Suuny a Mwandamuteket

Mu myand yoos yaakady Yeez muleeb ni mulong, ni bishim bilongeley, i mwiidikij Taat indiy ku meej ni ku mushind waakadyey wiiyumvw. (Jah 14:9) I biny bitudy mwa kulongel ku bishim bilongel Yeez? Yeez ni Taat indiy i bitukat bikasakan. Haakadyey ha bulab, Yeez uleejel mwaakadyey mukat bikasakan baat hakukal mudimw ni bukash bwindiy haakadyey ulong bishim bwa kwambulwiish baat baakady bakab. Musang mukwaabw, baat bafw mees baakady bumb Yeez diiy ney bwa kwiibambulwiishey. (Mat. 20:30-34) Manyik ney Yeez “umvwiil lus” ni cikwaabw yiy kwiibondah. Teng mudyobw bakal nend mudimw hinaah, mwaak wa ha bwaal wa mu ciin Krek udyobw baalabul ney “umvwiil lus” uleeleeb bwa mudy muut udy ni micim yimwiit mund bikasakan bwa bakwaabw wiiyumvw. Lus luvul oolw, i mushind waakady Yeez uleej mwaakadyey mukat baat, micim yaakady yimusak cikwaabw bwa kudiish baakady ni nzal ni bwa kondah mwiin nyaw. (Mat. 15:32; Mark 1:41) Bikaam twiikal batwiishibw ney Yehow i Mawej “udy ni lus luvul,” ni Mwaan indiy i mwiitukat bikasakan ni bumvumvw bibiih hatukeekeng. (Luuk 1:78; 1 Py. 5:7) I bakat bwa kufulok makab moos mady baat batwiilangan naam! w23.04 diib. 3 cik. 4-5

Tudy mwa kwiikashishomw bwa kulek kubal eecy kukun mat ku ngeny yibiih yidy naay baat ba mu bulongolody bwa Sataan oobw. Tudy mwa kwiikal ni meej malengel miiwul teh mu mit yiitut tut tubal ni tulong Bibl. Kutweel mu bisangil ni kulong mudimw a bukajaady kudy mwa kwiitwambulwiish cikwaabw bwa kulam meej miitut. Cikwaabw Yehow i mulay ney kiishoh bend mwa kwiitab bwa ney biituteet bikahit ha makand miitut. (1 Kor. 10:12, 13) Bikaam muut woos wa kutudy iikal usambil bikasakan bwa kushaaley ni lulamat kudy Yehow mu mafuk makasakan ma bulekel aam. Yehow i mukat bwa ‘tuteek micim yiitut yoos kudyey’ diib ditusaasambil. (Mus. 62:8, NWT) Tumbish Yehow ni mufwiijok bwa byoos bidyey ulong. Mulomb bwa akwambulwiish bwiibuh kwiikal ni mucim mukasakan mu mudimw a bukajaady. Mulomb bwa akwambulwiish bwiibuh kutaatameen makab ning ma bicy ni bwiibuh kukasakeen mateet ning ma mushind kaay mawudy mwa kutwiilangan naam. Kulekoh bend ciit ning cyaakaabumw eecy muut kaay woos ukukaakeesh bwiibuh kwiikal ni ciibidil cya kusambil Yehow. w23.05 diib. 7 cik. 17-18

Bwaabiny tudyaakal tuy mu bisangil? Kabingil katam i bwiitut kutumbish Yehow. (Mus. 26:12; 111:1) Tutweetweel cikwaabw mu bisangil ni kiihacil ka kukashishangan ni biin-kweet mu biisang bikasakan eeby. (1 Tes. 5:11) Tukukumbaj biihacil bibidy eeby hatumbumb cikam mwiiwul ni twaalabul. Ki myand yibidy yidy mwa kulong bwa biitukasakeen bwiitut kutwaal dyaalabul: 1) Tudy mwa kumvw mooy bwa kwaalabul. 2) Tudy mwa kwiikal bakat bikasakan kutwaal maalabul, ki kabiish bahit kwiitusungul mutudy bakat. I biny bidy mwa kwiitwambulwiish? Mupostol Pool uleebel ney bikaam tutungunuk ni ‘kukashishangan mu mabok.’ Tut batal ney dyaalabul diitut diihiih didy mwa kukashish diitabij dya baat bakwaabw mu bisangil aamw, biikaakal bilengel bwiitut kumb cikam mwiiwul bwa kwaalabul. Ni tut batal ney kabiish bahit kwiitusungul bwa kwaalabul, tudy mwa kwiikal ni musangal wa ney bakwaabw ba mu cisumbw biiyiiy kuhet mushind a kwaalabul.—1 Py. 3:8. w23.04 diib. 20 cik. 1-3

Mukaleng utwaadil diimanyish! Biin Yuud, baakady bahik mu Babiloon mukacy mwa mivw 70, baakady biibalekelel bwa kuhingomw mu cibunj cyaabab, mu Izaleel. (Esd. 1:2-4) Teng Yehow ki waakady mwa kwiiy kukumbaj bwaal oobw. Bwaal Babiloon kaakady mwa kulekelel biin-biin bahik. (Ye. 14:4, 17) Ki Babutwiil Babiloon, ni mukaleng muhyaamuhy uleebel ney biin Yuud bady mwa kuhatuk. Mwiin Yuud woos, nang-nang baafumw ba bisak, waakady ni bwa kwangat dihangadik: bwa kuhatuk mu Babiloon eecy bwa kushaalomw. Kabyaakadyoh bend biheehel bwa kwangat dihangadik aady bu diin eedy. Bukuluuh bwaakady mwa kukaakeesh bavul bwa kulongobw lwend luleeh lwaakady mwa kwiibakabish. Ni bu mwaakady biin Yuud bavul biikal baleelel mu Babiloon, bakaady bamanyik teng cibunj cya Babiloon. Bwa bab, Izaleel waakady bulab bwa baakaakababw. Bamw biin Yuud bamweekel ney bahetel bihak bivul mu Babiloon, nook byaakady mwa kwiikal biibakasakeen bwa kushiyobw mazubw maabab malengel eecy bihak byaabab bwa kuyobw kashikacil ha cyaab cyaakadyobw kabay bibidilangan naacy. w23.05 diib. 14 cik. 1-2

