Кануна Пешьн

Гәло мәрьве Әтйопи һазьр бу кӧ бе ньхӧмандьне? Дина хԝә бьдьне әԝ «бона һʹәбандьне һатьбу Оршәлиме» (Кʹаред Шандийа 8:27). Ӧса дьһатә кʹьфше, кӧ әԝи дине Щьһуйа ԛәбул кьрьбу. Бешьк, әԝи жь Ньвисаред Пироз сәр зьмане Ибрани дәрһәԛа Йаһоԝа гәләк тьшт заньбу. Ле әԝи бь хирәт дьхԝәст дьһа зедә пебьһʹәсә. Әм ве йәке жь кʹӧ заньн? Гава Филипо ле сәр рʹе дит, әԝи жь дьл ньвисаред Ишайа пʹехәмбәр дьхԝәндьн (Кʹаред Шандийа 8:28). Әԝи дьхԝәст дьһа зедә пебьһʹәсә. Әԝ жь Әтйопийайе дьчу пʹарьстгәһа Оршәлиме. Мәрьве Әтйопи жь Филипо дәрһәԛа һьнә рʹастийед тʹәзә йед фәрз пеһʹәсийа, мәсәлә кӧ Мәсиһ бь рʹаст кʹи йә (Кʹаред Шандийа 8:34, 35). Һʹьзкьрьна һьндава Йаһоԝа у Иса Мәсиһ дьле ԝида һаԛас мәзьн бьбу, кӧ әԝи сафи кьр бе ньхӧмандьне. Әԝи дьхԝәст бьбә шагьртәки Иса Мәсиһ. Филипо дит кӧ әԝ бона ве йәке һазьр ә, ләма жи ԝи ньхӧманд. w23.03 8-9 ¶3-6

Һәгәр әм дьхԝазьн дьле Йаһоԝа ша кьн, гәрәке әм тʹьме рʹастийе бежьн (Мәтʹәлок 6:16, 17). Иро гәләк мәрьв дьфькьрьн, ԝәки дәрәԝи тьштәки хьраб нинә. Ле Йаһоԝа ӧса нафькьрә, у гәрәке әм жи мина ԝи бьфькьрьн (Зәбур 15:1, 2). Һьнә кәс рʹастә-рʹаст дәрәԝа накьн, ле бона кʹара хԝә һьнә информасийа вәдьшерьн. Әм гәрәке ве йәке нәкьн у һәр тьштида һʹәлал бьн. Әм гәрәке гәвәзтийе жи нәкьн (Мәтʹәлок 25:23; 2 Тʹесалоники 3:11). Һәгәр тӧ тʹәхмин дьки ԝәки хәбәрдан ԝә һеди-һеди дәрбази сәр гәвәзтийе дьбә, тӧ дькари бь нәрми тʹема хәбәрдане бьгӧһези. Иро хәбәрдана хьраб гәләк бәлабуйи йә, гәрәке әм хирәт бькьн кӧ хәбәрдана мә Йаһоԝа хԝәш бе. Һәгәр әм жь дьл алийе хԝәда чьԛас дькарьн пʹешкʹеша хәбәрдане ԝәʹде хьзмәтийе, сәр щьвата у жийина һәррʹожида рʹаст дьдьнә хәбате, Йаһоԝа ԝе хирәта мә кʹәрәм кә. Дьнйа тʹәзәда әме жь һʹӧкӧме ве дьнйа хьраб бь тʹәмами хьлаз бьн, у мәрʹа ԝе ида дьһа һеса бә кӧ бь хәбәрдана хԝә рʹумәте бьдьнә Йаһоԝа (Щьһуда 15). w22.04 9 ¶18-20

Йаһоԝа у Иса мә гәләк һʹьз дькьн. Һʹьзкьрьна ԝан мә һелан дькә, кӧ әм жи ԝан һʹьз бькьн (1 Йуһʹәнна 4:10). Һәрге әм баш фәʹм бькьн кӧ Иса жийина хԝә бона мә дайә, әме ԝана һе зедә һʹьз бькьн. Әв һʹьзкьрьн дьле Паԝлосе шандида жи һәбу, у әԝи шекьрдарийа хԝә ӧса ани зьмен: «Кӧрʹе Хԝәде . . . әз һʹьз кьрьм у щанийа хԝә бона мьн да дәр» (Галати 2:20). Сәр һʹиме кʹьрʹине Йаһоԝа мә бәрбь хԝә дькʹьшинә, ԝәки әм бькарьбьн бьбьнә достед ԝи (Йуһʹәнна 6:44). Бәле, Йаһоԝа тьштәки ԛәнщ дьле тәда дитийә у сәва кӧ тӧ бьби досте ԝи, әԝи ԛимәта һәри мәзьн дайә. Гәло әв йәк тә һелан накә, ԝәки тӧ Йаһоԝа у Иса һе зедә һʹьз бьки? Ԝе баш бә кӧ әм әве пьрсе бьдьнә хԝә: «Гәло әв һʹьзкьрьн мьн дәʹф дьдә, кӧ әз тьштәки бькьм?» Һʹьзкьрьна мә һьндава Хԝәде у Иса Мәсиһ мә һелан дькә, ԝәки әм мәрьва жи һʹьз бькьн (2 Корьнтʹи 5:14, 15; 6:1, 2). w23.01 28 ¶6-7

Йаһоԝа бь сайа Кʹьтеба Пироз али хьзмәткʹаред хԝә дькә, кӧ әԝана ‹мьл бь мьл жерʹа хьзмәте бькьн›. Гәләк пʹаред Кʹьтеба Пироз ӧса һатьнә ньвисандьне, кӧ тʹәне мәрьвед мьлук дькарьн ле фәʹм бькьн (Луԛа 10:21). Һʹәму дәра мәрьв Кʹьтеба Пироз дьхуньн. Ле тʹәне мәрьвед мьлук Кʹьтеба Пироз фәʹм дькьн у ль гора готьнед ԝе дьжин (2 Корьнтʹи 3:15, 16). Кʹьтеба Пирозда биланийа Йаһоԝа те кʹьфше. Йаһоԝа бь сайа Кʹьтеба Пироз, щьмәʹта хԝә нә тʹәне ча кʹом һин дькә, ле мә һәр кәси башԛә жи һин дькә у бәр дьле мәда те. Гава әм Кʹьтеба Пироз дьхуньн, әм дькарьн тʹәхмин кьн, кӧ Йаһоԝа ча хут бона мә хәм дькә (Ишайа 30:21). Гәло һьнә рʹезед кӧ тӧ дьхуни ӧса тәрʹа найенә кʹьфше, кӧ те бежи әԝ һәма бона тә һатьнә ньвисаре? Бәле, Кʹьтеба Пироз бона һʹәму мәрьва һатийә ньвисаре. Гәло чьма ширәтед кӧ шәхси бона тә лазьм ьн, теда һәнә? Мәʹни әв ә кӧ Ньвискʹаре Кʹьтеба Пироз һәри билан ә (2 Тимотʹейо 3:16, 17). w23.02 4-5 ¶8-10

