Сьбат

Әм жи дькарьн чʹәʹв бьдьнә Йаһоԝа ве йәкеда, кӧ хушк-бьра фәʹм кьн. Бона ве йәке әм гәрәке ԝана рʹьнд нас кьн. Чаԝа? Пешийа у паши щьвате тʹәви ԝан хәбәр дьн, тʹәвайи хьзмәт кьн, у чахе дькарьн ԝана тʹәглифи мала хԝә кьн, кӧ тʹәвайи нан бьхԝьн. Һәрге һун ӧса бькьн, һуне пебьһʹәсьн, ԝәки әԝ хушк йа кӧ бь тʹәхмина ԝә һәвалһʹьз нинә, бь рʹасти шәрмокә йә, йан жи әԝ бьра кӧ һун дьфькьрин пәй пʹәра дькʹәвә, бь рʹасти меванһʹьз у мәрʹд ә, йан жи әԝ хушк йа кӧ тʹәви зарʹед хԝә дәрәнг те щьвате, малда нәфәр мьԛабьли ԝе нә (Иб. 6:29). Һәмьки әм гәрәке фәсал бьн, ԝәки «тʹәви шьхӧле хәлԛе» нәбьн (1 Тимтʹ. 5:13). Ле йәкә ԝе баш бә әм хушк-бьра рʹьнд нас кьн у һаш жь дәрәщед ԝан һәбьн, йед кӧ сәр хәйсәте ԝан һʹӧкӧм бунә. Ӧса әме дьһа рʹьнд ԝана фәʹм бькьн. Гава щьватеда кәсәк ԝә әʹщьз дькә, ԝи һе рʹьнд нас бькьн, чьмки ӧса ԝәрʹа ԝе дьһа һеса бә ԝи фәʹм кьн у һьндава ԝида шәԝат бьн. Рʹаст ә бона ве йәке ԝәʹдә лазьм ә, ле һәрге һун ширәта Кʹьтеба Пироз биньн сери, кӧ дьле хԝә фьрә кьн, һуне чʹәʹв бьдьнә Йаһоԝа, йе кӧ «һʹәму мәрьва» һʹьз дькә (1 Тимтʹ. 2:3, 4; 2 Корн. 6:11-13). w20.04 16-17 ¶10-12

Шәва пешийа мьрьна хԝә, Иса Мәсиһ шагьртед хԝәрʹа тʹәми да ԝәки әԝана һәвдӧ һʹьз бькьн. Әԝи заньбу кӧ һʹьзкьрьна фәдакʹар ԝе али ԝан бькә, ԝәки әԝана йәктийа дь нав хԝәда хԝәй кьн у һьмбәри нәфрʹәта дьнйайе сәбьр бькьн. Мәсәлә, сәрһатийа щьвата Тʹесалоники бинә бәр чʹәʹве хԝә. Жь рʹожа кӧ щьват һатьбу сазкьрьне, хушк-бьред ль Тʹесалоники рʹасти зерандьне дьһатьн. Диса жи, әԝана жь алийе амьнийе у һʹьзкьрьнеда кәсед дьнрʹа бунә мәсәлә (1 Тʹесалоники 1:3, 6, 7). Паԝлосе шанди әԝ һелан дькьрьн кӧ жь алийе һʹьзкьрьнева «һе пешда һәрʹьн» (1 Тʹесалоники 4:9, 10). Бь сайа һʹьзкьрьне, ԝана ԝе бькарьбуйа дьлбини бьдана кәсед дьлтәнг у аликʹари бьдана кәсед сьст (1 Тʹесалоники 5:14). Әшкәрә йә кӧ ԝана гӧһ да рʹебәрийа Паԝлос, чьмки саләк шунда, әԝи нәʹма хԝә йа дӧдада ԝанрʹа ӧса гот: «Һʹьзкьрьна ԝә һьндава һәвда зедә дьбә» (2 Тʹесалоники 1:3-5). Бәле, һʹьзкьрьна ортʹа ԝанда али ԝан дькьр кӧ әԝана һьмбәри зӧлм у зәʹмәта сәбьр бькьн. w21.03 22 ¶11

Һәрге әм дьхԝазьн хәлата жийина һʹәта-һʹәтайе бьстиньн, әм гәрәке рʹийа Мәсиһитида бьрʹәвьн, демәк сәр рʹийа жийине (Кʹар. Шанд. 20:24; 1 Пәт. 2:21). Ле Мире-щьн у пьштгьред ԝи дьхԝазьн әм рʹекә дьн бьжберьн, әԝана дьхԝазьн әм тʹәви ԝан рʹийа ԝанда бьрʹәвьн (1 Пәт. 4:4). Әԝана ԛәрфе хԝә ве рʹе дькьн, йа кӧ мә бьжартийә, у дьбежьн, ԝәки рʹийа ԝан жь йа мә четьр ә, чьмки азайе дьдә. Ле әԝ йәк дәрәԝ ә (2 Пәт. 2:19). Чьԛас фәрз ә, ԝәки әм рʹийа рʹаст бьжберьн! Мире-щьна дьхԝазә, ԝәки һәр кәс жь мә «рʹийа тәнгда», кӧ «дьбә бәрбь жийине», рʹәва хԝә бьдә сәкьнандьне, у дәрбази ве рʹе бә, сәр кʹижани һʹәчʹи зәʹф мәрьв дьчьн. Рʹаст ә әв рʹе дина мәрьва дькʹьшинә, чьмки һеса йә ве рʹерʹа һәрʹьн, ле әԝ «дьбә бәрбь ӧндабуне» (Мәт. 7:13, 14). Сәва әм сәр рʹийа рʹаст бьминьн у нәкʹәвьнә бәр байе мәрьвед ве дьнйайе, әм гәрәке итʹбарийа хԝә Йаһоԝа биньн у гӧһ бьдьнә ԝи. w20.04 26 ¶1; 27 ¶5, 7

