Suuny a Mwandamukul

Tal myand yibidy ya buseeb yidy mu musambw oow: 1) Baat baakookooyel Mawej batwiitwiilangan ni makab. 2) Yehow wiitukuukul mu makab miitut. I mushind kaay udy Yehow wiitukuuloh? Umw wa ku mishind yidyey ulong nook, i haadyey wiitwambulwiish bwa kumanyik mudy biin-biin shikacil wa mu bulongolody oobw. Ning mudy Yehow wiitulay ney, twiiyiiy kwiikal ni musangal hatumukaakadil mudimw, ki kiishoh bend wiitulay ney, kaatwaakwiikaloh bend ni shikacil kay makab leeloow. (Ys. 66:14) Wiitukaakashish bwa kutum meej miitut ku mafuk maciiyiiy, ciisang ciitwiikal ni buumy bwa mwendelel. (2 Kor. 4:16-18) Hatucidy batakamin ciisang aacy, wiitwambambulwiish bwa kutungunuk ni kumukadil mudimw diifuk dyoos. (Kudil. 3:22-24) I biny bitudy mwa kulongel ku bileejel bya bahambidil ba Yehow ba lulamat, ba mu biisang bifundilobw Bibl ni ba mu mafuk miitut aam? Tudy mwa kutwiilangan byeet ni makab matudy katuy batakamin. Ki hatuloolong myand ya Yehow, kakwiiy kulekoh bend bwa kwiitwambulwiish.—Mis. 55:22. w23.04 diib. 14-15 cik. 3-4

Tudy mwa kuhetel malongweesh ku cileejel cya Yozeefw ni Mariy, baakady habwiih bwa kukooyel kudy baafumw ba mbul-matady ning hakadyeby bikasakan bwa kulong nook. (Luuk 2:1-6) Haakady Mariy ni diifw dya suuny citem, mbul-matady umbiil mukenj waakady mukasakan menmen bwindiy ni bwa Yozeefw. Angus, waakady mukaleng a biin Rom utumin diiy bwa baat bakiifundish ku fiish ku misok yaabab. Yozeefw ni Mariy baakady ni bwa kulong lwend lwa kilometel 150 bahicil mu bulab bwa milund. Lwend oolw lwaakady lukasakan menmen, nang nang bwa Mariy. Biin maluw aab, baakady ni mooy bwa makand maababw ma nyeet ni bwa mwaan waakadyobw mwa kwiiy kulel. Ki i bingany byaakady mwa kulongek bu yiy mulelel mu njil? Bwaal waakady mwiimit mwaan waakady mwa kwiiy Mesih. Biineeby byaakady bwa kwiibasakok bwa kulek kukooyel kudy mbul-matady eeny? Yozeefw ni Mariy kabalekeeloh ciit ning cyaakaabumw ciibakaakeesh bwa kukooyelobw mukenj oow. Yehow ubeneshel diihangadik dyaababw dya kukooyel eedy. Mariy ufikil ku Betelem bilengel, kuleley mwaan mwiikal ni makand ma nyeet ni biineeby byambulwiishil bwa kuwaakany diiy dya buprofet dya mu Bibl!—Mik. 5:2. w23.10 diib. 8 cik. 9; diib. 9 cik. 11-12

I biny biwudy mwa kulong uw umvw mooy bwa kutwaal maalabul mu bisangil? Udy mwa kuhetok dyambulwiish uw wiilongolol bilengel. (Tus. 21:5) Cikwaabw uw mwiibidilangan ni myand yiwudy mulongolol, biiyiiy kwiikal biheehel bwiibuh kwiiyumvw bilengel ni kwiikal mwiin bukish bwa kutwaal maalabul. cikwaabw, iikal utwaalok maalabul miihiih. (Tus. 15:23; 17:27) Kwakumvwoh bend bibiih menmen uw mutwaal dyaalabul dihiih hamut a dileeh. Uw mutwaal dyaalabul dihiih mu may miibuh, wiiyiiy kuleej ney udy mwiilongolol bilengel ni udy mumvw bilengel myand yidy mu ciin-bwaal eecy. I biny biwudy mwa kulong uw mwa kukooyel myand eey ki utungunuk ni kumvw cikwaabw bibiih menmen hawukaakaam kwaalabul misang yivul hamut a musang aakaabumw eecy yibidy? Iikal mutwiishibw ney Yehow wiiyiiy kwanyish mushind uwiikaakashishomw ni mucim aakaabumw bwa kulong myand yiwudy mwa kulong. (Luuk 21:1-4) Kutwaal cidy cilengel menmen bwiibuh kakwiin kumvwiij ney udy mwa kulong myand yidy yikuhit diikand. (Fil. 4:5) Anj iikal mumanyik bwaal buwukaakaam kulong, iifundil kiihacil bwa kwiibukumbaj, ni sambil bwiibuh kwiikal ni micim yibatam. Bwaal bwa kuuhal, kiihacil aak kady mwa kwiikal ka kutwaal maalabul mu may makeeh. w23.04 diib. 21 cik. 6-8

Mupostol Pool wiitufwaafwanyikij ni basalaay badimuk ni bady biihang bwa kul diivit. Musalaay udy ni cya kwiikal mwiihang diib dyoos hadyok diivit. I bya mushind aakaabumw ni tut. Tushaal biihang bwa diifuk dya Yehow hatuvwaavwaal diitabij ni lukat bu ngabw, ni hatuvwaavwaal kutakamin kwa luhand, bu ciful. Ngabw waakady ulam mucim a musah. Diitabij ni lukat bilaalam mucim iitut a mu ciifwaany. I biikadil biikal mwa kwiitwambulwiish bwiitut kutungunuk ni kukadil Yehow mudimw ni kulond Yeez. Diitabij ditujaajaadikil ney Yehow wiiyiiy kwiituh bulang bwa mutumukaakaam ni mucim iitut woos. (Ebr. 11:6) Diitabij diiyiiy kwiitusak bwa kushaal ni lulamat kudy Mulombol iitut Yeez, ning tut tutaatameen makab. Tudy mwa kukashish diitabij diitut bwiitut kuhet mushind utudy mwa kutaatameen makab hakulongel ku bileejel bya biin mudimw ba Mawej ba leeloow bady balam mucim aabab mutook hadyobw bibakabish ni biibamweesh mal eecy hadyobw bahet lutat lwa makut. Ni tudy mwa kweehuk butey bwa kutungunuk ni kukaam bikasakan makut ni bihak tut katuy bidikij aab bady baheehej shikacil aabab ha kuteek ha cyaab cya kuuhal myand ya Bukaleng. w23.06 diib. 10 cik. 8-9