Diiy dya Mawej ditukaakashish bwiitut kutungunuk ni kutaatameen, kuleejangan lus ni lukat. Luuk 21:19 uleeleeb ney: “Anwaasuminyinaay [anwaataatameenaay], nwiiyiiy nuhandukaay.” Biin Kolos 3:12 uleeleeb ney: “Bikaam nwiikal biin lus.” Ni mu 1 Biin Tesalonik 4:9, 10 baleeleebomw ney: “Nun biin, Mawej wiinulongweeshel mwiinun kukatangan. . . . Twiinuloolomb, a biin-kweet, bwiinun kulong bilengel kuhicijoh.” Verseh yoos eey baakady biiyifundil biyiij baakady baman kutaatameenatameen, baleejel lus ni lukat. Ing, batungunukil ni kuleej biikadil eeby. Bikaam tulong byeet naak. Bwiibuh kuleej biikadil eeby, tal mwaakady biin Krist ba kuuhal biibileej. Nook, wiiyiiy kutal mushind uwudy mwa kwiidikij biiyij aab, ni wiiyiiy kwiikal mwiilongolol bwa ciisang cya mal miimiin. Ni hiikal mal miimiin mwa kutang, wiiyiiy kwiikal muman kulong muwudy mwa kwiimataatameen ni wiiyiiy kwiikal mwiiswiik bwa kutungunuk ni kwiimataatameen. w23.07 diib. 3 cik. 4, 8

Ning tut biikal bashing diisaby eecy “mikook yikwaabw,” Tudy bakat bwa kushaal mu “Njil a Bujilang” bu mudyey wiiy kwiitwambulwiish bwa kutungunuk ni kuhambidil Yehow leeloow mu paradiiz iitut a mu spirit ni wiiyiiy kwiitufikish ku mabenesh miikal Bukaleng mwa kwiiy kwiituhetesh ha bulab. (Jah 10:16) Kacy mu muvw a 1919 B.B., baat miliyo yivul baan balum, baan bakaj, ni baan i bahatuk mu Babiloon Mutam, sangil a bitendeleel bya makos, ni i batwaadij kwendel mu njil a mu ciifwaany oow. Haakady biin Yuud baaluk mu Babiloon, Yehow waakady mulongolol myand bwa baful biit byoos byaakady mu njil byaakady mwa kwiibakakesh bwa kutungunuk ni lwend. (Ye. 57:14) Bwiitut leeloow “Njil a Bujilang” i biny? Mivw kam yivul kuuhal kwa muvw a 1919, Yehow utwaadijil kukal mudimw ni baan-balum baakady bamuneemek bikasakan bwa kulongobw bwa baat bakwaabw bahet mushind a kuhatukobw mu Babiloon Mutam. (Fwanyikij ni Yeshaay 40:3.) Balongel mudimw a buseeb habitaatal njil a mu spirit wiikal mwa kwambulwiish baat ba micim yilengel bwa kuhatukobw mu Babiloon Mutam ni bwa bab kutweel mu paradiiz a mu spirit, cyaab cidyobw mwa kuhambidil Yehow haakaabumw ni baat bindiy. w23.05 diib. 15-16 cik. 8-9

Yehow i mukat bwa tumukadil mudimw ni musangal ni mucim aakaabumw. (2 Kor. 9:7) Nook bikaam tutungunuk ni kukal mudimw bwa kukumbaj kiihacil kiitut ka mu spirit ning tut katuy ni lukat bwa kwiikakumbaj eeny? Tukontononaay cileejel cya mupostol Pool. Uleebel ney: “Nakaakabish nyeet ya mim niiyilaam bikasakan ni niiyilombol bu muhik.” (1 Kor. 9:25-27, NWT) Pool waakady wiikashishomw bwa kulong cidy ciwaakan ning haakady baat bakwaabw kabay bamukashish bwa kulong cyaakady Yehow ukaam bwa along. Yehow waakadyok ni musangal bwa mudimw waakady Pool ulong eeny? Ing! Cikwaabw Yehow umwaakishil bulang bwa kwiikashishomw kwindiy (2 Tim. 4:7, 8) Bya mushind aakaabumw, Yehow udy ni musangal hadyey wiitutal tukal mudimw bwa kukumbaj kiihacil kiitut ning hadyok kakuy baat bady mwa kwiitukashish bwa kulong nook. Udy ni musangal bwaal i mumanyik ney ning tut katuy bakat mudimw utuloolong, i mumanyik ney tumuloolong bwaal tudy bamukat. Teng bu mwaakady Yehow mufiil Pool kis, wiiyiiy kwiitufiil byeet kis bwa kwiikashishomw kwiitut. (Mus. 126:5) Ni hatutaatal mudy Yehow wiitufiil kis, bidy mwa kwiitusak cikwaabw bwa kumukadil mudimw. w23.05 diib. 29 cik. 9-10

Mupostol Pool i mufwanyikij aab bakiish biiy kuhanduk mu diifuk dya Yehow ni aab bady balaal. Kabiishoh bend bamanyik myand yiloolongek ha cyaab cidyobw bashikacil eecy ciisang cyendend ni kuhit. Nook kabiish bajingunun myand ya buseeb yiloolongek ha bulab ni kabiish ni ciloolongobw bwa myand eey. Baat bavul leeloow i balaal tul habitaatal myand ya mu spirit. (Rom 11:8) Kabiish biitab bijaadik bileeleej ney tukaady mu “mafuk ma bulekel” ni kabiish biitab cikwaabw neey ciisang cya mal miimiin ciiyiiy kwiiy mu kalung kakeeh oomw. (2 Py. 3:3, 4) Nook, tudy bamanyik ney mubel udyobw batwaal oow ku dyambulwiish dya spirit wiitwambambulwiish bwiitut kulong myand lwang-lwang bwa kwiikal teng bakazamuk diifuk dyoos. (1 Tes. 5:6) Biikaam twiikal babatamij micim ni tulang meej mu mushind mulengel. Bwaabiny? I bwa kaay twaatweelakan mu myand ya cidiidy yidyok leeloow eecy mu bilumbw bidyok leeloow mu baat. Kutweelakan kwa mu myand eey kwiiyiiy kuvul mu baat bu mudy diifuk dya Yehow diikal dyend ni kufweej habwiih menmen. Cikwaabw, kabiish bikaam twiikal ni kukabakan kwa micim habitaatal citwiikal mwa kwiiy kulong. Spirit a Mawej udy mwa kwiitwambulwiish bwiitut kwiikal ni micim yibatam mund ni bwiitut kulang mu mushind mulengel ni bwa kwangat mahangadik ma meej.—Luuk 12:11, 12. w23.06 diib. 10 cik. 6-7

