Мьждар

Мәсиһи гәрәке чʹерʹа нәкьн у гьлийед хьраб нәдьнә хәбате. Ле диса һьнә щурʹе хәбәрдане һәнә, жь кʹижана кӧ әм гәрәке хԝә дур бьгьрьн. Мәсәлә, гәрәке әм фәсал бьн ԝәки ԛәрфе хԝә мьләт, бәрәк йан жи култура кәсед дьн нәкьн. Ӧса жи, әм нахԝазьн бь готьнед хԝә дьле мәрьва бешиньн. Бь гьлийед хԝә мәрьва һелан кә у ԛәԝи кә. Дәԝса кӧ гьли-газьна бьки у мәрьва сущдар ки, пʹайе ԝан бьдә. Бона Исраелийа гәләк мәʹни һәбун кӧ шекьрдар бьн, ле ԝана һәртʹьм дькьрә кӧтә-кӧт. Һәгәр әм бәрдәԝам кьн газьнед хԝә бькьн, әв йәк дькарә сәр кәсед дьн жи һʹӧкӧм кә. Бинә бира хԝә кӧ хәбәра хьраб йа 10 щәʹсуса чаԝа бу сәбәб кӧ һʹәму Исраели дәстпекьрьн сәр Муса бькьнә кӧтә-кӧт (Жьмар 13:31–14:4). Ле гава әм пʹайе мәрьва дьдьн, һәр кәс кʹаре дьстинә. Ләма жи мәщала бьгәрʹә, ԝәки жь дьл пʹайе мәрьва бьди. w22.04 8 ¶16-17

Бь һʹәзара сала, Йаһоԝа али гәләк зарʹа у щаһьла кьрийә кӧ әԝ бьбьнә достед ԝи. Бь аликʹарийа Йаһоԝа зарʹед ԝә жи дькарьн бьбьнә достед ԝи (1 Корьнтʹи 3:6, 7). Ле һәгәр зарʹед ԝә иро бь дьл у щан Йаһоԝарʹа хьзмәт накьн жи, баԝәр бьн кӧ чʹәʹве Йаһоԝа ԝе рʹийа ԝан бә (Зәбур 11:4). Һәгәр әԝана бь гавәкә бьчʹук нишан кьн, ԝәки ‘дьле ԝан бона жийина һәрһәйи һазьр ә’, Йаһоԝа ԝе дәсте ԝан бьгьрә (Кʹаред Шандийа 13:48; 2 Дирок 16:9). Әԝ дькарә али ԝә бькә кӧ һун ԝәʹде рʹастда, демәк гава зарʹед ԝә һʹәԝщә бьн, тьште рʹаст бежьнә ԝан (Мәтʹәлок 15:23). Йан жи, Йаһоԝа дькарә сәр дьле хушк йан бьраки һʹӧкӧм кә, ԝәки әԝ дина хԝә бьдә зарʹед ԝә у али ԝан бькә. Гава зарʹед ԝә ида мәзьн бьн жи, Йаһоԝа дькарә тьштәки ӧса бинә бира ԝан, чь кӧ бьчʹуктайеда ԝә әԝана һин кьрьбу (Йуһʹәнна 14:26). Һәгәр һун зарʹед хԝә пе готьн у кьред хԝә бәрдәԝам кьн һин кьн, Йаһоԝа ԝе ԝә хәлат кә. w22.04 21 ¶18

Мире-щьна нькарьбу бьчуйа сәр әʹзмана, ләма әԝ һерса хԝә сәр Мәсиһийед бьжартида дьрʹьжинә, йед кӧ сәр әʹрде манә. Әԝана ԝәкʹилед Пʹадшатийа Хԝәде нә, у «шәʹдәтийа бона Иса дьдьн» (2 Корьнтʹи 5:20; Әфәси 6:19, 20). Сала 1918-да, бӧхдан авитьнә сәр һʹәйшт бьред щабдар, ԝана кьрьнә кәле у гәләк сал данә ԝан. Ӧса дьһатә кʹьфше кӧ те бежи шьхӧле ԝан бьред бьжарти һатьбу «кӧштьне», демәк сәкьнандьне (Әʹйан. 11:3, 7-11). Ле дәстпека сала 1919, саләк паши кӧ бьред мә кʹәтьбунә кәле, әԝана ньшкева һатьнә азакьрьне у паше суще ԝан диԝанеда һатә бәталкьрьне. Бьред мә дәрберʹа вәгәрʹийан сәр шьхӧле Пʹадшатийе. Жь ԝе дәмева, Мире-щьна бәрдәԝам дькә һʹьщуми һʹәму хьзмәткʹаред Хԝәде дькә, у әԝи бь симболик ‹чʹәмәки› зерандьне ль сәр ԝан бәрʹдайә (Әʹйанти 12:15). Ләма мәрʹа бь рʹасти жи сәбьр у баԝәри лазьм ә (Әʹйанти 13:10). w22.05 5-6 ¶14-16

Хәԝн-хәйаләкеда, Йуһʹәннайе шанди дӧ кʹома дьвинә, йед кӧ пьштгьрийа сәрԝертийа Йаһоԝа дькьн у жийина һәрһәйи дьстиньн. Кʹома пешьн жь 144 000 мәрьва йә. Әԝана сәр әʹрде тенә бьжартьне, ԝәки тʹәви Иса Мәсиһ сәр әʹзмен пʹадшатийе бькьн (Әʹйанти 5:9, 10; 14:3, 4). Хәԝн-хәйаледа, әԝана тʹәви Иса Мәсиһ сәр әʹзмана «ль сәр чʹийайе Сийоне» сәкьни нә (Әʹйанти 14:1). Нава ԛьрʹнада, бь һʹәзара мәрьв тенә бьжартьне, ԝәки бьбьнә пʹара кʹома жь 144 000 бьжартийа (Луԛа 12:32; Рʹомайи 8:17). Ле Йуһʹәннарʹа һатьбу готьне ԝәки рʹожед пашьнда, кәсед кӧ жь ве кʹоме сәр әʹрде манә ԝе һьндьк бьн (Әʹйан. 12:17). Әԝана ԝәʹде тәнгасийа мәзьн ԝе жь әʹрде бенә һьлдане, у сәр әʹзмана кʹома жь 144 000 ԝе ида тʹәмам бә. Әԝана ԝе ль әʹзмана тʹәви ԝан йед кӧ бәре жь мьрьне һатьбун рʹакьрьне у тʹәви Иса, пʹадшатийе бькьн (Мәтта 24:31; Әʹйанти 5:9, 10). w22.05 16 ¶4-5

