Mutudy mwa kutungunuk ni kukatangan bikasakan muut ni mukwaabw

1-2. a) Bwabiny mupostol Pool uleebel neey lukat i ciikadil “cidy cihitok byoos”? b) I majooj kaay matwiiyiiy kukontonon?

HAAKADY mupostol Pool uleeb bwa diitabij, kutakamin ni lukat, umanyin ni may aam uleeb neey: “Cidy cihitok [biikadil] byoos i lukat.” (1 Kor. 13:13) Bwabiny Pool uleebel naak? Mu mafuk miiyiiy, katwaakwiikaloh bend tukaam kwiikal ni diitabij mu milay ya Mawej habitaatal bulongolody bwindiy buhyaabuhy eecy katwaakwiikaloh bend ni kutakamin kwa neey, milay eey yiiyiiy kukumban bwaal yiikaakal yiman kukumban. Ki twiikaakal teng ni micim ya kukat Yehow ni baat. Biin-biin, lukat lwiitut bwaabab lwiiyiiy kutungunuk ni kukasakan buyiil.

² Nook mu twiikal teng ni micim ya kukatangan, twiiyiiy kukontonon majooj masat aam: 1) Bwabiny bikaam tukatangan muut ni mukwaabw? 2) I mushind kaay utudy mwa kukatangan muut ni mukwaabw? 3) I mushind kaay utudy mwa kutungunuk ni kukatangan bikasakan muut ni mukwaabw?

BWABINY BIKAAM TUKATANGAN MUUT NI MUKWAABW?

3. I tubingil kaay twiitusaasak bwiitut kukatangan muut ni mukwaabw?

³ Bwabiny bidy ni buseeb bwiitut kukatangan muut ni mukwaabw? Kamw ka kutubingil i ka neey, kwiikal ni lukat i kuk kuleeleej neey, tudy biin Krist ba biin-biin. Yeez wambiil bapostol bindiy neey: “Binwiikal bakatangan, naak baat boos biiyiiy kumanyik ney,—aash nudy biiyij ba mim.” (Jah 13:35) Cikwaabw, kwiikal bakatangan muut ni mukwaabw kwiiyiiy kulong bwa twiikal mu kaacyumw. Pool uleebel bwa lukat neey: “I lul lwiinukwaakwanjok bwiinun kwiikal baswiikakan bilengel.” (Kol. 3:14) Nook, kudy kabingil kakwaabw ka buseeb kiitusaasak bwiitut kukatangan. Mupostol Jah ufundiil baan baabw biin Krist neey: “Oow udy mukat Mawej, akat ni mwaanaabw.” (1 Jah 4:21) Hatuleeleejangan lukat muut ni mukwaabw, tuleeleej neey, tudy bakat Mawej.

4-5. Twaal cileejeel cileelej kuhetangan kudy hakacy ha lukat lwiitut bwa Mawej ni kukatangan kwiitut kwa muut ni mukwaabw.

⁴ I mu mushind kaay mudy lukat lwiitut bwa Mawej luhetangan menmen ni lukat lutudy bakat biin-kweet baan-balum ni baan-bakaj? Bwa kumvwiij, tukontononaay kumvwangan kudy hakacy a mucim iitut ni bituh bikwaabw bya nyeet iitut. Diib didy mungang wiitulong mateet ma mikum ya lwend lwa mash ku cikam bwa kumanyik ning mendend bikeeh-bikeeh eecy lwang-lwang, udy mwa kumanyik mudy mucim iitut ukal mudimw. I biny bitudy mwa kulongel ku diiy ditam dya kwiikal ni lukat?

⁵ Teng mudy Dokteer ukaam kumanyik mudy mucim iitut hadyey ulong mateet ma mikum ya lwend lwa mash miitut, tudy byeet ni mushind a kumanyik bukash bwa lukat lutudy naal bwa Mawej hatukookontonon mushind utudy bakat baat bakwaabw. Tut batal neey lukat lutudy naal bwa biin-kweet i lwiiy kukeeh mu mushind kaahand, bidy mwa kuleej neey lukat lutudy naal bwa Mawej lwendend ni kukeeh byaal. Tut biikal ni ciibidil cya kuleej biin-kweet lukat, i cimanyin cya buseeb cileeleej neey lukat lwiitut bwa Yehow i lukasakan.