Әм Мәсиһи нә, у әм Йаһоԝа гәләк һʹьз дькьн. Ләма жи әм дьхԝазьн бь щурʹе һәри баш ԝирʹа хьзмәт бькьн. Бона ве йәке, лазьм ә ԝәки әм хԝәрʹа нета дайньн. Мәсәлә, лазьм ә кӧ әм һʹӧнӧред баш нав хԝәда пешда биньн, тьштед тʹәзә һин бьн у мәщала бьгәрʹьн, ԝәки али кәсед дьн бькьн. Чьрʹа фәрз ә ԝәки әм рʹӧһʹанида пешда һәрʹьн? Йа һәри фәрз, әм дьхԝазьн дьле Баве хԝәйи әʹзмана ша кьн. Гава Йаһоԝа дьвинә, ԝәки әм һʹӧнӧред хԝә бь дьл у щан хьзмәтеда дьдьнә хәбате, әԝ гәләк ша дьбә. Ӧса жи, әм дьхԝазьн пешда һәрʹьн сәва кӧ бькарьбьн дьһа зедә али хушк-бьра бькьн (1 Тʹесалоники 4:9, 10). Фьрԛи тʹӧнә ида чәнд сал ә кӧ әм Шәʹдед Йаһоԝа нә, әм гьшк жи дькарьн рʹӧһʹанида пешда һәрʹьн. w22.04 22 ¶1-2

Дәмәкә незикда сәрԝеред политики ԝе һʹьщуми сәр динед ԛәлп бькьн, кʹижан кӧ тенә навкьрьне «Бабилона Мәзьн». Әв йәк ԝе бьбә дәстпека тәнгасийа мәзьн. Гәло дьбә жь бо ве йәке гәләк мәрьв тʹәзә бьхԝазьн пьштгьрийа Йаһоԝа бькьн? На! Кʹьтеба Әʹйанти сәре 6 нишан дькә, ԝәки ԝан рʹожед чәтьнда, кәсед кӧ Йаһоԝарʹа хьзмәт накьн ԝе хԝә бьсперьн «чʹийа», демәк системед политики у комерси. У чьмки әԝана ԝе алийе Пʹадшатийа Хԝәде нәгьрьн, Йаһоԝа ԝе ԝана ча дьжмьн һʹәсаб кә (Луԛа 11:23; Әʹйанти 6:15-17). Ԝәʹде тәнгасийа мәзьн, фьрԛийа нав хьзмәткʹаред Йаһоԝа у кәсед дьнда ԝе әшкәрә бе кʹьфше. Жь һʹәму мәрьва, тʹәне әԝана ԝе Йаһоԝа Хԝәдерʹа хьзмәт бькьн у пьштгьрийа «щәʹнәԝьр» нәкьн (Әʹйанти 13:14-17). w22.05 16-17 ¶8-9

Хенщи мьзгина Пʹадшатийе, лазьм ә ԝәки хьзмәткʹаред Хԝәде хәбәрәкә дьн жи бәла кьн (Мәтта 24:14). Гәрәке әԝана пьштгьрийа шьхӧле ван мәләка бькьн, дәрһәԛа кʹижана Әʹйанти сәре 8 һʹәта 10-да те готьне. Әв мәләк сәр кәсед кӧ Пʹадшатийа Хԝәде ԛәбул накьн, чәнд бәла әʹлам дькьн. Ләма жи Шәʹдед Йаһоԝа диԝана Хԝәде йед сәр щурʹә-щурʹә пʹаред дьнйа Мире-щьна әʹлам дькьн. Әв әʹламәтийа дәрһәԛа диԝана Хԝәде мина «тәйрок у агьр» ә (Әʹйанти 8:7, 13). Гәрәке һәр кәс бьзаньбә ԝәки ахьри незик ә у лазьм ә кӧ әԝана жийина хԝә бьгӧһезьн, ԝәки ԝәʹде рʹожа һерса Йаһоԝа сах бьминьн (Сефанйа 2:2, 3). Ле әв хәбәр гәләк мәрьва хԝәш найе, ләма жи мәрʹа мерхаси лазьм ә. Ԝәʹде тәнгасийа мәзьн, диԝана хьлазийе ԝе дьһа сәрт у гьран бә (Әʹйанти 16:21). w22.05 7 ¶18-19

Дина хԝә бьдьнә мәсәла жьн-мерәки, йед кӧ гәрәке бьбьнә де-бав. Бь сала, дьбәкә ԝана гӧһ дабу гәләк готаред дәрһәԛа мәзьнкьрьна зарʹа. Ле ньһа әв принсип бона ԝан дьһа фәрз ьн, чьмки әԝ ида бунә де-бав. Чь щабдарикә мәзьн ә! Бәле, гава дәрәщед мә тенә гӧһастьне, һьнә принсип дькарьн бона мә дьһа ԛимәт бьн. Хьзмәткʹаред Йаһоԝа, чаԝа кӧ пʹадшед Исраелерʹа һатьбу готьне, Ньвисаред Пироз «тʹәмамийа рʹожед әʹмьре хԝәда» дьхуньн у ль сәр ԝан кʹур дьфькьрьн (Ԛануна Дӧщари 17:19). Де-бавно, әв йәк кӧ һун дькарьн зарʹед хԝә дәрһәԛа Йаһоԝа һин кьн, ԛәдьрәки гәләк мәзьн ә. Һьлбәт нета ԝә нә тʹәне әв ә кӧ һун дәрһәԛа Йаһоԝа ԝана һин кьн. Һун дьхԝазьн али ԝан бькьн кӧ әԝана Хԝәде жь дьл һʹьз бькьн. w22.05 26 ¶2-3

