Сьбат

Гәло әв чь те һʹәсабе? Иса да кʹьфше, ԝәки һʹьзкьрьна нав шагьртед ԝида гәрәке һаԛас мәзьн бә, кӧ һәрге лазьм бә, әԝана әʹмьре хԝә жи бона һәвдӧ бьдьн. Хәбәра Хԝәде гәләк щара дьбежә кӧ һʹьзкьрьн чьԛас фәрз ә. Мәсәлә, гәләк кәс ван рʹеза һʹьз дькьн: «Хԝәде һʹьзкьрьн ә» (1 Йуһʹәнна 4:8). «Һәвале хԝә ԝәкә хԝә һʹьз бькә» (Мәтта 22:39). «Һʹьзкьрьн гәләк гӧна дьньхемә» (1 Пәтрус 4:8). «Һʹьзкьрьн тʹӧ щар кʹӧта набә» (1 Корьнтʹи 13:8). Әв рʹез у рʹезед мина ван, рʹьнд дьдьнә кʹьфше, ԝәки гәләк фәрз ә кӧ әм һʹьзкьрьне бьдьнә кʹьфше. Канийа һʹьзкьрьна рʹаст Йаһоԝа йә. Бәле, тʹәне мәрьвед кӧ рʹӧһʹе пироз у кʹәрәма Йаһоԝа сәр ԝан ә, дькарьн бь дьл у щан һәвдӧ һʹьз бькьн (1 Йуһʹәнна 4:7). Ләма жи Иса готьбу, кӧ тʹәне шагьртед ԝи ԝе һʹьзкьрьна рʹаст һьндава һәвда бьдьнә кʹьфше. Бәле, чаԝа Иса готьбу, гәләка бь сайа ве йәке шагьртед ԝи нас кьрьбун, кӧ ортʹа ԝанда һʹьзкьрьн һәбу. w23.03 27-28 ¶5-8

Гәло тәрʹа лазьм ә сәр хԝә бьхәбьти ԝәки дьһа зедә бьбахшини мәрьва? Тӧ дькари сәрһатийед кәсед кӧ һазьр бун бьбахшиньнә мәрьва у сәрһатийед кәсед кӧ ӧса нибун, бьхуни у ль сәр ԝан кʹур бьфькьри. Бәʹса хәбәре, сәр мәсәла Иса бьфькьрә. Әԝи бь дьл дьбахшандә мәрьва (Луԛа 7:47). Әԝи дина хԝә нәдьда шашийед ԝан, ле итʹбарийа хԝә ԝан дьани. Ле Ферьси ӧса нибун. Ԝана мәрьва «бәр тьштәки һʹәсаб нәдькьрьн» (Луԛа 18:9). Сәр ван мәсәла кʹур бьфькьрә у жь хԝә бьпьрсә: «Гәло әз сәр мәрьва ча дьньһерʹьм? Гәло әз дина хԝә дьдьм кʹижан һʹӧнӧред ԝан?» Һәгәр тәрʹа чәтьн ә бьбахшини кәсәки, бьфькьрә кӧ кʹижан һʹӧнӧред баш щәм ви кәси һәнә, у ԝана сәр кʹахазәке бьньвисә. Паше жь хԝә бьпьрсә: «Гәло Иса сәр ви кәси чаԝа дьньһерʹә? Һәгәр Иса дәԝса мьн буйа, гәло ԝе бьбахшанда ԝи?» Леколинәкә ӧса дькарә али мә, бькә кӧ әм фькьред хԝә рʹаст бькьн. Серида дьбәкә мәрʹа нәһеса бә бьбахшиньн ви кәси кӧ дьле мә ешандийә. Ле чьԛас әм хирәт бькьн ԝәки ви алида пешда һәрʹьн, ԝе мәрʹа дьһа һеса бә бьбахшиньнә мәрьва. w22.04 23 ¶6

Кʹьтеба Әʹйантида дәрһәԛа дьжмьнед Хԝәде бь зьманәки симболик те гьликьрьне. Әв кʹьтеб бәʹса чәнд щәʹнәԝьра дькә. Мәсәлә, щәʹнәԝьрәк кӧ «жь бәʹре дәрдькʹәт» у «һʹәфт сәред ԝи у дәһә стьруйед ԝи һәбун» (Әʹйанти 13:1). Паши ви щәʹнәԝьри, Йуһʹәннайе шанди дьвинә кӧ «щәʹнәԝьрәки дьн жь әʹрде дәрдькʹәт». Әв щәʹнәԝьр «мина зийе хәбәр дьда» у «һʹәта кӧ агьр жи жь әʹзмен» давит (Әʹйанти 13:11-13). Паше, дәрһәԛа «щәʹнәԝьрәки соре гәвәз» те готьне, сәр кʹижани ԛавәк сийар бьбу. Әв се щәʹнәԝьр дьжмьнед бәре йед Йаһоԝа Хԝәде у Пʹадшатийа ԝи нә. Ләма жи гәләк фәрз ә кӧ әм фәʹм бькьн, ԝәки әԝана бь рʹасти кʹи нә (Әʹйанти 17:1, 3). Гәрәке әм мәʹна ви зьмане симболик фәʹм бькьн. Бь рʹасти Кʹьтеба Пироз хԝәха ве йәке зәлал дькә. Гәләк симболед кӧ кʹьтеба Әʹйанти бәʹса ԝан дькә, кʹьтебед дьнда тенә зәлалкьрьне. w22.05 8-9 ¶3-4

