹожед ахьрийеда, һьнә бьжарти ԝе сәр әʹрде бьн (Әʹйан. 12:17). Ле Кʹьтеба Пирозда найе готьне, ԝәки әԝана ԝәʹде тәнгасийа мәзьн сәр әʹрде ԝе чьԛас бьминьн. w20.01 29-30 ¶11-13

Иса чахе сәрһатийа кӧрʹе ӧндабуйи гьли кьр, да кʹьфше ԝәки Йаһоԝа ча бав зарʹед хԝә чьԛас  зәʹф һʹьз дькә (Луԛа 15:11-32). Ве сәрһатийеда бав тʹӧ щар һевийа хԝә ӧнда нәдькьр, кӧ кӧрʹе ԝи ԝе диса вәгәрʹә. Гава кӧрʹе ԝи вәгәрʹийа мал, әԝи бь дьл у щан кӧрʹе хԝә ԛәбул кьр. Һәрге әм жь Йаһоԝа дур кʹәтьнә, ле әм пʹошман дьбьн у тʹобә дькьн, әм гәрәке дӧдьли нәбьн, кӧ Баве мәйи һʹьзкьри һазьр ә у дьхԝазә мә пашда вәгәрʹинә. Баве мә ԝе һʹәму зийанед кӧ мә жь Адәм стандийә, бьдә һьлдане. Паши рʹабәрибуна Адәм, Йаһоԝа сафи кьр, ԝәки 144 000 мәрьва бьжберә кӧ бькә зарʹед хԝә, сәва әԝана сәр әʹзмана тʹәви Кӧрʹе ԝи, ча пʹадша у кʹаһин хьзмәт кьн. Иса у әԝед кӧ тʹәви ԝи сәрԝертийе бькьн, дьнйа тʹәзәда ԝе али мәрьвед гӧһдар бькьн, ԝәки әԝана бьбьнә беԛьсур. Паше, чахе әԝана щерʹьбандьна хьлазийеда амьн бьминьн, Хԝәде ԝе ԝана пе жийина һʹәта-һʹәтайе хәлат кә. Һьнге Баве мә ԝе гәләк әшԛ у ша бә, чьмки ԝе бьвинә кӧ әʹрд бь кӧрʹ у ԛизед ԝийи беԛьсур тʹьжи йә. Әԝ ԝәʹдә ԝе чьԛас мәхсус у хԝәш бә! w20.02 6-7 ¶17-19

Һәр кәс жь мә гәрәке пьрсе бьдә хԝә: «Гәло әԝ гӧһастьн кӧ әз нав хԝәда дькьм, тʹәне рʹува йә, йан әз бь рʹасти кʹурайа дьле хԝәда дьбьмә Мәсиһи?» Бь рʹасти фьрԛи гәләк ә. Мәтта 12:43-45-да, Иса да кʹьфше кӧ чь гәрәке бе кьрьне. Әԝ гьли рʹастийа гәләк фәрз әʹйан дькә: Бәс нинә тʹәне фькьред хьраб жь һʹьше хԝә дәрхьн, ле әм гәрәке ӧса жи һʹьше хԝә пе фькьред Хԝәде тʹьжә кьн. Ле гәло әм дькарьн хәйсәте хԝә бьгӧһезьн, демәк дьлда бьбьнә мәрьве ну? Хәбәра Хԝәде дьбежә: «Мәрьве ну ль сәр хԝә ԝәргьрьн, кӧ кьрасе Хԝәдеда бь рʹастийе у һʹәлалийе бе ԛәлпи хӧльԛи йә» (Әфәс. 4:24). Бәле, әм дькарьн һʹьше хԝә у дьле хԝә бьгӧһезьн, ле әԝ йәк һеса нинә. Әм гәрәке нә кӧ тʹәне хԝәстьнед хьраб бьтәмьриньн у хԝә жь кьред хьраб дур бьгьрьн, ле ӧса жи фькьред хԝә, демәк һʹьше хԝә бьгӧһезьн. Гӧһастьна хԝәстьнед мә, хәйсәт у нет-мәрәмед мә жи дькʹәвьн нава ве йәке. Әм гәрәке сәр ԝан тьшта һәр гав бьхәбьтьн. w19.06 9-10 ¶6-7

Йаһоԝа бь дьлшәԝатийе мәләкед хԝә шанд, ԝәки Лут у нәфәред ԝи хьлаз кә. Ле Лут «ньгед хԝә пашда давит». Мәләка дәсте ԝи гьртьн у али ԝи у нәфәред ԝи кьрьн, кӧ жь шәһәр бьрʹәвьн (Дәстп. 19:15, 16). Мәләка жерʹа готьн, кӧ бьрʹәвә бәрбь чʹийа. Ле дәԝса кӧ гӧрʹа Йаһоԝа бькә, әԝи хԝәст һәрә шәһәрәки дьн (Дәстп. 19:17-20). Йаһоԝа бь сәбьр гӧһ да ԝи у изьн дайе, ԝәки һәрә ԝи шәһәри. Ԝи шәһәрида ԝәʹдә шунда Лут тьрсийа у чу сәр чʹийа, демәк ԝи щийи, кʹидәре Йаһоԝа пешийе жерʹа готьбу кӧ һәрә (Дәстп. 19:30). Рʹасти жи Йаһоԝа сәбьра чьԛас мәзьн да кʹьфше! Мина Лут, хушк-бьред мәйә рʹӧһʹани жи, дькарьн сафикьрьнед нәрʹаст бькьн у хԝәрʹа проблемед мәзьн чекьн. Ле һәрге тьштәки ӧса бьԛәԝьмә, һьнге әме ча хԝә бьдьнә кʹьфше? Дьбәкә әм бьхԝазьн ԝанрʹа бежьн, ԝәки ԝана чь чанд, әԝе жи дьчьньн (Галт. 6:7). Ле дьһа баш бә, әм хԝә щурʹәки майин бьдьнә кʹьфше. Әм дькарьн чʹәʹв бьдьнә Йаһоԝа ве йәкеда, кӧ әԝи ча али Лут кьр. w19.06 20-21 ¶3-5

