Чьлә

Баԝәрийа Тимотʹейо сәр һʹиме избаткьрьна бу, йед кӧ ԝи незики Йаһоԝа кьрьн. Һун жи гәрәке Кʹьтеба Пироз леколин кьн у избат бьн ве йәкеда, чь кӧ дәрһәԛа Йаһоԝа педьһʹәсьн. Йа лапә кем, һун гәрәке дӧдьли нәбьн се тьштада. Йа пешьн, һун гәрәке баԝәр бьн, ԝәки Әʹфьрандаре һʹәму тьшти Йаһоԝа йә (Дәркʹ. 3:14, 15; Ибрн. 3:4; Әʹйан. 4:11). Йа дӧда, һун гәрәке избат бьн, кӧ Кʹьтеба Пироз әԝ һәйә ньвисара жь бина бәр Хԝәде, кӧ бона һʹәму мәрьва йә (2 Тимтʹ. 3:16, 17). У йа сьсийа, һун гәрәке баԝәр бьн, кӧ сәр әʹрде щьмәʹта Йаһоԝа һәйә, йа кӧ бьн рʹебәрийа Исада Ԝирʹа хьзмәт дькә, у әԝ щьмәʹт Шәʹдед Йаһоԝа нә (Иша. 43:10-12; Йуһʹн. 14:6; Кʹар. Шанд. 15:14). Ле әԝ йәк найе һʹәсабе ԝәки һун әʹсәйи гәрәке һур бь һур Кʹьтеба Пироз бьзаньбьн. Нета ԝә гәрәке әԝ бә, кӧ һʹьш-аԛьле хԝә бьдьнә хәбате, ԝәки дӧдьли нәбьн, кӧ ԝә рʹасти дитийә (Рʹом. 12:1). w20.07 10 ¶8-9

Ве пʹехәмбәртийеда те готьне кӧ рʹуйе кӧлийа «мина рʹуйе мәрьва» нә у ль сәр сәре ԝан «тьштед мина кʹофийед зерʹин» һәнә (Әʹйан. 9:7). Әԝана пенщ мәһа, чь кӧ ԝәк жийина кӧлийа йә, щәфе дьдьнә «ԝан мәрьвед [дьжмьнед Хԝәде] кӧ мора Хԝәде ль сәр әʹнийа ԝан тʹӧнәйә» (Әʹйан. 9:4). Зәлал те кʹьфше, ԝәки әва те готьне дәрһәԛа хьзмәткʹаред Йаһоԝайә бь рʹӧһʹе пироз бьжарти. Әԝана дьнйа хьрабрʹа бь мерхаси диԝана Хԝәде әʹлам дькьн, у бь ве йәке әԝана пьштгьред ве дьнйайе гәләк әʹщьз дькьн. Гәло әм дьхԝазьн бежьн, ԝәки әԝ кӧли дәрһәԛа кʹижани Йоԝел 2:7-9-да те готьне, у кӧли кӧ кʹьтеба Әʹйантида һәнә, йәк ниньн? Бәле, у әԝ йәк әʹщебмайи нинә, чьмки гәләк щар Кʹьтеба Пирозда тьштәки симболик, щурʹә-щурʹә тьшт те һʹәсабе. Мәсәлә, Әʹйанти 5:5-да дәрһәԛа Иса те готьне, кӧ әԝ «Шере жь ԛәбила Щьһуда» йә, ле 1 Пәтрус 5:8-да, сәр Мире-щьна те готьне «шер», кӧ «мьрʹәмьрʹа ԝи йә». w20.04 3 ¶8; 5 ¶10

Һащәр, щарийа Сарайе, чахе бу жьна Бьраһим, дәстпекьр тьштед бефәʹмти бькә. Гава әԝ һʹәмлә бу, ида ԛәдьре ханьма хԝә кӧ безӧрʹәт бу, нәдьгьрт. Ортʹа ԝан һәрда ӧса хьраб бьбу, ԝәки Һащәр жь Сарайе рʹәви чу (Дәстп. 16:4-6). Пе ньһерʹандьна мә, дьбәкә Һащәр йәкә ԛӧрʹә у зьмантуж бу, у һежайи щәзайе бу. Ле йәкә Йаһоԝа дәрһәԛа Һащәре ӧса нәдьфькьри. Әԝи мәләке хԝә шандә щәм ԝе, у чахе мәләк әԝ дит, али ԝе кьр ԝәки ньһерʹандьна хԝә рʹаст кә, у паше әԝ кʹәрәм кьр. Бь ве йәке, Һащәре фәʹм кьр, ԝәки Йаһоԝа дина хԝә дьда ԝе у һаш жь дәрәща ԝе һәбу. Әԝ йәк ӧса дьле ԝе гьрт, кӧ әԝе гот: «Тӧ йи Хԝәдейе кӧ мьн дьбини» (Дәстп. 16:7-13). Йаһоԝа дәрәща Һащәреда чь һьлда һʹәсаб? Әԝ һаш жийина ԝейә бәре һәбу у заньбу әԝе бәр чь тәйах дькьр. Йаһоԝа чʹәʹве хԝә данәда сәр беԛәдьрийа Һащәре һьндава Сарайе, ле йәкә әԝи һʹале ԝе һьлда һʹәсаб. w20.04 16 ¶8-9

Паԝлосе шанди гот, ԝәки һʹәму Мәсиһийед рʹаст ләщеда ньн (Ибрн. 12:1). Һәрге әм дьхԝазьн хәлата кӧ Йаһоԝа дьдә мә, бьстиньн, фьрԛи тʹӧнә әм щаһьл ьн йан әʹмьрда мәзьн ьн, ԛәԝат ьн йан ԝәстийайи нә, әм гьшк жи гәрәке һʹәта хьлазийе ве ләщеда бь сәбьр бьрʹәвьн (Мәт. 24:13). Паԝлос хԝәха жи ләщеда «рʹийа хԝә ԛәданд», ләма бь сәрфьнийази Мәсиһийед майин бәрбь ве йәке һелан дькьр (2 Тимтʹ. 4:7, 8). Ле әԝ чь щурʹә ләщ бу, бәʹса кʹижани Паԝлос дькьр? Паԝлос чахе дьхԝәст дәрсед фәрз һин кә, щара жь листькед Йунаньстана бәре мәсәлә дьанин (1 Корн. 9:25-27; 2 Тимтʹ. 2:5). Гәләк щар әԝи  жийина Мәсиһийа бәрамбәри рʹәва ләщмәйданеда дькьр (1 Корн. 9:24; Галт. 2:2; Фили. 2:16). Мәрьв чахе хԝә тʹәсмили Йаһоԝа дькә у те ньхӧмандьне, һьнгеда әԝ дәстпедькә ве «ләщеда» бьрʹәвә (1 Пәт. 3:21). Ле әԝ хәза финишерʹа һьнге дәрбаз дьбә, чахе Йаһоԝа ԝи пе жийина һʹәта-һʹәтайе хәлат дькә (Мәт. 25:31-34, 46; 2 Тимтʹ. 4:8). w20.04 26 ¶1-3

