Чьлә

Тимотʹейо чьрʹа хьзмәткʹарәки керһати бу? Чьмки һʹӧнӧред ԝийә баш һәбун (Филипи 2:19-22). Жь готьнед Паԝлосе шанди те фәʹмкьрьне кӧ Тимотʹейо йәки мьлук, амьн, хирәт у бь итʹбар бу. Әԝи жь дьл бона хушк-бьра хәм дькьр. Ләма Паԝлос ԝи һʹьз дькьр у щабдарийед мәзьн тʹәсмили ԝи кьр. Һәгәр әм һʹӧнӧред кӧ Йаһоԝа хԝәш тен пешда биньн, Йаһоԝа ԝе жь мә рʹази бә, у әме дьһа кери щьвате бен (Зәбур 25:9; 138:6). Ләма жи дӧа бькә у бьфькьрә кӧ гәрәке тӧ кʹижан һʹӧнӧра нав хԝәда пешда бини. Һʹӧнӧрәки бьжберә у сәр ве йәке бьхәбьтә. Тӧ дьбәкә дьхԝази дьлшәԝати дьһа зедә ки. Йан жи тӧ дьхԝази дьһа зедә әʹдьлайиһʹьз би у алийе бахшандьнеда дьһа рʹәʹм би. Тӧ дькари жь һәваләки хԝә бьпьрси, һәла гәрәке тӧ кʹижан алийада пешда һәрʹи (Мәтʹәлок 27:6). w22.04 23 ¶4-5

Йаһоԝа дьхԝазә кӧ әм бәхтәԝар бьн. Әм заньн ԝәки шабун әԝ һәйә бәре рʹӧһʹе пироз (Галати 5:22). Гава әм хьзмәт дькьн йан жи щурʹә-щурʹә алийава аликʹарийе дьдьнә хушк-бьра, әм ша дьбьн, чьмки Кʹьтеба Пироз дьбежә кӧ «хԝәзи ль дайийа, нә кӧ ль стандийа» (Кʹаред Шандийа 20:35). Чаԝа кӧ рʹеза рʹожеда те готьне, Паԝлосе шанди бәʹса дӧ тьшта кьрьбу, йед кӧ али мә дькьн ԝәки әм шабуна хԝә ӧнда нәкьн. Йа йәке, гәрәке нета мә әв бә кӧ әм бона Йаһоԝа чь жь дәсте мә те бькьн. Һәгәр әм ӧса бькьн, әме бәхтәԝар бьн (Мәтта 22:36-38). Йа дӧда, гәрәке әм хԝә бәрамбәри кәсед дьн нәкьн. Сьһʹәт-ԛәԝат, һинкьрьн йан фәрәсәтед мә чьԛас изьне дьдьн, гәрәке әм һаԛас Йаһоԝарʹа хьзмәт кьн у жь ԝи рʹази бьн. Жь алийе дьнва жи, һәгәр кәсед дьн хьзмәтеда һьнә алийада жь мә четьр ьн, гәрәке әм ша бьн кӧ әԝана фәрәсәтед хԝә бона рʹумәта Йаһоԝа дьдьнә хәбате. w22.04 10 ¶1-2

Религийа ԛәлп ԝе ньшкева бе кʹӧтакьрьне. Һьнге дьне әʹлам ԝе әʹщебмайи бьминә (Әʹйанти 18:8-10). Ԛьрʹкьрьна «Бабилона мәзьн» ԝе дьне бьһʹәжинә у дьбәкә бьбә сәбәба гәләк тәнгасийа, ле хьзмәткʹаред Хԝәде ԝе ша бьн, чьмки әв дьжмьне Хԝәде ԝе ида тʹӧнә бә у дәмәкә незикда әме жь ве дьнйа хьраб бенә хьлазкьрьне! Данийел пʹехәмбәрти кьрьбу кӧ занәбуна рʹаст ԝе зедә бә. Бь рʹасти жи ӧса йә! Әм пʹехәмбәртийед дәрһәԛа рʹожед мә ида фәʹм дькьн (Данийел 12:4, 9, 10). Чахе әм дьвиньн, ԝәки готьнед Кʹьтеба Пироз чаԝа тенә сери, гәло әм Йаһоԝарʹа у Хәбәра ԝирʹа фьрнаԛ набьн? (Ишайа 46:10; 55:11) Сәва кӧ баԝәрийа тә һе ԛәԝи бә, бәрдәԝам кә Ньвисаред Пироз леколин бькә у али кәсед дьн бькә ԝәки әԝана жи бьбьн достед Хԝәде. Йаһоԝа ԝе һʹәму кәсед кӧ хԝә дьсперьн ԝи бьпарезә у тʹьме ԝе әʹдьлайе бьдә ԝан (Ишайа 26:3). w22.07 6-7 ¶16-17

Кʹьтеба Әʹйанти нишан дькә кӧ Пʹадшатийа Хԝәде сәр әʹзмана һатийә сазкьрьне у Мире-щьна жь әʹзмана һатийә авитьне (Әʹйанти 12:1-9). Ләма жи сәр әʹзмана ида әʹдьлайи һәйә, ле һʹале мә хьраб ә. Гәло чьма? Чьмки Мире-щьна сәр хьзмәткʹаред Йаһоԝа гәләк һерс ә у пәй ԝан дькʹәвә (Әʹйанти 12:12, 15, 17). Гәло әм чаԝа дькарьн бәр һʹьщуме Мире-щьна ԛәԝи бьсәкьньн? (Әʹйанти 13:10). Чьԛас баш ә кӧ әм заньн ԝәки ахьрийеда чь ԝе бьԛәԝьмә, чьмки әв йәк дькарә али мә бькә ԝәки әм Йаһоԝарʹа амьн бьминьн. Мәсәлә, кʹьтеба Әʹйантида, Йуһʹәннайе шанди бәʹса һьнә кʹәрәма кьрьбу, йед кӧ әме дәмәкә незикда бьстиньн. Йәк жь ван кʹәрәма әв ә кӧ ԝе кʹока дьжмьнед Хԝәде бе. Кʹьтеба Әʹйанти рʹеза йәке зәлал дькә, ԝәки готьнед ве кʹьтебе бь зьманәки симболик һатьнә ньвисаре (Әʹйанти 1:1). w22.05 8 ¶1-3

