CIIN BWAAL CYA KULONG CYA 49
Yehow wiiyiiy kwaalabulok masambil maam eeny?
“Naak nun biiy kuubiikan ni kuulomb, niiyiiy kwiinumvw.”—JER. 29:12.
MUSAMBW A 41 Umvuaku kulomba kuanyi
KADYOOSHa
1-2. Bwabiny tudy mwa kulang neey, Yehow kiishoh bend waalabul masambil miitut?
“HET musangal iibuh muvul teng kudy Mawej, wiiyiiy kukuh cidy mucim iibuh ukaam aacy.” (Mis. 37:4) Mulay oow ukeekemesh! Ki bikaam tutakaminok neey Yehow wiiyiiy kwiitwaakish biit byoos bitumuloolomb teng kaabaak eeny? Bwabiny tudy mwa kwiiyihanguj nook? Tulalaay bileejel biloolond eeby. Mwiin-kweet mwaan-mukaj ucidy mujik asaasambil bwa kutweeley mu kalaas ka Badiil ba baat musah a Bukaleng. Ki kuhicil mivw yivul, kabakaadyoh bend bamubiikan. Mwiin-kweet mwaan-mulum ucidy saand uloolomb Yehow bwa kumvwey bilengel ku lubeel lukasakan lwaakadyey naalw bwindiy kuhet mushind a kukaley mudimw bikasakan mu cisumbw. Ki ucidy teng ni lutat habitaatal makand mindiy ma nyeet. Balel biin Krist basaasambil bwa mwaanaababw ashaal mu myand ya biin-biin. Ki mwaanaababw wangangat dihangadik dya kulek kulongel Yehow mudimw.
2 Misang yikwaabw uw byeeb udy mwa kwiikal mulomb Yehow ciit kaahand, ki kwiish mwiicihetoh bend. Nook, udy mwa kwiiy kulang neey, Yehow waalaalabul teng masambil ma bakwaabw, miibuh kiin wiimaalabuloh bend. Eecy udy mwa kulang neey, udy mulong bwaal kaahand bubiih. Mwiin-kweet mwaan-mukaj mukwaabw dindiy Janiceb umvwiil byend nook. Yiy ni mbaayend baakady basambil bwa cyaakadyobw bakaam, bwa kukadil Mawej mudimw ku Betel. Uleeleeb neey: “Naakady mujaadik neey, mu mafuk makeeh oomw biiyiiy kwiitubikan ku Betel bwa kukal mudimw.” Ki kuhicil mivw ivul ni kabaakadyoh bend biibabikan. Janice uleeleeb neey: “Numvwiil kaakunying. Niiyihangujil bwa kumanyik cinaakady mulong bwa kumb Yehow mwanz ku makas. Nasambiil bikasakan bwa kuhet buludik bwindiy. Bwabiny kaakadyoh bend mwaalabul ku disambil dyaam?”
3. I biny bitwiiyiiy kukontonon mu ciin bwaal eecy?
3 Misang yikwaabw tudy mwa kwiiyihanguj ning Yehow umvumvw masambil miitut. Bamw baat ba lulamat ba kal baakady biyihanguj byaabw nook. (Yoobw 30:20; Mis. 22:2; Hab. 1:2) I biny bidy mwa kukujaadikil neey, Yehow wiiyiiy kwaalabul ku masambil miibuh? (Mis. 65:2, NWT) Bwa kwaalabul ku dijooj eedy, twiiyiiy kwaalabul cya kuuhal majooj aam: 1) I biny bitudy mwa kutakamin kudy Yehow? 2) I biny bidy Yehow wiitulomb? 3) Bwabiny bikaam tulongolol misang yikwaabw mamw masambil miitut?