Uvuuvulukok biny hadyobw bateel diijin dya Samuson? Ulaalang ney waakady muut a diikand diidiin dyeeh. I cya biin. Ning naak Samuson wangaciil diihangadik dyaakady dimukabish. Ki Yehow waakady utal byoos byaakady Samuson mulong bwa ku mukadil mudimw, ni ufundishil cileejel cya lulamat lwa Samuson mu Bibl bwa kwiitwambulwiishecy. Yehow ukadil mudimw ni Samuson bwa kulongey myand yikeekemesh bwa kwambulwiishey cis cindiy cyaakadyey musungul cya biin Izaleel. Mivw kam yivul kuunyim kwa Samuson muman kufw, Yehow waakady mulombol Mupostol Pool bwa kufundey diijin dya Samuson mu mulong a majiin ma biin kwiitabij. (Eb. 11:​32-34) Cileejel cya Samuson cidy mwa kwiitukashish. Waakady muteekel Yehow micim ning mu biisang bya makab. Tudy mwa kuhetel malongweesh ku cileejel cya Samuson, ni cileejel cindiy cidy mwa kwiitukashish. w23.09 diib. 2 cik. 1-2

Tudy mwa kukashish kutaatameen kwiitut hatusaasambil Yehow ha cimbidil ni tumwambil myand yoos yidy yiitutond. (1 Tes. 5:17) Misang yikwaabw kwiish utaatameen myand yikasakan kaabaak. Ning biby naak, ukaakaamok buludik bwa Yehow diib diwudy mumvw bibiih, hawudy kuy mumanyik ciloolongek, eecy hawudy mumvw myand yikutond eeny? Uw mwiikal ni cimbidil cya kulomb Yehow dyambulwiish bwa makab mawutwiitwiilangan naam diifuk dyoos, kwaakwiiy kweelakanoh bend bwa kulong nook hawiikal mwa kwiiy kutwiilangan ni myand yikasakan yiikal mwa kukufikil. Wiiyiiy kwiikal cikwaabw mujaadik ney i mumanyik bilengel ciisang cidyey mwa kukwambulwiish ni cidyey mwa kulong bwiibuh. (Mis. 27:1, 3) Tudy mwa kwiiy kutaatameen cikwaabw ciisang cya mal miimiin tut biikal tutaatameen makab matutwiitwiilangan naam leeloow. (Rom 5:3) Bwaabiny tudy mwa kuleeb nook? Biin-kweet bavul baleeleeb ney: Ciisang cyoos cidyobw bataatameen lutat lukasakan, kulong nook kwiibambambulwiish bwa kukasakeenobw lutat lukwaabw lwiikal mwa kwiibafikil. Hadyobw bataatameen bwaal kaahand ku dyambulwiish dya Yehow, biiyiiy kwiikal ni diitabij dikasakan didy Yehow mukat. Diitabij diiyiiy kwiimbambulwiish bwa kutaatameen lutat lukwaabw lwiikalobw mwa kutwiilangan naalw.—Jak 1:2-4. w23.07 diib. 3 cik. 7-8

Kwiihweekej kwa Yehow ni lus luvul ludyey naalw biloolong bwa iikal utal myand mu mushind mulengel. Cileejel, Yehow uleejel kwiihweekej kwindiy ha ciisang ciikaaminey kubutul baat babiih mu Sodom. Ku dyambulwiish dya mwanjel indiy, Yehow wambiil Loot bwa kuyey lubil ku bulab bwa mu milund. Loot umvwiil mooy bwa kuy kwiinaak. Nook, waakady mwiisanz bwa kumwiitabilobw yiy ni cisak cindiy bwa kuyobw kasokot mu cibunj cikeeh cya Sowaar cyaakadyobw bakaam kubutul. Yehow kaakadyoh bend mutungunuk ni kwambil Loot bwa along teng cyaakadyey mumwambil bwa kulong. Ki Yehow wiitabil bwa Loot kuyey mu Sowaar ni kaakadyoh bend mubutul cibunj eecy. (Kbwa. 19:18-22) Kuunyim kwa mivw kam yivul, Yehow uleejel lus luvul kudy baat baakady bashikacil mu cibunj cya Niniiv. Utumin muprofet Jonas bwa kwambiley baat babiih ba mu Niniiv ney: Bab ni cibunj cyaababw biiyiiy kubutuk. Ki haakady baat ba mu Niniiv biikunying bwa myand yaabab yibiih, Yehow ushiitulwiil meej mindiy ni kaakadyoh bend mubutul cibunj cya Niniiv.—Jon. 3:1, 10; 4:10, 11. w23.07 diib. 21 cik. 5