«Хӧдан хԝәха амьн ә, ԝе ԝә бьшьдинә у жь Йе Хьраб хԝәй кә» (2 Тʹесалоники 3:3). Гәло Йаһоԝа мә чаԝа хԝәй дькә? Йаһоԝа һьнә чʹәкед рʹӧһʹани дайә мә, йед кӧ дькарьн мә жь һʹьщумед Шәйтʹан хԝәй кьн. Әв чʹәкед рʹӧһʹани гәләк ԛәԝи у керһати нә! Ле сәва кӧ әм жь ԝан кʹаре бьстиньн, гәрәке әм ԝана ль хԝә бькьн у жь хԝә нәехьн. Мәсәлә, кʹәмбәра рʹастийе, те һʹәсабе рʹастийед жь Кʹьтеба Пироз. Гәло чьрʹа фәрз ә кӧ әм бь ве кʹәмбәре пьшта хԝә гьредьн? Чьмки Шәйтʹан «баве дәрәԝа йә» (Йуһʹәнна 8:44). Әԝи бь һʹәзара сала дәрәԝ кьрьнә у «тʹәмамийа дьне хальфандийә» (Әʹйанти 12:9). Ле рʹастийед Кʹьтеба Пироз мә чаԝа хԝәй дькьн, ԝәки әм нәйенә хапандьн? Гәло әм чаԝа дькарьн пьшта хԝә бь ве кʹәмбәра симболик гьредьн? Бона ве йәке, гәрәке әм рʹастийа дәрһәԛа Йаһоԝа һин бьбьн, «бь рʹӧһʹ у рʹастийе» ԝи бьһʹәбиньн у дь һәр тьштида һʹәлал бьн (Йуһʹәнна 4:24; Әфәси 4:25; Ибрани 13:18). w21.03 26-27 ¶3-5

Әв ԝәлат гәләк мәхсус бу, чьмки мәрьвед ԝедәре Йаһоԝа дьһʹәбандьн. Ле жь сала 33 Д.М., әв ида бь симболик «ԝәлат» ә, чьмки иро щьмәʹта Йаһоԝа сәр тʹәмамийа әʹрде бәлабуйи йә. Иро «ԝәлате хԝәшьк» бь симболик щьнәта рʹӧһʹани йә, чь кӧ те һʹәсабе шьхӧлед рʹӧһʹани, мәсәлә һʹәбандьн Йаһоԝарʹа щьватеда у хьзмәтийеда. Ԝәʹде ԝан рʹожед ахьрийеда, пʹадше бакӧре чәнд щара кʹәтә «ԝәлате хԝәшьк». Мәсәлә, чахе Алманйайа Натсисти пʹадше бакӧре бу, әԝ илаһи ԝәʹде шәрʹе һʹәмдьнйайе дӧда, кʹәтә «ԝәлате хԝәшьк» гава хьзмәткʹаред Хԝәде дьзеранд у дькӧшт. Паши Шәрʹе Һʹәмдьнйайе II, гава Йәктийа Совйәте бу пʹадше бакӧре, әԝ кʹәтә «ԝәлате хԝәшьк» чахе пәй щьмәʹта Хԝәде дькʹәт у аксор дькьр. w20.05 13 ¶7-8

Дина хԝә бьдьнә сәрһатийа ԝан мәрьва, йед кӧ пешийа һатьна Мәсиһ, достед Хԝәде бун. Бьраһим мәрьвәки бь баԝәрийа гәләк ԛәԝи бу. Һәла һе 1 000 сала зедәтьр паши мьрьна Бьраһим жи, Йаһоԝа сәр ԝи гот «досте мьн» (Иша. 41:8). Демәк, һәла һе мьрьн жи тʹӧ щар нькарә достед Йаһоԝайи незик жь ԝи бьԛәтинә. Ләма жи Бьраһим бира Йаһоԝада сах ә (Луԛа 20:37, 38). Мәсәләкә майин әԝ һәйә Ибо. Йаһоԝа һʹәму мәләкарʹа кӧ тʹәвайи бәр ԝи тʹоп бьбун, да кʹьфше кӧ әԝ Ибода баԝәр ә. Йаһоԝа гот кӧ әԝ мәрьвәки «рʹаст у кʹамьл ә», «жь Хԝәде дьтьрсә у жь хьрабийе хԝә вәдькʹшинә» (Иб. 1:6-8). Данийел ԝәкә 80 сала ԝәлате пʹутпʹарьстада бь амьни Хԝәдерʹа хьзмәт дькьр. Ле Йаһоԝа һьндава ԝида ча бу? Калбуна ԝида мәләка се щара жерʹа готьн, кӧ әԝ бәр чʹәʹве Хԝәде гәләк ԛимәт ә (Дан. 9:23; 10:11, 19). Әм гәрәке дӧдьли нәбьн, кӧ Йаһоԝа гәләк һивийа ве рʹоже йә, чахе достед хԝәйи дәлал жь мьрьне рʹакә (Иб. 14:15). w20.05 26-27 ¶3-4

Мәрьве кӧ Кʹьтеба Пироз һин дьбә, дькарә ԛанунед Хԝәде пебьһʹәсә у бинә сери, ле ԝе нә жь һʹьзкьрьне ве йәке бькә. Биньн бира хԝә кӧ Һеԝайе ԛануна Хԝәде заньбу, ле әԝе у Адәм бь рʹасти Ԛанундар һʹьз нәдькьрьн (Дәстп. 3:1-6). Ләма әм гәрәке мәрьва нә кӧ тʹәне дәрһәԛа дәʹԝакьрьн, ԛанун у принсипед Хԝәде һин кьн, ле һе зедә. Ԛанун у принсипед Йаһоԝа тʹьме бона кʹара мә нә (Зәб. 119:97, 111, 112). Ле әԝед кӧ һин дьбьн, дәстпекеда дьбәкә ӧса нәфькьрьн һʹәта кӧ фәʹм нәкьн, ԝәки Йаһоԝа әԝ ԛанун жь һʹьзкьрьне дайә мә. Ләма жи ԝе баш бә әм ԝана бьпьрсьн: «Бь тʹәхмина тә чьрʹа Хԝәде дьбежә хьзмәткʹаред хԝә, кӧ фьлан тьшти бькьн йан нәкьн? Әԝ йәк дәрһәԛа хәйсәт-һʹӧнӧред Хԝәде чь әʹйан дькә?» Һәрге әм али ԝан бькьн ԝәки дәрһәԛа Йаһоԝа бьфькьрьн у наве ԝийи пироз һʹьз бькьн, ӧса әме бькарьбьн рʹастийа Хԝәде бьгьһиньн дьле ԝан. Бь ԝи щурʹәйи әԝана ԝе нә тʹәне ԛануна һʹьз бькьн, ле ӧса жи Ԛанундар. Баԝәрийа ԝан ԝе дьһа ԛәԝи бә у ԝе бькарьбьн бәр щерʹьбандьнед гьран жи тәйах кьн (1 Корн. 3:12-15). w20.06 10 ¶10-11

