ನಮ್ಮ ಪತ್ರಿಕೆಗಳ ಅತ್ಯುತ್ತಮ ಉಪಯೋಗವನ್ನು ಮಾಡಿರಿ

¹ ನೀವು ವೃತ್ತಪತ್ರಿಕೆಗಳ ವ್ಯಾಪಾರ ಕಟ್ಟೆಯೊಂದನ್ನು ಸಮೀಪಿಸುವಾಗ, ನೀವೇನನ್ನು ನೋಡುತ್ತೀರಿ? ಪತ್ರಿಕೆಗಳು. ಬೀದಿಯ ಮೂಲೆಯ ಅಂಗಡಿಯೊಂದರಲ್ಲಿ, ಯಾವುದು ನಿಮ್ಮ ಗಮನವನ್ನು ಸೆಳೆಯುತ್ತದೆ? ಪತ್ರಿಕೆಗಳು. ಅಂಚೆಯವನು ತನ್ನ ಅಂಚೆಚೀಲದ ಭಾರದ ಕೆಳಗೆ ಬಾಗುವಂತೆ ಯಾವುದು ಮಾಡುತ್ತದೆ? ಪತ್ರಿಕೆಗಳು. ಹೀಗೆ, ಅನೇಕ ಜನರು ಏನನ್ನು ಓದುತ್ತಿದ್ದಾರೆ? ಪತ್ರಿಕೆಗಳು. 10ರಿಂದ 18ರ ನಡುವಿನ ವರ್ಷ ಪ್ರಾಯದ ಯುವ ಜನರಲ್ಲಿ, 10ರಲ್ಲಿ 9 ಮಂದಿ, ಮತ್ತು ಅದೇ ಪ್ರತಿಶತದಷ್ಟು ವಯಸ್ಕರು, ಪ್ರತಿ ತಿಂಗಳು ಕಡಿಮೆಪಕ್ಷ ಒಂದು ಪತ್ರಿಕೆಯನ್ನು ಓದುತ್ತಾರೆ ಎಂದು ಸಮೀಕ್ಷೆಗಳು ತೋರಿಸಿವೆ. ಲೋಕವು ಪತ್ರಿಕಾ ಪ್ರಜ್ಞೆಯುಳ್ಳದ್ದಾಗಿದೆ.

² ಪ್ರಾಮಾಣಿಕ ಹೃದಯದ ವ್ಯಕ್ತಿಗಳನ್ನು ಕಾವಲಿನಬುರುಜು ಮತ್ತು ಎಚ್ಚರ! ಪತ್ರಿಕೆಗಳ ಪ್ರಜ್ಞೆಯುಳ್ಳವರಾಗುವಂತೆ ನಾವು ಮಾಡಬಲ್ಲೆವೊ? ಹೌದು, ನಾವು ಕಾವಲಿನಬುರುಜು ಮತ್ತು ಎಚ್ಚರ! ಪತ್ರಿಕೆಗಳ ಪ್ರಜ್ಞೆಯುಳ್ಳವರಾಗಿರುವುದಾದರೆ ಹಾಗೆ ಮಾಡಬಲ್ಲೆವು. ನಮಗೆ ಯಾವುದು ಸಹಾಯ ಮಾಡಬಲ್ಲದು? ಈ ಸೂಚನೆಗಳನ್ನು ಪರಿಗಣಿಸಿರಿ:

◼ ಪತ್ರಿಕೆಗಳನ್ನು ಓದಿರಿ: ಸರಾಸರಿಯಾಗಿ, ತನ್ನ ಸರ್ಕಿಟ್‌ನಲ್ಲಿರುವ 3 ಮಂದಿ ಪ್ರಚಾರಕರಲ್ಲಿ ಕೇವಲ 1 ಪ್ರಚಾರಕನು, ಕಾವಲಿನಬುರುಜು ಮತ್ತು ಎಚ್ಚರ! ಪತ್ರಿಕೆಗಳ ಪ್ರತಿಯೊಂದು ಸಂಚಿಕೆಯನ್ನು ಮುಖಪುಟದಿಂದ ಕೊನೆಯ ಪುಟದ ವರೆಗೆ ಓದುತ್ತಾನೆಂದು ಒಬ್ಬ ಸಂಚರಣ ಮೇಲ್ವಿಚಾರಕನು ವರದಿಸಿದನು. ನೀವು ಹಾಗೆ ಓದುತ್ತೀರೊ? ಪ್ರತಿಯೊಂದು ಲೇಖನವನ್ನು ನೀವು ಓದಿದಂತೆ, ‘ಈ ಸಮಾಚಾರವನ್ನು ಯಾರು—ಒಬ್ಬ ತಾಯಿ, ಒಬ್ಬ ಅಜ್ಞೇಯತಾವಾದಿ, ಒಬ್ಬ ವ್ಯಾಪಾರಸ್ಥ, ಒಬ್ಬ ಯೌವನಸ್ಥನು—ಗಣ್ಯಮಾಡಸಾಧ್ಯವಿದೆ?’ ಎಂದು ಸ್ವತಃ ಕೇಳಿಕೊಳ್ಳಿರಿ. ನಿಮ್ಮ ವೈಯಕ್ತಿಕ ಪ್ರತಿಯಲ್ಲಿ, ಈ ಪತ್ರಿಕೆಯನ್ನು ನೀಡುವಾಗ ನೀವು ಉಪಯೋಗಿಸಸಾಧ್ಯವಿರುವಂತಹ ಒಂದೆರಡು ಅಂಶಗಳನ್ನು ಗುರುತುಮಾಡಿಕೊಳ್ಳಿರಿ. ತದನಂತರ ಆ ವಿಷಯದಲ್ಲಿ, ಕೇವಲ ಒಂದು ಅಥವಾ ಎರಡು ವಾಕ್ಯಗಳಲ್ಲಿ ನೀವು ಆಸಕ್ತಿಯನ್ನು ಹೇಗೆ ಕೆರಳಿಸಬಹುದೆಂಬುದರ ಕುರಿತಾಗಿ ಆಲೋಚಿಸಿರಿ.

◼ ಖಚಿತವಾದ ಒಂದು ಪತ್ರಿಕಾ ಆರ್ಡರ್‌ ಅನ್ನು ಹೊಂದಿರ್ರಿ: ಪ್ರತಿ ಸಂಚಿಕೆಯ ಖಚಿತ ಸಂಖ್ಯೆಯ ಪ್ರತಿಗಳಿಗಾಗಿ, ಪತ್ರಿಕೆಗಳನ್ನು ನಿರ್ವಹಿಸುತ್ತಿರುವ ಸಹೋದರರೊಂದಿಗೆ ವಾಸ್ತವಿಕವಾದ ಆರ್ಡರ್‌ ಅನ್ನು ಇಟ್ಟುಕೊಂಡಿರಿ. ಈ ರೀತಿಯಲ್ಲಿ, ನೀವು ಮತ್ತು ನಿಮ್ಮ ಕುಟುಂಬವು ಪತ್ರಿಕೆಗಳ ಒಂದು ಕ್ರಮವಾದ ಮತ್ತು ಸಾಕಷ್ಟು ಪ್ರಮಾಣದ ಸರಬರಾಯಿಯನ್ನು ಹೊಂದಿರುವುದು.

◼ ಒಂದು ಕ್ರಮವಾದ ಪತ್ರಿಕಾ ದಿನವನ್ನು ಶೆಡ್ಯೂಲ್‌ ಮಾಡಿರಿ: ಅನೇಕ ಸಭೆಗಳು, ಪ್ರಧಾನವಾಗಿ ಪತ್ರಿಕಾ ಸಾಕ್ಷಿಕಾರ್ಯಕ್ಕಾಗಿ ಒಂದು ನಿಯುಕ್ತವಾದ ದಿನವನ್ನು ಬದಿಗಿರಿಸಿವೆ. ಸಭೆಯ ಪತ್ರಿಕಾ ದಿನವನ್ನು ನೀವು ಬೆಂಬಲಿಸಬಲ್ಲಿರೊ? ಬೆಂಬಲಿಸಸಾಧ್ಯವಿಲ್ಲದಿರುವಲ್ಲಿ, ಪತ್ರಿಕೆಯ ಬೀದಿ ಸಾಕ್ಷಿಕಾರ್ಯಕ್ಕಾಗಿ ಮತ್ತು ಮನೆಯಿಂದ ಮನೆಯ ಹಾಗೂ ಪತ್ರಿಕಾ ಮಾರ್ಗಗಳ ಮೂಲಕ, ಪತ್ರಿಕೆಗಳ ವೈಯಕ್ತಿಕ ವಿತರಣೆಗಾಗಿ ಸ್ವಲ್ಪ ಸೇವಾ ಸಮಯವನ್ನು ನಿಯತ ಕಾಲಿಕವಾಗಿ ಉಪಯೋಗಿಸಲು ಪ್ರಯತ್ನಿಸಿರಿ.