Sambil bwa wiikal wiikand. Bwaal kwiikand kwiitusaasak bwa kukumbaj biihacil biitut kulong bwaal bulengel, amanaman biiby biikal ney kiihacil i kakasaakan bwiitut kwiikakumbaj. Vuluk ney, kwiikand i cimw cya ku biikadil bya dimum dya spirit, nook lomb Yehow bwa akwambulwiish ni spirit mujilang bwiibuh kwiikal ni ciikadil cya buseeb eecy. (Luuk 11:13; Kal. 5:22, 23) Kutakaminoh bend bwa myand yiiy yiwaakan mu shikacil. Mu bulongolody oobw, katwaakwiikaloh bend ni shikacil muwaakan. Tut batakamin teng ney myand yiiyiiy kuwaakan kuuhalok mu bulongolody oobw, katwiish mwa kukumbajoh bend kiihacil kiitut. Tudy mwa kwiikal katuy biiyumvw bilengel bwaal kiihacil kiitut i kamweek kakasakan menmen bwa kwiikakumbaj. Biby biikal ney ki mudyeby bwiibuh, udy mwa kulek kiihacil kawudy naak kady kakasakan bwa kwiifundilok biihacil biheehel eeny? Iikaleby ney kiihacil kiibuh i ka kwiikal ni ciikadil kaahand, bwabiny kwiish mwa kwanj kwiikaleejok mu mishind yiheehel? Iikaleby ney kiihacil kiibuh i ka kubal Bibl mutuutul kwiish mwa kulongok program bwiibuh kwiikal kumubal mu minit yikeeh eeny? w23.05 diib. 29 cik. 11-13

Mu mafuk ma bulekel aam, Yehow i mukal mudimw ni bulongolody bwindiy bwa kutungunuk ni kwiitwaakish byaakudy bya mu spirit bidy mu Diiy dindiy bwa kwiitwambulwiish bwiitut kutungunuk ni kwendel mu “Njil a Bujilang.” (Ye. 35:8; 48:17; 60:17) Tudy mwa kuleeb ney hady muut wiitab bwa kulong Bibl, uheehet dyaakatook dya kwendel mu “Njil a Bujilang.” Bakwaabw bendendelomw teng bwa katancy kakeeh ni kuunyim biiy balukomw. Bakwaabw i biihangadij bwa kutungunuk ni kwendelomw teng ni diib diiyiiyobw kafik kuyaayobw. I kweeh kuyaayobw? Bwa aab bady ni kutakamin kwa kuy mu diiwul, “Njil a Bujilang” wiibafiifikish mu “budimy bwa Mawej [mu paradiiz a Mawej]” mu diiwul. (Yis. 2:7) Bwa biinaab bady ni kutakamin kwa kwiiy kushikat ha bulab, njil oow wiiyiiy kwiibafikish ku buwaakan ku bulekel kwa mivw 1 000. Uw mwiikal wendel mu njil oow leeloow, kulangiloh bend ha myand yiwukaady mulek. Ni kwaalukoh bend mu njil oomw teng ni muwufiifik kuwuyaay mu bulongolody buhyaabuhy! w23.05 diib. 17 cik. 15; diib. 19 cik. 16-18

Uw mulangil ha myand yoos yidy Yehow mukulongel, wiiyiiy kwiilambul kudyey. (Mis. 116:12-14) Bibl ubiibiikan Yehow ni bujaalal boos ney: i mwaakishangan a “bukish boosolol bwa mulow ni kuh koosolol kulengel.” (Jak 1:17) Cya bukish citam cidy cihitok byoos i mulambw a mwaan indiy Yeez! Langil ha mushind udy cya kukuul naacy baat cikwambulwiish bwiibuh kudy bulund bulengel ni Yehow. Ni cikuheehetesh mushind iibuh kuhet buumy bwa mwendelel. (1 Jah 4:9, 10) Kwiilambul kwiibuh kudy Yehow i mushind mulengel wa kuleej kwaan kuwudy naakw, bwa mushind mutam udyey mwiituleej lukat, ni bwa mabenesh makwaabw moos mady Yehow mukwaakish. w24.03 diib. 5 cik. 8

Hatutaatal mudy myand yibiih yend teng ni kunyanguk mu bulongolody oobw, tumvumvw teng bu mumvwiil muut muwaakan Loot. “Waakady wiikunying bwa myand yibiih yaakady baat babiih ba ha ciisang cindiy balong,” bwaal waakady mumanyik ney Taat iitut a mu diiwul i mukin myand yibiih. (2 Py. 2:7, 8) Bu mwaakady Loot uneemek Mawej bikasakan ni mukat, waakady mukin myand yibiih yaakady baat baakady bamunyungulukil balong. Tut byeet i biitunyungulukil kudy baat baneeneemekok eecy bakiish bend baneemek mikenj ya Yehow. Ning naak, tudy mwa kutungunuk ni kwiikal ni biikadil bilengel tut bakat kushaal mu lukat lwa Mawej ni hatuloong bwa kumuneemek bikasakan. Mu mafuk ma kubulekel aam, Yehow wiitukaakashish ni lukat ku dyambulwiish dya mukand a Tusumw. Biin Krist boos, baan-balum ni baan-bakaj, baasand ni bakuluuh, bady mwa kuhet biin-biin dyambulwiish hadyobw bangat ni buseeb mubel a meej udy mu mukand a Tusumw oow. Tut biikal tuciin Yehow, katwaakulongoh bend myand yibiih. w23.06 diib. 20 cik. 1-2; diib. 21 cik. 5