I BINY BITUDY MWA KUTAKAMIN KUDY YEHOW
4. Bilondeshil Jeremih 29:12, Yehow ulaalay bwa kulong biny?
4 Yehow ulaalay neey, umvumvw masambil miitut. (Bal Jeremih 29:12.) Mawej iitut i mukat bahambidil bindiy ba lulamat, nook kakwiiyoh bend kulek kumvw masambil maabab. (Mis. 10:17; 37:28) Biineeby, kabiish byumvwiij neey, wiiyiiy kwiitwaakish biit byoos bitumuloolomb. Tudy mwa kutungunuk ni kwiimanyin teng ni mu bulongolody buhyaabuhy bwiitut kuhet biit bikwaabw bitumuloolomb.
5. I biny bidy Yehow ukontonon hadyey umvw masambil miitut? Umvwiij.
5 Yehovah wangangat ni buseeb masambil miitut hadyem mahetangan ni kihacil kindiy. (Yesh. 55:8, 9) Mu kihacil kindiy oomw, i mukat bwa bulab bwiiwul ni baat baan-balum ni baan-bakaj biikal mu kaacyumw ni musangal mu bukookesh bwindiy. Ki Sataan uleeleeb neey, baat bady mwa kwiikal bilengel bab biikookesh bab kaayaabw. (Kbwa. 3:1-5) Bwa kuleej neey, bidy Dyaabol muleeb i bya makos, Yehow i mwiitabil baat bwa kwiilombolobw bab kaayaabw. Nook, kukookesh kwa baat i kukamish makab muvul matudy naam leeloow. (Mul. 8:9) Tudy bumvw neey, Yehow kakwiiy kuman makab moos aam teng kaabaak. Yiy mwiikal mulong nook, baat bakwaabw bady mwa kuleeb neey, as bukookesh bwa baan ba baat bukaakal mudimw bilengel ni budy mwa kuman myand yoos yidy naay baat.
6. Bwabiny bikaam twiikal batwiishibw neey, Yehow wiiyiiy teng kulong myand ni lukat ni mu mushind muwaakan?
6 Yehow udy mwa kwaalabul ku masambil ma mwaamumw mu mishind yishil-shilangan. Cileejel, haakady Mukaleng Ezekiyas mubeel bikasakan, ulombel Yehow bwindiy kumwambulwiishey bwa kumvw bilengel. Yehow walaabwiil ku kulomb kwindiy ha kumondahey. (2 Bak. 20:1-6) Cikwaabw, haakady mupostol Pool mwiisanjil Yehow bwa kuful “mal hanyeet” yindiy, misang yikwaabw lutat lwaakadyey naalw ku nyeet, Yehow kaakadyoh bend mwiiluful. (2 Kor. 12:7-9) Tukontononaay cikwaabw cileejel cya mupostol Jak ni mupostol Pyeel. Boos babidy, bakaamiin kwiibazuh kudy mukaleng Herood. Biin mu cisumbw basambiil bwa Pyeel ni cikwaabw bwa Jak. Ning naak, bazuhil Jak, ki Pyeel naabw bamukudiloh mu cishim. (Yil. 12:1-11) Tudy mwa kwiiyihanguj neey , ‘Bwabiny Yehow ukudiloh Pyeel ni kulekey kukuloh Jak?’ Bibl kiin muleeboh bend bwaal oobw.c Bikaam twiikal batwiishibw neey Yehow uloolong teng “myand yiwaakan.” (Mmu. 32:4) Tudy bamanyik neey, boos babidy Pyeel ni Jak, Yehow waakady mwiibakat. (Yis. 21:14) Misang yikwaabw Yehow kiin mwa kwaalabul masambil miitut mu mushind utwaakady batakamin. Ki bu mutudy bajaadik neey, Yehow udyaakal teng ni lukat ni muwaakan, katwiinoh bend ni cya kuleeb bwa mushind waalaalabuley masambil miitut.—Yoobw 33:13.