6. Bilondeshel 1 Jah 4:7-9, 11, bwabiny i cilumbw citam kutudy tut batal neey lukat lutudy naalw bwa biin-kweet lwendend lukooyel?

⁶ Bikaam tumanyik neey tudy ni cilumbw citam tut batal neey, lukat lutudy naalw bwa biin-kweet baan-balum ni baan-bakaj lwendend ni kukooyel. Bwabiny? Bwaal byumvwmvwiij neey bulund bwiitut ni Yehow kabuciish bukasakan. Mupostol Jah uleeleeb hatook hadyey wiituvulwiij neey: “[Muut] yiy kay utal mwanaabw mu diis, i mwiin makos. Bwaal, kiish mwa kukat Mawej udyey kay mutal biikaley kay mukat mwanaabw udyey mutalok ni mees.” (1 Jah 4:20) I diilongweesh kaay bwiitut? Yehow udy neet ni musangal teng ‘hatukaakatangan muut ni mukwaabw.’—Bal 1 Jah 4:7-9, 11.

I MUSHIND KAAY UTUDY MWA KUKATANGAN MUUT NI MUKWAABW?

7-8. Teelok yimw mishind yitdy mwa kuleej neey tudy bakatangan muut ni mukwaabw?

⁷ Misang ni misang mu Diiy dya Mawej, tusaasanganomw diiy dya neey: “Katanganaay.” (Jah 15:12, 17; Rom 13:8; 1 Tes. 4:9; 1 Py. 1:22; 1 Jah 4:11) Ki, lukat i ciikadil cidy mu micim yiitut, eecy mushind wiitwiiyumvumvw udy mund mwa micim yiitut udy muut mukwaabw kay mwa kutal. Nook, i mushind kaay udy bakwaabw mwa kumanyik neey tudy biibakat? I ku myand yituleeleeb ni ku bilong biitut.

⁸ Kudy mishind yishil-shilangan yitudy mwa kuleej biin-kweet baan-balum ni baan-bakaj neey tudy biibakat. Tal byumw bileejel: “Muut woos ambil mwaanaabw myand ya biin-biin.” (Zak. 8:16) “Shikataay talal ni bakween.” (Mark 9:50) Iikalaay ba kuuhal ‘hakuneemekangan.’ (Rom 12:10) “Yaakanganaay.” (Rom 15:7) “Fwiilanganaay lus.” (Kol. 3:13) “Kwanjanganaayok mu kwangat kwa majit.” (Kal. 6:2) “Nukashishangan ku micim.” (1 Tes. 4:18) “Kashishanganaay mu mabok.” (1 Tes. 5:11) “Lombelanganaay kudy Mawej.”—Jak 5:16.

9. Bwabiny kukashish bakwaabw ku micim i mushind a buseeb utuleeleej neey tudy biibakat? (Tal cikwaabw cifwaatul.)

⁹ Tukontononaay mushind a kuleej lukat udyobw baleeb ku mishind yidyobw baleej mu cikos cishaal. Twiiyiiy kukontonon mubel utwaadil Pool wa neey: “Nukashishangan ku micim.” Bwabingany kukashish bakwaabw i mushind a buseeb uleeleej neey tudy ni lukat? Bilondeshel mukand mukwaabw udyobw balayidil habitaatal Bibl, cyambil cikadil naacy Pool mudimw cya neey: “kukashishangan ku micim” cyumvumvwiij “kwiikal habwiih ni muut bwa kumukashish hadyey mu makab makasakan.” Nook, hatumukaakashish ku micim, twambambulwiish mwiin-kweet udy mu makab ni mal bwa kuhetey diikand bwa kutungunuk ni kwendel mu njil a buumy. Musang woos utukaakashish mwiin-kweet, tumuleeleej neey tudy bamukat.—2 Kor. 7:6, 7, 13.