Чахе дьжмьнед мә шьхӧле мә ԛәдәхә дькьн, әԝана дьхԝазьн ԝәки мә бьтьрсиньн, сәва әм Йаһоԝарʹа хьзмәт нәкьн. Хенщи ве йәке, әԝана дькарьн ӧса жи тьштед ԛәлп бәла кьн, мәрьвед дәԝләте бьшиньн, ԝәки бькʹәвьнә мала мә сәва тьшта бьгәрʹьн, мә зоре бьвьнә диԝане, йан һәла һе жи бькьнә кәле. Пәйкʹәтийед мә дьфькьрьн, кӧ әме бьтьрсьн, чьмки ԝана жь мә һьнәка кьрьнә кәле. Һәрге әм бьһельн, ԝәки тьрс бькʹәвә дьле мә, әме ида хԝәха хԝә «ԛәдәхә кьн», демәк жь бо тьрсе хьзмәтийа хԝә бьдьнә сәкьнандьне. Ле әм нахԝазьн бьбьнә мина ԝан мәрьва, дәрһәԛа кʹижана те готьне Ԛануна Кʹаһинтийе 26:36, 37-да. Әме нәһельн, ԝәки тьрс рʹе мә бьгьрә бәрдәԝам кьн Йаһоԝарʹа хьзмәт кьн. Әм бь тʹәмами итʹбарийа хԝә Йаһоԝа тиньн у накʹәвьнә панике (Иша. 28:16). Әм бь дӧа рʹебәрийа Йаһоԝа дьгәрʹьн. Әм заньн, ԝәки пе аликʹарийа ԝи, тʹӧ сәрԝере лапи ԛәԝи жи, нькарә рʹе мә бьгьрә бь амьни Хԝәдейе хԝә бьһʹәбиньн. Мьԛабьлибун дькарә нә кӧ мә бьтьрсинә, ле дьһа һелан кә, ԝәки һе зедә Йаһоԝарʹа хьзмәт кьн. w19.07 9-10 ¶6-7

Һәрге жи ԝә хьзмәтийеда һе кәсәк нәдитийә, кӧ тʹәв һинбуна Кʹьтеба Пироз дәрбаз кьн, бәрдәԝам кьн бьгәрʹьн. Бир нәкьн, ԝәки Иса әԝ мәрьв, йед кӧ шагьрта дьгәрʹьн, бәрамбәри мәʹсигьра кьр. Мәʹсигьр дькарьн гәләк сьһʹәта жи хәрщ кьн, һʹәта кӧ мәʹсики бьгьрьн. Гәләк щар әԝана шәв йан жи бәрбанге нечʹире дькьн, у щара әԝана дьчьнә щийед дур жи (Луԛа 5:5). Мина ве йәке, һьнә мьзгинван епʹещә ԝәʹдә хәрщ дькьн, сәва бь сәбьр щурʹә-щурʹә ԝәʹдәда у щийада «нечʹирванийе» бькьн. Ле чьрʹа? Сәва кӧ әԝана һе зедә мәрьва бьвиньн. Әԝед кӧ ԝи шьхӧлида чьԛас дькарьн һәр тьшти дькьн, тенә кʹәрәмкьрьне, демәк ԝан мәрьва дьвиньн, йед кӧ гӧһ дьдьнә мьзгинийе. Ле һун дькарьн нава рʹоже, ԝәʹде ӧса хьзмәт кьн, кӧ бькарьбьн рʹасти мәрьва бен, йан жи щийед ӧса, кʹидәре гәләк мәрьва дькарьн бьвиньн? Чьрʹа мәрʹа сәбьр лазьм ә, чахе һинбуна Кʹьтеба Пироз тʹәви мәрьва дәрбаз дькьн? Мәʹник әԝ ә, ԝәки әм гәрәке нә кӧ тʹәне али мәрьва бькьн һинкьрьнед Кʹьтеба Пироз пебьһʹәсьн, ле али ԝан бькьн ԝәки әԝана Ньвискʹаре Кʹьтеба Пироз, демәк Йаһоԝа Хԝәде, нас кьн у һʹьз бькьн. w19.07 18-19 ¶14-15

Жь мә һьнәк дьбәкә бона шашийед хԝәйә бәре, хԝә сущдар дькьн. Һәрге ӧса нә, ԝе керһати бә ԝәки дәрһәԛа ԛӧрбана Мәсиһ хԝәрʹа леколине бькьн. Һәрге әм дәрһәԛа ве йәке леколина бькьн, бьфькьрьн у дӧа бькьн, әме дьлрʹьһʹәт бьн у хԝә нәчәрчьриньн бона шашийед хԝәйә бәре. Әме ида бона ԝан тьшта, йед кӧ Йаһоԝа бахшандийә мә, хԝә сущдар нәкьн. Дина хԝә бьдьне, әм диса чь дькарьн жь Паԝлос һин бьн. Һьнәка жь мә дьбәкә бона шьхӧле Пʹадшатийе хәбата баш һиштьнә, бь кʹижани әм дькарьбун дәԝләти буна. Һәрге ӧса нә, гәло әм дькарьн бир кьн ԝан тьштед пьшт хԝәва һишти, жь бо кʹижана әм дькарьбун дәԝләти буна? (Жьмар 11:4-6; Ԝаиз 7:10) Нава «тьштед пьшт хԝәва һьшти» дькарьн кьред мәйи бәре бьн, йан жи тәнгасийед мәйи бәре, бәр кʹижана мә тәйах кьрийә. Бәле, чахе әм тиньн бира хԝә кӧ Йаһоԝа ча ԝәʹде тәнгасийа мә кʹәрәм кьрийә у али мә кьрийә, әԝ йәк дькарә мә һе незики Баве мәйи әʹзмана кә. Ле әм тʹӧ щар нахԝазьн хԝәрʹази бьн у бьфькьрьн кӧ мә ида епʹещә бона Йаһоԝа кьрийә (1 Корн. 15:58). w19.08 3 ¶5-6

Әм дькарьн Хԝәдайе хԝәрʹа һәртʹьм дӧа бькьн, фьрԛи тʹӧнә әм кʹидәре бьн. Әԝ дӧайед мә пьшт гӧһе хԝәва набежә у тʹьме һазьр ә гӧһ бьдә мә. Чахе әм дьвиньн, ԝәки Йаһоԝа дӧайед мә дьбьһе, әм дьһа незики ԝи дьбьн у ԝи һʹьз дькьн. Зәбурбеж гот: «Әз Хӧдан һʹьз дькьм, Әԝи дәнге зарʹинийа мьн бьһист» (Зәб. 116:1). Баве мә нә кӧ тʹәне дӧайед мә дьбьһе, ле ӧса жи щаба дӧайед мә дьдә. Йуһʹәннайе шанди дьбежә: «Һәгәр әм тьштәки ль гора хԝәстьна [Хԝәде] же бьхԝазьн, әԝ дәнге мә дьбьһе» (1 Йуһʹн. 5:14, 15). Бәле, Йаһоԝа дьбәкә ӧса щаба дӧайед мә нәдә чаԝа кӧ әм һивийе нә, чьмки әԝ дьһа рʹьнд занә чь бона мә баш ә. Ләма жи щара щаба ԝи на йә, йан жи әԝ дьхԝазә, ԝәки әм һивийе бьн (2 Корн. 12:7-9). Йаһоԝа мә хԝәй дькә у бона мә хәм дькә. Әԝ хԝәха жи тинә сери ԝан тьшта, чь кӧ жь бава дәʹԝа дькә (1 Тимтʹ. 5:8). Әԝ бона һʹәԝщед зарʹед хԝә алийе материалида, хәм дькә. Йаһоԝа нахԝазә әм бәрхԝә кʹәвьн бона хԝарьне, кʹьнщхԝәкьрьне, йан жи бона ве йәке кӧ кʹидәре бьжин (Мәт. 6:32, 33; 7:11). Йаһоԝа чаԝа баве бь һʹьзкьрьн, һәла һе жи хәм кьрийә бона ве йәке, ԝәки ахьрийеда һʹәму тьшт чь кӧ мәрʹа лазьм бә бал мә һәбә. w20.02 5 ¶10-12