I biny bitudy mwa kulongel ku cileejel cya Yowas? Waakady bu mutond waakady ni mij yikiish yitweel mu bulab yakady mwa kwambulwiish mutond. Hafwiil Yoyadah muut waakady umwambulwiish, Yowas utwaadijil kukun batontolody mat, ulekeel bwa kwiikaley ni lulamat kudy Yehow. Cileejel eecy cileeleej ney katwiin ni bwa kukooyel Mawej teng bwaal ney biin mu cisak ciitut ni baat bakwaabw mu cisumbw i biitushiil cileejel bwiitut kulong nook. Bwiitut kushaal bakasakan mu myand ya mu spirit, bikaam tukashish lulamat lwiitut kudy Mawej ni bikaam tumuneemek bikasakan ku dyambulwiish dya kwiilongel ha cimbidil, kulangil meej ha myand yitubaabal, ni hakwiikal ni cimbidil cya kusambil. (Jer. 17:7, 8; Kol. 2:6, 7) Biin-biin, Yehow kiish wiitulomboh bend bwa kulong myand yihit kuvul. Cidy Mawej wiitulomb i biicileej mu may makeeh mady mu mukand a Muleej 12:13, uleeleeb ney: “Mudimw udy nend muut woos ni bwa kulong, i wa kuneemek Mawej ni kukooyel ku may mindiy mumb.” Hatuciiciin Mawej, twiiyiiy kwiikal bakumban bwa kutaatameen makab matwiikal mwa kutwiilangan naam ni bwa kushaal ni lulamat kudy Mawej teng bu Obadiyah ni Yoyadah. Kakwiish ciit ning cyaakaabumw ciikal mwa kunyang bulund bwiitut ni Yehow. w23.06 diib. 19 cik. 17-19

Mawej wiitujaajaadikil mu may mindiy ma butambwiil mady mu verseh 5 ma ney: “Naak waakady mushikat mu kwaas a bukaleng uleebel ney.” (Yis. 21:5a) May aam i ma habwaah bwaal i musang umw a ku misang yisat mu mukand a Myand Yisokolweel Jah yidy Yehow muleeb kaayend. Nook cijaadik eecy kaciin citwaal kudy mwanjel a bukash, ni kudy Yeez usangukil, ki Yehow kaayend ki utwaadilecy! Bwaal oobw buleeleej biin-biin ney may aam i ma kuteekel micim. Bwaabiny tuleeleeb nook? Bwaal Yehow ‘kiish udingomw.’ (Tiit 1:2) Bwaal oobw i cijaadik cya ney may matubaabal mu mukand a Myand Yisokolweel Jah 21:5, 6 i makuteekel micim yitut yoos. Tukontononaay diiy dya ney, “Talaay!” Mwaak wa mu ciin Krek udyobw baalabul ney “Talaay!” I bakal nend mudimw misang yivul mu mukand a Myand Yisokolweel Jah. I bwaal kaay bwiiyiiy haanyim ha mwaak a cikem oow? Mawej uleeleej ney: “Naloolong myand yoos yihyaayihy.” Biin-biin, Yehow uleeleeb bwa mwiikal myand mwa kwiiy kushintuluk, ki kudyey, mulay oow i wa biin-biin, ki bwaabiny uleeleeb bwa myand yiikal mwa kushituluk eey bu yikaady yiman kutang kulongek.—Ye. 46:10. w23.11 diib. 3-4 cik. 7-8

Mupostol Pyeel waakady ulw diivit ni myand yaakady yimukooyesh. Tutalaay bileejel bikeeh. Haakady Yeez umvwiij mwaakadyey mwa kukeng ni kufw bwa kukumbaj may ma buprofet ma mu Bibl, Pyeel umwambiil ney, bwaal oobw kabwiish mwa kulongek. (Mark 8:31-33) Misang yivul, Pyeel ni bapostol bakwaabw baakady bend ni kwiiyiihanguj bwa kumanyik waakady mukuluuh mukacy mwaababw. (Mark 9:33, 34) Bufuk kuuhal kwa Yeez kufwey, Pyeel ulwiishil muut ni kumukosoley diity. (Jah 18:10) Teng bufuk aabw, Pyeel umvwiil mooy ni utunyin mulund nend Yeez hakuleeb ney kiishoh bend mumumanyik. (Mark 14:66-72) Bineeby bifikishil Pyeel bwa kudiley bikasakan. Yeez kalekeloh bend Mupostol waakady mukooyel mu mabok oow. Kuunyim kwa Yeez muman kusanguk, waakishil Pyeel dyaakatook bwa kumujaadikil cikwaabw ney waakady mumukat. Yeez ubiikeen Pyeel bwa kukaley mudimw ni kwiihweekesh. (Jah 21:15-17) Pyeel wiitabil bilengel cimwambiil Yeez. Waakady ku Jeruzalem diifuk dya Pantekoot ni waakady mu baat ba kuuhal bashingilobw diisaby ku dyambulwiish dya spirit mujilang. w23.09 diib. 22 cik. 6-7

Mupostol Pyeel wambiil bakul nend ney: “Lamaay baat bady Mawej mwiinwaakish bu mikook.” (1 Py. 5:1-4) Uw mwiikal mukul, tudy bamanyik ney udy mukat baan been baan-balum ni baan-bakaj ni udy mukat kwiibalam. Ki, udy mwa kwiital misang yikwaabw ni bivul bya kulong eecy mukooyel menmen mu mushind uwudy kuy mwa kukumbaj mudimw aaw. I biny biwudy mwa kulong? Ambil Yehow myand yidy yikutond. Pyeel ufundil ney: “Ukwaakwanjanganok akwanjanganok ni bukash bumwaakaakish Mawej.” (1 Py. 4:11) Biin-kween baan-balum ni baan-bakaj bady mwa kwiikal batwiilangan ni myand yidyobw kabay mwa kuman menmen mu bulongolody bwa myand oobw. Ki iikal mumanyik ney “mutam a balam ba mikook,” Yeez Krist, udy mwa kwiibambulwiish bilengel byeeh bishiilangan menmen ni mushind udy muut mukwaabw mwa kwiibalongel. Udy mwa kulong nook leeloow ni mu bulongolody buhyaabuhy. Cidy Mawej ulomb bakul i cya kukatobw baan baabw, bwa kulam baan baabw, ni bwa kwiikal “baat ba kutadiloboh.” w23.09 diib. 29-30 cik. 13-14