◼ “ಕಾವಲಿನಬುರುಜು” ಮತ್ತು “ಎಚ್ಚರ!” ಪತ್ರಿಕೆಗಳ ಪ್ರಜ್ಞೆಯುಳ್ಳವರಾಗಿರ್ರಿ: ಪ್ರಯಾಣಿಸುವಾಗ ಅಥವಾ ಶಾಪಿಂಗ್‌ ಮಾಡುವಾಗ, ನಿಮ್ಮೊಂದಿಗೆ ಪತ್ರಿಕೆಗಳ ಪ್ರತಿಗಳನ್ನು ಕೊಂಡೊಯ್ಯಿರಿ. ನೀವು ಸಹಕಾರ್ಮಿಕರು, ನೆರೆಯವರು, ಶಾಲಾಸಹಪಾಠಿಗಳು, ಅಥವಾ ಶಿಕ್ಷಕರೊಂದಿಗೆ ಮಾತಾಡುವಾಗ ಅವುಗಳನ್ನು ನೀಡಿರಿ. ಆಗಾಗ್ಗೆ ಪ್ರಯಾಣಿಸುವ ಒಬ್ಬ ದಂಪತಿಗಳು, ತಮ್ಮ ಪಕ್ಕದಲ್ಲಿ ಕುಳಿತುಕೊಂಡಿರುವ ಪ್ರಯಾಣಿಕನೊಂದಿಗೆ ಸಂಭಾಷಣೆಯೊಂದನ್ನು ಆರಂಭಿಸಲಿಕ್ಕಾಗಿ, ಪ್ರಚಲಿತ ಪತ್ರಿಕೆಗಳಲ್ಲಿರುವ ಅಂಶಗಳಲ್ಲಿ ಒಂದನ್ನು ಉಪಯೋಗಿಸುತ್ತಾರೆ. ಅವರು ಅನೇಕ ಆನಂದಭರಿತ ಅನುಭವಗಳನ್ನು ಆನಂದಿಸಿದ್ದಾರೆ. ಕೆಲವು ಯುವ ಜನರು, ತಮ್ಮ ಶಿಕ್ಷಕರಿಗೆ ಅಥವಾ ಜೊತೆ ವಿದ್ಯಾರ್ಥಿಗಳಿಗೆ ಆಸಕ್ತಿಯನ್ನು ಉಂಟುಮಾಡುವುದೆಂದು ತಮಗೆ ಅನಿಸುವ ಲೇಖನಗಳನ್ನು ಕ್ರಮವಾಗಿ ಶಾಲೆಗೆ ತರುತ್ತಾರೆ. ನಿಮ್ಮ ನೆರೆಹೊರೆಯ ಅಂಗಡಿಗಳಿಗೆ ನೀವು ಚಿಕ್ಕ ಸಂಚಾರಗಳನ್ನು ಮಾಡುವಾಗಲೂ ನಿಮ್ಮೊಂದಿಗೆ ಪ್ರತಿಗಳನ್ನು ಕೊಂಡೊಯ್ಯಿರಿ, ಮತ್ತು ನೀವು ನಿಮ್ಮ ವ್ಯಾಪಾರವನ್ನು ಮುಗಿಸಿದ ಬಳಿಕ, ಅವುಗಳನ್ನು ವ್ಯಾಪಾರಿಗಳಿಗೆ ನೀಡಿರಿ. ನಮ್ಮಲ್ಲಿ ಅನೇಕರು ಕ್ರಮವಾಗಿ ಪೆಟ್ರೋಲನ್ನು ತುಂಬಿಸಿಕೊಳ್ಳುತ್ತೇವೆ; ಪೆಟ್ರೋಲ್‌ ಸ್ಟೇಷನ್‌ನ ಸೇವಕನಿಗೆ ಪತ್ರಿಕೆಗಳನ್ನು ಏಕೆ ನೀಡಬಾರದು? ಸಂಬಂಧಿಕರು ಭೇಟಿ ಮಾಡುವಾಗ, ನೀವು ಸಾರ್ವಜನಿಕ ವಾಹನ ಸೌಕರ್ಯವನ್ನು ಉಪಯೋಗಿಸುವಾಗ, ಅಥವಾ ನೀವು ಒಂದು ಭೇಟಿ ನಿಶ್ಚಯಕ್ಕಾಗಿ (ಅಪಾಇಂಟ್‌ಮಂಟ್‌) ಕಾಯುತ್ತಿರುವಾಗ, ಅವುಗಳನ್ನು ಸಿದ್ಧವಾಗಿಡಿರಿ. ಸೂಕ್ತವಾದ ಇತರ ಸಂದರ್ಭಗಳ ಕುರಿತು ನೀವು ಯೋಚಿಸಬಲ್ಲಿರೊ?

◼ ಸಂಕ್ಷಿಪ್ತವಾದ ಒಂದು ಪತ್ರಿಕಾ ನಿರೂಪಣೆಯನ್ನು ತಯಾರಿಸಿರಿ: ಕೇವಲ ಸ್ವಲ್ಪ ವಿಷಯವನ್ನು ಹೇಳಲು ಯೋಜಿಸಿರಿ, ಆದರೆ ಅದನ್ನು ಸಮರ್ಪಕವಾಗಿ ಹೇಳಿರಿ. ಉತ್ಸಾಹಿಗಳಾಗಿರ್ರಿ. ಹೃದಯಕ್ಕೆ ರಂಜಿಸುವಂತೆ ಮಾತಾಡಿರಿ. ನಿರ್ದಿಷ್ಟ ವಿಷಯದ ಕುರಿತು ಮಾತಾಡಿರಿ. ಲೇಖನವೊಂದರಿಂದ ಒಂದು ವಿಚಾರವನ್ನು ಆರಿಸಿಕೊಳ್ಳಿರಿ, ಕೆಲವು ಮಾತುಗಳಲ್ಲಿ ಅದನ್ನು ವ್ಯಕ್ತಪಡಿಸಿರಿ, ಮತ್ತು ಪತ್ರಿಕೆಗಳನ್ನು ನೀಡಿರಿ. ಅತ್ಯುತ್ತಮವಾದ ನಿರೂಪಣೆಯು, ಆಸಕ್ತಿಭರಿತವಾದ ಒಂದು ವಿಷಯದ ಮೇಲೆ ಪ್ರಶ್ನೆಯನ್ನು ಎಬ್ಬಿಸುತ್ತದೆ ಮತ್ತು ತದನಂತರ ಶಾಸ್ತ್ರೀಯ ಉತ್ತರವನ್ನು ಕೊಡುವಂತಹ ಒಂದು ಲೇಖನದ ಕಡೆಗೆ ನಿರ್ದೇಶಿಸುತ್ತದೆ. ಇದು ಹೇಗೆ ಮಾಡಲ್ಪಡಬಹುದು ಎಂಬುದರ ಕುರಿತಾಗಿರುವ ಕೆಲವು ಉದಾಹರಣೆಗಳನ್ನು ಪರಿಗಣಿಸಿರಿ:

³ ಅಧಿಕಗೊಳ್ಳುತ್ತಿರುವ ಪಾತಕದ ಪ್ರಮಾಣದ ಕುರಿತಾದ ಲೇಖನವನ್ನು ನೀವು ಎತ್ತಿತೋರಿಸುತ್ತಿರುವುದಾದರೆ, ನೀವು ಹೀಗೆ ಕೇಳಸಾಧ್ಯವಿದೆ:

◼ “ನಾವು ರಾತ್ರಿಯಲ್ಲಿ ಪಾತಕದ ಭಯವಿಲ್ಲದೆ ಮಲಗಲು ಶಕ್ತರಾಗುವಂತೆ ಸಾಧ್ಯಮಾಡಲು ನಮಗೆ ಯಾವುದರ ಆವಶ್ಯಕತೆಯಿದೆ?” ವಿಷಯಗಳು ಹೆಚ್ಚು ಉತ್ತಮಗೊಳ್ಳುವುದರ ಕುರಿತಾಗಿ ಮನೆಯವನು ನಿರಾಶಾವಾದಿಯಾಗಿರಬಹುದು. ಅನೇಕ ಜನರು ಅದೇ ರೀತಿ ಭಾವಿಸುತ್ತಾರೆ ಎಂದು ನೀವು ಉತ್ತರಿಸಸಾಧ್ಯವಿದೆ ಮತ್ತು ಅವನಿಗೆ ಆಸಕ್ತಿಭರಿತವಾದದ್ದಾಗಿರುವುದು ಎಂದು ನೀವು ನಂಬುವ ಯಾವುದೋ ಸಮಾಚಾರವು ನಿಮ್ಮಲ್ಲಿದೆಯೆಂದು ಕೂಡಿಸಿರಿ. ತದನಂತರ ಆ ಲೇಖನದಲ್ಲಿರುವ ಸೂಕ್ತವಾದ ಅಂಶಕ್ಕೆ ನಿರ್ದೇಶಿಸಿರಿ.

