ಆಸಕ್ತಿಕರವಾಗಿ ಆನಂದಕರವಾಗಿ ಬೈಬಲನ್ನು ಅಧ್ಯಯನ ಮಾಡುವುದು ಹೇಗೆ?

ಇಸ್ರಾಯೇಲ್‌ ಜನಾಂಗವನ್ನು ವಾಗ್ದತ್ತ ದೇಶಕ್ಕೆ ಕರಕೊಂಡು ಹೋಗುವ ದೊಡ್ಡ ಜವಾಬ್ದಾರಿ ಯೆಹೋಶುವನ ಹೆಗಲ ಮೇಲೆ ಇತ್ತು. ಇದೊಂದು ಕಠಿಣ ಸವಾಲಾಗಿತ್ತು. ಆದರೆ ಯೆಹೋವನು ಅವನಿಗೆ “ಸ್ಥಿರಚಿತ್ತನಾಗಿರು, ಪೂರ್ಣಧೈರ್ಯದಿಂದಿರು” ಎಂದು ಪ್ರೋತ್ಸಾಹಿಸಿ ಬಲಪಡಿಸಿದನು. ಒಂದುವೇಳೆ ಯೆಹೋಶುವನು ಧರ್ಮಶಾಸ್ತ್ರವನ್ನು ಓದಿ ಅದರಂತೆ ನಡೆದರೆ ಒಳ್ಳೇ ನಿರ್ಧಾರಗಳನ್ನು ಮಾಡಲು ಮತ್ತು ಯಶಸ್ಸನ್ನು ಪಡಕೊಳ್ಳಲು ಸಾಧ್ಯವಾಗುತ್ತದೆ ಎಂದು ಯೆಹೋವನು ಹೇಳಿದನು.—ಯೆಹೋ. 1:7, 8.

ನಾವು ಜೀವಿಸುತ್ತಿರುವ ಸಮಯ “ನಿಭಾಯಿಸಲು ಕಷ್ಟಕರವಾದ ಕಠಿನಕಾಲಗಳು” ಆಗಿರುವುದರಿಂದ ನಮಗೂ ಕಷ್ಟಗಳು ಬರುತ್ತವೆ. (2 ತಿಮೊ. 3:1) ನಾವು ಯೆಹೋಶುವನಂತೆ ಯಶಸ್ಸನ್ನು ಪಡಕೊಳ್ಳಬೇಕೆಂದರೆ ಯೆಹೋವನು ಅವನಿಗೆ ಕೊಟ್ಟ ಸಲಹೆಯನ್ನು ನಾವೂ ಪಾಲಿಸಬೇಕು. ನಾವು ಪ್ರತಿದಿನ ಬೈಬಲನ್ನು ಓದಬೇಕು ಮತ್ತು ಕಲಿತದ್ದನ್ನು ಅನ್ವಯಿಸಿಕೊಂಡು ಒಳ್ಳೇ ನಿರ್ಧಾರಗಳನ್ನು ಮಾಡಬೇಕು.

ಆದರೆ ನಮ್ಮಲ್ಲಿ ಕೆಲವರಿಗೆ ಹೇಗೆ ಬೈಬಲ್‌ ಅಧ್ಯಯನ ಮಾಡಬೇಕು ಎಂದು ಗೊತ್ತಿಲ್ಲದೆ ಇರಬಹುದು ಅಥವಾ ಅದನ್ನು ಆನಂದಿಸದೇ ಇರಬಹುದು. ಆದರೂ ವೈಯಕ್ತಿಕ ಬೈಬಲ್‌ ಅಧ್ಯಯನ ತುಂಬ ಪ್ರಾಮುಖ್ಯ. ನಿಮ್ಮ ಅಧ್ಯಯನದಿಂದ ಪ್ರಯೋಜನ ಪಡಕೊಳ್ಳಲು ಮತ್ತು ಅದನ್ನು ಆನಂದಿಸಲು “ಇದನ್ನು ಮಾಡಿನೋಡಿ” ಎಂಬ ಚೌಕದಲ್ಲಿ ಕೊಟ್ಟಿರುವ ಸಲಹೆಗಳು ಸಹಾಯ ಮಾಡುತ್ತವೆ.