Ԝан салед пашԝәхтийеда, Русйа у пьштгьред ԝе жи кʹәтьнә «ԝәлате хԝәшьк» (Дан. 11:41). Чаԝа? Сала 2017-да, әв пʹадше бакӧре шьхӧле щьмәʹта Йаһоԝа ԛәдәхә кьр у һьнә хушк-бьра кьрә кәле. Әԝи ӧса жи әʹдәбйәтед мә у Кʹьтеба Пирозә «Ԝәлгәрʹандьна Дьнйа Тʹәзә», ԛәдәхә кьр. Хенщи ве йәке, әԝи Русйайеда филиала мә, Одед Щьвата у Одед Щьватед Мәзьн жь мә станд. Паши ве йәке, сала 2018-да, Кʹома Рʹебәрийе әʹлам кьр, кӧ Русйа у пьштгьред ԝе, пʹадше бакӧре нә. Рʹаст ә хьзмәткʹаред Йаһоԝа зәʹф тенә зерандьне, ле әԝана тʹӧ щар мьԛабьли сәрԝера дәрнайен у нә жи тьштәки дькьн сәва сәрԝертийе бьгӧһезьн. Дәԝсе әԝана ширәта Кʹьтеба Пироз тиньн сери у бона «һʹәму сәрԝера» дӧа дькьн, илаһи гава сәрԝер сафикьрьнед ӧса дькьн, кӧ дькарьн сәр азайа һʹәбандьна мә һʹӧкӧм бьн. w20.05 14 ¶9

Де-бавно, ԝәки зарʹед ԝә нава рʹастийеда бьминьн, гәрәке һәләԛәтийа ԝанә шәхси тʹәви Йаһоԝа һәбә, у хԝәха баԝәр бьн, ԝәки һинкьрьнед Кʹьтеба Пироз рʹаст ьн. Һәрге һун дьхԝазьн зарʹед хԝә дәрһәԛа Хԝәде һин кьн, һун гәрәке леколинкьрьна Кʹьтеба Пирозда мәсәләкә баш бьн бона ԝан. Һун гәрәке ԝәʹдә кʹьфш кьн бона ве йәке, кӧ кʹур бьфькьрьн дәрһәԛа чь жи педьһʹәсьн. Һьнге һуне бькарьбьн зарʹед хԝә жи һин кьн кӧ ӧса бькьн. Де-бавно, чаԝа кӧ һун ԝан мәрьва һин дькьн, тʹәви кʹе һинбуне дәрбаз дькьн, ӧса жи гәрәке һун зарʹед хԝә һин кьн, ԝәки әԝана һащәтед сәва һинбуне бьдьнә хәбате. Һәрге һун ӧса бькьн, һуне зарʹед хԝә һин кьн, ԝәки Йаһоԝа у ӧса жи хӧламе амьн, жь кʹижани хԝарьна рʹӧһʹани дьстиньн, ԛимәт кьн (Мәт. 24:45-47). Де-бавно дәрһәԛа «нет-мәрәмед Хԝәдейә кʹур» зарʹед хԝә һин кьн һаԛас, чьԛас әԝана дькарьн фәʹм кьн. Ӧса һуне али ԝан бькьн, кӧ баԝәрийа ԝан ԛәԝи бә (1 Корн. 2:10). w20.07 11 ¶10, 12-13

Гәло иро чьԛас мәрьвед гӧнәкʹар достед Йаһоԝа нә? Иро бь милйона мәрьв достед ԝи нә у жь ве йәке шабуне дьстиньн. Әԝ мәрьв бунә достед Хԝәде, чьмки баԝәрийа хԝә ԛӧрбана Иса анинә. Сәр һʹиме ве ԛӧрбане, Йаһоԝа жь һʹьзкьрьне мәщал да мә, сәва әм хԝә тʹәсмили ԝи кьн у бенә ньхӧмандьне. Чахе әм ван гава давежьн, әм дьбьнә йәк тʹәви бь милйона Мәсиһийед ньхӧманди, йед кӧ бәхтәԝар ьн кӧ достед Кәсе Һьмзор ьн! Ле әм ча дькарьн нишан кьн, кӧ достийа тʹәви Хԝәде ԛимәт дькьн? Мина Бьраһим у Ибо, йед кӧ сәд сала зедәтьр Хԝәдерʹа амьн ман, әм жи гәрәке ԝирʹа амьн бьминьн, фьрԛи тʹӧнә ве дьнйайеда әме чьԛас ԝәхт жерʹа хьзмәт кьн. Мина Данийел, әм гәрәке достийа хԝә тʹәви Хԝәде жь әʹмьре хԝә зедәтьр ԛимәт кьн (Дан. 6:7, 10, 16, 22). Пе аликʹарийа Йаһоԝа, әм дькарьн һәр щерʹьбандьнәкеда амьн бьминьн, сәва достийа хԝә тʹәви ԝи ӧнда нәкьн (Фили. 4:13). w20.05 27 ¶5-6

Даԝьд Пʹадша жьна мерькәки дит, йа кӧ сәре хԝә дьшушт. Әԝи дәрһәԛа ве ԛануна Йаһоԝа заньбу, кӧ гәрәке «дьлһавьжийа кʹӧлфәта тʹӧ кәси» нәкә (Дәркʹ. 20:17). Ле ча те кʹьфше, әԝи чʹәʹве хԝә сәр ԝе һьлнәда у бәрдәԝам кьр бьньһерʹә. Дьле ԝи пʹарәвәбу, чьмки һьн ԝи бәрбь ве кʹӧлфәте дькʹьшанд һьн жи дьхԝәст гӧрʹа Йаһоԝа бькә. Рʹаст ә Даԝьд гәләк Йаһоԝа һʹьз дькьр у жь ԝи хоф дькьр, ле әԝ кʹәтә һʹәйра хԝәстьна хԝә. Ве дәрәщеда хԝәстьна ԝийә нәрʹаст щийе пешьн гьрт, ләма жи әви паше гӧнед гьран кьр. Даԝьд наве Йаһоԝа беһӧрмәт кьр, у мәрьвед нәнәһәԛ у нәфәред хԝәрʹа жи зьрар ани (2 Сам. 11:1-5, 14-17; 12:7-12). Йаһоԝа Даԝьд щәза кьр у паше әԝи диса һәләԛәтийа хԝә тʹәви Йаһоԝа баш кьр (2 Сам. 12:13; Зәб. 51:2-4, 17). Әԝи бир нәдькьр, кӧ чахе дьле ԝи пʹарәвәбу, әве йәке чьԛас кӧл-дәрд у ахьрийа хьраб ани. Ле гәло Йаһоԝа али Даԝьд кьр ԝәки дьле ԝи бь тʹәмами тʹәви ԝи бә? Бәле, Хәбәра Хԝәдеда сәр Даԝьд те готьне кӧ дьле ԝи «тʹәви Хԝәдайе ԝи Хӧдан йәк бу» (1 Пʹадш. 11:4; 15:3). w20.06 11 ¶12-13

