I Mushind Kaay udy Yehow Waalabul Masambil Miitut?

1-2. I biny bitudy mwa kwiiyihanguj hatukaakaam kusambil?

UKAADY mwiiyihangujok neey Yehow waalaabulok masambil miibuh eeny? Biby biikal neey ukaady mulong nook, manyik neey kwiin kaayeeb. Biin-kweet bakwaabw bavul i baleeb neey biiyihahaanguj byaabw bwa bwaal oobw, nang-nang haakadyobw bataatameem myand yikasakan. Tut tukab, bidy mwa kwiitukasakeen byeet menmen bwa kujingunun mudy Yehow waalabul ku masambil miitut.

² Twiiyiiy kukontonon kabingil kady mwa kwiitusak bwiitut kwiikal bajaadik neey Yehow waalaalabul masambil ma bahambidil bindiy. (1 Jah 5:15) Twiiyiiy kukontonon cikwaabw majooj aam: Bwabiny misang yikwaabw bimweemweek neey Yehow kiin waalabul masambil miitut? I mishind kaay yidy Yehow ukal naay mudimw leel oow bwa kwaalabul masambil miitut?

YEHOW KIIN MWA KWAALABUL MU MUSHIND UTUDY BATAKAMIN

3. Bwabiny Yehow i mukat bwa twiikal tumusambil?

³ Diiy dya Mawej ditujaajaadikil neey Yehow i mwiitukat bikasakan ni tudy ni buseeb ku mees kwindiy. (Hak. 2:7; 1 Jah 4:10) Ki bwabiny wiitubiibiikan bwa twiikal tulomb dyambulwiish dindiy mu diisambil. (1 Py. 5:6, 7) I mukat kwiitwambulwiish bwiitut kwiikal habwiih nend ni bwiitut kutaatameen makab matwendend ni kutwiilangan naam.

4. I mushind kaay utudy bamanyik neey Yehow waalaalabul masambil ma bahambidil bindiy? (Tal cikwaabw cifwaatul.)

⁴ Mu Bibl, tudyaakal teng tubal omw neey Yehow waakady waalabul masambil ma bahambidil bindiy. Udy mwa kwiikalok mumanyik ngany? I biny biwudy mumanyik bwa Mukaleng Davih? Waakady mutwiilangan ni balwiish ba buuhund bavul mu shikacil indiy, ni waakady teng ulomb Yehow bwa kumwambulwiishey. Cileejel, ulombel Yehow musang mukwaabw neey: “A Mawej, umvw hamb yaam, kun mat diib dinakumbumb may! Uw udy mukooyel ni muwaakan uuyaalabul!” (Mus. 143:1) Yehow waalabwiil masambil ma Davih bwa kumukuuley. (1 Sam. 19:10, 18-20; 2 Sam. 5:17-25) Davih waakady mwa kuleeb ni kutwiishiibw koos neey: “[Yehow] udy habwiih ni boos bamubiibiikan, ni boos bamubiibiikan biin-biin.” Bikaam tut byeet twiikal batwiishibw nook.—Mus. 145:18.

5. Bahambidil ba Yehow ba kal baakady teng bahet maalabul ku masambil maabab bilondeshel mushind waakadyobw batakamin eeny? Twaal cileejel. (Tal cikwaabw cifwaatul.)

⁵ Yehow kiin mwa kwaalabul masambil miitut mu mushind utudy batakamin. Bwaal oobw bwaakady bufikil mupostol Pool. Ulombel Mawej bwa amuful ‘mal mamutwiikilobw hanyeet.’ Misang yisat, Pool usambiil nang-nang habitaatal bwaal bukasakan oobw. Yehow umwaalabwiil eeny? Ying, ki kiin mu mushind waakady Pool mutakamin. Hamut a kumufudil lutat oolw, Yehow umwaakishil bukash bwaakadyey ukaam bwa kutungunukey ni kumukadil mudimw ni lulamat.—2 Kor. 12:7-10.