Bikaam tweehuk kulong myand bilondeshel meej ma baat. Tut tulangil ha mushind udy baat batobolol may ma Yehow tudy mwa kulek byeet kukooyel may mindiy aam. (1 Kor. 3:19) “Meej ma ha bulab” makaakaamish teng kwaalakan kwa nyeet. Biin Krist bakwaabw ba mu Perkam ni ba mu Tiyaatiir biitabil bwa kwiikalobw balong cyendend ni kuhambidil kish bu mwaakady baat ba ha cyaab cyaakadyobw bashikaciil balong. Yeez waakishil bisumbw bibidy eeby mibel yikasakan bwa mushind waakadyobw biitab bwa kulong myand ya cyendend cya masandy. (Yis. 2:14, 20) Leeloow baat bady biitunyunguluk bady mwa kwiitusak bwiitut kwiitaab meej maababw mabiih. Biin mu cisak ciitut ni baat batudy bamanyikangan naab bady mwa kwiitwiitabij bwiitut kulek kukooyel mikenj ya Yehow. Cileejel, bady mwa kuleeb ney, kulong myand yalaalakan nyeet kakwiishoh bend kubiih ni mikenj ya mu Bibl yileeleeb bwa kulek kwend kwa masandy ney kayiciish ni buseeb mu ciisang ciitut eecy. Misang yikwaabw tudy mwa kulang ney buludik butwaatwaal Yehow kabwiish bulengel. Tudy mwa kwiiy kuhon mu diiteet dya kulek “kwiimanyin ha myand yidy yifund.—1 Kor. 4:6. w23.07 diib. 16 cik. 10-11

Mariy maamend a Yeez, waakady ukaam bwa bamukashish. Kaakadyoh bend mwanj kuy ku maluw; cikwaabw, waakady mwa kwiiy kwiimit. Kaakadyoh bend mwanj kumanyik mwa kukashish baan yiy kaayend, ki waakady ni bwa kukashish mwaan mwaan-mulum waakady mwa kwiiy kushaal Mesih. Cikwaabw, ning mwaakadyey kay mwanj kumanyik balum, i mushind kaay waakadyey mwa kwiiy kumvwiij myand yoos eey kudy waakady mumukwaacil, Yozeefw? (Luuk 1:26-33) I mushind kaay waakady Mariy muhet diikand? Ukaamin dyambulwiish kudy bakwaabw. Cileejel, wiihangujil Kabriyel bwa kumwambiley myand yikwaabw habitaatal mudimw wiiyey kwiikal nend. (Luuk 1:34) Kuunyim kwa mafuk makeeh bituh, uhonen mu njil mwiilandakany waay mu ’cibunj cidy mukacy mwa milund’ mu bulab bwa Yuudeh bwa kakumbul mwaanaabw Luzabeet. Lwend aalw lwaakady lulengel. Luzabeet umbumb Mariy lumbandy ni Yehow umuleejel ku dyambulwiish dya spirit mujilang bwa kuleebey diiy dya buprofet dikaakashish eedy habitaatal mwaan sangwiilum waakady Mariy mwiimit. (Luuk 1:39-45.) Mariy uleebel ney: Yehow “i muulongel myand yikasakan ni kubok indiy a bukash.” (Luuk 1:46-51) Ku dyambulwiish dya mwanjel Kabriyel ni Luzabeet, Yehow ukashishil Mariy. w23.10 diib. 14-15 cik. 10-12

Teng biiyij ba Krist bakeeh bituh i bab baheehet dyaakatook dya kwiibashingobw diisaby dya spirit mujilang ni bady mu bulund bwa habwaah ni Yehow. Baat 144 000 aab biiyiiy kukal mudimw bu balambul ba milambw aakaabumw ni Yeez. (Yis. 1:6; 14:1) Cyaab Cijilang cyaakady mu mutand a Mawej cyaakady cileej kwiikal kwaababw baan balel kudy spirit hacyaakadyobw ha bulab bu baan ba Mawej. (Rom 8:15-17) Cyaab cihit kwiikal Cijilang cyaakady mu mutand a Mawej cyaakady cileej mwiiwul mudy Yehow mushikacil. “Cizang” cyaakady cikosolol Cyaab Cijilang ni Cyaab cihit kwiikal Cijilang cyaakady cileej nyeet ya Yeez yaakady yimukaakeesh bwa kuyey katweel mwiiwul bu Mutam a Balambul ba milambw mu tempel a mu spirit. Haakadyey mutwaal nyeet yindiy ya buumuut bu cya kukuuloh naacy baat ba mitah yoos, Yeez waakady mwiinzulwiil biin Krist boos bashing diisaby njil a buumy mwiiwul. Bab byaabw biiyiiy kulek nyeet yaababw ya buumuut bwa kuyobw kahet diifut dyaababw mwiiwul. (Ebr. 10:19, 20; 1 Kor. 15:50. w23.10 diib. 28 cik. 13

Jedewoh waakady mwaalabul ni diiy dilengel haakady biin Efrayim bamufulwiij mund. (Zuj. 8:1-3) Kaakadyoh bend mwiibaalabul ni cinj. Uleejel ney waakady ni kwiihweekesh hakukun mat ku myand yaakadyobw baleeb yaakady yiibatond, ni ubatamijil myand eey hakwiibaalabul ni diiy dilengel. Bakul ba meej biidiidikij cileejel cya Jedewoh hakukun mat ni meej ni hakwaalabul ni diiy dilengel hadyobw biibafuluj mund. (Jak 3:13) Bab balong nook, diitalal diiyiiy kwiikal mu cisumbw. Haakady baat ki batumbish Jedewoh bwa mwaakadyey mucimun biin Madyan, utumin meej ma baat kudy Yehow. (Zuj. 8:22, 23) Baat badyobw baakish majit mu cisumbw bady mwa kwiidikij Jedewoh bicy? Bady mwa kwaakish Yehow lutumb bwa myand yidyobw balong. (1 Kor. 4:6, 7) Cileejel, biby biikal ney mukul i bamufwiijok bwa mushind udyey ulongweesh, udy mwa kutum meej ma baat mu Diiy dya Mawej mudyey mwangacil diilongweesh aady, eecy ku malongweesh ma mu bulongolody bwa Yehow matuheehet. Misang yikwaabw bakul bady mwa kulangiloh bwa kutal ning batuutum teng meej ma baat kudyobw kaayaabw. w23.06 diib. 4 cik. 7-8