Әм гәрәке бь сәбьр бьн, чьмки ԝәʹдә лазьм ә, ԝәки мәрьв вәгәрʹә щәм Йаһоԝа. Гәләк хушк-бьред кӧ вәгәрʹийанә щьвате, гьли дькьн кӧ рʹуспи у хушк-бьред щьвате гәләк щар тʹәсәлийа ԝан дькьрьн, у әве йәке ԝана һелан кьр, кӧ вәгәрʹьнә щьвате. Ненси, хушкәкә жь Асйайе, ньвиси: «Һәвала мьнә незик жь щьвате, гәләк али мьн кьр. Әԝе әз ча хушка хԝәйә мәзьн һʹьз дькьрьм. Әԝе тʹьме дьани бира мьн, кӧ бәре мә ԝәʹдә ча хԝәш дәрбаз дькьр. Чахе мьн дьле хԝә жерʹа вәдькьр, әԝе бь сәбьр гӧһ дьда мьн у әз ширәт жи дькьрьм. Әԝе избат кьр ԝәки һәваләкә баш ә у һазьр ә һәр гав аликʹарийе бьдә». Дьлшәԝати әԝ һәйә дәрманәкә ԛәԝи, кӧ дькарә али мәрьвед дьлбьриндар бькә. Һьнә хушк-бьра жь щьвате дур кʹәтьнә, чьмки бь сала пешда, щьватеда әԝана данә хәйидандьне, жь бо ве йәке әԝана һʹәта ньһа һерс ьн у нькарьн әԝе йәке бир кьн. У дьбәкә һьнәк дьфькьрьн, кӧ һьндава ԝанда нәһәԛи һатийә кьрьнә. Әԝ һәр тьшт рʹе ԝан дьгьрә, кӧ вәгәрʹьн щәм Йаһоԝа. Ләма жи әԝана һʹәԝщә нә, кӧ кәсәк гӧһ бьдә ԝан у ԝана фәʹм кә. w20.06 26 ¶10-11

Чьԛас һун хԝә жь тʹәлька хԝәй кьн, һаԛас ԝе ԝәрʹа һеса бә Хԝәдерʹа амьн бьминьн. Ӧса жи бир нәкьн, ԝәки ньһерʹандьна нәрʹаст сәр сексе, жь Шәйтʹан ә. Демәк, чахе һун фькьред мәрьвед ве дьнйайе инкʹар дькьн, ӧса һун «сәр Йе Хьраб» дькʹәвьн. Әм дӧдьли набьн, ԝәки тʹәне Йаһоԝа дькарә бежә, кӧ кʹижан рʹабун-рʹуньштьн гӧнә те һʹәсабе. У әм алийе хԝәда һʹәму тьшти дькьн, ԝәки гӧнә нәкьн. Ле гава әм шашийа дькьн, әм бәр Йаһоԝа дӧада гӧне хԝә тиньн рʹуйе хԝә (1 Йуһʹн. 1:9). Ле һәрге әм гӧнед гьран дькьн, әм аликʹарийе жь рʹуспийа дьхԝазьн, чьмки Йаһоԝа әԝана кʹьфш кьрьнә, ԝәки бона мә хәм бькьн (Аԛуб 5:14-16). Ле әм гәрәке хԝә нәчәрчьриньн жь бо шашийед хԝәйә бәре. Чьрʹа? Чьмки Баве мәйи һʹьзкьри кӧрʹе хԝә да ԛӧрбан, ԝәки гӧне мә бенә бахшандьне. Чахе Йаһоԝа дьбежә кӧ әԝ ԝе бьбахшинә ԝан, йед кӧ гӧнед хԝә тʹобә дькьн, ԝе әʹсә ве йәке бькә. Ләма жи тʹӧ тьшт нькарә рʹе мә бьгьрә, кӧ пе исафа тʹәмьз Йаһоԝарʹа хьзмәт кьн (1 Йуһʹн. 2:1, 2, 12; 3:19, 20). w20.07 22-23 ¶9-10

Сәрида, Йаһоԝа бь тʹәне сәре хԝә бу. Ле бәле, әв йәк найе һʹәсабе кӧ ԝи хԝә тʹәне у бекәс тʹәхмин дькьр. Жь бо кӧ Йаһоԝа дьлша бә, әԝ һʹәԝще кәсед дьн нинә. Диса жи, Йаһоԝа дьхԝәст жийине бьдә кәсед дьн жи. Жь һʹьзкьрьне, Йаһоԝа дәст бь ише әʹфьрандьне кьр (1 Йуһʹн. 4:19). Сәрида, Йаһоԝа Кӧрʹе хԝә Иса әʹфьранд кӧ тʹәви ԝи кʹар бькә. Паше, әԝи бь дәсте ви Кӧрʹе пешьн бь милйона мәләк у һʹәму тьштед дьн әʹфьрандьн (Колс. 1:16). Иса жь кʹаркьрьна тʹәви Баве хԝә шабун дьстанд (Мәтʹлк. 8:30). Мәләк жи пʹьр кʹефхԝәш бун. Гава ԝана дит кӧ Йаһоԝа у Иса әʹрд у әʹзман чаԝа чекьрьн, ԝана «бь кʹефхԝәшийева банг дькьр». Ӧса жи, гава Йаһоԝа тьштед дьн әʹфьрандьн – илаһи гава ԝи инсан әʹфьрандьн – мәләк пʹьр ша бун (Иб. 38:7; Мәтʹлк. 8:31). Һʹәму тьштед әʹфьранди һʹьзкьрьн у биланийа Йаһоԝа әʹйан дькьн (Зәб. 104:24; Рʹом. 1:20). w20.08 14 ¶1-2

Йаһоԝа әм ӧса хӧльԛандьнә кӧ әм мәрьва һʹьз бькьн у бьхԝазьн кӧ әԝана жи мә һʹьз бькьн. Ләма гава кәсәк мә нәфрʹәт дькә, әм әʹщьз дьбьн у дьбәкә дьтьрсьн жи. Бьраки ӧса дьньвисә: «Гава әскәра сәва баԝәрийа мьн ль мьн дьхьстьн, чʹери мьн дькьрьн у әз дьдамә тьрсандьне, әз тьрсийам у безарʹ бум». Бәле, әм сәва нәфрʹәте әʹщьз дьбьн, ле әм әʹщебмайи наминьн, чьмки Иса Мәсиһ пешда готьбу кӧ мәрьв ԝе мә нәфрʹәт бькьн. Гәло чьрʹа әв дьнйа шагьртед Иса Мәсиһ нәфрʹәт дькә? Чьмки мина Иса Мәсиһ, әм «нә пʹара дьнйайе нә» (Йуһʹәнна 15:17-19). Ләма, әм чьԛас ԛәдьре һʹӧкӧмәтед дьнйайе дьгьрьн жи, әм ԝана у симболед кӧ һӧрмәте дьдьнә ԝан, наһʹәбиньн. Әм тʹәне Йаһоԝа Хԝәде дьһʹәбиньн, у әм ԛәбул дькьн ԝәки тʹәне изьна Хԝәде һәйә кӧ ль сәр тʹәмамийа дьнйайе сәрԝертийе бькә. Ле Шәйтʹан у «зӧрʹәта» ԝи сәрԝертийа Хԝәде ԛәбул накьн (Дәстпебун 3:1-5, 15). Әм мәрьварʹа дьбежьн кӧ тʹәне Пʹадшатийа Хԝәде дькарә проблемед дьнйайе сафи бькә у кӧ дәмәкә незикда, әв Пʹадшати ԝе һʹәму дьжмьнед хԝә ԛьрʹ бькә (Данийел 2:44; Әʹйанти 19:19-21). Әв хәбәр бона мәрьвед мьлук мьзгин ә, ле бона хьраба шин ә. w21.03 20 ¶1-2