Хьзмәткʹаред Йаһоԝа ԝе Йаһоԝарʹа амьн бьминьн, ләма жи дьжмьнед Йаһоԝа ԝе гәләк һерс кәвьн. Ахьрийеда коалисйа мьләта ԝе сәр тʹәмамийа дьнйайе һʹьщуми сәр хьзмәткʹаред Хԝәде бькә. Кʹьтеба Пирозда әв һʹьщумкьрьн те навкьрьне һʹьщуме Гог жь Магоге (Һәзәԛел 38:14, 15). Гава кӧ әв һʹьщум дәстпебә, Йаһоԝа ԝе бь «агьре хәзәба хԝә» щаба ԝан бьдә (Һәзәԛел 38:18, 21-23). Кʹьтеба Әʹйанти сәре 19 бәʹса ве йәке дькә. Йаһоԝа ԝе Кӧрʹе хԝә бьшинә, ԝәки әԝ хьзмәткʹаред ԝи бьпарезә у дьжмьнед ԝан ԛьрʹ кә. Ԝи шәрʹида, «ордийед әʹзмен», демәк мәләкед амьн у 144 000 кәсед бьжарти, ԝе али Иса Мәсиһ бькьн (Әʹйанти 17:14; 19:11-15). Бәле, ахьрийеда һʹәму мәрьв у тʹәшкиләтед кӧ һьмбәри Йаһоԝа нә, ԝе бенә ԛьрʹкьрьне (Әʹйанти 19:19-21). w22.05 17 ¶9-10

Дәмәкә кьн паши кӧ Адәм у Һеԝайе гӧнә кьрьн, Йаһоԝа бь сайа пʹехәмбәртике һеви да зӧрʹәта ԝан. Готьнед ԝи Дәстпебун 3:15-да һатьнә ньвисаре, кʹидәре кӧ те готьне: «Әзе нава тә у кʹӧлфәте, нава зӧрʹәта тә у зӧрʹәта ԝеда дьжмьнатийе дайньм, әԝе сәре тә бьһʹьнщьрʹинә у те жи пәʹнийа ԝе бьгәзи». Әв пʹехәмбәрти Кʹьтеба Пирозда, кʹьтеба пешьнда ньвисар ә. Бь рʹасти һʹәму кʹьтебед дьн, йед Хәбәра Хԝәде бь готьнед Дәстпебун 3:15-ва гьредайи нә. Готьнед ве рʹезе нишан дькьн, кӧ Хԝәде ԝе Хьлазкʹарәки бьшинә, ԝәки Мире-щьна у һʹәму пьштгьред ԝи ԛьрʹ кә. Әв йәк ԝе бона достед Йаһоԝа кʹәрәмәкә гәләк мәзьн бә! Леколина Кʹьтеба Пироз ԝе али мә бькә бьвиньн кӧ чаԝа әв пʹехәмбәрти те сери у әм ча дькарьн жь ве кʹаре бьстиньн. w22.07 14 ¶1-3

Жь Йаһоԝа биланийе бьхԝазьн, ԝәки һун бькарьбьн али зарʹед хԝә бькьн кӧ әԝана ԝи һʹьз бькьн (Аԛуб 1:5). Ширәтед һәри баш жь Йаһоԝа Хԝәде тен. Әм ве йәке жь кʹӧ заньн? Йа пешьн, чьмки Йаһоԝа баве һәри щерʹьбанди йә (Зәбур 36:9). Йа дӧда, ширәтед ԝи һәртʹьм бона мә кʹаре тиньн (Ишайа 48:17). Йаһоԝа бь сайа Хәбәра хԝә у тʹәшкиләта хԝә, хԝарьна рʹӧһʹани тʹер-тʹьжә дьдә, чь кӧ ԝе али ԝә бькә кӧ һун һʹьзкьрьна Йаһоԝа бькьнә дьле зарʹед хԝә (Мәтта 24:45). Мәсәлә һун дькарьн гәләк ширәтед керһати ве рʹеза готарада бьвиньн: «Аликʹари Бона Малбәте», кʹижан кӧ әʹдәбйәтед мәда у сәр малпәра мә һатьнә дәрхьстьне. Ӧса жи, сәрһати, видео у синәм, кӧ сәр jw.org һәнә, дькарьн али де-бава бькьн кӧ зарʹед хԝә ль гора рʹебәрийа Йаһоԝа мәзьн кьн (Мәтʹәлок 2:4, 5). w22.05 27 ¶4-5

Тʹәмамийа дьнйалькеда Йаһоԝа кәсе һәри Афукʹар ә. Йа пешьн, әԝ тʹьме һазьр ә бьбахшинә мә. Йа дӧда, әԝ дәрһәԛа мә һәр тьшти занә у мә рʹьнд нас дькә. Әԝ һʹәму хәйсәт-һʹӧнӧред мә занә у дьле мә дьвинә, ләма әԝ дькарә тедәрхә һәла әм бь рʹасти тʹобә дькьн йан на. Йа сьсийа жи, гава Йаһоԝа дьбахшинә мә, әԝ гӧнед мәйи бәре ида надә рʹуйе мә. Бь сайа бахшандьна ԝи, әм дьбьн хԝәйе исафәкә тʹәмьз у әм заньн ԝәки әԝ мә ԛәбул дькә. Һʹәта кӧ әм нәбьнә беԛьсур, әме һьлбәт щар-щара шаши у гӧна бькьн. Ле Йаһоԝа дьлрʹәʹм у дьлован ә, у әԝ бир накә ԝәки әм гӧнәкʹар ьн. Ләма жи нәлазьм ә ԝәки әм бона шашийед кӧ әм жь бо ԛьсурдарийа хԝә дькьн, гәләк дьлтәнг бьн (Зәбур 103:8-14; 130:3). Бәле, һәгәр әм чь жь дәсте мә те бькьн, кӧ ль рʹийа Хԝәдеда һәрʹьн, әм дькарьн ша бьн (Филипи 4:4-6; 1 Йуһʹәнна 3:19-22). w22.06 7 ¶18-19