6. Ha biisang bikwaabw, bwabiny bidy mwa kumweek neey Yehow kiin waalabul masambil miitut?

⁶ Tut byeet tudy mwa kuhet misang yikwaabw dyaalabul ni kadiy mu mushind utwaakady batakamin. Bikaam twiikal bamanyik neey Yehow i mumanyik biin-biin mushind mulengel wa kwiitwambulwiish nend habitaatal bitukaakaam. Cikwaabw udy mwa “kwiitulongel teng kwiitulongel biit kuhicijoh ha bitumuloolomb ecy bitulaalang.” (Ef. 3:20) Bwa kabingil aak, mushind udyey waalabul masambil miitut udy mwa kumweek mu ciisang kaahand eecy mu mushind kaahand utwaakady katuy batakamin.

7. Bwabiny tudy mwa kushintulul mushind iitut a kusambil? Twaal cileejel.

⁷ Tudy mwa kukaam bwa kushintulul kabingil hatusaasambil hatujijingulul menmen cidy lukat lwa Yehow. Twangat cileejel cya Martin Poetzinger. Mafuk makeeh baman kubakangan, bumbil mwiin-kweet Poetzinger mu nzubw a lukan mu cyaab cidyobw bakabish baat ni midimw yikasakan cya Nazi. Cya kuuhal, ulombel Yehow bwa bamulekelel mu cyaab cyaakadyobw bakabish baat ni midimw yikasakan bwindiy kuhetey mushind a yiy kuy katal mukaj indiy ni bwa kutwaadijilul cikwaabw mudimw a kudiil baat musah. Ki, kuunyim kwa mbing yibidy, kutadiloh bend cimanyin cyaakady cileej neey Yehow waakady wend ni kulong myand bwa kumulekelelobw. Nook utwaadijil kusambil uleeb neey: “A Yehow, katok bwa kuuleej ciwudy mukat bwa nalong.” Kuunyim utwaadijil kulangil habitaatal biin-kweet bakwaabw bady mu cyaab cya midimw yikasakan baakady bend ni kutaatameen. Bavul ba kudyobw baakady batat bikasakan ni micim bwa bakaj baabab ni baan. Kuunyim, mwiin-kweet Poetzinger usambiil neey: “A Yehow, waafwaak bwa munabaahet mudimw mukwaabw. Uuyambulwiish bwa nakashish biin-kweet mu diitabij ni nibakashish mu mabok.” Uhitijil mivw citeem yilondel mu byaab bya midimw yikasakan eeby wend ni kulong teng cilombeley mu diisambil!

8. I bwaal kaay bwa buseeb butudy ni bwa kuvuluk hatusaasambil?

⁸ Bikaam tuvuluk neey Yehow udy ni kiihicil ka neey wiiyiiy kukumbaj myand yidyey mulongolol bilondeshel ciisang cidyey muhangadij. Mu kiihacil aak mudy cikwaabw kuful bwa loos myand yoos yikaakaamish makab mavul leel oow—myand bu mudy bikumin biloolongek, mabenj, ni lufw. Yehow wiiyiiy kukumbaj kiihacil kindiy ku dyambulwiish dya Bukaleng bwindiy. (Dan. 2:44; Yis. 21:3, 4) Nook, teng ni ciisang aacy, Yehow ucidy mulekeel Sataan bwa kukookeshey bulab.b (Jah 12:31; Yis. 12:9) Biby biikal neey Yehow waakady mwa kuman myand yidy naay baat leel oow, bidy mwa kumweek neey Sataan uloolombol bulab bilengel. Nook, hatucidy batakamin bwa Yehow akumbaj milay kaahand yindiy, kabiin byumvwiij neey witushiishiy bituh nook kay wiitwambulwiish. Tutalaay mishind kaahand yidy Yehow ukal naay mudimw bwa kwiitwambulwiish.