Йаһоԝа ԛәдре хушка дьгьрә у щабдарийед фәрз дьдә ԝан. Әԝ бь кьрьнед ԛәнщ, билани, баԝәри, хирәт, мерхаси у мәрʹданийа хԝә мәрʹа мәсәлә баш ьн (Луԛа 8:2, 3; Кʹар. Шанд. 16:14, 15; Рʹом. 16:3, 6; Фили. 4:3; Ибрн. 11:11, 31, 35). Ӧса жи, әм хушк у бьрайед әʹмьрда мәзьн жи пʹьр һʹьз дькьн. Сьһʹәта гәләк хушк у бьрайед әʹмрда мәзьн ида нә баш ә. Диса жи, әԝ чьԛас жь дәсте ԝан те хьзмәт дькьн, у әԝ кәсед дьн дьшьдиньн у һин дькьн. Әм жь мәсәла ԝан пʹьр кʹаре дьстиньн. Әм бь рʹасти жи пʹьр ԛимәте дьдьн ԝан, у Йаһоԝа жи гәләк ԛимәте дьдә ԝан (Мәтʹлк. 16:31). Щьватед мәда зарʹок у щаһьл жи гәләк бьԛимәт ьн. Жь бәр кӧ дьнйа бьн дәсте Мире-щьнда йә у бь фькред хьрабва тʹьжә йә, әԝ рʹасти гәләк тәнгасийа тен. Гава зарʹок у щаһьл щьватада щаб дьдьн, дьчьн хьзмәте у баԝәрийа хԝә бь мерхаси дьпарезьн, әм гәләк ша дьбьн. Бәле, щьватеда рола зарʹок у щаһьла жи пʹьр фәрз ә! (Зәб. 8:2) w20.08 21-22 ¶9-11

Гава әм дәст бь ише бәлакьрьна мьзгине дькьн у дьбежьн кӧ әм Шәʹдед Йаһоԝа нә, щарьна «фьртонә» рʹадьбә. Мәсәлә, дьбә кӧ малбәта мә мьԛабьли мә дәре йан жи һәвалед мә ԛәрфед хԝә мә бькьн. Ӧса жи, һьнә кәс нахԝазьн гӧһ бьдьн мә. Тӧ чаԝа дькари мерхасийа хԝә зедә бьки? Йа йәке,  гәрәке тӧ баԝәр би кӧ Иса Мәсиһ жь әʹзмана рʹебәрийа ви шьхӧли дькә (Йуһʹн. 16:33; Әʹйан. 14:14-16). Йа дӧда, гәрәке тӧ бь соза Йаһоԝа баԝәр би кӧ әԝе тә хԝәй бькә (Мәт. 6:32-34). Баԝәрийа тә чьԛас ԛәԝи бьбә, тӧйе һаԛас мерхас бьби. Тә баԝәрикә мәзьн әʹйан кьр гава тә һәвал у мәрьвед хԝәрʹа гот кӧ тә дәстпекьрийә Кʹьтеба Пироз һин би у ида дьчи щьвинед Шәʹдед Йаһоԝа. Бешьк тә пʹьрʹ хирәт кьр кӧ рʹабун у рʹуньштьна хԝә ль гора хԝәстьна Йаһоԝа бьгӧһези. Жь бо ве жи баԝәри у мерхаси лазьм бу. Һәр кӧ тӧ мерхасийа хԝә зедә бьки, баԝәр бә кӧ «Хԝәдайе тә Хӧдан, дь һәр дәре кӧ тӧ бьчи, ԝе бь тәрʹа бә!» (Йешу 1:7-9) w20.09 5 ¶11-12

Аса Пʹадша мәсәләкә баш ә, чьмки әԝи хԝә бь тʹәмами дьспарт Йаһоԝа. Әԝи һьм ԝәхтед зорда һьм жи ԝәхтед аштийеда Йаһоԝарʹа хьзмәт дькьр. Жь щаһьлтийева, «дьле Аса һәр тʹьм бь Хӧданрʹа йәк бу» (1 Пʹадш. 15:14). Әԝи пʹутпʹарьсти жь ԝәлате Щьһуда рʹакьр у бь ви аԝайи амьнийа хԝә избат кьр. Кʹьтеба Пироз дьбежә кӧ Аса горигәһед пʹутпʹарьст у щийед бьльнд жь һоле рʹакьрьн у стун у дирәкед пироз шькенандьн (2 Дир. 14:3, 5). Бь сәрда, әԝи пирька хԝә Маака жь пʹадшатийе дәрхьст. Гәло чьма? Чьмки әԝе пьштгьрийа пʹутпʹарьстийе дькьр (1 Пʹадш. 15:11-13). Хенщи ве кӧ Аса Пʹадша пʹутпʹарьсти жь һоле рʹакьр, әԝи пьштгьрийа һʹәбандьна Йаһоԝа дькьр у али щьмәʹта Щьһуда кьр кӧ әԝ вәгәрʹьн бал Йаһоԝа. Бь сайа бәрәкʹәта Йаһоԝа, ль ԝәлате Щьһуда дәмәкә әʹдьлайе дәстпебу. Дь бьн һʹӧкӧмдарийа Аса Пʹадшада, ԝәлат ԝәкә 10 сал «рʹьһʹәт бу» (2 Дир. 14:1, 4, 6). w20.09 14 ¶2-3