Иса шагьртед хԝә һин дькьр кӧ әԝана ньһерʹандьна рʹаст сәр хԝә хԝәй кьн. Әԝи ԝанрʹа ӧса гот: «Һәр тʹеләки пʹорʹед сәре ԝә жьмарти нә» (Мәтта 10:30). Әв рʹез нишан дькә кӧ Баве мәйи әʹзмана бона мә хәм дькә у мә ԛимәт дькә. Әв йәк али мә дькә, ԝәки әм һьндава хԝәда ньһерʹандьна рʹаст хԝәй кьн, илаһи һәгәр әм хԝәда баԝәр ниньн у хԝә бекер һʹәсаб дькьн. Йаһоԝа изьне дьдә кӧ әм ԝирʹа хьзмәт кьн у дьхԝазә жийина һʹәта-һʹәтайе бьдә мә, әм гәрәке тʹӧ щар ве йәкеда дӧдьли нәбьн. Ԝәкә 15 сал пешда, журнала «Бьрща Ԛәрәԝьлийеда» ӧса һатьбу готьне: «Гәрәке әм дәрһәԛа хԝә зедә нәфькьрьн у хԝә ԛӧрʹә нәкьн. Жь алийе дьнва жи, әм гәрәке нәфькьрьн кӧ әм бекер ьн. Лазьм ә кӧ әм дәрһәԛа хԝә рʹаст бьфькьрьн у һьм ԛәԝата хԝә һьм жи кемасийед хԝә бьзаньбьн». w22.05 24-25 ¶14-16

Гава әм хирәт дькьн, ԝәки әʹдьлайе пешда биньн, әм алийе хԝәда аликʹарийе дьдьн ве йәктийе (Мәтта 5:9; Рʹомайи 12:18). Һәр щар чахе әм гава пешьн давежьн, ԝәки әʹдьлайе тʹәви хушк-бьра пешда биньн, әм щьнәта рʹӧһʹани дьхәмьлиньн. Әм гәрәке бир нәкьн, ԝәки һәр кәсе кӧ щьнәта рʹӧһʹанида йә, рʹастә-рʹаст жь алийе Йаһоԝава һатийә кʹьшандьне нава һʹәбандьна рʹаст (Йуһʹәнна 6:44). Һәла бьфькьрә: Һәрге Йаһоԝа һʹәму хьзмәткʹаред хԝә һаԛас ԛимәт дькә, гәло нә лазьм ә, ԝәки әм әʹдьлайи у йәктийе нав хԝәда пешда биньн у бь ви щурʹәйи дьле Йаһоԝа ша кьн? (Ишайа 26:3; Һагай 2:7) Йаһоԝа гәләк кʹәрәма сәр хьзмәткʹаред хԝәда дьбаринә. Гәло әм чаԝа дькарьн жь ван кʹәрәма бь тʹәмами кʹаре бьстиньн? Чь кӧ әм жь Хәбәра Хԝәде һин дьбьн, әм гәрәке кʹур сәр ве йәке бьфькьрьн. Леколин у фькьрандьна кʹур ԝе али мә бькә, кӧ әм һʹӧнӧред Иса нав хԝәда пешда биньн у «һʹьзкьрьнеда чаԝа хушк-бьра сәр һәв шәԝат бьн» (Рʹомайи 12:10). w22.11 12-13 ¶16-18

Гава әм ԛәбул дькьн кӧ Йаһоԝа бахшандийә мә, әʹдьлайи дькʹәвә дьле мә у исафа мә ида мә сущдар накә. Әм тʹәне ԝи чахи хԝә ӧса тʹәхмин дькьн, гава бахшандьна жь Йаһоԝа дьстиньн (Кʹаред Шандийа 3:19). Чахе Йаһоԝа дьбахшинә мә, әԝ һьндава мәда ӧса йә, ча бежи мә ԛә бәр ԝи гӧнә нәкьрьбу у әԝ изьне дьдә ԝәки әм диса бьбьнә достед ԝи. Чахе Йаһоԝа дьбахшинә мә, әԝ ви гӧнәйи ида тʹӧ щар надә рʹуйе мә у мә щәза накә (Ишайа 43:25). «Чьԛас рʹоһьлат жь рʹоавайе дуртьр ә», Йаһоԝа гӧнед мә жь мә һаԛас дур дьхә (Зәбур 103:12). Гава әм тиньн бәр чʹәʹве хԝә кӧ Йаһоԝа чьԛас афукʹар ә, дьле мә бь рʹазибуне тʹьжә дьбә, ӧса нинә! (Зәбур 130:4) Ле Йаһоԝа һазьр ә кӧ бьбахшинә кʹе? Йаһоԝа һазьр ә нә тʹәне гӧнед бьчʹук, ле гӧнед мәзьн жи бьбахшинә. Йаһоԝа Әʹфьрандар, Ԛанундар у Һʹакьме мә йә, әԝ рʹьнд занә һәла кʹе һежайи бахшандьне йә. w22.06 5 ¶12-14

Йаһоԝа һевикә хԝәш дайә кәсед кӧ ԝи һʹьз дькьн. Зутьрәке әԝе нәхԝәши, шин у мьрьне бь тʹәмами бьдә һьлдане (Әʹйанти 21:3, 4). Әԝе али кәсед мьлук бькә ԝәки әԝана дьне бькьнә щьнәт (Зәбур 37:9-11). Ӧса жи, Хԝәде ԝе рʹе вәкә ԝәки әм һе незики ԝи бьн. Һевикә чьԛас хԝәш ә! Гәло әм чьма итʹбарийа хԝә ван созед Хԝәде тиньн? Чьмки әм заньн кӧ Йаһоԝа тʹьме хԝәйе созед хԝә йә. Ләма жи әм Йаһоԝада «гӧман» ьн (Зәбур 27:14). Әм ве йәке нишан дькьн, чахе бь сәбьр у шабуне һивийе нә, һʹәта кӧ Йаһоԝа нета хԝә бинә сери (Ишайа 55:10, 11). Ԝәрә әм тʹьме Йаһоԝарʹа амьн бьминьн у баԝәр бьн, кӧ «ԝе ԝан хәлат кә, кʹижан кӧ ль ԝи дьгәрʹьн». w22.06 20 ¶1; 25 ¶18