Нә һʹәму бьжарти пʹара «хӧламе амьн у сәрԝахт» ьн  (Мәт. 24:45-47). Чаԝа ԛьрʹна йәкеда ӧса жи иро, Йаһоԝа у Иса бь сайа һьнә бьра гәләкарʹа хԝарьне дьдьн, демәк һин дькьн. Ԛьрʹна йәкеда тʹәне чәнд Мәсиһийед бьжарти Ньвисаред Йунани ньвисин. Иро жи тʹәне һьнә  Мәсиһийед бьжарти щабдар ьн сәва «ԝәхтда» хԝарьна рʹӧһʹани бьдьнә щьмәʹта Хԝәде. Йаһоԝа сафи кьрийә кӧ һʹәчʹи зәʹф мәрьварʹа жийина һʹәта-һʹәтайе сәр әʹрде бьдә, ле һьнәкарʹа жийина сәр әʹзмана, йед кӧ ԝе тʹәви Иса сәрԝертийе бькьн. Йаһоԝа һʹәму хьзмәткʹаред хԝә хәлат дькә, ча «Щьһу» ӧса жи «дәһ мәрьв», у әԝ жь ԝана дәʹԝа дькә, кӧ гӧрʹа ԛанунед ԝи бькьн у жерʹа амьн бьминьн (Зәкәр. 8:23). Ӧса жи әԝ дьхԝазә кӧ әԝана гьшк шкәсти у мьлук бьн. Әԝана гьшк гәрәке тʹәвайи йәктийеда хьзмәт кьн. У гьшк гәрәке һәр тьшти бькьн, сәва әʹдьлайа щьвате хԝәй кьн. Әм незики хьлазийа ве дьнйайе дьбьн, ләма жи ԝәрә әм бәрдәԝам кьн Йаһоԝарʹа хьзмәт кьн, у ча «кәрик» пәй Иса һәрʹьн. w20.01 31 ¶15-16

Әм нькарьн зоре нәфәред хԝә бькьн, кӧ мьзгинийе ԛәбул кьн, ле әм дькарьн ԝана һелан кьн, ԝәки һʹьш у дьле хԝә бона мьзгинийа жь Кʹьтеба Пироз вәкьн (2 Тимтʹ. 3:14, 15). Бь рʹабун-рʹуньштьна хԝә, бьбьнә мәсәла баш. Гәләк щар кьред мә һе һʹӧкӧм дьбьн сәр мәрьва, нә кӧ готьна мә. Бәрдәԝам кьн али нәфәред хԝә бькьн. Ве йәкеда Йаһоԝа мәрʹа мәсәләкә мәзьн ә. Әԝ диса у диса мәщале дьдә мәрьва, ԝәки мьзгинийе ԛәбул кьн у жийине бьстиньн (Йерәм. 44:4). Паԝлосе шанди Тимотʹейорʹа гот, ԝәки бәрдәԝам кә али мәрьва бькә. Ле чьрʹа? Чьмки ԝи щурʹәйи әԝи ԝе хԝә жи хьлаз кьра, у ԝан жи, йед кӧ гӧһ дьданә ԝи (1 Тимтʹ. 4:16). Әм мәрьвед хԝәйи незик һʹьз дькьн, ләма жи әм дьхԝазьн әԝана рʹастийед жь Хәбәра Хԝәде бьзаньбьн. w19.08 14 ¶2; 16-17 ¶8-9

Ԝе баш бә ԝәки әм бир нәкьн, кӧ һәрге кәсәк дьхԝазә мә рʹаст кә у ширәт кә, ԝәки ӧса нә,  шашийа мә ӧса бьчʹук нинә, ча әм һʹәсаб дькьн. Дәрәщед ӧсада, чахе мә ширәт дькьн, дьбәкә әм ширәте ԛәбул нәкьн. Әм дькарьн сәр ԝи мәрьве кӧ ширәт да, һерс кәвьн, йан жи бьхәйдьн кӧ әԝи чь щурʹәйи әԝ ширәт да мә. Ле һәрге әм мьлук ьн, әме сәр хԝә бьхәбьтьн, ԝәки ньһерʹандьна рʹаст хԝәй кьн. Мәрьве мьлук ширәте дьшекьринә. Сәва әве йәке рʹьнд фәʹм кьн, бьдьнә бәр чʹәʹве хԝә ве мәсәле: Һун тʹәви чәнд хушк-бьра щьватеда хәбәр дьдьн, у йәк жь ԝана ԝә дьбә алики у бь дәнге ньмьз ԝәрʹа дьбежә, кӧ сәр дьране ԝә хԝарьн майә. Фәʹмдари йә, һуне һьнәки шәрм бькьн, ле йәкә һуне гәләк рʹази бьн жь ԝи, кʹе ԝәрʹа әԝ йәк гот. Бь рʹасти, дьбәкә ԝәйе бьхԝәста кӧ ԝәрʹа һе зу бьготана! Мина ве йәке, әм гәрәке мьлук бьн у рʹази бьн жь хушк у бьра, йед кӧ мерхасийе дьдьнә кʹьфше у ԝәʹдәда ширәтед лазьм дьдьнә мә. Әм ԝан мәрьва һʹәсаб дькьн ча дост, нә кӧ дьжмьн (Мәтʹлк. 27:6; Галт. 4:16). w19.09 5 ¶11-12