Misang yikwaabw biin mu cisak ciibuh bakulwiilwiish eecy udy mulek mishind ya kuhet fwalang yivul bwa kuteek myand ya Bukaleng bwa Mawej ha cyaab cya kuuhal mu shikacil iibuh. (Mat. 6:33) Biby biikal naak, iikal mujaadik ney Yehow i mumanyik byoos biwuloolong bwindiy. (Ebr. 6:10) Misang yikwaabw udy mutal mudy may aam miikal ma biin-biin: “Biikal muut mushiy nzubw indiy, baan-baabw baan-balum, balookej bindiy, ba maam indiy, taat indiy, baan bindiy, ni madimy mindiy bwa kuulondey mim ni bwa Musah Mulengel, wiiyiiy kuhet ciisang citudy kaabaakoow eecy mazubw, baan-baabw baan-balum, balookej, baamaamend, baan, madimy ecy wiiyiiy kwiibihet bikuuk lukam, ni bamumweesheloh ni mal. Kuunyim ciisang ciiyiiy kuuhal, wiiyiiy kuhet buumy bwa mwendelel.” (Mark 10:29, 30) Mabenesh mawudy muhet i mavul mahitok byoos biwudy mwiibudishomw.—Mis. 37:4. w24.03 diib. 9 cik. 5

Haakady biin Krist ba mu Yuudeh bahet ciyool cya nzal, biin-kweet ba mu cisumbw cya mu Antiyosh “baswiikil diiy bwa kusangobw biit, muut ni muut waakady utwaal cyaakadyey naacy bwa kutuminobw biin Krist naab bakaady bashikat ku Yuudeh.” (Yil. 11:27-30) Ning mwaakady biin-kweet baakady bakab bwa ciyool cya nzal bashikacil kuleeh, biin Krist ba mu Antiyosh baswiikil diiy bwa kwiibambulwiish. (1 Jah 3:17, 18) Tut byeet tudy mwa kuleej lus leeloow hatumamanyik ney biin Krist neet bakaakab bwa bikumin eecy bwa myand yikwaabw yikasakan yidyobw batwiilangan naay. Twiibaakaakish lwang-lwang biit bidyobw naaby diikeng, misang yikwaabw hakwiihanguj bakul bwa kumanyik ning kudy mudimw kaahand utudy mwa kulong, hakutwaal bya bukish biitut bwa mudimw uloolongek ha bulab butuutul, eecy hakusambil bwa aab bakaakab bwa cikumin. Biin-kweet bady mwa kukaam byaab biit bidy mwa kwiibambulwiish bwa kwiikalobw bilengel. Ciisang ciikal Mukaleng iitut, Yeez Krist mwa kwiiy bwa kulumbulwiish baat, yiy mwiitusangan biikal ni lus, udy mwa kwiitubiikan bwa ‘kuhyaan Bukaleng.’—Mat. 25:​34-40. w23.07 diib. 4 cik. 9-10; diib. 6 cik. 12

Yeez ulondel mu diikas dya Yehow dya kutal myand mu mushind mulengel. Bamutumin ha bulab bwa kudiil “mikook ya mu nzubw a Izaleel yidy yihamban” musah. Ki uleejel mwaakadyey utal myand mu mushind mulengel ha kudiil baat boos musah. Cileejel, maam mukwaabw waakady kay mwiin Izaleel umwiisanjil bwa kondahey mwaan indiy mwaan-mukaj “waakady demoh ukabish.” Yeez umvwiil lus luvul ni kulongey cyaakady maam ukaam, kondahey mwaan indiy. (Mat. 15:21-28) Tutal cileejel cikwaabw. Hatangiley mudimw indiy, Yeez uleebel neey: ‘muut woos waakaalek . . . , Niiyiiy byaany kumulek.’ (Mat. 10:33) Ulongelok nook bwa Pyeel waakady mumutun bikuuk bisat eeny? Waakweeh. Yeez umanyikil ney Pyeel waakady mwiikunying bwa cilongeley ni waakady muut a diitabij dikasakan. Hasangukil Yeez, waakady mumweekel Pyeel ni kumujadikiley ney, waakady mumufwiil lus ni mumukat. (Luuk 24:33, 34) Mawej Yehow ni Yeez i baat bady ni kulang kwa meej kulengel. Ki tut naabw? Yehow ukaakaam ney twiikal byeet ni kulang kwa meej kulengel. w23.07 diib. 21 cik. 6-7

I mushind kaay utudy mwa kujaadikil aab balaalandul bwa kukumban kwa mulay a Mawej wa Paradiiz? Cyaakuuhal, Yehow kaayend i yiy udy mulay. Mukand a Myand Yisokolweel Jah uleeleeb ney: “Naak waakady mushikat mu kwaas a bukaleng uleebel ney: ‘Kaabaak! naloolong myand yoos yihyaayihy.’” Udy ni meej, bukash ni micim kwiiwul kwiiwul bwa kukumbaj mulay indiy. Ciibiidy, Yehow i mumanyik ney byoos bidyey muleeb biiyiiy bikumban. Uleeleeb cikwaabw ney: “Fund bwaal may ma mim aam i ma biin-biin, i mawaakan kuteekel micim. . . . Byoos bibaawaakan!” Ciisaat, Hady Yehow utang kulong bwaal kaahand, wiiyiiy teng kwiibukumbaj ni kubulekel kwa bubw, teng mwiitujaajaadikil cyambil cya ney: “Mim nady Alfah ni Omekah.” (Yis. 21:6) Yehow wiiyiiy kuleej ney Sataan i mwiin makos ni ubaakaakal kukumbaj byoos. Nook, dimw diib muut yiy mukwambil ney, “Myand eey kayiish mwa kwiiy kukumban,” mubadil ni umumvwiij Myand yisokolweel Jah 21:5, 6. Muleej mudy Yehow mwiitujaadikil mulay indiy udyey muleej mu may mindiy ma bulekel aam, teng mwaakadyey muman kuleeb.—Ye. 65:16. w23.11 diib. 7 cik. 18-19

