OMWATSI W’ERIGHA 20
Eryuwania Emisabe Yethu
“Mumubwire amalighe wenyu wosi.”—ESY. 62:8.
OLHWIMBO 45 Amalengekania w’Omuthima Waghe
EBIKENDI KANIBWAKOa
Mughulhu wosi thwangana hikira Yehova omwa musabe n’erimusaba obusondoli omwa ngebe yethu yosi (Lebaya enungu 1)
1. Ni kyahi ekya Yehova akabugha athi abaramya biwe ibakolha? (Lebaya n’ekisasani.)
NINDI oyo thwanga saba omughulhu thukayithagha erihumulikanibwa n’obusondoli? Thunasi eky’erisubirya okwa kibulyo ekyo. Thwanganahikira Yehova Nyamuhanga omwa musabe. Yehova akabugha athi ithwakolha ekyo. Anzire ithwasaba mughulhu wosi—erisaba “butsira eriumbya.” (1 Tes. 5:17) Thuwithe obwiranda bw’erimuhikira omwa musabe n’erimusaba obusondoli omwa ngebe yethu yosi. (Emi. 3:5, 6) Kundi iyo ni Nyamuhanga omwenge, Yehova syalihiraho olhubibi bikahika okwa mirundi eyo thwanga musabiramo.
2. Thukendi kania okuki omo mwatsi ono?
2 Thukalhangira ekihembo ky’omusabe mwa ky’obughuli. Nomwabine, busana n’ebyosi ebyo thukakolha, ikyangana thukalira eribana endambi y’erisaba. Kandi thwanganayowa ithutholere eryuwania emisabe yethu. Eky’obutseme, thwangana bana erihumulikanibwa lingyi n’obusondoli bungyi omwa Amasako. Omo mwatsi ono, thukendi lebya nga thwanga hiraho thuthi endambi y’erisaba omw’ilebya eky’erileberyako kya Yesu. Kandi thukendi lebya ngoku thwang’uwania emisabe yethu omw’ikania okwa bindu bikulhu-bikulhu bithano.
YESU MWAHIRAHO ENDAMBI Y’ERISABA
3. Yesu abya iniabir’ighaki okwa musabe?
3 Yesu abya inianasi ngoku Yehova akalhangira omusabe mwa w’obughuli. Kera Yesu athali asa okwa kihugho, mwalhangira Thatha wiwe akasubirya emisabe y’abalhume n’abakali abathaleghulha. Ng’eky’erileberyako, Yesu abya inianeho Thatha wiwe akasubirya emisabe eyikalhua okwa muthima eya Hana, Dawudi, Eliya, n’abandi bangyi. (1 Sam. 1:10, 11, 20; 1 Bam. 19:4-6; Esy. 32:5) Kwesi ky’ekyaleka Yesu iniakangirirya abigha biwe athi basabe mughulhu wosi kandi ibanasikire!—Mt. 7:7-11.
4. Thuk’ighaki okwa misabe ya Yesu?
4 Erilhabira omwa misabe yiwe oku Yehova, Yesu mwahiriraho abigha biwe eky’erileberyako ekyo bangakwama. Omw’ithulira liwe lyosi, Yesu iniakasaba mughulhu wosi. Mwabya w’erihiraho endambi y’erisabiramo kundi mughulhu wosi iniakabya bbize kandi inianathimbirweko bandu bangyi. (Mk. 6:31, 45, 46) Iniakabuka omwa ngyakya-ngyakya nuku abane endambi y’erisaba iyuwene. (Mk. 1:35) Buthuku bughuma, mwaghunza erithumbi lyosi inianemusaba athali akolha erithwamu likulhu. (Lk. 6:12, 13) Kandi Yesu mwasaba ngendo nyingyi omw’ithumbi athali aholha anemulengekania okw’ibughirira ekitsweka ekikalire kutsibu eky’okwa lhukwamirwa lhwiwe olhw’okwa kihugho.—Mt. 26:39, 42, 44.