Хенщи тьрса бәр пәйкʹәтьна жь алийе сәрԝеред дәԝләте, Мире-щьна тьрсед дьн жи дьдә хәбате. Мәсәлә, һьнә кәс дьтьрсьн кӧ һәгәр әԝана бьбьнә Шәʹдед Йаһоԝа, малбәта ԝан ԝе сәр ԝан һерс кʹәвә. Әԝана мәрьвед хԝә гәләк һʹьз дькьн у дьхԝазьн ԝәки әԝана жи Йаһоԝа нас бькьн у ԝи һʹьз бькьн. Гава мәрьвед ԝан Хԝәдайе рʹаст у хьзмәткʹаред ԝи ньмьз дькьн, дьле ԝан дешә. Щарна, мәрьвед кӧ серида мьԛабьли рʹастийе бун, паше һатьнә сәр рʹийа рʹастийе. Ле һәгәр мәрьвед мә сәва баԝәрийа мә һәләԛәтийа хԝә тʹәви мә дьбьрʹьн, әме чь бькьн? Әм дькарьн жь готьнед Зәбур 27:10 дьлбинийе бьстиньн. Һәгәр малбәта мә жи мә бьһелә, әм гәрәке бир нәкьн кӧ Йаһоԝа гәләк мә һʹьз дькә, ләма жи нә лазьм ә кӧ әм бьтьрсьн. Әм баԝәр ьн кӧ Йаһоԝа ԝе амьнийа мә хәлат бькә. Әԝ жь һәр кәси баштьр занә кӧ чаԝа бона һʹәԝщед мәйә физики, емосийали у рʹӧһʹани хәм бькә. w22.06 16-17 ¶11-13

Чахе Иса хьзмәт дькьр, гәләк щар мәрьва әԝ сущдар дькьрьн. Ԝана дьгот кӧ әԝ пәй хԝарьн у вәхԝарьне кʹәтийә, хьзмәткʹаре Мире-щьна йә, Рʹожа Шәмийе нагьрә у кʹьфьрийа дькә (Мәтта 11:19; 26:65; Луԛа 11:15; Йуһʹәнна 9:16). Ле йәкә Иса бь готьнед сәрт, щаба ԝан нәдьда. Мина ԝи, әм жи гәрәке сәрт щаба мәрьва нәдьн (1 Пәтрус 2:22, 23). Ле щарна һеса нинә кӧ әм хԝә бьгьрьн (Аԛуб 3:2). Гәло чь дькарә али мә бькә? Һәгәр хԝәйе мале сәрт щаба тә бьдә, һерс нәкʹәвә. Бьраки бь наве Сем дьбежә: «Әз тʹьме дина хԝә дьдьме һәла хԝәйе мале чьԛас һʹәԝще рʹастийе йә, у кӧ әԝ дькарә бе гӧһастьне». Щарна дьбәкә хԝәйе мале һерс бә, чьмки әм ԝәʹдәки нәбаш һатьн бал ԝи. Һәгәр әм рʹасти кәсәки һерс бен, әм дькарьн кьн дӧа бькьн, жь Йаһоԝа аликʹарийе бьхԝазьн кӧ әм рʹьһʹәтийе хԝәй кьн у хԝә бьгьрьн, ԝәки сәрт у беԛәдьр хәбәр нәдьн. w22.04 6 ¶8-9

Сәва кӧ зарʹед мә незики Йаһоԝа бьн, гәләк фәрз ә ԝәки әм тʹәви ԝан Кʹьтеба Пироз һин бьн (2 Тимотʹейо 3:14-17). Ле мәщаләкә дьн жи һәйә, кӧ ча әԝана дькарьн дьһа баш Йаһоԝа нас кьн. Кʹьтеба Мәтʹәлокда, бавәк кӧрʹе хԝәрʹа дьбежә, ԝәки әԝ һʹӧнӧред Йаһоԝа, кʹижан кӧ әʹфринада тенә кʹьфше, тʹьме бира хԝәда хԝәй кә (Мәтʹәлок 3:19-21). Де-бавно, һьлбәт ԝәрʹа һʹәԝас ә тʹәви зарʹед хԝә тʹәбийәтеда ԝәʹдә дәрбаз кьн. Ԝи чахи зарʹед хԝәрʹа нишан кьн, кӧ ортʹа әʹфринед Йаһоԝа у һʹӧнӧред ԝида, чь һәвгьредан һәйә (Рʹомайи 1:20). Дина хԝә бьдьнә, Иса пе мәсәла әʹфрина чаԝа һин дькьр. Рʹожәке, Иса дина шагьртед хԝә кʹьшандә сәр ԛарʹԛарʹ у сосьна (Луԛа 12:24, 27-30). Әԝи дәрһәԛа мәрʹдани у ԛәнщийа Баве хԝә, дәрсәкә фәрз да шагьртед хԝә. Чаԝа кӧ Йаһоԝа тәйрәда у кӧлирка хԝәй дькә, әԝе кʹьнщ у хԝарьне бьдә хьзмәткʹаред хԝә жи. w23.03 20-21 ¶1-4

Әм жь Йаһоԝа рʹази нә кӧ әм дькарьн бь наве Кӧрʹе ԝи, ԝирʹа дӧа бькьн. Бь сайа Иса, Йаһоԝа щаба дӧайед мә дьдә. Гава әм бь наве Иса дӧа дькьн, Йаһоԝа мә дьбьһе у сәр һʹиме ԛӧрбана Иса гӧнед мә дьбахшинә (Рʹом. 5:1). Ль гора Ньвисаред Пироз, Иса Мәсиһ Сәрәккʹаһине мә йә, «кӧ ль әʹзмана сәр тʹәхте мәзьнайийа Хԝәдейә рʹасте рʹуньштийә» (Ибрани 8:1). Иса кʹеләка Баве мә Йаһоԝа йә, у пьштгьрийа мә дькә (1 Йуһʹәнна 2:1). Әм гәләк жь Йаһоԝа рʹази нә, кӧ Әԝи Сәрәккʹаһинәки ӧса дьлован кʹьфш кьрийә, йе кӧ кемасийед мә фәʹм дькә у бона мә рʹәща дькә (Рʹомайи 8:34; Ибрани 4:15). Мәйе нькарьбуйа бе ԛӧрбана Иса Мәсиһ Йаһоԝарʹа дӧа бькьра. Бәле, хәбәр тʹера мә накьн, ԝәки әм рʹазибуна хԝә бона ԛӧрбана Иса бьдьнә кʹьфше! w22.07 23 ¶10-12