Бәс нинә кӧ мәрьв тʹәне бәрхԝә кʹәвә бона кьред хԝәйә нәрʹаст. Тʹобәкьрьна рʹаст мәрьв һелан дькә, ԝәки рʹабун-рʹуньштьна хԝә у кьред хԝә бьгӧһезә. Йаһоԝа ӧса жи дина хԝә дьде, һәла кәсе гӧнәкʹар тʹәрка рʹийа хьраб дайә у хԝә ль рʹийа рʹаст гьртийә йан на. Демәк, Йаһоԝа дина хԝә дьде, һәла әԝ кәс те гӧһастьне у сәр хԝә дьхәбьтә, ԝәки ӧса бьжи чаԝа Ԝи хԝәш те (Ишайа 55:7). Әԝ гәрәке фькьред хԝә бьгӧһезә у изьне бьдә, ԝәки фькьред Йаһоԝа рʹебәрийе ԝи бькьн (Рʹомайи 12:2; Әфәси 4:23). Гәрәке әԝ хԝәрʹа сафи кә кӧ тʹәрка ньһерʹандьн у кьред нәрʹаст бьдә (Колоси 3:7-9). Сәва кӧ Йаһоԝа бьбахшинә мә, гәләк фәрз ә әм баԝәрийа хԝә ԛӧрбана Иса Мәсиһ биньн. Һәгәр әм хирәт бькьн кӧ жийина хԝә бьгӧһезьн, Йаһоԝа ԝе сәр һʹиме ԛӧрбана Иса бьбахшинә мә (1 Йуһʹәнна 1:7). w22.06 6 ¶16-17

Йазьх кӧ инсан һәртʹьм хьрабийе һәвдӧ дькьн (Ԝаиз 8:9). Мәсәлә, гәләк кәс һʹӧкӧме хԝә бь щурʹәки хьраб дьдьнә хәбате, зӧлм у зордарийе дькьн, мәкʹтәбеда чʹерʹи һәвдӧ дькьн у һәвалдәрсханед хԝә дьтьрсиньн. Һьнә малбәтада, нәфәред мале һьндава һәвда берʹәʹм ьн. Ләма гәләк мәрьв һәвдӧ дьтьрсьн. Гәло Мире-щьна чь дькә кӧ тьрса бәр мәрьва мьԛабьли мә бьдә хәбате? Мире-щьна дьхԝазә кӧ әм мәрьва бьтьрсьн, ԝәки мьзгинийе бәла нәкьн йан гӧһ нәдьнә һьнә тʹәмийед Йаһоԝа. Бьн һʹӧкӧме Мире-щьна, һьнә дәԝләт шьхӧле мә ԛәдәхә дькьн у пәй мә дькʹәвьн (Луԛа 21:12). Дьнйа Мире-щьнада, гәләк кәс дәрһәԛа Шәʹдед Йаһоԝа дәрәԝа бәла дькьн, у дьбәкә кәсед кӧ ван дәрәԝа баԝәр дькьн, ԛәрфед хԝә мә бькьн йан һʹьщуми сәр мә бькьн (Мәтта 10:36). Гәло әм сәва ван тʹәлькед Мире-щьна әʹщебмайи дьминьн? На! Әм заньн кӧ ԛьрʹна йәкеда жи, Мире-щьна ԝан тʹәлька дьда хәбате (Кʹаред Шандийа 5:27, 28, 40). w22.06 16 ¶10-11

Нава ван гәләкада ԝе мәрьвед сахкьри бьн, йед кӧ жь Һармәгәдоне дәрбаз бьн у зарʹед кӧ ԝе дьнйа тʹәзәда бенә буйине. Хьлазийа Сәрԝертийа Һʹәзарсали, һʹәму мәрьв ԝе беԛьсур бьн. Әв йәк кӧ кәсәк беԛьсур ә, найе һʹәсабе кӧ әԝе жийина һәрһәйи бьстинә. Дәрһәԛа Адәм у Һәԝайе бьфькьрә. Әԝана беԛьсур бун, ле сәва кӧ жийина һәрһәйи бьстиньн, лазьм бу кӧ ԝана гӧһдарийа Йаһоԝа бькьра. Сәд һʹәйф кӧ ԝан нәхԝәст гӧһдарийа ԝи бькьн (Рʹомайи 5:12). Хьлазийа Сәрԝертийа Һʹәзарсали, һәр кәс ԝе беԛьсур бә. Гәло әԝана ԝе һʹәта-һʹәтайе пьштгьрийа сәрԝертийа Йаһоԝа бькьн? Йан һьнәк ԝе мина Адәм у Һәԝайе, йед кӧ беԛьсур бун ле Йаһоԝарʹа амьн нә ман, ԝе жь рʹийа Йаһоԝа дәркʹәвьн? Щаба ԝан пьрса гәрәке бе дайине. w22.09 22-23 ¶12-14

Гава тӧ һʹале дьнйайе дьвини, тӧ баԝәр дьки кӧ рʹожәке, һәр тьшт ԝе баш бә? Малбәтада чьԛас дьчә һʹьзкьрьн ӧнда дьбә у сар дьбә. Нав тʹәмамийа дьнйайе, зӧлми у зордари зедә дьбә, у гәләк мәрьв һерс ьн у тʹәне хԝә һʹьз дькьн. Гәләк мәрьв ида итʹбарийа хԝә кәсед хԝәйиһʹӧкӧм найньн. Ле әв йәк кӧ һʹале дьнйайе һаԛас хьраб ә, дькарә баԝәрийа тә дьһа ԛәԝи кә, кӧ һәр тьшт ԝе баш бә. Гәло чьрʹа? Чьмки Кʹьтеба Пироз бәреда готьбу кӧ «рʹожед ахьрийеда» мәрьв ԝе ӧса бьн (2 Тимотʹейо 3:1-5). Пекһатьна ве пʹехәмбәртийе, кʹижан кӧ тʹӧ кәс нькарә инкʹар кә, әшкәрә избат дькә кӧ Иса Мәсиһ буйә Пʹадше Пʹадшатийа Хԝәде, у әԝи ида дәстпекьрийә сәр әʹзмана һʹӧкӧм бькә. Әме бьвиньн кӧ әԝ пʹехәмбәрти мина пʹаред шькьләки, дьбьнә шькьләкә тʹам у зәлал, кʹижан кӧ нишан дькә ԝәки хьлази зутьрәке ԝе бе, чаԝа Йаһоԝа соз дайә. w22.07 2 ¶1-2