Һәгәр әм ида кал у пир бунә йан жи сьһʹәт-ԛәԝата мә нә баш ә, дьбәкә әм ида нькарьн һаԛас хьзмәт кьн чьԛас дьле мә дьхԝазә. Һәгәр тӧ щарна сәва синоред хԝә дьлтәнг дьби, жь хԝә бьпьрсә: «Гәло хԝәстьна Йаһоԝа һьндава мьнда чь йә?» Әԝ тʹәне дьхԝазә кӧ тӧ чь жь дәсте тә те бьки. Ве мәсәле бьдә бәр чʹәʹве хԝә: Хушкәкә 80 сали хәмгин ә, чьмки әԝ нькарә мина бәре хьзмәт бькә. Әԝ чь жь дәсте ԝе те дькә, ле әԝ дьфькьрә кӧ әв йәк бона Йаһоԝа бәс нинә. Гәло бь рʹасти ӧса йә? Һәла бьфькьрә: Гава әԝ 40 сали бу, әԝе чьԛас дькарьбу һаԛас хьзмәт дькьр, у ньһа жи, әԝ чьԛас дькарә һаԛас хьзмәт дькә. Һәгәр әм чь жь дәсте мә те бькьн, Йаһоԝа ԝе мәрʹа бежә: «Әʹфәрьм!» (Бәрамбәр кә Мәтта 25:20-23). Дәԝса кӧ әм хәмгин бьн сәва тьштед кӧ ԛәԝата мә нагьһиже бькьн, гәрәке әм дина хԝә бьдьн ԝан тьшта, чь әм дькарьн бькьн. w22.04 10 ¶2; 11 ¶4-6

Кʹьтеба Әʹйанти сәре 21-да, 144 000 йед бьжарти бәрамбәри бажарәки гәләк бәдәԝ дькә, наве кʹижане «Оршәлима ну» йә. Әв бажар сәр 12 кәвьра һʹимгьрти йә, сәр кʹижана кӧ навед «донздәһ шандийед Бәрх ньвисар бун» (Әʹйанти 21:10-14; Әфәси 2:20). Тʹӧ бажарәки мина ви бажари тʹӧнә бу! Мәйдана бажер жь зерʹе хас бу у 12 дәргәһед ԝи жь дӧрʹ һатьбунә чекьрьне. Һʹимед сура бажер бь һәр щурʹә кәвьред хасә ԛимәт һатьбунә хәмьландьне (Әʹйанти 21:15-21). Ле тьштәк ле кем бу. Йуһʹәнна ӧса ньвиси: «Мьн бажерда пʹарьстгәһ нәдит, чьмки Хӧдан Хԝәдейе Һʹәму Зорайийе у Бәрх пʹарьстгәһа ԝи нә. Бажар нә һʹәԝще тәʹве у һиве бу кӧ рʹонайи бьдане, чьмки рʹумәта Хԝәде ԝи рʹонайи дькә у Бәрх чʹьра ԝи йә» (Әʹйанти 21:22, 23). Йед кӧ пʹара Оршәлима ну нә, ԝе тʹәви Йаһоԝа бьн (Ибрани 7:27; Әʹйанти 22:3, 4). w22.05 17-18 ¶14-15

Хенщи ве йәке кӧ Йаһоԝа Әʹфьрандар, Ԛанундар у Һʹакьме мә йә, әԝ ӧса жи Баве мәйи дьлован ә (Зәбур 100:3; Ишайа 33:22). Гава әм гӧнә дькьн, ле жь дьл тʹобә дькьн, әԝ һьм дькарә һьм жи дьхԝазә бьбахшиньнә мә (Зәбур 86:5). Бь сайа Ишайа пʹехәмбәр, Йаһоԝа бь дьлгәрми ӧса готийә: «Һәгәр сущед ԝә мина ԛьрʹмьз [соре гәвәз] бьн жи ԝе мина бәрфе сьпи бьбьн» (Ишайа 1:18). Әм гьшк ԛьсурдар ьн, ләма жи әм дьле мәрьва щарна бь готьн у кьред хԝә дешиньн (Аԛуб 3:2). Диса жи, һәгәр әм һин бьн ԝәки бьбахшиньнә һәв, әм дькарьн тʹәви мәрьва әʹдьлайеда бьн (Мәтʹәлок 17:9; 19:11; Мәтта 18:21, 22). Гава әм дьле һәвдӧ бь шашийед бьчʹук дешиньн, Йаһоԝа дьхԝазә кӧ әм бьбахшиньнә һәв. Һәгәр Йаһоԝа мә «бь зедәбари» дьбахшинә, гәло нә лазьм ә ԝәки әм жи бьбахшиньнә һәв? (Ишайа 55:7, ИМ). w22.06 8 ¶1-2

Рʹаст ә гәрәке әм хԝә бәрамбәри кәсед дьн нәкьн, ле әм һьлбәт дькарьн жь мәсәла кәсед амьн һин бьн. Бәʹса хәбәре, әм дькарьн жь мәсәла Иса һин бьн. Әм беԛьсур ниньн, ле әм дькарьн жь һʹӧнӧред ԝийә баш у кьред ԝи дәрса һин бьн (1 Пәтрус 2:21). Һәгәр әм чь жь дәсте мә те бькьн кӧ чʹәʹв бьдьнә ԝи, әме бькарьбьн бь щурʹәки дьһа баш Йаһоԝарʹа хьзмәт бькьн. Кʹьтеба Пироз бәʹса гәләк кәсед амьн дькә, йед кӧ рʹаст ә гӧнәкʹар бун, ле мәрʹа бунә мәсәлед баш. Мәсәлә, Йаһоԝа Даԝьд ԝәк «мәрик дьле хԝәрʹа дит» (Кʹаред Шандийа 13:22). Рʹаст ә Даԝьд һьнә гӧнед гьран кьрьбу, ле диса жи әԝ гәләк алийава мәрʹа мәсәләки баш ә. Гәло чьрʹа? Чьмки әԝ һазьр бу ширәта ԛәбул кә, у сәва гӧнед хԝә жь дьл пʹошман дьбу, ләма жи Йаһоԝа дьбахшандә ԝи (Зәбур 51:3, 4, 10-12). w22.04 13 ¶11-12