Кәсе ширһʹәлал у бь итʹбар рʹастийе дьбежә у һәр тьшти дькә, ԝәки созед хԝә бинә сери (Зәбур 15:4). Мәрьв заньн кӧ дькарьн итʹбарийа хԝә ԝи биньн. Әм дьхԝазьн ԝәки хушк-бьред мә сәр мә жи ӧса бьньһерʹьн. Әм нькарьн зоре мәрьва бькьн, ԝәки әԝана итʹбарийа хԝә мә биньн. Гәрәке әм избат кьн кӧ әм мәрьвед бь итʹбар ьн, у әм гәрәке сәр хԝә бьхәбьтьн ԝәки ӧса бьминьн. Йе һәри бь итʹбар, Йаһоԝа йә. Әм дькарьн һәртʹьм итʹбарийа хԝә ԝи биньн, чьмки әԝ амьн ә у «һʹәму кьрьнед Ԝи бь һәԛ-һʹәлалийе нә» (Зәбур 33:4). У әԝ дьхԝазә ԝәки әм чʹәʹв бьдьнә ԝи (Әфәси 5:1). Әм чьԛас рʹази нә ԝәки Йаһоԝа мә тʹәви бьратийа һʹәмдьнйайе кьрийә йәк, йед кӧ һʹьзкьрьне дьдьнә кʹьфше у мәрьвнә һʹәлал ьн. Гәрәке әм бәрдәԝам кьн сәр хԝә бьхәбьтьн, кӧ бьбьнә мәрьвнә бь итʹбар, ԝәки хушк-бьра бькарьбьн итʹбарийа хԝә мә биньн. Чьԛас кӧ әм һʹьзкьрьн, мьлукти, сәрԝахти, һʹәлали у хԝәгьртьне пешда биньн, һаԛас әме пьштгьрийа йәктийа щьвате бькьн. Ԝәрә әм чʹәʹв бьдьнә Йаһоԝа у избат кьн кӧ әм мәрьвнә бь итʹбар ьн! w22.09 8 ¶1-2; 13 ¶17

Тʹәмамийа дьнйайеда хушк-бьред мә гәләк ьн, ле диса жи дьбәкә әм хԝә щарна тʹәне тʹәхмин бькьн у дьбәкә хәмгин дьбьн, дькʹәвьн депресийе у дьфькьрьн кӧ әм тʹәне манә. Ле Йаһоԝа тʹӧ щар нахԝазә кӧ әм бькʹәвьн һʹаләки ӧса. Дина хԝә бьдьне, сәва кӧ Елйас дьле хԝә вәкә, пешийе Йаһоԝа дӧ щара жь ԝи пьрси: «Тӧ ль вьр чь дьки?» (1 Пʹадшати 19:9, 13, ИМ). Гава Елйас дәрде дьле хԝә Йаһоԝарʹа рʹет, Йаһоԝа гӧһ да ԝи. Паше, Йаһоԝа ԛәԝата хԝә нишани Елйас кьр у избат кьр кӧ әԝ кʹеләка ԝи йә. Ӧса жи, әԝи Елйасрʹа гот кӧ хенщи ԝи, гәләк кәсед дьн жи Ԝи дьһʹәбиньн (1 Пʹадшати 19:11, 12, 18). Паши кӧ Елйас дьле хԝә Йаһоԝарʹа вәкьр у щаба ԝи бьһист, бешьк әԝи хԝә һе рʹьһʹәт тʹәхмин кьр. Һьнге Йаһоԝа чәнд шьхӧлед фәрз данә Елйас: Әԝи жерʹа гот кӧ бьра әԝ Һазаел ча пʹадше Сурйайе, Йәһу ча пʹадше Исраеле у Елиша ча пʹехәмбәр кʹьфш бькә (1 Пʹадшати 19:15, 16). Бь ви щурʹәйи, Йаһоԝа али ԝи кьр кӧ әԝ дина хԝә бьдә тьштед баш. Ӧса жи, Хԝәде Елиша ча аликʹар да ԝи. w22.08 8 ¶3; 9 ¶5

Щьвата тә ԛә Ода Щьвате ава йан тʹәзә кьрийә? Те бира тә кӧ щьвина пешьн Ода Щьватеда ча дәрбаз бу? Ԝе дәме, тә шькьри да наве Йаһоԝа, ӧса нинә? Дьԛәԝьмә тӧ һаԛас ша буй кӧ чʹәʹве тә бь һесьра тʹьжә бун у тә нькарьбу кʹьламе жи бежи. Бәле, әм бона Одед Щьвата йед кӧ әм ава дькьн, пәсьне Йаһоԝа дьдьн. Ле бәс нинә кӧ әм тʹәне одед бәдәԝ ава бькьн. Гәрәке әм мәрьвед кӧ тенә ԝедәре жи, аликʹарийе бьдьнә ԝан. Әв йәк ԝе дьһа зедә рʹумәте бьдә Йаһоԝа. Рʹеза иройинда гьлийед Паԝлосе шанди «аликʹарийа һәвдӧ бькьн», ӧса жи те һʹәсабе кӧ ча бежи һәвдӧ ава бькьн. Паԝлосе шанди рʹьнд заньбу ԝәки чаԝа хушк-бьра ава кә. Әԝи һʹале ԝан рʹьнд фәʹм дькьр. Әм дькарьн чʹәʹв бьдьнә ԝи у хушк-бьра ԛәԝи кьн (1 Корьнтʹи 11:1). w22.08 20 ¶1-2

Мәсиһийе кӧ дьхԝазә бәр чʹәʹве Хԝәде рʹаст бе кʹьфше, гәрәке һʹәму кьред хԝәда һʹәлал бә. Мәрьве рʹаст һәԛийе жи һʹьз дькә. Гава кәсәки дьн рʹасти нәһәԛийе те, әԝ хәмгин дьбә. Ӧса жи, мәрьве кӧ жь дьл рʹаст ә, һьлдьдә һʹәсаб кӧ Йаһоԝа ԝе сәр сафикьрьнед ԝи чаԝа бьньһерʹә, чьмки әԝ дьхԝазә дьле Йаһоԝа ша кә. Кʹьтеба Пироз дьбежә кӧ Йаһоԝа Канийа рʹастийе йә. Ләма жи, Йаһоԝа ча «ԝәлате рʹастийе» те навкьрьне (Йерәмйа 50:7). Йаһоԝа Әʹфьрандаре һәр тьшти йә, ләма жи тʹәне изьна ԝи һәйә ԝәки бежә, кӧ чь рʹаст ә у чь на. Әԝ мә баштьр занә ԝәки чь рʹаст ә у чь на (Мәтʹәлок 14:12; Ишайа 55:8, 9). Рʹаст ә әм сурәте Хԝәдеда һатьнә хӧльԛандьне, диса жи әм дькарьн ль гора принсипед ԝийи рʹастийе бьжин (Дәстпебун 1:27). Әм жь дьл дьхԝазьн ве йәке бькьн! Әм Баве хԝәйи әʹзмана гәләк һʹьз дькьн, ләма жи чьԛас жь дәсте мә те, әм дьхԝазьн чʹәʹв бьдьнә ԝи (Әфәси 5:1). w22.08 27 ¶5-6