Tut katuy bahet bitudy balomb mu diisambil, tudy mwa kwiiyiihanguj ney, ‘Nasaasambilok bwa ciit cilengel eeny?’ Misang yivul tulaalang ney, tudy bamanyik cidy cilengel menmen bwiitut. Ki biit bituloolomb kabiish teng ni bwa kwiitwambulwiish menmen. Tut tusambil habitaatal bwaal kaahand, kudy mwa kwiikal mushind mulengel menmen wa kuman bwaal aabw muhitok ni utuloolomb. Ni kudy biit bikwaabw bituloolomb bikiish byumvwangan ni lukat lwa Yehow. (1 Jah 5:14) Cileejel, tukontononaay cileejel cya balel balombel Yehow bwa alam mwaanaabab bwa atungunuk ni kumukadil mudimw. Kulomb kwaabab ook kumweemweek bu kulengel. Cikwaabw, Yehow kaakwiiy kulongesh muut ning waakaabumw wa kutudy ku makand bwa kumukadil mudimw. I mukat ney, tut boos ni baan biitut tusungul bwa kumuhambidil. (Mmu. 10:12, 13; 30:19, 20) Nook balel bady mwa kulomb Yehow bwa ibambulwiish bwa bateng mucim a mwaanaabab bwa amusak bwa kukatey Yehow ni bwa kushaaley mulund nend.—Tus. 22:6; Efez 6:4. w23.11 diib. 21 cik. 5; diib. 23 cik. 12

Bwaabingany kukashish bakwaabw i mushind a buseeb uleeleej ney tudy ni lukat? Bilondeshel mukand mukwaabw udyobw balayidil habitaatal Bibl, cyambil cikadil naacy Pool mudimw cya ney: “kukashishangan ku micim” cyumvumvwiij “kwiikal habwiih ni muut bwa kumukashish hadyey mu makab makasakan.” Nook, hatumukaakashish ku micim, twambambulwiish mwiin-kweet udy mu makab ni mal bwa kuhetey diikand bwa kutungunuk ni kwendel mu njil a buumy. Musang woos utukaakashish mwiin-kweet, tumuleeleej ney tudy bamukat. (2 Kor. 7:6, 7, 13) Kwiikal ni micim yikwiit mund bwa mal mamoomon bakwaabw ni kukashishangan ku micim i biikadil byendendel haakaabumw menmen. Mu mushind kaay? Muut udy ni micim yimwiit mund bwa mal mamoomon bakwaabw umvumvw micim yimusak bwa kwiibakashish ku micim ni wiikaakashish bwa kulong bwaal kaahand bwa kwiibambulwiish. Nook cya kuuhal tut biikal ni lus, tumvumvw micim yiitusak bwa kukashish bakwaabw ku micim. Tal mudy Pool uleej kuhetangan kudy hakacy ha lus ludy naal Yehow ni mushind udyey ukashish muut ku micim. Pool uleeleeb bwa Yehow ney i “Taat udy ni lus luvul; Mawej, ukaakashishangan ku micim mu myand yoos.”—2 Kor. 1:3. w23.11 diib. 9-10 cik. 8-10

Biiyij ba Yeez boosolol bady mwa kwiikal bamanyik ney makab mady mwa kwiibakwaat. Tukontononaay cileejel cya mupostol Pool. Wambiil biin mu Tesalonik ney: “Bwaal hatucyaakady neen, twiinwambiil ney, biiyiiy kwiitumweeshaay mal. I mam mal matukaady naam aam.” (1 Tesa. 3:4) Ni ufundil biin mu Korent ney: ‘Bwaal, a biin-kweet, tukaam numanyik ney, tumween mal . . . Twaalang ney tubaafw.” (2 Kor. 1:8; 11:23-27) Biin Krist ba leel, i batakamin byaabw bwa kumon mal ma mitah ni mitah. (2 Tim. 3:12) Uw mwiitabij Yeez ni umulond, balund neeb ni baat bakwaabw bady mwa kukusek eecy kukukis. Kwiiswiik kwiibuh bwa kwiikal mwiin bujaalal mu myand yoos, i kukukaaminok bilumbw ku mudimw eeny? (Ebr. 13:18) Mbul-matady i mukulwiishok bwaal udiidiil baat bakwaabw musah utaatal kutakamin kwiibuh eeny? Ning tut tumon mal ma mushind kaay, Pool uleeleeb ney bikaam tusangal. w23.12 diib. 10-11 cik. 9-10

Jakobw waakady mutaatameen makab mavul. Baan babidy ba Jakobw, Simewon ni Levih, bafwiijil cisak cyaabab bumvw ni kunyangobw luumw lwa diijin dya Yehow. Cikwaabw, Rashel, mukaj waakady Jakobw mukat ufwiil ha kulel kwa mwaan mwiibidy. Bwa ciyool cya nzal, Jakobw waalukil mu cibunj cyaabab ni kuyey mu Ejipit haakadyey munun. (Kbwa. 35:16-19; 37:28; 45:9-11, 28) Ning mu makab moosoolol aam, Jakobw kaakadyoh bend mulek diitabij dindiy kudy Yehow eecy mu malay mindiy. Ni Yehow uleejel Jakobw ney, waakady teng umwanyish. Cileejel, Yehow waakishil Jakobw biit bivul. Jakobw ufwiijil biin-biin Yehow hatadiley cikwaabw mwaan indiy Joseph waakadyey ulang ney, ufwiil kal. Bulund bulengel bwaakady Jakobw mudy ni Yehow bumwambulwiishil bwa kutaatameen makab mindiy. (Kbwa. 30:43; 32:9, 10; 46:28-30) Tut bady bulund bulengel ni Yehow, tudy mwa kutaatameen byeet makab matudy katuy batakamin. w23.04 diib. 15 cik. 6-7