Йаһоԝа хԝәстьна жийина һәр-һәйи кьрийә дьле мә (Ԝаиз 3:11). Ләма жи гава әм йан жи мәрьвәки мәйи һʹьзкьри гьран нәхԝәш дькʹәвә, әм дьтьрсьн, чьмки тʹӧ кәс жь мә нахԝазә бьмьрә. Ләма Кʹьтеба Пироз мьрьне ча «дьжмьн» нав дькә (1 Корьнтʹи 15:25, 26). Тьрса мьрьне дькарә али мә бькә кӧ әм жийина хԝә у жийина мәрьвед хԝәйи дәлал бьпарезьн. Мәсәлә, әм нахԝазьн жийина хԝә бькьнә бьн хофе, ләма әм хԝарьнед керһати дьхԝьн у спортева мьжул дьбьн, ԝәки сьһʹәт-ԛәԝата мә баш бә. Гава лазьм ә, әм дьчьн бал дохдьр, әм дәрмана дьхԝьн у әм жийина хԝә бадиһәԝа накьнә бьн хофе. Мире-щьна занә кӧ әм жийина хԝә ԛимәт дькьн у нахԝазьн бьмьрьн. Әԝ дьфькьрә ԝәки әм һазьр ьн һәр тьшти, һәла һе достийа хԝә тʹәви Йаһоԝа жи ӧнда кьн, тʹәне кӧ сах бьминьн (Ибо 2:5). Ле әв йәк ӧса нинә! Йәкә Мире-щьна, «йе кӧ һʹӧкӧме ԝи сәр мьрьне һәйә», һәр тьшти дькә ԝәки мә бьтьрсинә, сәва кӧ әм пьшта хԝә бьдьнә Йаһоԝа (Ибрани 2:14, 15). w22.06 18 ¶15-16

Ԝәʹде ԛәдәхәкьрьна, дьбәкә әм тʹәне бь кʹомед бьчʹук тʹәвайи тʹоп бьн. Ләма жи гәләк фәрз ә, ԝәки ида ньһада әʹдьлайе ортʹа һәвда хԝәй кьн. Гәрәке әм нә кӧ мьԛабьли хушк-бьра, ле мьԛабьли Мире-щьна шәрʹ бькьн. Ԝе баш бә, кӧ әм дина хԝә нәдьн сәр шаши у ԛьсуред хушк-бьра, у проблема нав һәвда зу-зу сафи кьн (Мәтʹәлок 19:11). Ԝәрә әм бь дьл у щан али һәвдӧ бькьн (Тито 3:14). Кʹомәка кӧ хушк-бьра данә хушкәке, йа кӧ һʹәԝще аликʹарийе бу, сәр тʹәмамийа кʹома хьзмәтийе баш һʹӧкӧм кьр. Әԝана һʹәму ча малбәтәк незики һәв бун (Зәбур 133:1). Бь һʹәзара хушк-бьред мә, нава ԛәдәхәкьрьнед ԝәлатда жи Йаһоԝарʹа хьзмәт дькьн. Һьнәк жь ԝан, жь бо баԝәрийа хԝә кʹәтьнә кәле. Әм дькарьн бона ԝан у малбәтед ԝан дӧа бькьн. Ӧса жи, әм дькарьн бона ԝан дӧа бькьн, йед кӧ аликʹарийа рʹӧһʹани, физики у ԛануни дьдьн хушк-бьра у һазьр ьн бона ԝана азайа хԝә жи ӧнда кьн (Колоси 4:3, 18). Тʹӧ щар бир нәкә, кӧ дӧайед тә дькарьн али ван хушк-бьра бькьн! (2 Тʹесалоники 3:1, 2; 1 Тимотʹейо 2:1, 2) w22.12 26-27 ¶15-16

Зарʹ тʹьме чʹәʹв дьдьнә де-бавед хԝә. Һәмьки де у бавед беԛьсур тʹӧнә нә (Рʹомайи 3:23). Диса жи, ԝе баш бә кӧ де у бав чь жь дәсте ԝан те бькьн, ԝәки зарʹед хԝәрʹа бьбьн мәсәла баш. Бавәк ӧса дьбежә: «Зарʹ мина пәмбу һәр тьшти дькʹьшиньн хԝә. Һәгәр әм ван тьшта нәкьн чь кӧ әм ԝана һин дькьн, әԝана ве йәке ԝе дәрберʹа бьдьн рʹуйе мә». Ләма жи, һәгәр әм дьхԝазьн кӧ зарʹед мә Йаһоԝа һʹьз бькьн, гәрәке әм хԝәха жи Йаһоԝа ԛайим һʹьз бькьн, у ве йәкеда зарʹед хԝәрʹа бьбьнә мәсәлә. Де-бав дькарьн бь щурʹә-щурʹә метода зарʹед хԝә һин кьн, ԝәки әԝана Йаһоԝа һʹьз бькьн. Бьраки 17 сали бь наве Ендру, ӧса дьбежә: «Де-баве мә һәртʹьм әм һин дькьрьн кӧ дӧа чьԛас фәрз ә. Һәр евар, һәгәр мьн хԝәха ида дӧа кьрьбу жи, баве мьн диса тʹәви мьн дӧа дькьр. Ньһа әз аза Йаһоԝарʹа дӧа дькьм у ԝи ча Бавәки дьлован һʹәсаб дькьм». Де-бавно, бир нәкьн ԝәки һʹьзкьрьна ԝә һьндава Йаһоԝа, дькарә зарʹед ԝә жи һелан кә ԝи һʹьз бькьн. w22.05 28 ¶7-8