5. Thwanga gherererya thuthi Yesu bikahika okw’isaba?
5 Eky’erileberyako kya Yesu kikathweghesaya ngoku nomuthwangabya ithuli bbize bungahi, thutholere ithwahiraho endambi y’erisaba. Nga Yesu, thwangana yithagha erihiraho endambi y’erisaba—eribuka omwa ngyakya-ngyakya kutse eritsuka erisaba imuthwakesya. Thwamakolha ekyo, thukakanganaya Yehova ku thukasima ekihembo ky’embaghane eki. Mwali wethu ya Lynne akibuka ngoku ayowa akaminya ngoku omusabe ni lhusunzo. Akabugha athi, “Nabere ingaminya ngoku nanganasaba Yehova okwa ndambi yosi-yosi, mukyaleka ingamulhangira ng’Omunywani waghe w’ahakuhi n’erianza eryuwania emisabe yaghe.” Ahathe erithika-thika, abangyi omw’ithwe bakayowa bathya. Neryo thulebaye ebindu bikulhu-bikulhu bithano ebyo thwangahira omwa misabe yethu.
EBINDU BIKULHU-BIKULHU BITHANO EBYO THWANGA HIRA OMWA MISABE
6. Ngoku kiri omwa Eribisulirwa 4:10, 11, Yehova atholere iniahebwaki?
6 Pipa Yehova. Omwa syonzoli esikaswekaya, omukwenda Yoane mwalhangira abakulhu 24 ibanemuramya Yehova omwa lhubulha. Mubapipa Nyamuhanga, eriligha ngoku yutholere “eribana olhukengerwa, n’erisikya, n’obuthoki.” (Soma Eribisulirwa 4:10, 11.) Abamalaika abathaleghulha nabu bawithe esyonzumwa nyingyi esyanga leka ibapipa Yehova n’erimusikya. Bane nayu elhubulha kandi babirimuminya ndeke. Bakalhangira emibere yiwe yikabisulhwa omwa by’akakolha. Bakabya bakalhangira ebyo Yehova akakolha, kikabahira mw’omuhwa w’erimupipa.—Yobu 38:4-7.
7. Ni byahi ebyanga leka ithwapipa Yehova?
7 Nethu thwanzire ithwapipa Yehova omwa misabe yethu, erikangania ebikaleka ithwamwanza n’erimusima. Wukasoma n’eriyeghesya e Biblia, lengaho erilhangira emibere eyikakutsemesaya kutsibu eyo Yehova abirikangania. (Yobu 37:23; Abar. 11:33) Neryo bwira Yehova nga wukayowa wuthi okwa mibere yiwe eyo. Kandi thwangana pipa Yehova busana n’erithuwathikya, ithwe n’erihiika lyethu lyosi ly’obunyakirimu. Mughulhu wosi akathutsomana n’erithutheya.—1 Sam. 1:27; 2:1, 2.
8. Ni nzumwa nga syahi esyanga leka ithwasima Yehova? (1 Abanya Tesalonika 5:18)
8 Sima Yehova. Thuwithe nzumwa nyingyi esyangaleka ithwasima Yehova omwa musabe. (Soma 1 Abanya Tesalonika 5:18.) Thwangana musima busana n’ekibuya kyosi-kyosi ekya thuwithe; kundi nibya, obuli kihembo kibuya kikalhua okw’iyo. (Yak. 1:17) Ng’eky’erileberyako, thwangana kangania erisima lyethu busana n’obubuya bw’ekihugho n’ebihangikwa ebikaswekaya. Kandi thwanganaha ewasingya busana n’engebe yethu, efamile yethu, abanywani, n’amaha wethu. Kandi thwanzire ithwasima Yehova busana n’erithulighira erithunga obunywani bw’obughuli nayu.