Әм дькарьн баԝәр бьн кӧ сәре малбәте, демәк Йаһоԝа, ԝе ль гора принсипа кӧ әԝи 1 Тимотʹейо 5:8-да дайә ньвисаре, бона мә хәм бькә. Йаһоԝа һьм мә һьм жи малбәта мә һʹьз дькә, ләма жи әм дькарьн баԝәр бьн кӧ Әԝе бона һʹәԝщед мә хәм бькә (Мәтта 6:31-33). Йаһоԝа бь рʹасти жи йәки гәләк дәствәкьри йә! Чахе әԝи әʹрд чедькьр, әԝи нә тʹәне тьштед ӧса чекьр, йед кӧ бона жийине лазьм ьн, ле гәләк тьштед дьн жи, жь кʹижана әм ләзәте дьстиньн (Дәстпебун 2:9). Һәгәр тьштед кӧ дәсте мәда һәнә щарна кем бьн жи, ԝе баш бә кӧ әм дина хԝә бьдьне, ԝәки Йаһоԝа мә диса жи бьрʹчи наһелә (Мәтта 6:11). Гәрәке әм бир нәкьн ԝәки тьштед кӧ әм иро ԛӧрбан дькьн, ԛә бәрамбәри ԝан кʹәрәма набьн, йед кӧ Йаһоԝа ча иро дьдә мә ӧса жи ахьрийеда ԝе бьдә. Сәрда жи, әԝе жийина һʹәта-һʹәтайе бьдә мә (Ишайа 65:21, 22). w22.06 15 ¶7-8

Хенщи кәсед кӧ рʹастийе тʹәзә һин дьбьн, әм жи һʹәԝще хԝарьна рʹӧһʹани нә, ԝәки Кʹьтеба Пироз у Йаһоԝа рʹьнд нас бькьн. Паԝлосе шанди зәлал кьрьбу, кӧ хԝарьна ӧса али мә дькә ԝәки әм «ԛәнщи у хьрабийе жь һәв» дәрхьн. Иро дьнйайеда нормед нав-намусийе гәләк кʹәтьнә, ләма жи щарна һеса нинә кӧ әм гӧһ бьдьн ԛанунед Йаһоԝа. Ле бь сайа хԝарьна рʹӧһʹанийә тәʹмхԝәш, Иса ԛәԝате дьдә мә, ԝәки әм сәркʹәвьн. Чʹәʹвканийа ве хԝарьне, Хәбәра Хԝәде йә. Мина Иса әм жи наве Хԝәде рʹумәт дькьн (Йуһʹәнна 17:6, 26). Мәсәлә, жь сала 1931, әм хԝә ча «Шәʹдед Йаһоԝа» нав дькьн. Бь сайа ви нави, кӧ мә жь Кʹьтеба Пироз стандийә, әм нишан дькьн ԝәки әм чьԛас незики Баве хԝәйи әʹзмана нә (Ишайа 43:10-12). Хенщи ве йәке мә наве Хԝәде «Ԝәлгәрʹандьна Дьнйа Тʹәзәда» һʹәму щийед ԝеда дайә хәбате. w22.07 11 ¶11-12

Мьзгинийа Пʹадшатийа Хԝәде жи пʹарәкә рʹастийе йә. Иса Мәсиһ рʹастийа дәрһәԛа Пʹадшатийе бәрамбәри хьзнәкә вәшарти кьр. Ль гора Мәтта 13:44, Иса ӧса гот: «Пʹадшатийа Әʹзмана мина ве йәке йә: Әʹрдәкида хьзнәкә вәшарти һәбу. Мәрьвәк ԝе дьбинә, вәдьшерә, шабуна дьчә һʹәму һәбука хԝә дьфьрошә у ԝи әʹрди дькʹьрʹә». Әв мер ве хьзне нәдьгәрʹийа, ле гава дит, әԝи мал-һʹале хԝә фьрот кӧ ве хьзне ԛазанщ кә. Гәло чьрʹа? Әԝи заньбу кӧ әв хьзнә жь һʹәму тьштед кӧ щәм ԝи һәбун, ԛимәттьр ә. Чьмки чь кӧ дьнйа пʹешкʹеши мә дькә, нькарә шабунәкә ӧса бьдә мә, ча хьзмәтийа Йаһоԝарʹа дьдә мә. Һьм жи, һевийа мә һәйә кӧ әме һʹәта-һʹәтайе бьн сәрԝертийа Пʹадшатийа Хԝәдеда бьжин. Ӧса жи, достийа мә тʹәви Йаһоԝа, һежайи һәр ԛӧрбанкьрьна йә, ләма жи әм бь дьл у щан хирәт дькьн, ԝәки «һәр алийава ль ԝи хԝәш бен» (Колоси 1:10). w22.08 15 ¶8-9; 17 ¶12

Гәло Усьв жь кʹӧ заньбу ԝәки бенамуси бәр чʹәʹве Хԝәде гӧнәки гьран ә? Ԛануна Муса, кʹидәре кӧ дьһатә готьне «Зьнийе нәки», ԝәкә 200 сал шунда Исраелийарʹа һатә дайине (Дәркʹәтьн 20:14). Рʹаст ә әв ԛанун һе нәһатьбу дайине, диса жи Усьв рʹьнд фәʹм дькьр кӧ Йаһоԝа сәр зьнийе, демәк сәр бенамусийе чаԝа дьньһерʹә. Мәсәлә, Усьв бешьк заньбу кӧ Йаһоԝа зәԝащ бь жьнәке у мерәки саз кьрьбу. Дьԛәԝьмә әԝи бьһистьбу, ԝәки Йаһоԝа намуса Сарайе чаԝа дӧ щара парастьбу (Дәстпебун 2:24; 12:14-20; 20:2-7). Гава Усьв сәр ван тьшта дьфькьри, әԝи тедәрдьхьст, ԝәки бәр чʹәʹве Хԝәде чь рʹаст ә у чь на. Усьв Хԝәде һʹьз дькьр, ләма жи әԝи дьхԝәст ль гора принсипед Йаһоԝа бьжита. w22.08 26 ¶1-2