Сәва кӧ әм бона ньхӧмандьне һазьр бьн, бәри пешьн чь кӧ әм гәрәке бькьн әԝ ә, ԝәки әм гӧнед хԝә тʹобә кьн (Кʹаред Шандийа 2:37, 38). Тʹобәкьрьна жь дьл кьред мәда те кʹьфше. Гәло тә тʹәрка хәйсәтед хьраб дайә, йед кӧ Йаһоԝа нәфрʹәт дькә? Мәсәлә, йед ӧса ча бенамуси, кʹьшандьна щьхаре у хәбьтандьна гьлийед хьраб (1 Корьнтʹи 6:9, 10; 2 Корьнтʹи 7:1; Әфәси 4:29). Һәр тьшти бькә, ԝәки тӧ бей гӧһастьне. Жь ԝи кәси, кʹе кӧ тʹәви тә һинбуна Кʹьтеба Пироз дәрбаз дькә, йан жи жь рʹуспийа, ширәт у аликʹарийе бьхԝазә. Кәсед щаһьл дькарьн аликʹарийе жь де-бавед хԝә бьхԝазьн, ԝәки бькарьбьн тʹәрка хәйсәтед хьраб бьдьн, кʹижан кӧ рʹийа ԝан дьгьрьн, ԝәки бенә ньхӧмандьне. Гәләк фәрз ә ԝәки тʹьме нава шьхӧлед рʹӧһʹанида бьн. Мәсәлә һәрʹьнә щьвата у щьватада кʹар бькьн (Ибрани 10:24, 25). У гава тӧ ида дәстпеки тʹәви щьвате хьзмәт ки, ве йәкеда хирәт бә. w23.03 10-11 ¶14-16

Дәстпебун 3:14, 15 гьли дькә дәрһәԛа «мәʹр» у «зӧрʹәта» мәʹр. Те кʹьфше кӧ әв рʹез бәʹса мәʹрәки реали накә, чьмки һʹәйԝан ԝе нькарьбуйа готьнед Йаһоԝа Хԝәде фәʹм кьра. Ләма жи әшкәрә йә, кӧ Йаһоԝа фәрмана хԝә дабу әʹфринәки хԝәйифәʹм. Гәло әв әʹфрин кʹи йә? Әʹйанти 12:9 рʹастә-рʹаст дьбежә, кӧ әв «мәʹре бәре», Мире-щьна йә. Кәсед кӧ чʹәʹв дьдьнә ньһерʹандьн у рʹабун-рʹуньштьна кәсәки, Кʹьтеба Пироз ԝана бь симболик ча «зӧрʹәта» ԝи нав дькә. Ләма жи һʹәму мәләк у мәрьв, йед кӧ дьжмьнед Хԝәде у хьзмәткʹаред ԝи нә, пʹара зӧрʹәта мәʹр ьн. Мәсәлә, һьм мәләк, йед кӧ рʹожед Нӧһда кʹьфшкьрьна хԝә һиштьн у дакʹәтьн сәр әʹрде, һьм жи мәрьвед кӧ чʹәʹв дьдьнә баве хԝә, Мире-щьна, зӧрʹәта мәʹр ьн (Дәстпебун 6:1, 2; Йуһʹәнна 8:44; 1 Йуһʹәнна 5:19; Щьһуда 6). w22.07 14-15 ¶4-5

Паԝлосе Шанди хушк-бьра гәләк һʹьз дькьр. Әԝ жи рʹасти гәләк тәнгасийа һатьбу, ләма жи әԝи һʹале ԝан рʹьнд фәʹм дькьр. Щарәке, пʹәре Паԝлос нәмабу у лазьм бу кӧ әԝи хԝәрʹа хәбатәк бьдита, ԝәки әʹбура хԝә у һәвалед хԝә бькьра (Кʹаред Шандийа 20:34). Ләма жи, гава Паԝлос гьһиштә бажаре Корьнтʹе, әԝи серида тʹәви Әкила у Прьскилайе кон чедькьрьн, ԝәки әʹбура хԝә бькьн. Диса жи, әԝи һʹәму «рʹожед шәмийа» мьзгини дьда Щьһу у Йунанийа. Паше, гава Силас у Тимотʹейо жи һатьн ԝедәре, «Паԝлос бь хирәт тʹәмамийа ԝәхте хԝә да һинкьрьна хәбәре» (Кʹаред Шандийа 18:2-5). Бәле, Паԝлосе шанди жийина хԝәда йа һәри пешьн дина хԝә дьда хьзмәтийа Йаһоԝа. Әԝ йәки хирәт у хәбатһʹьз бу, ләма жи әԝи дькарьбу бь исафа тʹәмьз хушк-бьра һелан кә. Әԝи ԝанрʹа гот, ԝәки изьне нәдьн кӧ чәтьнайед жийине у һʹәԝщед малбәте бьбьн сәбәб, ԝәки әԝана «кʹижан һәрә ԛәнщ ә», демәк хьзмәтийа Йаһоԝа, пьшт гӧһе хԝәва бавежьн. w22.08 20 ¶3

Хԝәстьна Хԝәдайе мә әв ә, ԝәки мьзгинийа Пʹадшатийе сәр тʹәмамийа дьнйайе бе бәлакьрьне (1 Тимотʹейо 2:3, 4). Әв йәк шьхӧле Йаһоԝа йә у әԝи щабдарийа ви шьхӧли дайә дәсте Кӧрʹе хԝәйи дәлал. Әм дькарьн баԝәр бьн, кӧ бьн рʹебәрийа Исайә баш, шьхӧле бәлакьрьна мьзгинийе ԝе пешийа хьлазийа ве дьнйа зӧльм, бе сәкьнандьне (Мәтта 24:14). Ле әм жь кʹӧ заньн кӧ Иса рʹебәрийа шьхӧле бәлакьрьна мьзгинийе дькә? Ԝәхтәкә кьн пешийа кӧ Иса чу әʹзмана, әԝ сәр чʹийаки Щәлиле рʹасти чәнд шагьртед хԝә һат. Әԝи ԝанрʹа гот: «Һʹәму һʹӧкӧме әʹрд у әʹзмен мьнрʹа һатә дайине». Дина хԝә бьдьн паши ве йәке әԝи чь гот: «Ньһа һәрʹьн һʹәму мьләта һин кьн» (Мәтта 28:18, 19). Жь ван рʹеза әм зәлал фәʹм дькьн, кӧ Исарʹа һʹӧкӧм һатийә дайине, ԝәки рʹебәрийа шьхӧле бәлакьрьна мьзгинийе бькә. Бәле, дина Иса һʹәта рʹожа иро сәр шьхӧле бәлакьрьна мьзгинийе йә. w22.07 8 ¶1, 3; 9 ¶4