7. I biny bitudy mwa kuteet kulek ni bwabiny?
7 Twiikaakashishomw bwa kulek kufwanyikij shikacil utudy nend ni wa bakwaabw. Cileejel, tudy mwa kulomb Yehow bwa kwiitwambulwiishey mu mushind kaahand musunguluk, ki katuy tuhet citwaakady bamulomb. Kuunyim kwa mafuk, twiiyiiy tumanyik neey, muut mukwaabw ulongel disambil dya mwaamumw eedy ni bimweekel neey, Yehow waakady mumwaakish cyaakadyey mulomb. Mwiin-kweet mwaan-mukaj mukwaabw dindiy Anna, utadil byend bwaal oobw. Waakady musambiil bwa mbaayend Matthew umvw bilengel ku lubeel lwa kanser lwaakadyey naalw. Mu ciisang cyaakaabumw aacy, biin-kweet baan bakaj babidy bakuluh baakady bakab byaabw bwa lubeel lwa kanser. Anna usambidiil bikasakan bwa Matthew ni bwa biin-kweet baan-bakaj aab. Biin-kweet baan-bakaj aab bumvwiil bilengel, ki Matthew naabw ufwiil. Kuuhal, Anna waakady wiiyihanguj ning biin-kweet baan bakaj aab baakady bumvw bilengel bwaal Yehow waakady mwiibambulwiish. Ni biby biikal naak, bwabiny Yehow kaakady mwaalabul ku musambil mindiy bwa mbaayend umvw bilengel? Cyaabiin, katwiin bamanyik mushind waakady biin-kweet baan-bakaj aab bumvw bilengel. Citudy bamanyik i cya neey, Yehow i mukat kuman makab moos matudy naam ni mukat kusangul balund bindiy bady bafw.—Yoobw 14:15.
8. a) Bilondeshil Yeshaay 43:2, I mushind kaay udy Yehow wiitwambulwiish? b) I mushind kaay udy diisambil mwa kwiitwambulwiish hatutwiitwiilangan ni makab makasakan? (Tal film wa neey, Diisambil Didy Mwa Kwiitwambulwiish Bwa Kutaatameen Makab.)
8 Yehow wiiyiiy teng kwiitwambulwiish. Bu mudyey taat iitut udy ni lukat, Yehow kiish mukat kwiitutal tukab. (Yesh. 63:9) Cikwaabw, kiish mwa kwiitweehul ku makab moosoolol mady mwa kwiitukwaat mady bu misul eecy malak-lak ma mudil. (Bal Yeshaay 43:2.) Ning naak, wiitulaalay bwa kwiitwambulwiish ‘atuhiihicilomw’. Kaakwiitaboh bend bwa makab miitukaakeesh bwa kutungunuk ni kumukadil mudimw. Yehow wiitwaakakish cikwaabw spirit indiy mujilang udy ni bukash bwa kwiitwambulwiishey bwiitut kutaatameen makab. (Luuk 11:13; Fili. 4:13) Nook, tudy mwa kwiikal bajaadik neey, twiiyiiy teng kuhet bitukaakaam menmen ni twiiyiiy kutaatameen makab ni tushaal ni lulamat kudyey.d
I BINY BIDY YEHOW WIITULOMB?
9. Bilondeshil Jak 1:6, 7, bwabiny bikaam tuteekel Yehow micim neey, wiiyiiy kwiitwambulwiish?
9 Yehow wiituloolomb bwiitut kumuteekel micim. (Eb. 11:6) Misang yikwaabw, makab matuheehet mady mwa kumweek makasakan bwa kwiimataatameen. Tudy mwa kutang kweelakan ning Yehow wiikaakal mwa kwiitwambulwiish. Ki Bibl wiitujaajadikil neey, ku bukash bwa Mawej tudy mwa “kutuhik ciman cya cibunj.” (Mis. 18:29, NWT) Nook, hamut iitut kweelakan, bikaam tusambil ni diitabij dyoos ni tuteekel Yehow micim neey, wiiyiiy kwaalabul ku masambil miitut.—Bal Jak 1:6, 7.