Бәре әм дьфькьрин кӧ әв рʹез бәʹса сахкьрьна симболик дькә, демәк рʹабуна рʹӧһʹани йа хьзмәткʹаред Хԝәде рʹожед ахьрийеда. Ле ньһа әм фәʹм дькьн кӧ әв рʹез бәʹса рʹабуна мьрийа дькә, йа кӧ ԝе дьнйа тʹәзәда дәстпебә. Әм чьрʹа ӧса дьфькьрьн? Чаԝа Ибо 17:16-да те готьне, хәбәра «ах» те һʹәсабе «ԝаре мьрийа», демәк мәзәл. Ләма жи әм фәʹм дькьн кӧ Данийел 12:2 бәʹса рʹабуна мьрийа дькә, йа кӧ ԝе паши хьлазбуна рʹожед ахьрийе, демәк паши шәрʹе Һармәгәдоне дәстпебә. Ӧса жи, Данийел 12:2, дьбежә кӧ һьнә кәс ԝе рʹабьн бона «жийина һәрһәйи, ИМ». Әв те һʹәсабе ԝәки мәрьвед кӧ ԝәʹде сәрԝертийа 1 000 сали жь мьрьне бенә рʹакьрьне, Йаһоԝа у Иса Мәсиһ нас бькьн, йан жи бәрдәԝам кьн «нас кьн» у гӧһ бьдьн ԝан, ԝе жийина һʹәта-һʹәтайе бьстиньн (Йуһʹәнна 17:3). w22.09 21 ¶6-7

Әв готьн һәмьки найе һʹәсабе, кӧ Йаһоԝа дьхԝазә ԝәки әм чʹәʹвгьрти итʹбарийа хԝә кәсед дьн биньн. Мәʹна ве готьне әв ә, кӧ гәрәке әм итʹбарийа хԝә ԝана биньн, чьмки ԝана избат кьрийә кӧ әԝана бь итʹбар ьн. Бәле, ԝәхт лазьм ә итʹбари бе ԛазанщкьрьне. Сәва кӧ әм итʹбарийа хԝә хушк-бьра биньн, гәрәке әм ԝана рʹьнд нас бькьн. Ләма жи ԝәʹде щьвата тʹәви ԝан хәбәр дьн. Тʹәви ԝан дәркʹәвьнә хьзмәтийе. Һьндава ԝанда бь сәбьр бьн у мәщале бьдьнә ԝан кӧ избат бькьн, ԝәки әԝана мәрьвнә бь итʹбар ьн. Сәрида, гава тӧ кәсәки тʹәзә нас дьки, дьбәкә тӧ ԝирʹа дәрберʹа дәрһәԛа тьштед шәхси гьли нәки. Чьԛас кӧ достийа ԝә ԛәԝи бә, һаԛас дьԛәԝьмә тӧ хԝә ида һе рʹьһʹәт тʹәхмин ки у дьле хԝә ԝирʹа вәки (Луԛа 16:10). Ле һәрге кәсәк дьле тә бешинә, гәрәке тӧ чь бьки? Дәрберʹа һәләԛәтийа хԝә тʹәв ԝи нәбьрʹә, ле һьнә ԝәʹдә бьде. Ӧса жи, сәва шашийед һьнәка, нәфькьрә кӧ хушк-бьред дьн жи бь итʹбар ниньн. w22.09 4 ¶7-8

Рʹуспики бь наве Мигел, дьфькьри кӧ һьнә бьред щабдар нәһәԛийе ль ԝи дькьн. Ле диса жи, әԝ сәрхԝә ма у алийе хԝәда һәр тьшт дькьр, ԝәки емосийед хԝә контрол кә. Әԝи тʹьме дӧа дькьр, ԝәки Йаһоԝа рʹӧһʹе пироз у ԛәԝате бьдә ԝи, кӧ әԝ бькарьбә сәбьр кә. Ӧса жи, әԝи әʹдәбйәтед мәда информасийа ӧса дьгәрʹийа, йа кӧ дькарьбу али ԝи бькә. Әԝ чь дәрс ә бона мә? Һәрге тӧ дьфькьри кӧ хушкәк йан бьрак нәһәԛийе ль тә дькә, рʹьһʹәт бьминә у зу нәхәйдә. Дьбәкә тӧ ньзани кӧ сәбәб чь бу, ԝәки әԝи ӧса хәбәр да йан ӧса кьр. Ләма жи дьле хԝә Йаһоԝарʹа вәкә у аликʹарийе жь ԝи бьхԝазә, ԝәки тӧ бькарьби сәр ве чәтьнайе бь щурʹәки майин бьньһерʹи. Шашийа ԝи бьбахшинә у нәфькьрә ԝәки нета ԝи хьраб ә (Мәтʹәлок 19:11). Бир нәкә кӧ Йаһоԝа һʹале тә дьвинә, у әԝе ԛәԝате бьдә тә, ԝәки тӧ бькарьби сәбьр ки (Ԝаиз 5:8). w22.11 21 ¶5

Тʹәви ԝан һәвалтийе бькә, йед кӧ Йаһоԝа һʹьз дькьн. Ча мә пешда гот, һәвалед кӧ тӧ хԝәрʹа дьжбери ԝе ль сәр пешдачуйина тә һʹӧкӧм бькьн (Мәтʹәлок 13:20). Бьраки бь наве Щулйен, йе кӧ ньһа рʹуспийе щьвате йә, ӧса дьбежә: «Гава әз щаһьл бум, ԝәʹде хьзмәтийе мьн хԝәрʹа һәвалед баш дитьн. Әԝ мьзгинванед хирәт бун, у ԝана али мьн кьр бьвиньм, ԝәки хьзмәти тьштәки чьԛас хԝәш ә. Ӧса жи мьн фәʹм кьр кӧ гава мьн тʹәне тʹәви кәсед ԛаси хԝә һәвалти дькьр, мьн нькарьбу һәвалед баш хԝәрʹа ԛазанщ кьра». Һәрге тӧ фәʹм бьки кӧ кәсәк щьватеда бона тә һәваләки баш нинә, гәрәке тӧ чь бьки? Ԛьрʹна йәкеда жи кәсед ӧса һәбун. Ләма жи, Паԝлосе шанди Тимотʹейорʹа готьбу, ԝәки әԝ хԝә жь кәсед кӧ ль гора хԝәстьна Хԝәде нажин, дур бьгьрә (2 Тимотʹейо 2:20-22). Достийа мә тʹәви Йаһоԝа гәләк ԛимәт ә, ләма жи гәрәке әм изьне нәдьн кӧ кәсәк ве достийа мә сьст бькә. w22.08 5-6 ¶13-15