Кʹьтеба Пироз һʹьзкьрьна Йаһоԝа бәрамбәри тʹоге дькә. Ле әԝ чь щурʹәйи мина тʹоге йә? Дина хԝә бьдьнә ве мәсәле: Бьдьнә бәр чʹәʹве хԝә, ԝәки һун бәреда, йа кӧ пʹелед ԝе рʹабунә, дьхәньԛьн у кәсәк еләк давежә бал ԝә. Бешьк, һуне жь ԝи кәси гәләк рʹази бьн, чьмки һуне бькарьбьн хԝә сәр аве хԝәй кьн. Ле сәва әʹмьре хԝә хьлаз кьн, тʹәне еләк бәс нинә. Ав гәләк сар ә, ләма жи һʹәта һун нәгьһижьнә ԛәйька бона хьлазкьрьне, һуне хьлаз нәбьн. Лазьм ә кәсәк тʹоге бавежә бал ԝә у ԝә бькʹьшинә бәрбь ԛәйьке. Чаԝа кӧ ве рʹеза рʹожеда те готьне, Йаһоԝа бь һʹьзкьрьне «һьлкʹьшандьн» Исраелийед кӧ жь ԝи дур кʹәтьбун, иро жи Хԝәде ӧса нә һьндава ԝанда, йед кӧ жь ԝи дур кʹәтьнә, у проблем у хәмед хԝәда дьхәньԛьн. Йаһоԝа дьхԝазә әԝана бьзаньбьн, кӧ әԝ ԝана гәләк һʹьз дькә, у дьхԝазә ԝана бькʹьшиньнә щәм хԝә. Йаһоԝа дькарә бь сайа ԝә һʹьзкьрьна хԝә ԝанрʹа нишан кә. Гәләк фәрз ә тʹьме ԝана, йед кӧ хьзмәтийа хԝә данә сәкьнандьне, бьдьнә баԝәркьрьне, ԝәки Йаһоԝа у ӧса жи әм ԝана гәләк һʹьз дькьн. w20.06 27 ¶12-13

Паши кӧштьна Стәйфан, гәләк шагьртед Иса Мәсиһ жь Оршәлиме рʹәвийан у «бәлайи тʹопрахед Щьһустане у Самәрйайе бун». Һьнә кәс һʹәта Кипрус у Әнтакйайе чун (Кʹаред Шандийа 7:58–8:1; 11:19). Бинә бәр чʹәʹве хԝә кӧ һʹале ԝан чьԛас зор бу! Диса жи, ԝана мьзгин ль һәр дәра бь хирәт бәла дькьр, у ль тʹәмамийа Императорийа Рʹоме гәләк щьват һатьн саз кьрьн (1 Пәтрус 1:1). Ле чәндәк шунда, әԝана рʹасти тәнгасийед дьһа гьран һатьн. Мәсәлә, ԝәкә сала 50 йа Д.М., Императоре Рʹоме Клаԝдйос фәрман дабу кӧ һʹәму Щьһу жь Рʹоме дәркʹәвьн. Ләма жи Щьһу кӧ бунә Мәсиһи мәщбур бун малед хԝә бьһельн у ль щийед дьн щиԝар бьн (Кʹаред Шандийа 18:1-3). Незики сала 61 йа Д.М., Паԝлосе шанди ньвиси кӧ әԝ хушк-бьра ль бәр һәр кәси һатьбун беһӧрмәткьрьн, ԝана дькьрьнә кәле у тʹалан дькьрьн (Ибрани 10:32-34). Хенщи ве йәке, һьнә Мәсиһи кʹәсиб бун у нәхԝәш дькʹәтьн (Рʹомайи 15:26; Филипи 2:25-27). w21.02 26-27 ¶2-4

Һәрге баԝәрийа мә ԛәԝи бә, нә Шәйтʹан нә жи пьштгьред ԝи, ԝе нькарьбьн мә жь рʹийа рʹаст дәрхьн (2 Йуһʹн. 8, 9). Әм гәрәке әʹщебмайи нәминьн, кӧ әм бәр чʹәʹве ԝе дьне рʹәш ьн (1 Йуһʹн. 3:13). Йуһʹәннада  те готьне, кӧ «тʹәмамийа дьнйайе бьн һʹӧкӧме Йе Хьрабда йә» (1 Йуһʹн. 5:19). Кʹӧтасийа ԝе дьнйайе бәр  шемике йә, ләма жи һерса Шәйтʹан дьһа ԛайим дьбә. Әԝ нә кӧ тʹәне тʹәлькед вәшарти дьдә хәбате, мәсәлә бенамуси у дәрәԝед рʹабәра, ле ӧса жи әшкәрә пәй мә дькʹәвә у мә дьзерʹинә. Шәйтʹан занә кӧ ԝәʹде ԝи гәләк һьндьк майә бона ве йәке, кӧ хьзмәтийа мә бьдә сәкьнандьне у баԝәрийа мә сьст кә. Ләма әм әʹщебмайи наминьн, кӧ һьнә ԝәлатада шьхӧле мә йан бь тʹәмами йан жи нивида ԛәдәхәкьри йә. Ле йәкә хушк-бьред мә ԝан ԝәлатада бәр ве йәке тәйах дькьн у амьн дьминьн. Әԝана избат дькьн, кӧ фьрԛи тʹӧнә чь жи Йе Хьраб бькә, йәкә щьмәʹта Хԝәде дькарә сәркʹәвә! w20.07 24 ¶12-13