ಕೀರ್ತನೆಗಾರನು “ಯೆಹೋವನ ನಿಯಮಗಳು ನೀತಿಯುಳ್ಳವುಗಳಾಗಿವೆ; ಮನಸ್ಸನ್ನು ಹರ್ಷಪಡಿಸುತ್ತವೆ” ಎಂದು ಹಾಡಿದನು. (ಕೀರ್ತ. 19:8) ನೀವೂ ದೇವರ ವಾಕ್ಯದ ಅಧ್ಯಯನದಿಂದ ಸಂತೋಷ ಪಡಕೊಳ್ಳಬಹುದು. ನೀವು ಬೈಬಲನ್ನು ಓದುತ್ತಾ ಹೋದಂತೆ ಅನೇಕ ಅಮೂಲ್ಯ ವಿಷಯಗಳನ್ನು ಕಂಡುಕೊಳ್ಳುತ್ತೀರಿ.

ಯೆಹೋಶುವನಂತೆ ನಿಮಗೆ ಒಂದು ಜನಾಂಗವನ್ನು ನಡೆಸುವ ಜವಾಬ್ದಾರಿ ಇಲ್ಲದೇ ಇರಬಹುದು. ಆದರೆ ನಿಮಗೆ ನಿಮ್ಮದೇ ಆದಂಥ ಕೆಲವೊಂದು ಸಮಸ್ಯೆಗಳು ಇರುತ್ತವೆ. ಹಾಗಾಗಿ ಯೆಹೋಶುವನಂತೆ ದೇವರ ವಾಕ್ಯವನ್ನು ಅಧ್ಯಯನ ಮಾಡಿ ಮತ್ತು ಅದನ್ನು ಪಾಲಿಸಿ. ಹೀಗೆ ಮಾಡಿದರೆ ನೀವೂ ಒಳ್ಳೇ ನಿರ್ಧಾರ ಮಾಡುವಿರಿ ಮತ್ತು ಯಶಸ್ಸನ್ನು ಪಡಕೊಳ್ಳುವಿರಿ.