Гәләк мәрьв ширәтед Хԝәде нәфрʹәт дькьн, ле әм рʹийа Хԝәде у ԛанунед ԝи гәләк һʹьз дькьн. Сәва кӧ әм дьһа зедә ван ԛануна ԛимәт кьн, ԝе баш бә кӧ әм ахьрийа гӧһдарикьрьне у нәгӧһдарикьрьне, бәрамбәри һәв кьн. Һьлбәт тә дитийә, ԝәки кәсед кӧ биланийа Йаһоԝа инкʹар дькьн, рʹасти чьԛас чәтьнайа тен. Дә ньһа бьдә һʹәсабе хԝә, кӧ жийина тә чьԛас жь йа ԝан четьр ә, чьмки тӧ гӧһ дьди Хԝәде у ль гора принсипед ԝи дьжийи (Зәбур 32:8, 10). Һәр кәс дькарә биланийа Йаһоԝа ԛазанщ кә, ле әԝ зоре тʹӧ кәси накә, ԝәки биланийа ԝи ԛәбул кьн. Диса жи, әԝ дина мә дькʹьшинә сәр ве йәке, кӧ чь те сәре ԝан мәрьва, йед кӧ гӧһ надьн биланийа ԝи (Мәтʹәлок 1:29-32). Әԝана ԝе «бәре әʹмәлед хԝә бьхԝьн». Ԝәхт шунда, щурʹе жийина ԝан ԝе хәм у тәнгасийа ԝанарʹа бинә у ахьрийеда жи ԝе бенә ԛьрʹкьрьне. Ле Йаһоԝа ԝан мәрьварʹа йед кӧ гӧһ дьдьн ширәтед ԝийә билан, ӧса соз дьдә: «Йе гӧһ дьдә мьн ԝе сах-сьламәт бьжи у жь саԝа хьрабийе тʹәвһәв нәбә» (Мәтʹәлок 1:33). w22.10 21 ¶11-13

Әм жь Йаһоԝа дьтьрсьн, демәк әм һаԛас ԛәдьре ԝи дьгьрьн кӧ әм нахԝазьн дьле ԝи бь кьред хԝә бешиньн (Мәтʹәлок 16:6). Кʹьтеба Пироз нишани мә дькә кӧ бь дитьна Хԝәде чь рʹаст ә у чь нә рʹаст ә, у гәләк фәрз ә кӧ әм хԝә ль ван принсипа бьгьрьн (2 Корьнтʹи 7:1). Һәрге әм ван тьшта бькьн, чь кӧ Йаһоԝа һʹьз дькә, у тьштед кӧ әԝ нәфрʹәт дькә, нәкьн, әме бәхтәԝар бьн (Зәбур 37:27; 97:10; Рʹомайи 12:9). Бәс нинә ԝәки кәсәк тʹәне бьзаньбә кӧ һʹӧкӧме Йаһоԝа һәйә, ԝәки ԛануна дайнә; гәрәке әԝ ӧса жи ль гора ван ԛануна бьжи (Рʹомайи 12:2). Гәрәке әм пе рʹабун-рʹуньштьна хԝә нишан кьн, ԝәки әм бь рʹасти баԝәр ьн кӧ ԛанун-принсипед Йаһоԝа бона кʹара мә нә (Мәтʹәлок 12:28). Даԝьд жи ӧса дьфькьри, ләма жи әԝи Йаһоԝарʹа гот: «Те рʹийед әʹмьр мьнва әʹйан ки. Шабунәкә мәзьн ә ль бәр диндара Тә, һʹәта-һʹәтайе хер у хԝәши дәсте Тәйи рʹастеда йә» (Зәбур 16:11). w22.10 8 ¶9-10

Ньһерʹандьна Иса һьндава хԝә рʹаст у бь мьлукти бу. Пешийа кӧ әԝ һатә сәр әʹрде, әԝи хьзмәта Йаһоԝада гәләк тьштед баш кьрьбу. Бь дәсте Иса, «һәр тьштед ль әʹрд у әʹзмана әʹфьринә» (Колоси 1:16). Ӧса те фәʹмкьрьне кӧ гава Иса һатә ньхӧмандьне, тьштед кӧ әԝи тʹәви Баве хԝә кьрьбу һатьн бира ԝи (Мәтта 3:16; Йуһʹәнна 17:5). Диса жи, Иса хԝә ԛӧрʹә нәдькьр. Әԝи хԝә тʹӧ щара жь кәсед дьн бьльндтьр нәдьгьрт. Әԝи шагьртед хԝәрʹа гот кӧ әԝ нәһатийә дьнйайе «кӧ жерʹа бәрдәстийе бькьн, ле ԝәки әԝ хԝәха бәрдәстийе бькә у әʹмьре хԝә бьдә, кӧ гәләка бькʹьрʹә» (Мәтта 20:28). Ӧса жи, Иса бь мьлукти ԛәбул кьр кӧ әԝ «нькарә хԝәсәрихԝә тьштәки бькә». Бәле, Иса йәки гәләк мьлук бу, у ԝе баш бә кӧ әм чʹәʹв бьдьнә ԝи. w22.05 24 ¶13