⁴ ಕುಟುಂಬ ಜೀವನದ ಕುರಿತಾದ ಒಂದು ಲೇಖನವನ್ನು ನೀಡುವಾಗ, ನೀವು ಹೀಗೆ ಹೇಳಬಹುದು:

◼ “ಈ ದಿವಸಗಳಲ್ಲಿ ಒಂದು ಜೀವನೋಪಾಯವನ್ನು ಮಾಡುವುದು ಮತ್ತು ಕುಟುಂಬವೊಂದನ್ನು ಬೆಳೆಸುವುದು, ಒಂದು ನೈಜ ಪಂಥಾಹ್ವಾನವಾಗಿದೆಯೆಂದು ಅನೇಕ ಜನರು ಕಂಡುಕೊಳ್ಳುತ್ತಾರೆ. ಆ ವಿಷಯದ ಮೇಲೆ ಅನೇಕ ಪುಸ್ತಕಗಳು ಬರೆಯಲ್ಪಟ್ಟಿವೆ, ಆದರೆ ನಮ್ಮ ಸಮಸ್ಯೆಗಳಿಗಿರುವ ಪರಿಹಾರಗಳ ಕುರಿತು ಪರಿಣತರು ಸಹ ಏಕಾಭಿಪ್ರಾಯವನ್ನು ಸೂಚಿಸುವುದಿಲ್ಲ. ಭರವಸಾರ್ಹವಾದ ಮಾರ್ಗದರ್ಶನೆಯನ್ನು ಪಡೆದುಕೊಳ್ಳಲಿಕ್ಕಾಗಿ ನಾವು ಬೇರೆ ಎಲ್ಲಿಗಾದರೂ ಹೋಗಬಲ್ಲೆವೊ?” ಬಳಿಕ ಆ ಪತ್ರಿಕೆಯಲ್ಲಿರುವ ನಿರ್ದಿಷ್ಟ ಹೇಳಿಕೆಯೊಂದರ ಕಡೆಗೆ ನಿರ್ದೇಶಿಸಿರಿ.

⁵ ಸಾಮಾಜಿಕ ಸಮಸ್ಯೆಯೊಂದರ ಮೇಲಿನ ಲೇಖನವನ್ನು ಪ್ರದರ್ಶಿಸುತ್ತಿರುವಾಗ, ನೀವು ಈ ರೀತಿಯ ಪ್ರಸ್ತಾಪವನ್ನು ಮಾಡಬಹುದು:

◼ “ಇಂದು ಅಧಿಕಾಂಶ ಜನರು ಒತ್ತಡದ ಕೆಳಗಿದ್ದಾರೆ. ನಾವು ಈ ರೀತಿ ಜೀವಿಸುವಂತೆ ದೇವರು ಎಂದೂ ಉದ್ದೇಶಿಸಿರಲಿಲ್ಲ.” ತದನಂತರ, ಈ ಲೇಖನದಲ್ಲಿರುವ ವಿಷಯವು, ಈಗ ಜೀವನದ ಸಮಸ್ಯೆಗಳನ್ನು ನಿಭಾಯಿಸಲು ಹೇಗೆ ಸಹಾಯ ಮಾಡಬಲ್ಲದು ಮತ್ತು ಭವಿಷ್ಯತ್ತಿನಲ್ಲಿ ಶಾಶ್ವತವಾದ ಒಂದು ಪರಿಹಾರಕ್ಕಾಗಿ ನಿರೀಕ್ಷೆಯನ್ನು ಹೇಗೆ ಒದಗಿಸಬಲ್ಲದು ಎಂಬುದನ್ನು ತೋರಿಸಿರಿ.

⁶ ಬೀದಿ ಸಾಕ್ಷಿಕಾರ್ಯವು ಪರಿಣಾಮಕಾರಿಯಾಗಿದೆ: ಜನವರಿ 1940ರ ಇನ್‌ಫಾರ್‌ಮಂಟ್‌ (ನಮ್ಮ ರಾಜ್ಯದ ಸೇವೆ)ನ ಸಂಚಿಕೆಯಲ್ಲಿ, ಪತ್ರಿಕೆಗಳನ್ನು ಉಪಯೋಗಿಸಿ ಬೀದಿ ಸಾಕ್ಷಿಕಾರ್ಯವನ್ನು ಮಾಡಲಿಕ್ಕಾಗಿ, ಪ್ರತಿ ವಾರ ವಿಶೇಷ ದಿನವೊಂದನ್ನು ಶೆಡ್ಯೂಲ್‌ ಮಾಡುವಂತೆ ಮೊತ್ತಮೊದಲ ಬಾರಿಗೆ ಪ್ರಚಾರಕರಿಗೆ ಉತ್ತೇಜನವು ಕೊಡಲ್ಪಟ್ಟಿತ್ತು. ಆಗಿಂದಾಗ್ಗೆ ನೀವು ಬೀದಿ ಸಾಕ್ಷಿಕಾರ್ಯದಲ್ಲಿ ಒಳಗೂಡುತ್ತೀರೊ? ನೀವು ಒಳಗೂಡುತ್ತಿರುವಲ್ಲಿ, ನೀವು ಉಪಯೋಗಿಸುವ ವಿಧಾನವು ನಿಜವಾಗಿಯೂ ಪರಿಣಾಮಕಾರಿಯಾಗಿದೆಯೊ? ಕೆಲವು ಪ್ರಚಾರಕರು ಕಾರ್ಯಮಗ್ನವಾಗಿರುವ ಬೀದಿಯ ಮೂಲೆಯಲ್ಲಿ ನಿಂತುಕೊಂಡು, ಅನೇಕ ಜನರು ಗಮನಿಸಲ್ಪಡದೆ ಹಾದುಹೋಗುತ್ತಿರುವಾಗ, ಒಬ್ಬರೊಂದಿಗೊಬ್ಬರು ಮಾತಾಡುತ್ತಿರುವುದನ್ನು ಗಮನಿಸಲಾಗಿದೆ. ಪತ್ರಿಕೆಗಳನ್ನು ಹಿಡಿದುಕೊಂಡು ಪರಸ್ಪರ ಜೊತೆಯಾಗಿ ನಿಂತುಕೊಳ್ಳುವುದಕ್ಕೆ ಬದಲಾಗಿ, ಪ್ರತ್ಯೇಕಗೊಂಡು, ಜನರನ್ನು ಸಮೀಪಿಸುವುದು ಹೆಚ್ಚು ಪರಿಣಾಮಕಾರಿಯಾಗಿದೆ. ಅಪರಿಚಿತರು ಏಕಮಾತ್ರ ವ್ಯಕ್ತಿಯಿಂದ ಸಮೀಪಿಸಲ್ಪಡುವುದಾದರೆ, ಅವರು ನಿಂತುಕೊಂಡು ಸಂಕ್ಷಿಪ್ತವಾಗಿ ಆಲಿಸಬಹುದು, ಆದರೆ ಸಂಭಾಷಣೆಯಲ್ಲಿ ತೊಡಗಿರುವ ಒಂದು ಗುಂಪನ್ನು ಸಮೀಪಿಸಲು ಕೆಲವೇ ದಾರಿಹೋಕರು ಆರಂಭದ ಹೆಜ್ಜೆಯನ್ನು ತೆಗೆದುಕೊಳ್ಳುವರು. ಬೀದಿಯಲ್ಲಿ ನಾವು ಬಹಳಷ್ಟು ಗಮನವನ್ನು ಸೆಳೆಯುವುದರಿಂದ, ದೇವರ ಶುಶ್ರೂಷಕರಿಗೆ ಯೋಗ್ಯವಾಗಿರುವಂತೆ, ಒಳ್ಳೆಯ ರೀತಿಯಲ್ಲಿ ತಲೆಬಾಚಿರಲು ಹಾಗೂ ಗಂಭೀರವಾದ ಉಡುಪನ್ನು ಧರಿಸಿರುವವರಾಗಿರಲು ವಿಶೇಷವಾದ ಅಗತ್ಯವಿದೆ.—1 ತಿಮೊ. 2:9, 10.