Әм гәләк щара тьштед хԝә йед бьԛимәт тʹәсмили кәсед дьн дькьн. Мәсәлә, әм бәлки пʹәред хԝә тʹәсмили банкайе дькьн, у әм баԝәр ьн кӧ пʹәред мә ԝе ль ԝе дәре ӧнда нәбьн у нәйен дьзин. Паԝлосе шанди ани бира Тимотʹейо кӧ ԝи тьштәки бьԛимәт стандьбу – занәбуна зәлал йа ль сәр нета Хԝәде. Ӧса жи, ԛәдьрәки ӧса жерʹа һатьбу дайине кӧ «хәбәре даннасин кә» у «кьре мьзгиндар бькә» (2 Тимтʹ. 4:2, 5). Паԝлосе шанди Тимотʹейо тʹәми кьр кӧ бьра әԝ ве йәке чь кӧ жерʹа һатьбу дайине хԝәй кә. Ԝәк Тимотʹейорʹа, һьнә тьштед бьԛимәт мәрʹа жи һатьнә дайине. Йаһоԝа занәбуна зәлал йа ль сәр рʹастийед бьԛимәт йед Кʹьтеба Пироз дайә мә. Рʹастийед Кʹьтеба Пироз пʹьрʹ бьԛимәт ьн, чьмки әԝ мә һин дькьн, кӧ әм чаԝа дькарьн бьбьн достед Йаһоԝа у бәхтәԝарийа рʹасти ԛазанщ кьн. Гава әм ван рʹастийа ԛәбул дькьн у ль гора ԝан дьжин, әм жь бьндәстийа һинкьрьнед ԛәлп у жь жийанәкә бенамус дьфьльтьн (1 Корн. 6:9-11). w20.09 26 ¶1-3

Гава тӧ бәʹса рʹастийе дьки, гәләк фәрз ә кӧ хԝәндәкʹар хирәт у баԝәрийа тә бьвинә. Әв йәк ԝе али ԝи бькә кӧ рʹастийа Кʹьтеба Пироз дьле ԝи бьгьрә. Һәгәр дьбә, ԝирʹа бежә кӧ хәбьтандьна принсипед Кʹьтеба Пироз жийана тә чаԝа дьһа баш кьрийә. Бь ви аԝайи, хԝәндәкʹар ԝе фәʹм бькә кӧ рʹебәрийа Кʹьтеба Пироз ԝе ԝирʹа жи кʹаре бинә. Һәгәр һьнә проблемед хԝәндәкʹаре тә һәнә, ԝирʹа бәʹса сәрһатийед һьнә мәрьва бькә, йед кӧ рʹасти ԝи щурʹәйи проблема һатьбун у әԝ проблем сафи кьрьнә. Хенщи ве йәке, тӧ дькари мьзгинванәки дьн тʹәви хԝә бьви сәр һинбуне, ԝәки хԝәндәкʹаре тә жь щерʹьбандьна ԝи кʹаре бьстинә. Али хԝәндәкʹаре хԝә бькьн кӧ әԝ кʹара хәбьтандьна принсипед Кʹьтеба Пироз фәʹм бькә. Һәгәр хԝәндәкʹаре тә зәԝьщи йә, жьна ԝи (йан мере ԝе) тʹәглиф бькә кӧ әԝ жи ԝәʹде һинбуне тʹәви ԝә бә. Хԝәндәкʹаре хԝә һелан бькә кӧ әԝ нәфәр у һәвалед хԝәрʹа бәʹса мьзгине бькә (Йуһʹн. 1:40-45). w20.10 16 ¶7-9

Усьв у Мәрйәме али Иса дькьр, ԝәки әԝ дьле Хԝәде ша бькә. Ԝана гӧһ дьда рʹебәрийа Йаһоԝа йа кӧ бона де-бава бу (Ԛан. Дщр. 6:6, 7). Бәле, ԝана Йаһоԝа гәләк һʹьз дькьр, у ԝана дьхԝәст али зарʹед хԝә бькьн, ԝәки әԝ жи Йаһоԝа һʹьз бькьн. Усьв у Мәрйәме һәртʹьм тʹәви зарʹед хԝә Йаһоԝа дьһʹәбандьн. Әԝ бешьк һәр һʹәфтә дьчун щьвинед кʹьништа Ньсрәте у һәр сал бона Щәжна Дәрбазбуне дьчун Оршәлиме (Луԛа 2:41; 4:16). Гава әԝ дьчун Оршәлиме, ԝана бәлки Иса у хушк у бьрайед ԝирʹа тʹәриха хьзмәткʹаред Йаһоԝа гьли дькьр. Рʹеда, әԝана дьԛәԝьмә тʹәвайи ԝан щийарʹа дьчун, йед кӧ Ньвисаред Пироз бәс дькьр. Гава малбәт һәр кӧ дьчу һе мәзьн дьбу, ида бона Усьв у Мәрйәме нә һеса бу кӧ һʹәбандьна хԝә бь аԝайәки тʹәрбәт бәрдәԝам бькьн. Ле бәле, ԝана диса жи әԝ йәк дькьр у жь ве йәке гәләк кʹар дьстанд. Әԝ йәк кӧ ԝана жийана хԝәда һәри зедә дина хԝә дьда һʹәбандьна Йаһоԝа, малбәта ԝан незики Йаһоԝа бу. w20.10 28 ¶8-9

Гава кәсәк тә тʹәглифи сәр һинбуна хԝә дькә, ԝе баш бә кӧ тӧ хԝә бона дәрсе һазьр бьки. Бьре мә Дорин кӧ пешәнге мәхсус ә, ӧса дьбежә: «Ԝе баш бә кӧ мьзгинване дьн жи хԝә бона һинбуне һазьр бькә. Бь ви щурʹәйи, әԝе бькарьбә дьһа баш аликʹарийе бьдә». Сәрда жи, хԝәндәкʹар ԝе бьвинә кӧ ԝә һәрдӧ жи рʹьнд хԝә һазьр кьрийә, у әв йәк ԝе бона ԝи мәсәләкә баш бә. Һәгәр мәщала тә тʹӧнә бә кӧ тӧ хԝә рʹьнд һазьр бьки, ԝе диса жи баш бә кӧ тӧ фькьред фәрз йед дәрсе бьзаньби. Ԝәʹде һинбуна Кʹьтеба Пироз, дӧа пʹарәкә фәрз ә. Ләма пешда бьфькьрә кӧ тӧйе чь бежи һәгәр лазьм бә кӧ тӧ дӧа бьки. Бь ви щурʹәйи, дӧайе тә ԝе дьһа конкрет у жь дьл бә (Зәбур 141:2). Хушкәкә бь наве Һанае, йа кӧ ль Жапонйайе дьжи, тинә бира хԝә кӧ дӧайед хушка кӧ тʹәви дәрсдара ԝе дьһат сәр һинбуне, сәр ԝе чаԝа һʹӧкӧм дькьр: «Мьн дит кӧ әԝ гәләк незики Йаһоԝа йә, у мьн дьхԝәст бьбьм мина ԝе. Ӧса жи, ве йәке кӧ әԝе дӧайед хԝәда наве мьн һьлдьда, дьле мьн гәрм дькьр». w21.03 9-10 ¶7-8