9. Busana naki thukayithagha erikulha-kulhania omubere w’erisima Yehova?
9 Thwangana yithagha erihiraho akaghalha kanene nuku thulengekanaye okwa syonzumwa esyangaleka ithwe ahabwethu ithwabya b’erisima Yehova. Thuli omwa kihugho ekithe mw’erisima. Mughulhu mungyi abandu bakahira amalengekania w’okwa bya banzire omwakanya k’erihiragho okwa bya banga kolha erikangania ku bakasima ebyo bawithe. Thwamabya n’amalengekania awali ng’ayo, emisabe yethu iyikendibya y’erisabirirya. Eriyitheya okw’ekyo, thutholere ithwalholha embere erikulha-kulhania omubere w’erisima Yehova busana n’ebyosi ebyo akathukolera kandi ithwakanganiagho.—Lk. 6:45.
Erikangania ku thukasima Yehova kyangana leka ithwayiyinia (Lebaya enungu 10)
10. Erisima mulyawathikya lithi mwali wethu mughuma eriyiyinia? (Lebaya n’ekisasani.)
10 Omubere w’erisima anganaleka ithwaghumira ebitsibu. Thulebaye ekyalholirweko kya Kyung-sook, ekiri omwa AKaleberyo ak’Okwokubanza 15, 2015. Mubamupipamo ekansa ey’ebihaha. Mwabugha athi: “Munahononoka ingowa omwatsi w’obulhwere oyu. Munayowa nganamabiriherya obuli kindu, kandi munakwa obuba bunene.” Ni kyahi ekyamuwathikaya erighuma? Mwabugha athi obuli kiro athali akesya, iniakaghenda okwa lhuthwe lhw’enyumba yabu y’ekayina n’eriyasaba omwa mulenge owakowika busana n’ebindu bithano eby’amasima ekiro ekyo. Eki ikikaleka iniaghuma kandi ikyamuhira mw’omuhwa w’erikangania kw’anzire Yehova. Mwayilhangirira ngoku Yehova akawathikaya abaghombe biwe abathaleghulha bakabana ebitsibu, kandi mwaminya ngoku thuwithe emighisa minene omwa ngebe kwilhaba ebitsibu ebya thukabana. Nga Kyung-sook, thuwithe nzumwa nyingyi esyanga leka ithwasima Yehova, nomuthwangabya ithune omwa bitsibu. Erikangania ku thukamusima erilhabira omwa musabe kyanganaleka ithwayiyinia n’eribya ithune n’amalengekania awatholere.
11. Ni kyahi ekyaleka abigha ba Yesu ibayithagha obuthubaha Yesu alisubire elhubulha?
11 Saba Yehova akuhe obuthubaha omw’ithulira. Athali asuba elhubulha, Yesu mw’ibukya abigha biwe olhukwamirwa lhwabu olhw’eriha obwema obumuhambireko “e Yerusalemu n’omo Yudea yosi, ne Samaria, n’erihika oko nduli-nduli sy’ekihugho.” (Emib. 1:8; Lk. 24:46-48) Buthuku buke enyuma waho, abathabali Abayuda mubahamba abakwenda, ya Petero na Yoane, n’eribaletha omw’Ibughiro n’eribwira abalhume abathaleghulha abo bathi baleke erithulira kandi nibya mubabahayira. (Emib. 4:18, 21) Petero na Yoane mubakolhaki?
12. Ngoku kiri omwa Emibiri 4:29, 31, abigha mubakolhaki?
12 Omw’isubirya abasondoli b’edini y’Ekiyuda ababahayira, Petero na Yoane mubabugha bathi: “Inywe mubye batsweri nga linathunganene omwa meso wa Nyamuhanga eribowa, kutse eriowa Nyamuhanga. Kusangwa sithwangathoka erireka eribugha ebyo thwabirilholhako n’ebyo thwabiriowa.” (Emib. 4:19, 20) Petero na Yoane babere babiriboholhwa, abigha mubasumba emirenge yabu oku Yehova omwa musabe owakahira omuwatho okw’ikolha erisonda liwe. Mubasaba bathi: “Wuleke abaghombe bawu babughe ekinywe kyawu n’erithendyubaha lyosi.” Yehova mwasubirya omusabe owakalhua okwa muthima oyo.—Soma Emibiri 4:29, 31.