Пешийа кӧ бьбахшинә кәсәки Йаһоԝа һьлдьдә һʹәсаб һәла кәсе гӧнәкʹар заньбу ԝәки кьред ԝи шаш ьн йан на. Иса әв йәк рʹьнд зәлал кьрьбу (Луԛа 12:47, 48). Мәрьве кӧ һʹәмде хԝә хьрабийе дькә, демәк әԝе кӧ рʹьнд занә ԝәки кьред ԝи бәр чʹәʹве Хԝәде хьраб ьн, гӧнәки гьран дькә. Ве дәрәщеда Йаһоԝа дькарә сафи кә ԝәки нәбахшинә ԝи (Маркос 3:29; Йуһʹәнна 9:41). Ле гәло һеви һәйә кӧ әԝе бе бахшандьне? Бәле! Йаһоԝа һьлдьдә һʹәсаб, һәла кәсе гӧнәкʹар бь рʹасти жь дьл тʹобә дькә йан на. Тʹобәкьрьн әв ә, гава мәрьв «фькьр, ньһерʹандьн у нета хԝә дьгӧһезә». Мәрьве кӧ тʹобә дькә, бона кьред хԝәйә хьраб йан жи бона кӧ әԝи тьштед рʹаст нәкьрийә, пʹошман дьбә у дьлтәнг ә. Әԝ һьм сәва гӧне хԝә, һьм жи сәва ве йәке кӧ әԝи һәләԛәтийа хԝә тʹәви Йаһоԝа хьраб кьр, хәмгин ә. w22.06 5-6 ¶15-17

Дьжмьнед мә бь сайа медйа у малпәред сосйали, дәрһәԛа тʹәшкиләта мә у бьред щабдар дәрәԝа бәла дькьн (Зәбур 31:13). Һьнә бьра һатьнә гьртьне у ча зӧлмкʹар һатьнә диԝанкьрьне. Ԛьрʹна йәкеда, бӧхдан авитьнә Паԝлосе шанди у ле гьртьн. Чахе Паԝлосе шанди Рʹомеда кʹәтә кәле, һьнә хушк-бьра пьшта хԝә данә ԝи у ида пьштгьрийа ԝи нәдькьрьн (2 Тимотʹейо 1:8, 15; 2:8, 9). Дә бьдә бәр чʹәʹве хԝә Паԝлос чьԛас хәмгин бу у дьле ԝи гәләк ешийа. Әԝ гәләк щар бона ԝан рʹасти зӧлмийе дьһат у әʹмьре хԝә дькьрә бьн хофе (Кʹаред Шандийа 20:18-21; 2 Корьнтʹи 1:8). Сәд һʹәйф кӧ ԝана пьшта хԝә да ԝи. Ләма жи, әм әʹщебмайи наминьн кӧ Мире-щьна илаһи һʹьщуми сәр бьред щабдар дькә. Бь сайа һʹьщумкьрьнед ӧса, әԝ дьхԝазә амьнийа ԝан бьшкенә у мә бьтьрсинә (1 Пәтрус 5:8). Бәрдәԝам кьн хушк-бьра бьпарезьн у бь амьни пьштгьрийа ԝан бькьн (2 Тимотʹейо 1:16-18). w22.11 16-17 ¶8-11

Ча кʹьфш ә, әв мере кӧ тʹобә кьр, Щьһу бу. Щьһуйа баԝәр дькьр, кӧ Хԝәде йәк ә, ле кәсед жь мьләтед дьн баԝәр дькьрьн, ԝәки гәләк хӧдан һәнә (Дәркʹәтьн 20:2, 3; 1 Корьнтʹи 8:5, 6). Һәрге меред сущдаркьри жь мьләтед дьн буна, дьбәкә әԝи ӧса йе дьнрʹа бьгота: «Тӧ жь хӧдана натьрси». Ӧса жи, Иса нә кӧ бона мьләтед дьн, ле «тʹәне бона пәзед мала» Исраеле, һатьбу шандьн (Мәтта 15:24). Хԝәде Исраелийарʹа әʹйан кьрьбу, кӧ әԝе мьрийа рʹакә. Дьбәкә мере тʹобәдар әв йәк заньбу. Хенщи ве йәке, готьнед ԝи нишан дькьн, кӧ әԝи баԝәр дькьр, ԝәки Йаһоԝа ԝе Иса жь мьрьне рʹакә, сәва кӧ әԝ Пʹадшатийа Хԝәдеда сәрԝертийе бькә. Әԝ баԝәр бу кӧ Йаһоԝа ԝе ԝи жи жь мьрьне рʹакә. Чаԝа Щьһу, әви мери бешьк заньбу кӧ Йаһоԝа мәрьвед пешьн Адәм у Һәԝа щьнәтеда сәр әʹрде щиԝар кьрьбун. Ләма жи, ча те кʹьфше әԝи фәʹм дькьр, ԝәки Щьнәта дәрһәԛа кʹижане кӧ Иса Луԛа 23:43-да дьгот, бахчәки бәдәԝ ә, сәр рʹуйе әʹрде (Дәстпебун 2:15). w22.12 8-9 ¶2-3

Әм жи һʹәԝще рʹӧһʹе Хԝәде нә, сәва кӧ әм бькарьбьн хьзмәтийа хԝә биньн сери. Гәло чьрʹа? Чьмки Мире-щьна мьԛабьли мә шәрʹ дькә, ԝәки әм хьзмәтийа хԝә бьдьнә сәкьнандьне (Әʹйанти 12:17). Мире-щьна чьԛас жи жь мә ԛәԝаттьр ә, йәкә әм бь сайа хьзмәтийа хԝә сәрдькʹәвьн! (Әʹйанти 12:9-11) Гәло чаԝа? Гава әм хьзмәт дькьн, әм нишан дькьн, ԝәки әм Мире-щьна натьрсьн. Чьԛас әм хьзмәт дькьн, һаԛас Шәйтʹан дьдә дәр. Әм дькарьн баԝәр бьн, ԝәки рʹӧһʹе пироз ԛәԝате дьдә мә у Йаһоԝа жь мә рʹази йә (Мәтта 5:10-12; 1 Пәтрус 4:14). Бәле рʹӧһʹе Хԝәде дькарә ԛәԝате бьдә мә, ԝәки әм сәркʹәвьн (2 Корьнтʹи 4:7-9). Һәрге ӧса йә, әм чаԝа дькарьн бәрдәԝам кьн рʹӧһʹе Хԝәде бьстиньн? Лазьм ә кӧ әм һәр гав бона рʹӧһʹе пироз дӧа бькьн у баԝәр бьн, кӧ Йаһоԝа ԝе дӧайед мә бьбьһе. w22.11 5 ¶10-11