Гава дәрдед мә һәнә йан әм тәнгасийеда ньн, дьбәкә әм бьхԝазьн бь тьштәки дьн мьжул бьн, ԝәки дәрһәԛа проблемед хԝә нәфькьрьн. Әв хԝәстьн нормал ә, ле гәрәке әм мьԛати хԝә бьн, ԝәки пе ван тьшта мьжул нәбьн, йед кӧ Йаһоԝа нәфрʹәт дькә (Әфәси 5:10-12, 15, 16). Паԝлосе шанди хушк-бьред бажаре Филипйайерʹа ньвисибу, ԝәки сәр ԝан тьшта бьфькьрьн, «чь кӧ бь рʹастийе йә . . . чь кӧ бь һʹәлалийе йә . . . [у] чь кӧ бь хԝәшийе йә» (Филипи 4:8). Рʹаст ә готьнед Паԝлос рʹастә-рʹаст дәрһәԛа ԝәʹдәдәрбазкьрьна нинә, ле диса жи гьлийед ԝи нишан, дькьн ԝәки лазьм ә әм ԝәʹдәдәрбазкьрьнед хԝә ль гора ве принсипе бьжберьн. Һәла ӧса бькә: Ве рʹезеда кʹидәре кӧ хәбәра «тьшт» ньвисар ә, дәԝса ве, хәбәра «стьран», «филм», «кʹьтеб» йан «листька компӧтәре» дайнә. Бь ви щурʹәйи, тӧ дькари тедәрхи кӧ бәр чʹәʹве Хԝәде чь баш ә у чь на. Әм дьхԝазьн пе принсипед Йаһоԝайә бьльнд бьжин (Зәбур 119:1-3). w22.10 9 ¶11-12

Жийина хԝәйә бәреда, һьнә жь ван кәсед «нәһәԛ» тьштед гәләк хьраб кьрьбун. Ләма жи гәрәке әԝана бенә һинкьрьне, кӧ чаԝа ль гора ԛанунед Йаһоԝа бьжин. Бона ве йәке, бьн сәрԝертийа Пʹадшатийа Хԝәдеда, бәрнама һинкьрьне йа һәри мәзьн ԝе дәстпебә. Кʹе ԝе кәсед нәһәԛ һин кә? ‹Әʹлаләта мәзьн› у «йед һәԛ», кӧ жь мьрьне бенә рʹакьрьне, ԝе ви шьхӧли бькьн. Сәва кӧ навед кәсед нәһәԛ кʹьтеба жийинеда бе ньвисандьне, гәрәке әԝана бьбьнә достед Йаһоԝа у жийина хԝә бьдьнә дәсте ԝи. Иса Мәсиһ у һәмпʹадшед ԝи, ԝе рʹьнд дина хԝә бьдьнә ԝан һʹәму кәсед нәһәԛ, һәла әԝана һинкьрьнеда ча пешда дьчьн (Әʹйанти 20:4). Кәсед кӧ аликʹарийе ԛәбул нәкьн, ԝе бенә кʹӧтакьрьне, һәла һе һәрге әԝана 100 сали бьн жи (Ишайа 65:20). Йаһоԝа у Иса Мәсиһ дькарьн дьла бьхуньн, у әԝе изьне нәдьн ԝәки кәсәк дьнйа тʹәзәда хьрабийе бькә (Ишайа 11:9; 60:18; 65:25). w22.09 17 ¶11-12

Ве рʹезеда хәбәра «һʹӧкӧмәти» те һʹәсабе сәрԝеред ве дьнйайе. Мәсиһи гӧрʹа ԝан сәрԝера дькьн. Әԝ сәрԝер ӧса дькьн кӧ һәр тьшт бь организә бә, ԛануна датиньн у дина хԝә дьдьне, ԝәки мәрьв ль гора ԝан ԛануна бьжин у щарна һәла һе хьзмәткʹаред Йаһоԝа жи дьпарезьн (Әʹйанти 12:16). Ләма жи, мәрʹа тʹәми те дайине кӧ әм хәрщ, сәләф, тьрс у ԛәдьр кӧ әԝана жь мә дьхԝазьн, бьдьн ԝан (Рʹомайи 13:7). Әв һʹӧкӧм Йаһоԝа дайә дәсте сәрԝеред дьнйайе. Иса әв йәк да кʹьфше гава Пилато Понтийо, ԝәлийе Рʹоме, пьрс данә ԝи. Чахе Пилато гот кӧ дәсте ԝида йә кӧ Иса аза кә йан жи бькӧжә, Иса готе: «Һәгәр жь жор тәрʹа нәһата дайине, тʹӧ һʹӧкӧме тә ԝе ль сәр мьн тʹӧнәбуйа» (Йуһʹәнна 19:11). Чаԝа кӧ синоред һʹӧкӧме Пилато һәбун, иро жи синоред һʹӧкӧме һʹәму сәрԝер у политика һәйә. w22.10 14 ¶6

Жь бина бәр Хԝәде, Даԝьд Пʹадша ньвисибу кӧ ахьрийеда, жийина бьн сәрԝертийа пʹадшаки билан у амьнда ԝе чаԝа бә (Зәбур 37:10, 11, 29). Гава әм мәрьварʹа бәʹса дьнйа тʹәзә дькьн, әм гәләк щара Зәбур 37:11 дьхуньн. Иса хԝәха жи ԝәʹде Хьзмәтийа сәр Чʹийе бәʹса ве рʹезе кьрьбу у бь ве йәке нишан кьрьбу, ԝәки готьнед ве рʹезе ԝе ахьрийеда бенә сери (Мәтта 5:5). Ле ӧса жи, ван готьнед Даԝьд әшкәрә дькьр, кӧ ԝәʹде сәрԝертийа кӧрʹе ԝи Сьлеманда, жийин ԝе чаԝа бә. Гава Сьлеман Пʹадша сәр Исраеле сәрԝерти дькьр, щьмәʹт ль ԝәлатәки «кӧ шир у һьнгьв же дькʹьшә» нав хԝәши у сьламәтийеда бу. Хԝәде ԝанрʹа ӧса готьбу: «Һәгәр һун пе ԛәйдә-ԛанунед мьн рʹабьн-рʹунен у тʹәмийед мьн хԝәй кьн у ԝан бьԛәдиньн, . . . Әзе әʹдьлайе бьдьмә ԝәлате ԝә, һуне рʹьһʹәт пʹалдьн» (Ԛануна Кʹаһинтийе 20:24; 26:3, 6). Әв созед Хԝәде бьн сәрԝертийа Сьлеман Пʹадшада һатьн сери (1 Дирок 22:9; 29:26-28). Готьнед Зәбур 37:10, 11, 29 ԝәʹде бәре һатьн сери у ахьрийеда жи ԝе диса бенә сери. w22.12 10 ¶8