Йаһоԝа дьхԝәст кӧ инсан һʹәта-һʹәтайе щьнәтеда сәр рʹуйе әʹрде бьжин. Ле бәле, сәд һʹәйф кӧ Адәм у Һәԝайе һьмбәри Хԝәде сәри һьлда, у сәва ве йәке гӧнә у мьрьн кʹәтьн дьнйайе (Рʹом. 5:12). Гәло Йаһоԝа сафи кьр кӧ чь бькә? Ԝи дәрберʹа гот кӧ әԝе инсана чаԝа хьлаз бькә (Дәстп. 3:15). Йаһоԝа соз да кӧ бь сайа ԛӧрбанәке, әԝе мәщале бьдә зарʹокед Адәм у Һәԝайе кӧ әԝ жь гӧнә у мьрьне бьфьльтьн. Бь сайа ԛӧрбане, кәсед кӧ гӧһ дьдьн Хԝәде дькарьн жийина һʹәта-һʹәтайе бьстиньн (Йуһʹн. 3:16; 1 Корн. 15:21, 22). Ча те кʹьфше, Йаһоԝа ԝе бь дәсте Кӧрʹе хԝә Иса Мәсиһ, бь милйона кәса нә әʹйни дәмеда, ле дор бь дор жь мьрьне рʹакә. Гәло чьма? Жь бо кӧ кʹаос ченәбә! Йаһоԝа һәр тьшти бь аԝайәки рʹек у пек дькә, чьмки әԝ «нә Хԝәдайе тʹәвльһәвийе йә, ле йе аштийе йә» (1 Корн. 14:33, ИМ). w20.08 14 ¶3; 15 ¶5

Хԝәндәкʹаред мә гәрәке фәʹм бькьн кӧ нета һинбуна Кʹьтеба Пироз әв ә кӧ әԝ бьбьн Шәʹдед Йаһоԝа. Гав бь гав, хԝәндәкʹарәки дьлпʹак дькарә бона ньхӧмандьне һазьр бьбә. Гава пешьн әв ә кӧ хԝәндәкʹар Йаһоԝа нас бькә, ԝи һʹьз бькә у баԝәрийа хԝә ԝи бинә (Йуһʹн. 3:16; 17:3). Бь ви щурʹәйи, хԝәндәкʹар ԝе һеди-һеди һе незики Йаһоԝа у щьвате бьбә  (Ибрн. 10:24, 25; Аԛуб 4:8). Ԝәʹдә шунда, әԝе тʹәрка әʹдәтед хьраб бьдә у гӧнед хԝә тʹобә бькә (Кʹар. Шанд. 3:19). Чьԛас баԝәрийа ԝи ԛәԝи бьбә, һаԛас әԝе бьхԝазә кәсед дьнрʹа рʹастийе гьли кә (2 Корн. 4:13). Паше, әԝе жийана хԝә бьдә дәсте  Йаһоԝа у ԝе бе ньхӧмандьне (1 Пәт. 3:21; 4:2). Гава хԝәндәкʹарәк те ньхӧмандьне, һәр кәс гәләк ша дьбә! Гава хԝәндәкʹар һеди-һеди бәрбь ве нете дьчә, пʹайе ԝи бьдә у ԝи һелан бькә, ԝәки әԝ ль сәр рʹийа рʹастийе бьминә у пешда һәрʹә. w20.10 17-18 ¶12-13

Һәрге тӧ хԝә бь хушк у бьрайед дьн бәрамбәр бьки, дьбәкә тӧ ԛимәта хԝә нәбини. Һьнә хушк у бьра бәлки жь алийе һинкьрьн, организәкьрьн йан шьвантийева пʹьрʹ жир у зен ьн. Тӧ бәлки дьфькьри кӧ фәрәсәтед тә ԛаси фәрәсәтед ԝан баш ниньн. Әв йәк нишан дькә кӧ тӧ мьлук и у синоред хԝә зани (Фили. 2:3). Ле һаш жь хԝә һәбә! Һәрге тӧ һәр тʹьм хԝә тʹәви кәсед бь фәрәсәтед мәзьн бәрамбәр бьки, тӧйе мерхасийа хԝә ӧнда бьки. Сәрда жи, ча Паԝлос шанди готьбу, тӧйе бәлки бьфькьри кӧ щьватеда щийе тә тʹӧнә. Ль сәдсала йәкеда, һьнә шагьртед Иса бь сайа рʹӧһʹе пироз фәрәсәтед мәхсус дьстандьн, ле фәрәсәтед ԝан нә ԝәк һәв бун (1 Корн. 12:4-11). Диса жи һәр хьзмәткʹарәки ԛимәт бу. Иро әм фәрәсәта бь кʹәрәмәти настиньн, ле принсип диса жи әʹйни йә: Фәрәсәтед мә нә ԝәк һәв ьн, ле чʹәʹве Йаһоԝада, әм гьшк бьԛимәт ьн. w20.08 23 ¶13-15

Чахе тӧ бона мерхасийе дӧа дьки, Йаһоԝа ԝе щаба дӧайед тә бьдә, у әԝе тә тʹӧ щара тʹәне нәһелә (Кʹар. Шанд. 4:29, 31). Әԝе һәр тʹьм пьштгьрийа тә бькә. Ле әԝи али тә кьрийә кӧ тӧ сәри бь тәнгасийед хԝәрʹа дәрхи у жийана хԝә бьгӧһези? Гәло йе кӧ хьзмәткʹаред хԝә дь бәʹра Соррʹа дәрбаз кьрьбун ԝе али тә нәкә кӧ тӧ бьби  шагьртәки Иса? (Дәркʹ. 14:13) Бьра баԝәрийа тә мина баԝәрийа зәбурбеж ԛәԝи бә, йе кӧ гьлийед ве рʹоже готьбу. Йаһоԝа дькарә али мьзгинванед тʹәзә жи бькә ԝәки әԝана мерхас бьн. Әв йәк жь сәрһатийа хушкәкә бь наве Томойо әшкәрә йә. Щара пешьн кӧ әԝ чу мал бь мал, жьнькәке дәри вәкьр у ӧса кьрә ԛирʹини: «Әз нахԝазьм Шәʹдед Йаһоԝарʹа хәбәр дьм!», у бәр позе ԝе дәри гьрт. Томойойе мерхасийа хԝә ӧнда нәкьр, ле һәвала хԝәрʹа гот: «Тә бьһист? Пешийа кӧ мьн тьштәк гот, әԝе фәʹм кьр кӧ әз Шәʹде Йаһоԝа мә. Әз пʹьрʹ ша мә!» Томойо ньһа пешәнга һәртʹьм ә. w20.09 6 ¶13-14