Yehow ulayil Abraham mulay oow haakadyey ni midimw 75 kay mwaan. Abraham utadil mwaakady mulay aaw mukumban eeny? Kaakadyoh bend mumutal mukumbeeney woos. Hamanyinobw kusabuk musul a Efrat ni kwiimanyin mivw 25, Abraham utadil mulelelobw mwaan indiy Izaak mu cishim, ni kuunyim kwa mivw yikwaabw 60, balelel biikul bindiy Ezaw ni Jakobw. (Ebr. 6:15) Ki Abraham katadiloh bend twiikululwiil twindiy tushaal cis citam ni tuhyaan Bulab Bulay. Nook, muut a lulamat oow usangeel bwa bulund bulengel budiiley ni Cyakahang indiy. (Jak 2:23) Ni hiiyiiyobw kusangul Abraham, i musangal kaay wiiyiiyey kwiikal nend bwa kumanyik ney diitabij dindiy ni kutuukij mu diis kwindiy i kwiiy kuhetesh bis byoos mabenesh! (Kbwa. 22:18) I dilongweesh kaay bwiitut? Katwiin mwa kutal mudy milay ya Yehow yoos yikumban musang umw. Ki, tut biikal batukij mu diis teng bu Abraham, twiiyiiy kwiikal batwiishibw ney Yehow wiiyiiy kwiituh bulang teng kaabaak ni mu bulongolody Bwindiy buhyaabuhy budyey mwiitulay.—Mark 10:29, 30. w23.08 diib. 24 cik. 14

Hacyaakadyey sand, Mukaleng Oziyas waakady ni kwiihweekesh. Waakady mwiikashishomw “bwa kumanyik lukat lwa Mawej.” Ni Yehow uyiishil myand yindiy kuuhal mu mivw yihit ha 68. (2 Cif. 26:1-4) Oziyas ucimwiin balwiish bavul baakady balwiish cis cyaababw ni ulongel myand bwa cibunj cya Yeruzalem ciikal cilam bilengel. (2 Cif. 26:6-15) Oziyas waakady biin-biin ni musangal bwa byoos byaakady Mawej mumwambulwiish bwa kulongey. (Mul. 3:12, 13) Mukaleng Oziyas waakady ni cimbidil cya kwambil bakwaabw cyaakadyey mukat bwa balong. Byaakady bimusakok bwa kulang ney waakady mwa kulong bwaal boos bwaakadyey mukat eeny? Diifuk dikwaabw, Oziyas wangacil dihangadik dya kutweeley mu Nzubw a Mawej ni dikam-kam, ukaamin bwa koosh manansh ha cilambwiil mu tempel, bwaal bwaakady bakaleng kabay ni bwa kulong. (2 Cif. 26:16-18) Mutam a balambul ba milambw Azariyah ukaamin bwa kumubel, ki Oziyas ufulwiil mund bikasakan. Bya kaakunying, Oziyas kashaadiloh bend ni lulamat ni uhetel nyaw bu diinyook dimuheel Yehow. (2 Cif. 26:19-21) Shikacil indiy waakady mwa kwiiy kulengel menmen yiy mwiikal mushaal ni kwiihweekesh! w23.09 diib. 10 cik. 9-10

Ning kuunyim kwa yiy muman kushaal mwiin Krist mushing diisaby, mupostol Pyeel utungunukil ni kul diivit ni myand yaakady yimukooyesh mu diitabij. Mu 36 H.H.Y., Pyeel waakadyoh diib dyaakadyobw bashing Korney muut waakady kay mwiin Yuud ni waakady kay mutahish diisaby ku dyambulwiish dya spirit mujilang, ni bimweekel hatook ney “Mawej kiishoh bend ni kabow,” ning baat bakiish biin Yuud bady mwa kwiikal byaab mu cisumbw cya biin Krist. (Yil. 10:34, 44, 45) Hamanyin kutal Pyeel naak, utwaadijil kudy haakaabumw ni baat bakiish biin Yuud, bwaal bwaakadyey kay mwa kulong kuuhal. Ki, bamw biin Krist biin Yuud batadil ney kabyaakady bikaam bwa badiil haakaabumw ni bakiish biin Yuud. Haakady bamw baakady ni meej ma nook bafik ku Antiyosh, Pyeel ulekeel kudy haakaabumw ni baan baabw bakiish biin Yuud, misang yikwaabw waakady uciin biin Krist biin Yuud. Mupostol Pool utadil cilongel Pyeel ni umubelel kuuhal kwa baat boos. (Kal. 2:13, 14) Ning mulongeley cilem eecy, Pyeel utungunukil teng ni kwiikal ni lulamat. w23.09 diib. 22 cik. 8