ಹೀಗೆ ಮಾಡಿನೋಡಿ

ಪ್ರಾರ್ಥಿಸಿ. ಬೈಬಲಿನಲ್ಲಿ ಯೆಹೋವನ ಯೋಚನೆಗಳಿವೆ. ಅವು ನಿಮ್ಮ ಪ್ರಯೋಜನಕ್ಕಾಗಿ ದಾಖಲಾಗಿವೆ. ಹಾಗಾಗಿ ನೀವು ಬೈಬಲನ್ನು ಓದುವ ಮುಂಚೆ ಪ್ರಾರ್ಥಿಸಿ. ಓದಿದ್ದನ್ನು ಅರ್ಥಮಾಡಿಕೊಳ್ಳಲು, ನೆನಪಲ್ಲಿಟ್ಟುಕೊಳ್ಳಲು, ಅದನ್ನು ಅನ್ವಯಿಸಿಕೊಂಡು ಒಳ್ಳೆಯ ನಿರ್ಧಾರಗಳನ್ನು ಮಾಡಲು ಸಹಾಯ ಕೇಳಿ.—ಎಜ್ರ 7:10.
ಪ್ರಶ್ನೆಗಳನ್ನು ಕೇಳಿಕೊಳ್ಳಿ. ನೀವು ಬೈಬಲನ್ನು ಅಥವಾ ಬೈಬಲಾಧಾರಿತ ಸಾಹಿತ್ಯವನ್ನು ಓದುವಾಗ ಇದನ್ನು ಮಾಡಿ. ಉದಾಹರಣೆಗೆ, ‘ಯೆಹೋವನ ಬಗ್ಗೆ ಈ ಭಾಗದಿಂದ ನಾನೇನು ಕಲಿಯಬಹುದು? ಬೈಬಲಿನ ಮುಖ್ಯ ವಿಷಯಕ್ಕೆ ಈ ಭಾಗ ಹೇಗೆ ಸಂಬಂಧಿಸಿದೆ? ಇತರರಿಗೆ ಸಹಾಯ ಮಾಡಲು ಇದನ್ನು ನಾನು ಹೇಗೆ ಬಳಸಬಹುದು?’ ಎಂದು ಕೇಳಿಕೊಳ್ಳಿ.
ಧ್ಯಾನಿಸಿ. ಓದುವಾಗ ಸ್ವಲ್ಪ ಹೊತ್ತು ನಿಲ್ಲಿಸಿ ಅದರ ಬಗ್ಗೆ ಯೋಚಿಸಿ. ಹೀಗೆ ಕೇಳಿಕೊಳ್ಳಿ: ‘ಇದನ್ನು ಓದಿದಾಗ ನನಗೆ ಹೇಗನಿಸಿತು? ಯಾಕೆ ಹಾಗೆ ಅನಿಸಿತು? ನನ್ನ ಜೀವನದಲ್ಲಿ ಹಿಂದೆ ಆದ, ಈಗ ಆಗುತ್ತಿರುವ ಅಥವಾ ಮುಂದೆ ಆಗಲಿರುವ ವಿಷಯಕ್ಕೆ ಇದು ಸಂಬಂಧಿಸಿದೆಯಾ? ಬೈಬಲಿನ ಈ ತತ್ವಗಳನ್ನು ಅಥವಾ ಸಲಹೆಯನ್ನು ಹೇಗೆ ಅನ್ವಯಿಸಿಕೊಳ್ಳಬಹುದು?’ (ಯೋಬ 23:5; ಕೀರ್ತ. 49:3) ಯೆಹೋವನು ತನ್ನ ಜನರಿಗೆ ಕೆಲವೊಂದು ವಿಷಯಗಳನ್ನು ಮಾಡಬೇಡಿ ಎಂದು ಹೇಳಿದ್ದಾನೆ. ಯೆಹೋವನು ಯಾಕೆ ಹಾಗೆ ಹೇಳಿದ್ದಾನೆ ಅಂತ ಬೇರೆಯವರಿಗೆ ನಿಮ್ಮಿಂದ ವಿವರಿಸುವುದಕ್ಕೆ ಆಗುತ್ತಾ ಎಂದು ನೋಡಿ. ಅಥವಾ ಬೈಬಲಿನಲ್ಲಿ ನೀವು ಒಬ್ಬ ವ್ಯಕ್ತಿ ಬಗ್ಗೆ ಓದಿದಾಗ ಅವನು ಬೇರೆ ರೀತಿಯಲ್ಲಿ ನಡಕೊಂಡಿದ್ದರೆ ಏನಾಗುತ್ತಿತ್ತು ಎಂದು ಯೋಚಿಸಿ.—ಧರ್ಮೋ. 32:28, 29.