Аса щьмәʹтерʹа гот ԝәки йе кӧ  әʹдьлайи да ԝан, Йаһоԝа йә (2 Дир. 14:6, 7). Әԝ нәдьфькьри кӧ дәма әʹдьлайе, дәма рʹьһʹәтийе йә, ләма әԝи дәст бь авакьрьна бажар, сур, бьрщ у дәргәһа кьр. Әԝи щьмәʹта Щьһударʹа ӧса гот: «Һе ԝәлат ль бәр мә йә». Аса дьхԝәст чь бьгота? Мәʹнийа готьнед Аса Пʹадша әв ә кӧ мьләт аза бу вьрда-ԝеда һәрʹә у шьхӧле авакьрьне бәрдәԝам бькә, чьмки ль дәрдора ԝан дьжмьн тʹӧнә бу. Ләма Аса щьмәʹтерʹа гот кӧ бьра әԝ ве дәма аштийе рʹьнд бь кʹар биньн. Ӧса жи, Аса Пʹадша әв дәма аштийе бь кʹар ани кӧ ордийа хԝә һе ԛәԝи бькә (2 Дир. 14:8). Гәло әв йәк те һʹәсабе кӧ баԝәрийа ԝи сьст бу? На. Аса заньбу кӧ ԝәк пʹадша, йәк жь щабдарийед ԝи әв ә кӧ мьләте хԝә жь бо тәнгасийа һазьр бькә. Аса Пʹадша заньбу кӧ дәма аштийе ԝе рʹожәке хьлаз бьбә, у бь рʹасти жи ӧса бу. w20.09 15 ¶4-5

Дьбәкә бь нетәкә баш, һьнә рʹуспийед щьвате бона хԝәйкьрьна щьвате ԛәйда дайньн. Ле рола рʹуспийед щьвате гәләк алийава жь рола сәред малбәта щӧдә йә. Мәсәлә, Йаһоԝа рʹуспийед щьвате ча һʹәким кʹьфш кьрьнә, у әԝ дьхԝазә кӧ әԝана кәсед кӧ гӧнә дькьн у тʹобә накьн, жь щьвате дәрхьн (1 Корьнтʹи 5:11-13). Алийе дьнва жи, Йаһоԝа һʹӧкӧме кӧ әԝи дайә сәред малбәта, нәдайә рʹуспийед щьвате. Мәсәлә, изьна сәре малбәте һәйә кӧ бона малбәта хԝә ԛәйда дайнә у жь малбәта хԝә бьхԝазә кӧ әԝана ван ԛәйда биньн сери (Рʹомайи 7:2). Мәсәлә, изьна сәре малбәте һәйә зарʹед хԝәрʹа бежә, кӧ гәрәке әԝана еваре сьһʹәта чәнда вәгәрʹьн мале. Һәгәр зарʹ гӧһ нәдьн ве ԛәйде, бав дькарә ԝана ширәт кә (Әфәси 6:1). Мере кӧ малбәта хԝә һʹьз дькә ԝе һьлбәт шеԝьра хԝә тʹәви жьна хԝә бькә пешийа кӧ бона малбәте ԛәйда дайнә, чьмки әԝана һәр дӧ жи «бәдәнәк» ьн (Мәтта 19:6). w21.02 16-18 ¶10-13

Рʹастийед Кʹьтеба Пироз пʹьрʹ бьԛимәт ьн жь бәр кӧ Йаһоԝа ԝана тʹәне кәсед мьлукрʹа әʹйан дькә, «йед кӧ дьле ԝан жь бо жийана һәрһәйи һазьр» ә (Кʹар. Шанд. 13:48, ДТʹ). Кәсед ӧса тьштед кӧ «хӧламе амьн у сәрԝахт» дәрһәԛа Кʹьтеба Пирозда һин дькә, ԛәбул дькьн (Мәт. 11:25; 24:45). Бәле, мәйе нькарьбуйа әв рʹастийед бьԛимәт хԝә бь хԝә фәʹм бькьрана (Мәтʹлк. 3:13). Йаһоԝа ӧса жи шьхӧләки фәрз дайә мә. Әԝ дьхԝазә кӧ әм рʹастийа дәрһәԛа ԝи у нетед ԝи бьгьһиньн инсана (Мәт. 24:14). Мьзгина кӧ әм бәла дькьн пʹьрʹ бьԛимәт ә, чьмки бь сайа ве мьзгине, мәрьв дькарьн бькʹәвьн малбәта Йаһоԝа, у жийана һʹәта-һʹәтайе ԛазанщ кьн (1 Тимтʹ. 4:16). Ләма, бьра әм һʹәта кӧ жь дәсте мә те пьштгьрийа ви ише һәри фәрз бькьн! (1 Тимтʹ. 2:3, 4) Чь ԛәдрәки мәзьн ә кӧ әм һәвалкʹаред Хԝәде нә! (1 Корн. 3:9) w20.09 26-27 ¶4-5