Йаһоԝа малбәтеда щабдарийа фәрз ӧса жи дайә дайика, у һьнә һʹӧкӧме ԝан һәйә сәр зарʹед  ԝан. Бь рʹасти хәбәрдан у кьред де, дькарьн сәр зарʹед ԝе тʹәмамийа әʹмьре ԝанда һʹӧкӧм бьн (Мәтʹлк. 22:6). Дина хԝә бьдьне, кӧ де чь дькарьн һин бьн жь Мәрйәма дийа Иса. Мәрйәм Ньвисаред Пироз гәләк рʹьнд заньбу. Әԝе гәләк ԛәдьре Йаһоԝа дьгьрт у достийа ԝе тʹәви Ԝи незик бу. Мәрйәме һазьр бу гӧрʹа рʹебәрийа Йаһоԝа бькә һьнге жи, гава бона ве йәке лазьм бу тʹәмамийа әʹмьре хԝә жи бьгӧһезә (Луԛа 1:35-38, 46-55). Дайикно, һун дькарьн гәләк тьштада чʹәʹв бьдьнә Мәрйәме. Ле ча? Йа пешьн, бь сайа леколинкьрьна Кʹьтеба Пироз у дӧа, достийа хԝә тʹәви Йаһоԝа ԛәԝи кьн. Йа дӧда, һазьр бьн әʹмьре хԝәда гӧһастьна жи бькьн, сәва дьле Йаһоԝа ша кьн. w19.09 18 ¶17-19

Йуһʹәннайе шанди хәԝн-хәйала пʹехәмбәртийе станд. Хәԝн-хәйаледа мәләк чар мәләкед майинрʹа дьбежә, ԝәки байед ԛайим йед тәнгасийа мәзьн бьгьрьн, һʹәта кӧ мора хьлазийе ль әʹнийа кʹомәкә хӧлама нәхьн (Әʹйан. 7:1-3). Һәжмара ве кʹоме 144 000 ә, йед кӧ сәр әʹзмана тʹәви Иса ԝе сәрԝертийе бькьн (Луԛа 12:32; Әʹйан. 7:4). Паши ве йәке, Йуһʹәнна хәԝн-хәйаледа кʹомәкә дьнә мәзьн дьвинә, у дьбежә «Ва», чь кӧ дьдә кʹьфше ԝәки әԝ әʹщебмайи дьминә сәр ве йәке чь кӧ дит. Ле әԝи чь дит? «Әʹлаләтәкә ӧса мәзьн, кӧ тӧ кәси нькарьбу бьжьмарта жь һәр мьләти, жь һәр бәрәке, жь һәр щьмәʹте у жь һәр зьмани ль бәр тʹәхт у ԝи Бәрхи сәкьни бун» (Әʹйан. 7:9-14). Бьдьнә бәр чʹәʹве хԝә, Йуһʹәнна чьԛас ша бу кӧ пеһʹәсийа, ԝәки бь мириада мәрьв ԝе ахьрийеда рʹаст Хԝәде бьһʹәбиньн! Бешьк дькарьн бежьн, әԝе хәԝн-хәйале баԝәрийа Йуһʹәнна ԛәԝи кьр, ле баԝәрийа мә һе зедә ԛәԝи дькә, чьмки әм иро пе чʹәʹве хԝә дьвиньн ча әԝ хәԝн-хәйал те сери! Әм дьвиньн кӧ бь милйона мәрьв Йаһоԝа дьһʹәбиньн, у һевийа ԝан һәйә кӧ тәнгасийа мәзьнда хьлаз бьн у һʹәта-һʹәтайе бьжин сәр әʹрде. w19.09 26 ¶2-3

Бьдьнә бәр чʹәʹве хԝә, ԝәки сәрԝеред дьнйайе әʹлам кьрьнә кӧ «дьне сәԛьрʹи у бехофи йә», чаԝа һатийә пʹехәмбәртикьрьне. Әԝана пʹайе хԝә дьдьн кӧ дьнйайеда тʹӧ  щар әʹдьлайикә ӧса тʹӧнә буйә. Сәрԝеред дьнйайе ԝе бьхԝазьн кӧ әм бьфькьрьн, ԝәки әԝана дькарьн һʹәму проблемед инсанәте сафи кьн. Ле бь рʹасти әԝана нькарьн бьдьнә сәкьнандьне ԝе йәке, чь кӧ паше ԝе бьԛәԝьмә «Бабилона Мәзьн» ԝе бе кʹӧтакьрьне (Әʹйан. 17:5, 15-18). Хԝәде ԝе әве йәке бькә «дьле ԝан, кӧ хԝәстьна ԝи бькьн». Ле хԝәстьна ԝи чь йә? Ԛьрʹа һʹәму религийа ԛәлп бинә, демәк ӧса жи Мәсиһийед ԝе дьнйайе. Хԝәде ԝе хԝәстьна хԝә бькә дьле «дәһә стьру» йед «щәʹнәԝьрәки соре гәвәз». Дәһә стьру бь симболик те һʹәсабе һʹәму сәрԝерти, кʹижан кӧ пьштгьрийа «щәʹнәԝьр» дькьн, демәк тʹәшкиләта Мьләтед Йәкбуйи (Әʹйан. 17:3, 11-13; 18:8). Чахе әԝ сәрԝер пәй религийа ԛәлп кәвьн, әв нишана ве йәке бә, кӧ тәнгасийа мәзьн дәстпебуйә. Әԝ ԝе ԛәԝьмандьнәкә хоф у тьрс бә, чьмки дьнйайеда ԝе сәр һʹәмуйа һʹӧкӧм бә. w19.10 14 ¶1, 3

Ԛьрʹна йәкеда, Дийотрәфис һʹәвсуди ԝан бьра дькьр, йед кӧ бона щьвата Мәсиһити щабдар бун. Әԝи дьхԝәст щьватеда «сәр һʹәмуйарʹа бә», ләма жи әԝи хәйбе Йуһʹәнна у бьред майин дькьр, сәва щьватеда ԛәдьре ԝан бехә (3 Йуһʹн.  10). Рʹаст ә чь кӧ Дийотрәфис кьр әме ве йәке тʹӧ щар нәкьн, ле әм дьбәкә һʹәвсудийе ԝи Мәсиһи бькьн, йе кӧ әв щабдари стандийә, кʹижан мә дьхԝәст бьстанда, илаһи һәрге әм дьфькьрин, ԝәки әм дькарьн әви шьхӧли ԝи четьр бькьн. Һʹәвсуди мина чʹерәкә жәʹрдадайи йә. Гава кʹока ԝе дәстпедькә дьле мәда шин бә, ида чәтьн дьбә әм жь дьле хԝә дәрхьн. Һʹәвсуди ӧса жи бал мәрьва хәйсәт-һʹӧнӧред хьраб һе зедә дькә, мәсәлә кʹӧмрʹәши, ԛӧрʹәбун у хԝәһʹьзи. Һʹәвсуди ӧса жи наһелә мәрьв хәйсәт-һʹӧнӧред баш нав хԝәда пешда бинә, мәсәлә һʹьзкьрьн, дьлшәԝати у ԛәнщи. Гава әм тедәрхьн, кӧ һʹәвсуди дьле мәда кʹока хԝә дьдә, әм гәрәке дәрберʹа кʹокева дәрхьн. w20.02 15 ¶6-7