ಚಿತ್ರಿಸಿಕೊಳ್ಳಿ. ಬೈಬಲನ್ನು ಓದುವಾಗ ಮನಸ್ಸಲ್ಲಿ ಚಿತ್ರಿಸಿಕೊಳ್ಳಿ. ಉದಾಹರಣೆಗೆ ಯೋಸೇಫನ ಅಣ್ಣಂದಿರು ಅವನನ್ನು ಇಷ್ಮಾಯೇಲ್ಯರಿಗೆ ಮಾರುತ್ತಿರುವ ದೃಶ್ಯವನ್ನು ಚಿತ್ರಿಸಿಕೊಳ್ಳಿ. (ಆದಿ. 37:18-28) ನಿಮಗೆ ಏನೇನು ಕಾಣುತ್ತಿದೆ? ಯಾವ ಶಬ್ದಗಳು ಕೇಳಿಸುತ್ತಿವೆ? ಯಾವ ವಾಸನೆ, ಪರಿಮಳ ಬರುತ್ತಿದೆ?ಅವರ ಜಾಗದಲ್ಲಿ ನೀವಿದ್ದೀರಾ ಎಂದು ಅಂದುಕೊಳ್ಳಿ. ಅವರು ಏನು ಯೋಚಿಸುತ್ತಿದ್ದಾರೆ, ಅವರ ಭಾವನೆಗಳೇನು? ಈ ರೀತಿ ಚಿತ್ರಿಸಿಕೊಳ್ಳಿ. ಹೀಗೆ ಮಾಡುವಾಗ ನಿಮ್ಮ ಅಧ್ಯಯನ ಇನ್ನೂ ಆಸಕ್ತಿಕರವಾಗಿರುತ್ತದೆ, ಅರ್ಥಭರಿತವಾಗಿರುತ್ತದೆ.
ಅಧ್ಯಯನ ಸಲಕರಣೆಗಳನ್ನು ಬಳಸಿ. ನಮ್ಮ ಸಂಘಟನೆ ಅನೇಕ ಅಧ್ಯಯನ ಸಲಕರಣೆಗಳನ್ನು ಕೊಟ್ಟಿದೆ. ಇದರಿಂದ ನಮ್ಮ ಸಂಶೋಧನೆ ಆಸಕ್ತಿಕರವಾಗಿರುತ್ತದೆ. ನಿಮ್ಮ ಭಾಷೆಯಲ್ಲಿ ಲಭ್ಯವಿರುವ ಸಲಕರಣೆಗಳನ್ನು ಹೇಗೆ ಬಳಸಬಹುದೆಂದು ಕಲಿತುಕೊಳ್ಳಿ. ಅವುಗಳಲ್ಲಿ ಕೆಲವು ಆನ್‌ಲೈನ್‌ನಲ್ಲಿ ಸಿಗುತ್ತವೆ ಮತ್ತು ಕೆಲವು ಮುದ್ರಿತ ರೂಪದಲ್ಲಿ ಸಿಗುತ್ತವೆ. ಅವನ್ನು ಚೆನ್ನಾಗಿ ಬಳಸಲು ಗೊತ್ತಾಗದಿದ್ದರೆ ಬೇರೆಯವರ ಸಹಾಯ ಪಡಕೊಳ್ಳಿ, ಹಿಂಜರಿಯಬೇಡಿ. ಉದಾಹರಣೆಗೆ, ವಾಚ್‌ ಟವರ್‌ ಪಬ್ಲಿಕೇಷನ್ಸ್‌ ಇಂಡೆಕ್ಸ್‌ ಅಥವಾ ಯೆಹೋವನ ಸಾಕ್ಷಿಗಳ ಸಂಶೋಧನಾ ಸಾಧನ ನಿಮ್ಮ ಭಾಷೆಯಲ್ಲಿ ಇದ್ದರೆ ಅವನ್ನು ಬಳಸಿ. ನಿರ್ದಿಷ್ಟ ವಿಷಯಗಳ ಬಗ್ಗೆ ಮಾಹಿತಿಯನ್ನು ಮತ್ತು ಅನೇಕ ಬೈಬಲ್‌ ವಚನಗಳ ಬಗ್ಗೆ ವಿವರಣೆಗಳನ್ನು ಕಂಡುಕೊಳ್ಳಲು ಇವು ಸಹಾಯ ಮಾಡುತ್ತವೆ. ಬೈಬಲಿನ ಅಧ್ಯಯನ ಕೈಪಿಡಿಯನ್ನು ಉಪಯೋಗಿಸಿ. ಇದರಲ್ಲಿ ನಕ್ಷೆಗಳು, ಕಾಲಗಣನಾ ಚಾರ್ಟ್‌ಗಳು ಇವೆ ಮತ್ತು ತೂಕ, ಅಳತೆಯ ಬಗ್ಗೆ ಮಾಹಿತಿ ಇದೆ.
ಮುಖ್ಯಾಂಶಗಳನ್ನು ಸಾರಾಂಶಿಸಿ. ಇದನ್ನು ಮಾಡಿದರೆ ಓದಿದ್ದನ್ನು ನೆನಪಲ್ಲಿಟ್ಟುಕೊಳ್ಳಲು ಸಾಧ್ಯವಾಗುತ್ತದೆ. ನೀವು ಏನು ಕಲಿತುಕೊಂಡಿರೋ ಅದರ ಬಗ್ಗೆ ಬೇರೆಯವರ ಜೊತೆ ಮಾತಾಡಿ. ಕಲಿತ ವಿಷಯವನ್ನು ಸೇವೆಯಲ್ಲಿ ಉಪಯೋಗಿಸಬಹುದಾ ಎಂದು ಯೋಚಿಸಿ ನೋಡಿ. ಹೀಗೆ ಮಾಡಿದರೆ ಮುಖ್ಯಾಂಶಗಳನ್ನು ನೆನಪಲ್ಲಿಟ್ಟುಕೊಳ್ಳಲು ಸಾಧ್ಯವಾಗುತ್ತದೆ ಮತ್ತು ನಿಮ್ಮ ಅಧ್ಯಯನದಿಂದ ಬೇರೆಯವರೂ ಪ್ರಯೋಜನ ಪಡಕೊಳ್ಳಲು ಆಗುತ್ತದೆ.