Musambw a 23, i musambw uleeleej mwaakady Davih mweeyeleel lukat lwa Yehow, ni mushind udyey ulam baat. Davih waakady mufund musambw oow, umvumvwiij mwaakady bulund bwindiy ni Mulamy indiy Yehow. Davih waakady wiiyumvw ku mat talal haakadyey ulek Yehow umulombol, ni waakady mumweeyeleel mu myand yindiy yoos. Davih waakady mumanyik ney lukat lwa Yehow lwaakady ni bwa kumutwaalok mafuk mindiy moos ma buumy. I biny byaakady bilong bwa Davih iikal mutwiishiibw nook? Davih waakady wiiyumvw bamulamok bilengel bwaal Yehow waakady umwaakish byoos byaakadyey ukaam. Cikwaabw, Davih waakady mumanyik ney, Yehow waakady mulund nend, ni waakady umwanyish. Ki bwaabiny waakady mutwiishiibw ney, ning lutat kaay lwaakady mwa kumufikil mu mafuk maakady miiy, Yehow waakady ni bwa kutungunuk ni kumwaakish byoos byaakadyey ukaam. Bu mwaakady Davih mutwiishiibw ney, Yehow waakady mumukat ni waakady mwa kumushikik talal, bimwambulwiishil bwa kulek kwiikaley ni mooy, ki iikal wiiyumvw bilengel ni musangal misang yoos.—Mis. 16:11. w24.01 diib. 29 cik. 12-13

Kacy ku Diivit diibiidy dya ha bulab butuutul, baat ba Yehow mu bibunj bivul badyok mu ditaalal ni badiidiil baat musah biilekelel. Cya biin, mudimw oow i muhatul bihet bilengel. Leeloow, biin mu Kasumbw Kaludik bacituutungunuk ni kukaam buludik bwa Krist. I bakat ney may ma kulond madyobw baakish biin-kweet miikal maleej meej ma mu diiwul. Cikwaabw, bakaakal mudimw ni balombol ba bijeng ni bakul bwa kutwaal buludik budyobw biibaakish mu bisumbw. Bakul bashing diisaby aab bady mu “cikam cya ciiludy” dya Krist. (Yis. 2:1.) Cya biin, bakul aab i baat bakiish bawaakan ni baloolong byaabw bilem. Moyiz ni Jozuweh balongel byaabw bilem, teng mulongel bapostol. (Kub. 20:12; Joz. 9:​14, 15; Rom 3:23) Cikwaabw, Krist uloolombol bilengel muhik a lulamat ni bakul bady bateek mu bisumbw, ni wiiyiiy kutungunuk ni kulong nook. Nook, tudy ni tubingil toos bwa kwiikal ni diitabij mu may ma kulond madyey utwaal ku dyambulwiish dya baat badyobw bateek bwa kwiitulombol. w24.02 diib. 23-24 cik. 13-14

Leeloow, tudy mwa kutumbish Yehow hatuleeleeb myand yimutaatal mu mushind uleeleej ney, tumwanyanyish ni tudy bamukat bikasakan. Hatudy mu mudimw a bukajaady, tuvuluk ney, kiihacil kiitut katam i ka kwambulwiish baat bwa kufweejobw habwiih ni Yehow, ni kwiibambulwiish bwa biiyumvw byaabw mutwiiyumvumvw bwa Taat iitut a lukat. (Jak 4:8) Tudy ni musangal wa kuleej baat mudy Bibl uleeb bwa Yehow, bwa lukat lwindiy, buwaakan bwindiy, meej mindiy, bukash bwindiy ni bwa biikadil bindiy bikwaabw biitusaasangej. Tutuutumbish cikwaabw Yehow hatuloolong mwiitut moos bwa kumwiidikij. Hatuloolong naak, baat bakwaabw bady mwa kutal ney, tudy bashiilangan ni baat ba mu bulongolody bubiih oobw ni bady mwa kwiitwiihanguj bwa kumanyik bwaabiny tudy bashiilangan naabw. (Mat. 5:14-16) Hatuheehetangan naabw, tudy mwa kwiibumvwiij bwaabiny tuloolong nook. Nook baat bady bakat myand ya biin-biin, biiyiiy kumvw bwa kufweej habwiih ni Mawej iitut. Hatutuutumbish Yehow mu mushind oow, tusaasangej mucim indiy.—1 Tim. 2:3, 4. w24.02 diib. 10 cik. 7

Bwa kushaal mwiin Krist mushimat mu spirit, bikaam ulong midimw ya buseeb yidy mwa kukwambulwiish mafuk moos mu shikacil iibuh. Midimw eey yiiyiiy kukwambulwiish bwiibuh kwiitab majit mu cisumbw, bwa kuhet ni kulam mudimw wiikal mwa kukwambulwiish bwa biit biwukaakaam eecy bwa bikaakaam biin mu cisak ciibuh, ni bwa kwiikal cikwaabw mu bulund bulengel ni baat bakwaabw. Cileejel, long mwa kubal ni kufund bilengel. Bibl uleeleeb ney muut udy ni musangal uhiihitij diib diifuk dyoos hakubal Diiy dya Mawej ni hakulangiloh. (Mis. 1:1-3.) Hadyey ubal Diiy dya Mawej diifuk dyoos, wiiyiiy kumanyik mushind udy Yehow ulang, wiikal mwa kumwambulwiish bwa kulang bilengel ni mwa kukooyel bilengel bidyey ubal. (Tus. 1:3, 4) Biin-kweet baan-balum ni baan-bakaj bakaakaam baat bady mwa kwiibalongweesh ni kwiibaakish mibel ya mu Bibl. Uw mumanyik mwa kubal ni kufund bilengel, wiiyiiy kwiikal mukumban bwa kulong miisamb ni kutwaal maalabul miikal mwa kwambulwiish baat. Wiiyiiy kwiikal ni mushind a kufund myand ya buseeb yiikal mwa kukwambulwiish bwiibuh kukashish diitabij diibuh ni kukashish bakwaabw. w23.12 diib. 26-27 cik. 9-11