10. Twaal cileejel cya mushind utudy mwa kulong myand yumvumvwangan ni masambil miitut.
10 Yehow wiituloolomb bwa tulong myand yumvwangan ni masambil miitut. Cileejel, mwiin-kweet mwaan-mulum udy mwa kulomb bwa Yehow amwambulwiish bwa kuhetey diib ku mudimw indiy bwa ahet mushind a kutweel mu cihwiil cya rejoh. I mushind kaay udy Yehow mwa kwaalabul ku disambil eedy? Udy mwa kwaakish mwiin-kweet mwaan-mulum oow mucim mukasakan ukaakaamey bwa kuy kalombey fumw indiy a mudimw. Ki biiyiiy kulomb bwa mwiin-kweet oow ay cikwaabw bwa kalombey fumw indiy a mudimw. Bidy mwa kumulomb bwa atungunuk ni kulomb misang yivul. Udy mwa kulomb bwa ashiitulul diifuk dindiy dya mudimw ni mwiin mudimw mukwaabw. Kuk mushind, udy mwa kulomb bwa kuyey ki kabay bamufut diifuk aady.
11. Bwabiny bikaam tulomb teng kulomb bwa myand yidy yiitutond?
11 Yehow wituloolomb bwiitut kutungunuk ni kumulomb habitaatal myand yidy yitutond. (1 Tes. 5:17) Teng mudyeby bileej mu may ma Yeez, bimw biit bituloolomb , kabakwiiy kwiituheby musang umw. (Luuk 11:9) Nook kanukooyeloh bend mu mabok! Iikalaay nulomb teng kulomb ni mucim aakaabumw. (Luuk 18:1-7) Hatuutungunuk ni kulomb habitaatal bwaal kaahand, tuleeleej Yehow neey, twangangat biin-biin diisambil ni buseeb. Tuleeleej cikwaabw diitabij ku bukash budyey naabw bwa kwiitwambulwiish.
BWABINY BIKAAM TULONGOLOL MISANG YIKWAABW MAMW MA KU MASAMBIL MIITUT?
12. a) I dijooj kaay ditudy mwa kwiiyihanguj habitaatal masambil miitut ni bwabiny? b) I mushind kaay utudy mwa kwiikal bajaadik neey, masambil miitut maleeleej kaneemw kudy Yehow? (Tal kazubw ka neey, “Masambil maam, maleeleejok munaneeneemek Yehow eeny?”)
12 Tut katuy bahet bitudy balomb mu diisambil, tudy mwa kwiiyihanguj majooj masat aam. Dya kuuhal, ‘Nasaasambilok bwa ciit cilengel eeny?’ Misang yivul tulaalang neey, tudy bamanyik cidy cilengel menmen bwiitut. Ki biit bituloolomb kabiin teng ni bwa kwiitwambulwiish menmen. Tut tusambil habitaatal bwaal kaahand, kudy mwa kwiikal mushind mulengel menmen wa kuman bwaal aabw muhitok ni utuloolomb. Ni kudy biit bikwaabw bituloolomb bikiish byumvwangan ni lukat lwa Yehow. (1 Jah 5:14) Cileejel, tukontononaay cileejel cya balel badyobw baman kutel mu bikos bya kubutambwiil. Balombel Yehow bwa alam mwaanaabab bwa atungunuk ni kumukadil mudimw. Kulomb kwaabab ook kumweemweek bu kulengel. Cikwaabw, Yehow kaakwiiy kulongesh muut ning waakaabumw wa kutudy ku makand bwa kumukadil mudimw. I mukat neey, tut boos ni baan biitut tusungul bwa kumuhambidil. (Mmu. 10:12, 13; 30:19, 20) Nook balel bady mwa kulomb Yehow bwa ibambulwiish bwa bateng mucim a mwaanaabab bwa amusak bwa kukatey Yeehow ni bwa kushaaley mulund neend.—Tus. 22:6; Efez 6:4.