YIMW MISHIND YIDY YEHOW UKAL NAAY MUDIMW LEEL OOW BWA KWAALABUL MASAMBIL MIITUT

9. I mushind kaay udy Yehow mwa kwiitwambulwiish hatukaakaam kwangat mahangadik? Twaal cileejel.

⁹ Wiitwaakakish meej. Yehow i mulay bwa kwiitwaakishey meej matukaakaam bwa kwangat mahangadik malengel. Tukaakaam nang-nang meej ma kudy Mawej hatwangangat mahangadik mady mwa kutwaal kushintuluk kaahand mu shikacil iitut, bu mudy kushaal mujik eecy kubak. (Jak 1:5) Twangat cileejel cya mwiin-kweet mwaan-mukaj mujik diijin dindiy i Mariy.c Waakady ukal mudimw ni musangal bu seeb’ aa njil wa ku diib ni ku diib ciisang dihetelanganey ni mwiin-kweet mwaan-mulum. Uleeleeb neey: “Haakady bulund bwiitut bwiiy kukasakan, nook twiiyil kukatangan bikasakan. Naakady mumanyik neey naakady ni cya kwangat diihangadik. Nasambiil bikasakan habitaatal bwaal oobw. Naakady nakaam dyambulwiish kudy Yehow bwa mim kumanyik cya kulong, ki naakady mumanyik cikwaabw neey Yehow kakwiiyoh bend kwangat diihangadik bwa mim.” Utaatal neey Yehow waalabwiil masambil mindiy bwa kwiikaley ni meej. I mushind kaay umwambulwiishiley? Ujoojolol myand mu mikand yiitut, waakady mwa kuhet maalabul maakady mwa kumwambulwiish ku majooj maakadyey naam. Umvwiil cikwaabw mibel ya meej yimwaakishil maam indiy waakady ni lulamat. Mibel eey yambulwiishil Maria bwa kukontononey myand yaakadyey ukaam bwa kulong. Nook, ku bulekel, waakady mwa kwangat dihangadik dya meej.

10. Bilondeshel Biin Filipw 4:13, i biny bidy Yehow ulong bwa kwambulwiish bahambidil bindiy? Twaal cileejel. (Tal cikwaabw cifwaatul.)

¹⁰ Wiitwaakakish bukash bwiitut kutaatameen mateet. Teng bu mulongeley bwa mupostol Pool, Yehow wiiyiiy kwiituh bukash butukaakaam bwiitut kutaatameen mateet. (Bal Biin Filipw 4:13.) Tutalaay mushind waakady Yehow mwambulwiish mwiin-kweet Benjamin bwa kutaatameeney myand yikasakan yaakadyey mutwiilangan naay. Ku buusand bwindiy menmen, Benjamin ni cisak cindiy baakady bashikacil mu byaab byaakady biin cimwang bashikacil mu Afrik. Benjamin uleeleeb neey: “Naakady nasambil teng Yehow, namulomb bwa kuuyaakiishey bukash bwa mim kulong myand yaakady yilengel ku mees kwindiy. Yehow waalabwiil masambil maamim hakuuyaakishey diitalal dya mu meej, mucim mukasakan bwa kutungunuk ni kudiil baat musah, ni mikand yitwambambulwiish bwa kushaal bakasakan mu myand ya mu spirit.” Uleebel cikwaabw neey: “Kubal habitaatal biin-kweet baan-balum ni baan-bakaj ni kulong bwa kumanyik mudy Yehow mwiibambulwiish bwa kutaatameen i kukashish diihangadik dyaam dya kushaal ni lulamat.”

11-12. I mushind kaay udy Yehow mwa kukal mudimw ni biin-kweet baan-balum ni baan-bakaj bwa kwaalabul masambil miitut? (Tal cikwaabw cifwaatul.)