⁷ ಮನೆ ಬಾಗಿಲುಗಳಲ್ಲಿ ಪತ್ರಿಕೆಗಳನ್ನು ವಿತರಿಸುವುದು: ಬೀದಿ ಸಾಕ್ಷಿಕಾರ್ಯವು, ಪತ್ರಿಕೆಗಳನ್ನು ನೀಡುವ ಏಕಮಾತ್ರ ಮಾರ್ಗವಾಗಿರುವುದಿಲ್ಲ; ಅವುಗಳನ್ನು ಮನೆಯಿಂದ ಮನೆಯ ಶುಶ್ರೂಷೆಯಲ್ಲಿ ಸಹ ನೀಡಸಾಧ್ಯವಿದೆ ಮತ್ತು ನೀಡತಕ್ಕದ್ದು. ಜನರನ್ನು ಅವರ ಮನೆಗಳಲ್ಲಿ ಭೇಟಿ ಮಾಡುವಾಗ, ನಾವು ಸಾಮಾನ್ಯವಾಗಿ ಮೂರರಿಂದ ಎಂಟು ನಿಮಿಷಗಳ ವರೆಗೆ ಮಾತಾಡಲು, ಒಂದೆರಡು ಶಾಸ್ತ್ರವಚನಗಳನ್ನು ಹಂಚಿಕೊಳ್ಳಲು, ಮತ್ತು ಆ ತಿಂಗಳಿಗಾಗಿ ಸೂಚಿಸಲ್ಪಟ್ಟಿರುವ ನೀಡುವಿಕೆಯನ್ನು—ಅದು ಒಂದು ಪುಸ್ತಕ, ಪುಸ್ತಿಕೆ, ಅಥವಾ ಚಂದಾ ಆಗಿರಬಹುದು—ಕೊಡಲು ಯೋಜಿಸುತ್ತೇವೆ. ಆದರೆ ಸಭೆಯು ಪತ್ರಿಕಾ ದಿನವೊಂದನ್ನು ಬದಿಗಿರಿಸುವಾಗ, (ಅನೇಕ ಸಭೆಗಳು ಪ್ರತಿ ಶನಿವಾರ ಹಾಗೆ ಮಾಡುತ್ತವೆ,) ನೀವು ಬೀದಿ ಸಾಕ್ಷಿಕಾರ್ಯವನ್ನು ಅಪರಾಹ್ಣದಲ್ಲಿ ಮಾಡಲು, ಆದರೆ ಕೇವಲ ಪತ್ರಿಕೆಗಳನ್ನು ನೀಡುವ ಮೂಲಕ, ಬೆಳಗ್ಗೆ ಮನೆಯಿಂದ ಮನೆಯ ಸಾಕ್ಷಿಕಾರ್ಯವನ್ನು ಮಾಡಲು ಆರಿಸಿಕೊಳ್ಳಬಹುದು. ಅಂತಹ ಪತ್ರಿಕಾ ಸಾಕ್ಷಿಕಾರ್ಯದ ಸಮಯದಲ್ಲಿ, ಮನೆ ಬಾಗಿಲುಗಳಲ್ಲಿನ ನಮ್ಮ ನಿರೂಪಣೆಯು ಸಂಕ್ಷಿಪ್ತವಾಗಿರುತ್ತದೆ—ಸುಮಾರು 30ರಿಂದ 60 ಸೆಕೆಂಡುಗಳಿಗೆ ಸಾಕಾಗುವಷ್ಟು ಮಾತ್ರ—ಮತ್ತು ಸಾಮಾನ್ಯವಾಗಿ ಶಾಸ್ತ್ರವಚನವೊಂದು ತೋರಿಸಲ್ಪಡದೇ ಪತ್ರಿಕೆಗಳು ನೀಡಲ್ಪಡುತ್ತವೆ. ಆಸಕ್ತಿ ತೋರಿಸಲ್ಪಟ್ಟದ್ದನ್ನು ಗುರುತು ಮಾಡಿಟ್ಟುಕೊಂಡು, ಆಸಕ್ತ ವ್ಯಕ್ತಿಗಳನ್ನು ಪುನಃ ಭೇಟಿ ಮಾಡತಕ್ಕದ್ದು. ಅಥವಾ ಅದೇ ಟೆರಿಟೊರಿಯನ್ನು ತದನಂತರದ ತಾರೀಖಿನಂದು, ನಿಧಾನ ಗತಿಯಲ್ಲಿ, ಕ್ಯಾಂಪೇನ್‌ ಸಾಹಿತ್ಯವನ್ನು ಉಪಯೋಗಿಸುತ್ತಾ ಆವರಿಸಸಾಧ್ಯವಿದೆ. ಆದರೆ ಮನೆಯಿಂದ ಮನೆಯ ವೇಗಗತಿಯ ಪತ್ರಿಕಾ ಸಾಕ್ಷಿಕಾರ್ಯದ ಮೌಲ್ಯವನ್ನು ಎಂದೂ ಕಡಿಮೆ ಅಂದಾಜುಮಾಡಬಾರದಾಗಿದೆ. ವಾಸ್ತವವಾಗಿ, ಬೀದಿ ಸಾಕ್ಷಿಕಾರ್ಯಕ್ಕೆ ಹೋಲಿಸುವಾಗ, ಮನೆ ಬಾಗಿಲುಗಳಲ್ಲಿ ಪತ್ರಿಕೆಗಳನ್ನು ನೀಡುವುದು ಅನೇಕವೇಳೆ ಇದನ್ನು ಆರಂಭಿಸುವುದನ್ನು ಹೆಚ್ಚು ಸುಲಭವನ್ನಾಗಿ ಮಾಡುತ್ತದೆ:

⁸ ಪತ್ರಿಕಾ ಮಾರ್ಗಗಳು: ಯಾರಿಗೆ ಪತ್ರಿಕಾ ಮಾರ್ಗಗಳಿವೆಯೊ ಅವರು, ಟೆರಿಟೊರಿಗಳು ಕ್ರಮವಾಗಿ ಆವರಿಸಲ್ಪಡುತ್ತಿರುವುದಾದರೂ ಅನೇಕ ಪತ್ರಿಕೆಗಳನ್ನು ನೀಡುತ್ತಾರೆ. ಪತ್ರಿಕಾ ಮಾರ್ಗಗಳು, ಸಂಭಾವ್ಯ ಮನೆ ಬೈಬಲ್‌ ಅಭ್ಯಾಸಗಳ ಅತ್ಯುತ್ತಮ ಮೂಲವಾಗಿವೆ.

⁹ ಪತ್ರಿಕೆಗಳನ್ನು ತಲಪಿಸಲಿಕ್ಕಾಗಿ ನೀವು ಕ್ರಮವಾದ ಪುನರ್ಭೇಟಿಗಳನ್ನು ಮಾಡುವಾಗ, ನಿಮ್ಮ ಮತ್ತು ಮನೆಯವನ ಮಧ್ಯೆ ಹೃತ್ಪೂರ್ವಕತೆ ಮತ್ತು ಗೆಳೆತನವು ಬೆಳೆಯುವುದನ್ನು ನೀವು ಕಂಡುಕೊಳ್ಳುವಿರಿ. ನೀವು ಹೆಚ್ಚು ಉತ್ತಮವಾಗಿ ಅವರೊಂದಿಗೆ ಪರಿಚಿತರಾದಷ್ಟು, ಶಾಸ್ತ್ರೀಯ ವಿಷಯಗಳ ಕುರಿತು ಸಂಭಾಷಿಸುವುದು ಹೆಚ್ಚು ಸುಲಭವಾಗಿರುವುದು. ಇದು ಫಲಪ್ರದವಾದ ಬೈಬಲ್‌ ಅಭ್ಯಾಸವನ್ನು ಆರಂಭಿಸುವುದಕ್ಕೆ ನಡಿಸಬಲ್ಲದು. ಪತ್ರಿಕೆಗಳಿಗಾಗಿ ಸ್ಪಷ್ಟವಾದ ಗಣ್ಯತೆಯು ತೋರಿಸಲ್ಪಡುವ ಪುನರ್ಭೇಟಿಗಳಲ್ಲಿ, ಒಂದು ಚಂದಾವನ್ನು ನೀಡಿರಿ. ಮತ್ತು ಪ್ರತಿ ಬಾರಿ ನೀವು ಮನೆಯವನನ್ನು ಸಂಪರ್ಕಿಸುವಾಗ, ನೀವು ಒಂದು ಪುನಃ ಸಂದರ್ಶನವನ್ನು ವರದಿಸಸಾಧ್ಯವಿದೆಯೆಂಬುದನ್ನು ನೆನಪಿನಲ್ಲಿಡಿರಿ.