Udy mwa kwiikontonon kaayeeb bwa kutal bwaal kaahand buwudy mwa kulongolol, ki kukooyeloh bend mu mabok. ‘Mawej i mulengel myand,’ ni wiiyiiy kukwambulwiish bwiibuh kulongolol myand kaahand. (1 Py. 2:3) Mupostol Pyeel wiitujaajadikil ney: “Mawej . . . wiiyiiy kwiinuwaakany yiy kaayend. Wiiyiiy kwiinujaamij.” Pyeel waakady wiiyumvw kuuhal ney kaakadyoh bend mukumban bwa kwiikaley ni Yeez. (Luuk 5:8) Ki ku dyambulwiish dya Yehow ni Yeez, Pyeel utungunukil ni kulond Yeez ni lulamat. Nook, banyishil Pyeel bwa kuhetey mushind a “kutweel mu Bukaleng bwa diikal bwa Fumweet ni Mwiitukuuloh iitut Yeez Krist.” (2 Py. 1:11) Bwiin oobw i bulang bulengel bweeh! Uw mutungunuk ni kwiikal ni lulamat teng muleejel Pyeel ni uw mwiitab bwa Yehow akulongweesh, wiiyiiy kuhet byeeb bulang bwa buumy bwa mwendelel. Nwiiyiiy kuhet “luhand lwa micim yiinun bu bulang bwa kwiitabij kunudy biitabij.”—1 Py. 1:9. w23.09 diib. 31 cik. 16-17

Tempel waakady muteek mu luhang mwiikal ni cyaab citam cyaakady balambul ba milambw baakadil midimw yaabaabw. Mwiin mu luhang aamw mwaakady cyooshel citam cya bronz ni diilong dya mwanz dya bronz mwaakady balambul ba milambw bowel mwanz kuuhal kwa kutangobw mudimw aababw mujilang. (Cim. 30:17-20; 40:6-8) Leeloow, bashaadil ba ku bashing diisaby bendend ni kukal mudimw ni lwiitabij mu lubanz lwa mund lwa tempel a mu spirit ha bulab. Diilong ditam dya mwanz divuuvulwiij bashing diisaby ni biin Krist boos ney bikaam bashaal teng bajilang ku nyeet ni mu spirit. Ki i bingany bitudy mwa kuleeb bwa “baat bavul beeh” bendend ni kukwanjok ni lulamat loos baan baabw ni Krist bashing diisaby bwa kuhambidilobw Mawej? Mupostol Jah wiibatadiil “biimanakan kuuhal kwa kwaas a bukaleng,” bwiin kuleeb ney ha bulab aah, mu lubanz lwa hanj mudyobw “bakadil Mawej mudimw bufuk ni munyiny mu nzubw mwindiy.” (Yis. 7:9, 13-15) I dyaakatook buneen kaay ditudy naady dya kuhambidil Yehow mu tempel indiy a mu spirit! w23.10 diib. 28 cik. 15-16

Mushind udy Yehow wiitwaakish bukash bwindiy i ku dyaambulwiish dya bakul. (Ye. 32:1, 2) Nook uw ukabakan ni micim bwa myand yidy yikutond, udy mwa kwiiyambil bakul. Bab bakwaakish dyambulwiish, i diitab ni dyanyish. Ku dyambulwiish dyaabab, Yehow udy mwa kukukashish. Kutakamin kwiitut kudy kushimatil mu Bibl kudy cikwaabw mwa kwiituh diikand. (Rom 4:3, 18, 19) Kutakamin kwiitut kwiitukaakashish bwiitut kutaatameen makab, hatudiidiil baat musah mulengel, ni hatuloolong midimw yishiil-shiilangan mu cisumbw. (1 Tes. 1:3) Kutakamin kwaakaabumw ook kukashishil byend mupostol Pool. ‘Bamumweeshel mal,’ ‘baakady bamulekesh bwa kukadil Mawej mudimw,’ ‘bamukabishil’ ni ‘bamufiinyin haash.’ Buumy bwindiy bwaakady mu buuhund. (2 Kor. 4:8-10) Pool uhetel bukash haakadyey mutum meej ku myand yaakadyey mutakamin. (2 Kor. 4:16-18) Pool waakady mutum meej ku kutakamin kwindindiy kwa kwiikal ni buumy mu diiwul. Pool waakady ulangil ha kutakamin ook, ni bu cihet, waakady wend ni “kukasakan ku diifuk ni ku diifuk.” w23.10 diib. 15-16 cik. 14-17

Hawusaasambil, iikal wanj utal ney, ‘Ciineecy, i ciissang cidy Yehow mwa kuuyakish cinady mumulomb eeny?’ Tudy mwa kulang ney, bikaam tuhet teng kaabaak dyaalabul ku masambil miitut. Manyik ney Yehow i mumanyik ciisang cilengel cidyey mwa kwiitwambulwiish. (Ebr. 4:16) Diib ditudy katuy tuhet bitudy balomb teng kaabaak, tudy mwa kulang ney, dyaalabul dya Yehow didy ney, ‘Waakweeh kwiishoh bend uhet ciit.’ Ki dyaalabul dindiy didy mwa kwiikal biin-biin ney, ‘Ciishoh bend mwanj kukwaalabul.’ Cileejel, mwiin-kweet mwaan-mulum sand usambidil bwa kumondahobw lubeel lwaakadyey naalw. Ki lubeel aalw, kaluhwiiloh bend. Bu Yehow mwiikal mumondah mu cishim, Sataan waakady mwa kuleeb ney, mwiin-kweet utungunukil ni kukadil Yehow mudimw teng bwaal Yehow waakady mumondah. (Yoobw 1:9-11; 2:4) Cikwaabw, Yehow i muman kulongolol ciisang cikaley mwa kuman mabeenj moos. (Yesh. 33:24; Yis. 21:3, 4) Bwa kaabaak, katwiishoh bend mwa kutakamin bwa kwiitondahobw mu cishim. Nook mwiin-kweet mwaan-mulum oow waakady mwa kutungunuk ni kulomb Yehow bwa kumwaakishey diikand ni diitalal dya mu micim bwindiy kutungunuk ni kutaatameen lubeel lwaakadyey naalw ni bwindiy kutungunuk ni kukadil Mawej mudimw ni lulamat. w23.11 diib. 24 cik. 13