Кәсед һәԛ, йед кӧ пешийа мьрьна хԝә ԛәнщи кьрьбун, ԝе «бона жийине» рʹабьн, чьмки навед ԝан кʹьтеба жийинеда ньвиси нә. Демәк, рʹабуна ԝан «йед кӧ ԛәнщи кьрьнә», жь Йуһʹәнна 5:29, у рʹабуна «йед һәԛ», жь Кʹаред Шандийа 24:15, йәк ә. Әв шьровәкьрьн бь ван готьнед жь Рʹомайи 6:7 гьредайи йә: «Әԝе кӧ мьрийә, әԝ жь гӧнә азабуйи йә». Гава кәсед һәԛ дьмьрьн, гӧнед ԝан тенә паԛьжкьрьне, ле кьред ԝанә амьн найенә биркьрьне (Ибрани 6:10). Паши рʹабуна жь мьрьне жи һәмьки ԝе лазьм бә ԝәки әԝана амьн бьминьн, сәва кӧ навед ԝан жь кʹьтеба жийине нәйенә паԛьжкьрьне. w22.09 18 ¶13, 15

Данийел пʹехәмбәр мәрьвәки бь итʹбар бу. Гава әԝ дилтийа Бабилонеда бу, гәләк ԝәхт дәрбаз нәбу кӧ кәсед дьн фәʹм кьрьн, ԝәки әԝ йәки чьԛас ширһʹәлал у бь итʹбар ә. Гава әԝи пе аликʹарийа Йаһоԝа хәԝна Нәбукәднәсәр шьровәкьр, әԝ дьһа зедә бу йәки нав у дәнг (Данийел 4:20-22, 25). Гәләк сал шунда, гава Бабилонеда сәр диԝарәки ԛәсьре ньвисарәкә әʹщеб һатә кʹьфше, Данийел мәʹна ве ньвисаре әшкәрә зәлал кьр у бь ви щурʹәйи избат кьр, ԝәки әԝ йәки бь итʹбар ә (Данийел 5:5, 25-29). Ԝәхт шунда, Дарйус Мәди у бәрдәстийед ԝи жи дитьн, ԝәки Данийел мәрьвәки чьԛас ширһʹәлал у бь итʹбар ә. Бь дитьна ԝан, Данийел мәрьвәки «дьлсоз бу, нә шашитийа ԝи у нә жи суще ԝи һәбу» (Данийел 6:3, 4, ИМ). Әм гәрәке жь хԝә бьпьрсьн: «Гәло мьн нас дькьн ча мәрьвәки бь итʹбар?» Әм пәсьне наве Йаһоԝа дьдьн, гава әм мәрьвнә бь итʹбар ьн. w22.09 8-9 ¶2-4

Принсип у нормед Йаһоԝа тʹьме мәрʹа кʹаре тиньн. Гәло чьрʹа? Ве мәсәле бьдә бәр чʹәʹве хԝә: һәрге һәр банкәке хԝәха сафи кьра кӧ ԛимәта доларәке чьԛас ә, йан һәрге һәр фирмәкә авакьрьне хԝәха сафи кә кӧ дьрежайа метрәке чьԛас ә, хаосәкә мәзьн ԝе һәбуйа, ӧса нинә? Йан жи, һәрге һʹәким гӧрʹа ԛәйда нәкьрана, гәләк кәсед нәхԝәш ԝе жийина хԝә ӧнда кьрана. Бәле, нормед бь итʹбар мә дьпарезьн. Мина ве йәке, нормед Йаһоԝа у принсипед ԝи жи мә дьпарезьн. Йаһоԝа кәсед кӧ хирәт дькьн ԝәки ль гора принсипед ԝи бьжин, кʹәрәм дькә. Әԝ соз дьдә: «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29). Ԝе дәме, әʹдьлайи у йәкти ԝе һәбә, у һәр кәс ԝе ша бә. Йаһоԝа ԝе һәма жийинәкә ӧса бьдә мә. Бәле, гәләк сәбәб һәнә кӧ әм рʹастийе һʹьз бькьн! w22.08 27-28 ¶6-8

Гава әм рʹасти тәнгасийа тен, амьнийа мә һьндава Йаһоԝа у тʹәшкиләта ԝи дькарә бе щерʹьбандьне. Гәло әм ча дькарьн ван чәтьнайада сәркʹәвьн? Әм гәрәке сәрхԝә бьминьн, һʹьшйар бьминьн у баԝәрийеда ԛәԝи бьн. Сәрхԝә бьминьн әԝ те һʹәсабе, кӧ гәрәке әм рʹьһʹәт бьминьн, сәрԝахт бьн у хирәт бькьн, ԝәки сәр чәтьнайа пе чʹәʹве Йаһоԝа бьньһерʹьн. Һәрге әм ӧса бькьн, һәстед мә ԝе фькьред мә контрол нәкьн. Дьбәкә әм дьфькьрьн кӧ хушк йан бьраки нәһәԛи ль мә кьрийә, дьбәкә әԝ бьраки щабдар ә. Дьԛәԝьмә әԝи нәдьхԝаст дьле тә бешинә (Рʹомайи 3:23; Аԛуб 3:2). Диса жи, дьбәкә кьред ԝи тӧ әʹщьз кьри. Гәло тӧ ԛә ӧса фькьри йи: «Һәрге бьред щабдар ӧса дькьн, гәло әв тʹәшкиләт бь рʹасти тʹәшкиләта Хԝәде йә?» Мире-щьна дьхԝазә кӧ әм ӧса бьфькьрьн! (2 Корьнтʹи 2:11) Шькед ӧса дькарьн бьбьнә сәбәб, ԝәки әм жь Йаһоԝа у жь тʹәшкиләта ԝи дур кʹәвьн. Ләма жи әм гәрәке фәсал бьн, ԝәки нәбьнә мәрьвнә һерс. w22.11 20 ¶1, 3; 21 ¶4