Гава Паԝлос дьчу Рʹоме, әԝи чәнд щара бь дәсте хушк у бьра жь Йаһоԝа аликʹари станд. Мәсәлә, дӧ һәвалед Паԝлос – Әристархо у Луԛа – тʹәви ԝи чун Рʹоме. Кʹьтеба Пироз набежә кӧ Иса соз дабу ԝан кӧ әԝе сах у сьламәт бьгьһижьн Рʹоме. Ләма, гава әԝ рʹе кʹәтьн, ԝана жийана хԝә дькьрьнә бьн хофе. Диса жи, әԝ һазьр бун кӧ тʹәви Паԝлос рʹеԝитийе бькьн. Анщах гава әԝ ида ль гәмийе бун, ԝана бьһист кӧ әԝе жи сах бьминьн. Гава әԝана һатьнә ль бажаре Сайдайе, Йулйо изьн да кӧ Паԝлос «һәрʹә щәм достед хԝә, ԝәки бона ԝи хәм бькьн» (Кʹар. Шанд. 27:1-3). Паше, ль бажаре Потийоле, Паԝлос у һәвалед ԝи «хушк-бьра дитьн», йед кӧ һиви жь ԝан кьрьн, кӧ һʹәфтике ԝьр бьминьн. Хушк у бьрайед ль ван дәра бона һʹәԝщәдарийед Паԝлос у һәвалед ԝи хәм дькьрьн, у бешьк Паԝлос жи ԝанрʹа бәʹса сәрһатийед хԝә дькьр у бь ви аԝайи дьле ԝан ԛәԝи дькьр (Кʹаред Шандийа 15:2, 3 жи бьньһерʹә). w20.11 15-16 ¶15-17

Де-бавно, бь готьн у кьрьнед хԝә нишани зарʹед хԝә бькьн кӧ һун Йаһоԝа гәләк һʹьз дькьн. Пʹешкʹеша һәрә мәзьн, йа кӧ һун дькарьн бьдьн ԝана әв ә, кӧ али ԝан бькьн ԝәки әԝана Йаһоԝа һʹьз бькьн. Ләма, ԝана һин кьн кӧ әԝ чаԝа дькарьн һәртʹьм леколина бькьн, дӧа бькьн, һәрʹьн щьвина у мьзгине бәла бькьн (1 Тимтʹ. 6:6). Ӧса жи, һьлбәт лазьм ә кӧ һун алийе һʹәԝще физикида бона зарʹед хԝә хәм бькьн (1 Тимтʹ. 5:8). Ле бәле, бир нәкьн кӧ мал у мьлкʹ нькарә жийане бьдә ԝан. Тʹәне достийа тʹәви Йаһоԝа али ԝан бькә кӧ әԝ ахьрийа ве система кәвнда сах бьминьн у дәрбази дьнйа тʹәзә бьн. Бона ве йәке достийа тʹәви Йаһоԝа гәләк фәрз ә (Һәзԛл. 7:19). Әм пʹьрʹ ша нә кӧ гәләк де у бав бона малбәтед хԝә сафикьрьнед баш дькьн. Әԝана һәртʹьм тʹәвайи Йаһоԝарʹа хьзмәт дькьн. Гәләк кәсед кӧ дь малбәтед ӧсада мәзьн дьбьн ль сәр ве рʹе дьминьн у тʹӧ щара пʹошман набьн (Мәтʹлк. 10:22). w20.10 28-29 ¶10-11

Пәтрус мәрьвәки жир бу, ле әԝи щарьна беһʹәмде хԝә хәбәр дьда, ләз дькʹәт тьштәки бькә у бона ве йәке гәләк шаши дькьр. Ле паше әԝ пʹошман дьбу у бәрхԝә дькʹәт. Мәсәлә, гава Иса Мәсиһ шандийед хԝәрʹа гот кӧ әԝе бе кӧштьн, Пәтрус ԝирʹа гот гьлийед жь рʹеза ве рʹоже (Мәт. 16:21-23). Һьнге Иса Мәсиһ ньһерʹандьна Пәтрус рʹаст кьр. Ԝәхта кӧ әʹлаләтәк һат кӧ Иса бьгьрә, Пәтрус гӧһе хӧламәки сәрәккʹаһин жекьр (Йуһʹн. 18:10, 11). Диса, Иса Мәсиһ әԝ рʹаст кьр. Хенщи ве йәке, Пәтрус пәсне хԝә да кӧ һәгәр һәр кәс дӧдьли у сьст бә жи, әԝе тʹӧ щара дӧдьли у сьст нәбә (Мәт. 26:33). Ле паше, Пәтрус кʹәтә бәр байе тьрсе у хԝәбаԝәрийа хԝә ӧнда кьр, у се щара Иса инкʹар кьр. Пәтрус пʹьрʹ дьлтәнг бу, «дәркʹәтә дәрва у кʹәлә-кʹәл гьрийа» (Мәт. 26:69-75). Бешьк әԝ бәрхԝә дькʹәт, гәло Иса ԝе бьбахшинә ԝи йан на. Пәтрусе шанди сәва дьлтәнгийе хьзмәта хԝә нәда сәкьнандьне. Паши кӧ әԝи шаши кьр, әԝ диса һат сәр хԝә, у вәгәрʹийа бал шандийед дьн (Йуһʹн. 21:1-3; Кʹар. Шанд. 1:15, 16). w20.12 20 ¶17-18

Сәре малбәте дькарә мьлуктийа хԝә гәләк тьштада бьдә кʹьфше. Мәсәлә, гәрәке әԝ жь жьн у зарʹед хԝә беԛьсуртийе дәʹԝа нәкә. Һәгәр нәфәред мале тʹәви ньһерʹандьнед ԝи ԛайил ниньн, ԝе диса жи баш бә кӧ сәре малбәте гӧһ бьдә ньһерʹандьнед ԝан. Ӧса жи, мәрьв чьԛас бьфькьрә кӧ ише мале нә ише мера йә жи, мерәки мьлук һазьр ә кӧ шьхӧлед маледа аликʹарийа жьна хԝә бькә. Ле гәло әв йәк щарна чьма һеса нинә? Хушкәкә бь наве Рейчел ӧса дьбежә: «Ль мьһала мә, һәгәр мер али жьна хԝә бькә у фьраԛа бьшо йан мале тʹәмьз кә, щинар у мәрьвед ԝи ԝе бьфькьрьн кӧ әԝ нә мер ә. Әԝе бежьн кӧ әԝи жьна хԝә данийә сәр сәре хԝә». Һәгәр мьһала тәда ньһерʹандьнәкә ӧса һәйә, бир нәкә кӧ гава Иса Мәсиһ ньгед шагьртед хԝә шуштьн, мәрьвед ԝедәре әв шьхӧл һʹәсаб дькьрьн ча шьхӧле хӧлама. Бона малхеки баш, тьште һәри фәрз нә әв ә кӧ мәрьвед дьн ԝи ча «щамерәки мерхас» бьвиньн, ле кӧ жьн у зарʹед ԝи бәхтәԝар бьн. w21.02 2 ¶3; 4 ¶11