13. Eky’erileberyako kya Jin-hyuk kyanga thweghesyaki?
13 Ab’obuthoki bamabugha bathi thuleke erithulira, thwangana gherererya abigha omw’ilholha embere erithulira. Thulebaye eky’erileberyako kya mughalha wethu Jin-hyuk, oyuwahirawa omwa ngomo busana n’erighana eringira omwa mahe. Omwa ngomo, mwahebwa omubiiri w’eritsomana abanya-ngomo abo obuli mughuma abya omwa kisenge ky’engomo mw’eyuwene, aliwe isyali lighirawa erikania nabu okwa yindi myatsi eyithahambene n’omubiiri oyo, imwamuli e Biblia. Mwasaba obuthubaha bw’erithulira omwa menge akaghisa kakabanika. (Emib. 5:29) Akabugha athi: “Yehova mwasubirya emisabe yaghe omw’inyiha obuthubaha n’amenge w’eritsukisya abigha bangyi be Biblia okwa buli lhukyo lhw’engomo omw’ikolesya esyodakika ithano-ithano. Neryo omwa kiro, iningahandika esyobaruha esyo ngend’iha abanya-ngomo abo ekiro ekikakwamako.” Nethu thwangana yikethere ngoku Yehova akendi thuwathikya eribughirira omubiiri wethu w’erithulira. Nga Jin-hyuk, thwangana saba obuthubaha n’amenge.
14. Ni kyahi ekyanga thuwathikya omughulhu thuwithe ebitsibu? (Esyonyimbo 37:3, 5)
14 Saba Yehova y’obuwathikya bw’erighumira ebitsibu. Abangyi omw’ithwe banemwaghalhwa busana n’ebitsibu by’amaghalha kutse eby’omw’iyowa, eriholerwa, ebitsibu by’amaka, eriendereribwa, kutse ekindi kitsibu. Kandi ebindu ng’ekihunzo n’esyonyuhi byabirileka ikyongera erikalha erighumira ebingyi by’okwa bitsibu ebi. Bwira Yehova y’ebyosi ebiri okwa muthima. Mubwire okwa mibere eya wulimo ngoku wangana bwire omunywani wawu w’ahakuhi. Yikethere ngoku Yehova akendi ‘kuwathikya.’—Soma Esyonyimbo 37:3, 5.
15. Omusabe angathuwathikya athi ‘eriyiyinia omo malighe’? Iha eky’erileberyako.
15 Eriyitsingirira omw’isaba likendi thuwathikya ‘eriyiyinia omo malighe.’ (Abar. 12:12) Yehova anasi ebyo baramya biwe banemulhabamo—“akowa erilhaka lyabu.” (Esy. 145:18, 19) Omutemburi ow’emyaka 29 ya Kristie mwayilhangirira ekyo. Isyayitsulirye mwatsuka eribana ebitsibu by’amaghalha ebikalire. Busana n’ekyo, mwabya omw’ituntura ery’olhughumerere. Enyuma waho, mwaminya ngoku mama wiwe abiripimwamo obulhwere obukalire. Kristie akabugha athi: “Munasaba Yehova ya kutsibu indi anyihe akaghalha ako ngayithagha obuli kiro. Munalengaho eryamakirira endegheka eyuwene ey’obunyakirimu omw’ihindana n’eriyeghesya.” Akongerako athi: “Erisaba mulyangwathikya erilhaba omwa mibere eyikalire kutsibu. Munaminya ngoku mughulhu wosi Yehova akabya inianeho, kandi amalengekania ayo mwanyihumulikania kutsibu. Nomwabine indi ebitsibu by’amaghalha waghe mubithahwaho aho naho, Yehova mwasubirya emisabe yaghe omw’inyiha obuholho n’erithekana.” Ambi isithwibirirawa ngoku “Omukama anasi erilhamya abakamukenga okw’irengwako.”—2 Pet. 2:9.