Йаһоԝа һевийа жийина һәрһәйи дайә мә. Һьнә кәс һивийа жийина сәр әʹзмана нә. Ԝедәре, әԝана ԝе мина рʹӧһʹед нәмьри һʹәта-һʹәтайе бьжин (1 Корьнтʹи 15:50, 53). Ле һʹәчʹи зәʹф мәрьв һивийа жийина һʹәта-һʹәтайе йа сәр әʹрде нә, кʹидәре кӧ әԝана ԝе сьһʹәт-ԛәԝат у бәхтәԝар бьн (Әʹйанти 21:3, 4). Һәрдӧ һеви жи гәләк ԛимәт ьн. Гӧмана мә һьндава ахьрийа баш ԝе әʹсәйи бе сери, чьмки әԝ йәк жь Йаһоԝа йә (Рʹомайи 15:13). Әм заньн кӧ әԝи чь соз дайә, у әԝ созе хԝә һәртʹьм тинә сери (Жьмар 23:19). Әм баԝәр ьн ԝәки Йаһоԝа һьм дьхԝазә, һьм жи дькарә һәр тьште кӧ әԝи готийә, бинә сери. Баве мәйи әʹзмана мә һʹьз дькә, у әԝ дьхԝазә кӧ әм итʹбарийа хԝә ԝи биньн. Бь сайа һевийа ԛәԝи, әм дькарьн нава тәнгасийада Йаһоԝарʹа амьн бьминьн, у ӧса жи мерхаси у шабуна хԝә ӧнда нәкьн. w22.10 24 ¶1-3

Щьмәʹте гӧһ нәдьда Йаһоԝа, ләма жи Ишайа пʹехәмбәрти кьрьбу, ԝәки Йаһоԝа ԝе бьһелә кӧ әԝана бькʹәвьнә тәнгасийе (Ишайа 30:5, 17; Йерәмйа 25:8-11). У ӧса жи ԛәԝьми, Бабилонийа әԝ бьрьнә дилтийе. Ле нав ԝанда һьнә кәсед амьн жи һәбун, у Ишайа ԝанрʹа готьбу кӧ рʹожәке, әԝе вәгәрʹьн ԝәлате хԝә (Ишайа 30:18, 19). Йаһоԝа созе хԝә ани сери, у ԝана жь дилтийе аза кьр. Диса жи, һʹәта ԝе рʹоже гәләк сал дәрбаз бу. Әԝ гьли «Хӧдан дьсәкьнә кӧ кʹәрәма хԝә нишани ԝә бьдә», нишани кәсед амьн дькьр, ԝәки һьнә ԝәхт ԝе дәрбаз бә, һʹәта кӧ әԝана бенә хьлазкьрьне. Ләма жи 70 сал дәрбаз бу, пешийа кӧ Исраели жь дилтийа Бабилоне һатьнә азакьрьне у һьнә жь ԝан вәгәрʹийан бажаре Оршәлиме (Ишайа 10:21; Йерәмйа 29:10). Гава әԝана гьһиштьн ԝәлате хԝә, һесьред дьлтәнгийе сәр һесьред шабуне һатьнә гӧһастьне. w22.11 9 ¶4

Иро һьнә ԝәлатада хушк-бьред мә, мина Мәсиһийед ԛьрʹна йәкеда рʹасти пәйкʹәтьна тен, чьмки ԝана жи мьзгинийа дәрһәԛа Иса бәла дькьр. Һʹакьмед диԝана бьльнд йа Щьһуйа чәнд щара «тʹәми данә ԝан, кӧ тʹӧ щар бь наве Иса хәбәр нәдьн» (Кʹаред Шандийа 4:18-20; 5:27, 28, 40). Ԝана заньбу кӧ йе һәри Бьльнд тʹәми дабу ԝан, ԝәки әԝана мьзгинийе бәла кьн у дәрһәԛа Мәсиһ шәʹдәтийе бьдьн (Кʹаред Шандийа 10:42). Ләма жи, Пәтрус у Йуһʹәнна бь мерхаси готьн, кӧ гәрәке әԝана дьһа гӧрʹа Хԝәде бькьн нә кӧ гӧрʹа һʹакьма, у ԝана әшкәрә кьр, ԝәки ԝе тʹәрка бәлакьрьна мьзгинийа дәрһәԛа Иса Мәсиһ нәдьн (Кʹаред Шандийа 5:29). Паши кӧ шанди һатьн ледане, әԝана жь диԝана бьльнд йа Щьһуйа дәркʹәтьн, у «ша дьбун кӧ бона наве Иса һежайи рʹәзилкьрьне бунә» у диса бәрдәԝам кьрьн хьзмәт кьн (Кʹаред Шандийа 5:41, 42). w22.10 12-13 ¶2-4

Гава мә дәстпекьр Йаһоԝа нас бькьн, әм рʹастийед сәрәкә һин бун. Паԝлосе шанди нәʹма хԝәйә Ибранийарʹа, гот кӧ һинкьрьнед сәрәкә әв һәнә «дәрсед пешьнә садә». Әԝи нәдьхԝәст бьгота кӧ рʹастийед сәрәкә беԛимәт ьн. Әԝи әв рʹасти бәрамбәри шире дайике кьр, кӧ бона зарʹоке гәләк фәрз ә (Ибрани 5:12; 6:1). Ле ӧса жи, әԝи Мәсиһийарʹа гот, кӧ әԝана гәрәке һьм рʹастийед сәрәкә һьм жи рʹастийед кʹур бьзаньбьн. Гәло тӧ дьхԝази рʹастийед кʹур һин бьби? Гәло тӧ дьхԝази дәрһәԛа Йаһоԝа у ԛьрара ԝи дьһа зедә пебьһʹәси? Гәләк мәрьварʹа чәтьн ә леколина бькьн. Ле тӧйе чь бежи? Гәло тӧ мәкʹтәбеда һин буйи, кӧ баш бьхуни у һин би? Гәло һʹәԝаса тә сәр хԝәндьн у леколине һәбу? Йан тӧ дьшьрмиш дьбуйи, кӧ бал тә найе стандьне кʹьтеба леколин ки? Һәрге ӧса нә, дьлтәнг нәбә, чьмки гәләк мәрьв ӧса ньн. Ле Йаһоԝа дькарә али тә бькә. Әԝ Мамостәйе һәри баш у беԛьсур ә. w23.03 9-10 ¶8-10

