Kubala

35 Yehoba waambijile Mosesa mu biselebwa bya Moabu byajinga ku Yodano+ kwipi na Yeliko amba: 2 “Kambizha bena Isalela amba bakape bena Levi mizhi ya kwikalamo kufuma mu bya buswanyi byabo,+ kabiji bakape bena Levi mapunzha a kujishishamo banyama azhokoloka yoyo mizhi.+ 3 Bakekalenga mu yoyo mizhi ne mapunzha abo akekala a kujishishamo bilelwa byabo ne kulaminamo banyama babo bakwabo bonse. 4 Kabiji mapunzha a kujishishamo banyama a yoyo mizhi yo mukapa bena Levi akekale makyubichi* 1,000 kufuma ku nsakwa, kuzhokoloka muzhi yense. 5 Kabiji mukapime pangye ya muzhi ku musela makyubichi 2,000, ku kabeta ka ku bulenge makyubichi 2,000, ku muzhika makyubichi 2,000 ne ku kabeta ka ku buyeke makyubichi 2,000 ne muzhi mwine saka aji pakachi. Ano o akekala mapunzha a kujishishamo banyama a mizhi yabo.

6 “Mizhi yo mukapa bena Levi ikekala mizhi 6 ya kufyamamo,+ mukeipane kuba’mba muntu waipayañana akanyemenemo+ kabiji mukanungepo ne mizhi ikwabo 42. 7 Mizhi yonse yo mukapa bena Levi ikekala 48, pamo na mapunzha ayo a kujishishamo banyama.+ 8 Mizhi yo mukebapa ikafuma mu mapunzha a bena Isalela.+ Mu jibumba muji bantu bavula mukafumyemo yavula, ne mu jibumba muji bantu bacheche mukafumyemo icheche.+ Jibumba jonse jikapanepo mizhi yajo imo ku bena Levi kwesakana na buswanyi bo bakatambula.”

9 Yehoba watwajijile kwambila Mosesa amba: 10 “Buula bena Isalela amba, ‘Musakwabuka Yodano ne kutwela mu kyalo kya Kenana.+ 11 Mukesajile mizhi ikemupelela kwikala mizhi ya kufyamamo mwakonsha kunyemena muntu waipaya mukwabo* kya mapuso.+ 12 Ino mizhi ikekala ya kufyamamo anweba kuchina’mba muntu ushinkanya na mambo a mashi+ wakeya kwipaya muntu waipayañana saka bakyangye kumuchibila mambo ku kije.+ 13 Mizhi itanu na umo yo mukasala, yo ikekala ya kufyamamo. 14 Mukapane mizhi isatu kuno ku bushiya bwa Yodano+ ne mizhi ikwabo isatu ikekale mu kyalo kya Kenana+ kwikala mizhi ya kufyamamo. 15 Ino mizhi itanu na umo, ikekala ya kufyamamo bena Isalela, muntu wafuma mu kyalo kingi ne muntu ye bakekala nanji,+ kabiji mo mukanyemenanga muntu waipaya mukwabo* kya mapuso.+

16 “‘Pakuba umvwe muntu wapuma mukwabo na kyela ne kufwa wafwa, ko kuba’mba awo muntu mbanzhi. Awo mbanzhi bafwainwa kumwipaya.+ 17 Kabiji umvwe muntu waasa mukwabo jibwe jakonsha kwipayañana ne kufwa wafwa, ko kuba’mba awo muntu mbanzhi. Awo mbanzhi bafwainwa kumwipaya. 18 Kabiji umvwe muntu wapuma mukwabo na kichi kyakonsha kwipayañana ne kufwa wafwa, ko kuba’mba awo muntu mbanzhi. Awo mbanzhi bafwainwa kumwipaya.

19 “‘Muntu ushinkanya na mambo a mashi ye ukepaya yewo mbanzhi. Umvwe wamutaana, aye yenka ye ukamwipaya. 20 Umvwe wamushinjikile na mambo a kumushikwa ne aye wafwa nangwa wamwashile kintu na mambo a kumulangulukila byatama,*+ 21 nangwa wamupumine na kuboko kwanji na mambo a kumushikwa ne kufwa wafwa, awo muntu wamupumine bakamwipaye. Awo muntu mbanzhi. Ushinkanya na mambo a mashi akepaye yewo mbanzhi umvwe wamutaana.

22 “‘Pakuba umvwe kyajingatu kya mapuso, kabiji kechi wamushinjikile na mambo a kumushikwa ne, nangwa kechi wamwashile kintu na mambo a kumulangulukila byatama* ne,+ 23 nangwa umvwe wamwashile jibwe kwa kubula kumumona kabiji kechi wajinga mulwanyi wanji nangwa kechi wakebeletu kumukozha ne, ne yewo muntu wafwa, 24 jibumba jikebachibile mambo bonse babiji, awo wakozhañana ne muntu ushinkanya na mambo a mashi monka mwayila ano malamuna.+ 25 Jibumba jikapokolole muntu waipayañene ku muntu ushinkanya na mambo a mashi kabiji bakamubwezhe ku muzhi wanji wa kufyamamo ko anyemejile. Ne aye akekale monka posotu ñanga mwine mukatampe ye bashingile manyi azhila akafwe.+

26 “‘Bino umvwe muntu waipayañene walupukila pangye ya muzhi wa kufyamamo mo anyemejile, 27 kabiji muntu ushinkanya na mambo a mashi wamutaana pangye ya muzhi wanji wa kufyamamo ne kumwipaya, ko kuba’mba kechi ukekala na mambo a mashi ne. 28 Mambo wafwainwa kwikala mu muzhi wanji wa kufyamamo posotu ñanga mwine mukatampe wafwa. Bino umvwe ñanga mwine mukatampe wafwa, awo muntu waipayañene wakonsha kubwela ku mpunzha yanji.+ 29 Ano o akekala malamuna o mukalondelanga pa kuchiba mambo kufikatu ne ku bisemi byenu bya kulutwe mu mapunzha enu onse mo mukekalanga.

30 “‘Muntu* yense ukepaya mukwabo umvwe bamushinawina ku* bakamonyi, bafwainwa kumwipaya mambo ye mbanzhi;+ bino kafwako muntu* ye bakepaya umvwe bamushinawina ku kamonyi+ umotu ne. 31 Mbanzhi ye bazhachisha amba afwe, kechi mwafwainwa kukuula bumi* bwanji ne, mambo wafwainwa kufwa.+ 32 Kabiji kechi mwafwainwa kukuula muntu wanyemena mu muzhi wa kufyamamo ne, nangwa kumuswisha kubwela ku mpunzha yanji ya kwikalamo ñanga mwine mukatampe saka akyangye kufwa ne.

33 “‘Kabiji kechi mukazhilulule kyalo kyo mukekalamo ne, mambo mashi o azhilulula kyalo.+ Kabiji kechi kukekala mashi a kufuchilako mashi o bakechila mu kyalo ne, kanatu mashi a yenkawa wiechijile.+ 34 Kabiji kechi mwafwainwa kuzhilulula kyalo kyo mwikalamo, mo mbena kwikala ne; mambo amiwa Yehoba, mbena kwikala mu bena Isalela.’”+