10. I kuhetangan kaay kudy hakacy hakwiikal ni lus ni kukashishangan ku micim?

¹⁰ Kwiikal ni micim yikwiit mund bwa mal mamoomon bakwaabw ni kukashishangan ku micim i biikadil byendendel haakaabumw menmen. Mu mushind kaay? Muut udy ni micim yimwiit mund bwa mal mamoomon bakwaabw umvumvw micim yimusak bwa kwiibakashish ku micim ni wiikaakashish bwa kulong bwaal kaahand bwa kwiibambulwiish. Nook cya kuuhal tut biikal ni lus, tumvumvw micim yiitusak bwa kukashish bakwaabw ku micim. Tal mudy Pool uleej kuhetangan kudy hakacy ha lus ludy naal Yehow ni mushind udyey ukashish muut ku micim. Pool uleeleeb bwa Yehow neey i “Taat udy ni lus luvul; Mawej, ukaakashishangan ku micim mu myand yoos.” (2 Kor. 1:3) Iinaah Pool ukaakal mudimw ni cyambil cya neey: “udy ni lus luvul” bwa kuleej mudy micim yitwiit mund bwa bakwaabw. Ki bwabiny, “Mawej i Taat, eecy Mwiin lus luvul, bwaal i yiy udy ni lus luvul bwa baat.” Cibwaabw, lus aal lumusaasak bwa kwiitukashishey ku micim “mu mal [moos] matumoomon.” (2 Kor. 1:4) Teng bu mudy mwanz a kasul ubatamij micim ya bady ni min ya mwanz, ki mudy Yehow ubatamij ni ukashish micim ya aab bady mu makab ni mal. I mushind kaay utudy mwa kwiidikij Yehow hakwiikal ni lus ni hakukashish bakwaabw ku micim? Mushind utudy mwa kulong nook i hakwiikal ni biikadil mu micim yiitut byumvumvwangan ni kukashish bakwaabw ku micim. Teel byumw bya ku biikadil eeby.

11. Bilondeshel biin Kolos 3:12 ni 1 Pyeel 3:8, I biikadil kaay bikwaabw bitudy ni bwa kwiikal naaby bwiitut kutungunuk ni kwiikal ni lukat lwiitusaasak bwa kukashish bakwaabw ku micim?

¹¹ I biny bidy mwa kwiitwambulwiish bwa kwiikal ni lukat lutukaakaam bwiitut kutungunuk ni ‘kukashishangan ku micim’ diifuk dyoos? Bikaam twiikal ni biikadil bu mudy kwiikal ni lukat, lukat lwa bu baan ba kamuut, ni kwiikal biin myand yilengel. (Bal Biin Kolos 3:12; 1 Pyeel 3:8.) I mushind kaay wiikal biikadil eeby mwa kwiitwambulwiish? Tut biikal ni lus bwa biin-kweet ni twiitacish bikasakan bwaabab, ni lukat lwiitut lwiiyiiy kukasakan bwiitut kwiibambulwiish hadyobw mu makab ni mal. Teng muleejel Yeez, “May mahaahatul muut mukan mady teng mady miiwul mu micim yindiy. Muut mulengel myand uhaahatul teng myand yilengel yidy mu micim.” (Mat. 12:​34, 35) Kukashish biin-kweet baan-balum ni baan-bakaj bady mu diikeng i biin-biin mushind a buseeb utuleeleej neey tudy biibakat.

I MUSHIND KAAY UTUDY MWA KUTUNGUNUK NI KUKATANGAN BIKASAKAN MUUT NI MUKWAABW?

12. a) Bwabiny bikaam tutungunuk ni kushaal badimuk? b) I dijooj kaay ditwiiyiiy kukontonon?