Samuson ulongel cilem citam menmen, ki utungunukil ni kukadil Yehow mudimw. Ukaamin mushind kaahand bwa kukumbaj mudimw umwaakishilobw kudy Mawej bwa kukwaat Baafilisiteh. (Zuj. 16:28-30.) Samuson ulombel Yehow ni may aam: “Uyaakishilul makand , bwa nahingijil Baafilisiteh cinding.” Mawej a biin-biin waalabwiil kulomb kwa Samuson hakumwaakishilul makand ma habwaah. Bu cihet, Samuson ucimwiin bikasakan Baafilisiteh bwa musang oow kuhitok ni kuuhal. Ning mwaakady Samuson muhet makab mavul bwa bubiih bulongeley, utungunukil teng ni kulong lukat lwa Yehow. Cikwaabw ning tut balong bwaal kaahand bubiih ni tukaam bwa biitubel eecy tut bajimbaj midimw kaahand mu cisumbw, bikaam tutungunuk ni kukadil Yehow mudimw. Vuluk ney: Yehow udy habwiih bwa kukufwiil lus. (Mus. 103:8, 9) Ning mutuloolong bilem, Yehow udy mwa kwiitwaakish bukash bwiitut kulong lukat lwindiy, teng bu mulongeley ni Samuson. w23.09 diib. 6 cik. 15-16

Kukasakan kwiibuh kwa micim kuloolong bwa Yehow akwaan. Biineeby kabiish byumvwiij ney Yehow usaasangal hawumoomon makab ni mal. Mawej ukwaakwanyish uw. Kukasakan kwiibuh kwa micim kuloolong bwa Mawej akwaan. I diibenesh diidiin dyeeh! (Mis. 5:12) Vuluk ney, Abraham umweenen makab, ki haakadyey mwiimataatameen Yehow umwanyishil. Yehow umutadil bu mulund nend ni umubadil bu muut muwaakan. (Kbwa. 15:6; Rom 4:13, 22) Bidy mwa kwiikal naak bwiitut byeet. Mawej kiish wiimanyin ha myand yituloolong mu mudimw indiy eecy ha majit matudy naam bwa kwiitwanyishey. Yehow wiitwanyanyish hatushaashaal bamulamat ning mu makab. Ning tut biikal ni mivw buuny kaay eecy ni shikacil wa mushind kaay eecy ni diimany dya bicy, tut boos tudy mwa kutaatameen makab. Utaataatameenok kaabaakoow lutat kaahand ni lulamat eeny? Biiby biikal naak, ukaakasakan micim hawumamanyik ney Mawej ukwaakwanyish. Kumanyik ney Mawej ukwaakwanyish kwiitwaakaakish bukash. Kudy mwa kukashish kutakamin kwiitut. w23.12 diib. 11 cik. 13-14

Bikaam mwiin Krist amanyik mwa kwiisamb bilengel. Mwaan-mulum udy mumanyik mwa kwiisamb bilengel i mukat kukun mat ni kumvw mulaalang bakwaabw ni mudyobw biiyumvw. (Tus. 20:5) Udy mwa kulong bwa kumanyik muleeleeb muut mukwaabw, kumumanyik bilondeshel mudyey ulong ku mees, ni biloolongey. Kwiin mwa kulongoh bend nook uw kuy uhitij diib ni baat. Uw ukal mudimw ni byaamw bya kwiisambil naaby, bu mudy kutuminangan mikand ni kufundilangan mesaaj, biineby bidy mwa kukukakeesh bwa kwiisamb ni baat taz-ni-taz. Nook, iikashishomw bwiibuh kuhet mishind bwa kwiisamb ni baat bakwaabw taz-ni-taz. (2 Jah 12) Mwaan-mulum udy mukasakan mu sprit mwa kwiiyambulwiish yiy kaayend ni biin mu cisak cindiy. (1 Tim. 5:8) I bilengel kulong myand kaahand yiikal mwa kukwambulwiish bwiibuh kuhet mudimw. (Yil. 18:2, 3; 20:34; Ef. 4:28) Leej ku myand yiwuloolong ney udy muut ukaakal mudimw bikasakan ni udy mujaadik ney wiiyiiy kuman mudimw uwukaady mutwaadij kulong. Uw mulong nook, wiiyiiy kuhet misang yikwaabw mudimw ni umanyik mwa kumulam. w23.12 diib. 27 cik. 12-13

Hady Bibl uleeb bwa “diifuk dya Yehow,” uleeleeb bwa ciisang ciiyiiy Yehow kubutul balwiish bindiy ni ciiyiiyey kukuuuloh baat bindiy. Ha kal, Yehow waakady unyook bis kaahand bya baat. (Ye. 13:1, 6; Ezek. 13:5; Sef. 1:8) Mu ciisang ciitut eecy, “Diifuk dya Yehow” ditwaatwaadij hady biin cidiidy batwaadij kulwiish Babiloon Mutam ni bulwiish oobw bwiiyiiy kufik teng ni ku diivit dya Harmakedon. Bwiitut kuhanduk ku “diifuk” aady, bikaam twiilongolol teng kaabaak. Yeez ulongweeshel ney katwiin mwa kwiikal teng biilongolol bwa “ciisang cya mal miimiin” ki cikwaabw bikaam ‘twiikal bihang’ bwa diifuk aady. (Mat. 24:21; Luuk 12:40) Mu mukand indiy a kuuhal mufundish ku spirit mujilang waakadyey mutumin biin Tesalonik, mupostol Pool ukadil mudimw ni bileejel bivul bwa kwambulwiish biin Krist bwa kwiikalobw biihang bwa diifuk ditam dya Yehow dya kulumbulwiish baat. Pool waakady mumanyik ney diifuk dya Yehow kadyaakady mwa kwiiy ciisang aacy. (2 Tes. 2:1-3) Cikwaabw, utungunukil ni kwambil baan baabw biin krist bwa kwiilongololobw bwa diifuk aady bilong teng bu ney i muucy, ni tut byeet tudy mwa kukooyel mubel utwaadiley oow.w23.06 diib. 8 cik. 1-2