Ԝәʹде пандәмийа COVID-19, мәрʹа рʹебәри дьһатә дайине кӧ гәрәке әм щьвата чаԝа дәрбаз бькьн у чаԝа мьзгинийе бәла кьн. Жь бо дәрбазкьрьна щьвин у кʹомщьвина, әм зу-зу һини програмед видео-конференсйайе бун. Ӧса жи, әм һин бун кӧ мьзгинийе бь сайа тʹеле у нәʹма бәла бькьн. Йаһоԝа хирәта мә кʹәрәм кьр. Гәләк ԝәлатада, һәжмара мьзгинвана зедә буйә. Ԝәʹде пандәмийе, гәләк кәсед дьлпʹак һатьнә сәр рʹийа рʹастийе. Һьнә кәс дьбәкә дьфькьрин кӧ рʹебәрийа тʹәшкиләте дәрһәԛа пандәмийе бь зедәйи сәрт ә. Ле мә дит кӧ ахьрийеда, рʹебәрийа кӧ мә дьстанд чьԛас бь билани бу. Гава әм дина хԝә дьдьне, кӧ Иса чаԝа бь дьловани рʹебәрийа шагьртед хԝә дькә, баԝәрийа мә дьһа ԛәԝи дьбә, кӧ чь жи һәбә, Йаһоԝа у Кӧрʹе ԝийи дәлал ԝе тʹәви мә бьн (Ибрани 13:5, 6). w22.07 13 ¶15-16

Хенщи ве йәке кӧ әм дӧайед хԝәда пәсьне Йаһоԝа дьдьн, әм дьхԝазьн ԝирʹа бона һʹәму тьшти, чь кӧ әԝи данә мә, рʹази бьн. Мәсәлә, әм дькарьн бона бах у кӧлиркед бәдәԝ, бона хԝарьнед тәʹм у бона һәвалед ԛимәт, рʹазибуна хԝә бьдьнә кʹьфше. Баве мәйи дьлован ван тьшта у гәләк тьштед дьн дьдә мә, ԝәки әм ша бьн (Зәбур 104:12-15, 24). Гәло чь дькарә али тә бькә, ԝәки тӧ кʹәрәмед Йаһоԝа бир нәки? Мәсәлә, тӧ дькари хԝәрʹа бьньвиси кӧ тә бона чь дӧа кьрьбу у паше бьньһерʹи ԝәки Йаһоԝа ча щаба дӧайед тә дайә. Паше, рʹазибуна хԝә ԝирʹа бьдә кʹьфше (Колоси 3:15). w22.07 22 ¶8-9

Әм һәмьки заньн, ԝәки бәс нинә кӧ әм тʹәне рʹастийе леколин бькьн. Сәва кӧ әм жь рʹастийе кʹаре у шабуна рʹаст бьстиньн, әм гәрәке ль гора тьштед кӧ әм һин дьбьн, бьжин (Аԛуб 1:25). Гәло әм ча дькарьн бьзаньбьн һәла әм ль гора рʹастийе дьжин йан на? Бьраки мә дьбежә кӧ әм гәрәке дьле хԝә леколин бькьн у тедәрхьн, һәла әм кʹижан алийада ида пешда чунә, у кʹижан алийада гәрәке диса сәр хԝә бьхәбьтьн. Паԝлосе шанди ӧса гот: «Әм гьһиштьнә чь дәрәще, анәгори ԝе йәке бьжин» (Филипи 3:16). Дә бьдьнә һʹәсабе хԝә кӧ һәгәр әм чь жь дәсте мә те бькьн, ԝәки «нава рʹастийеда» бьжин, әме кʹарәкә чьԛас мәзьн бьстиньн! Һьм жийина мә ԝе дьһа баш бә, һьм жи әме дьле Йаһоԝа у дьле хушк-бьра ша кьн (Мәтʹәлок 27:11; 3 Йуһʹәнна 4). Гәло һежа нинә ԝәки әм рʹастийе һʹьз бькьн у ль гора рʹастийе бьжин? w22.08 18-19 ¶16-18

Гәло рʹуспи чаԝа дькарьн нишан кьн, кӧ әԝана Йаһоԝа Хԝәде у Иса һʹьз дькьн? Рʹуспи гәрәке бона пәзед Иса Мәсиһ хәм бькьн (1 Пәтрус 5:1, 2). Иса мәʹна ве йәке Пәтрусе шандирʹа зәлал кьр. Паши кӧ Пәтрус Иса се щара инкʹар кьрьбу, әԝи гәләк дьхԝәст избат кә, ԝәки әԝ Иса һʹьз дькә. Паши рʹабуна хԝә жь мьрьне, Иса жь Пәтрус пьрси: «Шьмһʹуне кӧрʹе Йуһʹәнна, тӧ мьн һʹьз дьки?» Әм дькарьн баԝәр бьн, кӧ Пәтрус һәр тьшт кьр, ԝәки һʹьзкьрьна хԝә Ахайе хԝәрʹа избат кә. Иса Пәтрусрʹа гот: «Шьвантийе пәзед мьн бькә» (Йуһʹәнна 21:15-17). У һʹәта хьлазийа әʹмьре хԝә, Пәтрус бь дьл у щан бона пәзед Ахайе хԝә хәм дькьр у ӧса избат кьр, ԝәки әԝ Иса һʹьз дькә. Рʹуспино, һун чаԝа дькарьн избат кьн, ԝәки әв готьнед Иса кʹижан кӧ әԝи Пәтрусрʹа готьбу, бона ԝә жи гәләк фәрз ьн? Һун дькарьн мина шьванед дьлован тʹьме дьле хушк-бьра ԛәԝи кьн. Илаһи али ԝан бькьн, дьле кʹижана һьндава рʹастийе сар буйә, ԝәки әԝана вәгәрʹьн щәм Йаһоԝа (Һәзәԛел 34:11, 12). w23.01 29 ¶10-11