Һәрге әм мьлук бьн, әме бьһельн кӧ Хәбәра Хԝәде дьле мәда кʹок бәрʹдә. Тʹәне мәрьвед бь нетед ԛәнщ у мьлук дьһельн, ԝәки Хәбәра Хԝәде сәр һʹьш у дьле ԝан һʹӧкӧм бькә у ԝана бькә мәрьвнә дьлрʹәʹм, дьлшәԝат у бь һʹьзкьрьн. Мәрьве кӧ һьндава кәсед дьнда ԛәнщ ә, нишан дькә, кӧ Хәбәра Хԝәде сәр һʹьш у дьле ԝи һʹӧкӧм дькә. Ферьсийа нәдьһишт ԝәки Хәбәра Хԝәде бьгьһижә дьле ԝан, ләма жи ԝана «йед бесущ гӧнәкʹар» дькьр (Мәтта 12:7). Бәле, һәрге әм бь готьн у кьред хԝә һьндава мәрьвада ԛәнщ бьн, әме әʹйан кьн ԝәки Кʹьтеба Пироз кʹәтийә һʹьш у дьле мә. Гәло әм дәрһәԛа мәрьва тьштед ԛәнщ дьбежьн, йан әм дәрһәԛа ԛьсуред ԝан хәбәр дьдьн? Гәло әм дьлрʹәʹм ьн у һазьр ьн бьбахшиньнә мәрьва, йан әм нетед ԝан дькьнә бьн шьке у хәйдок ьн? Бь аликʹарийа ван пьрса, әм дькарьн фәʹм бькьн, һәла Хәбәра Хԝәде сәр һәст, фькьр у кьред мә һʹӧкӧм дькә йан на (1 Тимотʹейо 4:12, 15; Ибрани 4:12). w23.02 12 ¶13-14

Дина хԝә бьдьн мәсәла Усьве Аримәтйайи. Әԝ нав щьмәʹта хԝәда йәки хԝәйиԛәдьр бу. Әԝ әндәмәки Щьвина Гьрәгьра бу, демәк әндәме диԝана һәри бьльнд йа Щьһуйа. Гава Иса сәр әʹрде бу, сьстбуна Усьв әԝ бу кӧ әԝ мәрьва дьтьрсийа. Чаԝа кӧ Йуһʹәнна дәрһәԛа ԝи готьбу, әԝ «шагьрте Иса бу, ле жь тьрса щьһуйа хԝә әʹйан нәдькьр» (Йуһʹәнна 19:38). Усьв чьԛас жи дьхԝәст мьзгинийа Пʹадшатийе нас бькә жи, әԝи баԝәрийа хԝә һьндава Иса бәр кәсед дьн әшкәрә нәдькьр. Бешьк, Усьв дьтьрсийа кӧ ԛәдьре хԝә нав мьләте хԝәда ӧнда кә. Ле чаԝа Кʹьтеба Пироз дьбежә, Усьв паши мьрьна Иса Мәсиһ «тӧрӧш кьр, чу щәм Пилато, щьнйазе Иса же хԝәст» (Маркос 15:42, 43). Һьнгева, Усьв вәнәдьшарт кӧ әԝ шагьртәки Иса Мәсиһ йә. Гәло тӧ жи мина Усьв щарна мәрьвед дәр-дора хԝә дьтьрси? w23.01 30 ¶13-14

Жьн-пʹадша Шәбайе дәрһәԛа хԝәши у сьламәтийа Исраелийед бьн сәрԝертийа Сьлеман Пʹадшада, бьһист. Ләма жи, әԝ жь ԝәлате хԝә һʹәта Оршәлиме һат, кӧ һʹале ԝедәре пе чʹәʹве хԝә бьвинә (1 Пʹадшати 10:1). Паши кӧ әԝе пʹадшатийа Сьлеман дит, әԝе гьлийед кӧ жоре ньвисинә гот. Ле сәрԝертийа Сьлеман Пʹадша тʹәне сийа ве йәке бу, кӧ бьн сәрԝертийа Иса Мәсиһда, Йаһоԝа ԝе чь кʹәрәма сәр инсанәтеда бьбаринә. Иса һʹәму алийава Сьлеман Пʹадша мәзьнтьр ә. Сьлеман мерәки ԛьсурдар бу. Жь бо һьнә шашийед ԝийә мәзьн, щьмәʹт ԝәхт шунда кʹәтә тәнгасийе. Ле Иса Сәрԝерәки беԛьсур ә, йе кӧ ԛә шашийа накә (Луԛа 1:32; Ибрани 4:14, 15). Иса избат кьрийә, кӧ әԝе тʹӧ щар гӧнә нәкә у тʹӧ щара зьраре нәдә кәсед кӧ бьн сәрԝертийа ԝида ньн. Ԛәдьрәки чьԛас мәзьн ә, кӧ әԝ Пʹадше мә йә! w22.12 11 ¶9-10