13. Bilondeshil Ebreh 4:16, i ciisang kaay ciikal Yehow mwa kwiitwambulwiish? Umvwiij.
13 Dijooj dibiidy didy neey, ‘Ciineecy, i ciissang cidy Yehow mwa kuuyakish cinady mumulomb eeny?’ Tudy mwa kulang neey, bikaam tuhet teng kaabaak dyaalabul ku masambil miitut. Biin-biin bidy neey, Yehow i mumanyik ciisang cilengel cyeeh cidyey mwa kwiitwambulwiish. (Bal Ebreh 4:16.) Diib ditudy katuy tuhet bitudy balomb teng kaabaak, tudy mwa kulang neey, dyaalabul dya Yehow didy neey, ‘Waakweeh kwiishoh bend uhet ciit.’ Ki dyaalabul dindiy didy mwa kwiikal biin-biin neey, ‘Ciishoh bend mwanj kukwaalabul.’ Cileejel, vuluk mwiin-kweet mwaan-mulum saand waakady usambil bwa kumondahobw lubeel lwaakadyey naalw. Bu Yehow mwiikal mumondah mu cishim, Sataan waakady mwa kuleeb neey, mwiin-kweet utungunukil ni kukadil Yehow mudimw teng bwaal Yehow waakady mumondah. (Yoobw 1:9-11; 2:4) Cikwaabw, Yehow i muman kulongolol ciisang cikaley mwa kuman mabeenj moos. (Yesh. 33:24; Yis. 21:3, 4) Bwa kaabaak, katwiishoh bend mwa kutakamin bwa kwiitondahobw mu cishim. Nook mwiin-kweet mwaan-mulum waakady mwa kutungunuk ni kulomb Yehow bwa kumwaakishey diikand ni diitalal dya mu micim bwindiy kutungunuk ni kutaatameen lubeel lwaakadyey naalw ni bwindiy kutungunuk ni kukadil Mawej mudimw ni lulamat.—Mis. 29:11.
14. I biny bituloolongel ku cileejel cya Janice?
14 Vuluk cileejel cya Janice, usambiil bwa kuy kukaley mudimw ku Betel. Hahicil mivw itaan, wiiyil kumanyik neey, Yehow waakady mwaalabul masambil mindiy mu mushind waakadyey kay mutakamin. Uleeleeb neey: “Yehow ukadil mudimw ni ciisang eecy bwa kuulongweesh myand yivul ni bwa kuyambulwiish bwa mim kushaal mwiin Krist mulengel menmen. Byaakady bikaam bwa mim kukashish diitabij dyaam kudyey. Byaakady bikaam Bwa mim kulengej mushind aam a kwiilongel. Ni byaakady biikam bwa niikal ni musangal ha cinakaakadil Yehow mudimw.” Kuunyim kwa mafuk, Janice ni mbaayend bibabiikeen bwa kuy kakalobw mudimw wa kukumbul bisumbw. Halaalangiley ha bwaal oobw, Janice uleeleeb neey: “Yehow waalabwiil ku masambil maam mu mushind unaakady ciiy mutakamin. Byaakady biilomb diib kaahand bwa kutal bulengel bwa dyaalabul dindiy. Ki nady ni dyanyish divul bwa mushind udyey muyaakish dyaakatook dya lukat lwindiy ni bulengel bwindiy budyey muuleej.”