Нәфькьрә кӧ тʹӧ кәс нькарә тәнгасийед тә фәʹм бькә, кӧ һʹале тә һʹаләки бечʹарә йә у тӧ нькари һьмбәри хԝәстьнед хьраб шәрʹ бьки. Кʹьтеба Пироз дьбежә: «Әԝе щерʹьбандьнеда дәлиләке жи бькә, кӧ һун бькарьбьн тәйах кьн». Ләма, һәрге хԝәстьнәкә хьраб гәләк ԛәԝи бә жи, әм дькарьн һьмбәри ԝе сәркʹәвьн. Пе аликʹарийа Йаһоԝа, әм дькарьн хԝә бьгьрьн, у нәкʹәвьнә бәр байе ве хԝәстьна хьраб. Ве йәке тʹӧ щар бир нәкә: Әм мәрьвнә ԛьсурдар ьн, дьбәкә әме нькарьбьн хԝәстьнед хьраб бь тʹәмами жь һʹьше хԝә дәрхьн. Ле гава хԝәстьнед ӧса щәм тә пешда бен, тӧ дькари ԝана инкʹар ки. Усьв жи ӧса кьрьбу. Гава әԝ жь алийе жьна Потифар һатә щерʹьбандьне, әԝ зу жь ԝедәре рʹәви (Дәстпебун 39:12). Бәле, гәрәке хԝәстьнед хьраб нәбьнә сәбәб ԝәки тӧ кьред хьраб бьки. w23.01 12-13 ¶16-17

Һәԛи һʹӧнӧрәки Хԝәде йә (Ԛануна Дӧщари 32:4). Кәсе һәԛ фьрԛийе накә нава мәрьва. Йаһоԝа жи фьрԛийе накә нава мәрьва (Кʹаред Шандийа 10:34, 35). Мәсәлә, Йаһоԝа ӧса кьр, ԝәки Кʹьтеба Пироз сәр ԝан зьмана бе ньвисандьне, кӧ бона мәрьвед һьнге фәʹмдари бә. Йаһоԝа соз дабу ԝәки рʹожед ахьрийеда, занәбуна рʹаст ԝе зедә бә. Демәк, һатьбу готьне кӧ гәләк мәрьв ԝе Кʹьтеба Пироз дьһа баш фәʹм бькьн (Данийел 12:4). Йаһоԝа бь сайа ԝәлгәрʹандьн, нәшьркьрьн, бәлакьрьна Кʹьтеба Пироз у әʹдәбйәтед сәр һʹиме Кʹьтеба Пироз, али гәләк мәрьва кьрийә, ԝәки әԝана Хәбәра ԝи дьһа баш фәʹм бькьн. Һʹәта ньһа, хьзмәткʹаред Йаһоԝа Хәбәра ԝи бь тʹәмами йан ниви, сәр 240 зьмани зедәтьр ԝәлгәрʹандьнә. У һәр кәс дькарә Кʹьтеба Пироз бепʹәрә дәст хә. Бь ви щурʹәйи, пешийа кӧ хьлази бе, мәрьвед жь һʹәму мьләта дькарьн «Мьзгинийа Пʹадшатийе» нас бькьн (Мәтта 24:14). Хԝәдайе һәԛийе, Йаһоԝа, дьхԝазә мәщале бьдә һәр кәси, ԝәки әԝана Хәбәра ԝи бьхуньн у ԝи нас бькьн. Ләма әм дькарьн бежьн кӧ Йаһоԝа мә һʹәмуйа гәләк һʹьз дькә. w23.02 5 ¶11-12

Тӧ рʹастийе һʹьз дьки? Бешьк әре. Ле диса жи, әм гӧнәкʹар ьн, у һәрге әм һаш жь хԝә тʹӧнә бьн, ньһерʹандьна ве дьнйайе дәрһәԛа рʹастийе дькарә сәр мә һʹӧкӧм кә (Ишайа 5:20). Гәләк кәс дьфькьрьн, ԝәки мәрьвәки рʹаст йәки ԛӧрʹә йә, кәсед дьн сущдар дькә, йан жи хԝә жь йед дьн четьр һʹәсаб дькә. Ле Хԝәде хәйсәтед ӧса нәфрʹәт дькә. Гава Иса сәр әʹрде бу, әԝи сәрԝеред религи сущдар дькьрьн, чьмки ԝана нормед хԝәйә рʹастийе пешда дьбьрьн (Ԝаиз 7:16; Луԛа 16:15). Мәрьве кӧ ль гора принсипед Йаһоԝа дьжи, тʹӧ щар нафькьрә ԝәки әԝ жь кәсед дьн четьр ә. Рʹасти һʹӧнӧрәки гәләк хԝәш ә. Мәрьве рʹаст ван тьшта дькә, йед кӧ бәр чʹәʹве Йаһоԝа рʹаст ьн. Кʹьтеба Пирозда, хәбәра «рʹасти» дьдә кʹьфше, кӧ мәрьв гәрәке ль гора принсипед Йаһоԝайә бьльнд бьжи. w22.08 27 ¶3-5

Шагьртед Иса чьԛас ԛьсурдар бун жи, әԝи итʹбарийа хԝә ԝана дьани (Йуһʹәнна 15:16). Гава Аԛуб у Йуһʹәнна жь ԝи хԝәстьн, ԝәки әԝ Пʹадшатийа хԝәда щики мәхсус бьдә ԝан, Иса нәфькьри кӧ нета ԝан хьраб ә, у ԝана ча шанди инкʹар нәкьр (Маркос 10:35-40). Паше, гава Иса һатә гьртьне, һʹәму шагьртед ԝи тʹәрка ԝи дан (Мәтта 26:56). Диса жи, Иса һевийа хԝә жь ԝан нәбьрʹи. Рʹаст ә әԝ һаш жь кемасийед ԝан һәбу, ле йәкә һʹәта хьлазийе ԝана һʹьз кьр (Йуһʹәнна 13:1). Сәрда жи, паши кӧ Иса жь мьрьне һатә рʹакьрьне, әԝи рʹебәрийа шьхӧле бәлакьрьна мьзгинийе у хԝәйкьрьна пәзед хԝәйә һежа да ԝан (Мәтта 28:19, 20; Йуһʹәнна 21:15-17). Итʹбарийа Иса һьндава ван мәрьвед гӧнәкʹар бадиһәԝа нибу. Әԝ шандийед Иса Мәсиһ һʹәта мьрьне бь амьни хьзмәт кьрьн. Бәле, Иса Мәсиһ итʹбарийа хԝә кәсед гӧнәкʹар дьанин у ве йәкеда мәрʹа бунә мәсәлә. w22.09 6 ¶12