¹⁰ ಯಾವಾಗಲೂ ಪತ್ರಿಕೆಗಳನ್ನು ಸ್ವೀಕರಿಸಿದ, ಆದರೆ “ನೀವು ನನಗೆ ಹೇಳುತ್ತಿರುವ ವಿಷಯವನ್ನು ನಾನು ನಂಬುವುದಿಲ್ಲ” ಎಂದು ಹೇಳಿದ ಒಬ್ಬ ಸ್ತ್ರೀಗೆ, ಸಹೋದರಿಯೊಬ್ಬಳು ಕ್ರಮವಾಗಿ ಪತ್ರಿಕೆಗಳನ್ನು ಕೊಂಡೊಯ್ದಳು. ತದನಂತರದ ಒಂದು ಭೇಟಿಯಲ್ಲಿ, ಅವಳ ಗಂಡನು ಮನೆಯಲ್ಲಿರುವುದನ್ನು ಸಹೋದರಿಯು ಕಂಡುಕೊಂಡಳು. ಸ್ನೇಹಭಾವದ ಮಾತುಕತೆಯ ಬಳಿಕ, ಒಂದು ಬೈಬಲ್‌ ಅಭ್ಯಾಸವನ್ನು ಆರಂಭಿಸಲಿಕ್ಕಾಗಿ ಏರ್ಪಾಡುಗಳು ಮಾಡಲ್ಪಟ್ಟವು. ಅಭ್ಯಾಸದಲ್ಲಿ ಜೊತೆಗೂಡಲು ಬಂದಂತಹ ಮೂವರು ಪುತ್ರರೊಂದಿಗೆ ಆ ಸಹೋದರಿಯು ಗೆಳೆತನ ಮಾಡಿಕೊಂಡಳು. ಕ್ರಮೇಣವಾಗಿ, ಆ ತಾಯಿ ಮತ್ತು ಅವಳ ಪುತ್ರರು ತಮ್ಮ ಜೀವಿತಗಳನ್ನು ಯೆಹೋವನಿಗೆ ಸಮರ್ಪಿಸಿಕೊಂಡರು ಮತ್ತು ದೀಕ್ಷಾಸ್ನಾನ ಪಡೆದುಕೊಂಡರು. ಇಂದಿನ ತನಕ, ಆ ಕುಟುಂಬದ 35 ಸದಸ್ಯರು ಸತ್ಯವನ್ನು ಸ್ವೀಕರಿಸಿದ್ದಾರೆ. ಇದೆಲ್ಲವೂ ಸಂಭವಿಸಿದ್ದು, ಆ ಸಹೋದರಿಯು ತನ್ನ ಪತ್ರಿಕಾ ಮಾರ್ಗವನ್ನು ಅನುಸರಿಸಿಕೊಂಡು ಹೋದುದರಿಂದಲೇ!

¹¹ ಪತ್ರಿಕಾ ಮಾರ್ಗವೊಂದನ್ನು ಆರಂಭಿಸಲು ಅನೇಕ ಮಾರ್ಗಗಳಿವೆ. ಕೇವಲ ನಿಮ್ಮ ಕೊಡಿಕೆಗಳ ದಾಖಲೆಯನ್ನು ಇಡುವ ಮೂಲಕ ಮತ್ತು ಇತ್ತೀಚಿನ ಸಂಚಿಕೆಗಳೊಂದಿಗೆ ಪ್ರತಿ ಎರಡು ವಾರಗಳಿಗೊಮ್ಮೆ ಹಿಂದಿರುಗಲು ಏರ್ಪಾಡನ್ನು ಮಾಡುವ ಮೂಲಕ ನೀವು ಒಂದು ಮಾರ್ಗವನ್ನು ಆರಂಭಿಸಬಲ್ಲಿರಿ. “ನಮ್ಮ ಮುಂದಿನ ಸಂಚಿಕೆಯಲ್ಲಿ” ಎಂಬ ಶಿರೋನಾಮದ ಕೆಳಗಿರುವ ಸಮಾಚಾರವನ್ನು ಉಪಯೋಗಿಸುವುದು ಒಂದು ವಿಧಾನವಾಗಿದೆ. ನೀವು ಹಿಂದಿರುಗಿದಾಗ, ನೀವು ಈ ಹಿಂದೆ ಉಲ್ಲೇಖಿಸಿದ್ದಂತಹ ಲೇಖನವು ನಿಮ್ಮ ಬಳಿಯಲ್ಲಿದೆಯೆಂದು ಮನೆಯವನಿಗೆ ಹೇಳಿರಿ. ಅಥವಾ, ಪುನರ್ಭೇಟಿಯನ್ನು ಮಾಡುವಾಗ, ನೀವು ಹೀಗೆ ಹೇಳಸಾಧ್ಯವಿದೆ: “ನಾನು ಈ ಲೇಖನವನ್ನು ಓದಿದಾಗ, ಇದು ನಿಮಗೆ ಆಸಕ್ತಿಕರವಾಗಿರಬಹುದೆಂದು ನಾನು ಅಭಿಪ್ರಯಿಸಿದೆ . . .” ನಂತರ ಆ ಲೇಖನದ ಕುರಿತಾಗಿ ಕೆಲವು ಸಂಕ್ಷಿಪ್ತ ಹೇಳಿಕೆಗಳನ್ನು ಮಾಡಿ, ಅದನ್ನು ನೀಡಿರಿ. ನೀವು ಭೇಟಿಯನ್ನು ಮುಗಿಸಿದ ಬಳಿಕ, ನಿಮ್ಮ ಮನೆಮನೆಯ ರೆಕಾರ್ಡ್‌ನಲ್ಲಿ ಐದು ಸರಳವಾದ ಅಂಶಗಳನ್ನು ಟಿಪ್ಪಣಿ ಮಾಡಿಕೊಳ್ಳಿರಿ: (1) ಮನೆಯವನ ಹೆಸರು, (2) ಮನೆಯವನ ವಿಳಾಸ, (3) ಸಂದರ್ಶನದ ತಾರೀಖು, (4) ನೀಡಲ್ಪಟ್ಟಂತಹ ಸಂಚಿಕೆಗಳು, ಮತ್ತು (5) ಪ್ರದರ್ಶಿಸಲ್ಪಟ್ಟ ಲೇಖನ. ತಮ್ಮ ಪಟ್ಟಿಯಲ್ಲಿ 40ರಷ್ಟು ಹೆಚ್ಚು ಅಥವಾ ಅನೇಕ ಭೇಟಿಗಳನ್ನು ಸಂಗ್ರಹಿಸುವ ಮೂಲಕ, ಕೆಲವು ಪ್ರಚಾರಕರು ಪತ್ರಿಕಾ ಮಾರ್ಗಗಳನ್ನು ವಿಕಸಿಸುವುದರಲ್ಲಿ ಹೆಚ್ಚು ಯಶಸ್ವಿಯಾಗಿದ್ದಾರೆ!