Ku bulekel bwa mivw ya 1978, baakady biibak nzubw mutam wa kwiiwul mu cimeng cya Tokyo, mu cibunj cya Japon. Baat baakady bamutal baakady biyihanguj bwa mushind wiikaley mwa kushaal mushimat hakutal mudy bulab buhit kuzakal mu tawuny aaw. I biny bilongel bamwiibakil bwindiy kushaal mwiimanakan hady bulab buzakal? Ba-enjenyeer baakady bamulong bamwiibakil mwiikal mukasakan ni kay mwa kubukuk hady bulab buzakal. Biin Krist bady teng bu nzubw mutam wa mwiiwul oow. Mu mushind kaay? Bikaam mwiin Krist iikal ni kacy-kacy habitaatal kwiikal ni mucim mukasakan ni kwiikal habwiih bwa kukooyel. Iikal ni mucim mukasakan ni kay uzakal bend hadyeby bikaam bwa kukooyel mikenj ya Yehow ni may mindiy matam. I “mwiihang bwa kukooyel” ni kay uhing bend hanyim. Mu mushind mukwaabw, bikaam iikal ni “meej malengel,” hady shikacil ukaam bwa kulong nook eecy hadyeby ni buseeb. (Jak 3:17, NWT) Mwiin Krist udy mulong bwa kwiikal ni kacy-kacy kiin mwa kwiikal teng mulamat ku butamb kaahand eecy wiitabakan myand yoos. w23.07 diib. 14 cik. 1-2

Byaakady bikaam Yeez ataatameen mateet ma Sataan Dyaabol ni myand yoos yaakady mwa kumukaakeesh bwa kushaaley ni lulamat kudy Yehow. (Mat. 4:1-11) Sataan waakady mwiiswiik bwa kufikish Yeez kukulong mpekaat bwa ney kiikal mukumban bwa kufut cya kukuul naacy baat. Mu mudimw ulongeley ha bulab, Yeez waakady mutaatameen mateet mavul. Balwiish bindiy bamumweeshel makab ni mal, ni bakaamin kumuzuh. (Luuk 4:28, 29; 13:31) Waakady ni bwa kutaatameen bilem bya biiyij bindiy. (Mark 9:33, 34) Hakadyobw bamulumbulwiish bwa kumuzuh, bamumweeshel makab ni mal, ni bamuhweekesh milong. Bulekel bwa byoos, bamuzuhil mu mushind waakady utwaal kaakunying kavul ni umuhweekesh milong. (Ebr. 12:1-3) Waakady ni bwa kutaatameen diiteet dya bulekel kaayend-kend kay ni Yehow. (Mat. 27:46) Biin-biin Yeez ukabil bikasakan bwa kutwaaley cya kukuul naacy baat. Lukat lwiitut lukaakasakan hatulaalangil ha mushind waakady Yeez mukab bikasakan bwa kufut cya kukuul naacy baat ni mutwaal buumy bwindiy bwiitut. w24.01 diib. 10-11 cik. 7-9

Kutukij mu diis kudy mwa kwiitwambulwiish mu mushind utuloolongel bakwaabw myand. Kwiitwambambulwiish bwa kukun bakwaabw mat ni meej moos hadyobw biisamb. (Jak 1:19) Kutukij mu diis kukaakaamish cikwaabw diitalal. Kwiitulaalam bwa kulong myand ni lwang-lwang menmen ni bwa kuleeb bwaal kaahand bukiish bulengel hatudy ni kaakunying. Cikwaabw, tut biikal batukij mu diis, twiiyiiy kwiikal ni ciineng mu kufulul kwa mund hady muut mwiitulongel bibiih. Hamut a kuhingijil muut cinding, twiiyiiy kutunungunuk ni ‘kufwiilangan lus ni kuvulamin buyiil myand yibiih yidyobw biitulongel.’ (Kol. 3:12, 13) Kutukij mu diis i ciikadil cidy mwa kwiitwambulwiish bwa kwangat mahangadik malengel. Hamut a kufulul mund, twiiyiiy kwangat diib dya kujoojolol myand ni kulong bitukaakaam kulong ni kuunyim tudy mwa kwiihangadij bwa kwangat dihangadik dilengel. Cileejel, tut tukaam mudimw a kulong, tudy mwa kukat mudimw a kuuhal utuheehet. Ki, tut biikal batukij mu diis, twiiyiiy kwiikal ni diib dya kukontonon myand kaahand habitaatal cyaab cya kukadil mudimw, meeb miikal mudimw aaw mwa kwiitulomb ni ciikal mudimw oow mwa kulongel biin cisak ciitut ni habitaatal bulund bwiitut ni Yehow. Hakwiikal batukij, tudy mwa kweehuk bwa kwangat dihangadik dibiih. w23.08 diib. 22 cik. 8-9

Uw mwiikal wiiyumvw mukooyel mu mikon bwa micim yikusaasak ku kulong kwa myand yibiih, kulangil kwa ha biwaakady mulay Yehow, hawaakady mwiilambul kudyey, kwiiyiiy kukashish kwiiswiik kwiibuh bwiibuh kucumun diiteet. Mushind kaay? Hawiilaalambul kudy Yehow, uleelek kuteek myand yiibuh ha cyaab cya kuuhal. Biineeby byumvumvwiij ney, uleelek milang yiibuh ni biikadil bidy kabiy bisangej Yehow. (Mat. 16:24) Nook, hawuheehet diiteet kabiish biiy bikulomboh bend bwiibuh kuhicish diib wend wiiyihanguj ciwudy mwa kulong. Wiiyiiy kwiikal muman kwiiswiik bwa ciwiikal mwa kulong i bwiin kuleeb ney: kushaal ni lulamat kudy Yehow. Wiiyiiy kwiiswiik ni mucim aakaabumw bwiibuh kusangej Yehow. Wiiyiiy kwiikal teng bu Yoobw. Ning mwaakadyey muhet makab mahit kukasakan, ni kutwiishiibw koos uleebel ney: “Cya kulekoh bend mucim aam mutook!”—Yoobw 27:5, NWT. w24.03 diib. 9 cik. 6-7