Чаԝа Мәсиһийед рʹаст, әм гәрәке гӧһ бьдьнә рʹебәрийе. Сәва кӧ әм пешдачуйи бьн, Кʹьтеба Пироз тʹәмикә ӧса дьдә мә: «Шәрʹе хԝә кӧ дьки, дьди бәр һʹәсаба у сәркʹәтьн бь гәләк ширәткʹара те» (Мәтʹәлок 24:6). Ԝәрә әм бьньһерʹьн кӧ әв принсип чаԝа дькарә али мә бькә, ԝәки әм шьхӧле бәлакьрьна мьзгинийеда пешдачуйи бьн. Дәԝса кӧ әм ча дьхԝазьн ӧса хьзмәт бькьн, гәрәке әм гӧһ бьдьн ван рʹебәрийа, йед кӧ әм сәр щьвата дьстиньн. Ԝедәре әм дькарьн жь хушк-бьред щерʹьбанди һин бьн, кӧ чаԝа Кʹьтеба Пироз мәрьва һин кьн. Ӧса жи, тʹәшкиләта Йаһоԝа әʹдәбйәт у видеойед хԝәш дәрдьхә, йед кӧ али мәрьва дькьн ԝәки Кʹьтеба Пироз фәʹм бькьн. Әм ширәтед жь Хәбәра Хԝәде гәләк дьшекьриньн. Ԝәрә әм тʹьме ль гора ве биланийе бьжин, кʹижан кӧ Йаһоԝа дьдә мә (Мәтʹәлок 3:13-17). w22.10 23 ¶18-19

Чаԝа кӧ хԝарьн бәдәна мә хԝәй дькә, хԝарьна рʹӧһʹани жи, демәк леколина Хәбәра Хԝәде у фькьрандьна кʹур сәр ԝе, мә алийе рʹӧһʹанида хԝәй дькә. Йаһоԝа дьхԝазә кӧ әм зьке хԝәйә симболик бь Хәбәра ԝи тʹер бькьн. Бона ве йәке, гәрәке әм дӧа бькьн, Хәбәра ԝи бьхуньн у сәр ԝе кʹур бьфькьрьн. Йа пешьн, гәрәке әм дӧа бькьн кӧ дьле мә һазьр бә, ԝәки фькьред Хԝәде ԛәбул кә. Паше, гәрәке әм пʹарәкә Кʹьтеба Пироз бьхуньн у ль сәр тьштед кӧ мә хԝәндьнә, кʹур бьфькьрьн. Чьԛас әм сәр Хәбәра Хԝәде кʹур бьфькьрьн, һаԛас дьле мәйи симболик ԝе бь готьнед ԝева тʹьжә бә. Бәлакьрьна мьзгинийа Пʹадшатийе щарна нә һеса йә. Сәрда жи, дьбәкә дәмәкә незикда лазьм бә, кӧ әм диԝана Хԝәде мәрьварʹа әʹлам кьн. Сәва кӧ ԛәԝата мә һәбә, ԝәки әм ван щабдарийа пек биньн, гәләк фәрз ә кӧ әм Кʹьтеба Пироз бьхуньн у сәр ԝе кʹур бьфькьрьн. Хенщи ве йәке, гава әм дина хԝә дьдьн һʹӧнӧред Йаһоԝайә хԝәш, достийа мә тʹәви ԝи дьһа ԛәԝи дьбә. w22.11 6-7 ¶16-17

Иса да кʹьфше, ԝәки нә кӧ тʹәне пәйчуйед ԝи, ле мәрьвед дьн жи ԝе пәйчуйед ԝийә рʹаст нас кьн бь ве йәке, кӧ һʹьзкьрьна рʹаст ԝе ортʹа ԝанда һәбә. Һʹьзкьрьна нав хьзмәткʹаред Йаһоԝада рʹасти жи мәхсус ә. Һәмьки, Шәʹдед Йаһоԝа беԛьсур ниньн (1 Йуһʹәнна 1:8). Чьԛас баш әм хушк-бьра нас дькьн, һаԛас һе зедә әм кемасийед ԝан дьвиньн (Рʹомайи 3:23). Ле сәд һʹәйф кӧ кемасийед кәсед дьн, һьнәкарʹа буйә кәвьре лькʹӧмандьне у ԝана пьшта хԝә дайә Йаһоԝа. Иса чаԝа нишан кьр, кӧ әԝ шандийед хԝә һʹьз дькә? У иро, әм чаԝа дькарьн чʹәʹв бьдьнә Иса? Ԝе баш бә кӧ әм сәр щабед ван пьрса кʹур бьфькьрьн. Әв йәк ԝе али мә бькә, ԝәки әм хушк-бьра дьһа зедә һʹьз бькьн, илаһи гава әм кемасийед ԝан дьвиньн (Әфәси 5:2). w23.03 26-27 ¶2-4

Чьԛас әм дьһа незики хьлазийа ве дьнйайе дьбьн, һаԛас щьватеда һьнә чәтьнайи дькарьн пешда бен. Әв тәнгаси дькарьн амьнийа мә һьндава Йаһоԝа бьщерʹьбиньн. Ләма жи гәләк фәрз ә кӧ әм сәрхԝә бьминьн. Һәрге тӧ дьфькьри кӧ хушк йан бьраки нәһәԛи ль тә кьрийә, нәхәйдә. Һәрге тә ширәт бькьн у тӧ шәрм бьки, диса жи ширәте ԛәбул кә у хԝә рʹаст кә. У һәрге гӧһастьнед тʹәшкиләта Йаһоԝа сәр тә һʹӧкӧм бькьн, бь дьл у щан пьштгьрийа ԝан бькә у гӧһ бьдә рʹебәрийе. Чахе амьнийа тә те щерʹьбандьне, итʹбарийа хԝә Йаһоԝа у тʹәшкиләта ԝи бинә. Рʹьһʹәт бьминә, сәрԝахт бә у хирәт бькә ԝәки тӧ сәр һʹәму дәрәща пе чʹәʹве Йаһоԝа бьвини. Йаһоԝарʹа дӧа бькә у жь ԝи аликʹарийе бьхԝазә. Хԝә жь щьвате дур нәгьрә. Һәрге тӧ ӧса бьки, Мире-щьна ԝе нькарьбә тә жь Йаһоԝа у жь тʹәшкиләта ԝи бьԛәтинә (Аԛуб 4:7). w22.11 24-25 ¶14-16