Һәрге әм гәләк хирәт бькьн, ԝәки тʹәви хушк-бьра әʹдьлайеда бьн, әме ӧса избат кьн кӧ әм бь рʹасти ԝана һʹьз дькьн. Әм дьхԝазьн бахшандьнеда чʹәʹв бьдьнә Йаһоԝа Хԝәде. Йаһоԝа һишт ԝәки Кӧрʹе ԝи бона гӧнед мә әʹмьре хԝә бьдә. Ләма жи, һәрге кәсәки һьмбәри мә гӧнә кьрьбә, гәрәке әм жи һазьр бьн ԝәки ԝи жь дьл бьбахшиньн. Әм нахԝазьн мина ԝи хӧламе хьраб бьн, йе кӧ Иса мәтʹәлока хԝәда бәʹса ԝи кьрьбу. Ахайе ԝи дәйне ԝийә мәзьн бахшандьбу ԝи, ле һәла һе паши ве йәке жи, әԝи хӧлами нәхԝәст дәйнәки бьчʹук йе хӧламәки дьн, бьбахшинә (Мәтта 18:23-35). Һәрге ортʹа тә у хушк йан бьракида проблемәк пешда бе, гәло тӧ дькари гава пешьн бавежи, ԝәки һун пешийа Биранине ль һәв бен? (Мәтта 5:23, 24) Кәсед кӧ ӧса дькьн нишан дькьн, ԝәки әԝана жь дьл Йаһоԝа у Иса Мәсиһ һʹьз дькьн. w23.01 29 ¶8-9

Рʹуспи дькарьн бь сайа пьрсед лайиԛ фәʹм бькьн, һәла хушк-бьра һʹәԝще чь нә (Мәтʹәлок 20:5). Гәло щәм ԝана епʹещә нан, ав, дәрман у тьштед дьн һәнә? Гәло дьбәкә әԝана ида хәбате ӧнда дькьн, йан жи пʹәре кʹьрийа ԝан хьлаз дьбә? Гәло ԝанрʹа аликʹари лазьм ә, кӧ алийе дәԝләтеда кʹомәке бьстиньн? Йаһоԝа дьхԝазә, кӧ әм гьшк ԛәнщийе бькьн у һәвдӧ ԛәԝи кьн (Галати 6:10). Һәла һе тьштәки бьчʹук жи, һәрге жь дьл бә, дькарә сәр кәсәки кӧ нәхԝәш ә ԛайим һʹӧкӧм кә. Мәсәлә, зарʹ дькарьн шькьла нәԛьш кьн, сәва кӧ дьле бьраки ша кьн. Щаһьл дькарьн бона хушкәке тьштед бона мале бькʹьрʹьн, йан жи шьхӧлед дьн бькьн. Хушк-бьред дьн дькарьн кәсәки нәхԝәшрʹа хԝарьне чекьн. Һьнәк хушк-бьра рʹазибуна хԝә бь сайа смса нишан дькьн. Һәрге әм «дьл бьдьнә һәв у аликʹарийа һәвдӧ бькьн», әме алийе хԝәда ԛәнщикә мәзьн бькьн (1 Тʹесалоники 5:11). w22.12 22 ¶2; 23 ¶5-6

Садуԛийа һәр пенщ кʹьтебед пешьн йед Ньвисаред Ибрани рʹьнд нас дькьрьн. Ле диса жи чʹәʹвед ԝана бона рʹастийед фәрз, кор бун. Мәсәлә, гава дәрһәԛа рʹабуна мьрийа пьрс данә Иса, әԝи щабәкә һʹәԝас да ԝан. Әԝи ԝанрʹа гот: «Ле дәрһәԛа рʹабуна мьрийада, чьма ԝә Кʹьтеба Мусада нәхԝәндийә сәрһатийа дара дьрʹийеда кӧ чаԝа Хԝәде Мусарʹа дьбежә: ‹Әз Хԝәдейе Бьраһим, Хԝәдейе Исһаԛ у Хԝәдейе Аԛуб ьм›?» (Маркос 12:18, 26). Садуԛийа әв йәк гәләк щара хԝәндьбу. Ле пьрса Иса әшкәрә дькьр кӧ ԝана рʹастикә фәрз ԛәбул нәдькьр. Ԝана баԝәр нәдькьр кӧ кәсед мьри ԝе рʹожәке диса вәгәрʹьн жийине (Луԛа 20:38). Әм жь готьнед Иса чь һин дьбьн? Гава әм Кʹьтеба Пироз дьхуньн, әм дьхԝазьн дина хԝә бьдьн сәр дәрсед кӧ әм жь рʹезәке йан жь сәрһатике һин дьбьн. Әм дьхԝазьн нә тʹәне рʹастийед сәрәкә фәʹм бькьн, ле ӧса жи рʹасти у принсипед кʹур, йед кӧ ча бежи вәшарти нә. w23.02 11 ¶9-10

Һʹәму шәʹдә, дәрһәԛа кʹижана рʹеза иройинда те готьне, рʹасти тәнгасийед гьран һатьн, ле Йаһоԝарʹа амьн ман (Ибрани 11:36-40). Гәло сәбьр у хирәта ԝан бадиһәԝа бу? Һәмьки на! Рʹаст ә, ԝана пекһатьна һʹәму созед Хԝәде бь чʹәʹве хԝә нәдитьн, ле ԝана диса жи һевийа хԝә Йаһоԝа дьани. Ӧса жи, ԝана заньбу кӧ Йаһоԝа жь ԝан рʹази йә, ләма жи дӧдьли нәдьбун кӧ ԝе пе чʹәʹве хԝә бьвиньн чаԝа созед Ԝи, ԝе бенә сери (Ибрани 11:4, 5). Амьнийа ԝан дькарә мә һелан кә, ԝәки әм жи һевийа хԝә һьндава Йаһоԝа ӧнда нәкьн. Иро һʹале дьнйайе чьԛас дьчә дьһа хьраб дьбә (2 Тимотʹейо 3:13). Рʹож бь рʹож, Мире-щьна хьзмәткʹаред Хԝәде дьщерʹьбинә. Чь жи һәбә, ԝәрә әм бь дьл у щан Йаһоԝарʹа хьзмәт кьн у дӧдьли нәбьн, ԝәки «әм гӧмана хԝә ль Хԝәдейе сах тиньн» (1 Тимотʹейо 4:10). w22.06 25 ¶17-18