Паԝлосе шанди дьгот, ԝәки чәтьнайикә ԝийә ӧса һәбу, кӧ еш ԝирʹа дьани. Әԝи әв чәтьнайи нав кьр ча «мьлйакʹәтәки Шәйтʹан» йе кӧ ԝи дьда «бәр кʹӧлма». Дьбәкә мәʹнийа проблемед ԝи рʹастә-рʹаст Шәйтʹан йан щьнед ԝи нибун, демәк ча бежи ԝана хԝәха әԝ стьру нәдькьрьнә бәдәна ԝи. Ле гава ԝана тәнгасийа Паԝлос дитьн, ча бежи әв «стьру» дьһа кʹур дькьрьнә бәдәна Паԝлос, сәва еша ԝи зедә кьн. Ле Паԝлос чь кьр? Пешийе Паԝлос дьхԝәст, ԝәки Йаһоԝа әԝи «стьруйи» дәрхә. Әԝ дьбежә: «Мьн се щара һиви жь Хӧдан [Йаһоԝа] кьр, кӧ ве йәке жь мьн дур хә». Рʹаст ә Паԝлос дӧа дькьр, ле йәкә стьру диса жи бәдәна ԝида ма. Гәло әԝ йәк те һʹәсабе, кӧ Йаһоԝа щаба дӧайед Паԝлос нәда? На! Әԝи щаба ԝи да. Рʹаст ә Йаһоԝа ԝи жь проблеме хьлаз нәкьр, ле әԝи ԛәԝат да Паԝлос, ԝәки тәйах кә. Йаһоԝа гот: «Ԛәԝата мьн сьстийада мийасәр дьбә» (2 Корн. 12:8, 9). Пе аликʹарийа Хԝәде, Паԝлос шабун у дьлрʹьһʹәти ӧнда нәкьр (Фили. 4:4-7). w19.11 9 ¶4-5

Йаһоԝа һежа йә кӧ тʹәне ԝи бьһʹәбиньн у жерʹа амьн бьн, чьмки әԝ ә Әʹфьрандар у Жийиндаре мә (Әʹйан. 4:11). Ле әԝ йәк һеса нинә. Рʹаст ә әм Йаһоԝа һʹьз дькьн у ԝи һӧрмәт дькьн, ле дьбәкә бона мә тьштед майин дьһа фәрз бьн, у әԝ йәк рʹе мә бьгьрә кӧ тʹәне Йаһоԝа бьһʹәбиньн. Кʹьтеба Пирозда чахе те готьне дәрһәԛа амьнийа һьндава Хԝәде, әԝ те һʹәсабе һʹьзкьрьна ԛайим һьндава ԝи. Һәрге әм тʹәне Йаһоԝарʹа амьн бьн, әме тʹәне ԝи бьһʹәбиньн. Әме нәһельн, кәсәк йан жи тьштәк дьле мәда щийе ԝи бьгьрә (Дәркʹ. 34:14). Ле әм чʹәʹвгьрти Йаһоԝа һʹьз накьн. Чьрʹа? Чьмки әԝ һʹьзкьрьн сәр һʹиме ԝан тьшта йә, чь кӧ әм дәрһәԛа ԝи пеһʹәсийанә. Һʹӧнӧред ԝийи баш мә гәләк хԝәш тен. Әм заньн әԝ чь һʹьз дькә у чь һʹьз накә, у әм жи пәй рʹийа ԝи дьчьн кӧ мина ԝи бьн. Әм фәʹм дькьн ԛьрара ԝи һьндава мәрьва у пьштгьрийа ԛьрара ԝи дькьн. Бона мә ԛәдьр ә, ԝәки әԝ мәщале дьдә мә кӧ әм бьбьн достед ԝи (Зәб. 25:14). Һәр тьшт чь кӧ әм дәрһәԛа Әʹфьрандаре хԝә педьһʹәсьн, мә һе незики ԝи дькә (Аԛуб 4:8). w19.10 26 ¶1-3

Иро щурʹә-щурʹә чәтьнайед хушк-бьред мә һәнә. Мәсәлә, гәләк зийане дьстиньн жь тʹәшԛәлед тʹәбийәте, йан жи дьчәрчьрьн жь бо хәзәбед кӧ мәрьв пешда тиньн. Чахе тьштед ӧса дьԛәԝьмьн, һьнәк жь мә дьбәкә бькарьбьн әԝан һәвала мала хԝәда хԝәй кьн. Йед майин дькарьн алийе пʹәрәда аликʹарийе бьдьн. Ле һәр кәс жь мә дькарә Йаһоԝарʹа дӧа бькә, ԝәки али хушк-бьред мә бькә. Чахе әм педьһʹәсьн, ԝәки хушк йан бьрак дьлтәнг ә, дьԛәԝьмә әм ньзаньн кӧ чь бежьн йан жи чь бькьн бона ԝан. Ле һәр кәс жь мә дькарә тьштәкида аликʹарийе бьдә. Мәсәлә, әм дькарьн кʹеләка һәвалед хԝә бьн у тʹәви ԝан ԝәʹдә дәрбаз кьн. Һьн жи әм дькарьн бь дьл у щан гӧһ бьдьнә ԝан, чахе әԝана мәрʹа тьштәки гьли дькьн. У әм ӧса жи дькарьн ԝанрʹа рʹезед жь Кʹьтеба Пироз гьли кьн, кʹижан кӧ дьлбинийе дьдьн (Иша. 50:4). Йа лапә фәрз әԝ ә, ԝәки кʹеләка һәвале хԝә бьн, гава ԝанрʹа һун лазьм ьн. Әм гәрәке хԝәрʹа нете дайньн, ԝәки ирода һәләԛәтийа хԝә тʹәви хушк-бьред хԝә ԛәԝи хԝәй кьн. Һәвалтийа мә ԝе нә кӧ тʹәне һʹәта хьлазийа ве дьнйайе бьминә, ле һʹәта-һʹәтайе! w19.11 7 ¶18-19

Әԝ ԛӧрбана рʹәзәдьли ԝана дьани, чьмки ԝана Йаһоԝа Хԝәде һʹьз дькьр. Әԝе кӧ ԛӧрбан дьани, малбәта ԝи у кʹәшиша гәрәке гоште һʹәйԝана ԛӧрбанкьри бьхԝарана. Ле һьнә навдьле һʹәйԝана ԛӧрбанкьри, тʹәне Йаһоԝарʹа дькʹәтьн. Әԝ кʹижан навдьл бун? Бона Йаһоԝа пʹара лапә баш йе һʹәйԝане, бәз йане дон бу. Йаһоԝа ӧса жи конкрет гот, кӧ жь навдьл чь гәләк ԛимәт ә, мәсәлә гӧрчʹьк (Ԛан. Кʹаһ. 3:6, 12, 14-16). Ләма жи чахе Исраелийа бь рʹәзәдьли навдьлед ԛимәт у бәз Йаһоԝарʹа ԛӧрбан дькьрьн, әԝ йәк ԝи хԝәш дьһат. Исраелийа кӧ ԝи щурʹәйи ԛӧрбан дьанин, нишан дькьрьн, кӧ дьхԝазьн Йаһоԝарʹа ԛӧрбана лапә баш бьдьн. Мина ве йәке, Иса жь һʹьзкьрьна һьндава Йаһоԝа, бь рʹәзәдьли у бь дьл у щан чьԛас дәсте ԝи дьһат хьзмәтийеда дькьр (Йуһʹн. 14:31). Иса шабун дьстанд чахе ԛьрара Баве хԝә дьани сери (Зәб. 40:8). Дьле Йаһоԝа гәләк ша дьбу чахе әԝи дьдит, кӧ Иса ча бь рʹәзәдьли жерʹа хьзмәт дькә! w19.11 22-23 ¶9-10