Иса Паԝлосрʹа готьбу кӧ әԝе һәрә Рʹоме. Ле бәле, ль Оршәлиме, һьнә Щьһуйа дьхԝәстьн Паԝлос бькӧжьн. Гава фәрмандаре Рʹомайи Клаԝдйо Лусйо плана ԝан бьһист, әԝи Паԝлос жь дәсте ԝан фьльтанд. Әԝи Паԝлос тʹәви әскәра шанд бажаре Ԛәйсәрйе. Ԝедәре Фәликс ԝәли «әʹмьр кьр, кӧ әԝ ԛәсьра Һеродәсда бе хԝәйкьрьне». Ль ԝедәре, дьжмьнед Паԝлос ида нькарьбун зьраре бьдьн ԝи (Кʹар. Шанд. 23:12-35). Дәԝса Фәликс, мәрьвәки бь наве Фесто ида бубу ԝәли, йе кӧ «хԝәст кӧ щьһуйарʹа ԛәнщийе бькә». Әԝи жь Паԝлос пьрси: «Тӧ дьхԝази һәвраз һәри Оршәлиме, кӧ бона ван тьшта диԝана тә бәр мьн ԝьр бе кьрьне?» Паԝлос заньбу кӧ һәгәр әԝ һәрʹә Оршәлиме, әԝе дьбәкә бе кӧштьн. Әԝи гот: «Әз дәʹԝа диԝана Ԛәйсәр дькьм». Фесто Паԝлосрʹа гот: «Тӧ дәʹԝа Ԛәйсәр дьки, гәрәке тӧ һәрʹи щәм Ԛәйсәр». Ԝәхт шунда, Паԝлос чу Рʹоме – дури Щьһуйед кӧ дьхԝәстьн ԝи бькӧжьн (Кʹар. Шанд. 25:6-12). w20.11 13 ¶4; 14 ¶8-10

Һьнә кәс сәва шашийед кӧ ԝана кьрьбун, пешийа кӧ бун Шәʹдед Йаһоԝа, хԝә сущдар дькьн. Һьнә кәс жи сәва шашийед кӧ ԝан паши ньхӧмандьне кьрьн, хԝә сущдар дькьн (Рʹом. 3:23). Әм һьлбәт дьхԝазьн тьштед рʹаст бькьн. Ле әм «һʹәму жи гәләки шашийа дькьн» (Аԛуб 3:2; Рʹом. 7:21-23). Һьнә кʹаред хԝәсущдаркьрьне жи һәнә, чьмки гава әм хԝә сәва шашикә хԝә сущдар дькьн, әв йәк дькарә али мә бькә кӧ әм хԝә рʹаст бькьн у шашийа хԝә дӧбарә нәкьн (Ибрн. 12:12, 13). Ле бәле, тʹәльк әв ә  кӧ әм хԝә бь зедәйи сущдар бькьн. Мәсәлә, дьбәкә мә тʹобә кьрийә у Йаһоԝа нишан кьрийә кӧ әԝи әм әʹфу кьрьнә, ле әм хԝә диса жи сущдар дькьн. Әв йәк дькарә зьраре бьдә мә (Зәб. 31:10; 38:3, 4). Гәрәке әм хԝә жь тʹәлька хԝәсущдаркьрьне бьпарезьн. Һәгәр әм бьфькьрьн кӧ Йаһоԝа ида мә һʹьз накә у хьзмәта хԝә бьдьнә сәкьнандьне, әв йәк ԝе дьле Мире-щьна гәләк ша бькә (2 Корьнтʹи 2:5-7, 11 жи бьньһерʹә). w20.11 27 ¶12-13

Зәбурбеж Леԝи чʹәʹвнәбарийа кәсед хьраб у ԛӧрʹә кьр – нә сәва  хьрабийа ԝан, ле сәва ве кӧ жийана ԝан жь жийана ԝи рʹьһʹәттьр хӧйа дькьр (Зәб. 73:2-9, 11-14). Ӧса дьһатә кʹьфше кӧ һәр тьшт щәм ԝан һәбу, жийина баш, һәбук у әʹмьре бехәм. Жь бо кӧ зәбурбеж жь чʹәʹвнәбарийе у жь дьлшкәстибуне бьфьльтә, лазьм бу кӧ әԝ мина Йаһоԝа сәр тьшта бьньһерʹә. Гава әԝи ӧса кьр, әԝи дьлрʹьһʹәти станд у шабуна ԝи вәгәрʹийа. Әԝи гот: «Ль сәр әʹрде жи пештьри [Йаһоԝа] тьштәки дьн әз нахԝазьм» (Зәб. 73:25). Бьра әм тʹӧ щар чʹәʹвнәбарийа хьраба нәкьн. Жийана ԝан һәр чьԛас рʹьһʹәт те кʹьфше жи, шабуна ԝан дьреж накʹьшинә у һевийа ԝан тʹӧнә (Ԝаиз 8:12, 13). Һәгәр әм чʹәʹвнәбарийа ԝан бькьн, әме һьм мерхасийа хԝә һьм жи достийа хԝә тʹәви Йаһоԝа ӧнда бькьн. Ләма, һәгәр тӧ тедәрхи кӧ тӧ чʹәʹвнәбарийа сәркʹәтибуна хьраба дьки, зәбурбеже Леԝи бинә бира хԝә. Гӧһ бьдә ширәта Хԝәде у хԝә ль хушк-бьра бьгьрә. Һәгәр тӧ һәри зедә Йаһоԝа һʹьз бьки, тӧйе бәхтәԝарийа рʹасти ԛазанщ ки, у тӧйе ль сәр рʹийа «жийина кӧ рʹасти жийин ә», бьмини (1 Тимтʹ. 6:19). w20.12 19 ¶14-16

Хенщи ве йәке кӧ тӧ дь дӧайед хԝәда хәмед хԝә давежи сәр Йаһоԝа, ԝе баш бә кӧ тӧ рʹазибуна хԝә жерʹа бьди кʹьфше. Һʹале мә чьԛас зор бә жи, гәрәке әм кʹәрәмед кӧ мә жь Йаһоԝа стандьнә, бир нәкьн. Щарна бәлки ль тә зор те кӧ тӧ фькьр у хәмед хԝә бь зәлали әʹйан ки. Һәгәр тӧ тʹәне дькари бежи «Лава дькьм али мьн бькә!», Йаһоԝа ԝе диса жи щаба дӧайа тә бьдә (2 Дирок 18:31). Хԝә нәсперә аԛьле хԝә, ле хԝә бьсперә биланийа Йаһоԝа. Ль ԛьрʹна 8 йа Б.Д.М., щьмәʹта Щьһудайе жь Асурийа дьтьрсийа. Жь бо кӧ әԝ нәкʹәвьн бьн нире Асурийа, ԝана жь Мьсрийед пʹутпʹарьст аликʹари хԝәст (Ишайа 30:1, 2). Ле бәле, Йаһоԝа ԝанрʹа гот кӧ нета ԝан ԝе вала дәркʹәвә (Ишайа 30:7, 12, 13). Бь сайа Ишайа пʹехәмбәр, Йаһоԝа нишани ԝан кьр кӧ әԝана чаԝа дькарьн бенә хԝәйкьрьне. Ишайа гот: «Ԛәԝата ԝә ԝе йәкеда нә, ԝәки дьле хԝәда рʹьһʹәтийе хԝәйи кьн у итʹбари бьдьнә кʹьфше» (Ишайа 30:15б, ДТʹ). w21.01 3-4 ¶8-9