¹² ವ್ಯಾಪಾರ ಟೆರಿಟೊರಿ: ವ್ಯಾಪಾರ ಟೆರಿಟೊರಿಯಲ್ಲಿ ಸಾಕ್ಷಿಕಾರ್ಯನಡಿಸುವ ಪ್ರಚಾರಕರಿಂದ ಅನೇಕ ಪತ್ರಿಕೆಗಳು ನೀಡಲ್ಪಡುತ್ತವೆ. ಅಂಗಡಿಯಿಂದ ಅಂಗಡಿಯ ಸಾಕ್ಷಿಕಾರ್ಯವನ್ನು ನೀವು ಪ್ರಯತ್ನಿಸಿದ್ದೀರೊ? ಕೆಲವು ಸಭೆಗಳಲ್ಲಿ, ಸೇವೆಯ ಈ ವೈಶಿಷ್ಟ್ಯದಲ್ಲಿನ ಭಾಗವಹಿಸುವಿಕೆಯು ತೀರ ಪರಿಮಿತವಾಗಿದೆಯೆಂದು ವರದಿಗಳು ಸೂಚಿಸುತ್ತವೆ. ಆರಂಭದಲ್ಲಿ, ವ್ಯಾಪಾರಸ್ಥರನ್ನು ಭೇಟಿ ಮಾಡುವುದರ ಕುರಿತು ಕೆಲವರು ಹೆದರಿದ್ದಾರೆ, ಆದರೆ ಅವರು ಅದನ್ನು ಕೆಲವು ಬಾರಿ ಪ್ರಯತ್ನಿಸಿದ ಬಳಿಕ, ಅವರು ಅದನ್ನು ಆಸಕ್ತಿಭರಿತವೂ ಪ್ರತಿಫಲದಾಯಕವೂ ಆದದ್ದಾಗಿ ಕಂಡುಕೊಳ್ಳುತ್ತಾರೆ. ನೀವು ಅದನ್ನು ಆರಂಭಿಸುವಂತೆ ಸಹಾಯ ಮಾಡಲಿಕ್ಕಾಗಿ ಅನುಭವಸ್ಥ ಪ್ರಚಾರಕನನ್ನು ಅಥವಾ ಪಯನೀಯರನನ್ನು ಏಕೆ ಕೇಳಬಾರದು?

¹³ ಅಂಗಡಿಯಿಂದ ಅಂಗಡಿಗೆ ಸಾಕ್ಷಿಕಾರ್ಯವನ್ನು ಮಾಡುವುದರಲ್ಲಿ ಅನೇಕ ಪ್ರಯೋಜನಗಳಿವೆ. ವ್ಯಾಪಾರದ ಸಮಯದಲ್ಲಿಯಾದರೂ, ಮನೆಯಲ್ಲಿ ಇಲ್ಲದಿರುವವರು ಕೇವಲ ಕೆಲವರೇ ಇದ್ದಾರೆ! ಅವರು ವಿಶೇಷವಾಗಿ ಆಸಕ್ತರಾಗಿರದಿದ್ದರೂ, ವ್ಯಾಪಾರಸ್ಥರು ಮತ್ತು ಅಂಗಡಿಗಾರರು ಸಾಮಾನ್ಯವಾಗಿ ದಯಾಪರರಾಗಿರುತ್ತಾರೆ. ದಿನದಲ್ಲಿ ಬೇಗನೆ ಆರಂಭಿಸಿರಿ; ನೀವು ಹೆಚ್ಚು ಉತ್ತಮವಾಗಿ ಸ್ವಾಗತಿಸಲ್ಪಡುವುದು ಸಂಭವನೀಯ. ನಿಮ್ಮನ್ನು ಪರಿಚಯಿಸಿಕೊಂಡ ಬಳಿಕ, ನೀವು ವ್ಯಾಪಾರಸ್ಥರನ್ನು ಮನೆಯಲ್ಲಿ ಕಂಡುಕೊಳ್ಳುವುದು ಬಹಳ ವಿರಳವಾಗಿರುವುದರಿಂದ, ಕಾವಲಿನಬುರುಜು ಮತ್ತು ಎಚ್ಚರ! ಪತ್ರಿಕೆಗಳ ಇತ್ತೀಚಿನ ಸಂಚಿಕೆಗಳನ್ನು ನೀಡಲಿಕ್ಕಾಗಿ, ಕೆಲಸದ ಸ್ಥಳದಲ್ಲಿ ಅವರನ್ನು ಕೆಲವು ಕ್ಷಣಗಳ ವರೆಗೆ ಸಂದರ್ಶಿಸುತ್ತಿದ್ದೀರೆಂದು ನೀವು ಹೇಳಬಹುದು. ಅವರು ಲೋಕ ಘಟನೆಗಳ ಕುರಿತು ಸದ್ಯೋಚಿತವಾಗಿರಬೇಕಾದುದರಿಂದ—ಆದರೆ ಅವರಿಗೆ ಓದಲು ಸ್ವಲ್ಪ ಸಮಯವಿದೆ—ಅನೇಕ ವ್ಯಾಪಾರಸ್ಥರು ನಮ್ಮ ಪತ್ರಿಕೆಗಳನ್ನು ಗಣ್ಯಮಾಡುತ್ತಾರೆಂಬುದನ್ನು ಸೂಚಿಸಿರಿ. ಆ ಪತ್ರಿಕೆಗಳು, ಧಾರ್ಮಿಕ, ರಾಜಕೀಯ, ಅಥವಾ ವಾಣಿಜ್ಯದ ಪೂರ್ವಗ್ರಹವಿಲ್ಲದೆ, ನವೀನ ನೋಟದಿಂದ ಆಲೋಚನೆಯನ್ನು ಉದ್ರೇಕಿಸುವ ಸಮಾಚಾರವನ್ನು ಪ್ರಸ್ತುತಪಡಿಸುತ್ತವೆ. ವ್ಯಾಪಾರ ಟೆರಿಟೊರಿಯಲ್ಲಿ ಕಂಡುಕೊಳ್ಳಲ್ಪಡುವ ಆಸಕ್ತ ವ್ಯಕ್ತಿಗಳೊಂದಿಗೆ, ಒಂದು ಪತ್ರಿಕಾ ಮಾರ್ಗವನ್ನು ವಿಕಸಿಸಬಹುದು.

¹⁴ ಒಂದು ಕುಟುಂಬದೋಪಾದಿ ತಯಾರಿಸಿರಿ: ನಿಮ್ಮ ಕುಟುಂಬ ಅಭ್ಯಾಸದ ಸಮಯದಲ್ಲಿ, ಇತ್ತೀಚಿನ ಪತ್ರಿಕೆಗಳಲ್ಲಿನ ಯಾವ ಲೇಖನಗಳು ನಿಮ್ಮ ಟೆರಿಟೊರಿಯಲ್ಲಿ ಉಪಯೋಗಿಸಲಿಕ್ಕಾಗಿ ಸೂಕ್ತವಾಗಿರಬಹುದು ಎಂಬುದನ್ನು ಚರ್ಚಿಸಲಿಕ್ಕಾಗಿ ಸ್ವಲ್ಪ ಸಮಯವನ್ನು ಬದಿಗಿಡಬಹುದು. ಮಕ್ಕಳನ್ನೂ ಒಳಗೊಂಡು ಕುಟುಂಬದ ಸದಸ್ಯರು, ತಮ್ಮ ನಿರೂಪಣೆಗಳನ್ನು ಪ್ರ್ಯಾಕ್ಟೀಸ್‌ ಮಾಡುತ್ತಾ, “ನಾನು ಕಾರ್ಯಮಗ್ನನಿದ್ದೇನೆ,” “ನಮಗೆ ನಮ್ಮ ಸ್ವಂತ ಧರ್ಮವಿದೆ,” ಅಥವಾ “ನನಗೆ ಅಭಿರುಚಿ ಇಲ್ಲ” ಎಂಬಂತಹ, ಎಬ್ಬಿಸಲ್ಪಡುವ ಸಾಮಾನ್ಯ ಆಕ್ಷೇಪಣೆಗಳನ್ನು ಜಯಿಸುವುದರಲ್ಲಿ ಸರದಿಗಳನ್ನು ತೆಗೆದುಕೊಳ್ಳಬಲ್ಲರು. ಪತ್ರಿಕೆಯ ವಿತರಣೆಯಲ್ಲಿ ಇಡೀ ಕುಟುಂಬವು ಕ್ರಮವಾದ ಪಾಲನ್ನು ಪಡೆದುಕೊಳ್ಳಲಿಕ್ಕಾಗಿ ಒಳ್ಳೆಯ ಸಹಕಾರವು ಅದನ್ನು ಸಾಧ್ಯಮಾಡಬಲ್ಲದು.