Hawutaatal neey, kwiin muhet dyaalabul kudy Yehow, lang bwa kusambil bwa biit bikwaabw (Tal cikos cya 15)f
15. Bwabiny katwiish teng mwa kuleeb myand yisunguluk mu masambil miitut? (Tal cikwaabw bifwaatul.)
15 Dijooj diisaat didy neey, ‘Nady mwa kusambil bwa ciit cikwaabw eeny?’ I bilengel bwa kuleeb bwaal busunguluk hatusaasambil. Misang yikwaabw tudy mwa kulek kulomb myand yisunguluk mu masambil miitut, nook, tudy mwa kwiiy kutal cidy Yehow mukat bwiitut. Tutalaay cileejel cya mwiin-kweet mwaan-mukaj mujik waakady usambil bwa kutweel mu kalaas ka Badiil ba baat musah a Bukaleng. I mukat kuy katweel mu kalaas bwa kuhetey mushind a kukaley mudimw bikasakan ha cyaab cikaakaamobw baakajaady. Nook, hacyaakadyey utungunuk ni kusambil bwa kumubiikonobw ku kalaas, waakady cikwaabw ni bwa kulomb Yehow bwa amwambulwiish bwa kumanyikey mishind yikwaabw yaakadyey mwa kuvudij mudimw indiy a bukajaady. (Yil. 16:9, 10) Cikwaabw, waakady mwa kulong myand yumvumvwangan ni diisambil dindiy hakulomb mulombol aabab a cijeng bwa kumanyik ning kudy cisumbw cidy habwiih naabw cikaakaamobw ba nseb a njil bavul eecy waakady mwa kufundil biroh bya filiyal bwa kumanyikey cyaab cikaakaamobw baakajaady ba Bukaleng bavul.e
16. I biny bitudy mwa kwiikal bajaadik?
16 Teng mutudy biibilong, tudy mwa kwiikal bajaadik neey, Yehow wiiyiiy kwaalabul masambil miitut moos ni lukat ni mu mushind muwaakan. (Mis. 4:3; Yesh. 30:18) Misang yikwaabw katwiish mwa kuhet dyaalabul mu mushind utwaakady batakamin. Ki Yehow kakwiiyoh bend kuvulamin masambil miitut. I mwiitukat bikasakan ni kaakwiiyoh bend kwiitulek. (Mis. 9:10) Nook “teekaay micim yinun yoos kudyey diib dyoos,” mwambilaay yinudy naay ku kuluukul mu diisambil.—Mis. 62:8.
MUSAMBW 43 Disambila dia kuela Nzambi tuasakidila
a Ciin bwaal eecy ciiyiiy kumvwiij bwabiny tudy mwa tuteekel Yehow micim neey, wiiyiiy teng kwaalabul masambil miitut ni lukat loos ni mu mushind muwaakan.
b Tudy bashiitulul majin makwaabw.
c Tal ciin bwaal cya neey “Udy Muteekelok Yehow Uloolong Myand Yiwaakan Micim Eeny?” cidy mu Cibumb cya Muteetekel cya suuny 2/2022 diib. 3-6.
d Bwa kumanyik myand yikwaabw ha mushind udy Yehow wiitwambulwiish bwa kutaatameen makab, tal film wa neey Diisambil Didy Mwa Kwiitwambulwiish Bwa Kutaatameen Makab mu jw.org.
e Uw mukat bwa kumanyik cuwudy mwa kulong bwa kuy kakal mudimw mu teritwaar wa filiyal mukwaabw tal mukand wa neey, Balongolola bua kuenza disua dia Yehowa, shap. 10, cik. 6-9.
f DYUMVWIIJ DYA CIFWAATUL: Biin-kweet baan-bakaj babidy basaasambil kuuhal kwa kwiiwujobw formileer wa kuyobw ku kalaas ka Badiil ba baat musah a Bukaleng. Kuunyim kwa mafuk, babiibiikan umw wa kudyebw ni mukwaabw kabay bamubiikan. Hamut ha kumvwey bibiih, mwiin-kweet mwaan-mukaj udyobw kabay babiikan oow utuutungunuk ni kulomb Yehow bwa amwambulwiish bwa kuhetey mushind mukwaabw wa kuvudijey mudimw indiy a bukajaady. Nook, ufuufundil biroh bya filiyal mukand bwa kwiitwaaley bu mwiin bukish bwa kuyey ha cyaab cidyobw bakaam bakajaady bavul.