Yona
4 Bino kino kintu kyamufichishe bingi ku muchima Yona, kabiji wazhingijile bingi. 2 Kepo alombele kwi Yehoba amba: “Anweba Yehoba, nanchi kino kechi kyo kyo nalangulukilengapo byo najinga mu kyalo kyami nenyi? O ene mambo o nakebejilenga kunyemena ku Tashishi;+ mambo nayukile namba mwi Lesa wa kifyele* kabiji wa lusa, ubanda kuzhingila kabiji wavula butemwe bubula kwaluka,+ umvwa bulanda pa bya malwa. 3 Pano anweba Yehoba, onaunai bumi* bwami, mambo kyangwamina kufwa kukila kwikala na bumi.”+
4 Yehoba wamwipwizhe’mba: “Nanchi kijitu bulongo byo wazhingila nyi?”
5 Kepo Yona afumine mu muzhi ne kukekala ku musela wa muzhi. Watungile ka kimpampa ne kwikala monka mu kimfutele kuba’mba amone kisakumwekela muzhi.+ 6 Kabiji Yehoba wameneshe kijimbwa kitabakana nobe muzhimba wa kituwo* ne kwikikomesha pajinga Yona, kuba’mba kilenge kimfutele pa mutwe wanji ne kukepeshako bulanda bo ajinga nabo. Kabiji Yona watemenwe bingi na mambo a kino kijimbwa.
7 Bino juba ja londejilepo pa kukya lukelo, Lesa wa kine watumine kilongolo, kabiji kyajiile kijimbwa ne kuleela kyaleelele. 8 Juba byo jatendekele kusama, Lesa watumine ne mwela wa kyuya wa ku musela, kabiji mute wasokelenga Yona pa mutwe, ne aye wapungijile. Kabiji walombelenga amba afwe,* ne kwamba’mba, “Kyangwamina kufwa kukila kwikala na bumi.”+
9 Lesa waipwizhe Yona amba: “Nanchi kijitu bulongo byo wazhingila na mambo a kijimbwa nyi?”+
Aye wakumbwile’mba: “Ee, kijitu bulongo byo nazhingila, nazhingila kya kuba mbena kukeba ne kufwa.” 10 Bino Yehoba wamwambijile’mba: “Waubila lusa kijimbwa kyo wabujile kujimba kabiji kyo wabujile kukomesha; kyakomene bufuku bumo ne konaika bufuku bukwabo. 11 Nanchi ne amiwa kechi nafwainwa kubila lusa Ninevwa muzhi mukatampe,+ muji bantu kukila 120,000 babula kuyuka kyawama ne kyatama,* ne banyama babo bavula nenyi?”+