Хәбәра Хԝәдеда те готьне, ԝәки паши шәш «рʹожед» әʹфьрандьне, Хԝәде әʹфьрандьн хьлаз кьр (Дәстп. 2:2). Йаһоԝа хәбате һʹьз дькә у һʹәта иро жи «шьхӧле хԝә дькә» (Йуһʹн. 5:17). Йаһоԝа шәш «рʹожа» хәбьти у «рʹожа» һʹәфта һеса бу у ӧса жи готә Исраелийа ԝәки һәр рʹожа һʹәфта һеса бьн. Хԝәде гот, ԝәки Шәми ортʹа ԝи у Исраелийада ча нишан ә (Дәркʹ. 31:12-14). Һʹәмушкарʹа ԛәдәхә бу кӧ ве рʹоже бьхәбьтьн, зарʹарʹа, хӧламарʹа, у һәла һе һʹәйԝанед малерʹа жи (Дәркʹ. 20:10). Әԝе йәке мәщал дьда мәрьва, ԝәки һе зедә һʹьш-аԛьле хԝә бьдьн сәр тьштед рʹӧһʹани. Гәләк сәрԝеред религийа Щьһуйа, ԝәʹде Исада дәрһәԛа ԛануна рʹожа Шәмийе гәләк ԛәйдә саз кьрьн. Ԝана дьгот кӧ нәԛануни йә, ԝәки рʹожа Шәмийе һәла һе жи сьмбьлед геньм бьчьньн бьхԝьн, йан жи мәрьвәки жь нәхԝәшийе ԛәнщ кьн (Марԛ. 2:23-27; 3:2-5). Ле хԝәстьна Хԝәде әԝ нибу, у Иса әԝ йәк зәлал да кʹьфше ԝанрʹа, йед кӧ гӧһ дьданә ԝи. w19.12 3-4 ¶8-9

Чьԛас һе зедә әм дәрһәԛа хәйсәт-һʹӧнӧред Йаһоԝа пебьһʹәсьн, һаԛас һе зедә әме бькарьбьн чʹәʹв бьдьнә ԝи. Даԝьд Баве хԝәйи әʹзмана рʹьнд нас дькьр, ләма жи әԝи дькарьбу чʹәʹв бьда ԝи, һәләԛәтийа һьндава мәрьвада. Һәләԛәтийа Даԝьд тʹәви Йаһоԝа ӧса ԛәԝи бу, кӧ әԝ Исраеледа бу пʹадшаки лапи һʹьзкьри, у Йаһоԝа ԝи һʹәсаб дькьр ча  мәсәла баш бона пʹадшед Исраеле (1 Пʹадш. 15:11; 2 Пʹадш. 14:1-3). Әм чь дәрсе хԝәрʹа һин дьбьн? Әм гәрәке «чʹәʹв бьдьнә Хԝәде». Чахе әм чʹәʹв дьдьнә хәйсәт-һʹӧнӧред Хԝәде, әм избат дькьн, ԝәки әм зарʹед ԝи нә (Әфәс. 4:24). Әме һʹәта-һʹәтайе дәрһәԛа Йаһоԝа һе зедә пебьһʹәсьн (Ԝаиз 3:11). Йа фәрз нә кӧ әԝ ә, әм чьԛас тьшт заньн дәрһәԛа ԝи, ле әԝ ә кӧ әм чь дькьн чахе дәрһәԛа ԝи занәбуне дьстиньн. Һәрге әм чь педьһʹәсьн, әʹмьре хԝәда дьдьнә хәбате у чʹәʹв дьдьнә Баве хԝәйи һʹьзкьри, ӧса әм бәрдәԝам дькьн һе незики ԝи дьбьн (Аԛуб 4:8). Йаһоԝа бь Хәбәра хԝә мәрʹа соз дьдә, ԝәки ԝе тʹӧ щар нәһелә ԝан мәрьва, йед кӧ ԝи дьгәрʹьн. w19.12 20 ¶20; 21 ¶21, 23

Аԛуб һʹәму кӧрʹед хԝә һʹьз дькьр, ле әԝи Усьв, кӧ 17 сали бу, һе зәʹф һʹьз дькьр. Әԝ йәк сәр бьред ԝи ча һʹӧкӧм бу? Ԝана һʹәвсуди ԝи кьрьн, у ләма Усьв бәр чʹәʹве ԝан рʹәш бу. Ләма жи ԝана Усьв фьротьн у баве хԝә хапандьн, кӧ йанчь тәрәԝьләки кӧрʹе ԝийи һʹьзкьри кӧштийә. Бәле, жь бо һʹәвсудийа ԝан, малбәта ԝанда әʹдьлайи ӧнда бу у ԝана кӧл-дәрд кьрә дьле баве хԝә (Дәстп. 37:3, 4, 27-34). Һʹәвсуди дькʹәвә нава ԝан «кьред бьнйата инсен», йед кӧ бәрбь мьрьне дьбьн у рʹийа мәрьва дьгьрьн, кӧ Пʹадшатийа Хԝәде ԝар бьн (Галт. 5:19-21). Гәләк щар һʹәвсуди мәʹнийа нәйартийе, шәрʹ-дәʹԝа у һерскʹәтьне йә. Мәсәла бьред Усьв дьдә кʹьфше, ԝәки һʹәвсуди дькарә һәләԛәтийа ортʹа нәфәра хьраб кә у нав ԝанда әʹдьлайе ӧнда кә. Рʹаст ә әм тʹӧ щар нахԝазьн чʹәʹв бьдьнә бьред Усьв, ле әм гьшк жи гӧнәкʹар ьн у дьле мә хапинок ә. Ләма жи щара дьле мәда дькарә һʹәвсуди пешда бе. w20.02 14 ¶1-3