Һәгәр әм баԝәр бьн кӧ Йаһоԝа мә һʹьз дькә у тʹәви мә йә, Мире-щьна ԝе нькарьбә мә бьтьрсинә. Ньвискʹаре Зәбура 118 жи рʹасти тәнгасийед гьран дьһат. Гәләк дьжмьнед ԝи һәбун, у һьнә жь ван дьжмьна мәрьвед нав-дәнг бун (рʹеза 9, 10). Щарна, әԝ дькʹәтә һʹаләки гәләк гьран (рʹеза 13). Сәрда жи, әԝ жь алийе Йаһоԝада бь щурʹәки сәрт һатә щәзакьрьне (рʹеза 18). Диса жи әԝ нәдьтьрсийа, чьмки әԝи заньбу кӧ Йаһоԝа ԝи һʹьз дькә. Зәбурбеж баԝәр бу кӧ чь жи бьбә, Хԝәде һәртʹьм һазьр ә али ԝи бькә (Зәбур 118:29). Гәрәке әм баԝәр бьн кӧ Йаһоԝа мә һʹьз дькә. Әв йәк ԝе али мә бькә ԝәки (1) нәтьрсьн кӧ әме нькарьбьн әʹбура малбәта хԝә бькьн, (2) мәрьва нәтьрсьн у (3) мьрьне нәтьрсьн. w22.06 15 ¶3-4

Әм гәрәке избат бьн ԝәки һʹәбандьна Йаһоԝарʹа жийина мәда сәр щийе пешьн ә. Йаһоԝа Хԝәде һежайи һʹәбандьна мә йә, чьмки әԝи әм хӧльԛандьнә (Әʹйанти 4:11; 14:6, 7). Ләма жи гәрәке әм бь щурʹе рʹаст, чаԝа ль ԝи хԝәш те, демәк бь «рʹӧһʹ у рʹастийе» ԝи бьһʹәбиньн (Йуһʹәнна 4:23, 24). Әм дьхԝазьн ԝәки рʹӧһʹе пироз рʹебәрийа һʹәбандьна мә бькә, ԝәки һʹәбандьна мә ль гора рʹастийа Хәбәра Хԝәде бә. Һәрге шьхӧлед Шәʹдед Йаһоԝа ԝәлате мәда бь тʹәмами йан һьнә тьштада ԛәдәхәкьри нә, лазьм ә ԝәки әм пешийа һәр тьшти дина хԝә бьдьн һʹәбандьна Йаһоԝа. Ньһа зедәтьри 150 хушк-бьред мә сәва баԝәрийа хԝә кәледа ньн. Диса жи әԝана чь жь дәсте ԝан те дькьн, кӧ дӧа бькьн, Кʹьтеба Пироз леколин бькьн у мәрьварʹа дәрһәԛа Хԝәде у Пʹадшатийа ԝи гьли кьн. Гава мәрьв мә ньмьз дькьн йан жи дьзериньн, әм дькарьн бәхтәԝар бьн, чьмки әм заньн кӧ Йаһоԝа тʹәви мә йә у ԝе мә хәлат кә (1 Пәтрус 4:14). w22.10 9 ¶13

Кʹьтеба Мәтʹәлокда, Йаһоԝа бона жийина һәррʹожи ширәтед гәләк керһати дьдә мә. Дина хԝә бьдьнә дӧ ширәтед билан. Йа пешьн, чь кӧ дәсте тәда һәйә, рʹази бә. Кʹьтеба Мәтʹәлок 23:4, 5 ӧса дьбежә: «Нәкʹәвә дәмана дәԝләтибуне, . . . әԝе хԝәрʹа баска чекә у мина тәйра бьфьрʹә әʹзмен». Рʹожа иройин ча йед дәԝләти у ӧса жи йед кʹәсиб һәр тьшти дькьн, ԝәки һәбуке ԛазанщ кьн. Гәләк щар рʹуйе ве йәкеда наве ԝан хьраб дьбә, әԝана достед хԝә у һәла һе сьһʹәт-ԛәԝата хԝә жи ӧнда дькьн. У ахьрийеда ӧса дьбә, кӧ әԝана һәр тьшти ӧнда дькьн (Мәтʹәлок 28:20; 1 Тимотʹейо 6:9, 10). Йа дӧда, пешийа кӧ тьштәки бежи, бьфькьрә. Һәрге әм мьԛати хԝә нибьн, хәбәрдана мә дькарә зьраре бьдә кәсед дьн. Кʹьтеба Мәтʹәлок 12:18 ӧса дьбежә: «Һьнәк бь хәбәра мина шур мерьв бьриндар дькьн, ле зьмане сәрԝахта дәрмане дьла йә». Гәрәке әм зьмане хԝә бькарьбьн у дәрһәԛа шашийед мәрьва пьшт ԝан хәбәр нәдьн, ԝәки ортʹа мәда йәкти у әʹдьлайи хьраб нәбә (Мәтʹәлок 20:19). w22.10 21 ¶14; 22 ¶16-17

Лазьм бу Һәзәԛел әʹламәтийа Хԝәде рʹьнд фәʹм бькә у ча бежи бькә пʹара хԝә, ԝәки әԝ сәр һʹьш у дьле ԝи һʹӧкӧм бькә. Паше, тьштәки әʹщебмайи ԛәԝьми. Гава Һәзәԛел әв кʹьтеба гӧломәтккьри хԝар, әԝ бона ԝи «мина һьнгьв ширьн бу» (Һәзәԛел 3:3). Гәло чьрʹа? Бона Һәзәԛел, хԝәш у ширьн бу кӧ пе наве Йаһоԝа хәбәр дә (Зәбур 19:8-11). Әԝ шекьрдар бу, кӧ Йаһоԝа әԝ ча пʹехәмбәр кʹьфш кьрийә. Паше, Йаһоԝа Һәзәԛелрʹа ӧса гот: «Һʹәму готьнед мьн йед кӧ әзе тәрʹа бежьм бьгьрә у бьхә дьле хԝә» (Һәзәԛел 3:10). Демәк, Йаһоԝа дьхԝәст кӧ Һәзәԛел готьнед кʹьтеба гӧломәтккьри бира хԝәда хԝәй кә у сәр ԝан кʹур бьфькьрә. Һәзәԛел жь ве йәке гәләк кʹар дьстанд, у әԝи рʹьнд заньбу, кӧ гәрәке мәрьварʹа кʹижан әʹламәтийа фәрз бәла кә (Һәзәԛел 3:11). Хәбәра Хԝәде ида сәр дьл у левед Һәзәԛел бу, ләма жи әԝ һазьр бу кӧ хьзмәтийа хԝә бинә сери. w22.11 6 ¶12-14