¹⁵ ಪುಸ್ತಕ ಅಭ್ಯಾಸ ನಿರ್ವಾಹಕರು ಸಹಾಯ ಮಾಡಬಲ್ಲರು: ಪ್ರಾಯೋಗಿಕವಾಗಿರುವಾಗಲೆಲ್ಲಾ, ಇಡೀ ಸಭೆಯು ರಾಜ್ಯ ಸಭಾಗೃಹದಲ್ಲಿ ಸಂಧಿಸುವಂತೆ ಮಾಡುವುದರ ಬದಲಾಗಿ, ಪತ್ರಿಕಾ ದಿನದಂದು, ಕ್ಷೇತ್ರ ಸೇವೆಗಾಗಿ ಕೂಟಗಳನ್ನು ಪುಸ್ತಕ ಅಭ್ಯಾಸದ ಸ್ಥಳಗಳಲ್ಲಿ ಅಥವಾ ಟೆರಿಟೊರಿಗೆ ಹತ್ತಿರವಿರುವ ಒಬ್ಬ ಪ್ರಚಾರಕನ ಮನೆಯಲ್ಲಿ ನಡೆಸುವಂತೆ ಶೆಡ್ಯೂಲ್‌ ಮಾಡಿರಿ. ಕ್ಷೇತ್ರ ಸೇವೆಗಾಗಿ ಕೂಟಗಳ ಮೇಲ್ವಿಚಾರಣೆ ಮಾಡುವವರು, ಗುಂಪಿಗಾಗಿ ನಿರ್ದಿಷ್ಟ ಸಲಹೆಗಳೊಂದಿಗೆ ಸುಸನ್ನದ್ಧರಾಗಿರಬೇಕು. ಒಂದು ಮಾದರಿ ನಿರೂಪಣೆ ಮತ್ತು ಸ್ಥಳಿಕವಾಗಿ ಆಸಕ್ತಿಯನ್ನು ಕೆರಳಿಸಲಿಕ್ಕಾಗಿ ಉಪಯೋಗಿಸಬಹುದಾದ, ಪ್ರಚಲಿತ ಸಂಚಿಕೆಗಳಿಂದ ಆಯ್ದುಕೊಳ್ಳಲ್ಪಟ್ಟ ಒಂದೆರಡು ಅಂಶಗಳನ್ನು ಇವು ಒಳಗೊಳ್ಳಬಹುದು. ಕ್ಷೇತ್ರ ಸೇವೆಗಾಗಿ ಕೂಟಗಳು—ಗುಂಪುಗಳನ್ನು ವ್ಯವಸ್ಥಾಪಿಸುವುದನ್ನೂ ಸೇರಿಸಿ—ಸಂಕ್ಷಿಪ್ತವೂ, 10ರಿಂದ 15 ನಿಮಿಷಗಳಿಗಿಂತ ಹೆಚ್ಚಿನ ಸಮಯವನ್ನು ತೆಗೆದುಕೊಳ್ಳದಂಥವುಗಳೂ ಆಗಿರಬೇಕು. ಕ್ಷೇತ್ರ ಸೇವೆಯ ಇಡೀ ಕಾಲಾವಧಿಯಲ್ಲಿ ಆ ಗುಂಪು ಕಾರ್ಯಮಗ್ನವಾಗಿರುವಂತೆ, ಸಾಕಾಗುವಷ್ಟು ಟೆರಿಟೊರಿ ಇದೆ ಎಂಬುದನ್ನು ಅಭ್ಯಾಸ ನಿರ್ವಾಹಕರು ಖಚಿತಪಡಿಸಿಕೊಳ್ಳಬೇಕು.

¹⁶ ಪತ್ರಿಕೆಗಳಿಗಾಗಿ ಗಣ್ಯತೆಯನ್ನು ತೋರಿಸಿರಿ: ಜುಲೈ 1993ರ ನಮ್ಮ ರಾಜ್ಯದ ಸೇವೆಯ ಸಂಚಿಕೆಯಲ್ಲಿ ಪ್ರಕಾಶಿಸಲ್ಪಟ್ಟಿದ್ದ, “ಕಾವಲಿನಬುರುಜು ಮತ್ತು ಎಚ್ಚರ!ದ ಉತ್ತಮ ಉಪಯೋಗವನ್ನು ಮಾಡುವುದು” ಎಂಬ ಲೇಖನವು, ಈ ಪ್ರಮುಖ ಅಂಶವನ್ನು ಸೂಚಿಸಿತು: “ಅವುಗಳ ಸಂಚಿಕೆಯ ತಾರೀಖಿನ ಒಂದು ಯಾ ಎರಡು ತಿಂಗಳುಗಳೊಳಗೆ ಅವುಗಳನ್ನೆಲ್ಲ ನೀಡದಿದ್ದರೂ ಕೂಡ, ಕಾವಲಿನಬುರುಜು ಮತ್ತು ಎಚ್ಚರ! ಪತ್ರಿಕೆಗಳು ತಮ್ಮ ಮೌಲ್ಯವನ್ನು ಕಳೆದುಕೊಳ್ಳುವುದಿಲ್ಲ. ಅವು ಹೊಂದಿರುವ ಮಾಹಿತಿಯು, ಸಮಯದ ಗತಿಸುವಿಕೆಯೊಂದಿಗೆ ಕಡಿಮೆ ಪ್ರಾಮುಖ್ಯವಾದದ್ದಾಗಿ ಪರಿಣಮಿಸುವುದಿಲ್ಲ . . . ಹಳೆಯ ಪತ್ರಿಕೆಗಳು ಶೇಖರವಾಗುವಂತೆ ಬಿಡುವುದು ಮತ್ತು ಅವುಗಳನ್ನು ಎಂದೂ ಉಪಯೋಗಿಸದೆ ಇರುವುದು, ಈ ಬೆಲೆಯುಳ್ಳ ಉಪಕರಣಗಳಿಗೆ ಗಣ್ಯತೆಯ ಕೊರತೆಯನ್ನು ತೋರಿಸುತ್ತದೆ. . . . ಹಳೆಯ ಸಂಚಿಕೆಗಳನ್ನು ಬದಿಗಿಟ್ಟು, ಅವುಗಳ ಕುರಿತು ಮರೆತುಬಿಡುವುದರ ಬದಲು, ಆಸಕ್ತಿಯುಳ್ಳ ಜನರ ಕೈಗಳಲ್ಲಿ ಅವುಗಳನ್ನು ನೀಡಲು ವಿಶೇಷ ಪ್ರಯತ್ನವನ್ನು ಮಾಡುವುದು ಒಳ್ಳೆಯದಾಗಿರಲಿಕ್ಕಿಲ್ಲವೆ?”

¹⁷ ಇಂದು ಸತ್ಯಕ್ಕಾಗಿ ಹುಡುಕುತ್ತಿರುವ ಅನೇಕ ಪ್ರಾಮಾಣಿಕ ಹೃದಯದ ಜನರಿದ್ದಾರೆ. ಒಂದು ಪತ್ರಿಕೆಯಲ್ಲಿ ಒಳಗೊಂಡಿರಬಹುದಾದ ಸಮಾಚಾರವು ತಾನೇ ಅವರನ್ನು ಸತ್ಯದ ಕಡೆಗೆ ನಡೆಸಲು ಅಗತ್ಯವಿರುವ ವಿಷಯವಾಗಿರಸಾಧ್ಯವಿದೆ! ಘೋಷಿಸಲಿಕ್ಕಾಗಿ ನಮಗೆ ಯೆಹೋವನು ರೋಮಾಂಚಕವಾದ ಸಂದೇಶವನ್ನು ಕೊಟ್ಟಿದ್ದಾನೆ, ಮತ್ತು ಈ ಸಂದೇಶವನ್ನು ಇತರರಿಗೆ ತಿಳಿಯಪಡಿಸುವುದರಲ್ಲಿ ನಮ್ಮ ಪತ್ರಿಕೆಗಳು ಪ್ರಮುಖವಾದ ಒಂದು ಪಾತ್ರವನ್ನು ವಹಿಸುತ್ತವೆ. ಭವಿಷ್ಯತ್ತಿನಲ್ಲಿ ನೀವು ಪತ್ರಿಕಾ ವಿತರಣೆಯ ಕುರಿತಾಗಿ ಹೆಚ್ಚು ಪ್ರಜ್ಞಾವಂತರಾಗಿರುವಿರೊ? ಈ ಸಲಹೆಗಳಲ್ಲಿ ಕೆಲವನ್ನು ನೀವು ಈ ವಾರಾಂತ್ಯದಲ್ಲೇ ಅನ್ವಯಿಸುವಿರೊ? ನೀವು ಹಾಗೆ ಮಾಡುವುದಾದರೆ, ಹೇರಳವಾಗಿ ಆಶೀರ್ವದಿಸಲ್ಪಡುವಿರಿ.