¹¹ Ukaakal mudimw ni cisak ciitut cya mu spirit. Bufuk kuuhal kwa kutwaaley buumy bwindiy bu mulambw, Yeez usambiil bikasakan. Ulombel Yehow bwa baat bakwaabw kabalang neey waakady mutobolol a myand ya Mawej. Hamut a kulong nook, Yehow wambulwiishil Yeez hakumutumin umw a ku banjel bindiy bwa kumukashishey mu mabok. (Luuk 22:42, 43) Yehow udy mwa kwiitwambulwiish cikwaabw ku dyambulwiish dya biin-kweet baan-balum ni baan-bakaj hady umw a kudyobw wiitubiikan ku telefon bwa kwiitukashish mu mabok eecy bwa kwiitukumbul. Tut boos tudy mwa kukaam mishind yitudy mwa kwambilok biin Krist neet myand ni “diiy dilengel.”—Tus. 12:25.

¹² Twangat cileejel cya mwiin-kweet Miriam. Mbing kuunyim kwa mbaayend muman kufw, Miriam waakady mushaal kaayend ku cibel, kay ni bwaal budyey mutakamin ni mwiikal teng ni kakunying kavul. Waakady udil teng kudil ni kay mwa kwiihooy ni waakady ukaam muut a kwiisamb nend. Uleeleeb neey: “Cyaakadyoh bend ni diikand bwa kubiikan muut ning waakaabumw, nook naakady nasambil teng Yehow. Hanaakady natungunuk teng ni kudil ni nend nasambil, numvwiil telefon udil. I mukul, mulund naany a lukat waakady uubiikan.” Mukul ni mukaj indiy baakady bakashish Miriam mu mabok. Waakady mutwiishibw neey Yehow waakady musak mwiin-kweet mwaan-mulum oow bwa kumubiikaney.

13. Twaal cileejel cya mudy Yehow mwa kukal mudimw ni aab bakiish bamuhambidil bwa kwaalabul ku masambil miitut.

¹³ Udy mwa kukal mudimw ni baat bakiish bamuhambidil. (Tus. 21:1) Ha biisang aaby, Yehow waalaalabul masambil ma baat bindiy hakusak baat bakiish bamuhambidil bwa kulong myand bwa kwiibambulwiish. Cileejel, waakady musak mukaleng Artasereses bwa kwiitabey kulomb kwa Nehemih bwa kuhingomwey mu Yeruzalem bwa kuhetey mushind a kwiibakululey cibunj. (Neh. 2:3-6) Cikwaabw leel oow, Yehow udy mwa kusak ning baat bakiish bamuhambidil bwa kwiitwambulwiish ciisang citukaakaam dyambulwiish.

14. Bwaal budyobw balond bwa Soo Hing bukukaakashishok bicy? (Tal cikwaabw cifwaatul.)

¹⁴ Mwiin-kweet mwaan-mukaj diijin dindiy Soo Hing utadil neey Yehow i mumwambulwiish ku dyambulwiish dya dokteer indiy. Mwaan aabab mwaan mulum ukabil bikasakan bwa mabenj ma mut. Haakadyey mu buuhund bukasakan, yiy ni mbaayend balekel mudimw aabab bwa kumutabalel. Bu cihet, baakady ni lutat lwa myand ya fwalang. Soo Hing uleebel neey kaakady cikwaabw ni mushind a kutaatameen kakunying. Wambiil Yehow myand yoos yaakady yimutond, ni umulomb bwa amwambulwiish. Dokteer wangacil dihangadik bwa kutal mushind a kwiibambulwiish. Kulong nook kwiibambulwiishil bwa bab kuhetobw dyambulwiish dya kudy mbul-matady ni bwa kuhetobw cyaab cya kushikacil cya makut makumban. Kuunyim, Soo Hing uleebel: “Tutadil mwaakady Yehow mwiitwambulwiish mu bwaal oobw. Biin-biin, ‘Umvumvw kuhambidil kwa baat.’”—Mus. 65:2, NWT.

BIKAAM TWIIKAL NI DIITABIJ BWA KUKAAM NI KWIITAB MAALABUL MATWAATWAAL YEHOW

15. I biny byambulwiishil mwiin-kweet mwaan-mukaj kaahand bwa kutaley neey Yehow waakady wend ni kwaalabul masambil mindiy?