Щарәке Йаһоԝа һьнә рʹӧһʹе хԝәйи пироз сәр Муса һьлда у да һьнә рʹуспийед Исраели, йед кӧ незики коне щьвине сәкьнибун. Паше һьнә ԝәʹдә шунда Муса бьһист, ԝәки дӧ рʹуспийед майин жи, йед кӧ бәр коне щьвине нибун, рʹӧһʹе пироз стандьнә у дәстпекьрьнә пʹехәмбәртийе бькьн. Йешу Мусарʹа гот, ԝәки ԝан дӧ рʹуспийа бьдә сәкьнандьне. Ле Муса чь кьр? Әԝи дәхәси ԝан дӧ мерʹа нәкьр, йед кӧ алийе Йаһоԝада һатьнә ԛәбулкьрьне. Дәԝсе, әԝи мьлукти да кʹьфше кӧ тʹәви ԝан ша бу, ԝәки ԝана ԛәдьрәки ӧса станд (Жьмар 11:24-29). Әм жь Муса чь дәрсе һин дьбьн? Һәрге һун рʹуспи нә, дьбәкә ԝәрʹа готьнә кӧ бьраки майин һин кьн, сәва ида әԝ ԝи шьхӧли бькә, кʹижан ԝә хԝәш дьһат бькьн. Һәрге һун мина Муса мьлук ьн, һуне әʹщьз нәбьн у нәфькьрьн, ԝәки һун кери тьштәки найен. Дәԝсе, һуне ша бьн али бьре хԝә бькьн. w20.02 15 ¶9; 17 ¶10-11

Нәхԝәши дькарә мә емосйалида сьст кә. Дьбәкә әм ӧса жи шәрм дькьн бона нәхԝәшийа хԝә, чахе әм дьвиньн кӧ мәрьв ча сәр мә дьньһерʹьн, йан жи чахе жь бо нәхԝәшийе әм дькʹәвьнә стуйе кәсәки. Һәрге жи мәрьв ньзаньн дәрһәԛа нәхԝәшийа мә, йәкә әм бәрхԝә дькʹәвьн, чьмки әм ида нькарьн һаԛас бькьн чьԛас мә бәре дькьр. Ԝи һʹале гьранда, Йаһоԝа дькарә дьл бьдә мә у мә гәш кә. Чаԝа? Йаһоԝа Кʹьтеба Пирозда готьнед ԛәнщ бона мә дайә ньвисаре, кʹижан кӧ тиньн бира мә, кӧ әԝ мә ԛимәт дькә чахе әм нәхԝәш ьн жи (Зәб. 31:19; 41:3). Һәрге әм әԝ гьлийед кӧ жь бина бәр Хԝәде нә, бьхуньн, илаһи гәләк щар, Йаһоԝа ԝе али мә бькә кӧ фькьред нәбаш жь һʹьше хԝә дәрхьн у бона нәхԝәшийа хԝә гәләк бәрхԝә нәкʹәвьн. Дӧдьли нәбьн, ԝәки Йаһоԝа занә кӧ һун чь һʹалида ньн. Һиви жь ԝи бькьн, ԝәки али ԝә бькә кӧ сәр дәрәща хԝә рʹаст бьньһерʹьн. Паше Кʹьтеба Пирозда бьгәрʹьн ԝан готьнед ԛәнщ, кӧ Йаһоԝа бона ԝә хԝәй кьрийә. Кʹур бьфькьрьн сәр ԝан рʹеза кӧ нишан дькьн, ԝәки Йаһоԝа ча хьзмәткʹаред хԝә ԛимәт дькә. Гава һун ӧса бькьн, һуне бьвиньн, ԝәки Йаһоԝа һьндава һʹәму хьзмәткʹаред хԝәйи амьнда, ԛәнщ ә (Зәб. 84:11). w20.01 15-16 ¶9-10; 17 ¶12

Исһаԛ йәки дәԝләти бу, у Фьльстинийа чʹәʹвнәбари һәбука ԝи дькьрьн (Дәстп. 26:12-14). Ԝана һәла һе жи бир хьтьмандьн, жь кʹижана Исһаԛ бона һʹәйԝанед хԝә ав һьлдьда (Дәстп. 26:15, 16, 27). Иро һьнә мәрьв мина Фьльстинийа чʹәʹвнәбарийе ԝан мәрьва дькьн, һәбука кʹижана жь йа ԝан зедәтьр ә у жь ԝана баштьр дьжин. Әԝана нә кӧ тʹәне дьхԝазьн щәм ԝан жи әԝ тьшт һәбьн, ле ӧса жи дьхԝазьн йа ԝан мәрьва тʹӧнә бә. Сәрԝеред религийа Щьһуйа һʹәвсуди Иса дькьрьн, чьмки гәләк мәрьва ԝи һʹьз дькьрьн (Мәт. 7:28, 29). Хԝәде Иса шандә сәр әʹрде, у әԝи мәрьв рʹастийе һин дькьр. Ле әԝ сәрԝеред религийа дәрһәԛа Иса тьштед дәрәԝ бәла дькьрьн у бӧхдан дьавитьнә ԝи, сәва наве ԝийи баш әʹрде хьн (Марԛ. 15:10; Йуһʹн. 11:47, 48; 12:12, 13, 19). Ле әм жь ве йәке чь дәрсе һин дьбьн? Һәрге щьватеда кәсәки жь бо хәйсәт-һʹӧнӧред ԝийи баш гәләк һʹьз дькьн, әм гәрәке сәр хԝә бьхәбьтьн, сәва һʹәвсудийе ԝи кәси нәкьн. Дәԝсе, әм гәрәке чʹәʹв бьдьнә һʹӧнӧред ԝийи баш (1 Корн. 11:1). w20.02 15 ¶4-5

Бьдьнә бәр чʹәʹве хԝә, кӧ һун ԝәкә 2 500 сал пешда, Фарьседа дьжин у дьхԝазьн тʹәви пʹадше ԝи ԝәлати дәрһәԛа тьштәки хәбәр дьн. Ле пешийа кӧ тʹәви ԝи хәбәр дьн, һун гәрәке изьне жь ԝи бьхԝазьн. Һәрге һун бьхԝазьн бей изьн тʹәви ԝи хәбәр дьн, һун дькарьн бенә кӧштьне! Әм гәләк рʹази нә, кӧ Йаһоԝа мина ԝи пʹадше Фарьсе нинә! Әм тʹьме дькарьн тʹәви ԝи хәбәр дьн. Әԝ дьхԝазә, ԝәки әм аза тʹәви ԝи хәбәр дьн у незики ԝи бьн. Мәсәлә, сәрнавед Йаһоԝайи ӧса ԛәԝи һәнә ча Әʹфьрандаре һәри Бьльнд, Сәрԝере Һьмзор, Хԝәйи Хӧдан, ле йәкә әԝ дьхԝазә, кӧ чахе әм тʹәви ԝи хәбәр дьдьн, хәбәрәкә дьлгәрми бьдьнә хәбате, демәк жерʹа бежьн «Баво» (Мәт. 6:9). Әм бәхтәԝар ьн, чьмки Йаһоԝа дьхԝазә һәләԛәтийа мә тʹәви ԝи ӧса незик бә! Әм бь рʹасти дькарьн Йаһоԝарʹа бежьн Баво, чьмки әԝ ә Жийиндаре мә (Зәб. 36:9). Әԝ Баве мә йә, ләма әм борщдар ьн гӧрʹа ԝи бькьн. Һәрге әм ӧса бькьн ча әԝ дьхԝазә, әме кʹәрәмед мәзьн бьстиньн (Ибрн. 12:9). Дькʹәвә нава ԝан кʹәрәма жийина һʹәта-һʹәтайе, йан сәр әʹрде йан сәр әʹзмана. w20.02 2 ¶1-3