ಪ್ರಾಯೋಗಿಕ ಸಲಹೆಗಳು:

◼ ಪತ್ರಿಕೆಗಳನ್ನು ಮುಂಚಿತವಾಗಿಯೇ ಓದಿರಿ, ಮತ್ತು ಲೇಖನಗಳೊಂದಿಗೆ ಪರಿಚಿತರಾಗಿರ್ರಿ.

◼ ನಿಮ್ಮ ಸಮುದಾಯದಲ್ಲಿ ಸಾಮಾನ್ಯ ಆಸಕ್ತಿಯದ್ದಾಗಿರುವ ಯಾವುದೇ ವಿಷಯದೊಂದಿಗೆ ವ್ಯವಹರಿಸುವ ಲೇಖನವನ್ನು ಆರಿಸಿಕೊಳ್ಳಿರಿ.

◼ ಪುರುಷರಾಗಿರಲಿ ಸ್ತ್ರೀಯರಾಗಿರಲಿ ಯುವ ಜನರಾಗಿರಲಿ—ವಿವಿಧ ಜನರಿಗಾಗಿ ಸೂಕ್ತವಾಗಿರುವಂತಹ ಒಂದು ನಿರೂಪಣೆಯನ್ನು ತಯಾರಿಸಿರಿ. ಪತ್ರಿಕೆಯು ಮನೆಯವನಿಗೆ ಹೇಗೆ ಸಂಬಂಧಿಸುತ್ತದೆ ಎಂಬುದನ್ನು ಮತ್ತು ಇಡೀ ಕುಟುಂಬವು ಅದರಲ್ಲಿ ಆನಂದಿಸುವಂತಹ ವಿಧವನ್ನು ತೋರಿಸಿರಿ.

◼ ಅಧಿಕಾಂಶ ಜನರು ಮನೆಯಲ್ಲಿರುವಾಗ ನಿಮ್ಮ ಕ್ಷೇತ್ರ ಸೇವಾ ಚಟುವಟಿಕೆಯಲ್ಲಿ ಒಳಗೂಡಲು ಯೋಜಿಸಿರಿ. ಕೆಲವು ಸಭೆಗಳು, ಪತ್ರಿಕೆಗಳೊಂದಿಗೆ ಸಂಜೆಯ ಸಾಕ್ಷಿಕಾರ್ಯಕ್ಕಾಗಿ ಏರ್ಪಾಡನ್ನು ಮಾಡುತ್ತವೆ.

◼ ನಿಮ್ಮ ನಿರೂಪಣೆಯನ್ನು ಸಂಕ್ಷಿಪ್ತವೂ ವಿಷಯಕ್ಕೆ ತಕ್ಕದ್ದೂ ಆದದ್ದಾಗಿ ಮಾಡಿರಿ.

◼ ಹೆಚ್ಚು ವೇಗವಾಗಿ ಮಾತಾಡಬೇಡಿ. ನಿಮ್ಮ ಕೇಳುಗನಿಗೆ ಆಸಕ್ತಿ ಇಲ್ಲದಿರುವಲ್ಲಿ, ಹೆಚ್ಚು ವೇಗವಾಗಿ ಮಾತಾಡುವುದು ಸಹಾಯಕಾರಿಯಾಗಿರಲಾರದು. ಬಿಗುಮಾನವಿಲ್ಲದವರಾಗಿರಲು ಪ್ರಯತ್ನಿಸಿರಿ, ಮತ್ತು ಮನೆಯವನಿಗೆ ಪ್ರತಿಕ್ರಿಯಿಸಲು ಸಂದರ್ಭವನ್ನು ಕೊಡಿರಿ.

ಮನೆಯಿಂದ ಮನೆಗೆ ಪತ್ರಿಕೆಗಳನ್ನು ನೀಡುವುದು:

◼ ಸ್ನೇಹಭಾವದ ಒಂದು ನಸುನಗೆ ಮತ್ತು ದಯಾಪರ ಸ್ವರಭಾರವಿರಲಿ.

◼ ಪತ್ರಿಕೆಗಳ ಕುರಿತು ಅತ್ಯುತ್ಸಾಹಿಗಳಾಗಿರ್ರಿ.

◼ ನಿಧಾನವಾಗಿಯೂ ಸ್ಪಷ್ಟವಾಗಿಯೂ ಮಾತಾಡಿರಿ.

◼ ಒಂದೇ ಒಂದು ವಿಷಯದ ಕುರಿತು ಮಾತಾಡಿರಿ; ಸಂಕ್ಷಿಪ್ತವಾಗಿ ಆಸಕ್ತಿಯನ್ನು ಪ್ರಚೋದಿಸಿರಿ, ಮತ್ತು ಮನೆಯವನಿಗೆ ಅದರ ಮೌಲ್ಯವನ್ನು ತೋರಿಸಿರಿ.

◼ ಕೇವಲ ಒಂದು ಲೇಖನವನ್ನು ಎತ್ತಿತೋರಿಸಿರಿ.

◼ ಇನ್ನೊಂದನ್ನು ಒಂದು ಜೊತೆ ಪತ್ರಿಕೆಯೋಪಾದಿ ನೀಡುತ್ತಾ, ಒಂದೇ ಒಂದು ಪತ್ರಿಕೆಯನ್ನು ಪ್ರದರ್ಶಿಸಿರಿ.

◼ ಪತ್ರಿಕೆಗಳನ್ನು ಮನೆಯವನಿಗೆ ಕೊಡಿರಿ.

◼ ನೀವು ಹಿಂದಿರುಗಲು ಯೋಜಿಸುತ್ತೀರೆಂಬುದು ಮನೆಯವನಿಗೆ ತಿಳಿದಿರಲಿ.

◼ ಪತ್ರಿಕೆಗಳು ನಿರಾಕರಿಸಲ್ಪಡುವಲ್ಲಿ, ಸ್ನೇಹಭಾವದಿಂದ, ಸಕಾರಾತ್ಮಕವಾಗಿ ಕೊನೆಗೊಳಿಸಿರಿ.

◼ ಎಲ್ಲ ಆಸಕ್ತಿಯನ್ನು ಮತ್ತು ಕೊಡಿಕೆಗಳನ್ನು ಮನೆಮನೆಯ ರೆಕಾರ್ಡ್‌ನಲ್ಲಿ ಗುರುತುಮಾಡಿಟ್ಟುಕೊಳ್ಳಿರಿ.

ಪತ್ರಿಕೆಗಳನ್ನು ನೀಡಲಿಕ್ಕಾಗಿರುವ ಸಂದರ್ಭಗಳು:

◼ ಮನೆಯಿಂದ ಮನೆಯ ಸಾಕ್ಷಿಕಾರ್ಯ

◼ ಬೀದಿ ಸಾಕ್ಷಿಕಾರ್ಯ

◼ ಅಂಗಡಿಯಿಂದ ಅಂಗಡಿಯ ಸಾಕ್ಷಿಕಾರ್ಯ

◼ ಪತ್ರಿಕಾ ಮಾರ್ಗ

◼ ಸಂಜೆಯ ಸಾಕ್ಷಿಕಾರ್ಯ

◼ ಪುನರ್ಭೇಟಿಗಳನ್ನು ಮಾಡುತ್ತಿರುವಾಗ

◼ ಹಿಂದಿನ ಬೈಬಲ್‌ ವಿದ್ಯಾರ್ಥಿಗಳನ್ನು ಭೇಟಿಮಾಡುತ್ತಿರುವಾಗ

◼ ಪ್ರಯಾಣಿಸುತ್ತಿರುವಾಗ, ಶಾಪಿಂಗ್‌ ಮಾಡುತ್ತಿರುವಾಗ

◼ ಸಂಬಂಧಿಕರು, ಸಹಕಾರ್ಮಿಕರು, ನೆರೆಯವರು, ಶಾಲಾಸಹಪಾಠಿಗಳು, ಶಿಕ್ಷಕರೊಂದಿಗೆ ಮಾತಾಡುತ್ತಿರುವಾಗ

◼ ಸಾರ್ವಜನಿಕ ವಾಹನ ಸೌಕರ್ಯದಲ್ಲಿ, ಕಾಯುವ ಕೋಣೆಗಳಲ್ಲಿ