Һәрге щийе кӧ әм дьжин нәхԝәшик бәла бьбә, әм гәрәке чь бькьн? Әм гәрәке гӧһ бьдьн тʹәмийед дәрһәԛа шуштьна дәста, хԝәйкьрьна дистансийайе, хәбьтандьна маске у карантине. Һәрге әм ван тьшта бькьн, әме нишан бькьн ԝәки әм жийина кӧ Хԝәде дайә мә, гәләк ԛимәт дькьн. Ԝәʹде тʹәшԛәла, щарна әм жь һәвалед хԝә, щинаред хԝә йан жи жь нуча хәбәред нәрʹаст дьбьһен. Дәԝса кӧ әм «һәр готьне» баԝәр бькьн, дьһа баш ә әм гӧһ бьдьн готьнед дәԝләте у дохдьра, йед кӧ бь итʹбар ьн (Мәтʹәлок 14:15). Кʹома Рʹебәрийе у Бәйтʹәл пешийа кӧ дәрһәԛа щьвина у хьзмәткьрьне рʹебәрийе бьдьн, әԝана һәр тьшти дькьн, ԝәки информасийа рʹаст дәст хьн. Һәрге әм гӧһ бьдьн рʹебәрийе, әме сах-сьламәтийа хԝә у йа кәсед дьн жи бьпʹарезьн. Ӧса жи әме ча Шәʹдед Йаһоԝа бәр чʹәʹве хәлԛе навәки баш ԛазанщ кьн (1 Пәтрус 2:12). w23.02 23 ¶11-12

Гава Исраели дәрбази Әʹрде Создайи бун, әԝана щурʹә-щурʹә һәремада щиԝар бун. Исраелийед кӧ дури һәв дьжитьн, дькарьбун һеса һәвдӧ бир кьрана у һаш жь һәвдӧ тʹӧнә буна. Ле Йаһоԝа дьхԝәст, ԝәки Исраели ԝәʹде щәжьна тʹәвайи тʹоп бьн, сәва кӧ Хәбәра ԝи ԝанрʹа бе хԝәндьне у шьровәкьрьне (Ԛануна Дӧщари 31:10-12; Нәһәмийа 8:2, 8, 18). Бьдә бәр чʹәʹве хԝә, кӧ дьле Исраелики чьԛас ша дьбу, гава кӧ әԝ дьһатә Оршәлиме у дьдит кӧ бь милйона хьзмәткʹаред Хԝәде, жь тʹәмамийа ԝәлет һатьнә у ль һәв щьвийан ә! Бь ви щурʹәйи, Йаһоԝа али хьзмәткʹаред хԝә дькьр, кӧ әԝана тʹьфаԛ у йәктийеда бьминьн. Паше, гава щьвата Мәсиһити һатә сазкьрьне, нав ԝанда гәләк мәрьвед жь мьләтед дьн һәбун. Һьнәк жь ԝан кʹәсиб, һьнәк дәԝләти у һьнәк жи мәрьвед нав-дәнг бун. Ле ԝана йәктийеда Хԝәдейе рʹаст дьһʹәбанд. Кәсед кӧ тʹәзә һатьбун нава рʹастийе, дькарьбун бь аликʹарийа хушк-бьред дьн у бь аликʹарийа щьвина, Хәбәра Хԝәде дьһа баш фәʹм кьрана (Кʹаред Шандийа 2:42; 8:30, 31). w23.02 3 ¶7

Йаһоԝа соз дайә кӧ әԝе «жийина һʹәта-һʹәтайе» бьдә кәсед, кӧ гӧһ дьдьнә ԝи (Рʹомайи 6:23). Гава әм сәр ви созе Хԝәде дьфькьрьн, гәло әв йәк али мә накә кӧ әм ԝи һе зедә һʹьз бькьн? Бәле, Баве мәйи әʹзмана достед хԝә ӧса һʹьз дькә, кӧ дьхԝазә ԝәки әԝана һәр у һәр бьжин. Бь сайа созе жийина һʹәта-һʹәтайе, әм дькарьн нава чәтьнайед иройинда ԛәԝи бьсәкьньн. Һәрге дьжмьнед мә бежьн кӧ ԝе мә бькӧжьн, диса жи әме Йаһоԝарʹа амьн бьминьн, чьмки әм заньн кӧ әԝе мә жь мьрьне рʹакә у жийина һәр-һәйи бьдә мә (Йуһʹәнна 5:28, 29; 1 Корьнтʹи 15:55-58; Ибрани 2:15). Әм заньн кӧ Йаһоԝа дькарә жийина һʹәта-һʹәтайе бьдә мә, чьмки әԝ Канийа жийине йә у әԝ хԝәха һәр у һәр дьжи (Зәбур 36:9). Кʹьтеба Пирозда те готьне кӧ Йаһоԝа тʹьме һәбуйә у ԝе тʹьме һәбә (Зәбур 90:2; 102:12, 24, 27). w22.12 2 ¶1-3

Гава хьзмәткʹаред Йаһоԝа рʹасти тәнгасийа тен, әԝана әʹщебмайи наминьн, чьмки Кʹьтеба Пироз ӧса дьбежә: «Гәрәке әм бь гәләк щәфакʹьшандьне бькʹәвьнә Пʹадшатийа Хԝәде» (Кʹаред Шандийа 14:22). Ӧса жи әм заньн ԝәки һьнә чәтьнайед мә ԝе бь тʹәмами сафи нәбьн, һʹәта дьнйа тʹәзә нәйе, кʹидәре «иди мьрьне тʹӧнәбә, нә шин, нә гьри, нә еш-ешук» (Әʹйанти 21:4). Йаһоԝа мә жь һʹәму тәнгасийа хԝәй накә, ле әԝ али мә дькә ԝәки әм сәбьр кьн. Дина хԝә бьдьне, кӧ Паԝлосе шанди Рʹомайарʹа чь готьбу. Пешийа ве йәке, әԝи бәʹса чәнд тәнгасийа кьр, кʹижан кӧ рʹасти ԝи у хушк-бьред дьн дьһатьн. Паше әԝи ньвиси: «Әм нава ван һʹәму тьштада һе зедә сәрдькʹәвьн, бь сайа әԝи кӧ әм һʹьз кьрьн» (Рʹомайи 8:36, 37). Демәк, гава тәнгасикә тә хьлаз набә, Йаһоԝа дькарә али тә бькә ԝәки нава ве тәнгасийеда сәркʹәви. w23.01 14 ¶1-2