Рʹуспи али хушк-бьра дькьн, ԝәки әԝана пешда хԝә бона ԛәзийа һазьр кьн. Әԝана гәрәке избат бьн, ԝәки тʹәмамийа щьвате һаш пе һәйә, кӧ чь бькьн, сәва кӧ дәрәщед ӧсада бенә хԝәй кьрьне у тʹәви рʹуспийа текли бьн. Ле тӧ хԝәха чь дькари бьки? Һәрге незики мала тә тʹәшԛәләкә тʹәбийәте бьԛәԝьмә, жь рʹуспийа бьпьрсә һәла тӧ чаԝа дькари аликʹарийе бьди. Дьбәкә тӧ дькари хушк у бьред кӧ жь тʹәшԛәләке хьлаз бунә, йан жи йед кӧ авакьрьнеда кʹар дькьн, ԝәʹдәлу тʹәглифи мала хԝә ки. Йан жи, дьбәкә тӧ дькари хԝарьн йан тьштед дьн ԝанрʹа бьви. Ле һәрге тʹәшԛәләкә тʹәбийәте дури мала тә бьԛәԝьмә, гәло тӧ чаԝа дькари аликʹарийе бьди? Мәсәлә, тӧ дькари бона кәсед зьрардити дӧа бьки (2 Корьнтʹи 1:8-11). Ӧса жи, тӧ дькари бь сайа ԛӧрбанкьрьнед хԝә, бона шьхӧле һʹәмдьнйайе аликʹарийе бьди, йед кӧ ӧса жи тенә хәрщкьрьне гава тʹәшԛәлед тʹәбийәте дьԛәԝьмьн (2 Корьнтʹи 8:2-5). Һәрге мәщал һәбә ԝәки тӧ һәрʹи ви щийи кʹидәре кӧ тʹәшԛәлә ԛәԝьми йә, дәрһәԛа ве хԝәстьна хԝә рʹуспийарʹа бежә. Һәрге хԝәстьна тә бе ԛәбулкьрьне, дьԛәԝьмә тӧ бейи һинкьрьне, ԝәки бькарьби бь щурʹе һәри баш аликʹарийе бьди. w22.12 24 ¶8; 25 ¶11-12

Щерʹьбандьнед рʹасти кʹижани әм тен, тенә сәре мәрьвед дьн жи. Паԝлосе шанди әв гьли Мәсиһийарʹа ньвисибун, ча жьнарʹа ӧса жи мерарʹа, йед кӧ бажаре Корьнтʹеда дьжитьн. Һьнәк жь ԝан бәре бенамуси дькьрьн, һомосексуал у ичкәхԝәр бун (1 Корьнтʹи 6:9-11). Паши кӧ әԝана һатьнә ньхӧмандьне жи, ԝана бешьк щарна мьԛабьли хԝәстьнед хьраб шәрʹ дькьр. Рʹаст ә әԝана гьшк Мәсиһийед бь рʹӧһʹ кʹьфшкьри бун, ле диса жи әԝана һе гӧнәкʹар бун. Фьрԛи тʹӧнә әм мьԛабьли кʹижан хәйсәте хьраб шәрʹ дькьн, әме бькарьбьн сәркʹәвьн, чьмки заньн ԝәки кәсед дьн мьԛабьли хԝәстьнед ӧса сәркʹәтьнә. Кʹьтеба Пироз дьбежә ԝәки һун дькарьн баԝәрийеда һʹимгьрти бьн, чьмки «заньн кӧ хушк-бьред ԝә жи тʹәмамийа дьнйайеда хут ԝан щәфа дькʹьшиньн» (1 Пәтрус 5:9). w23.01 12 ¶15

Иса жь Йаһоԝа лава кьр, кӧ әԝ пәйчуйед ԝи бьпарезә (Йуһʹәнна 17:11). Әв йәк чьрʹа мерхасийе дьдә мә? Чьмки Йаһоԝа жь һʹәму дьжмьнед мә ԛәԝаттьр ә (1 Йуһʹәнна 4:4). Йаһоԝа Хԝәде һәр тьшти дьвинә. Һәрге әм хԝә бьсперьн Йаһоԝа, әԝе али мә бькә кӧ әм ԝәʹде тьрс у хофе жи мерхас бьминьн. Гәло тӧ шәрм дьки кӧ бәлакьрьна мьзгинийе дәстпеки, йан жи бейи ньхӧмандьне, чьмки тӧ дьтьрси һәла кәсед дьн ԝе сәр тә чь бежьн? Изьне нәдә ԝәки һәст у фькьред ӧса бьбьн сәбәб, ԝәки тьштед рʹаст нәки. Жь дьл Йаһоԝарʹа дӧа бькә. Жь ԝи бьхԝазә кӧ әԝ мерхасийе бьдә тә, ԝәки тӧ бькарьби ԛьрара ԝи бини сери. Гава тӧ бьвини ча Йаһоԝа ԛәԝате дьдә тә, дьле тә ԝе дьһа ԛәԝи бә (Ишайа 41:10, 13). w23.01 29 ¶12; 30 ¶14

Иса жь Ферьсийа ӧса пьрси: «Ԝә нәхԝәндийә?» Бь ве пьрсе, әԝи әшкәрә кьр кӧ ньһерʹандьна Ферьсийа сәр Ньвисаред Пироз шаш ә (Мәтта 12:1-7). Ферьсийа сәр шагьртед Иса дьготьн, ԝәки әԝана рʹожа Шәмийе хԝәй накьн. Ләма жи Иса бь дӧ мәсәлед жь Ньвисаред Пироз у бь рʹезәкә жь кʹьтеба Һосәйа щаба ԝан да. Бь ви щурʹәйи, әԝи нишан кьр кӧ ԝана мәʹнийа ԛануна рʹожа Шәмийе фәʹм нәкьрийә у рʹәʹме надьнә кʹьфше. Гәло хԝәндьна Хәбәра Хԝәде чьма сәр һʹьш у дьле ԝан һʹӧкӧм нәдькьр? Чьмки ԝана Ньвисаред Пироз бь нета нәрʹаст у бь бабахийе дьхԝәнд. Әв йәк бу сәбәб, кӧ ԝана Хәбәра Хԝәде фәʹм нәдькьр (Мәтта 23:23; Йуһʹәнна 5:39, 40). Ӧса жи дина хԝә бьдә Мәтта 19:4-6. Ван рʹезада те готьне, ԝәки Иса диса әԝ пьрс да Ферьсийа: «Ԝә нәхԝәндийә?» Ԝана жь Ньвисаред Пироз заньбу, кӧ Хԝәде инсан чаԝа әʹфьрандьбу. Ле диса жи, ԝана фәʹм нәкьрьбу кӧ Хԝәде дәрһәԛа зәԝаще чь дьбежә. w23.02 12 ¶12-13