Мәʹник кӧ чьрʹа әм гәрәке мьԛати сьһʹәт-ԛәԝата хԝә бьн, әԝ ә кӧ әм дьхԝазьн һʹәта кӧ мә те, Йаһоԝарʹа хьзмәт кьн (Маркос 12:30). Ләма жи әм тьштед ӧса кӧ дькарьн зьраре бьдьн сьһʹәт-ԛәԝата мә, накьн (Рʹомайи 12:1). Һьлбәт, щарна дәсте мәда нинә кӧ әм нәхԝәш нәкʹәвьн. Ле әм хирәт дькьн кӧ мьԛати сьһʹәта хԝә бьн, чьмки әм дьхԝазьн Баве хԝәйи әʹзманарʹа нишан кьн, ԝәки әм ԛимәт дькьн жийина кӧ әԝи дайә мә. Жь бо нәхԝәши у әʹмьре мәзьн дьбәкә әм ида нькарьн ча бәре гәләк тьшта бькьн. Ләма жи дьбәкә әм бона һʹале хԝә хәмгин ьн у бәрхԝә дькʹәвьн. Ле диса жи, әм гәрәке һʹәта кӧ дәсте мә те, рʹьнд мьԛати сьһʹәта хԝә бьн. Гәло чьрʹа? Чьмки әм әʹмьрда чьԛас мәзьн бьн жи, йан әм чьԛас нәхԝәш бьн жи, әм дькарьн мина Даԝьд Пʹадша пәсьне Йаһоԝа Хԝәде бьдьн. Һʹале мә чаԝа бә жи, әʹмьре мә бәр чʹәʹве Йаһоԝа гәләк ԛимәт ә у занәбуна ве йәке дьле мә рʹьһʹәт дькә! (Мәтта 10:29-31) Һәрге әм бьмьрьн жи, һʹьзрәта дьле Йаһоԝа әԝ ә, кӧ мә диса жь мьрьне рʹакә (Ибо 14:14, 15). Бәле, һʹәта кӧ әм сах бьн, әм дьхԝазьн бь дьл у щан сьһʹәт у жийина хԝә бьпʹарезьн. w23.02 20-21 ¶3-5

Гәло кәсед кӧ дькʹәвьнә нава әʹлаләта мәзьн, паши кӧ әԝана жь Һармәгәдоне сах дәрбаз бьн, навед ԝан ԝе һәла һе кʹьтеба жийинеда һәбә? Бәле! (Әʹйанти 7:14). Иса готьбу ԝәки кәсед кӧ бь симболик ча пәз тенә һʹәсабе «ԝе һәрʹьнә жийина һʹәта-һʹәтайе» (Мәтта 25:46). Диса жи, кәсед кӧ жь Һармәгәдоне дәрбаз бьн ԝе жийина һәрһәйи дәрберʹа нәстиньн. Ԝәʹде Сәрԝертийа Һʹәзарсали, Иса «ԝе шьвантийе ль ԝан бькә, ԝан бьбә сәр канийед ава жийине». Кәсед кӧ рʹебәрийа Иса ԛәбул кьн у ԝәʹде диԝанкьрьна хьлазийе ча мәрьвед амьн бенә һʹәсабе, навед ԝан ԝе кʹьтеба жийинеда сәр һʹәта-һʹәтайе бенә ньвисандьне (Әʹйанти 7:16, 17). Мәрьвед кӧ бь симболик тенә һʹәсабе бьзьн, ԝе Һармәгәдонеда бенә ԛьрʹкьрьне. Навед ԝан кʹьтеба жийинеда тʹӧнә. Иса готьбу кӧ әԝана ԝе сәр һʹәта-һʹәтайе бенә кʹӧтакьрьне (Мәтта 25:46). Бь рʹебәрийа Хԝәде, Паԝлосе шанди жи готьбу кӧ әԝана ԝе «ԝеранбуна һʹәта-һʹәтайе бьбиньн» (2 Тʹесалоники 1:9; 2 Пәтрус 2:9). w22.09 16 ¶7-8

Тʹәбийәтеда, малбәт дькарьн һеса бьн у шабуне бьстиньн. Әв йәк ԝе али ԝан бькә, ԝәки әԝана дьһа зедә һәвдӧ һʹьз бькьн. Йаһоԝа щийед гәләк хԝәш у бәдәԝ чекьрьнә, кʹидәре кӧ әм дькарьн һеса бьн у ләзәте бьстиньн. Гәләк малбәт һʹьз дькьн мешә, дәшт у зозанада, сәр чʹийа йан жи бәр дәве бәре ԝәʹде хԝә дәрбаз кьн. Дьнйа тʹәзәда, де-бав у зарʹ ԝе жь тьштед кӧ Йаһоԝа әʹфьрандьнә, һе зедә шабуне бьстиньн, чь кӧ ԝана әʹмьрада нәкьрьбу. Ԝи чахи, әме жь һʹәйԝана нәтьрсьн, у әԝе жи жь мә нәтьрсьн (Ишайа 11:6-9). Кʹаред дәсте Йаһоԝа ԝе мә һʹәта-һʹәтайе ша бькьн (Зәбур 22:26). Ле де-бавно, һун дькарьн иро жи али зарʹед хԝә бькьн, ԝәки әԝана жь тʹәбийәте шабуне бьстиньн. Һәрге һун бь сайа әʹфрина али зарʹед хԝә бькьн, кӧ әԝана Йаһоԝа дьһа баш нас бькьн, әԝана ԝе тʹәви гьлийед Даԝьд Пʹадша ԛайил бьн, йе кӧ гот: «Хӧдано, нава хԝәдейада йәки мина Тә тʹӧнә, нә жи мина кьред Тә, кьр һәнә» (Зәбур 86:8). w23.03 25 ¶16-17