Биранинед хԝәш кʹәрәма Йаһоԝа нә; ле бәле, жийана мә йа бәре чьԛас хԝәш бу жи, жийана мә йа дьнйа тʹәзәда ԝе дьһа хԝәш бә. Мәрьвед дьн дькарьн дьле мә бешиньн, ле һәгәр әм ԝана әʹфу бькьн, әме бькарьбьн ль сәр рʹийа хԝә пешда һәрʹьн. Һәгәр әм хԝә бь зедәйи сущдар бькьн, әв йәк дькарә бьбә сәбәб кӧ әм бь шабуне Йаһоԝарʹа хьзмәт нәкьн. Ле әм мина Паԝлосе шанди, гәрәке баԝәр бькьн кӧ Йаһоԝа әм әʹфу кьрьнә (1 Тимтʹ. 1:12-15). Жийана һʹәта-һʹәтайе пешийа мә йә. Дьнйа тʹәзәда, әме ида сәва тьштед бәре пʹошман нәбьн. Кʹьтеба Пироз ӧса дьбежә кӧ тьштед бәре ԝе нәйен бира мә (Иша. 65:17). Һьнәк жь мә хьзмәта Йаһоԝада кал у пир бунә, ле дьнйа тʹәзәда, әме диса щаһьл бьбьн (Иб. 33:25). Ләма, бьра әм һәри зедә дина хԝә бьдьн, нә рʹожед бәре, ле ахьрийа хԝәш кӧ һивийа мә йә! w20.11 24 ¶4; 29 ¶18-19

Ԝәʹде тәнгасийа мәзьн, Йаһоԝа ԝе хьзмәткʹаред хԝә бь дӧ щурʹе мәхсус хьлаз бькә: Йа пешьн, гава пʹадшед дьнйайе ԝе Бабилона Мәзьн – демәк империйа религийа ԛәлп у баԝәрийед ԛәлп – ԛьрʹ бькьн, Йаһоԝа ԝе хьзмәткʹаред хԝә йед амьн хьлаз кә (Әʹйанти 17:16-18; 18:2, 4). Паше, гава Хԝәде һʹәму тьштед дьн кӧ пʹара система Шәйтʹан ьн, ԝәʹде шәрʹе Һармәгәдоне ԛьрʹ кә, әԝе һьнге жи хьзмәткʹаред хԝә хьлаз бькә (Әʹйанти 16:14, 16). Һәгәр әм незики Йаһоԝа бьн, Шәйтʹан ԝе нькарьбә зьрара һәрһәйи бьдә мә. Бь рʹасти, зьрара һәрһәйи ԝе бе сәре ԝи! (Рʹомайи 16:20) Ләма жи һʹәму чʹәкед Хԝәде ль хԝә бькә, у жь хԝә нәехә! Нәфькьрә кӧ тӧ дькари шәрʹа рʹӧһʹанида тʹәне сәркʹәви! Пьштгьрийа хушк-бьра бькә, у гӧһ бьдә рʹебәрийа Йаһоԝа. Баԝәр бә кӧ һәгәр тӧ ӧса бьки, Баве тәйи әʹзмани ԝе ԛәԝате бьдә тә у тә хԝәй бькә! (Ишайа 41:10) w21.03 30 ¶16-17

Әм чаԝа дькарьн нишан кьн кӧ әм итʹбарийа хԝә Йаһоԝа тиньн? Гава әм пәй рʹебәрийа ԝи дьчьн. Гәләк сәрһатийед Кʹьтеба Пироз нишан дькьн кӧ пʹьрʹ фәрз ә ԝәки мәрьв рʹьһʹәт бьминә у итʹбарийа хԝә Йаһоԝа бинә. Гава тӧ ван сәрһатийа дьхуни, дина хԝә бьде кӧ чь али хьзмәткʹаред Хԝәде дькьр кӧ әԝ ԝәʹде зерʹандьнед гьран дьлрʹьһʹәт бьминьн. Мәсәлә, гава диԝана бьльнд йа Щьһуйа шандийед Иса Мәсиһрʹа гот кӧ бьра әԝ мьзгине бәла нәкьн, әԝана нәтьрсийан. Ԝана гот: «Әм гәрәке гӧрʹа Хԝәде бькьн, нә кӧ йа мәрьва» (Кʹаред Шандийа 5:29). Паши кӧ шанди данә бәр ԛамчийа, әԝана диса жи нәкʹә-тьн панике. Гәло чьма? Чьмки ԝана заньбу кӧ Йаһоԝа тʹәви ԝан ә у жь ԝан рʹази йә. Ләма, ԝана бәлакьрьна мьзгине нәданә сәкьнандьне (Кʹаред Шандийа 5:40-42). Гава Щьһуйа дьхԝәст Стәйфан бькӧжьн, әԝ ӧса дьлрʹьһʹәт бу, кӧ «рʹәнг-рʹуйе ԝи мина рʹәнг-рʹуйе мьлйакʹәта бу» (Кʹаред Шандийа 6:12-15). Гәло чьма? Чьмки Стәйфан заньбу кӧ Йаһоԝа ԝи ԛәбул дькә. w21.01 4 ¶10-11