¹⁵ Masambil miitut kamadyaakal miisang yivul bimaalabul teng mu mishind yikeekemesh. Ki maalabul matuheehet mady teng bwa bitukaakaam bwa kushaal ni lulamat kudy Taat iitut a mu diiwul. Nook iikal utal mudy Yehow waalabul masambil miibuh. Mwiin-kweet mwaan-mukaj diijin dindiy Yoko utadil neey Yehow kaakady mwaalabul masambil mindiy, ki cikwaabw utwaadijil kufund mu kayeh kindiy myand yaakadyey mulomb Yehow. Hahitilok ciisang, utadil myand yifundiley mu kayeh kindiy ni utadil neey Yehow i mwaalabul bikasakan masambil mindiy, ni myand yikwaabw yilombeley yaakadyey ki muman kuvulamin. Bikaam twiikal misang yikwaabw, twangatok diib dya kulangil ha mushind udy Yehow waalabul ku masambil miitut.—Mus. 66:19, 20.

16. Bilondeshel Biin Ebreh 11:6, i mushind kaay utudy mwa kuleej diitabij diitut hatusaasambil?

¹⁶ Katwiin mwa kuleej diitabij diitut teng hatusaasambil Yehow, ki cikwaabw hatwiitaatab dyaalabul dindiy mu mushind woos udyey wiitwaalabul. (Bal Biin Ebreh 11:6.) Tukontonaay cileejel cya Mike ni mukaj indiy, Chrissy. Baakady ni kiihacil ka kukal mudimw ku Betel. “Twaakady biitwaal mim ni mukaj aam mukacy mwa mivw yivul ni twaakady teng tusambil Yehow bwa kiihacil aak,” Mike uleeleeb neey, “ki kaabakadyoh bend biitubikan ku Betel.” Mike ni Chrissy baakady teng batwiishibw neey Yehow waakady mumanyik mushind mulengel wa kukal naabw mudimw mu mudimw indiy. Batungunukil ni kulong cyoos cyaakadyobw mwa kulong, ha kukal mudimw bu baaseb’aa njil ha cyaab cyaakadyobw bakaam bikasakan bakajaady ni baakady bambulwiish mu midimw ya lwiibak lwa mazubw mataatal bulongolody bwa Yehow. Leel oow bady mu mudimw a kulombol bijeng. Mike uleeleeb neey: “Yehow kiin mwaalabul teng masambil miitut mu mushind utwaakady batakamin,” “ki i mwiimaalabul mu mushind mulengel mushilangan ni utwaakady tulang.”

17-18. I kutwiishiibw kaay kutudy mwa kwiikal naak bilondeshel Musambw 86:6, 7?

¹⁷ Bal Musambw 86:6, 7. Mumb a misambw Davih waakady mutwiishibw neey Yehow umvwiil ni waalabwiil masambil mindiy. Udy mwa kwiikal byeeb ni kutwiishiibw kwa nook. Bileejel bya baat bitubakontonon mu ciin bwaal eecy biitujaadikil neey Yehow udy mwa kwiitwaakish meej ni bukash butukaakaam bwa kutaataamen. Udy mwa kukal mudimw ni biin-kweet baan-balum ni baan-bakaj eecy baat bakiish bamuhambidil bwa kwiitwambulwiish mu mushind kaahand.

¹⁸ Tut batal neey Yehow kiin teng mwaalabul masambil miitut mu mushind utudy batakamin, tudy bamanyik neey wiiyiiy kwiimaalabul. Wiiyiiy kwiitwaakish teng citukaakaam ha ciisang cilengel citukaakaamecy. Nook, tungunuk teng ni kusambil ni diitabij, ni iikal mutwiishibw neey Yehow wiiyiiy kukutabaleel kaabaak ni wiiyiiy “waakish boos bady batal bikaakaamobw” mu bulongolody buhyaabuhy butudy batakamin.—Mus. 145:16.