Хәлата амьнийа бьред Иса Мәсиһ йед кʹьфшкьри ԝе әԝ бә, кӧ әԝана ԝе ль әʹзмана тʹәви Иса ча пʹадша у кʹаһин һʹӧкӧм бькьн (Әʹйанти 20:6). Гава 144 000 кәсед бь рʹӧһʹ кʹьфшкьри хәлата әʹзмани бьстиньн, Йаһоԝа, Иса Мәсиһ у мәләк ԝе пʹьрʹ ша бьн. Паши кӧ Йуһʹәннайе шанди бәʹса ван 144 000 пʹадша у кʹаһина кьр, әԝи «әʹлаләтәкә мәзьн» дит, йа кӧ жь шәрʹе Һармәгәдоне сах дәрбаз буйә. Әв кʹом жь ве кʹома пешьн мәзьнтьр ә, у һәжмара ԝе әʹйан нинә (Әʹйанти 7:9, 10). Әв йәк кӧ ԝана «чӧхед чилә-ԛәрԛаш» хԝәкьрьбун те һʹәсабе кӧ әԝ ль дьнйа Шәйтʹан «паԛьж у беләкʹә» мабун у Хԝәде у Иса Мәсиһрʹа амьн манә (Аԛуб 1:27). Әԝ бь дәнгәки бьльнд дьбежьн кӧ әԝана бь сайа Йаһоԝа у Бәрхе Хԝәде, демәк Иса Мәсиһ, хьлаз бунә. Әв йәк кӧ дь дәсте ԝанда чʹьԛьлед хӧрма һәнә нишан дькә кӧ әԝ Иса Мәсиһ ча Пʹадше кʹьфшкьри ԛәбул дькьн (Йуһʹәнна 12:12, 13 жи бьньһерʹә). w21.01 15-16 ¶6-7

Сәва кӧ мер бона малбәта хԝә бьбә малхе баш, әԝ гәрәке чʹәʹв бьдә Йаһоԝа у Иса Мәсиһ. Мәсәлә, әм дина хԝә бьдьн һʹӧнӧра ӧса, ча мьлукти. Тʹӧ кәс мина Йаһоԝа билан нинә. Ле диса жи, әԝ гӧһ дьдә ньһерʹандьнед хьзмәткʹаред хԝә (Дәстпебун 18:23, 24, 32). Йаһоԝа йәки беԛьсур ә, ле әԝ беԛьсуртийе жь мә дәʹԝа накә, ле сәрда жи али мә дькә ԝәки әм пешдачуйи бьн (Зәбур 113:6, 7). Кʹьтеба Пирозда те готьне, ԝәки Йаһоԝа «аликʹар» ә (Зәбур 27:9; Ибрани 13:6). Даԝьд Пʹадша заньбу кӧ әԝи тʹәне бь сайа мьлукти у аликʹарийа Йаһоԝа дькарьбу щабдарийед хԝәйә мәзьн бинә сери. Мәсәла Иса Мәсиһ бинә бәр чʹәʹве хԝә. Рʹаст ә әԝ «Хӧдан» у «Дәрсдар» бу, ле йәкә әԝи ньгед шагьртед хԝә шуштьн. Иса Мәсиһ ӧса гот: «Мьн нәхшәк нишани ԝә кьр, ԝәки чаԝа мьн бона ԝә кьр, һун жи ӧса бькьн» (Йуһʹәнна 13:12-17). Һʹӧкӧме Иса Мәсиһ чьԛас мәзьн бу жи, әԝи нәдьхԝәст кӧ кәсед дьн жерʹа бәрдәстийе бькьн, ле әԝи ԝанрʹа бәрдәстийе дькьр (Мәтта 20:28). w21.02 3-4 ¶8-10

Бьред щаһьл, ԛәԝат у хирәта ԝә гәләк кери щьвате те. Һун бона аликʹарийа хушк-бьред щьвате гәләк тьшт дькьн. Дьбәкә һун дьхԝазьн рʹожәке бьбьнә бәрдәстийед щьвате. Ле дьԛәԝьмә һун дьфькьрьн кӧ хушк-бьра ԝә һʹәсаб дькьн ча кәсед нәщерʹьбанди йан гәләк щаһьл, у бь дитьна ԝан, һун һазьр ниньн кӧ щабдарийед фәрз бьстиньн. Ле бьзаньбьн кӧ һун чьԛас щаһьл бьн жи, йәкә һун дькарьн гәләк тьшт бькьн, ԝәки ньһада итʹбарийа хушк-бьра ԛазанщ бькьн. Бьред щаһьл, һун жи дькарьн фәрәсәтед хԝә бона кʹара щьвате бьдьнә хәбате. Мәсәлә, һун дьбәкә дькарьн али һьнә хушк у бьред әʹмьрда мәзьн бькьн, кӧ әԝана тʹел у планшета хԝә бона леколина шәхси у бона щьват бьдьнә хәбате. Һәр тьшти кӧ һун дькьн, ӧса бькьн ԝәки дьле Баве хԝәйи әʹзмана ша бькьн. w21.03 2 ¶1, 3; 7 ¶18

Һәгәр жьн жь мере хԝә зедәтьр хԝәнди бә жи, диса жи мер сәре малбәте йә у әԝ гәрәке али нәфәред хԝә бькә кӧ әԝана Йаһоԝа бьһʹәбиньн. Мәсәлә, гәрәке әԝ ԛӧльхкьрьна тʹәви малбәте дәрбаз бькә (Әфәси 6:4). Рʹаст ә мер сәре малбәте йә у жьн гәрәке гӧрʹа ԝи бькә, ле йәкә жьн гәрәке хԝәха жи бона рʹӧһʹанийа хԝә хәм бькә у баԝәрийа хԝә ԛәԝи бькә. Бона ве йәке, әԝ сәва леколина шәхси у фькьрандьна кʹур гәрәке ԝәʹдә бьвинә. Әв йәк ԝе али ԝе бькә кӧ һʹьзкьрьна хԝә һьндава Йаһоԝа хԝәй бькә у һӧрмәте бьдә ԝи. Ӧса жи, жьн ԝе бькарьбә бь шабуне сәритийа мере хԝә ԛәбул бькә. Кʹӧлфәтед кӧ сәритийа меред хԝә ԛәбул дькьн чьмки Йаһоԝа һʹьз дькьн, жь кʹӧлфәтед кӧ принсипед Йаһоԝа пьшт гӧһе хԝәва давежьн бәхтәԝартьр ьн. Жьнед ӧса бона хорт у ԛиза мәсәләкә баш ьн. Ӧса жи, әԝ һьм дь малбәта хԝәда һьм жи дь щьватеда һʹьзкьрьн у әʹдьлайе пешда тиньн (Тито 2:3-5). Иро, һʹәчʹи зәʹф жь хьзмәткʹаред Йаһоԝа жьн ьн (Зәбур 68:11). w21.02 13 ¶21-23