Diib diwumvumvw mooy, langil ha myand yiiyiiy kulong Yehow kuuhal ook hiikal Sataan kaciyok. Diizab dilongelobw mu cihwiil cya rejon mu muvw a 2014, dileejel mutudy mwa kulangil ha kutakamin kutudy naak. Taat mukwaabw wiisambil ni biin mu cisak cindiy ha mushind udyobw mwa kumvwiij mukand a 2 Timoteh 3:1-5 mu mushind mukwaabw, biby biikal ney verseh eey yileeleeb bwa mushind wiikal baat mu Paradiiz. Uleebel ney: “Mu bulongolody buhyaabuhy, biisang bya musangal iimwiin weeh biiyiiy kwiikalok. Bwaal baat biiyiiy kukat baat bakwaabw, biiyiiy kwiikal bakat myand ya mu spirit, biiyiiy kwiikal kabay biitumbish ni biikal ni kwiihweekesh, biiyiiy kwaakish Mawej lutumb, biiyiiy kuneemek baataataabw ni baamaamaabw, biiyiiy kwiikal baat biikal ni micim ya kufwiijanganok, biikal baneemek biit bijilang, biiyiiy kukat bikasakan biin mu bisak byaababw, biiyiiy kwiikal bahetangan, biikaakal baleeb teng bilengel bwa bakwaabw, biikaakal biikand, balengel myand, biikaakal bakat myand yilengel, baat ba kuteekel micim, kabay biin mut mukasakan, kabay biiyumb mwiiwul, biiyiiy kukat Mawej hamut a musangal, biikal ni bilong bileeleej mudyobw biitabij Mawej; naak lamat baat aab.” Kanwiishok bend mwa kwiisambilok ni biin mu bisak biinun eecy biin-kween mu lwiitabij bwa mwiikal shikacil mu bulab buhyaabuhy eeny? w24.01 diib. 6 cik. 13-14

Biitukaakashish ku micim hatumaamanyik ney Yehow i mukat baat bindiy boos! Bibl uleeleeb ney: ‘Yehow Mawej udy ni musangal mukacy mwa baat bindiy.’ (Mis. 149:4) Ha kal, baat bakwaabw bakooyedyeel mu mikon baafik ni ku kwiiyiihanguj ney: ‘Yehow uuyanyanyishok eeny?’ Bahambidil bavul ba lulamat ba Yehow ba mu ciisang cifundilobw Bibl, baakady bal diivit ni meej ma bwiin miinaam. (1 Sam. 1:6-10; Yoobw 29:2, 4; Mis. 51:11) Bibl uleeleeb hatook ney: Yehow udy mwa kwanyish baat bakiish bawaakan. Mushind kaay? Bikaam twiitabij Yeez ni tuhet baatiisumw. (Jah 3:16) Tut balong nook, tuleeleej bakwaabw ney tudy biifwiij naay bwa mpeekaat yiitut ni baalabul micim ni tudy balay Mawej bwa kulong lukat lwindiy. (Yil. 2:38; 3:19) Yehow usaasangal neet hatuloolong myand yiitwambambulwiish bwiitut kudy nend bulund. Hatutuutungunuk ni kwiikashishomw bwa kukumbaj mucih iitut a kwiilambul, Yehow wiitwanyanyish ni wiitubal bu balund nend ba ha micim.—Mis. 25:14. w24.03 diib. 26 cik. 1-2

Tudy mwa kwiidikij biiyij ba Yeez hakutungunuk ni kudiil baat musah ning biin mbul-matady bab biitulekesh bwa kulong mudimw oow. Tudy bajaadik ney Yehow wiiyiiy kwiitwambulwiish bwiitut kukumbaj mudimw iitut. Nook bwiibuh kuhet mucim mukasakan ni meej, lomb Yehow bwa akwambulwiish bwa kutaatameen makab mawudy naam. Bavul ba kutudy bakaakab bwa mabenj ni bwa myand yikwaabw ya kaakunying, kufwiish kwa muut udyobw bakat, myand yikasakan ya mu cisak, makab ni mal madyobw biibamweesh, eecy bwa myand yikwaabw. Myand bu mudy bihuh biloolongek ha bulab butuutul ni mavit, i bikaamish makab mavul ni myand i yiiy kukasakan menmen bwa kwiiyitaatameen. Ambil Yehow myand yoos yidy yikutond ku micim. Mwambil teng myand yiwudy naay teng muwudy mwa kwiiyambil mulund neeb a ha micim. Iikal mutwiishiibw ney Yehow “wiiyiiy kukulongel byoos biwudy naaby bwaal.” (Mis. 37:3, 5) Kwiikal teng kusambil kwiiyiiy kwiitwambulwiish bwa ‘kutuukij hatumoomon mal.’ (Rom 12:12) Yehow i mumanyik ney bahambidil bindiy bendend ni kutaatameen. ‘Umvumvw may maababw mamumbumbobw, bwa kwiibakuuloh.’—Mis. 145:18, 19. w23.05 diib. 5-6 cik. 12-15

Hatukaakaam kwangat mahangadik mady ni buseeb, bikaam tujingunun ‘cidy Yehow Mawej mukat’ ni kuunyim kulong myand yumvumvwangan ni lukat lwindiy. (Ef. 5:10, 17) Hatumaamanyik mudy may matam ma mu Bibl mahetangan ni shikacil iitut, twiiyiiy kaabaak kukaam bwa kumanyik mushind udy Yehow ulang bwa bwaal aabw. Ni hatukookooyel ku may matam mindiy, twiiyiiy kwiikal bakumban bwa kwangat mahangadik malengel. “Mubiih” mulwiish iitut Sataan, i mukat bwa twiikal ni bivul bya kulong mu bulongolody oobw bwa kaay twiikal ni diib dya kukadil Mawej mudimw. (1 Jah 5:19) Bidy mwa kumweek cikwaabw bikooyel bwa mwiin Krist kuteek ha cyaab cya kuuhal kukaam kwa bihat, kulong tulaas, eecy mudimw indiy hamut a kukaamey mishind kaahand yidyey mwa kwiikal naay bwa kukadil Yehow mudimw. Yiy mulong nook, wiiyiiy kuleej mukaadyey ni meej ma baat bakiish bakadil Yehow mudimw. Cya biin, kwiikal ni biit eeby kakwiishoh bend bwaal bubiih, ki kabiish mwa kwangatoh bend cyaab cya kuuhal mu shikacil iitut. w24.03 diib. 24 cik. 16-17