Erirwanisya erilengwako, (1) saba Yehova y’obuwathikya, (2) kolha erikwamana n’emisabe yawu, na (3) ghumaya obughuma bwawu na Yehova (Lebaya enungu 16-17)
16. Busana naki thukayithagha obuwathikya bwa Yehova erithoka erirwanisya erilengwako?
16 Saba Yehova y’obuwathikya bw’erirwanisya erilengwako. Ithwe ng’abandu abathahikene, thukabya ithunemurwanisya erilengwako ly’erikolha ekithahikire. Sitani anemukolha ekyosi-kyosi ekyo angathoka erikalya amalhwa ayo. Enzira nguma eyo akalengaho eritsandiryamo amalengekania wethu ly’erilhabira omw’iyitsemesya erithuwene. Eriyitsemesya eriri ng’eryo lyangana thusulya mw’amalengekania awathuwene—amalengekania awanga thutsandya n’erithukolya okwa kibi ekikalire.—Mk. 7:21-23; Yak. 1:14, 15.
17. Thwanga kolha thuthi erikwamana n’erisaba lyethu ery’eriyihighulha okw’irengwako? (Lebaya n’ekisasani.)
17 Thukayithagha obuwathikya bwa Yehova thwamabya b’erisingura erilengwako ery’erikolha ekithahikire. Yesu mwahira omwa musabe w’eky’erileberyako mw’erilemba-lemba lino: “Siwuthwingiraye omw’irengwako, nikwa wuthulhamaye oko mubi.” (Mt. 6:13) Yehova anzire iniathuwathikya, aliwe thutholere ithwamusaba obuwathikya. Kandi thutholere ithwakolha erikwamana n’emisabe yethu. Thwanganayira ekya thukakolha eriyihighulha okwa byangaleka ithwasamo amalengekania awathuwene kandi awakanyirire omwa kihugho kya Sitani. (Esy. 97:10) Thwangan’usulya omwa bulengekania bwethu mw’amalengekania awuwene omw’isoma n’eriyeghesya e Biblia. Erihindana n’erisangira omw’ithulira nabyo byangana theya amalengekania wethu. Yehova nayu akayilhagha athi syendi leka thukalengwako kwilhaba ngoku thwanga thoka.—1 Kor. 10:12, 13.
18. Bikahika okw’isaba, ithwe bosi thutholere ithwakolhaki?
18 Kwilhaba kera, obuli mughuma w’okw’ithwe atholere iniasaba nuku asighale muthaleghulha oku Yehova omwa biro by’enyuma-nyuma bino ebikalire. Obuli kiro hiraho endambi y’erisabiramo erilhua okwa muthima. Yehova anzire ‘ithwamubwira amalighe wethu wosi’ omwa musabe. (Esy. 62:8) Pipa Yehova n’erimusima busana n’ebyosi eby’akakolha. Musabe akuwathikaye eribya muthubaha omw’ithulira. Mulembe-lembe wuthi akuwathikaye erirwanisya ekitsibu ekyosi-kyosi n’erilengwako lyosi-lyosi eryo wangabya iwunemulhabamo. Isiwalighira ekyosi-kyosi kutse owosi-wosi erikulemesya erisaba Yehova mughulhu wosi. Aliwe ibbwa Yehova akasubiraya athi emisabe yethu? Thukendi syakania okwa kibulyo kikulhu ekyo omo mwatsi owakakwamako.
OLHWIMBO 42 Omusabe w’Omughombe wa Nyamuhanga
a Thwanzire emisabe yethu iyabya ng’esyo baruha esikalhua okwa muthima esyo thukathumira omunywani mwanzwa. Nomwabine, mughulhu wosi si kyolho eribana endambi y’erisaba. Kandi kyangana kalha eriminya ebyo thwangahira omwa musabe. Omwatsi ono akendi kania okwa myatsi mikulhu-mikulhu eyi.