Әв йәк нишан дькә кӧ исафа ԝан тʹәмьз ә, у Йаһоԝа ԝана ча кәсед рʹаст һʹәсаб дькә (Ишайа 1:18). Бь сайа сонда тʹәсмилбуйине у ньхӧмандьне, әԝана бунә шагьртед Иса Мәсиһ. Әԝана баԝәрийа хԝә ԛӧрбана Иса тиньн, у һәләԛәтийа ԝан тʹәви Йаһоԝа ԛәԝи йә (Йуһʹәнна 3:36; 1 Пәтрус 3:21). Ләма Хԝәде жь ԝан рʹази йә, у әԝана дькарьн ль сәр әʹрде «шәв у рʹож» ԝирʹа хьзмәт бькьн (Әʹйанти 7:15). Жь бәр кӧ әԝана бәри һәр тьшти ль Пʹадшатийа Хԝәде дьгәрʹьн, әԝана мьзгине бь хирәт бәла дькьн. Иро, ише бәлакьрьна мьзгине у һазьркьрьна шагьрта һәри зедә жь алийе әʹлаләта мәзьнва те кьрьне (Мәтта 6:33; 24:14; 28:19, 20). Паши тәнгасийа мәзьн, Хԝәде ԝе «коне хԝә ль сәр ԝан вәгьрә» у бона һʹәԝщед ԝан хәм бькә. Ԝи чахи, пәзед дьн ԝе пе чʹәʹве хԝә әв созе Йаһоԝа бьвиньн: «[Хԝәде] жь чʹәʹвед ԝан һʹәму һесьред ԝан паԛьж кә» (Әʹйанти 21:3, 4). w21.01 16 ¶9-10

Әм гәләк ша нә кӧ әм пʹара малбәта Йаһоԝа нә у әм принсипа сәритийе ԛәбул дькьн, йа кӧ Йаһоԝа данийә. Кʹьтеба Пироз нишан дькә кӧ Йаһоԝа жьна ԛимәт дькә. Мәсәлә, ԛьрʹна йәкеда, Йаһоԝа рʹӧһʹе пироз нә тʹәне ль сәр мера, ле ль сәр жьна жи дьрʹьжанд у ԛәԝат дьда ԝан кӧ әԝана кʹәрәмәта бькьн. Мәсәлә, һьм жьн һьм жи мер бь щурʹә-щурʹә зьмана хәбәр дьдан (Кʹаред Шандийа 2:1-4, 15-18). Чаԝа жьн ӧса жи мер бь рʹӧһʹе пироз дьһатьн кʹьфш кьрьн, ԝәки әԝана бьбьн һәмпʹадшед Иса Мәсиһ (Галати 3:26-29). Һьм жьн һьм мер ԝе һʹәта-һʹәтайе щьнәтеда ль сәр әʹрде бьжин (Әʹйанти 7:9, 10, 13-15). Ӧса жи, шьхӧле бәлакьрьна мьзгине нә тʹәне мерарʹа, ле жьнарʹа жи һатийә дайине (Мәтта 28:19, 20). Кʹьтеба Кʹаред Шандийа бәʹса хушкәкә бь наве Прьскила дькә, йа кӧ тʹәви мере хԝә Әкила али мәрьвәки хԝәнди бь наве Аполос кьр, кӧ әԝ рʹастийе дьһа зәлал фәʹм бькә (Кʹаред Шандийа 18:24-26). w21.02 14 ¶1; 15 ¶4

Рʹуспино, йәк жь щабдарийед ԝәйә фәрз әв ә, кӧ һун али мьзгинвана бькьн ԝәки әԝана бьбьн дәрсдаред щерʹьбанди. Һәгәр мьзгинванәк шәрм бькә кӧ һинбуна Кʹьтеба Пироз бәр тә дәрбаз кә, бежә кӧ тӧ һинбуне дәрбаз ки. Бәле, һелана рʹуспийа бона дәрсдара гәләк керһати йә (1 Тʹесалоники 5:11). Һәгәр ньһа хԝәндәкʹарәки мә тʹӧнә йә жи, әм дькарьн али хԝәндәкʹаред хушк-бьра бькьн кӧ әԝана жь алийе рʹӧһʹанива пешда һәрʹьн. Ԝәʹде һинбуне, әм дькарьн бь готьнед хԝә пьштгьрийа дәрсдар бькьн, ле гәрәке әм дәрбазкьрьна һинбуне һьлнәдьнә дәсте хԝә. Гава хԝәндәкʹар тен щьвина, әм дькарьн тʹәви ԝан һәвалтийе бькьн у ԝанрʹа бьбьн мәсәлә. Ԝе баш бә кӧ рʹуспийед щьвате бона һеланкьрьна хԝәндәкʹара ԝәхт бьвиньн. Ӧса жи, ԝе баш бә кӧ әԝана дәрсдара һин бькьн у пʹайе ԝан бьдьн. Рола мә чьԛас бьчʹук бә жи, йәкә әм шабуне дьвиньн гава али кәсәки дькьн ԝәки әԝ Баве мә Йаһоԝа һʹьз бькә у ԝирʹа хьзмәт бькә. w21.03 13 ¶18-19

Хортанийа хԝәда, Даԝьд йәки хирәт бу у мәрьв итʹбарийа хԝә ԝи дьанин. Мәсәлә, әԝи кәрийе пәзе баве хԝә дьпараст. Даԝьд Шаԝул Пʹадшарʹа ӧса гот: «Әзхӧлам, кʹәнге мьн пәзе баве хԝә дьчʹеранд, гава шерʹ йан жи һьрчʹ дьһат у пәз жь кәри дьбьр, ль пәй дьчум, мьн ле дьхьст у бәрх жь дәве ԝи дәрдьхьст» (1 Самуйел 17:34, 35, ИМ). Даԝьд щабдарийа хԝә кӧ мьԛати кәрийе пез бә, фәрз һʹәсаб дькьр. Мина Даԝьд, ԝе баш бә кӧ бьред щаһьл жи һʹәму щабдарийед кӧ ԝанрʹа тенә дайине бь дьл у щан биньн сери. Гәло бона Даԝьд, тьште һәри фәрз чь бу? Рʹаст ә әԝ йәки мерхас бу у странбежәки һостә бу, ле бона ԝи тьште һәри фәрз, достийа тʹәви Йаһоԝа бу. Бьред щаһьл, тьште һәри фәрз кӧ һун дькарьн бькьн әԝ ә, кӧ достийа хԝә тʹәви Йаһоԝа дьһа ԛәԝи кьн. w21.03 3 ¶4-5