Yehow, “Mawej mwiin lukat,” udy neet! (2 Kor. 13:11) Wiitaatacish bwa myand yidy naay woos wa kutudy. Tudy batwiishiibw ney, “lukat Lwindiy lwa bulamat i lwiitunyunguluk.” (Mis. 32:10, NWT) Hatulaalangil ha mushind udyey mwiituleej lukat lwindiy, twiiyiiy kumutal bu muut a biin-biin, ni twiiyiiy kwiiyumvw habwiih nend. Tudy mwa kufweej nend habwiih biilekelel, ni tumwambil mutukaakaam bikasakan bwa ney iitukat. Tudy mwa kumwambil myand yoos yidy yiitutond, bwaal tudy bamanyik ney, wiitumvumvw ni udy habwiih bwa kwiitwambulwiish. (Mis. 145:19) Teng bu mutudy bakat kushikat ku mudil hadyok mashik, ki mutufweefweej kudy Yehow udy mwiitukat. Lukat lwa Yehow i lukasakan ni cikwaabw, i luvul menmen. Nook, iikal ni musangal bu mudy Yehow mukukat. Ni woos wa kutudy udy mwa kuleeb bwa lukat lwindiy ney: “Nady mukat [Yehow] Mawej!”—Mis. 116:1. w24.01 diib. 31 cik. 19-20

Yeez ulongel myand yikwaabw yivul. Biin Yuud baakady Yeez ulongweesh, baakady baman kal kumanyik diijin dya Yehow. Ki Yeez, wangacil cyaab cya kuuhal hakwiikal muut “udy . . . Mumumanyikish kudy baat.” (Jah 1:17, 18) Cileejel, mu mikand ya mu Bibl yifundilobw mu ciin Ebreh baleeleebomw ney Yehow ufwiifwiilangan lus ni udy ni micim yimwiit mund bwa mal mamoomon baat. (Cim. 34:5-7) Yeez uleejel bwaal bwa biin-biiin oobw hatook umbiley kasumw ka mwaan ujimbeen ni taat indiy. Hatubaabal bwa mushind waakady taat mumvwiil mwaan indiy waakady mwiikunying bwa bibiih bindiy lus “ucyaakady bituh haleeh,” waay lubil kudyey bwa kumwiimun, waamubukacil ni waamufwiil lus ni mucim aakaabumw, tumvumw biin-biin mudy Yehow ufwiilangan lus ni mudy micim yimwiit mund bwa mal mamoomon baat. (Luuk 15:11-32) Yeez wambulwiishil baat bakwaabw bwa kumanyikobw biin-biin buumuut bwa Yehow. w24.02 diib. 10 cik. 8-9

Yehow ubaabatamij ni ukaakashish micim ya bady mu makab ni mal. I mushind kaay utudy mwa kwiidikij Yehow hakwiikal ni lus ni hakukashish bakwaabw ku micim? Mushind utudy mwa kulong nook i hakwiikal ni biikadil mu micim yiitut byumvumvwangan ni kukashish bakwaabw ku micim. Teel byumw bya ku biikadil eeby. I biny bidy mwa kwiitwambulwiish bwa kwiikal ni lukat lutukaakaam bwiitut kutungunuk ni ‘kukashishangan ku micim’ diifuk dyoos? (1 Tes. 4:18) Bikaam twiikal ni biikadil bu mudy kwiikal ni lukat, lukat bu lwa baan ba kamuut, ni kwiikal biin myand yilengel. (Kol. 3:12; 1 Py. 3:8) I mushind kaay wiikal biikadil eeby mwa kwiitwambulwiish? Tut biikal ni lus bwa biin-kweet ni twiitacish bikasakan bwaabab, ni lukat lwiitut lwiiyiiy kukasakan bwiitut kwiibambulwiish hadyobw mu makab ni mal. Teng muleejel Yeez, “May mahaahatul muut mukan mady teng mady miiwul mu micim yindiy. Muut mulengel myand uhaahatul teng myand yilengel yidy mu micim.” (Mat. 12:​34, 35) Kukashish biin-kweet baan-balum ni baan-bakaj bady mu diikeng i yiy mushind a buseeb utuleeleej ney tudy biibakat. w23.11 diib. 10 cik. 10-11

Bikaam kulomb dyambulwiish tut biikal tukaam bwa kumvw may ma buprofet mady mu Bibl. Twangat cileejel eecy. Lang ket ney wendend ni kwendakan ha cyaab kaahand ciwudy kuy mumanyik bilengel, ki mulund neeb unuloong nend lwend i mumanyik bilengel cyaab aacy. I mumanyik biin-biin cyaab ciwudy ni kuyaay njil woos. Biin-biin wiikaakal ni musangal hady mulund neeb mwiitab bwa kuy neeb ha cyaab aacy! Bya mushind aakaabumw, Yehow i mumanyik ciisang citudy ni bidy kuuhal kwiitut mu njil utudy. Nook bwa kumvw may ma buprofet mady mu Bibl, bikaam tulomb ni kwiihweekesh dyambulwiish kudy Yehow. (Dan. 2:28; 2 Py. 1:19, 20) Teng bu mulel woos mulengel udy ni lukat, Yehow i mukat bwa baan bindiy biikal ni shikacil a musangal mu mafuk miiyiiy. (Jer. 29:11) Ki i bishiilangan ni mulel kaay woos oow, bwaal Yehow udy ni bukash bwa kuleeb myand yiiyiiy ni bujaalal boos. Ufundishil may ma buprofet aam mu Diiy dindiy bwa tuhet mushind a kumanyik kal myand ya buseeb yiikal mwa kwiiy kulongek. w23.08 diib. 8 cik. 3-4