Ԛануна кӧ Йаһоԝа дабу Исраелийа али ԝан дькьр, ԝәки әԝана чаԝа малда, ӧса жи щийе хәбате хԝә жь ԛәзийед гьран бьпʹарезьн (Дәркʹәтьн 21:28, 29; Ԛануна Дӧщари 22:8). Мәсәлә, һәрге мәрьвәки кәсәки дьн ньшкева бе һʹәмде хԝә бькӧшта, әве йәке жерʹа ахьрийа хьраб дьани (Ԛануна Дӧщари 19:4, 5). Ль гора Ԛануна Хԝәде, кәсе кӧ зьрар дьда әʹмьре зарʹа нәбуйи, дьһатә щәзакьрьне (Дәркʹәтьн 21:22, 23). Хәбәра Хԝәде зәлал дьбежә кӧ Йаһоԝа дьхԝазә, ԝәки әм мьԛати сьһʹәт-ԛәԝата хԝә бьн. Һәрге әм малда у щийе хәбата хԝә мьԛати сьһʹәт-ԛәԝата хԝә бьн, әме рʹазибуна хԝә бона жийине бьдьнә кʹьфше. Әԝ тьштед кӧ дькарьн мә бьриндар кьн, йан жи тьштед хими, жәʹр у ӧса жи дәрман, әм давежьнә ван щийа, кӧ зьрар нәгьһижә тʹӧ кәси. Ӧса жи, әм нахԝазьн кӧ әв тьшт бәр дәсте зарʹа бьн, ԝәки әԝана хԝә пе ван бьриндар нәкьн. Гава кӧ әм агьр ведьхьн, аве дькʹәлиньн йан жи һащәтед кӧ дькарьн зийане бьдьн, дьдьнә хәбате, әм гәрәке гәләк фәсал бьн у тьштед ӧса пьшт гӧһе хԝәва нәвежьн. Ӧса жи, һәрге әм бьн һʹӧкӧме дәрманада бьн, йан вәхԝари бьн, йан жи хәԝа мә бе, әм гәрәке әʹрәбе нәжон. У чахе әм әʹрәбе дажон, әм гәрәке тʹеле дәсте хԝәда нәгьрьн у пе мьжул нәбьн. w23.02 21-22 ¶7-9

Йаһоԝа бь сәбьр у дьлован ә у һʹале мә рʹьнд фәʹм дькә. Әԝ дина хԝә дьдә һʹӧнӧред баш йед шагьртед хԝә (Зәбур 130:3). Әԝ тʹӧ щар тьштед жь ԛәԝата мә дәр, жь мә дәʹԝа накә. Бир нәкә, Әԝи мәжийе мә бь щурʹе мәхсус чекьрийә (Зәбур 139:14). Әʹфьрандаре мә дьхԝазә кӧ әм тʹьме һин бьн у ләзәте жь ве йәке бьстиньн. Ләма жи әм һʹәйра ве йәкеда ньн, кӧ рʹастийед жь Кʹьтеба Пироз пебьһʹәсьн (1 Пәтрус 2:2). Нетед ӧса дайнә пешийа хԝә, йед кӧ тӧйе бькарьби бини сери, у һәр рʹож Кʹьтеба Пироз бьхунә у леколин кә (Йешу 1:8). Бь аликʹарийа Йаһоԝа, тӧйе жь хԝәндьне дьһа зедә ләзәте бьстини у һе зедә дәрһәԛа ԝи пебьһʹәси. Тʹәне занәбун бәс нинә. Һәмьки занәбун ԝе али тә бькә ԝәки тӧ Йаһоԝа дьһа баш нас бьки, һе зедә ԝи һʹьз бьки у баԝәрийа хԝә ԝи бини (1 Корьнтʹи 8:1-3). Чахе тӧ леколина дьки, жь Йаһоԝа рʹәща кә ԝәки баԝәрийа тә һе ԛәԝи кә (Луԛа 17:5). Әԝ бь мәрʹдани щабед дӧайед ӧса дьдә. w23.03 10 ¶11, 13

Гава шагьртед Иса һивийа ԝеранкьрьна Оршәлим у пʹарьстгәһе бун, Иса дьхԝәст ԝәки әԝана шьхӧләки бькьн. Әԝи ԝанрʹа готьбу кӧ гәрәке әԝана мьзгинийе «Оршәлимеда гьрти тʹәмамийа Щьһустане, Самәрйайе у һʹәта сәре дьне жи» бәла бькьн (Кʹаред Шандийа 1:6-8). Бь рʹасти жи, әв шьхӧл, шьхӧләки гәләк мәзьн ә! Жь бо ве йәке кӧ ԝана шьхӧле хԝә бь дьл у щан дькьр, ԝана ԝәʹде хԝә бь щурʹе һәри баш дьда хәбате. Сәва кӧ әм мьԛати хԝә бьн, гәрәке әм бьфькьрьн кӧ әм ԝәʹде хԝә чаԝа дәрбаз дькьн. Тьштед хьраб дькарьн бенә сәре һәр кәси (Ԝаиз 9:11). Мәсәлә, ньшкева әм дькарьн жийина хԝә ӧнда кьн. Һәрге әм ль гора хԝәстьна Йаһоԝа һәрәкʹәт бькьн у достийа хԝә тʹәви ԝи дьһа ԛәԝи кьн, әме ԝәʹде хԝә бь щурʹе һәри баш бьдьнә хәбате (Йуһʹәнна 14:21). Гәрәке әм «ԛәԝин бьминьн, жь щийе хԝә нәһʹәжьн, һәр гав шьхӧле Хӧданда пешда һәрʹьн» (1 Корьнтʹи 15:58). Паше, гава хьлазийа жийина мә йан жи хьлазийа ве дьнйа хьраб бе, әме нәбежьн: «Хԝәзи мьн дьһа зедә Йаһоԝарʹа хьзмәт кьра» (Мәтта 24:13; Рʹомайи 14:8). w23.02 18 ¶12-14