Һәрге баԝәрийа тә жь бо гӧһастьнед тʹәшкиләтеда, те щерʹьбандьне, тӧ чь гәрәке бьки? Ԝәʹде рʹеԝитийа бәрʹийеда, Ԛоһатʹийа сьндоԛа пәймане бәр чʹәʹве хәлԛе бар дькьр (Жьмар 3:29, 31; 10:33; Йешу 3:2-4). Чь ԛәдьрәки мәзьн ә! Ле чахе әԝ Әʹрде Создайида щиԝар бун, ида нә лазьм бу кӧ сьндоԛа пәймане һәртʹьм бе баркьрьне. Ләма жи Ԛоһатʹи бона щабдарийед дьн жи дьһатьнә кʹьфшкьрьне (1 Дирок 6:31-33; 26:1, 24). Кʹьтеба Пироз набежә кӧ Ԛоһатʹи дьхәйдин йан жи ԝана дьхԝәст, ԝәки щабдарикә һе мәзьн ԝанрʹа бе дайине, чьмки ԝана бәре шьхӧләки фәрз дькьр. Әм жь ԝана чь дькарьн һин бьн? Һәрге тʹәшкиләта Йаһоԝа щабдарийед дьн бьдә тә жи, бь дьл у щан пьштгьрийа ван гӧһастьна бькә. Шьхӧле тә чь бә жи, рʹази бә. Бәр чʹәʹве Йаһоԝа, щабдарийа тә ԛимәта тә нә кем дькә нә жи зедә дькә. Йаһоԝа жь шьхӧле кӧ тӧ дьки, дьһа зедә гӧһдарибуна тә ԛимәт дькә. w22.11 23 ¶10-11

Онисифоро Паԝлос гәрʹийа, у гава ԝи дит, аликʹари да ԝи у бона ԝи әʹмьре хԝә кьрә ԛәзийе. Дәрс чь йә? Гава хушк у бьред мә рʹасти зерандьна тен, тьрса бәр мәрьва гәрәке рʹийа мә нәгьрә, ԝәки пьштгьрийа ԝан бькьн, ле әм гәрәке бәрдәԝам кьн ԝана бьпарезьн у бенә һәԝара ԝан (Мәтʹәлок 17:17). Бир нәкә кӧ әԝана һʹәԝще һʹьзкьрьн у аликʹарийа мә нә. Бьдә бәр чʹәʹве хԝә кӧ хушк-бьред мәйи Русйайеда чаԝа али хушк-бьред кәледа дькьн. Щарна гава кәсәк те диԝанкьрьне, гәләк хушк-бьра дьчьнә диԝане, ԝәки пьшта ԝи бьгьрьн. Әԝ чь дәрс ә бона мә? Гава бьред щабдар тенә сущдаркьрьне у гьртьне, йан чахе ԝана дьзериньн, нәтьрсә. Бона ԝан дӧа бькә, бона малбәтед ԝан хәм бькә у бь щурʹед дьн жи аликʹарийе бьдә ԝан (Кʹаред Шандийа 12:5; 2 Корьнтʹи 1:10, 11). w22.11 17 ¶11-12

Щабдарийа рʹуспийа әԝ ә, кӧ бь сайа Кʹьтеба Пироз дьлбинийе бьдьнә хушк-бьра у али кәсед дьлтәнг бькьн (1 Пәтрус 5:2). Чахе тʹәшԛәләкә тʹәбийәте дьԛәԝьмә, рʹуспи йа пешьн дәрһәԛа сах-сьламәтийа хушк-бьра педьһʹәсьн у дьпьрсьн һәла ԝанрʹа хԝарьн, кʹьнщ у щи-сьтʹар лазьм ә, йан на. Ле паши чәнд мәһа жи, дьбәкә ԝанрʹа диса дьлбини у аликʹарийа рʹӧһʹани лазьм бә (Йуһʹәнна 21:15). Бьре мә Һаролд, йе кӧ әндәме Комитейа Филиале йә у паши тʹәшԛәлед тʹәбийәте тʹәви гәләк хушк-бьра хәбәр дайә, ӧса дьбежә: «Сәва кӧ бьрина дьле ԝан ԛәнщ бә, гәләк ԝәхт лазьм ә. Жийина ԝан дьбәкә һеди-һеди нормал бьбә, ле дьбәкә мьрьна мәрьвәки ԝани дәлал, ӧндакьрьна мал-мьлкʹе ԝан, йан бәлайед кӧ һатьн сәре ԝан, бәр чʹәʹве ԝан нәчьн. Гава кӧ тьштед ӧса тенә бира ԝан, әԝана диса у диса хәмгин дьбьн. Һʹаләки ӧса найе һʹәсабе кӧ баԝәрийа ԝан сьст ә, чьмки фькьр у һәстед ӧса нормал ьн». Рʹуспи гәрәке ль гора ве ширәте һәрәкʹәт бькьн: «Тʹәви йед дьгьрин бьгьрин» (Рʹомайи 12:15). w22.12 22 ¶1; 24-25 ¶10-11

Йаһоԝа рʹӧһʹе пироз бь мәрʹдани дьдә мә, ԝәки әм сәркʹәти бьн у тьштед рʹаст бькьн. Гава әм Хәбәра Хԝәде леколин дькьн, әм дьһельн ԝәки рʹӧһʹе пироз сәр мә һʹӧкӧм бә. Ӧса жи әм рʹӧһʹе пироз сәр щьвата дьстиньн. Ԝедәре, әм дькарьн тʹәви хушк-бьра ԝәхте хԝә дәрбаз кьн. Әԝана жи мина мә хирәт дькьн тьштед рʹаст бькьн, у әв йәк мерхасийе дьдә мә (Ибрани 10:24, 25; 13:7). Хенщи ве йәке, гава әм жь дьл Йаһоԝарʹа дӧа дькьн у аликʹарийе жь ԝи дьхԝазьн, ԝәки кемасикә хԝә рʹаст кьн, әԝ бь сайа рʹӧһʹе пироз ԛәԝате дьдә мә, ԝәки әм бәрдәԝам кьн сәр хԝә бьхәбьтьн. Дьԛәԝьмә хԝәстьнед мәйә хьраб бь тʹәмами бәтавәнәбьн, ле әԝ һәр тьшт ԝе али мә бькьн, ԝәки нәкʹәвьнә бәр байе ван хԝәстьна. Гава әм дәстпедькьн хԝә ль шьхӧлед рʹӧһʹани бьгьрьн, лазьм ә кӧ әм ван шьхӧла хԝәрʹа бькьн хәйсәт у бәрдәԝам кьн хԝәстьнед щайиз нав хԝәда пешда биньн. w23.01 11 ¶13-14