Паԝлосе шанди алийе мерхаси у сәбьрева мәсәләкә баш бу. Щарна, әԝи жи хԝә сьст тʹәхмин дькьр. Ле чьмки әԝи хԝә дьспартә ԛәԝата кӧ жь Йаһоԝа дьстанд, әԝи дькарьбу сәбьр кә (2 Корьнтʹи 12:8-10; Филипи 4:13). Һәгәр әм бь мьлукти ԛәбул бькьн кӧ әм һʹәԝще аликʹарийа Йаһоԝа нә, әм жи дькарьн ԛәԝат у мерхасийе бьстиньн (Аԛуб 4:10). Гава әм рʹасти тәнгасийа тен, гәрәке әм нәфькьрьн кӧ Йаһоԝа мә щәза дькә. Аԛуб ӧса гот: «Бьра тʹӧ кәс, йе кӧ нава щерʹьбандьнеда йә, нәбежә: ‹Хԝәде мьн бь хьрабийе дьщерʹьбинә›, чьмки Хԝәде хьрабийада найе щерʹьбандьне у нә жи йәки дьщерʹьбинә» (Аԛуб 1:13). Һәгәр әм ве рʹастийеда баԝәр бьн, әме хԝә һе незики Баве хԝәйи дьлован тʹәхмин кьн. Йаһоԝа тʹӧ щар найе гӧһастьне (Аԛуб 1:17). Гава Мәсиһийед ль ԛьрʹна йәке рʹасти тәнгасийа дьһатьн, Хԝәде пьштгьрийа ԝан дькьр, у бешьк ԝе али мә жи бькә. Бь дьл Йаһоԝарʹа дӧа бькә кӧ әԝ билани, баԝәри у мерхасийа тә зедә бькә. Баԝәр бә кӧ әԝе гӧһ бьдә дӧайед тә. w21.02 31 ¶19-21

Гава хԝәндәкʹар тенә щьвина, дина хԝә бьдә ԝан (Филипи 2:4). Тӧ дькари пʹайе ԝан бьди кӧ әԝана һинбуна Кʹьтеба Пирозда пешда дьчьн. Ӧса жи, тӧ дькари дәрһәԛа малбәт йан шьхӧлед ԝан бьпьрси. Бь сайа ве йәке, тӧ дькари тʹәви ԝан һәвалтийе бьки у али ԝан бьки кӧ әԝана бәрбь ньхӧмандьне һәрʹьн. Ле нәкʹәвә нав шьхӧлед  ԝанә шәхси. Чахе хԝәндәкʹар пешда дьчьн у жийина хԝә дьгӧһезьн, али ԝан бькә кӧ әԝана хԝә ча пʹара щьвате тʹәхмин кьн. Ләма ԝе баш бә кӧ тӧ һьндава ԝан меванһʹьз би (Ибрани 13:2). Паши кӧ хԝәндәкʹар дьбьн мьзгинван, тӧ дькари тʹәви ԝан дәркʹәви хьзмәте. Мьзгинванәки жь Бразилйайе бь наве Диего ӧса дьбежә: «Гәләк бьра гази мьн дькьрьн кӧ әз тʹәви ԝан  һәрʹьм хьзмәте. Бь ви щурʹәйи, мьн ԝана рʹьнд наскьрьн. Әз гәләк тьшт һин дьбум, у мьн хԝә дьһа незики Йаһоԝа у Иса Мәсиһ тʹәхмин дькьр». w21.03 12 ¶15-16

Иса Мәсиһ шагьртед хԝәрʹа гот кӧ бьра әԝана дьжмьнед хԝә һʹьз бькьн (Мәтта 5:44, 45). Гәло һеса йә кӧ мәрьв дьжмьнед хԝә һʹьз бькә? Һьлбәт на! Ле бь аликʹарийа рʹӧһʹе пироз, әв йәк дьбә! Дь нав ‹бәре рʹӧһʹда› һʹӧнӧред ӧса ча һʹьзкьрьн, сәбьр, ԛәнщи, мьлукти у хԝәгьртьн һәнә (Галати 5:22, 23). Әв һʹӧнӧр али мә дькьн кӧ әм һьмбәри нәфрʹәте сәбьр бькьн. Гәләк мәрьв һьндава Шәʹдед Йаһоԝада нәрм бунә, чьмки мер, жьн, зарʹ йан щинаре ԝан, һʹӧнӧред баш нишан дькьрьн. Ӧса жи гәләк дьжмьнед мә бунә хушк-бьред мә. Ләма, һәгәр ль тә зор те кӧ дьжмьна һʹьз бьки, дӧа бькә кӧ Йаһоԝа рʹӧһʹе пироз бьдә тә (Луԛа 11:13). Жь сәд сәләфи баԝәр бә кӧ рʹийа Хԝәде һәртʹьм рʹийа һәри баш ә (Мәтʹәлок 3:5-7). Бәле, нәфрʹәти дькарә чәтьн у зор бә, ле һʹьзкьрьн дьһа ԛәԝи йә. Һʹьзкьрьн дьле мәрьва нәрм дькә у дьле Йаһоԝа ша дькә. Һәгәр дьжмьн нәфрʹәта хԝә бәрʹнәдьн, әм диса жи дькарьн бәхтәԝар бьн. w21.03 23 ¶13; 24 ¶15, 17

Йоԝел пʹехәмбәр дәрһәԛа һʹьщумкьрьне, демәк дәрһәԛа шәрʹ пʹехәмбәрти кьрийә (Йоԝл. 2:1, 8, 11). Йаһоԝа гот кӧ әԝ ԝе ордийа хԝәйә мәзьн, демәк әскәред Бабилони бьдә хәбате, сәва Исраелийед нәамьн щәза кә (Йоԝл. 2:25). Әԝ те навкьрьне «артеша бакӧр», чьмки Бабилони алийе бакӧрда гәрәке һʹьщуми сәр Исраелийа бькьрана (Йоԝл. 2:20). Ордийа Бабилонийа бәрамбәри кʹома кӧлийа дьбә, кӧ рʹьнд организә йә. Йоԝел дәрһәԛа ԝан дьбежә: «Һәр [әскәр] рʹийа хԝәда дьмәшә . . . бажерда дьпʹәнгьзьн . . . ; дь һӧндьре ханийанда рʹадьпʹәлькьн, мина дьза шьваканва [пʹәнщәрава] дькʹәвьн» (Йоԝл. 2:8, 9). Әве дәрәще бьдьнә бәр чʹәʹве хԝә. Һʹәму щийа әскәр ьн, тʹӧ  щик тʹӧнә ԝәки хԝә жь ԝана  вәшерьн. Тʹӧ кәс нькарә хԝә жь шуре Бабилонийа хьлаз кә! Мина кӧлийа, Бабилони (демәк Кьлдани), сала 607 Б.Д.М., Оршәлим зәфт кьрьн. Кʹьтеба Пироз дьбежә: «Ԛьрале [пʹадше] Кьлданийа . . . щьԝанед ԝан бь шурва кӧштьн у һʹәйфа ԝи ль әʹгите щьԝан, ль ԛиза кӧ нәзәԝьщийә, жь зьламе кал у пʹор сьпива нәһат» (2 Дир. 36:17). w20.04 5 ¶11-12