Даԝьд Нәдьтьрсийа

Чахе тӧ дьтьрси, тӧ чь дьки?— Дьбәкә дьчи щәм де у баве хԝә, ԝәки әԝана али тә бькьн. Ле зани ԝәки хенщи де-баве тә диса кәсәк һәйә, йе кӧ дькарә али тә бькә. Әԝ жь һʹәмушка ԛәԝаттьр ә. Тӧ зани әв кʹи йә?— Бәле, әв Йаһоԝа Хԝәде йә. Ԝәре әм ньһа бона хортәки бь наве Даԝьд хәбәр дьн, дәрһәԛа кʹижани Кʹьтеба Пирозда ньвисар ә. Даԝьд заньбу, ԝәки Йаһоԝа тʹьме ԝе али ԝи бькә, ләма жи әԝ нәдьтьрсийа.

Чахе Даԝьд һе зарʹ бу, де-баве ԝи әԝ һин дькьрьн, ԝәки Йаһоԝа һʹәз бькә. Әв йәк али ԝи дькьр кӧ нәтьрсә һәла һе ԝи чахи жи, гава әԝ рʹасти һьнә тьштед хоф дьһат. Даԝьд заньбу кӧ Йаһоԝа досте ԝи йә, у ԝәки ԝе али ԝи бькә. Щарәке чахе әԝ бәр пез бу, ньшкева шерәки мәзьн дәркʹәт у пәзәкә ԝи гьрт! Ле тӧ зани Даԝьд чь кьр? Әԝи да пәй шер, у бь дәстед хԝә әԝ кӧшт! Щарәке жи, һʹьрчʹ пәза ԝи гьрт, ле Даԝьд әв һʹьрчʹ жи кӧшт! Тӧ чь дьфькьри, кʹи али Даԝьд кьр?— Бәле, Йаһоԝа али ԝи кьр.

Диса ԝәʹдәки ӧса һәбу, чахе Даԝьд мерхасийа хԝә да кʹьфше. Щьмәʹта Исраели мьԛабьли щьмәʹта дьн дәрдькʹәт. Әв Фьльсти бун. Йәк жь әскәред Фьльстийа гәләк бьльнд у тәрʹьки бу! Наве ԝи Голйатʹ бу. Голйатʹ ԛәрфе хԝә Исраелийа у Йаһоԝа дькьр. Әԝи дьготә әскәред Исраелийа, ԝәки дәркʹәвьн у тʹәви ԝи шәрʹ кьн. Тʹӧ кәс жь Исраелийа нәԝерьбу тʹәви ԝи шәрʹ кьра, чьмки әԝана дьтьрсийан. Ле чахе Даԝьд дәрһәԛа ԝе йәке бьһист, әԝи готә Голйатʹ: «Әзе дәркʹәвьм тʹәви тә шәрʹ бькьм! Йаһоԝа ԝе али мьн бькә, у әзе тә алт кьм!» Тӧ чь дьфькьри Даԝьд мерхас бу?— Әре, Даԝьд гәләк мерхас бу. Дьхԝази пебьһʹәси паше чь ԛәԝьми?

Даԝьд пенщ кәвьред пәʹн у шьдан һьлда, у чу тʹәви Голйатʹ шәрʹ кә. Чахе Голйатʹ, Даԝьд дит, әԝ әʹщебмайи ма у дәстпекьр ԛәрфе хԝә ԝи бькә, чьмки Даԝьд һе щаһьл бу. Ле Даԝьд готә ԝи: «Тӧ тʹәви мьн пе шур у рʹьме хԝә дәркʹәти, ле әз бь наве Йаһоԝа темә сәр тә!» Паше Даԝьд кәвьр дәрхьст, кьрә шьдана хԝә, бәрбь Голйатʹ рʹәви у әв кәвьр авитә ԝи. Әв кәвьр рʹастә-рʹаст әʹнийа Голйатʹ кʹәт! Һьнге Голйатʹ әʹрде кʹәт у мьр! Чахе Фьльстийа әв йәк дитьн, һʹәмушк жь тьрса рʹәвин. Гәло Даԝьд ча карьбу Голйатʹе тәрʹьки алт кьра, нә әԝ һе щаһьл бу?— Йаһоԝа али ԝи кьр, чьмки Йаһоԝа жь Голйатʹе тәрʹьки, ԛәԝаттьр бу!

Чь тӧ дькари жь мәсәла Даԝьд һин би?— Йаһоԝа жь һʹәмушка ԛәԝаттьр ә. У әԝ досте тә йә. Һәрге ӧса бьԛәԝьмә кӧ тӧ бьтьрси, бир нәкә ԝәки Йаһоԝа дькарә али тә бькә, кӧ мерхас би!