Нета мә әԝ ә, ԝәки али ԝан бькьн, йед кӧ Кʹьтеба Пироз һин дьбьн, рʹӧһʹанида пешда һәрʹьн (Әфәс. 4:13). Чахе кәсәк ԛайил дьбә кӧ Кʹьтеба Пироз һин бә, әԝ дьбәкә пешийе дьхԝазә бьзаньбә, ԝәки әԝ һинбун ԝе ча хут жерʹа кʹаре бинә. Ле гава һʹьзкьрьна ԝи һьндава Йаһоԝа һе мәзьн бә, әԝ ида дьбәкә дәстпекә бьфькьрә, кӧ ча әԝ дькарә али мәрьвед дьн бькә, демәк ӧса жи али ԝан, йед кӧ щьватеда ньн (Мәт. 22:37-39). Ԝәʹде лайиԛ, һун дькарьн ԝанрʹа бежьн, кӧ мәщала ԝан һәйә пе ԛӧрбанкьрьна пәрʹа жи пьштгьрийа шьхӧле Пʹадшатийе бькьн. Ԝана һин кьн, кӧ ча проблема сафи кьн. Бьдьнә бәр чʹәʹве хԝә, әԝ мәрьве кӧ һун тʹәви ԝи һинбуне дәрбаз дькьн, кʹижан ида буйә мьзгинване нәньхӧманди, щьватеда жь кәсәки хәйдийә. Дәԝса кӧ алийе кәсәки бьгьрьн, һе баш ә жерʹа шьровәкьн, ԝәки дәрһәԛа ве йәке Кʹьтеба Пироз чь дьбежә. Әԝ гәрәке йан бьбахшинә ԝи мәрьви, йан жи һәрге нькарә хәйде бир кә, гәрәке тʹәви ԝи хәбәр дә бь ве нете, кӧ бь һʹьзкьрьн у нәрми бьре хԝә ԛазанщ кә (Бәрамбәр кьн Мәтта 18:15). Али ԝи бькьн кӧ хԝә һазьр кә, ԝәки ча хәбәр дә. w20.01 5-6 ¶14-15

Һәрге әм Йаһоԝарʹа бона бахшандьне дӧа бькьн, ширәткьрьна ԝи ԛәбул кьн, у сәр хԝә бьхәбьтьн, ԝәки диса ԝан шашийа нәкьн, әме нишан кьн кӧ әм бахшандьна Йаһоԝа дьшекьриньн. Чахе әм ван гава бькьн, дьле мә ԝе рʹьһʹәт бә у әме әʹдьлайе тʹәхмин кьн. Рʹасти жи әм чьԛас дьшьдьн кӧ заньн, ԝәки «Хӧдан незики дьлшкәстийа йә у мәрʹьм-бәләнгаза дьдәбьринә»! (Зәб. 34:18) Әм незики хьлазийа ве дьнйайе дьбьн, у хәмед мә ԝе һе зедә бьн. Ләма жи чахе һун бона тьштәки хәмгин бьн, дәрберʹа жь Йаһоԝа аликʹарийе бьхԝазьн. Бь дьл у щан Кʹьтеба Пироз леколин бькьн. Жь сәрһатийед Һаннайе, Паԝлосе шанди у Даԝьд Пʹадша хԝәрʹа дәрсе һин бьн. Жь Баве хԝәйи әʹзмана һиви кьн, кӧ али ԝә бькә, һун тедәрхьн, һәла чь йә мәʹнийа хәмгинийа ԝә (Зәб. 139:23). Бьһельн ԝәки Йаһоԝа баред ԝә һьлгьрә, илаһи гава һун нькарьн проблема хԝә сафи кьн. Һәрге һун ӧса бькьн, һуне жи мина зәбурбеж хԝә тʹәхмин кьн, йе кӧ Йаһоԝарʹа дьстьра: «Чахе хәмед мьн зедә дьбун, тә бәрдьли дьда мьн у дьле мьн рʹьһʹәт дькьр» (Зәб. 94:19, ДТʹ). w20.02 24 ¶17; 25 ¶20-21

Хԝәде бь сайа рʹӧһʹе хԝә, фькьред хԝә кьрә һʹьше ньвискʹаред Кʹьтеба Пироз. Чахе әм Кʹьтеба Пироз дьхуньн у сәр дьфькьрьн, ширәтед Хԝәде дькʹәвьн һʹьш у дьле мә. Әԝ ширәт у фькьред Йаһоԝа мә һелан дькьн әʹмьре хԝәда гӧһастьна бькьн, сәва дьле ԝи ша кьн (Ибрн. 4:12). Ле сәва әм бь тʹәмами жь рʹӧһʹе пироз кʹаре бьстиньн, әм гәрәке ԝәʹдә башԛә кьн сәва һәр гав Кʹьтеба Пироз леколин бькьн у кʹур бьфькьрьн сәр чь жи дьхуньн. Паше ида Хәбәра Хԝәде ԝе сәр хәбәрдан у кьред мә һʹӧкӧм кә. Ӧса жи әм гәрәке тʹәви хушк-бьра тʹәвайи тʹоп бьн сәва Хԝәде бьһʹәбиньн (Зәб. 22:22). Демәк рʹӧһʹе Йаһоԝа сәр щьвата йә (Әʹйан. 2:29). Чахе әм тʹәви хушк-бьра тʹоп дьбьн, әм бона рʹӧһʹе пироз дӧа дькьн, кʹьламед рʹӧһʹани кӧ сәр һʹиме Хәбәра Хԝәде нә, дьстьрен, у жь бьред кӧ пе рʹӧһʹе пироз тенә кʹьфшкьрьне, ширәт у рʹебәрийед жь Кʹьтеба Пироз дьбьһен. Ле сәва бь тʹәмами әм жь рʹӧһʹе пироз кʹаре бьстиньн, әм гәрәке хԝә бона щьвата һазьр кьн. w19.11 11 ¶13-14