Рʹаст ә Кʹьтеба Пироз нә кʹьтебәкә ширәтед бона сьһʹәт-ԛәԝат у хԝарьне йә. Ле диса жи, әԝ мәрʹа дьбежә кӧ Йаһоԝа дәрһәԛа ван тьшта чь дьфькьрә. Мәсәлә, Кʹьтеба Пироз ве ширәте дьдә мә: «Хьрабийе жь бәдәна хԝә дур бьгьрә» (Ԝаиз 11:10 ИМ). Кʹьтеба Пироз дьбежә кӧ әм гәрәке гәләк пәй хԝарьн у вәхԝарьна ичке нәкʹәвьн. Чьмки тьштед ӧса дькарьн зьраре бьдьн сьһʹәта мә у һәла һе әʹмьре мә жи бькьнә бьн хофе (Мәтʹәлок 23:20). Йаһоԝа жь мә дьхԝазә ԝәки әм хԝарьн у вәхԝарьнеда хԝә контрол кьн (1 Корьнтʹи 9:25). Гава әм һʹьш-аԛьле хԝә дьдьнә хәбате, ԝәки сафикьрьнед баш бькьн, әм жь дьл рʹазибуна хԝә бона әʹмьре кӧ Хԝәде дайә мә, нишан дькьн (Зәбур 119:99, 100; Мәтʹәлок 2:11). Мәсәлә, әм гәрәке рʹьнд бьфькьрьн кӧ әм чь дьхԝьн. Һәрге тӧ хԝарьнәке һʹьз дьки, ле зани кӧ әԝ хԝарьн дькарә зьраре бьдә тә, тӧйе ԝе хԝарьне нәхԝи, ӧса нинә? Ӧса жи әм сәрԝахтийе нишан дькьн, гава епʹещә хәԝа хԝә дьстиньн, спортева мьжул дьбьн, у мал у бәдәна хԝә тʹәмьз хԝәй дькьн. w23.02 21 ¶6-7

Гәло тӧ чаԝа дькари ԝәʹде хԝәндьна Кʹьтеба Пироз рʹастийед ԛимәт бьвини? Бона щаба ве пьрсе, дина хԝә бьдә 2 Тимотʹейо 3:16, 17. Әв рʹез дьбежьн кӧ «тʹәмамийа ньвисаре . . . керһати йә» бона (1) һинкьрьне, (2) леһьлатьне, (3) рʹасткьрьне у (4) ширәткьрьне. Бь аликʹарийа ван чар тьшта тӧ дькари жь тʹәмамийа Кʹьтеба Пироз кʹаре бьстини. Гава тӧ дьхуни, дина хԝә бьде кӧ сәрһатик дәрһәԛа Йаһоԝа, нета ԝи йан принсипед ԝи чь һин дькә. Бьфькьрә кӧ әԝ готьн чаԝа бона леһьлатьне керһати йә. Ӧса тӧйе нав хԝәда нет у хԝәстьнед хьраб бьвини, сәр хԝә бьхәбьти у Хԝәдерʹа амьн бьмини. Жь хԝә бьпьрсә кӧ әԝ пар чаԝа дькарә бона рʹасткьрьна ньһерʹандьнед шаш, мәсәлә йед кӧ мәрьв хьзмәтийеда дьбежьн, бенә хәбьтандьне. У бьфькьрә кӧ рʹезада дәрһәԛа ширәткьрьна рʹийа рʹастийеда чь те готьне. Демәк рʹьнд фәʹм бькә, кӧ тӧ чаԝа дькари мина Йаһоԝа бьфькьри. Һәрге тӧ ван чар тьшта һʹьше хԝәда хԝәй ки, тӧйе жь хԝәндьна Кʹьтеба Пироз дьһа кʹаре бьстини у рʹастийед ԛимәт бьбини. w23.02 11 ¶11

Кʹьтеба Данийел жи пʹехәмбәрти кьрьбун, ԝәки Иса Мәсиһ ԝе паши ‹һʹәфт дәма› Пʹадшатийе бьстинә. Гәло әм дькарьн тедәрхьн кӧ Иса кʹәнге бу Пʹадша? (Данийел 4:10-17). «Һʹәфт дәм» те һʹәсабе 2 520 сал. Әв дәм сала 607 Б.Д.-да дәстпебу. Ве сале, Бабилонийа бажаре Оршәлиме ԝеран кьрьн, у пʹадше хьлазийе жь тʹәхте Йаһоԝа һатә рʹакьрьне. «Һʹәфт дәм» сала 1914 Д.М.-да хьлаз бун. Ве сале, Йаһоԝа Иса Мәсиһ кьрә Пʹадше Пʹадшатийа хԝә, кʹижанирʹа кӧ бь ԛануни тʹәхте Пʹадшатийе дькʹәт (Һәзәԛел 21:25-27). Гәло әм жь ве пʹехәмбәртийе чь кʹаре дьстиньн? Пекһатьна пʹехәмбәртийа дәрһәԛа ‹һʹәфт дәма› баԝәрийа мә дьһа ԛәԝи дькә, кӧ Йаһоԝа созед хԝә ԝәхтда тинә сери. Чаԝа кӧ әԝи бона сазкьрьна Пʹадшатийа хԝә ԝәʹдә кʹьфш кьрьбу, Әԝе пʹехәмбәртийед дьн жи ль гора ԝәʹде кʹьфшкьри бинә сери. Бәле, рʹожа Йаһоԝа ԝе дәрәнги нәкʹәвә! (Һәбаԛуԛ 2:3) w22.07 3 ¶3-5