¹² Tut boos tudy bakat kutungunuk ni ‘kukatangan muut ni mukwaabw.’ (1 Jah 4:7) Ki, bidy ni buseeb bwiitut kuvuluk mubel utwaadil Yeez wa neey: ‘Baat bavul baakady ni micim ya kukat bakwaabw, ku micim [kwiiyiiy] kwiibatalal.’ (Mat. 24:12) Yeez kaleebeloh bend neey bavul ba ku biiyij bindiy baakady mwa kwiiy kwiimanyik bwa kuleejanganobw lukat muut ni mukwaabw. Ning naak, bikaam twiikal badimuk bwa kaay twaalek kwiikal ni lukat teng bu mudy baat ba mu bulongolody oobw bady biitunyunguluk. Ni bwaal oobw mu meej, tukontononaay diijooj dya buseeb eedy: Kudyok mushind utudy mwa kwiikontonon bwiitut kumanyik ning lukat lwiitut bwa biin-kweet i lukasakan eeny?

13. I biny bidy mwa kuteek lukat lwiitut mu diteet?

¹³ Mushind utudy mwa kumanyik bukash budy naabw lukat lwiitut i hatukookontonon mushind utuloolong myand mu shikacil iitut. (2 Kor. 8:8) Bwaal bwa nook i biibuleej kudy mupostol Pyeel: “Kuuhal kwa biit byoos, katanganaay bikasakan muut ni mukwaabw, bwaal lukat lujiijimbakany myand yibiih yivul.” (1 Py. 4:8) Nook, mushind utuloolong myand hady biin-kweet balong bilem eecy balong myand yitutaatah ku micim, kwiiyiiy kwiitwambulwiish bwiitut kumanyik ning tudy biibakat bikasakan.

14. Bilondeshel 1 Pyeel 4:8, bikaam twiikal ni lukat lwa mushind kaay?twaal cileejel.

¹⁴ Tulangilaay bilengel ha may maleebel Pyeel. Cituh cya kuuhal cya verseh a 8 cileeleej lukat lutudy ni bwa kwiikal naalw—‘lukat lukasakan.’ Mwaak udy Pyeel mukal nend mudimw “bikasakan” umvumvwiij bituh neey “kuvudij.” Cituh ciibiidy cya verseh cileeleej citudy mwa kulong hatudy ni lukat luvul bwa bakwaabw. Lujiijimbakany bibiih bya biin-kweet. Twangat cijleejel eecy: Lang ket neey: Ha mees hady bukooy. Kudy mushind a kwangat cihes cya cizang cinaananik ni kwiicikok bwa kwiicibwiikil ha mees oos. Kiin bwa cibwiikil teng bukooy ha cyaab cyumw, eecy byaab bibidy, ki i bwa cibwiikil bukooy boos budy ha mees. “Kujimbakany” kudyobw baleeb iinah, i mushind udyobw bumvwiij bwa kufwiilangan lus. Bya mushind aakaabumw, teng mudy cihes cya cizang mwa kujimbakany ha bukooy, tut biikal ni lukat luvul bwa biin-kweet baan-balum ni baan-bakaj, tudy mwa kujimbakany bibiih byoos bidyobw balong, eecy tudy mwa kwiibafwiil lus, kiin teng bwa bubiih bwaakaabumw, eecy myand yibiih yibidy, ki i bwiitut “kujimbakany myand yibiih yivul” yidyobw balong.

15. Bilondeshel Biin Kolos 3:13, tut bikal bakat bikasakan biin-kweet, i biny bitwiikal mwa kulong?

¹⁵ Bikaam lukat lwiitut kudy biin-kweet lwiikal lukasakan bwiitut kwiibafiil lus hadyobw biitulongel myand yibiih ning iikaleby bimweek neey i bikasakan menmen. (Bal Biin Kolos 3:13.) Hatufwiifwiil bakwaabw lus, tuleeleej neey tudy ni lukat lukasakan ni tudy bakat kusangeej Yehow. I biny bikwaabw bidy mwa kwiitwambulwiish bwiitut kufwiil bakwaabw lus bwa bibiih bidyobw balong?

16-17. I biny bikwaabw bidy mwa kwiitwambulwiish bwa kuvulamin bubiih bukeeh budy bakwaabw balong? Twaal cileejeeI. (Tal cikwaabw cifwaatul.)

¹⁶ Iikal wiimanyin teng ha bilengel bidy biin-kweet baan-balum ni baan bakaj balong hamut a kwiimanyin teng a bibiih byaabab. Teet kwiifwanyikij bu neey udy ku Hwiil ni haakaabumw ni cisumbw cya biin-kweet baan-balum ni baan-bakaj Nuhiihicish ciisang cilengel ni ku bulekel kwa Hwiil, ukwakwaat fotoh ni cisumbw cya baat boos. Kabidy, wiiyiiy kukwaat cikwaabw fotoh yibidy bwaal fotoh a kuuhal kiinoh bend muhatuk bilengel. Kaabaak udy ni fotoh yisat. Ki mu umw wa ku fotoh aay, utaatal neey mwiin-kweet kaahand i mukang ha hal. I biny biiwiiyiiy kulong ni fotoh aaw? Umukuukuhul bwaal udy ni fotoh yikwaabw yibidy mudy baat boos biikalomw, ni mwiin-kweet aaw mwiikalomw byend, boos bamweemweet.

¹⁷ Tudy mwa kufwanyikij fotoh yitulaalam mu byaamw biitut ni biit bitudy balam bwa kuvuluk myand kaahand. Tudyaakal tuvuluk myand yilengel ya mu biisang bituhiihitij diib ni biin-kweet. Ki bidy mwa kumweek neey mu cyumw cya ku biisang eeby, mwiin-kweet mwaan-mulum eecy mwaan-mukaj uleeleeb eecy uloolong bwaal kaahand bukiish bwiitusangeej. Bikaam tulong biny ni bwaal butudy balam aabw? Bikaam twiibukuhul mu meej teng mutwaakady bakuhul fotoh umw a yitwaakady bakwaat. (Tus. 19:11; Ef. 4:32) Tudy mwa kukuhul mu meej bubiih bukeeh budy mwiin-kweet mwiitulongel bwaal tudy bavuluk biisang bilengel bitudy bahitij diib ni mwiin-kweet aaw. Yineey i myand ya kuvuluk yitudy mwa kulam ni kukat bikasakan.

BWABINY KWIIKAL NI LUKAT KUDY NI BUSEEB LEELOOW

18. I myand kaay yitam habitaatal lukat yitubakontonon mu ciin bwaal eecy?

¹⁸ Bwabiny bikaam twiikal ni lukat lukasakan kudy muut ni mukwaabw? Teng mutubaaman kukontonon, tubaatal hatuleeleej biin-kweet baan-balum ni baan-bakaj lukat, tuleeleej neey tudy bakat Yehow. I mushind kaay utudy mwa kuleej biin Krist neet lukat? Mushind utudy mwa kulong nook, i kwiibakashish ku micim. Twiiyiiy kwiikal bakumban bwa kutungunuk ni ‘kukashishangan ku micim’ tut biikal ni lus. I mushind kaay utudy mwa kutungunuk ni kukatangan bikasakan muut ni mukwaabw? Hatuloolong mwiitut moos bwa kufwiil bakwaabw lus bwa bilem bidyobw balong.

19. Bwanbiny i bya buseeb menmen leeloow bwa kukatangan muut ni mukwaabw?

¹⁹ Bwaabiny kwiikal ni lukat kudy ni buseeb leeloow? Tal kabingil kady mupostol Pyeel mutwaal: “Bulekel bwa biit byoos bukaady habwiih. Nook, . . . katanganaay bikasakan muut ni mukwaabw.” (1 Pyeel. 4:7, 8) Bu mudy bulekel bwa bulongolody bubiih oobw bufweej habwiih menmen, i biny bidy mwa kwiitufikil? Haakady Yeez wiisamb ni biiyij bindiy, wiibambil kal neey: “Kabiish biiy kwiinutal mu diis bwa hamut ha mim.” (Mat. 24:9) Bwa kukasakeen lukin oolw, bikaam tushaal mu kaacyumw. Tut balong nook, Sataan wiiyiiy kukaakal bwa kwiitukabulul, bwaal tut boos tudy baswiikakan kudy lukat—‘lwiitukwaakwanjok bwiitut kwiikal baswiikakan bilengel.’—Kolos. 3:14; Fili. 2:1, 2.